Friday, August 21, 2009

رمضان زمان ودلوقتى

مشهد 1
من سنين طويلة لما كنا صغيرين أول ما المغرب يدن تلاقى حركة هنا وهناك وناس بتتكعبل فى بعضها وعيال بتتنطط وتقريبا كنت أنا وأخواتى وقرايبى العيال دول
كان رمضان على طول لمة وغالبا كنا بنقضية فى بلدنا وكل قرايبنا اللى زينا مش عايشين فى البلد برضة بيجوا وكانت بتبقى لمه حلوة قوى
وأيام نقضية فى بيتنا وعندنا قرايبنا برضة أو نسافر عند قرايبنا فى أماكن تانية وكان معظم الشهر لمة وهيصه وناس كتيرة وعلشان كده طلعنا كلنا بنحب اللمة دى قوى ومرتبطين قوى بقرايبنا وأنا وولاد وبنات أعمامى وخالاتى وأخوالى بقينا زى الأخوات بالظبط من كتر أرتباط أهالينا ببعضهم ولمتنا فى أوقات كتيرة


مشهد 2
كبرنا شوية وبقى اللى فى الجامعة فى الجامعة واللى بيشتغل بيشتغل وما بقناش فاضين زى الأول وبقى قليل لما نتجمع فى رمضان زى الأول يعنى بسيط قوى لما نسافر عند حد أو حد يجى عندنا وده لأننا كلنا مش عايشين فى مكان واحد ولكن كانت عادتنا كل أخر رمضان قبل العيد بيومين ثلاثة نسافر كلنا وكل الناس اللى مش عايشة فى بلدنا للبلد ونفضل لحد أخر يوم العيد هنااااك ويمكن دى العادة الوحيدة اللى مستمرين عليها لحد دلوقتى شىء مقدس تقضية العيد فى البلد فى وسط العيلة واللمة

مشهد 3
المغرب بيدن وأخويا لسة راجع من شغله والتانى من الجامعة وأنا وماما بنجهز الفطار وخلافه وأخواتى بيجروا من هنا لهنا علشان يصلوا ويجوا نفطر كلنا مع بعض

مشهد 4
المغرب هيدن السنه دى
مفيش صوت مفيش حس مفيش أخويا يجى يهزر معايا مفيش أخويا التانى يطلب منى حاجة
مفيش غيرى أنا وبابا وماما هنفطر كل يوم لوحدنا

مشهد 5
قررت قرار هااااااااام بدل ما هنسافر قبل العيد بيوم ولا أتنين البلد هنسافر قبله بأسبوع كامل وهنقعد لحد العيد
قرار تانى كل أسبوع هاخد بابا وماما ونروح البلد أو عند حد من قرايبنا طالما باقى الناس مشغولة ومش فاضية تيجى
قرار ثالث قررت أخرج ساعة الفطار معرفش بصراحة هعمل إيه بالظبط بس تقريبا ولا بلاش خلوها مفاجأة

مشهد 6
مش لازم نستسلم للوحدة لأنها قريب أو بعيد هتيجى ودى سنه الحياه وعلشان كده قررت أعمل أنا الفرق وأحاول أعمل نفسى ناسية أن أخواتى مش معايا

مشهد 7
أخواتى وحشونى قوى قوى وفيه ناس تانية كمان وحشانى جدااااااااا جدااااااااااااا بس مش قادرة أقول لهم كده ومش عارفة أنا كمان وحشاهم ولا لا
على العموم هشغل نفسى فى رمضان بحاجات كتيرة قوووووووووووى وهدعى كتير ربنا يهدينى ويحققلى اللى بتمناه

15 comments:

بن آدم said...

السلام عليكم
كل سنة وإنت طيبة
الوحدة فعلا وحشة جداااااا
عديت على الموضع ده بس أنا أبعد شوية معدش غيرى أنا ووالدى وساعات بيسيبنى ويروح لأحفاده وطبعا أنا أفضل فى البيت لوحدى أتصل بييه أقله مش عارف أنام فى البيت لواحدى يقللى عشان تعرف انك عايز تعمل فيا اييه
يقصد انى أتجوز بعيد عنه وأسيبه لوحده

ربنا يعافى الجميع من الوحدة يااارب

ذكريات حلوة بيتهيألى متشابهه مع كتيير
ربنا يجمعكم دايما على خير

إنسانة said...

بسم الله الرحمن الرحيم
أولا كل سنه وانتى طيبه يااحلى بوسبوس وربنا يتقبل منا ومنك صالح الأعمال وجد يكون رمضان السنه دى مختلف عن أى رمضان فات
بصى البوست رائعه يابسمه بتوصف اللى كلنا فية مع الفرق إن ده هيكون أول رمضان ليا من غير اختى الوحيدة ده غير انك زى ماقلتى انك لحد دلوقتى بتروحى البلد وكلكم بتتجمعوا لكن احنا فى نفس المدينة ومع ذلك بيكتفوا بالتجمع اول يوم العيد لمده لاتزيد عن ساعتين ودول أهل والدتى لكن بقى أهل والدى الموضوع مختلف حبتين بيتجمعوا كتير وبنسهر بالساعات كلنا سوا.... المحزن نظرتك الواقعية حبتين من إن الوحده هتيجى هتيجى ليه كدة بس النظرة الفظيعة دى... طب بالنسبة للى حياته ماشية على طول الخط كده هيكملها كده ولا ايه برضة... عموما انا مستنيه افكارك المجنونة وهتنزلى وقت الفطار تعملى ايه يابسووم
وكل سنه وانتى طيبة ورمضان كريم
ياعسل
أسماء حجازى

إنسانة said...

