Saturday, November 12, 2011

رائحة الشتاء

إنها الرائحة التى تبعث على نفسي الأمل والراحة والطمأنينة ، رائحة الشتاء والمطر

لعلها موجودة طوال العام فالشتاء أكثر فصول السنة قربا الى قلبي وعقلى

Sunday, October 16, 2011

رسائل ربانية

لا تيأس من رحمة الله فربما يكون تأخر شىء ما عنك لصالحك وتذكر أن الرسائل الربانية أعظم شىء فى الوجود فبها يطمئن قلبك ويرتاح

Sunday, August 21, 2011

أعطنى مقالا وأخطبنى

بعد المقال العاطشفى اللى قطع قلوب فئة من الناس لاقيت بعض البنات يا عينى قلبهم رفرف والدمعة فرت من عيونهم وقطعوا قلبى بصراحة ببرائتهم الغريبة وأمنيتهم أنه يتكتب فيهم مقال زى ده !!!

على أعتبار أن الحب والرومانسية مقطعين بعضهم وهنلاقى الرجالة من كتر ما بيقولوا كلام حلو هيكتبوا كمان
انتوا مش عايشين فى الدنيا اللى أحنا عايشين فيها
على ما أعتقد أنهم أصلا يادوب بيقولوا كلمتين وحلو عليكى قوى كده ما تطمعيش قوى بقى وتعيشى الدور
ولنفترض أنك ارتبطتى بواحد ما بيعرفش يكتب هتبقى النتيجة إيه هتسيبه وتقولى له يا المقالة يا مفيش جوازة
وأكيد الفترة الجاية هنلاقى ناس دماغها على قدها هتعمل مليون مشكلة مع بعضهم عشان الموضوع ده وأسمعوا منى واتفرجوا بعد كده

فاكرين مسلسل نور ومهند لما الستات والبنات اتجننوا وكل واحدة تقول لجوزها شوف مهند بيعامل نور أزاى ما بتعاملنيش ليه كده

وقريبا هتبقى أحدث صيحات الجواز الواحد يبقى داخل بيت العروسة وفى إيده مقالة وكل ما يزيد عدد المقالات أنت الكسبان !!


ومش بعيدالأمثال وأغاني تتحول وتبقى كده

ضل مقال ولا ضل جريدة

ومقال فى اليد خير من عشرة على المجلة

يا واخد المقال على جماله بكرة يروح الجمال ويبقى المقال على حاله

يا ولاد بلدنا يوم الخميس هكتب مقالى وأبقى عريس والجريدة عامة وهتبقى لمه

فى النهاية أنا ضد التعدى على حرية أى حد طالما حريته دى ما ضرتش حد تانى وللأسف إحنا أتعودنا على التطفل والتدخل فى كل كبيرة وصغيرة فى حياة كل الناس خاصة لو كانوا معروفين ودايما بنخلى سوء النية هو اللى سابقنا
ليه ما نسيبش الناس فى حالها وكل واحد حر فى حياته

أنت حر وأعمل اللى يريحك طالما حريتك دى مش على حساب حد تانى



Monday, August 8, 2011

يــــــــــــــــــــارب

يَـآ رَبْ . . إجْعَلْهُ شَهْرَ تَتَبَدّلُ فِيهْ الذّنُوبْ إلَـى حَسَنَـآتْ . . وَ هُمُومُنَـآ إلَـى أفْرآحْ . . وَ أَحْلآمُنَـآ إِلَـى وَآقِع يَـآ الله

Sunday, July 31, 2011

اهو جه ياولاد

كل سنه وكلكم طيبين ورمضان كريم عليكم ويارب يكون أحلى رمضان وربنا يغفر لنا كلنا ذنوبنا ويعتقنا من النار ويكتبنا من أهل الجنة إن شاء الله







Wednesday, July 6, 2011

الصبر

كتير بنمر بتجارب ومحن وحاجات بتكون محتاجة مننا شوية صبر والإيمان بقضاء ربنا
وكتير بتجيلنا رسايل ربانية تطمنا وتعرفنا انه مهما طال الظلم والبلاء أكيد هايجى يوم وناخد حقنا ونرتاح

يمكن ساعات بنغلط ونزعل لان حقنا لسة ما رجعش ولسة الظلم واجعنا ولكن وقتها لازم نفتكر أن ربنا كبير ومفيش حاجة بتحصل الا لما بنتعلم منها وأن ربنا مش هيسيبنا أبدااااااااا الا لما يريحنا ويعمل لنا الحاجة الكويسة دايما

{ وبشر الصابرين الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون }

Monday, June 20, 2011

يوم التدوين ضد التحرش الجنسى ( كرهت كوني أنثى.. مع أني أحبها

امرأة.. بنت.. فتاة.. سيدة.. كلها مرادفات لنفس المعنى.. أنثى...

الأنثى التي يراها البعض في هيئة جسد جميل وأداة للمتعة فقط لا أكثر ولا أقل..

