Sunday, December 16, 2007

عيد أضحى سعيد عليكم

كل سنه وأنتم طيبين وعيد سعيد عليكم كلكم
زى كل عيد لازم أتكلم شوية معاكم قبل ما نعيد كده وقبل ما أسافر سفرية كل عيد لبلدى علشان اللمة بقى والزيارات وزى ما أنتم شايفين الخروف اللذيذ اللى فوق ده مكتوب عليه أيه وبيوصيكم بأيه

قبل العيد أسأل عن الأهل والأصدقاء قبل أن تسأل عن الطعام

وده برضة اللى عايزة أتكلم فيه العيد أربع أيام ياريت يومين منهم يكونوا لزيارات الأهل والأصحاب والجيران والمرضى والأيتام ودور المسنين والحاجات اللى محدش بيعملها فى الأيام دى الا نادر جدا وهايتبقى ليكم يومين أتفسحوا زى ما أنتم عايزين فيهم مع أنى شايفة أن أحسن فسحة هى زيارة الناس وليها ثواب كبير جدا زى ما أنتوا عارفين
صلة الرحم هاه فاكرينها ولا أيه النظام

ياريت ماننساش صلة الرحم اللى هنتسأل عنها يوم القيامة مش عايزة أظهر بمظهر الواعظة وأعمل نفسى ياما هنا وياما هناك بس عايزة أقول لكم حاجة وياريت كل أسرة تربى ولادها عليها أنا من صغرى من يوم ما أتولدت وأنا عايشة فى مدينة بس أصلى واصل أهلى بلد أرياف أهلى عودونى من صغرى أننا كل عيد لازم نروح بلدنا ونزور الناس وأن أهم حاجة فى العيد قبل الأكل واللبس زيارة الناس والأهل والأصحاب والمرضى وكل حد نعرفه وأتربيت على كده من صغرى يمكن وأنا صغيرة قوى ماكانتش فاهمة معنى صلة الرحم كل اللى كنت بفكر فيه أنى هسافر بلدى وأشوف ناس كتير أزورهم ويزورنى والعب وخلاص لكن لما كبرت عرفت قيمة اللى أهلى ربونى عليه وأن ثواب ده كبير قوى فياريت كل واحد وواحدة يربوا ولادهم على كده
هو المفروض طبعا الناس تزور بعضها طول السنه بس نظرا للمشاغل الحياتية عند كل الناس لازم ننتهز فرصة الأعياد والأجازات ونعوض اللى ما بنعملوش طول السنه

فيه حاجة يعنى مضايقانى قوى من الناس مش عارفة أيه اللى بيحصل لهم فى عيد الأضحى كأنهم كانوا صايمين طول السنه وبينتهزوا الفرصة ويفضلوا ياكلوا لحمه كتير بطريقة مش طبيعية فيه ناس بجد بتفطر وتتغدى وتتعشى أصناف كتيرة من اللحمه
هو مش كفاية الغداء ولا أيه نظامكم
بجد حرام أنا لو عملت كده فى يوم ممكن أموت
فيه أيه براحة شوية على نفسكم الدنيا مش هتطير

-------------------------------
أيه تانى يا بوس بوس اه عدد جديد من مجلة نفسنا روحوا شوفوه وأستنوا مفاجأتنا العدد الجاى
العدد السابع

--------------------------------
خدوا بقى شوية رسايل الموبايل أفتكروا بيها أصحابكم وقرايبكم علشان الناس اللى ما بتكلمش بعض طول السنه وماعندهاش وقت خدوا شوية الرسايل دى

ناس تنتظر عيد الفطر وناس تنتظر عيد الأضحى وأنا أنتظر نجاحك كل لحظة

يارب عيد سعيد علينا وباب الجنه مفتوح لينا وملك الرحمه بينادى علينا والنبى مبتسم ورب العرش راضى علينا

رن يا موبايل وابعت مراسيل وعلى الحلو ميل وقول له عيد سعيد عليك يا جميل

أخاف الناس تسبقنى تهنى قلبك الطيب أريدك دايما متهنى وأشوفك كل عيد طيب

المرسل : واحد من الناس المستقبل : اعز واغلى الناس النص : عيد سعيد عليكم

وياريت تفتكرونى بكام رسالة حلوة
-----------------
وكل سنه وأنتم طيبين مسلمين ومسيحين وعيد أضحى وعيد قيامه سعيد عليكم

Thursday, December 13, 2007

مشاكل ليلى

كان بداية كلامى فى مواضيع ليلى تاج أنا ليلى
ودلوقتى هتكلم فى حاجة تانية خاصة برضة بليلى وهيا قهر ليلى واللى بيتضمن حاجات كتير منها أستغلال ليلى والقسوة عليها والغيرة منها ومن نجاحها
على الرغم من كل التطور اللى موجود حوالينا وكل حاجة بتحصل وكل التقدم الا أن برضة لسة قهر ليلى موجود ولسة التفكير الذكورى موجود وعايش بينا وبيتحرك وبياكل وبيشرب
قهر أدم لحواء مازال موجود
أستغلال أدم لحواء ، القسوة ، الغيرة منها ومن نجاحها
تعمد الغاء شخصيتها وتضييع مستقبلها شىء بشع جدا بقى موجود بصورة كبيرة قوى
كتير بنلاقى فى حياتنا أسر كتير فيها بنات وولاد ونلاقيهم فرحانين قوى بالولد وبيعملوا له كل حاجة وما بيرفضوش له طلب وتكون كل حاجة متاحة له من سبل الراحة لحد الوقوف جمبه علشان يوصل لاعلى المراكز ويشجعوه على الألتحاق بحاجات كتير علشان يزود خبراته
ولكن تعالوا بقى نبص للبنت أيه اللى بيحصل معاها
مش مهم تدرس أيه أهو أى حاجة والسلام وأهلها مش مهتمين أصلا بيها وحتى لما تحب تدرس حاجة كويسة أو تكون أحسن أهلها بيرفضوا ده وبيحسسوها أنها مهما عملت كل ده مش مهم مهما درست حاجة كويسة ومهمة أو حاجة عادية مش فارقة كده كده أخرها فى بيت واحد هيتجوزها
لو حبت تنمى مواهبها فى أى حاجة تتقابل بسخرية كبيرة قوى من أهلها ومحدش يقف جمبها
القهر بيبدأ من البيت من الأب وبعدين الأم وبعدين الأخوات الولاد وبعد كده جوزها
وكل واحد أهله بيدربوه على كده من صغره على أنه الآمر الناهى وأنه يقعد يحط رجل على رجل وأخته تخدمه وهو مايشيلش كوباية حتى من مكانها وللأسف هو بيتربى على عادات غلط وبتكبر معاه لحد ما يتجوز وتتنقل سيطرته على مراته
بجد مش عارفة نعمل أيه فى التفكير الذكورى اللى مش عايز ينتهى ده
ملايين من البنات طموحها ومستقبلها بيضيع بسبب أهلها
وبسبب غيرة أخوها أو جوزها
للأسف مجتعمنا لسة ذكورى وقليل قوى لما نلاقى ولاد وشباب فاهمين طبيعة المعاملة الصح للطرف الآخر
أمتى هنتغير أمتى

Wednesday, November 21, 2007

كيف تنجح فى عملك بالتجربة العملية ؟

لكى تنجح فى عملك وتتجنب المشاكل عليك بأتباع الآتى :-0

1- أذا جاءت لك الفرصة لكى تعمل بمفردك وتكون مسؤل عن كل شىء لا تتردد ابدا وتقول أن العمل سوف يكون كثير عليك فراحتك النفسية أهم بكثير من كثرة العمل فعند أشتراك مجموعة فى قسم واحد فهذا باب للمشاكل وأتكال شخص على آخر فى العمل وغيرها من المشاكل الكثيرة
لذلك عندما تأتى لك الفرصة أنتهزها ولا تتركها تضيع منك وسوف يعينك الله على عملك

