Sunday, August 30, 2009

عيد ميلاد النونة

طبعا النهاردة ليلة عيد ميلادى ال26 يعنى بعد الساعة 12 هبقى دخلت سنه جديدة ويارب تبقى سنه جميلة وسعيدة عليا وعلى كل الناس وطبعا طبعا بما أنى طفلة جبت بالونات وقعدت أنفخ فيها لحد ما نفسى أتقطع وجبت فلفل حبيبى اللى هو فى الصورة ده وبالمناسبة أخويا الكبير هو اللى مسمية فلفل وأنا مقدرش أكسر له كلمه فلفل يبقى فلفل المهم جبت فلفل وحطيت معاه البالونات وقعدت أصور فيه بس طبعا فيه بالونات طارت بعيد وبالونات مالحقتش أنفخها نفسى أتقطع خلاص هههههههههه وصورت فلفل كتير أوووووووى وهو بياكل الشيكولاتة وهو نايم وهو بيشم الورد حاجة أخر جنان كده لدرجة أن ماما بتقولى هو عيد ميلادك ولا عيد ميلاد فلفل قلت لها لأ عيد ميلاد فلفل وبكده هيا اتأكدت أن بنتها خلاص فاضل لها خطوة على المورستان ههههههههههههههههههههههههههه
ندخل بقى على الجد
عيد ميلاد الليلة مين عيد ميلاد النونة أيووووووووووون أنا حاسة أنى لسة نونة وبتصرف بطفولة وجوايا طفولة مش طبيعية ده حتى شكلى زى ما بيقولوا ليا ناس كتير طفولى أوووووووووووووى
ده أنا كمان قلت لماما تجيبلى بالونات وصورايخ العب بيهم مع نفسى كده وجابتلى فعلا بالونات هههههه
يااااااااااااه 26 سنه بحالهم ده أنا كبرت بقى وأنا مش واخدة بالى
وطبعا بالمناسبة دى جيت أكتب ذكرياتى من أول ما أتولدت لحد دلوقتى وأفتكرت أنها هتبقى حاجة بسيطة كده فوجئت بأنها كبيرة أوى وممكن أنشرها على كذا مرة ولأصحاب القلوب الضعيفة والنفس القصير خدوا بالكم قبل ما تقروها هههههههههه

بوسبوس البنوتة اللى جواها متناقضات كتيرة أوووووووووووى أوووووووووووووى كبرت يا ولاد وهتولع 26 شمعه يااااااااااااه ده حتى التورتة مش هتكفى إيه ده خلاص مش هولع شمع خالص وهكتفى باللعب بالبالونات وبعد كده هعلقهم فى المروحة نيييييييييياها

ياااااااه شريط ذكريات بيعدى من يوم ما وعيت على الدنيا لحد دلوقتى بجد حاسة بمشاعر كتيرة أوى مش قادرة فعلا أوصفها ولا أحكيها
وشوية حاجات كتيرة كده وصلتنى لأنى أكون بوسبوس اللى قدامكم دى مع كل المتناقضات اللى فى شخصيتها بس هى برضة بوسبوس الطفلة
هو يمكن السنه اللى فاتت كان فيها شوية تقلبات كتيرة أوى فى حياتى وفى نفسيتى وكنت نكد معظم الوقت بس الحمدلله بوسبوس رجعت تانى للحياه وبقت زى ما هيا بتضحك ومبسوطة ومهما قابلها بترمى ورا ضهرها وتفضل أبتسامتها ماركة مسجلة أسم على مسمى بقى
وشعارى حاليا زى ماكان زماااااااااان طنش خااااااااالص خالص يعنى وكبر دماغك وأضحك على طووووووووووووووووول بس مش لدرجة البلادة بقى ههههههههههههه


أنا هيا أنا
الأجتماعية جدا والأنطوائية جدا
الطيبة والهادية جدا والعصبية جدا والشريرة أحيانا
البريئة والرقيقة جدا والعنيدة والمتمردة جداااااا
الطفلة الصغيرة والشابة الكبيرة
وأهم حاجة الطفلة دى لأنى فعلا طفلة طفلة بجد لدرجة أنى بستنى ماما وهيا راجعة من شغلها تجيبلى معاها الشيبسى والشيكولاتة ههههههههههه وبيتهيألى الطفلة اللى جوايا لو طلعت مش هبقى أنا
الخجولة قووووووى والجريئة قوووووووى
الحساسة جداااااااا جداااااااا بس ما بكونش عكس كده يمكن الحساسية بتقل أو بتختلف على حسب أختلاف الشخص ولكنها ما بتختفيش
ويااااااااااه حاجات كتيرة جوايا وعكسها كمان موجود ومعرفش ده حلو ولا وحش بس اللى أعرفه أنى كده والناس اللى تعرفنى بجد تعرف أنى كده وعارفين يتعاملوا معايا كويس قوووووووى
يعنى أهلى وقرايبى وأصحابى المقربين ليا جدا عارفين أزاى يتعاملوا مع بوسبوس الشقية الطيبة العصبية الاجتماعية الانطوائية واللى فيها كل الحاجات اللى فوق دى وأزاى يمتصوا غضبها وما يشوفوش عصبيتها ولا حساسيتها اللى أصلا ما بيشوفوهاش ولا بتتعامل معاهم بيها ويمكن لأنهم فاهمينها قوى بيعرفوا يتعاملوا معاها كويس أوووووووووى
وبخصوص تناقض الشخصية ده هتكلم فيه بعدين مش وقته بقى دلوقتى

بجد بجد بتمنى حاجات كتير أووووى تتحقق فى السنه الجديدة وبدعى ربنا بيها كتييييييييييييير يارب تتحقق
وزى كل سنه ما بعملش عيد ميلاد ولا غيره ولكن أهم شىء عندى ألاقى الناس القريبة منى فاكرينى وبيقولوا ليا كل سنه وانتى طيبة يااااااااااااااه عندى بالدنيا بجد
كان نفسى يكون معايا فى عيد ميلادى ده وكنت هعمله بجد أخواتى طبعا وناس معينة وقريبة من قلبى أوووى ولكن ........... يالا خيييييييير
وأخواتى وصلتنى تهنئتهم من بدرى
والناس القريبة دول وصلتنى برضة تهنئتهم من كام ساعة ويمكن مش قادرة أرد على كلامهم الجميل أووووى والكتير أووووووووووووى عليا وقلت لهم يسيبونى لحد ما أعرف أرد بقى بس أنا رديت أهو وبقولهم ربنا يخليكم ليا ونقضى كل أعيادنا مع بعض إن شاء الله وعلى فكرة تهنئتكم أحلى تهنئة وصلتنى هااااااااا كده ردى وصلكم ؟؟؟

وبجد كل تهنئة وكل كلمة جاتلى من ناس كنت متوقعة منهم كده أو من ناس ماكنتش متوقعة منهم أسعدتنى وفرحتنى بشكل غير طبيعى وفعلا ده يعتبر أحلى عيد ميلاد مر عليا وأكيد هو أحلى بكل الناس الحلوة اللى فى حياتى