الأنثى التي جعلتني أخاف وأبكي وأتردد ثم أعود وأتمرد..

الأنثى التي حاولت إخفاء معالمها بالملابس الواسعة عندما بدأت تتضح على جسدي الصغير، ففي البداية كنت أخفيها بسبب ديني وتعاليمه، وبسبب ما تربيت ونشأت عليه، ورأيت أمي وكل من أعرفهم هكذا، ولكن بعد كل هذه الأسباب جاء سبب آخر، وهو أنني شعرت من داخلي بأن هذه الأنثى لا تريد أن يراها أحد أيًّا كان لأسباب أخرى سوف أذكرها لاحقًا..

الأنثى التي يراها البعض ملكًا لهم، أيًّا كانت هذه الأنثى، حتى لو كانت لا تمت لهم بصلة، فعقولهم تصور لهم أنها ملك لهم، ومن حقهم النظر إليها، وانتهاك جسدها، وترديد الكلمات والعبارات غير اللائقة، وأحيانًا يصل الأمر للمس هذه الأنثى، وحدوث ما تعلمونه كلكم من حوادث اغتصاب وهتك عرض الكثيرات.

الأنثى التي كرهتها يومًا ما، وجعلتني في وقت ما أخاف من مجرد السير بمفردي في الشارع، لا لشيء إلا لأني أنثى، وكنت مجبرة في بعض الأحيان على الخروج مبكرًا للذهاب إلى المدرسة أو الجامعة أو العمل، وكل هذا كان يستدعي خروجي مبكرًا، والسير بمفردي، والشوارع هادئة ساكنة لا يوجد بها إلا قليلون مثلي وأشخاص أخرى ممن يطلق عليهم الذئاب البشرية، الذين طالما سمعت بأذني منهم أبشع الألفاظ والكلمات التي لا يندى لها الجبين فقط، ولكن تدعو أي أنثى إلى السقوط مغشيًّا عليها من هول هذه الكلمات.

الأنثى التي جعلتني أوقات كثيرة وبعد إرهابي وخوفي من مجرد سماع هذه الكلمات إلى الجري حتى أصل إلى نهاية الشارع الذي يوجد به هؤلاء الأوغاد، ولأن الخوف الذي كان يتملكني، وخاصة خوفي من أن يتطور الأمر إلى شيء أكبر من مجرد الكلمات والنظرات..

النظرات التي جعلتني أكره كوني أنثى، فكانت كل نظرة مثل السهم الذي يخترق جسدي ويمزقه..

الخوف الذي كان أحيانًا كثيرة يجعلني أعود إلى المنزل وأوقظ أحد إخوتي للخروج معي حتى أصل إلى المكان الذي أريده.

وبغض النظر عن اللوم الذي يُلقى على أي فتاة يحدث لها أي شيء لأن ملابسها غير لائقة أو عارية نوعًا ما، فما هو العذر الذي سوف أتقبله أو تتقبله من ترتدي زيًّا محتشمًا وعاديًّا جدًّا.

ومع أني لا أعطي العذر لأي شخص بانتهاك أي جسد حتى لو كان بمجرد النظر بسبب ملابسها، فتعالوا معي ننظر إلى هذين المثلين:

عندما يكون أحد الأشخاص صائمًا في يوم حار جدًّا، وفعل مجهودًا كبيرًا جعل العطش يزداد ويزداد، إلى درجة أنه كان سيموت من العطش، وفجأة وجد أمامه كوب ماء مثلج جميل جدًّا، ماذا سيحدث في هذا الموقف؟ هل سيشرب أم يتماسك حتى ينتهي وقت الصيام؟ وهل لو شرب سنعطيه العذر في أن الجو كان حارًّا وأنه كان سيموت من العطش؟

هكذا هو حال أي شخص - مثلما يقول الكثيرون - سنه يكبر ولا يوجد عمل، وبداخله مشاعر وغرائز تحركه، وعندما رأى فتاة أمامه لم يستطع أن يوقف مشاعره هذه وفعل ما فعل..

لماذا في المثل الأول لا نعطي الشخص الصائم أي عذر في شرب الماء؟

وفي المثل الثاني نسوق كل التبريرات من بطالة وتأخر سن الزواج وقلة الحيلة وغيرها من الأسباب التي جعلته يفعل ما يريد مع أي أنثى أيًّا كان نوع ملابسها أو أخلاقها.

بالطبع نحن نفعل هذا لأننا نعاني من الانفصام الواضح في شخصياتنا وأفكارنا وتوجهاتنا، ففي لحظة نبرر شيئًا ما في أي قضية، وفي نفس اللحظة نبرر عكس هذا الشيء لقضية أخرى بحجج واهية كثيرة.

فأنا ظللت لفترة ما أخاف من مجرد السير في الشارع، حتى لو كان معي أي شخص، وكرهت كوني أنثى.. ولكني الآن أحب الأنثى التي بداخلي..

الأنثى التي أملكها أنا ولا يملكها شخص غيري..

