روح بوسبوس

عدنا

2009-12-05T08:06:00.000-08:00

رجعت من الأجازة والسفر أمبارح وما أنكرش أنى فضلت مقضياها نوم من أمبارح للنهاردة وما أنكرش أنها كانت أجازة ممتعة بالأضافة الى شوية حاجات ضايقتنى وقلبت مزاجى بالأضافة الى دور البرد اللى زاد عندى جداااااااااااا وماكنتش عارفة أستريح شوية وأنام

ولكن فى النهاية الحمدلله غيرت جو وحاولت أرتب شوية الوش اللى فى دماغى وأحاول أستعيد نشاطى وأرتب حاجات كتيرة والحمدلله الى حد ما وصلت لشوية حاجات المفروض أمشى عليها بعد كده بالأضافة الى أفكار وحاجات جديدة جاتلى وأنا هناااااااااااااااااااااااااااك ويمكن اللى مقدرتش أوصل له هو محاولة تقسيم وقتى وتظبيط حياتى ولكن كل ما أقسم تقسيمه تنتهى الى أن اليوم هيكون مليون ساعة شغل فى ال 24 وحاولت أجيبها كده أجيبها كده مفيش فايدة

وبناء عليه قلت يالا مش مهم شغل شغل محدش واخد منها حاجة هههههههههههههههههههه بس نوصل للى عايزينة وخلاااااااااااااااص

وأكيد رجعت لاقيت عندى شغل كتييييييييييييييير بالأضافة الى كام فكرة بتلح وتزن على دمااااااااااااااااااااغى وأنا لما حاجة تزن على دماغى ما بتسكتش الا لما أعملها

وبناء عليه هغطس شوية أنزل شوية الصور اللى صورتهم وأظبطهم وأحاول أنجز شوية فى الشغل اللى ورااااايا وفى الحاجات الجديدة

ولاحقا هبقى أحكى عن شوية حاجات صادفتنى وأنا هنااااااااااااااااااااك

باى باى بقى

العيد زى ما أتربيت

2009-11-24T17:17:00.000-08:00

العيد زى ما أتربيت ووعيت على الدنيا يعنى لمة وزيارات وقعدة حلوة وسط الأهل ولفة كبيرة على كل العيلة حتى لو كانت البلد كلها قرايبنا لااااااااااااااااااااازم نزور الكل والكل يزورنا
من أول ما أتولدت وأنا عايشة فى مدينة ولكن أصولى ريفية أبا عن جد وبرضة أما عن جد وده لأن بابا وماما قرايب يبقى من البديهى أنها نفس البلد اللى هما منها وطول عمرى بعتز جداااااااااااا بأنى من بلد ريفى وبأصولى دى وكل الناس اللى تعرفنى تعرف كده ومن صغرى أتعودت أنه لما يجى العيد لازم نسافر بلدنا ونقضية هناااااااااااااك وسط العيلة واللمة

وكل قرايبى برضة اللى عايشين فى نفس المدينة أو فى مدن تانية بيعملوا نفس الشىء وفى النهاية نوصل الى أن كل العيلة بتبقى متجمعة فى مكان وااااااااااااحد
وطول الفترة اللى بنكونها هناك بتتقسم ما بين زياراتنا لكل الناس وبين زيارتهم لينا

وأحسن حاجة بقى من قبل المغرب بشوية لما تلاقى الكل بدأ يتجمع ونفرش قدام البيت والكل يقعد واللى مساعدنا على كده أنه مفيش حد غريب وسطنا كل الشارع قرايبنا فالبالتالى بتلاقى الحصر أتفرشت والكل قاعد كبير وصغير وتلاقى أعمار من أول شهوووووور الى 80 وأنت طالع وتسمع حكايات وحواديت وهزار وضحك ورغى طول الليل ودى أكتر حاجة بحبها فى عيلتنا اللمة
اللمة اللى يمكن ما بحسهاش ولا بشوفها فى أى مدينة الناس أخرهم يعرفوا عمهم ولا خالهم وتليفون ولا زيارة كل فين وفين وعلشان كده أحنا دايما بنقضى العيد هناك والمرة أو المرتين اللى قضيناهم فى المكان اللى عايشين فيه وما سافرناش ما حستش بأى عيد ويمكن خرجت وشفت هيصة وناس وحاجات تبهر أى حد ولكنى ما حستش بروح العيد اللى أتعودت عليها

بيبدأ يوم العيد من بدرى قووووووووووى من أول ما تبدأ الصلاة كنا نقوم جرى وده وأحنا صغيرين ونلبس الهدوم الجديدة ونستنى بابا وأعمامنا وأخوالنا علشان ناخد العيدية
ولما كبرنا شوية وبقيت أنا وأخواتى من هواه السهر بدأ موضوع صحيانا بدرى يقل وتيجى ماما تصحينا نقول لها لا مش قادرين تقول لنا ولما يجوا الناس ويسألوا عليكم نقول لها قوليلهم نايمين ههههههههههههه
وفعلا كتير بقينا بنعملها وما نقدرش نقوم بدرى وده لأننا بنكون تقريبا لسة ما نمناش وبعد ما نصحى بقى نلف أحنا براحتنا على قرايبنا ونهنيهم
ولحد دلوقتى مازالت العادة موجودة وكل عيد لازم نسافر ولكن مع مرور سنه ورا التانية بقيت بحس بفرق فى حاجات كتير وحاجات تانية لسة زى ما هيا ما أتغيرتش وبتمنى ما تتغيرش

ومن الحاجات دى

باب بيتنا لما بنكون فى البلد سواء فى العيد أو غير العيد ما بيتقفلش دايما مفتوح طول اليوم وما بيتقفلش الا لما نيجى ننام بالليل وبتمنى يفضل كده دايما ويفضل مفتوح على طووووووووووووووووووووووول

بفرح قووووووووووى لما أسمع كلمة عمتو وخالتو بسمه من ولاد وبنات أعمامى وخالاتى ويمكن بتعب من كتر التنطيط معاهم والجرى وراهم فى الشارع زى الأطفال بس بيبقى تعب لذيذ قووووووى وبينسونى الدنيا وما فيها وأحلى لحظة لما يصحوا من النوم ويجوا جرى على بيتنا وأكون لسة نايمة ويسألوا ماما عنى وما يصدقوش أنى نايمة والاقيهم دخلوا جرى الأوضة يشوفونى

بحس بوجع لما يجى العيد وأنا لوحدى من غير أخواتى وأفتكر لما كنت أقوم الصبح وأفضل أصحى فيهم وواحد فيهم يضربنى بالمخدة والتانى يخبطنى بأى حاجة علشان أطفى النور وأسيبهم يناموا وفى النهاية يستسلموا لرغبتى ويقوموا ويفضلوا على السرير وأجيب لهم الفطار والشاى ويخلصوا وغالبا كان يضحكوا عليا ويكملوا نوم تانى

موقف عمرى ما هنساه كان السنه اللى فاتت فى أخر عيد قضاه أخويا الصغير معانا قبل ما يسافر لما لاقيتة بيدينى عيدية من مرتبه بجد أحساسى ساعتها مش قادرة أوصفه ليكم ولا فيه أى كلام يقدر يعبر عنه

عمى الله يرحمه وكلمة كل سنه وانتى طيبة يا بوسى أو أزيك يا بوسى مش قادرة أنساها ولا تتمحى من ذاكرتى أبداااااااااااااا
لسة بحس بروحك فى بيتنا اللى كنت قاعد معانا فيه قبل ما تنقل لبيت تانى
عارف أنا دلوقتى بنام فى الأوضة اللى أنت كنت بتنام فيها وتصدق أنى بستريح جدا فيها أكتر من الأوضة التانية وبحس بهدوء وراحه نفسيه فيها وبحسك معايا وحواليا بجد وحشتنى قوووووووووووووووووووى

مش هتجيلى تانى فى المنام أنا شفتك من مده بسيطة فى الحلم وفرحت قوى لما شفتك وكان بقالى فترة طويلة ما حلمتش بيك

عايزة أشوفك تانى بقى علشان بتوحشنى قووووووووووووووى

بحمد ربنا قوووووووووووووى أنه عوضنى بولاد خالاتى وأعمامى اللى بيحاولوا يعوضونى غياب أخواتى ويمكن هما غالين عليا جدا وبحسهم زى أخواتى ووجودهم بيفرق كتير
وبحمد ربنا أنه رزقنى بأصحاب أكتر من الأخوات وعاملين فرق جامد فى حياتى

أحسن شىء أنى هنااااااااك ببقى واحد تانية بجد ده كلام حقيقى الجو والطبيعة اللى هناك وطبيعة الناس كمان بتخليك تنسى كل شىء وأى شىء وتعيش فى راحة نفسية وسلام رهييييييييييييييييييب وبتنسى كل مشاكلك وأى حاجة شغلاك أيا كانت صدقونى مهما كانت المشاكل والأعباء بتلاقى نفسك ما بتفكرش فيها أصلا من كتر أنشغالك بحاجات تانية هناك ويمكن الجو ده اللى بيخلينى كل فترة أسافر علشان أغسل نفسى من جوايا وأرجع صافية قووووووووووى وذهنى خالى علشان أقدر أكمل حياتى

الموبايل مش هتحتاج تقفلة أو تعمله صامت لأنه تلقائى مش هيبقى فيه شبكة وده مش فى كل الأماكن ولكن المكان اللى فيه بيتنا تحديدا ولأنه دور واحد ما بيكونش فيه شبكة الا نادرا وده بيديك هدوء نوعا ما من رن الموبايل المتواصل طول اليوم ويخليك أنت اللى تحدد أمتى تتكلم وأمتى لا ولما تحب تتكلم عليك بلفة كاملة حوالين البيت علشان تلقط الشبكة أو تطلع أى بيت وبداية من الدور التانى هتلاقى شبكة هااااااااايلة بس بجد دى تانى حاجة بتعمل ليا هدووووووووووء وراحة نفسية ويمكن بكون نفسى أسمع أصوات ناس معينة وده بيخلينى كل شوية أخد الموبايل وأجرى على مكان يلقط شبكة وأشوف مين حاول يتصل بيا
وتقريبا لسة منتظرة مكالمات من ناس معينة وغالية قوووووووووووووووى عليا وبتمنى بجد الاقيهم أفتكرونى

منظر الأرض والزرع والخضرة مازال بيبهرنى ويشدنى جدااااااااااااااااااااااااا مع أنى يعتبر شفته كتير بس كل مرة بحس أنى أول مرة أشوفه وبقيت أحب كل مرة أوثق زيارتى بشوية صور للأرض وليا كمان وأكتر وقت بحبه لما أخد نفسى وأتمشى لوحدى فى الأرض وأعيش مع خيالى وأسرح يااااااااااااااااااااااااااااه أحساس مش قادرة أوصفه ليكم قاعد وقدامك الخضرة والسما وكل حاجة حلوة فيه إيه أحسن من كده