وكل سنه وأنا بوسبوس وأفضل بوسبوس زى ما أنا بقى علشان معرفش أكون حد غير نفسى

وكل سنه وكلكم طيبين وبكل خير

Saturday, August 29, 2009

ذكريات مدونتى مع عيد ميلادى

وأنا عمالة أكتب فى ذكريات وحاجات كتيرة قوى حصلت ليا من يوم ما أتولدت لحد دلوقتى وناوية أنزلها بعد بكرة بعد عيد ميلادى ال 26 لاقيتنى بقلب فى المدونة وأشوف السنتين اللى فاتوا كتبت إيه فى عيد ميلادى وكانت حياتى شكلها إيه وبقى شكلها إيه وياااااااااااه رجعت لذكريات وحاجات أكيد منها الجميل ومنها برضة الجميل هههههه وحبيت أوريكم كنت بقول إيه فى الأعياد اللى فاتت وهقول إيه السنه دى
عيد ميلادى الرابع والعشرون كتبت موضوع بعنوان
عيد ميلادى الخامس والعشرون كتبت موضوع بعنوان
عيد ميلادى السادس والعشرون كتبت موضوع بعنوان عن ال 26 عام أحدثكم
إيه بتدوروا على إيه لسة لسة لما أتم ال 26 بعد نص الليل بكرة هنزله
:)))
بس فعلا كتبت ذكريات وكلام أول مرة ناس كتيرة تعرفه عنى وفيه حاجات مضحكة وحاجات غريبة وهتشوفوا بوسبوس بجد وهنزله على حلقات أصله كبير قوووووووى أصلهم 26 سنه مش أى كلام برضة
:)))
واللى فرحنى قوى التعليقات اللى كانت موجودة على المواضيع بتوع السنتين اللى فاتوا من ناس كتيرة وفيه منهم كتير لسة أعرفهم لحد دلوقتى وعلاقتى بقت جامده بيهم قووووووى وفيه ناس مختفين من فترة مش عارفة هما فين بس الجميل أنى قررت أدور عليهم تانى وأعرف مختفين ليه

شخابيط حلمى


ولسة برضة بحلم بأكتمال الصورة

Friday, August 28, 2009

مجرد رسائل

ليس كل ما نتمناه نصل له فما أصعب الأمانى عندما تكون مستحيلة ونصر نحن على الوصول لها مع أنها بعيدة جدااااا بعد السماء والأرض ووقتها لا يوجد أمامنا سوى الدعاء الى الله راجين منه تحقيق أمانينا ونظل نحلم بها فى نومنا وحتى ونحن مستيقظين
فهكذا هى الأمانى والآحلام المستحيلة دائما ما نذهب لها ومثلما يقال الممنوع مرغوب
الأنتظار هل تعلمون ما هو الأنتظار ؟
هل تتذكرون مسرحية فى أنتظار جودو ؟ عندما كان كل من فى المسرحية ينتظر جودو وضاعت حياتهم وهم مازالوا منتظرون
هل سأكون مثلهم أنتظر جودو كثيرا ؟
سؤال لم أعرف له أجابة حتى الآن ولكنى مازلت منتظرة ولكن أنتظارى مع أمل وعمل ودعاء الى الله وليس أنتظار سلبى وأتمنى من الله أن ينتهى الأنتظار قريبا ويحدث ما أتمناه

تمر الأيام سريعا وتمر حياتنا ونأتى لذكرى يوم مولدنا ونحتفل به ولكن هل نستعيد وقتها شريط حياتنا لنقف عند كل شىء ونرى ماذا فعلنا وماذا يجب علينا فعله وما الأخطاء التى لا يجب أن نكررها؟

هل حاولنا تقييم حياتنا فى كل عام ونحن نطفىء شموع أعياد ميلادنا ؟

Thursday, August 27, 2009

عن القهر أتحدث

قدرنا أن نخلق بنات فى مجتمعات تتبع القهر أسلوبا فى حياتها فمنذ ولادة البنت ويكون القهر رفيقا لها فى حياتها حتى مماتها
فالقهر لا يعرف الفرق بين أسرة غنية أو فقيرة ، بين أسرة مستواها الأجتماعى عالى أو لا ، بين أسرة مثقفة أو لا ولكن القهر أسلوب حياه وتفكير وثقافة مجتمعات للأسف
منهج يتبعه الكبير والصغير وتتبعه أيضا النساء على بناتها وأى بنات تكون تحت سلطتها مع أن هؤلاء السيدات من الممكن أن يكونوا ذاقوا القهر كثيرا فى حياتهم ولكنهم لا يتعلموا أبدا مما حدث
فالقهر غير قاصر على الرجال ولكن على الرجال والنساء فكلهم يمارسون القهر على البنت أيا كانت صلتها بهم
بداية من أختيار دراستها وطريقة كلامها وأسلوبها فى الحياة وصولا الى أختيار عملها والتحكم فى طموحها وآحلامها وأخيرا التحكم فى أختيار شريك حياتها
ومع أنه يوجد فتيات أخذت حقها فى أختيار كل شىء يخصها بدون تدخل من أى شخص طالما ما تفعله صحيح وغير متعارض مع العادات والتقاليد ولا مع تعاليم ديننا نجد أيضا بنات تموت من القهر والظلم وعدم قدرتها على أختيار أبسط الأشياء فى حياتها

فهذه فتاه تجبر على دراسة شىء لا تحبه ويجبرها أهلها على الدخول الى القسم الأدبى فى الثانوية العامة مع أن ميولها علمية وهذا لأنهم يرون أنه لا فائدة من دخولها القسم العلمى فماذا سوف تفعل حتى لو حصلت على أعلى الدرجات فهى بنت ونهايتها بيت زوجها !! ؟

وآخرى تجبر على الدخول الى كلية لا تحبها ولا تريدها لأن رأى الآخرين أن باقى الكليات من تخصص الرجال وأنها لا تستطيع أن تدرس أو تتعلم هذه الأشياء !!؟

وآخرى تجبر على الجلوس فى المنزل بعد أنتهاء دراستها لأنها هكذا عملت ما يجب عليها عمله وعليها انتظار الزوج المنتظر !!؟

وآخرى يبحث لها أهلها على أى عمل لا تحبه ولا تريده ويجبروها على العمل به لأنه سهل على البنات ولأنهم لهم علاقات بناس كثيرة فيه وينسون ما تتمنى أو تطمح أو تحلم به مع أن عندها طموح وآحلام فى أتجاه آخر وناجحة فيه ولكنهم يريدون محو شخصيتها وطموحها وآحلامها وأجبارها على العمل فى شىء من وجهه نظرهم مناسب لها بغض النظر عن وجهه نظرها !!؟