الأنثى التي عرفت أنها مثل ملايين غيرها يُنظر لهم البعض نظرة دونية..

الأنثى التي أصابها الرعب كثيرًا، وأخذت الطريق جريًا حتى تختفي من أمام كل شخص سولت له نفسه أن يمطرها بسيل من الكلمات المقززة لأي نفس عفيفة..

الأنثى التي أفتخر بأنني أنتمي لها، وأصبحت تتمرد على كل شيء خطأ، ولن تصمت بعد الآن طالما ما تريده من أقل حقوقها في الحياةـ ودينها كفله لها..

الأنثى التي بدونها تفقد الدنيا طعمها، ولأنها - مثلما يقال - نصف المجتمع.

Sunday, June 12, 2011

حملة التدوين ( التدوينة السادسة ) تجربتي الفلسفية في التخلص من نار الجو

أيون فلسفية مالكم مستغربين كده ليه ما هو الواحد لازم يستفيد برضة من الدراسة اللي درسها غير يعنى أننا خدنا شهادة مالهاش أي لازمة وعرفنا أن الفلسفة هيا حب الحكمة وخلتنا نتأمل في كل حاجة وأي حاجة والحكاية ماكانتش ناقصة عندي أنا أساسا ما بسيبش حاجة إلا لما أتأمل فيها وأحللها مليون تحليل

وطبعا مش لازم أنسى الأساطير اللي كنا بندرسها وخير اللهم أجعله خير كان فيه آله مش فاكره أسمه قال إيه طلع بنته من دماغه بعد ما بلعها وعشان كده أتسمت آله الحكمة


ما علينا سيبكوا من الفلسفة وسنينها ندخل على الحر بقى والنار اللي إحنا فيها دى خاصة لو بتخرج كل يوم في الشمس الحارقة وبيجيلك هبوط وخمسين ضربة شمس ووشك يتحرق بالإضافة الى أنك بترجع البيت مش ضايق نفسك ولو حد كلمك كلمة ممكن تقتله

فلتتخيل مثلا أن واحد خارج مع خطيبته يشتروا دبل الخطوبة في الجو ده أعتقد أنه هيديها قلمين على وشها وهيلعن اليوم اللي شافها فيه ويقول لها بلا جواز بلا هم في الحر ده

وواحد تانى هيرجع بيته يلاقى مراته بعد الشر يعنى مبتسمة فى وشه هيقوم مديها باللي فى رجله من كتر خنقته مش عارفة يعنى الستات هيلاقوها منين ولا منين

يا عيني علينا غلابة من يومنا


ما علينا بعد خروجي كام يوم فى الشمس الحارقة دى وما تبع ده من هبوط ووشى اللي على وشك أنه يسيبنى ويمشى فكرت فكرة غريبة عجيبة

دلوقتى الفجر بيدن تقريبا الساعة 3 أو 3 و7 دقايق يعنى على الساعة 5 هتبقى الشوارع نورت

إيه المشكلة بقى لما نخلى مواعيد الشغل والمدارس فيما بعد لما تبدأ يعنى بدري بمعنى بدل ما يبقوا الساعة 8 ولا 9 نخليهم 6 أيووووووووووووون وبكده الشغل والمدرسة هتخلص على الساعة 12 مثلا والناس تلحق تروح تتخانق مع بعضها يووووووووه قصدى تلحق تروح بدري شوية وبكده هيبقى اليوم طويل

أينعم هيحتاجوا يناموا بدرى عشان يصحوا بدرى بس أساسا فيه ناس كتيرة بتسهر جدا وعما تنام وتصحى ما بتكونش لحقت تنام لها ساعتين يعنى مش هتبقى فارقة كتير معاهم موضوع الشغل البدرى وأهو هتبقى دعوة للحفاظ على الصحة وأننا ننام بدرى ونصحى بدرى وما ننساش نشرب اللبن قبل ما ننام ما عدا أنا طبعا ماليش فيه

طبعا أنا أول واحدة قلت لها الفكرة كانت ماما ورد فعلها كان أنها بصت ليا بصة استغراب واستعجبت

فقلت لااااااااااااازمن ولابد أكتب فكرتى حتى لو هتتحقق فى الخيال أصل أنا خيالى واسع حبيتين وما بحبش أسيب حاجة فى نفسى أحسن تقف فى زورى وأزور وهيبقى ذنبي فى رقبتكم على فكرة

وعشان كده فى النهاية قررت أعمل حملة المجانين فى نعيم يووووووه قصدى بسمه فى نعيم

Thursday, June 9, 2011

حملة التدوين ( التدوينة الخامسة ) أنا كنت جزء من النظام

أنا كنت جزء من النظام عشان كنت حابسة آحلامى جوه قمقم ومش عايزة أحررها

أنا كنت جزء من النظام عشان كنت كتير بسكت وما بقولش اللي جوايا

أنا كنت جزء من النظام عشان ضيعت وقت كبير من حياتي في الخوف من كل حاجة وأي حاجة

أنا كنت جزء من النظام عشان بوظت ساعتي البيولوجية لدرجة أنى يا أما ما انامش خالص وأطبق بالكام يوم أو أنام وما أصحاش إلا بالطبل البلدي