بنت عمى اللى علمتها التصوير علشان تصورنى فى الأرض بقت بتصور أحسن منى بمراحل ههههههههههههههههههههههههههههههه وبقت قرينى فى كل مرة أروح أتمشى علشان الاقى حد يسلينى ويصورنى

لسة جوايا كلام كتير وحواديت أكتر بس حسيت أنى تقلت عليكم وكمان نكدت عليكم فى النص فبقول كفاية كده وأبقى أكمل وقت تانى

كل سنه وكلكم طيبين وبكل خيييييييييييييييييييير ويارب يكون عيد سعيد عليكم إن شاء الله

كل سنه وأخواتى وكل أصحابى بكل خيييييييييييييير وعيد سعيد عليكم كلكم

كل سنه وكل الناس الغالية عليا بخير ويارب يكون من أحلى الأعياد اللى هتمر عليكم

وما تنسوش تصوموا يوم الوقفة وتدعولى معاكم بقى

هتوحشونى قوى

صيام يوم عرفة

2009-11-23T09:47:00.000-08:00

يوم الخميس إن شاء الله هيكون يوم عرفة وياريت ما ننساش نصومه

من فضائل يوم عرفة

أن صيامه يكفر سنتين:قال النبي صلى الله عليه وسلم "صيام يوم عرفه أحتسب على الله أن يكفر السنة التي قبله والسنة التي بعده" رواه مسلم

أنه يوم مغفرة الذنوب والعتق من النار:عن عائشة أن رسول الله صلى الله عليه وسلم قال: "ما من يوم أكثر من أن يعتق الله فيه عبدا من النار من يوم عرفة، وإنه ليدنو، ثم يباهي بهم الملائكة فيقول ما أراد هؤلاء" قال ابن عبد البر وهو يدل على أنهم مغفور لهم لأنه لا يباهي بأهل الخطايا والذنوب إلا بعد التوبة والغفران

-------------------------------------------

وكل سنه وأنتوا طيبين وربنا يتقبل منا ومنكم

http://www.facebook.com/event.php?eid=183192329476&index=1

الحملة الشعبية العربية لتصالح مصر والجزائر – تصالحوا

2009-11-22T17:54:00.000-08:00

مقدرش أنكر ولا أنفى أنى واحدة من الناس اللى أول ما سمعت اللى حصل أضايقت وزعلت جدا وكانت جوايا مشاعر غضب فوق الوصف وكانت مخليانى أتمنى لو أنى أقدر أروح أحرق الناس دى اللى بهدلت المصريين عندهم ولكن لما فكرت بعقل شوية وكنت متابعة كل اللى بيحصل فى التليفزيون والنت لاقيت أننا أتجرينا لخط وسكة تانية خالص ولو فضلنا ماشيين فيها ياعالم هتودينا فين

أنا طبعا وجعانى كرامتى وكرامة المصرييين اللى أتبهدلوا وعايزة حقهم ولازم يحصل إعتذار رسمى ولكن فيه ناس كتيرة شايفة غير كده ومتخذة طريق الغلط وتبادل الفيديوهات والصور المهينة لكل الطرفين
طيب وبعدين ؟؟ بعد ما هنفضل نشتم ونبهدل بعض هنعمل إيه نحارب بعض بقى علشان نكمل الحكاية ويبقى نهايتها ناس تانية هتستفيد وهيدخلوا لينا من مدخل تاااااااااانى وكلنا هنضيع

أنا بطالب ومن أشد المتمسكين باعتذار رسمى عن اللى حصل

ويمكن اللى خلانى أكتب الموضوع ده الحملة اللى أتعملت على الفيس بوك من شوية وكانت بعنوان الحملة الشعبية العربية لتصالح مصر والجزائر – تصالحوا
واللى بدأها وقام بيها شاب مصرى أسمه أحمد الصباغ وكانت مقدمتها بتقول
دعونا نختلف برفق..
لعب الإعلام فى الجزائر ومصر الدور الأكبر فى إشعال نيران الفتنة والكراهية والعداوة بين الشعبين، وقام المتعصبون والمتطرفون بترجمة هذا الدور السئ إلى واقع أسوأ، ورفع الأخ السلاح الأبيض فى وجه أخيه، وحرق الأعلام وضرب وسحل الأخر

ووقع الشعبين فى الفخ وتناصبا العداء، وقام الإعلام فى كل بلد بتقديم الصور والفيديوهات التى تفيد بأن الطرف الأخر مجرم وبربرى، وبدأت الأصوات فى البلدين بمقاطعة الأخر ومنع الفنانين والمثقفين والناشرين من إرتياد البلد الآخر، وتغيير أسماء الشوارع التى تذكر البلد الآخر

لا ننكر أن هناك مخطئون ومجرمون، ولا ننكر أن الإختلاف وارد، لكن العداء مرفوض، فلو إختلفنا دعونا نختلف برفق وبدون إهانة ولا نكون من "إذا خاصم فجر" وأن نكون موضوعيين

مثال: رأيت على صفحات الإنترنت فيديو لرجل مصرى يرقص ببدلة رقص شرقية، وفيديو آخر لشاب جزائرى يرقص ببدلة رقص شرقية، وكتب كل طرف على الفيديو الذى يمتلكه : هؤلاء هم رجالهم
وعند مطالعة الصحف الإسرائيلية ستجد إبتسامة التشفى والشماتة مرسمة بوضوح على وجه الإعلام الإسرائيلى..
يقول الله فى القرآن : ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ – فصلت 34ويقول الله فى الإنجيل : من ضربك على خدك الايمن فادر له خدك الايسر
وهما دعوتان غاية فى التسامح والإيثار وتقديم الخير للأخر

مطلوب مبادرة إعتذار بين البلدين، وأدعوا كل ذوى البصيرة والغيرة فى البلدين إلى المشاركة فى محاولة للوصول إلى الصورة المناسبة التى يمكن من خلالها إزالة أسباب العداء، لكن على الأقل نتوقف جميعاً عن العداء المهين، وتركيب الصور التى تصور الأخر فى شكل خروف العيد، وإزالة صور حرق الأعلام، والتوقف عن السباب والعداء

إذا إتفقت مع فكرة المبادرة فشارك بالتوقيع فى صفحة (الديسكيشن بورد) وساهم فى تطوير الفكرة بالمقالات والأفكار والصور والمعلومات

وبصراحة أنا متفقة جدااااااااااا معاه وياريت كلنا نفكر بعقل قبل ما ننفعل ومحدش قال أننا هنتصالح وخلاص من غير أى اعتذار أو شىء يرد كرامتنا

للمشاركة فى الجروب
http://www.facebook.com/group.php?gid=200638163632

----------------------------------------

http://www.mikanoo.com/do.php?id=1419

عايزة أطلق صرخة امرأة على مدونة

2009-11-22T13:19:00.000-08:00

دلوقتى عدد نوفمبر من جريدة أسرار الغد مع الباعة فى كل الجمهورية
وده حوارى مع محاسن صابر صاحبة مدونة عايزة أتطلق

أضغطوا على الصورة هتكبر وهتشوفوا الموضوع كويس

عن الهجوم من غير قراءة أى شىء

2009-11-22T05:11:00.000-08:00

من ساعة ما دخلت مجال التدوين والكتابة بشكل عام وكانت أكتر حاجة بتستفزنى أن حد يهاجمك ويهاجم كلامك لمجرد أنه قرأ العنوان بس أو سطرين من كلامك وما كملش الباقى ويمكن لو كمل الباقى وعرف الفكرة هيفهم ومش هينقد لمجرد النقد
ولكن تقريبا لا حياه لمن تنادى وكتير قوى الناس بتهاجم وتنقد بسبب عنوان
ويمكن لما ده حصل معايا مرة قبل كده وأنا معترفة فعلا أن العنوان كان مثير بعض الشىء أنا أتراجعت عن فكرتى وسبت الجروب كله
ولكن دلوقتى ما عنديش أى أستعداد أتراجع عن أى فكرة عملتها أو كتبتها لأن فيه مجموعة كلامى واجعهم ومتخيلين أنى بتكلم عليهم
ويمكن البداية كانت من هنا وياريت تقروا الموضوع اللى فى اللينك وبعدين تكملوا الموضوع ده
http://www.wostelbalad.com/index.php?option=com_content&view=article&id=292:2009-05-05-16-00-23&catid=53:2009-03-19-20-43-48&Itemid=79

ها قريتوا الموضوع نكمل بقى

دلوقتى الموضوع وعنوانه واضحين جدااااااااااا وواضح ليه أنا أخترت العنوان ده يعنى لا كان قصدى أنى بعرض نفسى ولا ببيع نفسى ولا طالبه عريس زى ما فيه ناس قالتلى
ويمكن لأن فكرة المغالاه فى المهور والشبكة والحاجات دى مضايقة وتاعبة ناس كتير وفكرت كذا مرة أعرض الفكرة وهيا المطالبة بعدم الغلاء وحبيت أوصل كلامى للبنات والشباب والأهل كمان ولأن كلهم ليهم دور فى كده وخاصة البنات والشباب

فكرت أعمل أيفنت بالعنوان بتاع الموضوع وأبين الفكرة وأحط لينك الموضوع ويمكن من أول يوم عدد الأعضاء كان كبير وفيه ناس فهمت الفكرة وعجبتها وناس شتمت ما علينا
فكرت أكبر الفكرة أكتر وأعمل ليها جروب
وكان عنوان الجروب
حمله أنا هنا يا ابن الحلال(للمطالبة بعدم المغالاه)
ووضحت فى المقدمة الفكرة وحطيت لينكات المواضيع وكل شىء وما أنكرش أنى يعتبر أتشمت من ناس كتير وده لأن فيه ناس فهمت الكلام أنه دعوة لترخيص البنات وأنهم يرضوا بأى شىء وأنهم بيشحتوا عريس زى ما أتقال بالحرف كده بالأضافة الى الناس اللى أفتكرتنى بدور على عريس
وفيه كذا حد علق على العنوان وبس ونسى يقرا الفكرة وبيقولوا أنتى هتشحتى عريس أنتى بترخصى البنات وكلام من ده طيب ممكن بالراحة كده نشوف العنوان جاى منين العنوان جاى من أغنية كلنا نعرفها كويس قوى ولو قلت كلماتها مش هنلاقى فيها تقليل لأى واحدة والكلمات هيا أنا هنا يا ابن الحلال لا عايزة جاه ولا كتر مال بحلم بعش أملاه أنا هنا
ممكن أعرف لو حتى العنوان هو المشكلة إيه التقليل اللى فى كلمات الأغنية أو فى العنوان من أى واحدة
على العموم أنا مش ناوية أتراجع عن فكرتى مهما حصل بالاضافة الى أنى مش جايه أدور على عريس زى الكلام اللى مالوش داعى اللى بيتقال ومليون مرة وضحت فى مواضيع ليا أنى لا هموت ولا بموت من غير جواز واللى بيتابع شغلى وكان أخرهم موضوع سنجل وأفتخر هيفهم
http://www.wostelbalad.com/index.php?option=com_content&view=article&id=544:2009-11-20-16-04-55&catid=46:2009-03-19-20-34-04&Itemid=73