2- يجب أن تعمل بكل ضمير وأخلاص ولا تنظر لمن حولك ماذا يفعلون فأفعل أنت ما عليك من أعمال ولكن أحذرك أن تتهاون مع أى شخص مقصر لأنه لا يوجد أحد يقدر تضحيتك أو شهامتك فعند وجود شخص لا يعمل ويفعل مشاكل فمن حقك تقديم شكوى أو مذكرة فيه ولا تأخذك الرأفة لأنك سوف تخسر فى النهاية لأن هذا الشخص لا يستحق هذا وسوف يفعل لك الكثير من المشاكل وأنت لم تشكيه بدون سبب ولكن لوجود أسباب

3- يجب عليك عدم الحديث عن حياتك الشخصية مع زملاءك فى العمل لأن زملاء العمل غير الأصدقاء وطبعاهم تتغير حسب مصالحهم فلا تترك فرصة لأى شخص لأستغلال مشاكلك أو حياتك فى الشخصية فى العمل فالعمل عمل

4- الضمير ثم الضمير ثم الضمير فأنت تعمل من أجل راحة ضميرك وأرضاء الله بغض النظر عن أى مقابل تأخذه سواء كان مادى أو معنوى

5- أذا جاءت لك فرصة لتساعد زملاءك فى العمل لا تتردد ولكن لا تترك فرصة لأحد لكى يستغلك كن مخلصا وفيا ومساعدا لهم ولكن بأرادتك وليس رغما عنك

6- أجعل دائما سيرتك العطرة تسبقك فضميرك وحبك للجميع ومساعدة الآخرين يجعل سيرتك لها معنى جميل ولكن حذارى من الطيبة الزائدة عن الحد لأنها من الممكن أن تسبب لك مشاكل

كل هذه النصائح عن تجربة شخصية
فمع عملى بمفردى لمده عامان ونصف ومسؤليتى عن كل شىء كنت فى راحة كبيرة جدا ولم يشتكى منى أحد يوما ما ولم تحدث مشاكل بينى وبين أى شخص وكان الله يعيننى على عمل كان من المفروض أن يقوم به أثنين أو ثلاثة وكنت فى غاية السعادة والراحة التى لم يتخيلها أحد
ولكن مع نقلى وأشتراكى فى عمل مع أشخاص آخرين وعدم أكتمال عام معهم بدأت المشاكل تظهر والأستغلال ولم تفلح معهم شهامتى ولا أخلاقى ولا قيامى بعملى وعملهم أحيانا كثيرة ومع تهاونهم وفعل المشاكل معى كان فى يدى تقديم شكاوى أكثر من مرة فيهم وكان معى شهود ولكن أخذتنى الشهامة والرأفة بهم وفى النهاية وقعت أنا فى مشكلة كبيرة جدا وأتهمت ظلما بأشياء كثيرة
ولكن عندى يقين فى الله بحل هذه المشكلة
لذلك أقدم هذه النصائح لكم لكى لا تقعوا فيها فنحن فى زمن غريب لا يقدر أحد أى شىء

Friday, October 19, 2007

كلنا ليلى أو مع ليلى هيا هيا نفس النتيجة

لمعرفة التفاصيل أدخلوا على اللينك ده
بصراحة أنا عجبتنى جدا الفكرة وعجبنى التاج المعمول لها وقلت لازم أجاوبه وبتمنى ما أكونش اتأخرت
هل انتى سعيدة كفتاه فى مناحى حياتك؟
طبعا سعيدة بأنى فتاه جدا جدا
ومن ناحية كل مناحى الحياه المشكلة مش فيا أنا المشكلة فى المجتمع يعنى المجتمع فى أوقات كتير بيحاول يهمش دور الفتاه ويحسسها أنها مالهاش قيمة ودى مش مشكلتى دى مشكلتهم هما لأنهم مش عارفين قيمة وجود الفتاه

هل تحبين نفسك أم تتظاهرين بالقوة ؟
طبعا بحب نفسى بس مش لدرجة الأنانية علشان محدش يفهم غلط
أنا الحمد لله شايفة أنى قوية وبحاول كتير فى أوقات الضعف أظهر قوية حتى لو أنا ضعيفة جدا جدا بحاول ما أخليش اللى قدامى يحس بكده
هل تعرفين دورك فى الحياه أم تتسابقين وتلعبين أدورا مرسومة فقط ؟
دورى فى الحياه منقسم لعده أدوار منها دور الفتاه اللى هتكون بعد كده زوجة وأم وأكيد الدور ده لازم كل فتاه بتستعد له من صغرها علشان تقدر تعيشه على أكمل وجه
وكمان فيه دور غير دور الزوجة والأم دور الأخت والأبنه وده دور مهم قوى ولازم كل واحدة تقدر تعيشه وتعرفه صح لأن ده البداية فى حياتها قبل دورها كزوجة وأم
وبالنسبة لدورى فى باقى الحياه من شغل وغيره أكيد بحاوله أكون على قد المستوى وبحاوله أعيشه صح
ولو فعلا القدر رسم ليا دور وده بيحصل لناس كتير مننا لازم فعلا احاول أمشية
هل مستعده أن تدافعى عن وجهة نظرك عموما أم تجبنين عند المواجهة ؟
طبعا وبقوة كمان
يمكن كنت قبل كده بحاول تجنب المشاكل لكن الهروب والضعف مش بيوصل لنتيجة وعلشان كده لازم أتسمك برأيى وأدافع عنه مهما حصل طالما الرأى ده مش غلط
وهل ترين جبنك صفة شخصية ام يغذيها من حولك؟
الحمد لله أنا مش جبانة
ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
أهمها أن أصلا المجتمع كتير مش بيعترف بوجود ليلى
ومصدره التربية كلنا من صغرنا بنشوف الأهل بيربوا الولد على أنه أحسن من البنت وهو اللى المفروض يقعد حاطط رجل على رجل والبنت هيا اللى تخدمه
المواقف موجودة فى كل حياتنا مش عندى أنا بس معظم الناس بتربى ولادها على أساس أن البنت هيا اللى لازم تخدم البيت كله والولد ما يعملش حاجة
وأنا مش بعترض ابدا على أشتراك البنت فى خدمة أخواتها وأهلها بس فيه فرق لما البنت تعمل كده بمزاجها ولما تعمله غصب عنها
البنت على فكرة بتكون سعيدة قوى لما تعمل حاجة فى البيت بس بمزاجها مش أجبار ولا بالطرق اللى بنشوفها
هل تري المرأة اقل من الرجل في اي مستوى من المستويات؟وان كان فعلا فما هي هذه المستويات؟
لا طبعا المرأة مش أقل من الرجل الأتنين مكملين لبعض طوال الحياه
ولا يمكن الحياه تكمل بدون حد منهم
هل يساهم الأعلام فى ترسيخ صورة نمطية عن المرأة ؟ وكيف ترين معالجات قضايا المرأة وتأثيرها فى المجتمع؟
للأسف دور الأعلام بسيط قوى ده إن ماكانش معدوم
وأصلا مابشوفش أى معالجات لقضايا المرأة وحتى لما يحصل ونشوف برنامج بيتكلم عن المرأة بنلاقى أصلا الفئة اللى بتتكلم دى فئة غريبة عنا ومش هيا معظم الحالات الموجودة فى مجتمعنا ومش عايشين أصلا المشكلات اللى بيتكلموا عنها يبقى أزاى هيقدروا يحسوا بيهم ويحلوا ليهم مشاكلهم
بعد مرور سنه من يوم ليلى الأول ماذا تغير فى وضع ليلى ؟
أنا يمكن مش شايفة أى تغير ملحوظ بس بتمنى فعلا أنى أشوف تغير
ماذا تغير حولها فى الشارع كالظروف والمشاكل فى مصر بالنسبة للبنات والسيدات صارت أحسن أم اسوأ ؟
أنا شايفة أنها بقت للأسوأ والمشاكل زادت
------------------------
ودى كانت الأسئلة وأجاباتى عليها
وفى النهاية مش عايزة أى واحد يفهم الموضوع غلط أحنا مش معترضين على دورنا فى الحياه كفتيات أو سيدات ليهم دور أساسى فى الحياه وفى البيت وفى تربية الأولاد وغيره من كل المهام الموجودة لكن أنا بعترض على نظرة الرجل لينا على أعتبار أننا أداه لخدمتهم بس دون مراعاه لشعورنا وكمان أستخفافه بينا فى أى عمل بنعمله سواء داخل البيت أو خارجة فى العمل
وكمان عدم الأحساس بالمرأة عموما ولا تقديرها ولا تقدير دورها فى الحياه
وأحنا مش بنادى بمعاداه الرجل لا ابدأ بس بنادى كل الرجال لفهم كل السيدات
-----------------------
التاج همرره لمين
وطبعا الأسماء اللى كتبتها دى لو حد مش عاجبه التاج مفيش مشكلة ما يجاوبش
والتاج ده كمان مش للسيدات أو الفتيات ولكن للرجال كمان ولكن أنا طبعا ما حبيتش أكتب أسم أى واحد علشان محدش يزعل