لدرجة أن الناس اللي معايا في البيت بقوا بيوحشونى ولسه ماما النهاردة الصبح أول ما شافتنى قالتلى أزيك وحشتينى

أنا كنت جزء من النظام عشان بستهبل كتير وما أغسلش الأطباق والكوبايات اللي بستخدمها عشان ما بحبش غسيل الأطباق عاااااااااا وماما تقوم من النوم تلاقى المطبخ مقلوب رأسا على عقب
وللأسف مازلت جزء من النظام في النقطة دى

ما تجيبوا غسالة أطباق بقى وتريحونا

أنا كنت جزء من النظام عشان أوقات كتير بنشغل عن صحابي وقرايبى وما بسألش عليهم لدرجة أنى مسكت موبايلى وقلبت فيه لاقيت أسماء ناس بقالي كتير قوى ما كلمتهمش ولا أعرف عنهم حاجة وفى نفس الوقت كنت محتاجة أتكلم مع حد ومعرفتش أكلم مين بالظبط

أنا كنت جزء من النظام عشان ما بحبش أكل السمك المشوي ولا البامية وحاجات تانية كتير ومازلت برضة ما بحبش أكلهم ممكن نبدلهم بـ ( شيكولاتة ، شيبسى ، حرنكش ، دوم ، قهوة ، نسكافية ) نييييييياها

أنا كنت جزء من النظام عشان حاولت أبقى حد عاقل مع أنى شايفانى حلوة فى الجنان

إيه يعنى لما أبقى فاتحة اللاب توب وبتابع الفيس بوك والمدونة والميلات ومواقع تانية كتيرة وفى نفس الوقت فاتحة التليفزيون وفى الوقت نفسه بطبخ وبنضف البيت وكمان بتكلم فى الموبايل وتليفون البيت بيرن تررن تررن

أنا كنت جزء من النظام فى حاجات كتير ولكن من النهاردة مفيش نظام

أنا النظـــــــــــــــــــــــــــــــــــــــــــــــــــــــــــام

Monday, June 6, 2011

حملة التدوين ( التدوينة الرابعة ) رسائل ربانية

أعظم رسالة ممكن تجيلك هيا اللي بتجيلك من ربنا وبتعرفك أنه دايما معاك وان حنانه وكرمه يفوقوا كل تخيلاتك

ما تنسوش تشكروا ربنا على كل النعم اللي أدانا لينا ولسه بيديها لينا


وما تنسوش تشكروه على كل الرسائل اللي بتجيلنا منه الرسايل دى بجد نعمة كبيرة قوى

عارف لما تبقى واقف وسط صحراء ومفيش فيها بني أدم واحد والدنيا حر جدا وأنت مش معاك ميه ولا أي وسيلة مواصلات ولا أي حاجة تحميك من الشمس ولا من أي حاجة ممكن تأذيك وفجأة تلاقى طيارة أو عربية جاية من بعيد وجاية ليك أنت مخصوص عشان تنقذك ساعتها بتفرح قوى وبتحس أن حياتك رجعت ليك تانى

بس مشكلتنا أننا ساعات لما بتجيلنا وسائل الإنقاذ دى بننسى نشكر ربنا عليها مع إن من غيره ماكناش هنعرف نعيش

الف حمد وشكر ليك يارب والحمد لله على كل شيء

ربنا يكرمنا كلنا بكل خير إن شاء الله




Saturday, June 4, 2011

حملة التدوين ( التدوينة الثالثة ) تنمية بشرية ولا ذاتية

ناس كتيرة مننا سمعت عن موضوع التنمية البشرية وكتير برضة مننا ماكانوش مقتنعين بيها وفيه ناس مازالوا مش مقتنعين وأنا واحدة من الناس زمان ماكنتش مقتنعة قوى بالموضوع ده لحد ما جربته بجد وقررت أنقل تجربتي يمكن تفيدكم

لكنى في البداية هسميها تنمية ذاتية وهمشي بالمسمى ده للنهاية

ليه تنمية ذاتية عشان إحنا اللي بننمى نفسنا بنفسنا وعشان لو كل واحد فينا من جواه مش عايز يتغير عمره ما هيتغير حتى لو خد مليون كورس ولكن لو كل واحد قرر أنه يغير نفسه من جواه الأول ويحاول معاها أكيد هيوصل وطبعا مش من أول مرة هيوصل ولكن مع التجربة هيوصل إن شاء الله


وعلى فكرة مش شرط عشان تنمى ذاتك أو نفسك انك تاخد كورسات تنمية بشرية لا طبعا كل واحد ممكن ينمى نفسه وقدراته لوحده ولكن اللي حابب يخوض التجربة مع ناس كتيرة ويختلط ويحتك بنوعيات مختلفة من البشر الموضوع هيفرق معاه جدااااااااااا