وآخرى يجبرها أهلها على الزواج من أى شخص حتى لو كان غير مناسب لها حتى لا يفوتها قطر الزواج ولأن فلانة وفلانة وفلانة تزوجن وأصبح عندهم أطفال والنتيجة لهذا القهر حياه زوجيه تعيسة فاشلة أو طلاق !!؟

وآخرى أهلها يمنعوها من الخروج من المنزل تماما ولا السفر ولا فعل أى شىء بمفردها حتى لو كان الخروج والسفر نهارا وحتى لو كانت ما تود فعله صحيح وليس خطأ ولكن لا حياه لمن تنادى !!؟

وغيره وغيره من القهر فى كل شىء وأى شىء يخص أى بنت

واليكم نتيجة هذا القهر
نفسية مدمرة لأى بنت
عقدة تظل معها طوال حياتها ومن الممكن أن تؤثر عليها بعد ذلك فى تربية أبنائها

ومازال القهر موجود كثيرا وفى أماكن كثيرة جدا وتتعرض له البنات فى كل مكان لذلك يجب علينا فهم طبيعة الحياه والتعامل مع الفتيات فالقهر ليس وسيلة للتعامل ولأنها كائن مثلها مثل الرجل ولها عقل وطموح وآحلام وشخصية لماذا يريد الآخرين محوها ولأن نتيجة هذا القهر غير مرضية لأى شخص أيا كان وخصوصا أذا كانت ما تريده أى بنت شىء جيد وغير متعارض مع العادات والتقاليد ولا التعاليم الدينية فلماذا التحكم فيها وفى رغباتها بحجة أنها بنت ويجب الحفاظ عليها ولا يجب تركها تفعل ما تريد وتشاء !!؟


( موضوع جديد من الجزء الثانى من كتاب البنات عايزة إيه )

منتظرة رسايل من بنات وسيدات تعرضوا للقهر فى حياتهم لنشرها مع الموضوع فى الكتاب بدون ذكر بياناتهم لو كانوا مش عايزين كده
ومنتظرة كمان رسايل من ولاد وشباب ورجال يقولوا ليا ليه بيحصل كده ولية المجتمع والناس بتعمل كده وإيه هيا وجهه نظرهم فى الموضوع ده


راسلونى على
elbanatayzaea@gmail.com

Tuesday, August 25, 2009

الكنز المفقود


حلقات برنامج الكنز المفقود لمصطفى حسنى البرنامج اللى كان بيجى السنه اللى فاتت دلوقتى موجودة على موقعه وممكن تنزلوها كلها
الكنز المفقود- الكنز الثاني
الكنز المفقود- الكنز الثالث
الكنز المفقود- الكنز الرابع
الكنز المفقود- الكنز الخامس
الكنز المفقود- الكنز السادس
الكنز المفقود- الكنز السابع
الكنز المفقود- الكنز الثامن
الكنز المفقود- الكنز التاسع
الكنز المفقود- الكنز العاشر
الكنز المفقود- الكنز الحادي عشر
الكنز المفقود- الكنز الثاني عشر
الكنز الثالث عشر- الجزء الأول
الكنز الثالث عشر- الجزء الثاني
الكنز المفقود- الكنز الرابع عشر
الكنز المفقود- الكنز الخامس عشر
الكنز المفقود- الكنز السادس عشر
الكنز المفقود- الكنز السابع عشر
الكنز المفقود- الكنز الثامن عشر
الكنز المفقود- الكنز التاسع عشر

الكنز المفقود- الكنز العشرون

الكنز المفقود- الكنز الواحد والعشرون

الكنز المفقود- الكنز الثاني والعشرون

الكنز المفقود- الكنز الثالث والعشرون

الكنز المفقود- الكنز الرابع والعشرون

الكنز المفقود- الكنز الخامس والعشرون

الكنز المفقود- الكنز السادس والعشرون

الكنز المفقود- الكنز السابع والعشرون

الكنز المفقود- الكنز الثامن والعشرون

دعوة للتصالح مع النفس ومع الغير

دى دعوة منى أنا مش من أى حد ولا من أى داعية ده كلامى أنا اللى بوجهه للناس سواء كانوا يعرفونى ولا لا سواء كانوا بيحبونى ولا لا سواء كان بينى وبينهم حاجة حلوة أو وحشة ولا لا
ياريت ياريت مليون مرة والكلام ده بقوله لنفسى قبل أى حد ياريت نتصالح مع نفسنا شوية وكمان نتصالح مع كل الناس
ياريت نبطل نكره بعض ونقف لبعض على الواحدة سواء كنا موافقين بعض فى كلامنا وآرائنا ولا لا لية ما نختلفش بهدوء ونعرض وجهات نظرنا بهدوء ومن غير ما نكره ونعادى بعض
وكمان فى حياتنا العادية وعلاقاتنا الأنسانية بكل الناس بلاش نتخانق بلاش نكره بعض بلاش نزعل بعض بلاش نقف لبعض على الواحدة ونبقى مستنين غلطة لبعض علشان ننتقم من بعض لية بس كده
أحنا بنى آدمين وأكيد مفيش حد مننا ما غلطش وما أتنرفزش وما زعلش ناس منه ولكن لية ما نحاولش نصلح نفسنا ونصلح علاقاتنا مع الناس لية ما بننساش الغلط لبعض لييييييييييييييييه
ياريت كلنا نتصالح مع نفسنا الأول لأننا ساعتها هنقدر نتصالح مع غيرنا وياريت كل واحد زعل حد ولا عمل فيه حاجة يصالحه أو حتى يعمل أى فعل يدل أنه نسى اللى حصل
ياريت بلاش لما تنتهى علاقات فى حياتنا ننتقم من بعض بعدها ونقف مستنين غلطات بعض علشان نشمت ونبهدل بعض
ياريت بلاش نكره بعض لأنه مفيش حاجة تستاهل
ياريت نتسامح أكتر من كده
ياريت ما ندخلش ونشتم فى بعض ونقول كلام مالوش لازمة وهنتحاسب عليه بعد كده
بالله عليكم أتصالحوا مع نفسكم ومع الناس الحياه مش مستاهلة كل ده وبكرة تفتكروا كلامى كويس

Monday, August 24, 2009

حلقات مهمة جداااااااا

السلام عليكم أخباركم إيه وأحنا فى ثالث يوم رمضان يارب تكونوا بخير وكل شىء ماشى تمام وربنا يعينكم على الصيام والطاعات كلها

دلوقتى فيه برنامجين حلوين قوى برنامج قصص القرآن لعمرو خالد وقصة حب لمصطفى حسنى وساعات بيكون فيه مننا ناس مش فاضية وقت اذاعة البرنامج أنا هنزل هنا لينكات الحلقات اللى نزلت خلاص فى المواقع بتاعتهم ودايما هحدث الموضوع بالحلقات الجديدة اللى هتنزل وهكتب على اليمين فى المدونة لينك الموضوع ده علشان تعرفوا توصلوا له بسهولة بعد كده



