Monday, August 27, 2007

العروسة

طبعا اللى شاف العنوان ممكن يفتكر أنى هتكلم عن عروسة بجد وبعد ما يشوف الصورة هيعرف أنى بتكلم عن العروسة اللعبة ايوة اللعبة عايزة أعرف منكم دلوقتى لو صادف ولعبت مع طفل صغير باللعبة بتاعته وخصوصا لو كانت عروسة بتحس بأيه فيه ناس وهيا بتعلب مع الأطفال بترجع تانى لطفولتها وبتكون زى الأطفال بالظبط وفيه ناس تانية بتحس أنها حاجة عبيطة قوى وناس مش بتهتم أصلا تلعب مع أى طفل
لكن أنا عن نفسى لما بكون مع أى أطفال وبيلعبوا وبيدعونى العب معاهم كالعادة يعنى بحس أنى طفلة زيهم وبرجع فعلا طفلة وبفضل العب معاهم وأشوف القصص اللى بيخترعوها وهما بيلعبوا لكن فيه فرق كبير قوى زمان لما كنت فى سنهم كانت دماغى فاضية رايقة مافيهاش أى هموم ولا مشاكل ولاكنت بفكر فى حاجة لكن دلوقتى وحتى وأنا بلعب معاهم أيوة بكون سعيدة وبرجع فعلا لطفولتى بس طفولة كبيرة شوية طفولة بس دماغها مليانة ومشغولة بمليون حاجة وأهم حاجة أنى ما أحسسش الأطفال دول أنى أكبر منهم بالعكس المفروض أحسسهم أنى قدهم وأنى فرحانة جدا باللعب معاهم وأعتقد أن دى العبقرية أن الأطفال يصدقوا أنك طفل زيهم وبتلعب معاهم ويمكن حبى للأطفال هو اللى بيخلينى فعلا مندمجة معاهم جدا وكمان بيخليهم دايما عايزينى العب معاهم وبيحسوا وأنا بلعب معاهم أنى فعلا طفلة قدهم
نفسى أعرف بقى أنتوا بتحسوا بأيه
والصورة اللى فوق دى أنا صورتها وأنا بلعب معاهم وأستنوا باقى مواضيع اللعب دى

18 comments:

عاشق عمرو دياب said...

انا نفسى اشترك معاكو بس مش عارف لو ممكن تليفونك او تخدو نمريتى عشان اشترك معاكو

bos bos said...

عاشق عمرو دياب

أهلا بيك فى مدونتى
ياريت توضح ليا قصدك عايز تشارك معانا فى أيه
ومعلش أنا حذفت الرد اللى كان فيه رقم تليفونك علشان ما تتعرضش لأى مضايقات من أى حد
ولو فيه أى أستفسار أيميلى موجود على المدونة وهو
rohbosbos@gmail.com

mesh2dra said...

السلام عليكم

الصورة دي بتفكرني
بعروسة زمان اسمها
" كرمبة"
مش عارفة انا صح ولا غلط
ومش عارفة لسه اسمها كده ولا غيروه

لو لعبت مع طفل بلعبته
برجع عيلة طبعااااااا
جدا جدا
وبعد ما بقعد مع نفسي بقول ايه اللي
كنت بعمله ده..هو انا مش حكبر ابدا
وآخد قرار انى خلاص مش حبان عيلة تانى
بس مع اول طفل برجع عيلة
وبتوصل إلي انى ممكن اركب " مرجيحة " أطفال
عادي جدا
وومكن نطلق على المرحلة دى
اسم
" الطفولة المؤخرة" أو الكبار عيال أو " الكبيرة العيلة"
بهزر طبعا

ومستنية باقي المواضيع بتاعت اللعب:D

مصراوي أوي said...

انا بقوم مزعق فيهم غور يا يوسف انت ويارا من هنا

:)

لا بجد شئ جميل جدا انك تلاعبي الطفال وتحسسيهم انك من سنهم بس دي صعبة جدا ومش اي حد يقدر عليها

انا عن نفسي بحاول اشاركهم واسعدهم علي اد ما اقدر

وفعلا مهما نعمل علي رايك هتبقي طفولة كبيرة شوية لانهم رايقين وذهنهم فااااااضي مش زي الكبار

تدوينة جميلة تحياتي

مؤمنه said...