وياريت بجد نفهم بقى ونبطل نقرا عناوين وننقد من غير ما نكمل ولأن العنوان هو كمان مفيش فيه أى شىء
وده لينك الجروب وفيه كذا موضوع بالأضافة للمقدمة
http://www.facebook.com/group.php?gid=182783013793

--------------------------------------

بصراحة أنا أتخنقت وجبت أخرى بس ماعنديش أستعداد أتراجع عن أى شىء

يارب

2009-11-21T13:05:00.000-08:00

ربنا لما يريد أكيد آحلامنا هتتحقق بس الصبر جمييييييييييييييييييييييييييييييييل

وأكيد مفيش حد فينا ما بيحلمش

ولكن لما تحس أنك واقف فى خط فاصل بين آحلام مهمة فى حياتك حلمتها وبين خطوات على تحقيقها ولو بس غفلت عنها شوية هتروووووح وهيضيع تعبك ومجهود سنين وهتروح آحلاااااااااااااامك اللى غرقت جواها

ويمكن لأنى حاليا فى مرحلة فاصلة وواقفة على الخط ده وفعلا دماغى متلخبطة بشكل غير طبيعى وعقلى مشتت جدااااااااااااااااااا وفى حالة تقييم لكل حاجة عملتها وإعادة حسابات كتيرة قوووووووى فى حياتى علشان أشوف هكمل فى إيه وهسيب إيه وأنظم وقتى وحياتى اللى يمكن ما بقاش فيها حاجة الا الشغل وبس كل دقيقة وثانية لشغلى

وفعلا محتاجة أظبط حاجات كتيرة قووووووووووووى هتترتب عليها حياتى الجاية

ويمكن فى جو الحيره ده بيبقى أحسن حاجة أننا ندعى ربنا قوووووووووووووووووووووووى

يارب

شعور جوايا دلوقتى

2009-11-19T14:55:00.000-08:00

خوف وقلق مدفون

والدمع مالى العيون

لا الخوف فى يوم أنتهى

ولا الدمع نزل من العيون

مصر والجزائر وحرب الأعصاب

2009-11-18T12:34:00.000-08:00

يمكن أنا ماليش فى الكورة ولا بحبها أصلا ولكن فيه حالات معينة بتابع فيها الماتشات ويمكن قبل كده كان البيت بيبقى عندنا مهرجان وده لأن أخواتى وبابا بيحبوا الكورة جداااااااااااااااااا
وطبعا تابعت الماتش اللى فات ومن بعدها المهرجانات والحرب اللى حصلت وكان أكبر حرب هيا حرب الأعصاب
وجه النهادرة والكل كان عمال يدعى أننا نكسب وفى نفس الوقت ناس كتيرة خايفة لو كسبنا الأوضاع تتأزم أكتر
والمصريين ينضروا بسبب كده

بس كان ليا بعض الملاحظات من قبل وبعد الماتش وهيا

أولا زعلت جداااااااااااااا لما لاقيت ناس بتقول أنها هتصوم النهاردة علشان تدعى للمنتخب وبصراحة كان الأولى تكون نيتهم أنهم هيصوموا أول يوم فى ذى الحجة لأنه سنه عن الرسول وفى نفس الوقت هيدعوا للمنتخب أعتقد ساعتها هتكون مقبولة شوية ولكن أنى أقول هصوم علشان أدعى للمنتخب !!!!!!!!!!!!!!!!!!!؟؟

ثانيا من ساعة ما الماتش بدأ وأنا حاسة أن اللاعيبة خايفة ومهزوزة جداااااااااااااااااااااااااااااا وكانوا عصبيين بشكل غير طبيعى خصوصا عمرو ذكى ولكن اللى عجبنى فيهم أنهم كانوا بيلعبوا وينافسوا بشرف وعايزين يكسبوا بشرف مش بالخناق والمشاكل

ثالثا لاعيبة الجزائر ماشية على نفس خط المشاكل وأفتعال أى موقف علشان يستفزوا اللى قدامهم وفضلوا يلعبوا على وتر حرب الأعصاب ده وتقريبا هما نجحوا فيه وفى أنهم يبوظوا أعصاب المنتخب المصرى

رابعا الجمهور اللى كان فى الملعب من بعد أول جون بشوية بلموا وتنحوا وده أكيد أثر على اللاعيبه وكان المفروض عليهم أنهم يفضلوا يشجعوا لأخر دقيقة علشان على الأقل يحمسوهم شوية

خامسا وأهم حاجة هيا الشعب المصرى اللى زى ما بيفرح قوى لما نكسب معرفش بيحصل له إيه لما نخسر وتلاقيه نازل شتيمة فى المنتخب واللاعيبه وطبعا مش كل الشعب ولكن فئه منه ليه مش عارفين نتقبل الفوز والخسارة وزى ما بنفرح قوى بالمكسب ونقول كلام حلو لللاعيبه لازم برضة لما يخسروا ما ننزلش شتيمة فيهم لأن الكورة مكسب وخسارة وبصراحة منتخبنا ما قصرش

سادسا روح الحب الكبير والترابط اللى بيحصل بين كل الناس والأصحاب والقرايب ونلاقيهم بيتجمعوا مع بعض فى البيوت والقهاوى علشان يشوفوا الماتش ليه الروح دى ما بتبقاش موجودة على طول وعلى قد ما فيه ناس على طول متجمعه وبتسأل على بعضها فيه ناس برضة عايشة فى وادى تانى
مش أولى لما نتجمع علشان الكورة نتجمع برضة ونشوف بعض فى حاجات أهم وأكبر فى حياتنا
أنا مش بقول بلاش نتجمع علشان نشوف ماتش ولكن لما ما يبقاش الناس بتشوف بعض ولا بتعرف بعض ولا بتحس ببعض وفجأة يظهر التجمع والحب والأحضان اللى متعرفش جت منين يبقى إيه الأولى ؟؟

سابعا منتخبنا نافس منافسة شريفة جدااااااااااااااااااااااااااااااااااااا بمقابل منافسة غير نظيفة للفريق الآخر ودى حاجة تحسب له بغض النظر عن الخوف والقلق اللى كانوا فيه وبصراحة لازم نديهم عذرهم لأن حرب الأعصاب اللى كانت موجودة ممكن تهد جبال ودول بنى آدمين مش حجر

ثامنا ياااااااااااااااااااريت زى ما أتجمعنا وكلنا كنا أيد واحدة فى الكورة نتجمع ونبقى أيد واحدة فى كل حاجة فى حياتنا لو عملنا كده هتفرق معانا كتير قوووووووووووووى وهنبقى أحسن بكتيييييييييييييييييييييير

تاسعا بصراحه فيه ناس ظهرت وبانت على حقيقتها قووووووووووووووى وعرفت هما قد إيه بيكرهونا وهما عارفين نفسهم كويس قوووووووووووى

عاشرا لازم نحمد ربنا ونقول الحمدلله على كل شىء ونفوق شوية بقى

خلاص بكرة بجد بقى

2009-11-17T12:53:00.000-08:00

خلاااااااااااااااااااااص بكره فعلا أول أيام ذى الحجة وأول يوم العيد الجمعة بعد الجاية إن شاء الله

كل سنه وانتوا طيبين

وياااااااااااااااااااااااااااريت بقى نصوم من بكره أنا بدأت أحس بمشاعر رمضان والأحساس اللى الواحد بيحسه لما يدخل على رمضان خلاااااااص

الأيام دى جميلة قوووووووووووووى وثوابها كبير بلاش تضيعوه

وربنا يتقبل منا ومنكم صالح الأعمال ويعينا ويثبتنا على الطاعه إن شاء الله

هنبدأ بكره بقى

2009-11-16T22:35:00.000-08:00

أزيكوا يا قطاقيط يا حلوين عاملين إيه بقى الجو بقى حاليا تحفة وجميل جدا وأكيييييييييييد كلكم مستمتعين بيه طيب يالا نبدأ بقى فى المفيد

إن شاء الله من بكره اللى هو الأربعاء هنبدأ الصيام التسع أيام أوائل ذى الحجة ومحدش يقولى هنبدأ من الخميس لأننا لسة مش عارفين أول الشهر أمتى وممكن لو أستنينا للخميس نلاقى يوم ضاع علينا وبعدين ده يوم مش هيعمل فينا حاجة

يبقى كلنا إن شاء الله نبدأ من بكرة الصيام وربنا يعينا كلنا ونصوم التسع أيام

وما ننساش بقى الدعوات أيوة الأيام دى حلوة قوى والدعاء فيها مستجاب إن شاء الله أدعوا بكل اللى أنتوا عايزينه وبتتمنوه أدعوا من كل قلبكم وفى كل وقت فى الأيام دى

ما تنسوش تطلعوا صدقات حتى لو بسيطة قوى بس ثوابها كبير قوووووووووووووووووووووى

أقول لكم على فكرة حلوة أكيد كلنا دلوقتى بنرتب دواليبنا وبنطلع الهدوم الشتوى ونعين الصيفى وأكيد هنلاقى فى ده وده حاجات صغرت أو مش هنلبسها تانى أو ما بقتش عجبانا إيه بقى داعى أننا نسيبها فى الدولاب لموا كل الهدوم دى وأدوها لأى حد محتاج فى الأيام الجميلة دى

اسألوا على كل أصحابكم وقرايبكم ولو لاقيتوا حد تعبان ولا حاجة زوروه

صلة الرحم ما تنسوهاااااااااااااااااش ولو فيه مسافات كبيرة بينكم التليفون قرب كل حاجة ومش الكام دقيقة دول اللى هيعطلونا عن حياتنا

ما تنسوش قيام الليل وكمان الذكر الكتير

ما تنسوش أهم حاجة تفكروا كل أصحابكم وقرايبكم بصيام الأيام دى

ولو حد زعلان من حد ولا فيه أى حاجة بينهم صالحوا بعض بقى والصلح خييييييييييييييييييير