------------------------------

برنامج عمرو خالد قصص القرآن الجزء الثانى





الحلقة الخامسة

الحلقة السادسة


---------------------------------

برنامج مصطفى حسنى قصة حب



الحلقة الخامسة


----------------------------------

وفيه على يمين المدونة لينكات للقيم المستخلصة من برنامج عمرو خالد مكتوبة على موقعه والقيم كلها هامة جدا وكل واحدة تقريبا 10 سطور بس حلوة قوى وهحدثهم دايما إن شاء الله


Sunday, August 23, 2009

سنحيا بالقرآن

دى حملة عمرو خالد الجديدة اللى أعلن عنها فى أول حلقة من حلقات البرنامج بتاعه قصص القرآن الجزء الثانى والحملة تتلخص فى أننا كلنا نشجع بعض على ختم القرآن وناخد اللوجو ده ونحطه فى كل مكان والهدف الوصول ل 10 مليون ختمة وياسلام لو حصل أكتر من كده
يالا بلاش حد يبخل على نفسه بثواب زى ده وخدوا اللوجو وحطوه فى مدوناتكم وأى مواقع تخصكم ويااااااااه لو فيه حد اتأثر لما يشوف اللوجو اللى أى حد مننا حطه ويقرر يختم القرآن مرة وأتنين وثلاثة متخيلين ممكن ناخد ثواب قد إيه
وما تنسوش كمان تسمعوا برنامج عمرو خالد بجد رااااااائع جدا فيه ميعادين أعتقد كويسين قوى وكتير مننا يقدروا يشوفوهم الأول الساعة 5 العصر على قناه المحور وساعات بيتأخر ل 5 ونص والثانى الساعة 10 بالليل على قناه الرسالة وبعده الساعة 11 بيجى برنامج مصطفى حسنى على قناه اقرأ ياااااااااااالا مستنين إيه شوفوا البرامج دى بجد حلوة قووووووووووووى
ده موقع عمرو خالد هتلاقوا فيه كلام عن الحلقات وعن حاجات كتيرة قوى

Saturday, August 22, 2009

لا تفسد رمضانك وبرنامج مجلة ميكانو الرمضانى

السلام عليكم وكل سنه وأنتم طيبين ويارب تكونوا بخير
فيه شوية حاجات مهمة قوى لرمضان أولها
حملة لا تفسد رمضانك أدخل هنا وهتشوفها
ثانى حاجة برنامج مجلة ميكانو الرمضانى البرنامج حلو قوى وفيه حاجات مفيدة وينقسم الى ثلاث أجزاء
الجزء الاول هو المعلومات الدينية والاذكار الرمضانية تشمل المرجع الاسلامى المتميز ، وبه الاذكار الرمضانية ، حياة الرسول ، احاديث ، تفسير ، اذكار اخرى ، ادعية (يشمل 500 صفحة)
الجزء الثانى وهو الألعاب مجموعة من الالعاب الفلاشية المتميزة ، للكبار والصغار ايضاً ، وهى مجموعة من الالعاب المتنوعة المسلية لجميع افراد الاسرة وتقدر تلعبها بدون التحميل على جهازك
الجزء الثالث وهو المعلومات الثقافية
عالم من المعرفة ، موسوعة هل تعلم الشاملة تحتوى على اكثر من عشرة الاف معلومة فى :طـــب و طـبيـعـة تاريــخ و جغرافيـا علوم و اختراعات عجائـب الإنسـان أول . اطول أقدم أجمل أربعين مثل إسلاميات و عـام فلـسطتينيــــات مـنـوعـــــــــات علماء و مخترعين مكتشفين مبتكرين مـكـتـشـفــين مـخـتـرعـيـــــن
هذا العمل اهداء لجمعية رسالة للأعمال الخيرية ، يلا نعمل الخير فى الشهر الكريم
ومعانا مواضيع خفيفة فى قسم ألطف الكائنات
وانتظروا الجديد دايما وكل سنه وأنتم طيبين

مواعيد البرامج الدينية

ميعاد برنامج عمرو خالد قصص القرأن الجزء الثانى الساعة 5 العصر على المحور و10 مساءا على الرسالة و3 الضهر على أبوظبى
وبرنامج قصة حب لمصطفى حسنى الساعة 11 مساءا على قناه اقرأ والأعادة الساعة 5 الفجر
وكل ده بتوقيت مصر وكل سنه وأنتم طيبين

Friday, August 21, 2009

رمضان زمان ودلوقتى

مشهد 1
من سنين طويلة لما كنا صغيرين أول ما المغرب يدن تلاقى حركة هنا وهناك وناس بتتكعبل فى بعضها وعيال بتتنطط وتقريبا كنت أنا وأخواتى وقرايبى العيال دول
كان رمضان على طول لمة وغالبا كنا بنقضية فى بلدنا وكل قرايبنا اللى زينا مش عايشين فى البلد برضة بيجوا وكانت بتبقى لمه حلوة قوى
وأيام نقضية فى بيتنا وعندنا قرايبنا برضة أو نسافر عند قرايبنا فى أماكن تانية وكان معظم الشهر لمة وهيصه وناس كتيرة وعلشان كده طلعنا كلنا بنحب اللمة دى قوى ومرتبطين قوى بقرايبنا وأنا وولاد وبنات أعمامى وخالاتى وأخوالى بقينا زى الأخوات بالظبط من كتر أرتباط أهالينا ببعضهم ولمتنا فى أوقات كتيرة


مشهد 2
كبرنا شوية وبقى اللى فى الجامعة فى الجامعة واللى بيشتغل بيشتغل وما بقناش فاضين زى الأول وبقى قليل لما نتجمع فى رمضان زى الأول يعنى بسيط قوى لما نسافر عند حد أو حد يجى عندنا وده لأننا كلنا مش عايشين فى مكان واحد ولكن كانت عادتنا كل أخر رمضان قبل العيد بيومين ثلاثة نسافر كلنا وكل الناس اللى مش عايشة فى بلدنا للبلد ونفضل لحد أخر يوم العيد هنااااك ويمكن دى العادة الوحيدة اللى مستمرين عليها لحد دلوقتى شىء مقدس تقضية العيد فى البلد فى وسط العيلة واللمة

مشهد 3
المغرب بيدن وأخويا لسة راجع من شغله والتانى من الجامعة وأنا وماما بنجهز الفطار وخلافه وأخواتى بيجروا من هنا لهنا علشان يصلوا ويجوا نفطر كلنا مع بعض

مشهد 4
المغرب هيدن السنه دى
مفيش صوت مفيش حس مفيش أخويا يجى يهزر معايا مفيش أخويا التانى يطلب منى حاجة
مفيش غيرى أنا وبابا وماما هنفطر كل يوم لوحدنا