السلام عليكم ورحمة الله وبركاته
طبعا اللاطفال احباب الله
بوصى بصراحه هو الاطفال احباب الله وكل حاجه بس فيه اطفال تكرهك فى الطفوله كلها لكن دى ما يمنعش ان فى اطفال عساسيل بحب العب معاهم وبحس ان انا مبسوطه لانى قدرت ابسطهم
دومتى بخير
والسلام عليكم ورحمة الله وبركاته

عصفور المدينة said...

مش باعرف أصلي كنت طفل عاقل زيادة عن اللزوم

bos bos said...

mesh2dra

وعليكم السلام
رأيك عجبنى قوى
وأستنى باقى المفاجأت فى موضوع اللعب ده
تحياتى لكى

bos bos said...

مصراوى أوى

وعليكم السلام
هو فعلا صعب أنك تقدر تحسسسهم أنك قدهم بس الحكاية مش عايزة غير انك تكون بتحب الأطفال جدا وهما كمان بيبادلوك نفس الحب وتكون مستمتع باللعب ده صدقنى ساعتها هتكون قدهم بالظبط وهما عايحسوا بكده
تحياتى لك

bos bos said...

مؤمنه

وعليكم السلام ورحمه الله وبركاته
هو فعلا فيه أطفال بتكرهك فى الطفولة وفيه أطفال بتحببك فيهم
بس صدقينى هما الأطفال محتاجين حد يفهمهم تحياتى لكى

bos bos said...

عصفور المدينة

مرحبا بيك وشكرا على رأيك
تحياتى لك

الملاح التائه said...

هاقولك يا بوس بوس أنا عن نفسي بحس بإستمتاع من نوع غريب
عارفه ليه غريب؟
لأنه مصدره حاجه ماحدش يتوقعه
عارفه ايه هي؟
متعة إنى أتخيل نفسي زمان قبل الوعي وأفكر وأجرب
متعة رؤية رد الفعل لأى حركه باعملها على وش مريم مثلا بنت أختي
وتعبيرات وشها فى حالات الخوف والحب والفرح والمتعة والإندهاش ووو
بجد متعة غير عادية متعة تعلم
وبحث وتجريب وحياة
أصل الأطفال دنيتهم هي البرائة بعينها
بوست برئ يا بوس بوس
ودمتى طفه ياعزيزتى :D

bos bos said...

الملاح التائه

رأيك مهم جدا
وسعدت بزيارتك ومشاركتك
تحياتى لك

samo said...

اكيد هرجع تانى واكون طفل

وفى حد يطول انه يرجع للايام دى

بس ياخساره الواحد مش لاقى وقت غير للمذاكر ه

بس بجد البوسط جامد وفكره معتقدش ان كتير اتكلم فيها قبل كده

دى يمكن تكون اول مره ليا هنا بس اكيد هكرر
لو حبيتى ؟؟

bos bos said...

samo

مرحبا بيك وأتشرفت بزيارتك وبرأيك وطبعا أتمنى أنك تزورنى تانى
تحياتى لك

dr.Roufy said...

دي اول مرة ازور مدونتك الحلوة بجد
واكيد مش الأخيرة ان شاء الله
بجد
تحيااااااااتي

bos bos said...

dr.roufy

أنا سعيدة جدا بزيارتك لمدونتى وبتمنى فعلا أنك تكرريها
تحياتى لكى

شبــ اون لاين ـــاب said...

الحقيقه انا عن نفسى ومن غير تريقه لما بكون مع اطفال ببقى عايز احضنه واعيط فى حضنه مش عارف ليه ... بس الاطفال دول احلى حاجه فى الدنيا

bos bos said...

شباب أون لاين

مفيش تريقة ولا حاجة وووجهة نظرك ورأيك مهمين جدا وفيه ناس كتير كده
تحياتى لك