وأدعوا بقى بكل خير ليكم ولينا كلنا وما تنسوش تدعوووووووووولى بقى

أقول لكم الناس اللى بتحبنى اللى بتحبنى بس أنا بقول أهو تدعيلى بقى معاها أن ربنا يحققلى اللى بتمناه وأوعوا حد يدعى عليا

حمله لبيك اللهم لبيك

2009-11-15T22:29:00.000-08:00

بدأت على موقع عمرو خالد دوت نت حملة لبيك اللهم لبيك وهي حملة تهدف إلى اغتنام العشر الأوائل من ذي الحجة في تحصيل الطاعات والفوز بجزيل الثواب من رب العالمين

واخترنا اسم لبيك اللهم لبيك ليكون شعارا للحملة لأنه نداء أبينا إبراهيم استجابة لطاعة ربه ولأنه شعار يردده حجاج بيت الله الحرام، يرجون به القرب من الله، ومغفرة الذنوب، والفوز بالجنان

ومن المنتظر أن تبدأ العشر الاوائل من ذي الحجة يوم الخميس 19 نوفمبر وهي الايام التي اقسم الله بها في كتابه (والفجر وليال عشر) وهي الايام التي قال عنها النبي ((أفضل أيام الدنيا العشر الاوائل من ذي الحجة)) وهي اعز أيام يكرمنا بها الله تعالى بعد أيام شهر رمضان، أيام فضيلة قال عنها النبي: "مَا مِنْ أَيَّامٍ الْعَمَلُ الصَّالِحُ فِيهِنَّ أَحَبُّ إِلَى اللَّهِ مِنْ هَذِهِ الْأَيَّامِ الْعَشْرِ" فَقَالُوا: يَا رَسُولَ اللَّهِ، وَلَا الْجِهَادُ فِي سَبِيلِ اللَّهِ؟ فَقَالَ رَسُولُ اللَّهِ r: "وَلَا الْجِهَادُ فِي سَبِيلِ اللَّهِ، إِلَّا رَجُلٌ خَرَجَ بِنَفْسِهِ وَمَالِهِ فَلَمْ يَرْجِعْ مِنْ ذَلِكَ بِشَيْءٍ"

وقد كان النبي يحرص كل الحرص علي صيام التسع الاوائل من ذي الحجة وهذا الصيام سنه حافظ عليه النبي ولذلك فإن حملة لبيك اللهم لبيك هي منحة ربانية، وفرصة إيمانية، سنعبد الله تعالى فيها سويا

وأهم أنشطة الحملة هي صيام أيام العشر الأوائل من ذي الحجة، وهدفنا هو جمع مليون يوم صيام، نعم مليون يوم صيام، سنصوم سوياً وسندون في العداد الخاص على الموقع كل يوم صيام يكرمنا الله تعالى بصومه

ومن الأنشطة أيضا هي دعوة الآخرين لمشاركتنا في الإقبال على الطاعات في هذه الأيام، عبر إرسال مليون رسالة قصيرة SMS لتعريف وتحبيب الناس في فضل وثواب العشر الاوائل من ذي الحجة

ويمكن تحميل والاستماع إلى حلقة الأستاذ عمرو خالد عن العشر الأوائل من ذي الحجة على الرابط التالي:

http://amrkhaled.net/multimedia/multimedia1387.htm

http://amrkhaled.net/articles/articles4001.html

----------------------------------------------------------

فضل العشر الأوائل من ذي الحجة في الكتاب والسنة

-----------------------------------------------------------

أقسم الله عز وجل في كتابه لشرفها وعظمها قال -تعالى-: "والفجر وليال عشر" قال ابن كثير -رحمه الله-: "المُراد بها عشر ذي الحجة" كما قاله ابن عباس وابن الزبير ومجاهد وغيرهم وقال تعالى " ويذكروا اسم الله في أيام معلومات " قال ابن عباس "أيام العشر" – وهى جملة الأربعين التي واعدها الله عز وجل لموسى عليه السلام "وواعدنا موسى ثلاثين ليلة وأتممناها بعشر

وفى البخاري وغيره أن رسول الله -صلى الله عليه وسلم- قال: "ما من أيام العمل الصالح فيها أحب إلى الله من هذه الأيام (يعني العشر)، قالوا: "يا رسول الله، ولا الجهاد في سبيل الله؟" قال -صلى الله عليه وسلم-: "ولا الجهاد في سبيل الله، إلا رجل خرج بنفسه وماله فلم يرجع من ذلك بشيء". وقد دل الحديث على أن العمل في هذه الأيام العشر أحب إلى الله من العمل في أيام الدنيا كلها من غير استثناء شيء منها، وإذا كان أحب إلى الله فهو أفضل عنده. وروى قدر المضاعفة في روايات مختلفة منها أنه يضاعف إلى سبعمائة؛ قال أنس بن مالك : "كان يُقال في أيام العشر بكل يوم ألف يوم، ويوم عرفة عشرة آلاف" قال الحافظ بن حجر في الفتح: "والذي يظهر أن السبب في امتياز العشر من ذي الحجة لمكان اجتماع أمهات العبادة فيه وهى الصلاة والصيام والصدقة والحج، ولا يتأتى ذلك في غيره"

وفيها يوم عرفة الذي أقسم الله -عز وجل- به في كتابه فقال: "والشفع والوتر" فهو الشفع وهو الشاهد لقوله -صلى الله عليه وسلم- "الشاهد يوم عرفة والمشهود يوم الجمعة" (الترمذي وأحمد)، وهو أفضل الأيام ففي الحديث "أفضل الأيام يوم عرفة" (ابن حبان في صحيحه)، وهو يوم مغفرة الذنوب والتجاوز عنها والعتق من النار والمُباهاة بأهل الموقف؛ ففي الحديث "ما من يوم أكثر من أن يعتق الله فيه عبيداً من النار من يوم عرفة، وأنه ليدنو ثم يباهى ملائكته فيقول ما أراد هؤلاء " (صحيح مسلم

-------------------------------------------------

كيف يستقبل المسلم هذا الموسم العظيم؟

--------------------------------------------------

بالتوبة الصادقة النصوح وبالإقلاع عن الذنوب والمعاصي؛ فإن الذنوب هي التي تحرم الإنسان فضل ربه وتحجب قلبه عن مولاه

كذلك تُستقبل مواسم الخيرات بالعزم الصادق الجادّ على اغتنامها بما يُرضي الله؛ فمن صدق الله صدقه الله، ونية المؤمن خير من عمله

من نوى الأضحية فعليه ألا يأخذ شيئاً من أشعاره وأظفاره منذ أول يوم في شهر ذي الحجة؛ ففي الحديث "إذا رأيتم هلال ذي الحجة وأراد أحدكم أن يُضحّي فليمسك عن شعره وأظفاره حتى يُضحّى" (صحيح مسلم

------------------------------------------------------

ما هي الأعمال التي يُستحب للمسلم أن يفعلها في هذه الأيام ليكون من الفائزين؟

-------------------------------------------------------

من اليوم الأول إلى اليوم الثامن من ذي الحجة

الصلاة: يجب المحافظة عليها في جماعة والتبكير إليها والإكثار من النوافل وقيام الليل؛ فإن ذلك من أفضل القربات؛ ففي الحديث "عليك بكثرة السجود؛ فإنك لن تسجد لله سجدة إلا رفعك الله بها درجة وحط عنك خطيئة " (مسلم

الصيام: لدخوله في الأعمال الصالحة؛ ففي المسند والسنن عن حفصة أم المؤمنين أن النبي صلى الله عليه وسلم "كان لا يدع صيام عاشوراء والعشر وثلاثة أيام من كل شهر". وفي سنن أبي داود عن بعض أزواج النبي -صلى الله عليه وسلم- "كان لا يدع صيام تسع ذي الحجة ويوم عاشوراء وثلاثة أيام من كل شهر"، وكان عبد الله بن عمر يصومها، قال الإمام النووي عن صوم أيام العشر أنه مستحب استحباباً شديداً

القيام: مُستحب وكان سعيد بن جبير إذا دخل العشر اجتهد اجتهاداً حتى ما يكاد يقدر عليه، ورُوي عنه أنه قال: "لا تطفئوا سرجكم ليالي العشر" تعجبه العبادة

الإكثار من الذكر: (التكبير والتهليل والتحميد)؛ ففي مسند الإمام أحمد أن النبي -صلى الله عليه وسلم- قال: "ما من أيام أعظم عند الله ولا أحب إليه العمل فيهن من هذه الأيام فأكثروا فيهن من التهليل والتكبير والتحميد"، وكان ابن عمر وأبو هريرة يخرجان إلى السوق أيام العشر يكبران ويكبر الناس بتكبيرهما.
وقال الإمام البخاري: "وكان عمر يُكبّر في قبته بمنى فيسمعه أهل المسجد فيُكبّرون ويُكبّر أهل الأسواق حتى ترتج منى تكبيرا"ً

وكان ابن عمر يُكبّر بمنى تلك الأيام وخلف الصلوات وعلى فراشه وفى فسطاطه ومجلسه وممشاه تلك الأيام جميعاً والمُستحب الجهر بالتكبير لفعل عمر وابنه وأبي هريرة

اليوم التاسع من ذي الحجة (يوم عرفة

بالإضافة إلى ما سبق ... من أراد أن يفوز في هذا اليوم بالعتق من النار وغفران الذنوب فليحافظ على هذه الأعمال فيه وهى

صيام ذلك اليوم .... ففي الحديث "صيام يوم عرفة أحتسب على الله أن يُكفّر السنة التي قبله والتي بعده" (صحيح مسلم

حفظ الجوارح عن المحرمات مطلقاً في هذا اليوم .... ففي الحديث "يوم عرفة، هذا يوم من ملك فيه سمعه وبصره ولسانه غُفر له" (مسند الإمام أحمد

الإكثار من شهادة التوحيد بصدق وإخلاص .... ففي الحديث "كان أكثر دعاء النبي -صلى الله عليه وسلم- يوم عرفة (لا إله إلا الله وحده لا شريك له, له الملك وله الحمد, بيده الخير وهو على كل شيء قدير)" (مسند الإمام أحمد)، وفي رواية الترمذي "خير الدعاء دعاء يوم عرفة، وخير ما قلتُ أنا والنبيون من قبلي (لا إله إلا الله وحده لا شريك له, له الملك وله الحمد وهو على كل شيء قدير

كثرة الدعاء بالمغفرة والعتق من النار .... فإنه يُرجى إجابة الدعاء فيه, وكان من دعاء علي بن أبى طالب (اللهم اعتق رقبتي من النار وأوسع لي من الرزق الحلال واصرف عني فسقة الإنس والجان) وليحذر من الذنوب التي تمنع المغفرة والعتق من النار كالكبر والإصرار على المعاصي