بسم الله الرحمن الرحيم
أولا كل سنه وانتى طيبه يااحلى بوسبوس وربنا يتقبل منا ومنك صالح الأعمال وجد يكون رمضان السنه دى مختلف عن أى رمضان فات
بصى البوست رائعه يابسمه بتوصف اللى كلنا فية مع الفرق إن ده هيكون أول رمضان ليا من غير اختى الوحيدة ده غير انك زى ماقلتى انك لحد دلوقتى بتروحى البلد وكلكم بتتجمعوا لكن احنا فى نفس المدينة ومع ذلك بيكتفوا بالتجمع اول يوم العيد لمده لاتزيد عن ساعتين ودول أهل والدتى لكن بقى أهل والدى الموضوع مختلف حبتين بيتجمعوا كتير وبنسهر بالساعات كلنا سوا.... المحزن نظرتك الواقعية حبتين من إن الوحده هتيجى هتيجى ليه كدة بس النظرة الفظيعة دى... طب بالنسبة للى حياته ماشية على طول الخط كده هيكملها كده ولا ايه برضة... عموما انا مستنيه افكارك المجنونة وهتنزلى وقت الفطار تعملى ايه يابسووم
وكل سنه وانتى طيبة ورمضان كريم
ياعسل
أسماء حجازى

Mohamed Hamdy said...

كل سنه وانتى طيبه يا بوسبوس

KING TOOOT said...

وحشتينا يا بسمة جدا
أنا و هبة و عمر بجد مفتقدينك أنتي و كل أصحابنا و لمة المجلة
فاكراها؟؟
علشان كده عايزين نبقى نفطر مع بعض كلنا في رمضان يوم
بلغي كل الناس و الحاضر يعلم الغايب إن كل أعضاء فريق علّي صوتك الله يرحمها معزومين على الفطار ده
بس كل واحد يجيب أكله معااااه
هههههههههههههههه
KING TOOOT

mahasen saber said...

كل رمضان وانتى بالف خير وسلام
يا جميله

ربنا يعود عليكى الايام وعلى كل من تحبين بكل خير

Anonymous said...

وليه مش قادرة تقولي لهم
ولا هي كده وصلت لهم

Anonymous said...

ربنا يتقبل منك ان شاء الله
وللمرة التالتة كل سنة وانتي طيبة

bos bos said...

بن آدم

وعليكم السلام
وأنت طيب وبكل خير

وفعلا دى سنه الحياه ومفيش مفر منها أبدااااااااااااااا

وأكيد الذكريات دى مشتركة بين ناس كتيرة قووووووووى

كل سنه وأنت طيب

bos bos said...

إنسانة

وانتى طيبة وبكل خير يا قمراية
وربنا يتقبل مننا كلنا إن شاء الله

أنا قصدى بموضوع الوحده جاية جاية أن كل حد هينشغل فى حياته وبكرة كل واحد يبقى له بيته وهكذا

مش عارفة لسة هنزل أعمل إيه انتى عارفة انى مجنونة بس غالبا هرجع فى كلامى هروح فين بس وأسيب ماما وبابا
:)))))

كل سنه وانتى طيبة يا قمر

bos bos said...

محمد حمدى

وانت طيب وبكل خير يا فندم

bos bos said...

وليد جوده

يا خبر يا فندم ده أنت وهبه وعمر الجميل اللى وحشتونى جدا جدا جدا ونفسى أشوفكم قووووووووووووووى

وبعدين مرحومة لية بس ما تخلنيش أتكلم بقى قعدنا نتحايل عليك وأنت اللى مش فاضى
عاااااااااااااا
اه يا حبيبتى يا على صوتك

:))))

اه طبعا وحشانى اللمة جدا بس أنت عارف موضوع السفر هحاول بجد أشوف صرفة وأشوف مين ممكن يجى معايا

وأحتمال يبقى فيه أفطار مدونين السنه دى ممكن نخليها كلها يوم واحد

هشوف الظروف وهبلغك أكيييييييييييد

سلاااااااااامى لهبه الجميلة ولعمر لحد ما أشوفكم

وكل سنه وأنتم طيبين

bos bos said...

محاسن

وانتى بخير وبصحة وسلامة انتى وبيرو الجميل

ربنا يتقبل منك يارب

bos bos said...

Anonymous

مش قادرة أقول لهم لميستوعبوش هما قد إيه واحشنى ومفتقداهم ومفتقدة طعم الحياه من غيرهم
ولأن المشاعر دايما مش بتترجم بالكلام

bos bos said...

Anonymous

وبعدين هيا أكيد وصلت لهم يعنى

----------------------------
وربنا يتقبل مننا كلنا إن شاء الله

وكل سنه وأنت طيب