وده بالظبط اللي حصل معايا بدأت مع نفسي الأول وشوفت إيه الحاجات أو الطباع والعادات اللي مش كويسة فيا ومسببة ليا مشاكل وممكن تكون مضايقة الناس اللي حواليا

وفكرت أزاى أعالج الحاجات دى وبدأت أحط خطوط عريضة أمشى عليها وبالفعل نجحت وعملت كذا خطوة من اللي رسمتهم لنفسي ويمكن كنت ساعات بضعف وساعات بقع في النص بس كان عندى عزيمة أنى أكمل


طبعا مفيش حد فاهم منى حاجة ولكن التفاصيل هكتبها بعد كده


كل اللي عايزة أقوله دلوقتى واللي لازم كلنا نعمله أننا نجيب ورقة وقلم

يا سيدى حتى لو هتفتح الورد وتكتب يالا ها أكتب

كل واحد يكتب كده شوية صفات وطباع وحاجات بيعملها مش كويسة فيه وأى حاجة شايفها مش حلوة أيا كانت بسيطة من وجهه نظرك أكتبوا كل حاجة بأمانة محدش يعنى هيشوف كلامكم غيركم

ولان الحاجات دى مهما كانت بسيطة ممكن تكون مبوظة حياتنا ومخلياها مش حلوة

وبعدين شوف أزاى تصلح الحاجات دى وحط خطوات تمشى عليها عشان تصلح الحاجات دى وابدأ بقى مع نفسك واحدة واحدة لحد ما تحقق كل خطوة وأكيد مش من أول مرة هتنجح بس حاول

لو فعلا قدرت تكتب وتحط خطوات حتى لو لسه ما بدأتش تعمل الخطوات دى يبقى أنت عايز تتغير

يالا هكمل بقى المرة الجاية

Friday, June 3, 2011

حملة التدوين ( التدوينة الثانية ) كفى نفسك واللي حواليك كمان

( ما إحنا لو ما سمعناش اللي حوالينا هايجى علينا يوم ومش هنلاقى حد يسمعنا خليك مستمع أكتر ما تكون متكلم هتكسب كتير قوووووووووووى )

فعلا ما هو مش من المنطقي أننا نطلب من الناس أنها تسمعنا وتبقى معانا في كل أحوالنا وظروف حياتنا وإحنا عمرنا ما كلفنا نفسنا وسمعناهم أو سمعنا أي حد

ابدأ بنفسك الأول وأسمع الناس

صدقني كل ما هتحس أنك ريحت حد لمجرد أنك سمعته هتحس أنك مرتاح من جواك حتى لو ما أتكلمتش وطلعت اللي جواك بس أكيد هايجى يوم وهتلاقى اللى يسمعك واللي بيطلب منك تتكلم وتطلع اللى جواك وممكن يكون حد مش متوقع أصلا


وهنروح لبعيد ليه قدامك الورقة والقلم طلع اللى جواك عليهم
قدامك السما بص لها وأتكلم

قدامك البحر أقف قدامه وأتكلم


بس في النهاية خليك مستمع جيد وريح اللى حواليك هتكسب كتير قوووووووووى

Thursday, June 2, 2011

حملة التدوين ( التدوينة الأولى ) فوبيا الحنفية وأشياء آخري

أكيد كلنا سمعنا عن أنواع فوبيا كتيرة ولكن فوبيا الحنفية دى هيا الإصدار الجديد بتاع بلده يعنى وأنا اللي أخترعتة أكيد

من فترة والميه قطعت عندنا مدة طويلة حوالي 3 أسابيع وكانت بتيجى أوقات بسيطة في اليوم وكانت لما بتيجى ما بتبقاش نضيفه وطبعا ما كنتش بشرب منها وكنت على طول بشرب من القزايز اللي مليانة ميه نضيفه قبل ما يحصل لها التحول ده

ولكن المشكلة إن الميه بعد ما جت وبقت زى الفل وطبعا هو مفيش ميه في كل الجمهورية زى الفل كلها لو حللناها ولا حطينا فلتر هنلاقى بلاوى ما علينا بقى عندي نفس الخوف من الشرب من الحنفية ولا يمكن أبدااااااااااااا أشرب منها وما بشربش إلا من القزايز مع إن الميه اللي فيها من الحنفية مش من مكان تانى ولا ميه معدنية بس بجد بقى عندي فزع غريب من الحنفية


نيجى بقى لفوبيا الحشرات أيوووووووون فوبيا الحشرات أنا بخاف منهم بشكل بشع ويا سلام بقى لو شفت صرصار ولا شوية نمل بيبقى يوم مش معدي وممكن ما أدخلش المكان اللي كان فيه الحشرات دى إلا لو أتأكدت أنه تم القضاء عليهم نهائيا سواء كان عن طريقي أو عن طريق حد تانى وأكيد يعنى لو كان الموضوع أكبر من شوية نمل هيبقى عن طريق حد تانى إحنا هنهزر ولا إيه