----------------------------------------------

ملحوظة الصيام هيبدأ من يوم الأربعاء لأن الرؤية هتكون لسة ما ظهرتش وممكن لما تظهر نلاقى فاتنا يوم فمفيش حاجة لو صمنا من الأربعاء

أى حد عايز ينقل الموضوع عنده يتفضل ياخده مفيش أى مشكلة

النهاردة يوم المطبخ والزهايمر العااااااااااالمى

2009-11-15T05:55:00.000-08:00

تقريبا النهاردة كان يوم عااااااااااالمى للمطبخ من ساعة ما صحيت وأنا فى المطبخ وخلصت الحمدلله بعد العصر بنص ساعة
وبدأ الموضوع بأنى دخلت عملت لنفسى أكل أفطر بيه وكتبت الطريقة بالصور الموضوع اللى فااااااااااااااااااات وبعد ما خلصت ويادوب فتحت الجهاز ونزلت الموضوع ولسة بفكر هعمل إيه وعايزة ألف لفة كده سريعة وبعدين أظبط الجهاز نسبه للحالة اللى جاتله ومابقاش راضى يفتح حاجة
أذ فجأة الاقى أغنية بحبك يا أمى حنانك فى دمى وبلتفت أشوف الصوووووووت وتأكدت وأيقنت أن موبايلى اللى بيرن وأن ماما بتتصل بيا ردييييييييييييييييت علشان الاقى المفاجأة التانية ماما هتتأخر ورايحه مشوار بعد الشغل وعلى هذا الأساس يا أما أنا أطبخ أكل للغدا أو أستنى لما ترجع وتطبخ أو ناكل أى شىء وأنا خدتنى حالة الشهامة المفاجأة دى وقلت لها لااااااااااااااااااااااا أنا هطبخ هو أنتى كنتى هتعملى إيه النهاردة
وعليها بقى أعديت العده وقعدت أفكر أعمل إيه أعمل إيه يا خوووووووووووفى يا بدران ليكون الزهايمر أنتشر ونسيت الأكل بيتعمل أزااااااااااااااااااااى
وكنت بكلم البت بدريه صاحبتى على الميل أيووووووووووووون بت صاحبتى وأنا حرة معاها ومحدش يقول لها بت غيرى وبقول لها أعمل إيه ودى تقترح عليا أعمل حاجات مش موجوده فى البيت وتقولى أخرجى أشترى وأنا علشان أسكتها قلت لها ماشى ماشى وقفلنا مع بعض وقمت بقى أشوف هعمل إيه
ماما كانت ناوية تعمل كفته أمممممممممممممممممممم أعمل إيه أنا بقى
قلت خلاص أضرب عصفورين بخمسين حجر وأعمل الكفته وكمان أعمل البطاطس اللى كنت عملتها الموضوع اللى فات بس المرة دى باللحمه المفرومة ورز بقى ولا أى حاجة جمبه
ولحد كده وكل شىء ماااااااشى تمام عاااااااااااادى جداااااااااا وظبطت وجهزت كل حاجة ونقيت الرز وجيت أعمله بقى وقلت أعمله بالشعرية وبما أن حاله الزهايمر أو عمى الألوان زادت قوى بعد ما حطيت حاجة فى الحلة وكنت متوقعة أنها شعرية ببص بعينى كده والااااااااااااقى إيه بقى اللى بيتحمر عاااااااااااااااااااااااااااااااااااااااااااااااااا لسان عصفور
يالهوووووووووووووووووى إيه اللى جاب اللسان ده هنا والعصفور ده جه منين أصلا ده بابا مش راضى يخلينى أشترى عصافير أربيهم أقوم الاقى لسانهم وبيطلعوه ليا كمااااااااااااااااااااااااان
وقلت جايز بيتهيألى وقلت علشان أتأكد لازم أجيب الكيس اللى نزلت منه اللسان قصدى الشعرية ولاقيته فعلااااااااااااااااااا لسان عصفور أمال إيه العمى اللى جالى وخلانى أتخيل أنه شعرية وعليها بقى شلت اللسان وحطيته فى طبق علشان أورى لماما هبلى لما ترجع من بره ههههههههههههههههههههههههه وحلفت ما أنا عامله لا شعرية ولا غيره وهو رز وبس بلا وش
وعملت الرز والكفته والبطاطس باللحمه المفرومه والحمدلله البطاطس باللحمه المفرومة عجبت ماما جداااااااااااااااااااااااااااااااااااااا وده لأنها داقت الحاجات التانية منى قبل كده ولكن ده أول مرة أعمل الصنف ده ولأنى دايما لما بعمل بطاطس فى الفرن يا أما بعمل معاها فراخ أو لحمه عادية لكن دى كانت جديدة بس عجبها وأنا فرحت قووووووووووووى
وقلت الحمدلله أن الزهايمر ما أثرش عليا أكتر من كده ونسيت أحط ملح ولا فلفل ولا أى حاجة على الأكل كانت تبقى مصيبة وفضيحتى كانت هتبقى بجلاجل
بس لحد دلوقتى مش عارفة إيه موضوع الزهايمر ده
ولا لسان العصفور اللى أفتكرته شعرية وكويس أن ماما عدت الموضوع وما فضحتنيش عاااااااااااااااااااااااااااا

الكلام الجاى لفاتيما روح قلب ماما وروح قلبى أنا كمان
معلش بقى أنا عارفة بدوخك معايا من كتر البوستات بس زى ما قلت لك هيا حاله بتيجى بكتر الكتابة أو قلتها مش عارفة أعمل إيه فى نفسى وعلشان كده بقيت كاتبه فوق عناوين أخر كام موضوع مع لينكاتهم

ده أنا حتى بفكر لما أسافر أو أروح لأى مكان أكتب كذا بوست وأظبطهم بالتواريخ علشان كل يوم ولا يومين ينزل بوست على أعتبار أن عفريتى هو اللى نزله هههههههههههههههههههههه

طبق اليوووووووووووم

2009-11-15T01:22:00.000-08:00

بما أنى بقالى فترة الحمدلله بقيت زى الكائنات الطبيعية اللى بتصحى بدرى مع أنى لسة بسهر برضة بس بقيت بقوم بدرى وساعتى البيولوجية تقريبا رجعت لقواعدها سالمة زى زمااااااااااااااان وتقريبا كل ما بصحى بدرى كل ما بلاقى نفسى جعانة

وخير اللهم أجعله خير أمبارح جيت على الساعة 2 ونص ولاقيت نفسى خلاص بنام قمت نمت وعلى 7 الصبح كنت صحيت وشوية ولاقيت نفسى جعت بقى وماليش نفس لأى حاجة تقليدية قعدت أقلب فى مواقع الطبخ ويمين وشمال وفوق وتحت ولاقيت حاجات غريبة عجيبه لدرجة أن نفسى أتسدت وشوية ولاقيت طريقة بطاطس باللحمة المفرومة فى الفرن وعجبتنى الطريقة ولكن أنا الصبح مش معقول هعمل حاجة دسمة كده وقعدت أفكر أفكر قلت خلاص سيبنا من اللحمه والخضار وخلينا فى البطاطس نخترع بيها حاجة منها تكون خفيفة وجديدة وقد كان قمت هوووووووووب جرى على المطبخ وعملت الآتى

المقادير

بطاطس ونقطعها قطع مربعة مثلثة أى حاجة

ملح ، فلفل ، كمون

فلفل أخضر ، بصل متقطع شرايح

طماطم جزء منها مبشور والتانى متقطع حتت صغيرة

زيت ذره

الطريقة

هنحط البطاطس فى طبق وعليها كل المكونات دى والمفروض نسيبها شوية تتبل مع بعضها

وبعدين نجيب صينية ونحط فيها ورق فويل ونحط شوية زيت وبعدين كل المقادير دى على بعضها وكمان الميه اللى هتلاقوها نزلت من التتبيلة حطوها لأنها هتديها طعم وهتعمل ريحه حلوه كمان

وبعدين نلف ورق الفويل كويس وناخد بالنا علشان ميه التتبيلة ما تطلعش بره وندخله الفرن

صورة المقادير بعد ما أتحطت قبل دخولها الفرن

بعد تلت ساعة نطلع الصينية ونفتح الفويل بالراحة بطرف شوكة نشوف البطاطس أستوت ولا لا وغالبا هياخد نص ساعة وبعد كده نفتح الفويل ونشغل الشواية شوية علشان وش البطاطس يحمر
وبس كده ده اللى عملته النهاردة وكان طعمه حلو جدااااااااااااااااااااااااااااااااااااااااااااااااااااااا وريحته جنان
وطبعا ممكن يتزود على الحاجات دى أى نوع خضار وكمان لحم مفروم يكون متعصج والمرة الجاية هزود الحاجات دى وهصورها برضة وأجيبها هنا

بعد ما أستوى وقبل ما أحطه تحت الشواية شوية

وبالهناااااااااااااااااا والشفا

وبما أنى بقيت كائن نهارى عاااااااااادى فأكيد كل يوم هدخل أخترع وأفنن شوية وهرجع لعادتى المطبخية البوسبوسية

هههههههههههههههههههههههههههههههههههههههههههههه

وجبتلكم مواقع أكلات كتيرة جدا وهتلاقوها على الجمب فى المدونة وأى خودعة بقى

وطبعا بما أن قلب الراجل فى كبدته يوووووووووه قصدى فى معدته فقلت أهى حاجة تنفعكم للزمن ههههههههههههههههههههههههههه

والله وعملوها الرجالة ورفعوا راس مصر بلدنا

2009-11-14T12:32:00.000-08:00

يمكن أنا ماليش فى الكورة ولا بحبها أصلا مع أن بابا وأخواتى بيحبوها جدااااااااااااا وبيبقى يوم الماتش ده يوم عالمى وده لأن التشجيع كان بيبقى حار جداااااااااااااا وكنت بحس أن البيت هيتهد من تشجيعهم وخاصة لما نجيب جون ومع أنى ما بحبش أشوف الكورة ولكن فى حالات زى دى بحب أشوف اللى بيحصل وبفرح قوى لما نكسب ويمكن أتفرجت وفرحت جدا لما جبنا أول جووووووون وكان قلبى على وشك أنه يقف فى باقى الماتش لولا الجون التانى ولأول مرة فى حياتى أصقف وأهيص وأعمل اللى عملته النهاردة لما جبنا الأجوان بجد مبسوووووووووطة وفرحت أكتر من فرحه أخواتى وهما بره مصر وبيستنوا أى شىء يفرحهم مبرووووووووووووووووووووك لكل مصر والمصريين وعقبال ما نكسبهم تانى فى السودان قولوا
آميييييييييييييييييييييييييييييييييين