مشهد 5
قررت قرار هااااااااام بدل ما هنسافر قبل العيد بيوم ولا أتنين البلد هنسافر قبله بأسبوع كامل وهنقعد لحد العيد
قرار تانى كل أسبوع هاخد بابا وماما ونروح البلد أو عند حد من قرايبنا طالما باقى الناس مشغولة ومش فاضية تيجى
قرار ثالث قررت أخرج ساعة الفطار معرفش بصراحة هعمل إيه بالظبط بس تقريبا ولا بلاش خلوها مفاجأة

مشهد 6
مش لازم نستسلم للوحدة لأنها قريب أو بعيد هتيجى ودى سنه الحياه وعلشان كده قررت أعمل أنا الفرق وأحاول أعمل نفسى ناسية أن أخواتى مش معايا

مشهد 7
أخواتى وحشونى قوى قوى وفيه ناس تانية كمان وحشانى جدااااااااا جدااااااااااااا بس مش قادرة أقول لهم كده ومش عارفة أنا كمان وحشاهم ولا لا
على العموم هشغل نفسى فى رمضان بحاجات كتيرة قوووووووووووى وهدعى كتير ربنا يهدينى ويحققلى اللى بتمناه

Thursday, August 20, 2009

ثالث رمضان عليا وعلى مدونتى

أزيكم وكل سنه وأنتم طيبين ورمضان كريم عليكم إن شاء الله
ده ثالث رمضان يعدى عليا من ساعة ما عملت المدونة ويارب نفضل على طول نحتفل مع بعض برمضان ومبسوطة جدا بأن ربنا رزقنى بأصحاب وأخوات حلوين قوووووووووووووووووووووووووى وكل سنه وأنتم كلكم طيبين وبكل خير
وعلشان خاطركم بقى جبتلكم الفانوس بتاعى على جمب فى المدونة أهو لكل أصحابى كل واحدة وواحد ياخدوه يلعبوا بيه شوية ويرجعوه تانى أيوة بلاش الحركات اللى أنتوا عارفينها دى
كل سنه وأخواتى وأصحابى وأهلى وكل الناس بخير ويمكن ده أول رمضان من غير أخواتى الأتنين ولكن حاسة أن ربنا عوضنى بأخوات تانية كتير قوى حواليا ربنا يخليكم ليا وكل سنه وأنتم طيبين

صوموا كويس وصلوا وأعملوا كل الطاعات كويس قوى وجهزوا دعواتكم وأدعوا كل يوم وإن شاء الله ربنا يستجاب لينا كلنا
وما تنسوناش من دعواتكم وكل سنه وأنتم طيبين

Wednesday, August 19, 2009

كل سنه وأنتم طيبين

كل سنه وأنتم طيبين ورمضان كريم ويارب يكون رمضان السنة دى فاتحة خير علينا كلنا وياريت ما ننساش التركيبة الأساسية وأهم أشياء فى رمضان وهما
أنا والقرآن
أنا والصدقة
أنا وصلة الأرحام
أنا والدعاء
أنا وصلاة التراويح
أنا والصلاة في المسجد
وكل سنه وأنتم طيبين وما تنسوناش من دعائكم

Monday, August 17, 2009

عن الجرح أتحدث


جربت مرة تجرح حد ، طيب أنجرحت مرة قبل كده
ممكن أعرف أحساسك فى الحالتين وأنت بتجرح وأنت مجروح
أكيد فيه أختلاف شاسع بين الأتنين لأن أحساس المجروح غير أحساس الجارح فرق السما والأرض بالظبط

طيب لو كنت طول عمرك بتجرح وبس وماشى تضايق فى الناس وتجرح فيهم فكرت مرة كده ممكن يكون نتيجة جرحك ده إيه وهل حطيت نفسك مكان اللى جرحته وشفت هتحس بإيه
أراهن أى حد بيجرح الناس لو حط نفسه لحظة واحدة مكان الأنسان المجروح هيفضل ندمان طول عمره على اللى عمله وهيتمنى يرجع بيه العمر من تانى وما يعملش اللى عمله ولكن للأسف ساعتها بيكون الوقت عدى وفات
طيب لية أحنا بنعمل فى نفسنا كده ولية بنجرح بعض ونضايق بعض

تحبوا أقولكم لما بتجرحوا حد ممكن يكون نتيجة ده إيه

مفيش حد كبير على الجرح والصدمات ومفيش حد ما قابلش مشاكل ولا عقبات فى حياته ولكن فيه حاجات بتكون أقوى من أى أنسان وممكن جرح أو صدمة واحدة تضيع حياه أنسان بحالها ويفضل سنين أثير الصدمة والجرح دة
وارد جدا أن أى صدمة تجيب الأنسان الأرض وتخليه بدل ماكان أنسان عادى وعايش طبيعى جدا أتقلب للعكس وده مش بمزاجة لأنه مش هو اللى بيتحكم فى مشاعره ولا أحاسيسه وساعتها حياته كلها هتتقلب ومش هتبقى حياه أصلا هيكون زى الميت بالظبط لا منه ميت فعلا ولا منه عايش
حاله كده مالهاش معنى
كمان ممكن جدا يحصل للأنسان ده تعب عضوى بسبب الجرح أو الصدمة
ممكن جدا الأنسان ده بسبب الصدمة تجيله حالة من الخوف والرعب من الناس كلهم أيا كانوا الناس دول حتى لو أقرب الناس ليه وتلاقية مش قادر يخرج ولا يختلط بالناس ودايما حابب يقعد لوحده وممكن يفضل فترة طويلة كده على الحال ده لأنه أتفزع من الناس بسبب اللى شافه وقابله ونتيجة لده بقى خايف يخرج ولا يشوف أى حد ولما يفكر يخرج بسرعة العقل الباطن بيدى أشارات للجسم بتخلية يتراجع تماما عن فكرة الخروج لأنه بيتعب فورا
ممكن كمان اللى أنجرح سواء كانت واحدة أنجرحت من واحد أو العكس أو أى ناس جرحوا بعض ده يسبب لهم عقدة من الطرف الثانى طول حياتهم ويخليهم شايفين الطرف التانى ده عدو ليهم وأن كل الناس وحشه

تخيل بقى لو أنت جرحت حد وبسبب جرحك فضل يتعذب وحياته باظت وقت طويل شوف أنت هتاخد سيئات قد إيه وهتتعذب بسببه قد إيه

وعلى فكرة كلامى ده ممكن تسألوا فيه أى دكتور أن أى صدمة أو جرح ممكن فعلا تدمر حياه أنسان هو يمكن فيه ناس مش أى حاجة تأثر فيهم ولكن فيه ناس تانية ممكن يتأثروا وقوى كمان
وفعلا ممكن بسبب جرح أو صدمة تعمل عقدة للأنسان ده من كل الناس وتخليه خايف ومفزوع من مجرد الخروج من بيته ومقابلة أى حد
وممكن كمان يتعب وتجيله مثلا قرحه عصبية أو أى حاجة تبقى مدمرة عليه حياته وخلاص
فى النهاية أى شىء هيحصل هيعتبر أذى للأنسان ده