Tuesday, October 9, 2007

عيد سعيد عليكم

كل سنه وأنتم طيبين بمناسبة عيد الفطر المبارك

ويارب يكون عيد سعيد عليكم كلكم

أنا ليه بقى بهنيكم بدرى

علشان هكون مسافرة فى العيد وقلت أحط البوست وأسيب المدونة وكل حاجة أمانة فى رقبتكم لحد ما أرجع
ما هو عيد وطالما عيد يبقى فيه لمة وزيارات وعيلة وطالما عيلة يبقى لازم أسافر لبلدى
كل سنه وأنتوا بكل خير ويارب تكونوا كلكم فى أحسن صحة وحال يارب


عايزة أتكلم فى شوية حاجات

أولا ياريت ما تنسوش صيام الست أيام البيض وقدامكم من ثانى يوم العيد لحد نهاية شهر شوال

ثانيا بقى ياريت ما نبطلش بقى كل حاجة يعنى اللى التزم بالصلاه فى مواعيدها فى رمضان ياريت يكمل على كده

واللى التزم بحاجات تانية كتير ياريت يحاول على قدر الأمكان يعملها

والقراءن ياريت ما نهجروش حتى لو قريت صفحة واحدة كل يوم

صفحة تخيلوا الصفحة هتاخد منكم وقت أد أيه بس هنكون عملنا حاجة كويسة وما هجرناش القراءن

فيه حاجات كتير بس بعد العيد بقى هنبدأ نتكلم فيها


أيه تانى يا بوس بوس أيه

أيوة أيوة

يا جماعة العدد الخامس من مجلة نفسنا نزل من يومين وأنا عارفة أن الناس كلها مشغولة بس بعد رمضان أعتقد هتكونوا فاضين بتمنى فعلا تزوروا المجلة وأعرف رأيكم


فيه بوست جديد فى مدونتى بنك الخير بوست مهم قوى أبقوا شوفوه


عيد مختلف


وكل سنه وأنتوا طيبين

أيوة أيوة فيه حاجة كمان شوفوا وصفتى فى مدونة مطبخنا وان شاء الله بعد العيد هتشوفوا وصفات كتير

وأكلات حلوة

الجلاش




Sunday, September 23, 2007

خارج نطاق الأحساس وبرنامج جديد فى رمضان

يمكن أنا من قبل رمضان وماكنتش عايزة أكتب أى مواضيع غير عن رمضان والعباده ولكن ساعات بتحصل حاجات بتخرجنا عن الطريق اللى رسمناه وبرضة أنا فى البوست ده هتكلم عن حاجات متعلقة بالعباده بس فى الجزء التانى من البوست
----------------
مش عارفة ليه الناس دايما بتصر تجرح الناس اللى قدامها ليه مش بتراعى شعورهم
وفيه ناس كتير ما بتعرفش تفرق بين الصراحة وقلة الذوق وجرح مشاعر الناس
للأسف ساعات الواحد بيتحط فى موقف محرج وجارح جدا وتلاقى شخص ممكن ما يكونش ليك علاقة بيه فجأة يكلمك ويجرحك بكلام غريب وللأسف من دهشتك من الموقف ومن جرأته بتلاقى نفسك مش عارف ترد عليه ولسانك وقف والغريب ان الشخص ده بعد كده يقول لك معلش أصل أنا صريح ولكن ياريت نعرف الفرق بين الصراحة والجرح وقلة الذوق
------------------------------
هرجع بقى للمواضيع اللى بحب أنزلها فى رمضان
فيه برنامج حلو قوى وعجبنى جدا البرنامج أسمه على باب الجنه
وبيجى كل يوم الساعة 4 ونص قبل المغرب ياريت كلكم تتابعوه
لأنه فعلا حلو قوى
ودى المقدمة بتاعت البرنامج
البرنامج بيجى على قناه اقرأ وأسفة لأنى نسيت أكتب أسم القناه

video

--------------------------------

ياريت ما تنسوش الأقتراحات اللى أنا أقترحتها فى البوست اللى قبل اللى فات

والأقتراحات دى مكتوبة كمان على اليمين جمب البوست ده

وربنا يتقبل منا ومنكم ويبلغنا ليلة القدر

Sunday, September 16, 2007

كيف نربح 6 هدايا من الله في رمضان؟

دلوقتى وأحنا فى رابع يوم وكلها كام ساعة وندخل فى خامس يوم فى رمضان حبيت بس أطمن على الناس وأشوف عاملين أيه وكمان حبيت أوريكم كيف نربح 6 هدايا من الله فى رمضان ؟

الثواب هيكون فى سته حاجات وهيا

1- مغفرة كل الذنوب الماضية

2- عتق الرقبة من النار.
3- يستجاب فيه الدعاء.
4- كنوز من الحسنات.
5- ليلة القدر.
6- فرحة الله بعباده

الواجب بقى علينا أيه هو تعالوا نشوف

1- أنا والقرآن.
2- أنا والصدقة.
3- أنا وصلة الأرحام.
4- أنا والدعاء.
5- أنا وصلاة التراويح.
6- أنا والصلاة في المسجد

هذه هي التركيبة الأساسية وأهم أشياء في رمضان

وده كان ملخص لموضوع الأستاذ عمرو خالد عن أزاى نربح 6 هدايا فى رمضان

ياترى مين منا هيربح ومين هيسخر

ولمتابعة الموضوع كامل أدخلوا على اللينك ده

كيف نربح 6 هدايا من الله فى رمضان ؟

وياريت ما تنسوش الأقتراحات اللى أنا أقترحتها فى موضوعى اللى فات ولو فيه أى أقتراحات أبعتولى