شفتك فى الحلم

2009-11-14T06:40:00.000-08:00

من زمان ما شفتكش فى الحلم وكان نفسى أشوفك قوووووووووووووووووى يمكن لأنى كنت بحس معاك بالأمان اللى مفتقداه من زمااااااااان قوى ويمكن لأرتباطى وحبى الكبير ليك
ومن مده طويله وأنت غايب عن عالمنا من حوالى خمس سنين ولكنك لسة فى قلبى وعمرى ما نسيتك ولا هنساك
لأنك كنت ومازلت أغلى عم عندى فى الدنيا كلها
ومش عارفه ليه كل ما بكون فى حيره أو مزاجى مش مظبوط وعندى حاجات كتير قلقانى بشوفك فى الحلم وده بيطمنى قوووووووووووووووووووى
يمكن أنا ما فهمتش معنى الحلم ومش قادرة أوصل لفك الرموز والحاجات اللى كانت فيه ولكن كل اللى أقدر أعمله أنى أحاول أخلى الناس تدعى ليك وتقرا ليك الفاتحه لأن ده اللى هيفيدك دلوقتى واللى أنت أكيد محتاجه منى ومننا كلنا

اللهم أغفر له و أرحمه و اعفو عنه و أكرمه
اللهم وسع مدخله و أدخله الجنة و غسله بالثلج و الماء والبرد
اللهم يمن كتابه و هون حسابه و لين ترابه و ثبت أقدامه و ألهمه حسن الجواب
اللهم نور مرقده و عطر مشهده و طيب مضجعه
اللهم آنس وحشته و أرحم غربته و قه عذاب القبر و عذاب النار
اللهم نقه من خطاياه كما ينقى الثوب الأبيض من الدنس
اللهم فسح له في قبره و أجعله روضة من رياض الجنة و لا تجعله حفرة من حفر النار
اللهم أجعل له من فوقه و من تحته و من أمامه و من خلفه و عن يمينه و عن يساره نورا من نورك يا نور السماوات و الأرض
اللهم أبدله دارا خيرا من داره و أهلا خيرا من أهله و أزواجا خيرا من أزواجه واسكنه فسيح جناتك في الدرجات العلي آمين
اللهم إن كان قد أحسن فزد في إحسانه و إن كان قد أساء فتجاوز عن إساءته
اللهم من أحييته منا فاحييه على الإسلام ومن توفيته منا فتوفاه على الإيمان
اللهم ارحم ( عمى مجدى ) رحمة واسعة وتغمده برحمتك

ربنا يرحمك يا عمى ويدخلك فسيح جناته
آميييييييييين يارب العالمين

متوفى يوم 22 أغسطس 2004 ومازال فى قلبى وعقلى موجود

زعلانة من الدنيا كلها

2009-11-13T02:59:00.001-08:00

لما تكون بتحب كل الناس وتكون بتتعامل مع الناس بكل حب وود وأخلاص وتكون من جواك بتعاملهم كلهم عادى ومش فى دماغك حاجة وبتحب تكون علاقات كتيرة ومفيش جواك أى حاجة وحشة ناحية أى حد ودايما بتكون حريص على معاملتك وعلى أنها تفضل كويسة معاهم وتلاقى الناس بتفهمك وتفسر كلامك وطريقتك ومعاملتك غلط ويكون سوء النيه موجود جواهم هتعمل إيه ؟
لما تكون فى أوقات كتيرة محتاج أصدقائك وتقوم أنت متصل بيهم علشان تطمن عليهم وتفضفض معاهم وبرضة تحس أنهم مش حاسين بيك وما فكروش أصلا لما لاقوك متغير أو فيك حاجة يطمنوا عليك ولما تلومهم أنهم مش بيسألوا عنك يعتذروا بمليون سبب مع أنك لما بتتأخر عنهم شوية بيزعلوا ويلوموك هتعمل إيه ؟
لما تقول لحد من أصحابك أنك محتاج تتكلم وتفضفض وعندك حاجة مغيراك أو محيراك ولكن كل ما تيجوا تتكلموا تحصل حاجة تقطع الكلام ده وما تكملوش وتكون منتظر أنك هتلاقيه بيكلمك يشوف فيك إيه ومالك وما تلاقيش هتعمل إيه ؟
لما تكون بتفرح لكل الناس لما تحصل عندهم أى حاجة كأنها حصلت ليك وتزعل برضة لزعلهم لو حصل عندهم حاجة وتلاقى الناس برضة تفسر تصرفك ده تفسير غلط هتعمل إيه ؟
لما تكون مهتم بشغل أصحابك وبتحب دايما تبقى متواجد وتدخل تعلق عندهم وتبقى فرحان ليهم وبكل حاجة بيعملوها وتلاقى ناس بتفسر ده غلط وساعات هما كمان يفسروه كده ويتعمدوا يبعدوا عنك هتعمل إيه ؟
لما تلاقى كل كلمة وحرف وهمسة بتعملها الناس تفسرها بمزاجها هيا وتألف حكايات وروايات عليها ويصدقوا نفسهم قوى وما يبقاش عندهم أستعداد يصدقوا الصح هتعمل إيه ؟

هو الصح أننا نبقى وحشين مع بعض ؟؟
هو الصح أننا ما نحبش يعض ؟؟
هو الصح أننا ما نساعدش بعض ؟؟
هو الصح أننا ما نطمنش على بعض حتى لو برسالة ولا رنة موبايل ؟؟
هو الصح أننا ما بنحبش الخير لبعض ؟؟
هو الصح أننا نتكلم على بعض ؟؟
هو الصح أننا نغلط فى بعض ؟؟
هو الصح أننا نبقى أندال مع بعض ؟؟
هو الصح أننا نتخلى عن بعض ؟؟
هو الصح أننا بنكون بنعمل الصح ويتفسر غلط واللى بيعمل الغلط محدش بيجى جمبه ؟؟

هو إيه بقى الصح وإيه بقى الغلط لأنى تقريبا أكتشفت أنى مش عايشة فى الدنيا دى يمكن عايشة فى دنيتى أنا اللى عملتها وصنعتها بكل تفاصيلها بس برضة كنت عايشة فى دنيا كل البشر وبشوف الحلو والوحش والصح والغلط وكنت بعمل الصح ومهما ده كلفنى ومهما الناس ما فهمتوش كنت بعمله وطالما ما بعملش حاجة غلط ولا حرام ماكانش بيهمنى كلام أى حد ولكن تقريبا فيه مفاهيم وحاجات كتيرة قوى أتغيرت وغيرت الناس

ولكن للأسف أنا مش عارفة أتغير وأبقى وحشة
مش عارفة أبقى أنسانة بتحب نفسها وبس
مش عارفة أبقى أنسانة ما تسألش وتطمن على الناس
مش عارفة أبقى أنسانة ما تحبش الخير للناس وتكره الشر ليهم
مش عارفة أبقى أنسانة تتخلى عن أى حد طلب منها مساعدته مهما كلفها ده
مليون مش عارفة لحاجات كتيرة غريبة مش قادرة عليها

وفعلا ما بقتش عارفة الغلط فيا ولا فى الناس ولا فى الدنيا ولا فى مين بالظبط ولكن فى اللحظة دى أفتكرت كلمة منى ذكى فى فيلم عن العشق والهوى لما قالت أنها زعلانة من الدنيا كلها

لأنى أنا فعلا حاليا زعلانة من الدنيا كلها

كلنا ليلى السنه الرابعة

2009-11-12T04:32:00.000-08:00

كلنا ليلى

كلنا ليلي هي مبادرة على الساحة التدوينية تدعو لإعادة النظر في القيم والأفكار السائدة المتعلقة بالأنثى التي يمارسها المجتمع يوميا دون اعتبار لتأثيرها على النساء أنفسهن

والدعوة ليست للترويج لثقافة أو قيم بعينها، ولكنها دعوة لنقد ومراجعة سلوكاتنا اليومية برغبة حقيقية في تغييرها وتنقيتها

لذا فالمشاركة متاحة ومفتوحة للجميع من مصر ومن الدول العربية نساء ورجال مدونين أو مواطنين يتم نقل أصواتهم للإنترنت

بدأت الفكرة فى سنة 2006 بمصر، ومنذ ذلك الحين شارك فيها العديد من المدونين والناشطين

وفي عامنا الرابع، نسعي لتوسيع التجربة لتشمل أكبر عدد ممكن من الدول العربية إيمانا مننا بأن الواقع الإجتماعي في الوطن العربى متشابه لدرجة التطابق فى بعض الأحيان؛ لهذا ندعوكم للمساعدة فى تنظيم الفعاليات لهذا العام والتى ستبدأ فى 24 من ديسمبر وتنتهى فى 30 من الشهر ذاته

انطلقتْ فكرة "كلنا ليلى" عام 2006 بمبادرة مدوِّنة مصرية باسم "لستُ أدري" بالإضافة الى العديد من المدوّنين في العالم العربي

و تتلخص فكرتها في دعوة المدونين العرب إلى التعبير عن آرائهم ومشاهداتهم فيما يتعلق بوضع المرأة العربية بكل حرية وصراحة، خاصة في ظل التأثير المتصاعد للإعلام الجديد على مجتمعاتنا متمثلاً في المدونات، وقد رأينا ذلك الأثر في الأعوام الماضية حيث اهتمت صحف ووسائل إعلامية عدة بالمبادرة منها الجزيرة والبي بي سي وصحيفة المصري اليوم والدستور وغيرهم

المشاركة متاحة ومفتوحة للجميع نساءاً ورجالاً، وللجميع مطلق الحرية في إبداء الرأي بأي من وسائل التعبير المتاحة: مقال، فكرة، صورة، تصميم، قصة ، أو أي شكل آخر. ويمكنك كذلك أن تختار بين النشر في مدونتك الخاصة أو النشر في المدونة الرئيسية للحملة

ليست هناك أية قيود سواء على الموضوعات أو الأفكار المطروحة، أو اللغة المستخدمة (رغم تفضيلنا للغة العربية لتكون اللغة الرسمية للمبادرة)، كما يمكن للمشاركة أن تكون مكتوبة أو مسموعة أو مرئية. كل ذلك مرحبٌ به ما دام صاحبه مؤمناً به ومسئولاً بشكل شخصي عن الدفاع عن آرائه أمام وجهات النظر المضادة ومستعداً كذلك لتغييرها إن اقتنع بأوجه القصور فيه

متى وكيف ؟

وفي عامها الرابع ستنطلق المبادرة يوم 24ديسمبروتستمر أسبوعاً فتنتهي يوم31 ديسمبر، كما أنها وعلى عكس الأعوام الماضية ستشمل دولاً عربية مختلفة – عدا عن مصر – كفلسطين وسوريا والأردن والمغرب وغيرها