ويالا كفاية عليكم شوية الفوبيات الحلوين دول مش عارفة هو أنا حالتي كده بقت صعبة ولا عادى يعنى

Monday, May 30, 2011

شارع البنات

العدد الأول المطبوع من مجلة البوسطجى


لقراءة المواضيع

هناااااااااااااا




شارع البنات

إعداد وإشراف بسمه عبدالباسط


أماكن توزيع مجلة البوسطجي ..
فيرجن
مكتبة البلد .. مدبولى
وعمر بوك ستور
وكومت وكنوز
بوسط البلد
مكتبة ديوان جامعة القاهرة
مكتبات الشروق بسيتى ستارز والزمالك والقربة وفرست مول وطلعت حرب
المكتبة العصرية بالمنصورة
مكتبة فكرة بالاسكندرية
بوك سنتر بروكسى
ومكتبة الفرجانى بالخليفة المامون

Thursday, May 26, 2011

الطير المدبوح

كان طير جميل له جناحات كبيرة
حلم أنه يطير ويرفرف بيها فى كل مكان
وأول ما صاحبه علمه الطيران وبدأ يطير
قام دبحه
وياريته مات ده دبحه نص دبحه
لا منه سابه عايش سليم
ولا منه مات
وبقى عايش بنص روح لا عارف يطير ويرجع يغنى
ولا قادر يموت عشان يرتاح

وتقريبا فيه ناس كتيرة بتعمل فى بعضها كده بتدبح بعض بسكاكين باردة لا منها بتموتها ولا منها بتسيبها عايشة فى حالها

Saturday, May 7, 2011

أغاني ما بعد قطع الميه

بعد كارثة قطع الميه عننا وأننا تقريبا داخلين على ثلاث أسابيع بالوضع ده كان للموضوع أثر فظيع عليا خاصة في الأغاني اللي بقيت بحب أسمعها وأغنيها وكانت النتيجة مجموعة الأغاني التالية

ميل وازجينى يا واد عمى ميل وازجينى انا هموت من العطش يا واد عمى ميل وازجينى

يا ولدى يا ولدى أنا مليت وبنار الحر اتكويت

والبت سوده سوده سوده والبت سوده كده ليه ( أكيد من قله الميه )

والبت سوده سوده سوده والبت سودة من إيه

ضيعت مالي على المية ضيعت مالي وأنا أعمل إيه

يا حلوة يا شايلة البلاص من فضلك أدلى ازجينى آه ده الميه قاطعة حدانا وزى ما زجيتك ازجينى

يا حلوة يا شايلة البلاص بلااااااااااااااااااااص

يا واد يا واد يا وله عايزين ميه بقى يا وله أنا عطشان وأنت الدوا

الفراولة بتاع الفراولة قرب وهاتلنا شوية ميه

يا ناري من غير ميه آه يانارى ومن غير ميه أصبح وأبات

يا واد يا واد يا وله عايزين ميه بقى يا وله أنا عطشان وأنت الدوا

والبت سوده سوده سوده والبت سودة كده ليه

والبت سوده سوده سوده والبت سودة من إيه

وبعد سماع إشاعات أن ميه الصرف الصحي اختلطت بالميه اللي بنشربها اللي أساسا قاطعة وبتيجى تخاطيف بقت دى أغنيتي المفضلة

ما شربتش من مجاريها طيب جربت صرفها

جربت في عز ما تعطش تجرى على حنفيتها وما تلاقيش ميه فيها

ما مشيتش في مجاريها طيب ما غرقتش فيها ولا ليك صورة في البانيو والميه مغرقاك فيه

دور جواك تلاقى ميه الصرف مغرقاك عشرة عمرك أزاي تنساها

يمكن ناسي عشان قاطعة مش وحشاك ولا غبت عليها بس اللي مجرب الميه القاطعة أكيد بيحن ليها

وأخيرا وبعد ما الموضوع طول وشكلنا هننزل نشرب من النيل مقدرتش أمسك نفسي وناديت كل الناس وقلت ليهم

إلى الأمام

بلاص بلاص

بحر بحر

نيل نيل


------------------

الميه جت ؟؟ لسه

Monday, May 2, 2011

الميه جت ؟؟ لسه

طبعا كلنا عارفين الأستغماية اللي كنا بنلعبها وإحنا أطفال وبنستخبى من بعضنا وواحد بس يغمى عينه ويستنى الباقيين يستخبوا عشان يدور عليهم ويفضل يقول لهم خلاص هما يقولوا لسه لحد ما يستخبوا فعلا