وربنا يتقبل كل أعمالنا

Friday, September 14, 2007

بعد أول يوم رمضان أخباركم أيه


بعد أول يوم رمضان أخباركم أيه وعملتوا أيه وأحنا خلاص هنبدأ ثانى سحور ياترى كان يومكم عامل أزاى
صليتوا كل الصلوات فى أوقاتها؟
صلاه الفجر صليتوها فى ميعادها ؟
صلاه التراويح أخبارها أيه ؟
القراءن قريتوا فيه قد أيه ؟
الصدقة ؟
صلة الرحم؟
أفطار صائم؟
التسبيح ؟
الدعاء؟
والى نهاية كل الأشياء والعبادات عملتوا فيها أيه
وهل حسيتوا فعلا أن أول يوم رمضان مختلف عن الأيام اللى فاتت وعلمنا فيه حاجة جديدة
أهم حاجة ياريت ما تنسوش الدعاء لشيماء شيكو أون لاين رحمها الله
وياترى أكتسبتوا أى خلق جديد أو بدأتم تتحلوا بصفة جديدة يعنى مثلا زى العصبية هل قدرتوا تتحكموا فيها
الضيق والغيظ اللى بيصيب الناس واللى لما هنقدر نتحكم فى نفسنا هنتجازى عنه أخباره أيه
الى نهاية بقى كل الصفات والأخلاقيات اللى لازم نتحلى بيها فى رمضان
---------------------
فيه حاجة كمان حبيت أنبه عليها وهو كان أقتراح منى وياريت فعلا ننفذه ودى حاجة هناخد منها حسنات كتير إن شاء الله وهيا

أول حاجة طبعا معظمنا عنده موبايل ممكن يا جماعة ساعة السحور وصلاه الفجر نرن على صحابنا وقرايبنا علشان يصحوا وتخيلوا بقى لو كانوا فعلا نايمين وصحيوا من الرنة دى أعتقد أنك هتاخد ثواب كبير قوى


وثانى حاجة طبعا فى كتير مننا ما يقدروش يعملوا شنطة رمضان ممكن نعمل حاجة بسيطة وليها ثواب كبير قوى وهيا طبعا كلنا عارفين البلح ممكن نشترى كيلو أتنين ثلاثة على حسب مقدرة كل واحد فينا وساعة صلاة المغرب نخلى حد يقف بيه عند الجامع يوزعه على الصايمين أو فكرة تانية ممكن نوديه الجامع لأى حد مسؤل هناك يوزعه ساعة المغرب وأعتقد أنه ده هيدينا ثواب كبير قوى


ولأى أقتراحات تانية ياريت تراسلونى علشان أنشرها هنا وكلنا نشترك فيها

ويارب تقبل منا كل أعمالنا

rohbosbos@gmail.com

Wednesday, September 12, 2007

Monday, September 3, 2007

رمضان من وجهة نظر أخرى

كل سنه وأنتم طيبين بمناسبة حلول شهر رمضان أعاده الله عليكم بالخير والبركات
طبعا كل الناس هتكتب مواضيع عن رمضان وفضل شهر رمضان وفضل الصيام
وفيه ناس بتطالب بعدم الكتابة فى المدونات علشان تضيع الوقت
وناس بتطالب بكثرة عمل أفعال الخير
وأنا مش معترضة طبعا عن حاجات من اللى فوق دى ولكن أنا عايزة أتكلم عن حاجة تانية خالص ومهمة جدا جدا
لية الناس بتلتزم بس فى رمضان وباقى الشهور لا
لية الناس بتشد على نفسها فى الصلاة فى الجوامع وحتى لو فى البيت تكون جماعة مع عيلتة فى رمضان وباقى الشهور لا
لية الناس بتكتر من الصدقات والأحسان والمعاملة الكويسة وصلة الرحم وقيام الليل وكل حاجة كويسة فى رمضان وباقى الشهور لا
سؤال مهم هو أحنا هنتحاسب عن شهر رمضان بس ومش هنتحاسب عن باقى شهور السنه
طبعا رمضان فيه فرص كتيرة وكنوز كتيرة ولازم كلنا نعمل ما فى وسعنا ولكن لية بعد رمضان بنسيب كل حاجة
بمعنى ما بنعملش أى حاجة خالص خالص
أنا مش بقول أننا المفروض نكون زى رمضان بس على الأقل نكون زى نصه أو ربعه
مش عارفة أيه النظرية بجد ياريت حد يفهمنى هو أحنا فعلا مش هنتحاسب غير عن الشهر ده
أحنا يا جماعة هنتحاسب عن السنه كلها بما فيها رمضان ولا أيه
ياريت ما ننساش ده أننا هنتحاسب عن السنه كلها مش رمضان بس ياريت تفوقوا قبل فوات الآوان
وطبعا عايزة أقول لكم حاجة كمان فيه ناس بتشد على نفسها قوى قوى وهو بالكتير أول كام يوم وأسبوع بالظبط وتلاقيهم بطلوا كل حاجة يا جماعة الأعتدال ابدأو واحدة واحدة علشان ما تبطلوش مرة واحدة
وحاولوا تكونوا كده السنه كلها
ياريت أعرف رأيكم بصراحة
-----------------------------
تحديث
وأنا بلف على المدونات لاقيت ناس عاملين مدونات لرمضان زى
-----------------------------
تحديث للمرة المليون
يا جماعة أنا مش قصدى من كلامى اللى فوق ده أن الناس تكون متكاسلة فى رمضان أو ما تشدش على نفسها لا بالعكس أنا عايزة الكل يعمل ما فى وسعه ولكن كل اللى كنت بقوله هو لية الناس بتلتزم بس فى رمضان وبعده ما بتعملش حاجة خالص وده كلام واقعى وكلكم عارفينه أن كل الناس بتعمل كل حاجة فى رمضان وبعده مفييييييييييييييييييش كل حاجة بتتنسى هو أحنا مش هنتحاسب غير عن رمضان بس
يا ريت أكون وصلت وجهة نظرى