جربت مرة ما تخافش من السعادة

2009-11-11T19:03:00.000-08:00

مش عارفة ليه دايما الناس لما بتفرح بتخاف

يمكن بتخاف للحظات السعادة دى تنتهى بسرعة وللأسف هما بكده بيضيعوها بمزاجهم فى تفكيرهم فى الخوف وبيفوقوا بعد ما بتخلص اللحظات دى وبعدها لو حصل أى حاجة لا قدرالله يقولوا للى حواليهم شوفوا مش قلت لكم أنا كان قلبى حاسس وخايف وأحساسى طلع صح

أحساس إيه بقى اللى طلع صح

هو مش المفروض أننا بشر وعايشين فى دنيا فيها الحلو والوحش والسعادة والحزن يعنى أكيد هنمر بلحظات سعادة ولحظات حزن وحاجات كويسة وحاجات وحشة

يبقى مش غريب لو مثلا حصلت حاجة وفرحتنا قوى وبعدها بيوم ولا يومين حصل أى حاجة وحشة لأننا عايشين فى دنيا مش فى جنه

ولكن للأسف أحنا اللى بنضيع لحظات السعادة والفرح وبنقتلها بسبب خوفنا من اللى جاى ويا سلام بقى بنعيش لحظات الحزن بدقة وأخلاص قوى وكل واحد كده يبص جوه نفسه لما بتحصل حاجة تزعله هتلاقيه بيعيش الجو الحزين قوى ويتمادى فى حزنه ولكن لما تحصل حاجة تفرحه يادوب شوية كده يفرح وبعدين يفضل خايف من اللى جاى

تقريبا ماعندناش ثقافة الأستمتاع بالسعادة

أحنا لية بنتسعجل الحاجات الوحشة

عايزة الناس تقولى هل فعلا بتخافوا من لحظات السعادة والفرح ولا بتحاولوا تعيشوها صح ؟

وليه أصلا بتخافوا منها وبتضيعوها بالخوف ده ؟

شعور بالأحتياج

2009-11-10T17:53:00.000-08:00

عندما تجد نفسك تحتاج أشخاص بعينها فى حياتك وتكون فى قمة أحتياجك لهم وللحديث معهم ولا تجدهم فمن الأفضل أن تصمت وأن تحترف الصمت بدلا من شعور الأحتياج الذى يعذبك
فكلنا بشر ونحتاج فى أوقات معينة للكلام والبوح ولكن ليس مع أى شخص سوف نتكلم فكل شخص منا حوله الملايين من الأشخاص ولكن الذى تريد الكلام معهم والخروج من صمتك ليسوا كثيرون ولكن عندما تريدهم لم تجدهم ليس تقصيرا منهم ولكن لظروف كثيرة يمر بها كلا منهم
ويظل أحساسك بالأحتياج يعذبك وتجبر نفسك على التزام الصمت حتى لا تجرح نفسك أكثر من اللازم وحتى تشعر بأنهم يشعرون بما داخلك ويحاولون أخراجك من صمتك فلا تتردد وأخرج ما بداخلك فهذا ما كنت تتمناه
ولكن لو حدث ولم يشعروا ويهتموا بك فألزم الصمت وأتركهم لحالهم وما هم به فمن المؤكد أن لديهم الكثير والكثير الذى يجعلهم لا يشعرون بك وعليك أن تلتمس لهم الأعذار ولا تغضب حتى تعرف سبب بعدهم عنك
ولكن لو شعرت بأن بعدهم عنك ليس الا عدم أهتمام منهم فعليك الأبتعاد عنهم وعدم اللجوء لهم مرة آخرى وتركهم لحالهم حتى لا تكون متطفل وتزعجهم بتطفلك وحتى لا تتعذب بأحساس المتطفل
وكفى شعور الأحتياج الذى يزعجك ولا تجد من يشاركك حتى تتخلص من هذا الشعور

ولكن كل ما أشعر به الآن هو شعور رهيب بالأحتياج لأشخاص بعينها وما يؤلمنى أكثر أنى حتى الآن لا أستطيع الحديث معهم لسوء الحظ الذى يحالفنى كلما أردت الحديث معهم
ولكن كل ما أعلمه أنهم على علم بما داخلى ولكن أحساس التطفل الذى شعرت به عند طلبى الحديث معهم يعذبنى خاصة أنى لم أصل لهم ولم أستطع الحديث معهم وأجبرت نفسى الآن على أحتراف الصمت حتى أصل لنتيجة ما

أما أن ينتهى شعور الأحتياج هذا

أو أجدهم يحدثونى

أو أتخلص من أحساس التطفل

أو كل هذا مرة واحدة

حوارى مع موظف التعداد

2009-11-08T16:07:00.000-08:00

رن جرس الباب الصبح وجريت أبص من العين السحرية لاقيت واحد ومعاه دفاتر وورق كتير فكرت شوية أفتح ولا لا وفى النهاية فتحت شراع الباب بس لأنى كنت لوحدى فى البيت
وبعدها عرفنى بنفسه وبأنه من التعداد وجاى يأكد على البيانات اللى جت بنات قبل كده خدتها مننا وأعتذر عن الأزعاج اللى هو حسه وده لأنه لاقانى فتحت الشراع مش الباب وعرف أنى لوحدى وده سبب له أحراج

ما علينا المهم بدأت الأسئلة

الشاب / الأسرة كام فرد
أنا / أحنا خمسة بس أخواتى الأتنين حاليا برة مصر مش هنا
الشاب / يعنى كام واحد مقيمين فى الشقة
أنا / فى بالى أممممممممم ما أنا لسة قايلة أننا خمسة وأخواتى الأتنين مش هنا يبقى الباقى أكيد ثلاثة المهم قلت له ثلاثة
الشاب / أيوة المقيمين بس هنا ثلاثة
أنا / قلت له أيوة ثلاثة
الشاب / يعنى اللى عايشين هنا ثلاثة
أنا / من جوايا أتخنقت بصراحة وكنت هفقد أعصابى قلت له أيوة ثلاثة اللى مقيمين حاليا هنا أنا وبابا وماما
الشاب / مين بقى الثلاثة دول
أنا / فى سرى آه يا دماغى هو أنا بتكلم هيروغليفى
الثلاثة أنا وبابا وماما
الشاب / أه الوالد اللى هو الأستاذ عبدالباسط وكمل باقى الأسم طيب عنده كام سنه
أنا / 58 سنه
الشاب / طيب والوالدة أسمها إيه وكام سنه
أنا / وبعد ما قلت له فاجأنى بسؤال كان هيغمن عليااااااااااااااا
الشاب / وأنتى بقى المدام أسمك إيه وكام سنه
أنا / بعد صدمة الكلمة الغريبة العجيبة ولأنى من شوية بقول له البيت فيه أنا وبابا وماما وكمان قلت له سن بابا يعنى مش معقول هبقى المدام المهم قلت له لا أنا بنتهم وأسمى كذا وسنى كذا
وفى سرى صبرنى يارب
الشاب / طيب مؤهلات بابا وماما إيه وبيشتغلوا إيه
أنا / بعد ما قلت له قالى سؤال أكتر مفاجأة وأتحدى لو حد يعرفه عن أهله
الشاب / طيب هما شغالين من كام سنه
أنا / بعد نظرة كلها أستغراب قلت له مش عارفة الصراحة بس تقريبا هما شغالين من يوم ما أتخرجوا بس كام بالظبط معرفش
الشاب / يعنى مثلا بابا بقاله 30 سنه
أنا / اه ممكن مع أنى بعدها لما حاولت أحسبها لاقيتهم أكتر ولأنه فاضل له سنتين ويطلع معاش ههههههههههههههههههههههههههههههه
الشاب / طيب ماما شغالة من كام سنه
أنا / قلت له برضة مش عارفة ممكن 30 برضة وفى بالى هيا البيانات دى مش معقول حد يعرفها عن أهله والمفروض يسأل الأهل نفسهم عااااااااااااااااااا
الشاب / طيب إنتى مؤهلك إيه وكام سنه
أنا / ليسانس آداب فلسفة و26 سنه
الشاب / بتشتغلى
أنا / لا
الشاب / أتصدم وأستغرب كأنى شتمتة مثلا وقالى ما أشتغلتيش خالص
أنا / لا أشتغلت قبل كده فى مدرسة بعقد وسبتها
الشاب / بنفس نظرة الأستغراب والصدمة اللى مش فهماها طيب وسبتى الشغل من أمتى
أنا / من حوالى سنه ونص
الشاب / طيب ما أشتغلتيش تانى لية
أنا / هو فيه شغل وأنا قلت لا
الشاب / لية هو مفيش
أنا / وكنت فعلا هفقد أعصابى عليه إيه الكلام المستفز ده قلت له طبعا مفيش هو فين الشغل ده وفى سرى إيه علاقة الكلام ده بالتعداد نفسى أعرف
الشاب / قام سألنى تانى مؤهلك إيه مع أنى لسة قايلاه له من شوية وقام كتبه مع شوية كلام بعد الكام سؤال دول وبعدين فجأة قالى تانى سنك كام مع أنى لسة قايلاه
أنا / 26 سنه وفى سرى صبرنى يارب أنا إيه اللى صحانى بدرى النهاردة عااااااااااااا
الشاب / بعد ما سمع السن للمرة المليون قالى إنتى مقيمة هنا
أنا / كنت فعلا هعمل كذا حاجة يا هقفل الشراع فى وشه يا هصرخ من غيظى يا هضربه يا هعمل أى حاجة تطلع الغيظ اللى أنا فيه
قلت له أيوه مقيمة هنا
الشاب / أستغرب قوى وسألنى وقالى 26 سنه
أنا / قلت له أيوه
الشاب / ومقيمة هنا على طول
أنا / فى سرى يارب
أيوة مقيمة هنا على طول وفى سرى أمال على العرض هههههههههههههه
ومش عارفة هو أستغرب لية من أنى 26 سنه ولسة مقيمة مع أهلى هو الواحد المفروض من سن كام يطفش ويسيب أهله هههههههههههههههههههههههههههههههههههه
ولا هو المفروض يستقل بنفسه بقى بعد سن معين ولا فيه إيه فى اليوم ده ولا الواد ده أخره إيه أنا أتخنقت
الشاب / قعد يقلب شوية فى الورق وفى الحاجات اللى كتبها وفى النهاية قالى فيه رقم تليفون بيت
أنا / أيوة
الشاب / طيب ياريت أخده
أنا / أديته له
الشاب / طيب ماشى شكرا وأسف على الأزعاج والسلام عليكم
أنا / العفو وعليكم السلام وقفلت الشراع وكان هاين عليا أكسر الباب من الغيييييييييييظ

