Friday, August 7, 2009

انتى طالق


بعد قصة حب طويلة وخطوبة كام سنه وكانت مليانة حب ورومانسية وآحلام وردية أنتهت الحكاية بأنتى طالق

فلاش باااااااااااااالك سريع لأول يوم زواج

الزوج :- يااااااااااااااااه مش قادر أصدق نفسى من الفرحة معقولة بقينا فى بيت واحد بعد كل السنين دى
الزوجة :- ترد بخجل ولا أنا قادرة أصدق وحاسة أنى بحلم وطايرة فى السما بجد
الزوج :- بحبك
الزوجة :- وأنا كمان

بعد مرور أسبوع على الجواز والرومانسية الجميلة والكلام والفسح وغيره وغيره ورجعوا من أجازتهم ورجع الزوج والزوجة لشغلهم وكل واحد خارج من البيت بكلمات حب ورومانسية وكلام يقطع القلب ولكن بعد رجوعهم من شغلهم بقى بيحصل إيه
الزوج بياخد شاور سريع وبعدين يدخل ينام كام ساعة
الزوجة بتجهز الأكل وبتشوف مهامها المنزلية وبعدين تصحى الزوج ويتغدوا سوا وبعدها وعلى قد ما بتكون تعبانة ونفسها ترتاح شوية ولكنها بتفضل تقعد مع جوزها ولأن الأتنين من هواه النت فيقوم الزوج جايب اللاب توب بتاعه من غير ما ينطق ولا كلمة ويقعد على كرسى الأنترية يلف لفه على النت تاخد تقريبا ساعات كتيرة وتنتهى وقت نومه بالليل وينسى تماما أنه فيه زوجة معاه محتاجة يتكلم معاها حتى لو نص ساعة بس
وتستمر الحياه هكذا وكل يوم بعد الرجوع من الشغل يمسك اللاب توب مع تجاهله تماما لوجود واحدة معاه ومابقاش فيه بينهم ولا كلمة ومع محاولاتها للكلام معاه ولأنه يحس بوجودها ولكن لا حياه لمن تنادى وبقت هيا كمان بتعمل زيه وتمسك اللاب توب الخاص بها وتتابع شغلها

بعد وقت طويل وأيام طويلة بالنظام ده والزوجة فعلا ملت وزهقت من الصمت والحياه الباردة دى حصل الحوار ده بينها وبين جوزها ولكنه على الميل

الزوجة :- على فكرة أنت وحشتنى جدا
الزوج :- وانتى كمان قوى
الزوجة :- بحبك قووووووووى
الزوج :- وأنا كمان
الزوجة :- محتاجالك قوى
الزوج :- وأنا كمان
الزوجة:- ممكن تكلمنى بس عشر دقايق
الزوج :- ما أحنا بنتكلم أهو قولى عايزة إيه
الزوجة :- نفسى أسمع صوتك كلمنى قول أى حاجة
الزوج :- ههههههههههههههههههه
الزوجة :- أنا بتكلم جد وحشنى صوتك قوى وكلامك وهزارك وكل حاجة فيك
الزوج :- لا تعليق
الزوجة :- طلقنى
الزوج :- إنتى طالق
الزوجة :- قامت ومسكت اللاب توب اللى فى أيد جوزها وقالت له بصوت عالى طلقنى
الزوج :- بكل بساطة قال لها أنتى طالق وخد منها اللاب توب
الزوجة :- لمت هدومها فى الشنط وهيا خارجة جوزها أخيرا خد باله وقال لها انتى رايحة فين يا سعاد
الزوجة :- قالت له خلى النت واللاب توب ينفعوك وورقتى توصلنى على بيت أهلى يا فوزى
الزوج :- لا يا سعاد أنا بحبك ما تسبينيش
الزوجة :- ده كان زمان دلوقتى وبعد جرحك ليا ومعاملتك ليا على إنى خدامة تطبخ وتمسح وتنضف وحتى مستكتر تكلمنى كلمة واحدة كل شىء خلاص أنتهى
الزوج :- طيب تعالى نتكلم
الزوجة :- خلاص أنتهى وقت الكلام طلقنى وياريت بالثلاثة
الزوج :- انتى طالق بالثلاثة ورجع تانى يمسك اللاب توب بتاعه ويكمل اللى كان بيعمله

5 comments:

THE illusionist said...

الزوج :- انتى طالق بالثلاثة ورجع تانى يمسك اللاب توب بتاعه ويكمل اللى كان بيعمله


والله احلى واجب
عارفه لو كانوا كملوا الجواز على النت كمان
كان افضل
بدل الفرح وتعمله اكل
كان يبقوا متجوزين على النت
على الاقل
الكلام الحلو هيقولهولها برضه
وهيقعد معاها كتير
او اخر حل
يشيتوا هما الاتنين
هيا فى الصالون
وهو فى البالكونه

صيدلانيه طالعه نازله said...

اللى يغيظ انه طلقها و هو مش مركز او واخد باله و بعد كده سألها و هو مستغرب انتى رايحه فين
و فى الاخر قالتله لقنى بالتلاته الحقيقه الراجل طلع اخلاق و محبش يكسفها
ناس ذوق ذوق الصراح
بس هو ده المتوقع فى العصر اللى احنا عايشينه و لسه ما خفى كان اعظم

son's egypt said...

السلام عليكم
الحياة الجافة اللي بين الزوجين هي فعلا اللي ممكن توصل لمرحلة الطلاق
طالما لا يوجد نفاهم او حوار متبادل بين الاثنين

أميرة ويلز said...

هههههههههههه
مش للدرجة دي يابوسبوس يعني في حد بالدرجة دي من الاستهتار وعدم الاحساس والامبالاة ؟؟ احتمال برده

مروة عوض said...

انا شايفة ان منقدرش نحمل طرف واحد المسئولية لان وصول الحياة للشكل ده مسئولية الطرفين الحياة بعد الزواج بتكون محتاجة مجهود من الراجل والست عشان يحافظوا عليها
هي كان لازم تعمل مجهود مش تبقى سلبيه وهي شايفاه بيبعد عنها واول ما تتكلم تقول " طلقني "