Friday, August 31, 2007

عيد ميلادى ولكن

بكرة عيد ميلادى بعد الساعة 12 بالليل بدقيقة هدخل سنه جديدة هيكون عندى 24 سنه طبعا ناس كتير بيفوت عليها سنين وسنين وكل اللى بتعمله كل سنه أو تفتكره الهدايا والتورته وخلاص لكن أنا السنه دى بفكر فى حاجة تانية يمكن تفكيرى أختلف أيوة مفيش مانع من التورتة وخلافه بس أنا بفكر فى حاجة تانية بفكر السنه اللى فاتت دى عملت فيها أيه حققت فيها أيه ضيعت فيها وقت قد أيه
أنا يمكن دخولى لعالم النت كان تقريبا من سنه ويمكن السنه دى فعلا حصلت ليا فيها حاجات حلوة كتير
أولا أتعرفت على صديقتى الجميلة جدا والشاعرة الرائعة أميرة ويلز صاحبة مدونة
وبجد كانت معرفتى بيها وش الخير عليا لأنها كانت الطريق ليا لمعرفة المدونات ولعمل مدونتى دى وبجد مش هنسى أبدا فضلها ده عليا وبالأضافة أنها صديقة غالية جدا عليا ووفية بمعنى الكلمة
ثانيا عملت أنا وهيا مجلة نفسنا واللى كانت الطريق والباب لكل حاجة كويسة وحلوة بتحصل لنا دلوقتى
ثالثا بقيت أنا وهيا بنكتب فى مجلة على صوتك اللى بعتز بيها جدا واللى فتحت لنا باب وطريق كبير قوى
رابعا لسة فيه حاجات كمان أنا بدأت فيها ولما هتكمل هعرفكم أكيد
خامسا وده الأهم عرفت منتدى جميل جدا وغالى قوى عليا ويمكن ده كان البداية لكل ده ويمكن هو له الفضل فى حاجات كتير من خلال معرفتى بحاجات جديدة وقراءة كتابات ناس هناك كل ده نمى عندى حاجات كتير ومقدرش فعلا أنسى فضل ناس كتير عليا من المنتدى ده
وهو منتدى الكرامة
سادسا وده شىء فرحنى جدا جريدة المصرى اليوم نقلت موضوع من عندى فى الجريدة وده شىء أسعدنى جدا
سابعا نزل ليا رأى فى موضوع فى جريدة الكرامة وطبعا دى حاجة فرحتنى جدا جدا جدا
ثامنا بقى عندى أصدقاء أكتر من اللى كانوا عندى قبل كده وعرفت ناس كويسين قوى بجد
يعنى من الأخر السنه اللى فاتت دى أتعلمت فيها حاجات كتير ووصلت فيها لحاجات مكنتش أتوقع أنى أوصل لها
أنا كنت طول عمرى بحب الكتابة لكن ما عرفتش أنمى ده لكن اللى بأكده أن النت ودخولى على حاجات كتير فيه نمت عندى الموهبة دى
تانى وفعلا أنا حصلت ليا حاجات كتير فى السنه دى مفرحة وجميلة
أرجع بقى للمدونات ولمدونتى اللى عملتها من حوالى 8 أشهر ويمكن هيا أتمسحت منى بعدها بكام شهر وعملتها تانى بس عايزة أتكلم عن حاجات جميلة قوى عرفتها وناس جميلة صادفتهم هنا فعلا المدونات دى عالم غريب بس حلو قوى والأحلى الترابط اللى بلاقية وبشوفه بين المدونين ناس بتشارك بعض فى حاجات كتير ويمكن ما يعرفوش بعض الا عن طريق المدونة بس بيفرحوا لفرح بعض وبيزعلوا لزعل بعض
وأنا عن نفسى مدونتى كانت فاتحة الخير عليا بجد
أنا طبعا مش عايزة أذكر أسماء ناس مدونين عملوا معايا حاجات كويسة قوى علشان ما أنساش حد معلش بقى عيد ميلادى ودماغى متلخبطة ولأنى عارفة مهما كتبت مش هوفى حد حقه
نفسى بجد فى السنه الجديدة أعمل حاجات كتير وأحقق حاجات أكتر
نفسى أقرب من ربنا أكتر
نفسى أنجح فى شغلى وخصوصا فى المجلات اللى بكتب فيها وصوتى يوصل لكل الناس ونفسى أنجح فى كل الشغل اللى بعمله
نفسى بجد أعمل حاجات كتير كتير كتير كفاية عليكوا بقى كده
ومش عايزة أطلع نفسى بقى مثالية ومفيش زيى وكده أيوة أنا عملت حاجات كويسة فى السنه اللى فاتت وبرضة عملت حاجات مش كويسة زى أى حد يعنى وضيعت وقت كبير قوى قوى على الكمبيوتر والنت ويمكن فى الأول كنت بضيعه من غير فايدة بس الحمد لله دلوقتى بقى بفايدة يمكن أنا بفضل كتير على النت بس الحمد لله بطلع بنتيجة كويسة
يمكن برضة النت ده أخدنى من الدنيا اللى حواليا والناس وصحابى ما بقتش بكلم حد قاعدة كده قدام الجهاز وخلاص
والحمد لله بدأت أرجع تانى للحياه
بجد ده أحسن عيد ميلاد مر عليا لحد دلقوتى فى حياتى
وخلاص فاضلى سنه وهكمل ربع قرن فى الحياه دى يا خبر بقالى كل ده فى الدنيا
وفعلا السنه دى أنا خدت فيها خبرة فى حاجات كتير قوى قوى
-----------------------------
ودى الهدايا اللى وصلتنى وأى حاجة جاية فى السكة هكتبها على طول
أول هديه جاتلى من الجميلة صاحبة مدونة مش قادرة وهيا عملت موضوع ليا ولناس كمان تانية عيد ميلادهم فى نفس الشهر
------------------------------
ثانى هدية مش هتقدروا تشوفوها للأسف صديقتى الجميلة أميرة ويلز كتبت على الأيميل بتاعها أهداء ليا مكان أسمها وبجد دى حاجة فرحتنى جدا جدا
--------------------------------
ثالث هدية رسالة جاتلى على الموبايل من مجهول هههههه قصدى من رقم بس تقريبا هو رقم واحدة قريبتى وصديقتى جدا
زى ما توقعت الرسالة من بنت خالتى صديقة عمرى ربنا يخليها ويخلى لها أبنها الجميل
-------------------------------
رابع هدية تهنئة من سمراء النيل على الأيميل بمناسبة عيد ميلادى
-------------------------------
خامس هدية تهنئة برضة من شيماء الجيزى على الأيميل بمناسبة عيد ميلادى
-------------------------------
سادس هدية
هدية حلوة قوى من ماما لسة جايباها من شوية ربنا يخليها ليا
---------------------------------
سابعا
هدية بجد غالية عندى قوى وأثرت فيا جدا لدرجة أن بعيط من الكلام الحلو اللى فيها واللى شايفة أنى أقل منه بكتير
الهدية دى من شيماء الجيزى
----------------------------------
ثامنا
رسالة جميلة من صديقة جميلة قوى على الموبايل شكرااااااااااااااااااااااااااااااااااااااااااا
-----------------------------------
تاسعا
الرقيقة صاحبة مدونة مش قادرة بعتتلى كارت جميل جدا جدا
يا حبيبتى والله مش عارفة أقول لك أيه على ذوقك ده يعنى موضوع وكارت
والله ده كتير قوى

Monday, August 27, 2007

العروسة

طبعا اللى شاف العنوان ممكن يفتكر أنى هتكلم عن عروسة بجد وبعد ما يشوف الصورة هيعرف أنى بتكلم عن العروسة اللعبة ايوة اللعبة عايزة أعرف منكم دلوقتى لو صادف ولعبت مع طفل صغير باللعبة بتاعته وخصوصا لو كانت عروسة بتحس بأيه فيه ناس وهيا بتعلب مع الأطفال بترجع تانى لطفولتها وبتكون زى الأطفال بالظبط وفيه ناس تانية بتحس أنها حاجة عبيطة قوى وناس مش بتهتم أصلا تلعب مع أى طفل
لكن أنا عن نفسى لما بكون مع أى أطفال وبيلعبوا وبيدعونى العب معاهم كالعادة يعنى بحس أنى طفلة زيهم وبرجع فعلا طفلة وبفضل العب معاهم وأشوف القصص اللى بيخترعوها وهما بيلعبوا لكن فيه فرق كبير قوى زمان لما كنت فى سنهم كانت دماغى فاضية رايقة مافيهاش أى هموم ولا مشاكل ولاكنت بفكر فى حاجة لكن دلوقتى وحتى وأنا بلعب معاهم أيوة بكون سعيدة وبرجع فعلا لطفولتى بس طفولة كبيرة شوية طفولة بس دماغها مليانة ومشغولة بمليون حاجة وأهم حاجة أنى ما أحسسش الأطفال دول أنى أكبر منهم بالعكس المفروض أحسسهم أنى قدهم وأنى فرحانة جدا باللعب معاهم وأعتقد أن دى العبقرية أن الأطفال يصدقوا أنك طفل زيهم وبتلعب معاهم ويمكن حبى للأطفال هو اللى بيخلينى فعلا مندمجة معاهم جدا وكمان بيخليهم دايما عايزينى العب معاهم وبيحسوا وأنا بلعب معاهم أنى فعلا طفلة قدهم
نفسى أعرف بقى أنتوا بتحسوا بأيه
والصورة اللى فوق دى أنا صورتها وأنا بلعب معاهم وأستنوا باقى مواضيع اللعب دى