حاليا بقى بقينا بنلعب اللعبة دى بس مش مع أطفال لا دى مع ناس كبيرة قووووووووى وبقت اللعبة عن طريق الميه اللي خير اللهم أجعله خير صحينا من نومنا من حوالي 12 يوم لاقينا الميه قاطعة وتخيلنا أنها عادى شوية وهاتيجى وفات يوم على يوم ومفيش جديد وطلع الموضوع كبير ومعقد وممكن ياخدله شهور عما يخلص وبقينا عمالين كل شوية نلعب نروح نفتح الحنفية

ها الميه جت

لا لسه ماجاتش

وطبعا الوضع كل يوم يزداد سوء وراحت تخيلاتي لما بعد الكام اللي فاتوا لو الوضع أستمر بالشكل ده شهور زى ما فيه ناس بتقول هيبقى شكل الحياة أزاي

وإذ فجأة جاتلى فكرة جهنمية وقلت بس هو مش النيل قدام بيتنا على طول طيب تمام دلوقتى الواحد يصحى من نومه بدل ما يروح يغسل وشه من الحنفية يقف على شط النيل ويغسل وشه ويظبط نفسه وبعدين يروح شغله

حد هيقولى طيب عايزين نغسل الهدوم ومش عارفين نشغل الغسالات لا العادية ولا الاتوماتيك عشان محتاجة ميه كتير

وطبعا الحل بسيط جدا فاكرين الطشت بتاع زمان الالومنيوم ده أيون الواسع الكبير ده كل واحدة تجيب لها أربعة خمسة منه وتجيب الهدوم وتقعد على شط النيل وتنقع الهدوم مع شوية مسحوق وشوية وتغسلها في الميه وأدى أديله أدى لحد ما الهدوم تنضف وبالمرة تجيب كام حبل وتربطهم بين الشجر وتنشر الهدوم وهيا ساعة زمن والهدوم هتنشف

بذمتكم فيه أسهل من كده

حد هيقولى طيب عايزين ناخد ( شاور ) دش لا مؤاخذة

ياااااااااااااه دى أسهل حاجة يا جدعان أنتوا بتهزروا على فكرة

بالنسبة للرجالة ياخدوا بعضهم وعلى النيل عدل وهوب ينطوا فيه وياخدوا أحلى دش

وبالنسبة للستات عارفين الزير أيووووووووون سمعاكى ياللى بتقولي بتاع مسرحية المتزوجون زير حبنا وكوز حبنا هاتيلك كام واحد ليكى وللعيال وأمليه ميه وعيشوا بقى ولا أجدعها بانيو

وبالنسبة للناس اللي شوارعها أتغرقت من المجارى بذمتكم ليكم عين تشتكوا ما هي الشوارع بقت مصيف طبيعي أهي يعنى تقدروا تاخدوا الدش بتاعكم وتغسلوا وشكم وهدومكم فيها وكمان الصيف قرب شمسيتين وكرسي وهتبقى أخر تمام

وفى الأخر أهي الناس مظبطانا ومروقانا على الآخر ونزلوا لينا جدول لرجوع الميه ولا أحسن جدول حصص هو أينعم ساعات الميه ما بتجيش في نفس المواعيد دى ولما بتيجى عادة ما بتبقاش نضيفه وبتبقى ساعات ضعيفة بس أهو نص العمى ولا العمى كله وأهو الناس كتر خيرهم أدونا الجدول

يعنى كل واحد جدولة في أيده وكوزه وزيره وطشته وشمسيته وعيشوا أحلى حياة عايزين إيه أكتر من كده

وأخيرا ده تقريبا اللي بيسموه هم يبكى وهم يضحك محدش عايز يستضيفني عنده كام شهر كده لحد ما الميه ترجع

Thursday, March 17, 2011

عريس تقفيل ثورة كلاكيت تانى وتالت مرة

عريس تقفيل ثورة كلاكيت تانى مرة فى موقع الشرقية اليوم
هنا

وكلاكيت تالت مرة فى جريدة نهضة مصر
العدد الأسبوعى 17،18 مارس 2011




Friday, March 11, 2011

دقت ساعة العمل فى نهضة مصر


مقال دقت ساعة العمل
جريدة نهضة مصر
العدد الأسبوعى 11مارس 2011

المقال هنا

Tuesday, March 8, 2011

نهضة مصر



مقال عزيزى فالنتين لبسمه عبدالباسط

جريدة نهضة مصر

العدد الأسبوعى
4مارس 2011

Tuesday, March 1, 2011

دقت ساعة العمل

عندما تكثر أحلامنا وطموحاتنا لا نجد مفر من محاولة تحقيقها مهما كلفنا الأمر من تعب وعناء ولكن لذة تحقيق الحلم ورؤيته واقع ملموس تنسيك أي تعب

ولأني كائن غريب الأطوار وكل من يعرفني جيدا يعرف هذا وخاصة من عاصرني منذ يوم ولادتي إلى هذا اليوم يعرف معنى كلامي جيدا ويعرف أنى مجنونة متخفية في ثوب عاقلة أو عاقلة بجنون لا يهم المسمى الآن ولكن المعنى هو الأهم