طيب إيه رأيكم وأحنا فى الأيام الحلوة دى نحاول نصلح غلطاتنا وكل أنسان جرح حد يطلب منه يسامحه ويحاول يصلح غلطته ولو ده صعب على الأقل يدعى ربنا يغفر له ذنوبه ويسامحه على اللى عمله ويدعى للأنسان اللى ظلمه وجرحه بأن ربنا يفك ضيقتة ويطلعه من اللى هو فيه

ما تيجوا نسامح بعض ونصالح بعض ونبطل نجرح فى الناس وقبل ما نعمل أى شىء وحش نحط نفسنا مكان الناس ونشوف هنحس بإيه وساعتها لا يمكن هنزعل ولا نضايق حد

Tuesday, August 11, 2009

الجواز مش علاقة بين أتنين وبس

وأنا بحضر لأفكار الجزء الثانى من الكتاب وبفكر ابدأ بأيه وكان شاغلنى قوى العلاقة بين الست والراجل خصوصا بعد الجواز ولكنى لاقيت موضوع لأحمد مهنى بعنوان الجواز مش للجنس فقط وعجبنى جدا طريقة تناول أحمد للموضوع وفرحت أنه فيه صوت رجالى وواحد بيفكر كده وبعدها فكرت أكتب موضوعى مع ملاحظة أنه كان فى دماغى حاجات كتيرة من اللى أحمد قالها وبالتالى مش هينفع أكتبها تانى ولازم أقول حاجة جديدة مع وضع لينك موضوعه علشان الموضوع يبقى كامل

فى البداية كده ومن قبل الجواز وفى فترة التعارف والخطوبة اللى المفروض الأتنين بيشوفوا فيها بعض على حقيقتهم ولازم نأكد أنه لازم الأثنين يكونوا على طبيعتهم خاصة لو كان أرتباط تقليدى علشان كل طرف يعرف هل هيقدر يكمل مع الطرف الثانى وهل هيقدر يحبه ويعيش ويكمل معاه حياته ولا لا

عايزة أوضح حاجة مهمة قوى أن الجواز مش مجرد علاقة جسدية بين الأتنين وبس زى ما فيه ناس كتيرة فاكرة وزى ما بيجى فى الأفلام اللى بتصور العلاقة بين أى أتنين سواء كانوا بيحبوا بعض أو متجوزين ما هى الا علاقة جسدية وبس يعنى نلاقى مثلا الأتنين واقفين فى المطبخ بيعملوا أى حاجة وفجأة كده وهما بيجهزوا الأكل ولا بيعملوا شاى حصل أى شىء تافهه فجأة أتحول لعلاقة بينهم
وشوية نشوف واحدة مضايقة وكل الحكاية محتاجة جوزها يطبطب عليها وياخدها فى حضنه وخلاص عادى يعنى برضة فجأة بعد الحضن ده نوصل للمشهد المحفوظ هو يعنى ما ينفعش الأتنين يحضنوا بعض الا ويوصل الموضوع لكده
وشوية ونشوف أتنين بيتخانقوا ومقطعين بعض وشوية وبيتصالحوا وبكل سذاجة وضحك على الناس فجأة نلاقى الخناقة أتحولت لنفس المشهد

يعنى من الآخر الأفلام صورت للناس وللشباب خاصة أن العلاقة بين أى أتنين علاقة جسدية فقط أى موقف بيحصل طول اليوم أيا كان الموقف حتى لو كانوا فى مشوار بالعربية فجأة يتحول لنفس المشهد وبالتالى عقول الشباب ومش الشباب وبس لا البنات كمان أطبع فيها أن الجواز ما هو الا علاقة بين أى أتنين كأن أى واحد وواحدة كل حياتهم هتبقى كده وكل تفكيرهم واللى شاغلهم هو ده وبس
الحياه الزوجية مش كده والأفلام فعلا بتقدم صور غريبة للناس ومش واقعية ابدا وما بتحصلش

الحياه مشاركة بين الأتنين فى كل حاجة ، أتنين يعرفوا يحبوا بعض كويس ، أتنين يضحكوا ويلعبوا ويهزروا مع بعض ، يقفوا مع بعض فى عز البرد فى البلكونة ويلموا الغسيل لأن الدنيا بتمطر ومن كتر البرد يدخلوا والزوج ياخد زوجته فى حضنه مش بهدف الوصول لعلاقة بينهم ولكن بهدف أحساسها بالأمان والدفا ، أتنين يضربوا بعض بأى حاجة قدامهم بالمخدات بالدباديب بأى حاجة يهزروا ويلعبوا مع بعض ويشدوا شعر بعض عادى جداااااااا ، أتنين يساعدوا بعض فى كل حاجة بداية من أن الواحدة تساعد جوزها وهو بيحلق دقنه وتطلع عينه شوية وتبهدله وبعدين تساعده ومفيش مانع أنها تعورة بماكينة الحلاقة عادى جداااااااااااا ، تجهز له هدومة وتساعده يلبسها ومن باب الرخامة تخبى مثلا الشراب أو الجزمة منه ويفضلوا يدوروا عليها مع بعض أكنهم بيلعبوا أستغماية لحد ما تظهر الحاجة ويعرف أنها كانت مخبياها ويخرج زعلان منها وبعدها بشوية ينفجر من الضحك على الموقف ويبعت لها رسالة على الموبايل بيهزر معاها ، واحد يشوف مراته بتسرح شعرها ومخنوقة لأن شعرها طويل ومضايقها ولأنها عارفة أن جوزها بيحب الشعر الطويل مش عارفة تقصره شوية يقوم رايح يساعدها فى تسريح شعرها ويحط لها كريم الشعر ومفيش مانع يلفه معاها وبعدين يبهدله ليها تانى ويحدفوا بعض بالأمشاط والفرش والكريم ، واحد يشوف مراته واقفة بتجهز الأكل فى المطبخ يدخل يساعدها فى تحويل الأطباق على السفرة ومفيش مانع يخبطها بطبق وهو معدى تقوم هيا خبطاه بالمعلقة فى دماغه عااااااااااااااادى ، واحد بعد الأكل يقوم بسرعة يعمل هو الشاى لحد ما هيا تلم الأطباق وتغسلها ومن باب الرخامة ما يحطش لها سكر خالص وتفتكر أنه حط السكر وتيجى تشرب تلاقيه ماسخ ويبقى هاين عليها تصبه على دماغه ومن غير ما ياخد باله تقوم مبدله الكوبايات علشان يشرب هو اللى من غير سكر ، واحدة تشوف جوزها مشغول قوى تقوم تساعده وفجأة وهو بيشتغل يكبس عليه النوم ويقوم نايم على كتفها وعلشان ما تقلقوش تفضل قاعدة فى مكانها ما تتحركش لحد ما يقلق لوحده ويقوم يدخل على السرير ، واحد وواحدة يكونوا بيتفرجوا على فيلم مع بعض وتقوم هيا حاطة راسها على كتفه وهو حاطط أيده على كتفها مش بهدف الوصول لعلاقة ولكن عاااااااااااااااادى جدا منتهى الحنان والألفة بين أى أثنين ، واحد وواحدة يخرجوا يتشموا شوية فى الشارع ولا على الكورنيش وهما ماسكين أيد بعض مفيهاش حاجة ابدا ولا حد هيقول عليهم حاجة دى مراته يعنى عادى ولا هو ما ينفعش الأتنين المتجوزين يتفسحوا شوية ويمشوا على الكورنيش ويمسكوا أيدين بعض ، يروحوا السينما ويتفرجوا على الأفلام اللى بيحبوها وهما بياكلوا فيشار ويقعدوا يبهدلوا فى بعض ويوقعوا الفيشار على هدوم بعض ، يروحوا الندوات والحفلات والحاجات اللى بيحبوها مع بعض وحتى لو كل طرف له أهتمامات مختلفة عن التانى مفيش مانع كل واحد يشارك التانى فى أهتماماته ده دى قمه الرومانسية والحب ، كل فترة ياخدوا أجازة من شغلهم ويسافروا أى مكان يغيروا جو حتى لو هيسافروا لأخر الشارع المهم يغيروا جو ويشوفوا وجوه وحاجات جديدة عليهم ، لما واحد ولا واحدة يخرج يشترى شوية طلبات ويقوم مشترى إن شاء الله وردة ويرجع يديها للطرف التانى ياااااااااااه قمه الرومانسية مش لازم يبقى بوكية فيه مليون وردة ولا هدية غالية لو ورده واحدة هتكون أحلى من أى حاجة تانية الهدية فى معناها مش فى ثمنها ، وحاجات تانية كتيرة قوووووووووووووووووووى ممكن تحصل بين أى أتنين وتخلى الحياه ليها طعم تانى خالص مش كلها خناق فى زعيق ومشاكل ولا زى ما الأفلام بتورى الناس أن العلاقة بين الأتنين مجرد علاقة جسدية
ولا زى ما فيه شباب مفكرة أن البنات والستات ما بتحبش ده وعلى طول غاوية نكد وخناق ومشاكل لا لا مين قال كده محدش غاوى نكد ولا مشاكل ولكن مش لازم كل طرف يستنى أن التانى هو اللى يبدأ لية ما يبدأش كل واحد ويشوف رد فعل التانى لية نفضل مستنين دايما المبادرة من الطرف التانى ولو محصلتش نقول يوووووووووه ده الستات دول نكديين ولا بيعرفوا يضحكوا ولا يهزروا ولا الحياه ليهم طعم معاهم