Tuesday, August 21, 2007

ماذا تفعل لو (2)0

اللى مش عارف حكاية الموضوع ده دى سلسة مواضيع بدأت أقدمها تحت عنوان ماذا تفعل لو وده ثانى موضوع فيه وممكن تشوفوا الجزء الأول علشان تعرفوا كان عن أيه ودلوقتى هدخل على الجزء الثانى
--------------------
ماذا تفعل لو كان عندك صديق وهو الوحيد الذى أصبح صديقا فى حياتك وكان كل شىء بالنسبة لك وكنت أيضا له كل شىء وكانت كل حياتكم مع بعض من بداية عمركم كله الى الآن ولكن فجأة تغير صديقك هذا وأصبح لا يهتم بك ولا يسأل عنك مع أنك لم تنقطع عن السؤال عنه ولم تنساه يوما وفعلت الكثير من أجله
بمعنى أنك فعلت كل شىء جميل ونبيل له وبعد ماكان هو مثلك معك فجأة تغير
ماذا تفعل فى هذا الوضع
مع العلم أن أجمل ذكريات عمرك وكل حلوها ومرها كانت معه
-------------------

Sunday, August 19, 2007

غمض عينيك ( الجزء الثالث ) 0

طبعا الموضوع ده تكملة لموضوع غمض عينيك ويمكن أنا اتأخرت عما نزلته
وعلشان الناس تعرف أحنا بنتكلم عن أيه ياريت يشوفوا الجزء الأول والثانى من الموضوع
وبأكد لحد دلوقتى أن باب الحوار لسة مفتوح لأى حد يحب أعمل معاه حوار على الموضوع ده
وهندخل بقى على الجزء الثالث ونكمل الحوارات
--------------------
وهبدأ فيه بالحوار الثالث مع صاحبة مدونة مش قادرة
الأسم / مش قادرة
السن / 19 سنه
العمل / طالبة
أسم مدونتك / مش قادرة
سبب أختيارك لأسم المدونة
راجع بوست 1 (أول بوست خالص) بعنوان "أنا هنا ليه"
ندخل على موضوع حياه العين كلمينا عنها
من الممكن أن اقول عن هذه الحياة انها جزء من حياتي الاساسية..أو انها تتداخل معها وتشترك في عدة أشياء
وهى عبارة عن تغميض العين ومحاولة الانفصال عن الواقع الخارجي
مثلا
حدوث أحد المواقف على أرض الواقع..ولكن تصرفي في ذلك الموقف لم يرق لي..أو أنني كان من الممكن أن اتصرف بشكل أفضل..ويأتي هنا دور حياة العين..والتي فيها اتصرف كما كنت اريد أو كما يبدو لي انه الأفضل الذي لم اقم به في حياتي الواقعية
اغلب الاحيان تكون تلك القصص عن الحياة المثالية التي أبغى العيش فيها ..أو بمعنى أدق.. عن كوني أنا الفتاة المثالية وهو ما لا أقوم به على أرض الولقعايضا..يكون تخيل مواقف لم تحدث من الاصل.. وإذا حدثت كيف يكون رد فعلي..وهل هذا هو الرد المناسب أم أن هناك ما هو أفضل
ما هو رأيك فيها
بالطبع أحب هذه الحياة..حبا شديدا..ولن أبالغ إذا قلت اننى إذا شعرت بالضغوط على الجأ إلي تلك الحياة أو اهرب اليها بالمعنى الادق ..فقد تجدينني في فترة الضغوط تلك ألجأ الي النوم الكثير..وهو لا يعد بمثابة نوم وإنما محاولة مني للانفصال عن الواقع الخارجي
وبالتالي يمكن ان اقول انني احب هذه الحياة والجأ اليها بمحض إرادتي
وبشأن القصص إذا ما كانت حقيقية أو خيالية فكما قلت سابقا..فهى مزيج من الواقع على الخيال
------------------
نصل الى الحوار الرابع
وهو مع صاحبة مدونة قلوب حائرة
الأسم / بيبو
السن / 24 سنه
المؤهل /ليسانس آداب قسم قسم قسم هقولك اهو من غير ما تتخضي علم نفس
العمل / محررة صحفية ، أخصائية نفسية
أسم مدونتك/ قلوب حائرة
سبب أختيارك لهذا الأسم
اخترت الاسم ده لأني حبيت تكون ليها طابع رومانسي بعض الشي بالإضافة لبعض مواضيع التخصص
الآن وبعد أن تعرفنا عليك وبعد أن سمعنا رأيك في موضوع غمض عينيك أو حياه العين من خلال ردك على الموضوع نريد معرفة شكل هذه الحياة معك وبعد اعترافك أنك تقضى ساعات طوال دون نوم ، كلمينا عن هذه الحياة وما رأيك فيها وماذا تفعلى فيها كلمينا عنها وهل تحبي هذه الحياة أم لا
على الرغم من التعب الذي أعيشه في الساعات التي أحارب فيها من أجل النوم ، الاانني أجد فيها متعة كبيرة لأنه الوقت الوحيد اللي بختلي فيه بنفسي واقعد أحاسبها على اللي عملته وممكن كمان أضع في الوقت ده خطط مستقبلية واللي تستغربي ليه إن الوقت ده ممكن اطلع منه بفكرة خاصة بالشغل ، أو فكرة لتقرير أو ملف أو حل لمشكلة عندي في التخصص بتاعي وقت بيخرج منه أشياء لو خصصت ليه وقت ليها علشان اطلعها مش هتطلع ،في الأول مكنتش بحب الحياة دي دلوقتي بمووووت فيها ، لانه الوقت الوحيد اللي بتعامل فيه مع بيبو كشخصية بدون مسؤوليات وبدون أعباء بيبو وبس بيبو االخجولة ، الانسانة، المجنونة ، الحبوبة بيبو وبس من غير اى حاجة بيبو كأول يوم ولدت فيه
------------------
ودى كانت باقى الحوارات ولسة الباب مفتوح والموضوع مازال موجود وأى حد يحب أعمل معاه حوار يبعت ليا