ولذلك كان لآحلامى نصيب كبير من هذا الجنون فأنا كما يقال سبع صنايع والبخت ........ ( محدش شاف البخت بتاعى بدور عليه ومش لاقياه ، بخت تايه يا ولاد الحلال ) ومازال البحث جارى عن البخت


عندما ترى الجنون متمثلا في شخصك وتقلب نظام يومك ويصبح نهارك ليلا وليلك نهارك وفجأة وبدون سابق إنذار تقرر عودة الوضع الطبيعي لتصبح بين يوم وليلة تنام وتستيقظ مثل الناس الطبيعيين ويبدأ يومك مبكرا جداااااااااااااا لتجد لسان حال ساعتك البيولوجية يقول لك ( منك لله يا بعيد بتغير نظامك 360 درجة مرة واحدة ده جنان ده ولا إيه طيب قدم شوية أتأخر شوية ولكن مرة واحدة كده ) وتهددك ساعتك هذه أنها من الممكن أن تعاندك وتقف عن العمل حتى تكف عن جنانك هذا


عندما تنام وعقلك يفكر في شيء ما ثم تستيقظ لتجد عقلك مازال يفكر في نفس الشيء اعلم أنك وصلت فعلا لأعلى درجات الجنان خاصة لو صاحب هذا أحلام كثيرة عديدة وأنت نائم تترجم حالتك وما تشعر به وتتمناه


عندما تقف في المطبخ لتغسل الأطباق وتطهو الطعام وفى نفس الوقت تتابع كل شيء على النت والتليفزيون وتسير من المطبخ إلى الأنترية لمتابعة المسلسل ( وبالمناسبة هو مسلسل قصة حب بتاع جمال سليمان وبسمه ) ثم تذهب إلى غرفتك لتنظر إلى اللاب توب الموجود على فراشك لتتابع ما يحدث ثم يرن جرس الباب والهاتف وأنت تفعل كل هذا مرة واحدة فاعلم أنك إنسان غير طبيعي بالمرة ووقتها تتذكر مقولة ( المورستان مصلحتك أولا )


عندما تجد أعمال كثيرة وأحلام أكثر على حافة التحقيق فسارع إلى تحقيقها ولا تسمع إلى أصوات اليائسين التي تناديك للنوم في العسل ونسيان ما كنت تود فعله وتذكر وقتها أنه بالفعل دقت ساعة العمل

Wednesday, February 16, 2011

محمد نبينا


------------------------------
من موقع مصطفى حسنى




السيرة النبوية
http://mustafahosny.com/article.php?cat_id=44
------------------
فى رحاب البخارى
http://mustafahosny.com/albokhary.php
...-------------------
الحبيب المصطفى
http://mustafahosny.com/article.php?cat_id=4
---------------------
ملخص السيرة النبوية
http://mustafahosny.com/pagination.php?type=articles&cat_id=133

Monday, February 14, 2011

عزيزى فالنتين

عزيزى فالنتين

تحية طيبة وبعد

لم أكن أعرف أن رسالتى هذا العام سوف يكون لها طابع خاص ربما لأنى كل عام عندما يأتى هذا العيد أتمنى أن أحتفل به ويكون الأحتفال له شكل مختلف ولكن تشاء الظروف أن أحتفل بمفردى

وكعادة كل عام يأتى شهر فبراير وأنظر حولى مجددا لأجدنى بمفردى ولكن هذا العام كان يحمل معه مفاجأت كثيرة جدااااااااااااا وكان لهذا العيد طابعا مختلفا وطعما آخر

لحظة لا تترك لعقلك العنان وتتخيل أنى أحتفلت به مع أحدهم فأنا مازلت كما أنا بمفردى وكان يومى مثله مثل أى يوم ولكن طعم الحب زاد بداخلى

أعرف أنك تتسائل الآن كيف أنت بمفردك وفى نفس الوقت تحتفلين بالعيد هل أنت مجنونة ؟

لحظة يا سيدى أترك لى الوقت كى أشرح لك

فالحب بالنسبة لى ليس فقط حب الرجل للمرأة ولكن حب كل الناس حب أهلى حب أصدقائى

والأهم حب مصـــــــــــــــــــــــــر

وهذا العيد كان عيد حب مصـــــــــــــــر وأحتفال بعودة الحرية والأمن وموت عصر الفساد

هذا العيد كان مختلفا لأن الأمل عاد لى مجددا فى أحتمال تغير الأوضاع وعودة أخوتى مرة آخرى للعيش داخل مصر

هذا العيد مختلف لأنى أرى بنات وأولاد مختلفين جدا

هذا العيد مختلف لأن أرى مصر جديدة وبلد جديدة وناس جديدة

هذا العيد مختلف لأن الأمل عاد لكل الناس من جديد الأمل فى كل شىء وأى شىء

لذلك فأصبح اليوم عيد حب لكل الناس

عيد حب مصــــــــــــــــــــــــر لذلك كانت هذه أول مرة أحتفل فيها بعيدك هذا