ومش معنى كلامى أنى بنكر العلاقة الجسدية ولا بقول أنها عيب ولا حرام ولكن الجواز مش بس علاقة لأنه لو كان كده يبقى أحنا مش هنفرق كتير عن الحيوانات ولأننا مش عايشين ولا بنمشى ورا غرايزنا وبس وكمان مش هيبقى له داعى كل واحد وواحدة يختاروا الطرف التانى بعناية طالما مش هيكون فيه أى شىء بينهم غير كده أعتقد مش هتفرق أى حاجة
لازم يكون فيه حب أو حتى بداية أعجاب وطالما فى فترة الخطوبة محصلش أى أنجذاب ولا بوادر حب يبقى ننهى العلاقة أحسن لأنها هتبقى روتينية وبس وجواز لهدف الجواز مش أكتر ولكن لو حصل بداية أعجاب وده فى جواز الصالونات اللى الأتنين بيكونوا لسة أول مرة يشوفوا بعض وماكانوش أصلا يعرفوا بعض بأى طريقة ومفيش أعجاب متبادل ممكن فعلا الموضوع يتطور لحب وتبقى أحلى عيشة لأن الحياه هتبقى حب مع هزار مع خناق مع لعب مع أهتمامات مشتركة بينهم مع كلام ومناقشات ساعات هادية وساعات حامية مع حاجات كتيرة بتخلى الحياه أحلى بكتير