--------------------

Saturday, July 14, 2007

كن صريح مع نفسك

مش عارفة ابدأ كلامى منين بقالى فترة طويل عايزة أكتب كلام كتير لكن كل ما أجى أكتب مقدرش أكتب ولا كلمه لحد ما قررت أكتب وأقول كل اللى جوايا واللى يحصل يحصل
فى الأول كده طبعا كلنا بقينا مدمنين للكمبيوتر والنت والمدونات والمجلات وغيرها وغيرها وبقينا بنقضى وقت طويل قوى على الكمبيوتر يمكن بقى نص يومنا أن ما كانش معظمة نت
عايزة اسألكم سؤال الوقت اللى بيروح ده سواء كان فى حاجات مفيدة أو لا مالوش ثمن ليه محدش حاسس بيه ليه مابقناش بندى لأى حاجة فى حياتنا وقت زى الكمبيوتر والنت لية بقينا منعزلين عن حياتنا الأجتماعية وعن كل حاجة وقاعدين جمب الجهاز ده بجد أنا مش لاقية أجابة
ما هو ممكن برضة نقسم وقتنا ونعمل كل حاجة ويكون من ضمن الحاجات القعاد على النت لكن معظمنا بقت حياته كلها على الجهاز ده
بقالى مده كبيرة بفكر فى الموضوع ده وبقول هو ينفع كده ماشى أنا ما بعملش حاجة غلط يعنى بتابع مدونتى وكمان المجلات اللى بكتب فيها بتابع الأخبار بتابع مدونات كتير يعنى من الأخر مابعملش حاجة غلط مش قاعدة مثلا على الشات بكلم ناس معرفهمش فى أى كلام وخلاص ولا بقعد كده من غير فايدة بس برضة مش مرتاحة الوقت الطويل اللى بقضيه على النت تاعبنى اليوم كله ضايع
طبعا ممكن حد يرد عليا ويقولى ما تقعديش كل الوقت ده هرد وأقول أننا كلنا بقى عندنا أدمان وكمان أنا عما بكتب مواضيع عما بلاقى أفكار عما بلف على المدونات والمواقع بلاقى الوقت طار
يعنى بقى تقسيمة يومى كده بصحى الصبح أروح شغلى أرجع أفتح الجهاز وأشوف أخر الأخبار على المدونة والمجلات أروح أنام شوية أقوم أكمل باقى اليوم على الجهاز وهكذ ا ويمكن أنا فى الفترة الأخيرة بدأت أبعد شوية عن الجهاز وأقلل ساعات القعده قدامه وأعمل حاجات تانية
طيب نسيب كل ده ونتكلم فى نقطة تانية دلوقتى الوقت ده أحنا مش هنتحاسب عليه أحنا مش عندنا دين وعندنا عقائد وفروض وحاجات لازم نعملها وأنا هتكلم هنا عنى نفسى كمسلمة أنا عن نفسى قبل ميعاد أى صلاه بشوية بقوم أتوضى وأرجع أقعد على الجهاز لو كنت بعمل حاجة مهمه عليه وبعدين لما ميعاد الصلاه يجى بقوم اصلى وشوية وأرجع للجهاز فيه ناس هاتقولى أنتى كده كويسة الحمد لله أنك بتصلى ماشى ما قلتش حاجة لكن هو ديننا الصلاة بس هرجع وأقول تانى طبعا مع الصلاه أو بعدها بسبح وأقول الحاجات اللى بنقولها وبقول أذكار الصباح والمساء لكن هل ده كافى كده يبقى خلاص
لا طبعا وطبعا أكيد فيه كتير بيعملوا زيى كده ماشى ولكن فين القراءن فين صله الرحم حتى لو بالتليفون فين زيارة المريض فين00 فين00
ليه ما بنفتكرش كل يوم نقرا قراءن ليه كل يوم ما بنسألش عن قرايبنا ولو حتى بالتليفون ليه ما بنزورش أى حد عيان ليه ما بنسألش عن صحابنا اللى برة عالم الكمبيوتر واللى قضينا معاهم أجمل سنين عمرنا
ليه ما نقسمش وقتنا لكل الحاجات دى صدقونى لو عملنا كده هنرتاح قوى وأنا بحاول أعمل كده وبدأت فعلا أقلل قعادى على الكمبيوتر وبدأت أرجع أكلم صحابى زى زمان بعد ما فضلت مده مقاطعة كل حاجة ومش عايزة حتى أتصل بحد على التليفون بدأت أرجع زى ما كنت زمان قبل الكمبيوتر والنت ما يضيعوا يومى
ياريت كلنا نفكرفى الكلام ده وياريت تكونوا أكتر صراحة منى وتقولوا بتعملوا الحاجات دى ولا لا
وفى الأخر أسفة أنى طولت عليكوا بس كان لازم أطلع كل اللى جوايا

Thursday, June 28, 2007

ماذا تفعل لو

ده موضوع من سلسلة مواضيع هقدمها تحت عنوان ماذا تفعل لو
ماذا تفعل لو تزوجت من أنسانة تحبها جدا وكان بها كل الصفات الجميلة التى تتمناها فى شريكة حياتك وبعد زواجكم كنت فى قمه السعادة ولا ينقصك أى شىء
ولكن بعد بضع سنوات أكتشفت أنها لا تنجب
ماذا تفعل هل ستطلقها لكى تتزوج أم ستزوج عليها بدون معرفتها أم تظل معها وتنسى موضوع الأطفال أم تتزوج وتطلب منها أن تظل معك ؟
وهذا السؤال أيضا للفتيات والسيدات ماذا تفعلى لو أكتشفتى أن زوجك لا ينجب وفى نفس هذه الظروف
-----------------
أتمنى أن أجد أجابات صريحة جدا وليست أجابات مصطنعة

Monday, June 18, 2007

غمض عينيك الجزء الثانى

بعد موضوعى غمض عينيك وبعد الردود اللى تلقتها على الموضوع وجدت العديد من
الناس يعيشون نفس الحياه
لذلك قررت أن أفتح معهم حوار حول هذه الحياه وأدخل أكثر فى تفاصيلها
والى الآن أجريت خمس حوارات سوف أقدم منهم حوارين فى هذا الجزء وباقى الحوارات فى الجزء القادم
وسوف أقدم الحوارات على حسب ترتيب أجراءها
------------------------
وسوف ابدأ أولى الحوارات مع سندباد صاحب مدونة فكرة
الاسم / امجد
السن / 35 سنة
المؤهل / ليسانس حقوق
العمل / خبير قانوني بالمحكمة
اسم المدونة / فكرة
سبب أختيارك لأسم المدونة
لان في راي ان كل حاجة بدات في الدنيا كانت في الاصل فكرة ده سبب والسبب التاني اني مش ببطل تفكير دايما عقلي شغال مش عايز ياخد هدنة فكان طبيبعي ان اسمي مدونتي بالفكرة لكثرة التفكير
الأن وبعد أن تعرفنا عليك وبعد أن سمعنا رأيك فى موضوع غمض عينيك أو حياه العين من خلال ردك على الموضوع نريد معرفة شكل هذه الحياه معك وبعد أعترافك أنك ترى آحلامك تكبر أمامك وتدفن بنفسك أحزانك وبتتكلم مع أشخاص أمامك
كلمنا عن هذه الحياه وما رأيك فيها وما هى هذه القصص التى تعيشها وهل تكون حقيقة أم خيالية كلمنا عنها وهل تحب هذه الحياه أم لا
بالنسبة لموضوع غمض عنيك او حياة العين الموضوع ده بدا معايا من فترة طويلة جدا وكانت المسالة في الاول عبارة عن تعبير عن كبت او وسيلة للتنفيث عن غضب وكان بيجي علي فترات طبقا للحالة النفسية ثم تحول الامر الي انه اصبح من الطقوس اللي لازم اعملها قبل ما انام لاني بطبعي مش من النوع اللي بنام علي طول باخد فترة طويلة قبل ما ادخل في النوم ولا اخفي سر اني قبل ما انام بيمر عليا شريط اليوم بالكامل وافضل افتكر واحلل كل موقف حصل واتخيل اني مثلا لو كنت رديت علي شخص معين بكلام غير اللي انا قلته كان هايقول ايه وافضل اتخيل واعمل سيناريو كامل – ده ناهيك علي ان الامر بيوصل معايا اني بحس ان بسمع صوت اللي بكلمه – واحيانا بتخيل حاجات كتير مش حقيقية لشئ بتمني حدوثه جدا وببقي مستمتع جدا جدا وانا بحس ان ممكن الموضوع ده يحصل بالصورة اللي انا رسمتها في خيالي وبصراحة انا مقدرش اتخيل نفسي من غير حياة العين دي لانها اعتقد انها نوع من انواع التخفيف النفسي للواقع الصعب اللي احنا عايشينه
----------------------------
وثانى حوار مع ضد الظلم صاحب مدونة ضد الظلم
الأسم / ضد الظلم
السن/ 23 سنه
المؤهل / بكالوريوس حاسب آلى
العمل/ صاحب محل
أسم المدونة/ ضد الظلم
سبب أختيارك لأسم المدونة
ضد الظلم لان انا بطبعى بكره الظلم والظالمين وبحس بمراره لما بشوف حد بيتظلم
ونفسى اكون ضد الظلم على طوول واقدر اعمل حاجة
الأن وبعد أن تعرفنا عليك وبعد أن سمعنا رأيك فى موضوع غمض عينيك أو حياه العين من خلال ردك على الموضوع نريد معرفة شكل هذه الحياه معك وبعد أعترافك أنك تظل حوالى ثلاث ساعات تعيش هذه الحياه وتخترع قصص وتعيشها
كلمنا عن هذه الحياه وما رأيك فيها وما هى هذه القصص التى تعيشها وهل تكون حقيقة أم خيالية كلمنا عنها
انا لما بغمض عيونى بخرج من عالم الفساد الى بنعيش فيه كلنا وبحاول ادخل
لعالمى الخاص عالم خالى من الفساد والمفسدين والظلم والظالمين وبحاول اكون بطل
قصه كل يوم يعنى مره اروح العراق وساعد المقاومه ومره اروح فلسطين واصلى فى الاقصى واجاهد مع المجاهدين
بحلم بحببتى وبرسم الدنيا الى بنتمنى انا وهى نعيشهابحلم بيوم الثورة فى مصر ونحررها من الفساد باديناوبفضل كدة لحد ما النوم يصالح عيونى ويجينىودة طبعا هروب من الواقع المؤلم الى بنعيشه
ومحدش يقول مجنون ( الجنون هو قمه العقل ) 0
--------------------
أتمنى أن تحوذ الحوارات على أعجابكم وباب الحوارات مفتوح لأى شخص يريد عليه أن يرسل لى لفتح معه حوار
وباقى الحوارات سوف تكون فى الجزء الثالث من الموضوع
تحياتى لكم