وده لينك موضوع أحمد مهنى
http://www.facebook.com/note.php?note_id=106749381649

ولسة الكلام ما أنتهاش وأنتظروا الباقى

غطس جوه نفسك

جربت مرة تدخل جوه نفسك وماتعرفش تطلع تانى أو تلاقى نفسك عايز تفضل جوه نفسك طبعا كلام غريب
هو مش غريب لأن كتير مننا بيحسوا بيه وبيعشوه كمان
طيب نبدأ من الأغتراب والأحساس بالغربة اللى الواحد بيحسه وبيخليه يدخل جوة ذاته
فى دراستى للفلسفة كان فيه موضوع عندنا بيتكلم عن الأغتراب والغربة مع توضيح بسيط لأنواع الغربة
فى البداية لازم نفرق بين نوعين من الغربة وهما زى ما قال التوحيدى :- غربة مكانية وغربة نفسية مأساوية
الغربة المكانية بيعتبرها التوحيدى غربة مؤقته أو مرهونة بارتحال الغريب وهجرته عن أهله وذويه
والغربة النفسية بيصفها بأنها الغربة الحقيقية لأنها غربة دائمة وعميقة ومريرة فالغريب الذى يعنيه التوحيدى غريب فى وطنه وغريب وهو بين أصحابه وأحبابه لأنه بيحمل الغربة فى داخله لذلك هو دائما متبرم ومتمرد على المكان
ياترى فيه حد حس بالغربة دى بالنوع الأقوى واللى بيأثر أكتر على الأنسان طيب كنتوا بتحسوا بأيه وهل الأحساس ده موجود دايما ولا بيجى ويروح لأنه لو بيجى ويروح هتكون حاجة كويسة لأن كده أنت مش هتكون أنسان تعبان نفسيا وبتعانى ولكن لو كان موجود على طول هتعمل أيه
كتير ناس مننا ساعات بتضايق وبتحصل مواقف تضايقها وتلاقى الواحد كرد فعل لاأرادى منه بيبعد عن الناس وبيعيش جوه نفسه زى ما أنا قلت ويكون فعلا حابب يبقى بعيد وبيحس بغربة شديدة حتى وهو بين أهله وأصدقائة وكل الناس المقربين له
لكن فيه نوع الطبيعى بتاعهم أحساسهم بالغربة يعنى حاجة طبيعية كده عندهم أنهم يكونوا حاسين بالغربة وهو فى وسط كل الناس وده طبعا أحساس بشع جدا وهو ده النوع التانى من الأغتراب عند التوحيدى اللى بيسميها غربة نفسية مأساوية وأنا لما فكرت فى النوع ده وحطيت نفسى بجد مكان الناس اللى بتكون حاسة بكده بجد مقدرتش أحس بأى حاجة حلوة أو كويسة ولاقيت أنه مهما الناس اللى حواليا عملوا أو أنا عملت برضة الأحساس ده هيفضل متملكنى وأتمنيت فعلا مايكونش فيه حد فى عصرنا ده عايش النوع ده من الغربة
هو يمكن فى عصرنا كترت شوية الأزمات النفسية والصراعات الداخلية جوه الأنسان ويعنى بتوصل للى أنا قلته أنك بتحس أوقات بالغربة عن كل اللى حواليك وفى نفس الوقت بتحب تعيش جوه نفسك وتفضل معاها وما بتكونش عندك الرغبة أنك تطلع منها
ولكن سؤالى برضة فيه حد بيحب يعيش جوه نفسه سواء كانت فيه حاجة مضيقاه ولا لا بمعنى أيه بمعنى أنى أقول كل حاجة جوايا لنفسى أفضفض لنفسى وما أكونش من النوع اللى بيحكى للناس وكل حاجة بخليها لنفسى لأنى حاسة أن نفسى أكتر حد هيحسنى وهيفهمنى وعمرها ما هتقلب عليها ولا هتعايرنى بأى حاجة غلط وهيا برضة أول حد هيحاسبنى وهيلومنى وهيوجهنى
فيه حد حس الأحساس ده أو حابب يعيشه أو يحسه طيب لو حد عاشه كان بيحس بأيه ولو حد ما جربوش هل نفسك تجربه ؟
أيه اللى بيخلى الناس توصل لكده هل كتر المشاكل والأزمات والضغوط اللى حوالينا بتدفع الناس الى انها تكون تعبانة نفسيا ؟
ولا الحاجات الكتير اللى بيكون الواحد بيعملها رغما عنه زى مثلا بيتعلم حاجة هو مش عايزها بيشتغل حاجة مش حابهها بيعيش حياه بطريقة مش عجباه
وايه اللى بيخلى الناس عايزة تدخل جوه نفسها وتفضل جواها وما تطلعش وما تحكيش لحد أى حاجة هل لعدم ثقتهم فى أى حد ؟ ولا لأن الناس ما بقتش زى زمان
لية الناس بقت بتخاف من بعضها كده فيه حد عنده أجابه
أعتقد لو الناس رجعت زى زمان ورجعت لها الأخلاق والعادات والتقاليد والحاجات اللى نسيناها وما بقتش موجودة مش هنكون محتاجين نعالج نفسنا نفسيا ولا هنقول أننا عندنا يأس ولا أحباط ولا الكلام الكبير ده
بس هل ممكن ده يحصل ولا خلاص دى بقت أحلام ومستحيلة ؟
موضوع أتنشر ليا فى مجلة على صوتك عدد مارس 2008

Friday, August 7, 2009

انتى طالق


بعد قصة حب طويلة وخطوبة كام سنه وكانت مليانة حب ورومانسية وآحلام وردية أنتهت الحكاية بأنتى طالق

فلاش باااااااااااااالك سريع لأول يوم زواج

الزوج :- يااااااااااااااااه مش قادر أصدق نفسى من الفرحة معقولة بقينا فى بيت واحد بعد كل السنين دى
الزوجة :- ترد بخجل ولا أنا قادرة أصدق وحاسة أنى بحلم وطايرة فى السما بجد
الزوج :- بحبك
الزوجة :- وأنا كمان

بعد مرور أسبوع على الجواز والرومانسية الجميلة والكلام والفسح وغيره وغيره ورجعوا من أجازتهم ورجع الزوج والزوجة لشغلهم وكل واحد خارج من البيت بكلمات حب ورومانسية وكلام يقطع القلب ولكن بعد رجوعهم من شغلهم بقى بيحصل إيه
الزوج بياخد شاور سريع وبعدين يدخل ينام كام ساعة
الزوجة بتجهز الأكل وبتشوف مهامها المنزلية وبعدين تصحى الزوج ويتغدوا سوا وبعدها وعلى قد ما بتكون تعبانة ونفسها ترتاح شوية ولكنها بتفضل تقعد مع جوزها ولأن الأتنين من هواه النت فيقوم الزوج جايب اللاب توب بتاعه من غير ما ينطق ولا كلمة ويقعد على كرسى الأنترية يلف لفه على النت تاخد تقريبا ساعات كتيرة وتنتهى وقت نومه بالليل وينسى تماما أنه فيه زوجة معاه محتاجة يتكلم معاها حتى لو نص ساعة بس
وتستمر الحياه هكذا وكل يوم بعد الرجوع من الشغل يمسك اللاب توب مع تجاهله تماما لوجود واحدة معاه ومابقاش فيه بينهم ولا كلمة ومع محاولاتها للكلام معاه ولأنه يحس بوجودها ولكن لا حياه لمن تنادى وبقت هيا كمان بتعمل زيه وتمسك اللاب توب الخاص بها وتتابع شغلها

بعد وقت طويل وأيام طويلة بالنظام ده والزوجة فعلا ملت وزهقت من الصمت والحياه الباردة دى حصل الحوار ده بينها وبين جوزها ولكنه على الميل

الزوجة :- على فكرة أنت وحشتنى جدا
الزوج :- وانتى كمان قوى
الزوجة :- بحبك قووووووووى
الزوج :- وأنا كمان
الزوجة :- محتاجالك قوى
الزوج :- وأنا كمان
الزوجة:- ممكن تكلمنى بس عشر دقايق
الزوج :- ما أحنا بنتكلم أهو قولى عايزة إيه
الزوجة :- نفسى أسمع صوتك كلمنى قول أى حاجة
الزوج :- ههههههههههههههههههه
الزوجة :- أنا بتكلم جد وحشنى صوتك قوى وكلامك وهزارك وكل حاجة فيك
الزوج :- لا تعليق
الزوجة :- طلقنى
الزوج :- إنتى طالق
الزوجة :- قامت ومسكت اللاب توب اللى فى أيد جوزها وقالت له بصوت عالى طلقنى
الزوج :- بكل بساطة قال لها أنتى طالق وخد منها اللاب توب
الزوجة :- لمت هدومها فى الشنط وهيا خارجة جوزها أخيرا خد باله وقال لها انتى رايحة فين يا سعاد
الزوجة :- قالت له خلى النت واللاب توب ينفعوك وورقتى توصلنى على بيت أهلى يا فوزى
الزوج :- لا يا سعاد أنا بحبك ما تسبينيش
الزوجة :- ده كان زمان دلوقتى وبعد جرحك ليا ومعاملتك ليا على إنى خدامة تطبخ وتمسح وتنضف وحتى مستكتر تكلمنى كلمة واحدة كل شىء خلاص أنتهى
الزوج :- طيب تعالى نتكلم
الزوجة :- خلاص أنتهى وقت الكلام طلقنى وياريت بالثلاثة
الزوج :- انتى طالق بالثلاثة ورجع تانى يمسك اللاب توب بتاعه ويكمل اللى كان بيعمله