Friday, June 8, 2007

الضمير

كتير قوى بسأل نفسى هو أيه الضمير ده هو الضمير ده حاجة موجودة جوه كل الناس ولا ده بقى حاجة نادرة مش موجودة للأسف فيه ناس فعلا ما عندهاش ضمير وفيه ناس عندها
بس الأول هو ايه تعريف الضمير هو فيه تعريف محدد له ولا تعريفه نسبى بيختلف من شخص لشخص ومن بلد لبلد على حسب العادات والتقاليد
الضمير من وجهه نظرى هو الصوت اللى دايما بيناديك الصوت اللى بيكون طالع من جواك ويقول لك ما تعملش كده وأعمل كده وهو كمان اللى بعد تصرفات كتيرة منك بيقول لك ماكانش لازم تعمل كده أنت غلطت أو يقول لك لية ما عملتش أكتر من كده فى الموقف ده كان ممكن تكون أحسن وهو الحاجة اللى دايما بتأنبك على كل شىء بتعمله هو الرقيب على كل تصرفاتك
وأعتقد أنه فيه تعريفات كتيرة للضمير على حسب مفهوم كل واحد له
ولكن هل فعلا فى زمنا ده بقى فيه ضمير ولا خلاص راح زى ما حاجات كتير راحت وهو الطبيعى يكون الواحد عنده ضمير ويحاسب نفسه ولا أيه أصل فيه ناس ما بتحاسبش نفسها خالص وسايبة نفسها كده
هل فيه درجات للضمير يعنى ممكن يكون فيه حد عنده ضمير زيادة عن اللزوم
ضمير بيحاسبه على كل حاجة عملها سواء كانت صح أو غلط
أنا عارفة أن الواحد لازم يكون عنده ضمير لكن لما الحكايه تكون زيادة عن الحد بتكون فعلا مشكلة لما تلاقى ضميرك بيوجعك على كل حاجة صح أو غلط بتلاقى نفسك بتحاسب نفسك على كل حاجة صح أو غلط والمشكلة أنك ممكن بتعمل حاجات هيا مش غلط لكن بسبب ضميرك الصاحى قوى بتحس أنك مقصر ويفضل ضميرك يأنبك
أنا عارفة أن موضوع الضمير ده كبير قوى ومش هيكفيه موضوع واحد علشان كده عايزة أعرف آرائكم فى الموضوع ده
--------------------------------
ملحوظة
بالنسبه لموضوع غمض عينيك لما تكمل كل الحوارات هنزلها كلها فى الجزء التانى من الموضوع

Monday, June 4, 2007

غمض عينيك


كلنا أكيد بنام ومهما طال وقت سهرنا لكن فى الأخر بنام وحتى لو النوم ده كان لمده نص ساعة لكن بنام
فيه حياه غريبة يمكن محدش واخد باله منها حياه بنشوفها بين النوم والصحيان وهيا حياه العين ايوة حياه العين
كلنا لما بنيجى ننام بنغمض عينينا فيه ناس طبعا بتنام على طول وفيه ناس لا لو كنت من الناس اللى مابتنامش على طول أهلا بيك معنا خليك معايا للأخر ولو برضة كنت بتنام على طول خليك معايا
لما بغمض عنيا بحس فعلا بحياه تانية جوه فى الأول مش بتشوف غير سواد لكن ركز شوية وعيش شوية وفكر فى كل حاجة وأحلم وصدقنى هاتلاقى حياه جوه العين هاتلاقى ناس ماشية ناس أنت تعرفهم وناس ماتعرفهش فكر فى أى حاجة وتوقعها وصدقنى هتشوفها فى حياه العين
أنا فعلا بعمل كده ولأنى ما بنامش على طول ودايما أفضل ساعة أو أتنين أو أكتر عما أنام علشان كده بحس قوى بحياه العين أمبارح لما جيت أنام دخلت جوه حياه العين كالعاده وانا على فكرة مش من الناس اللى بتتفائل أو بتتشائم بسماع صوت أى حيوان أو طير لكن معرفش ليه فيه صوت واحد بيخلى قلبى مقبوض معرفش لية فعلا مع عدم أعتقادى بده المهم وأنا فى الحياه دى سمعت صوت الهدهد بجد طلعنى من حياه العين فجأه على صوته
وبجد فيه حاجة غريبة فى الصوت ده مع أنه حلو بس معرفش لية بعد ما بسمعه قلبى بينقبض جايز أكون فعلا مضايقة من حاجة أو بفكر فى حاجة مضيقانى المهم طلعت من حياه العين بعد صوت الهدد ده وفضلت أفكر فى حياه العين وقلت لازم أعرفكم الموضوع ده وأشوف رأيكم فى الحياه دى
نرجع لحياه نوم العين تانى وطبعا الحياه دى محدش يحس بيها أو يقدر يعشيها الا الناس اللى بتعانى من الأرق والنوم بصعوبة بعد عده ساعات من الدخول للسرير فعلا حياه العين حياه جميلة جدا ورائعة ياريت فعلا تجربوها وأعرف آرائكم
-------------------------
تحديث
جاتلى فكرة مجنونة وعايزة أنفذها والفكرة مش هتنفع من غيركم طبعا اللى شاف الموضوع بتاع غمض عينيك والناس اللى ردت عليا ياريت اللى فعلا بيعيش وبيحس بالكلام اللى أنا قلته يبعت ليا على الأيميل علشان أعمل معاه حوار وأعمل أجزاء تانية للموضوع
وطبعا اللى يبعت يقول هو مين ويسيب ليا أيميله وعنوان مدونته علشان اللخبطة بس معلش أستحملونى

-----------------------------
تحديث للمرة الثانية
لحد دلوقتى عملت حوارين والثالث بيجهز وأتمنى أن كل الناس تشاركنى فى الحوار ده وتبعتلى
تحياتى لكم