وكنت فعلا هموت وأعرف إيه كمية الأستغراب اللى هو أستغربهم لما عرف أنى ما بشتغلش وأنى قلت له أنه مفيش شغل كأنى قلت شىء غريب أو مش موجود
وكمان لما عرف سنى وأنى لسة مقيمة هنا أمال عايزنى أقيم فييييييييييييييييين
وكمان البيانات اللى كل شوية أقولها وينساها كأنى بكلم نفسى مع العلم أن كل كلمة بيكتبها يعنى حتى لو نسى هيلاقيها مكتوبة

وساعتها أفتكرت أغنية ما شربتش من نيلها ما أستغربتش من كلامها طيب بطلت تستغرب ولا لسة

عيد الحب السنجلاوى

2009-11-03T20:08:00.000-08:00

لا أعلم تحديدا منذ متى وأنا أعرف بأمر هذا العيد سواء العيد المحلى 4 نوفمبر أو العالمى 14 فبراير ولكن كل ما أعلمه أننى أرى أن الحب يجب أن يكون موجود طوال العام ولا مانع من يوم أو أثنان نزيد فيها جرعة الحب والهدايا وخلافه ولكن كل ما كنت أمانع فيه هو أن الناس طوال العام فى شجار ونزاع ونكد وفجأة يهبط الحب والحنان والهدايا

أين كان هذا الحب طوال العام ولماذا ننساه ونتذكره يوم واحد فقط ؟

ولكن دعونا من هذا ولكنى طوال عمرى والست وعشرون سنه التى قضيتها على وجه الأرض وأنا أحتفل بهذا العيد بمفردى ومع أصدقائى وأقاربى ونتبادل التهنئة والعبارات الجميلة وكنت أرى الشوارع مليئة بكل شىء لونه أحمر مثل الدباديب والورود وغيرها وأرى كل ولد وبنت يسيران فى حالة هيام وغرام غير طبيعية وخاصة عندما كنت فى المرحلة الجامعية كان هذا اليوم نادرا ما تجد فتاه أو شابا يسير بمفرده ومع أنهم طوال العام فى شجار ولكن فجأة يهبط الحب والسلام وعندما ينتهى اليوم يعود الشجار والنكد الى قواعده سالما
ولكنى لم أحتفل بهذا العيد مطلقا مع طرف آخر بمعنى أدق مع شاب وهذا لأننى غير مرتبطة

ولا أخفى عليكم سرا أننى مثل باقى البشر وبداخلى مشاعر وأحاسيس وأتمنى أن يأتى اليوم وأجد من يقدم لى وردة أو يتذكرنى بكلمة طيبة ولكن حتى ذلك اليوم سوف نحتفل بهذا العيد السنجل وسوف أسمية عيد الحب السنجلاوى نسبة الى كل السناجل الموجودة والتى أعرف منهم الكثيرون

واذا كنت عزيزى القارىء من زوى السناجل مثلى تماما فعليك الأحتفال هكذا

أولا أن تتذكر كل من تعرفهم ومرتبطين وتحاول تذكرتهم بأمر هذا العيد لعل وعسى يكون أحدهم فى عالم آخر ونسى هذا الأمر فتكون فعلت شىء جيد جداااااااااااا مثلما فعلت أنا وذكرت أخى بأمر العيد ليحتفل به مع خطيبته

ثانيا أن تتذكر كل الخلافات والشجار الذى يحدث بين أى شخصين مرتبطين وأنت تعرفهم جيدا لتحمد الله على أنك مازلت سنجل

ثالثا أن تشترى دبدوب أحمر كبير ووردة حمراء وتسير بها فى الشارع مثل باقى البشر ليتخيلوا أن أحدهم أهداها لك وأنك مثلهم تماما وعندما تصل الى منزلك ضع الدبدوب فى علبه الهدايا والوردة داخل كتابك المفضل وأنتظر اليوم الذى سوف تكون مرتبط فيه وأهدى الدبدوب للطرف الآخر وأخرج الوردة وقل له أنك كنت تحتفظ بها وتنتظره ليراها

رابعا أرسل بالتهانى ورسائل ورنات الموبايل لأصدقائك ولأهلك ولأنه يجب أن يكون عيد حب لكل الناس

خامسا عيش وأحلم وأكثر من دعائك الى الله أن يوفقك وتصل لنصفك الثانى

سادسا أخرج وسر فى الشوارع وأفعل كل ما تريد وتذكر أنك بمفردك وأن للسنجل مميزات كثيرة فلن تجد شخص يعطيك موعد ويتأخر ولا تجد أولاد فى البيت وتود الا تعود الى منزلك حتى ترتاح من صراخهم طوال اليوم وأنك قادر على الخروج والسفر بمفردك فى أى وقت بدون مشاكل

سابعا أعلم تمام العلم أن نصفك الثانى بأنتظارك ولكن عليك أن تلتفت حولك حتى تجده وتجده بعناية

ثامنا أفعل مثلى وأنسى كل شىء وأى شىء وسافر الى أى مكان وحبذا لو كان مكان ريفى وأستمتع بالخضرة وكل شىء جميل وأنسى المدينة بصخبها وكل مشاكلها وأذهب لترتاح قليلا من نفسك ومن كل شىء

وأخيرا كل عيد حب سنجل وجميعكم بخير متمنين لكم فى العيد القادم فى شهر فبراير أن لا تكونوا سناجل
مع تحيات شركة السناجل المتحدة

سنجل وأفتخر

2009-11-03T17:01:00.000-08:00

يمكن اللى هقوله كلام أتقال كتير قبل كده وهيبقى كلام متعاد ولكن كل مرة بحاول أكتب فيها موضوع خاص بالبنات بحاول أكتبه بصيغة الجمع يعنى بتكلم عن كل البنات مش عنى أنا
ولكن المرة دى حسيت أنى عايزة أتكلم عنى ويمكن لما هقول اللى جوايا واللى حاسة بيه الموضوع هيوصل أكتر
فى مجتمعنا دايما بتلاقى البنت فى كل مرحلة من عمرها ليها مسمى ولكن فيه مسمى بيبقى جارح قوى وبيسيب علامة مش كويسة جوه أى بنت وهو عاااااااااااااااااااااااااانس
يمكن أنا عن نفسى مش مقتنعة بالموضوع ده ومش فارقة معايا أى سن ولا شايفة أن الجواز والأرتباط لازم يكونوا فى سن معين وبعد كده نبدأ نتهم البنت ونرمى عليها كلام وشوية ونقول خلاص القطر فاتها بقى ومحدش يفكر يقرب لها ولأن ديننا كمان محددش سن للجواز وقال أن بعد كده خلاص ما ينفعش ولكن مجتمعنا هو اللى عمل كده
ولأن الحكاية مش حكاية جواز وخلاص ما هو فيه ملايين الناس متجوزة ولكن هل هما عايشين صح ؟ هل هما مبسوطين ؟ هل هما حاسين بأى حاجة حلوة فى الدنيا ؟ ولا كل يوم يلعنوا فى الجواز وسنينه
مش قادرة أقول لكم كم الأذى اللى بحس بيه لما بحس أن حد بيعتبرنى خلاص القطر فاتنى وعليا أنى أقبل بقى بأى حد وخلاص والا ما ألومش الا نفسى
ويمكن أنا فى المكان اللى عايشة فيه الموضوع مش كبير قوى أو مش كل الناس شايفين كده ولكن لأنى من بلد ريفى فالموضوع بقى واخد شكل تانى ويمكن مش بالنسبة لكل الناس ولكن الأغلب عندهم أن البنت لما توصل ل 20 سنه من غير أرتباط تبقى دخلت فى سن الخطر وأول ما تخلص جامعة عند سن 21 تقريبا ومفيش حاجة بقى يبدأ الكلام والهمس ويا سلااااااااااااااااااام بقى لما توصل لسن 25 ولسة مفيش خطوبة ولا جواز كده تبقى كارثة بكل المقاييس
ولأنى خلاص عديت ال 25 سنه فالموضوع بقى واخد خط مش لطيف أبدا مع ناس كتيرة ويمكن بتحط فى مواقف تخلى الحجر ينطق وخاصة فى الأفراح اللى أنا بصمم أحضرها زى أى بنى أدم طبيعى ولأن مفيش فيا حاجة تخلينى أهرب من الناس ولكن للأسف الناس هيا اللى مريضة بمرض أسمه الجواز والعنوسة وخلافه
ويمكن قبل كده كانت كلمة عقبالك بتتقال ليا عادى مع أبتسامة أو ضحكة أو هزار من أى حد ولكن دلوقتى الوضع أختلف تماما بقيت بسمع كلمة عقبالك بنظرة كلها حزن ويأس وحسرة عليا وعلى عمرى
بالأضافة الى كم الدعوات اللى بسمعها بودنى وببقى نفسى فى اللحظة دى أفقد سمعى علشان ما يحصلش ليا حاجة من الكلام ده
عارفين كده لما واحد يبقى بيشحت ومصمم أنك تديلة حاجة ويفضل يدعيلك بطريقة مستفزة جداااااااااااااااااا
هو ده بالظبط اللى بقى بيحصل دعوات بأن ربنا يكرمنى وياريت الكلمة تتقال مرة واحدة لا دى بتتقال مليون مرة مع طبطبة على الكتف وشوية وهياخدونى فى حضنهم ويعيطوا ويكون نفسهم أعيط معاهم علشان الدعوة تجيب أثر
وطبعا أنا فى المواقف دى بتجيلى حالة هستيرية من الضحك وبتبدأ بأبتسامة بلهاء ورد بأن اللى ربنا عايزة هيكون وبأن محدش هيموت من عدم الجواز وبأنى مش مستعجلة ولا عايزة أسيب أهلى ولا أهلى أشتكوا منى ولأن الموقف ده فعلا بيبقى مهين وجارح جدا ومش أى حد هيحس بيه الا بنت وتكون مرت بواحد زيه
تخيلى نفسك كده رايحة مثلا خطوبة بنت عمك وهيا أصغر منك بحوالى خمس سنين وانتى مبسوطة ليها جدااااااااااااااااااااااا وعايزة تطيرى من الفرحة ليها وفجأة أول ما توصلى وتسلمى عليها وتاخديها فى حضنك وتباركى ليها وتبدأى فى السلام على باقى الناس تحسى أنك واقفة فى جامع والكل عمال يدعى ليكى بطريقة مستفزة وياريت الكلمة تتقال مرة واحدة لا لا أزاى لازم تتقال مليون مرة وكل شوية تلاقى حد جاى وراكى ويكمل دعاء ويملس عليكى قال يعنى علشان الدعاء يبقى صح ويتحقق وكمان شوية وتحسى أنهم هيشحتوا عليكى عريس
ولا لما تحسى أن الناس خايفة أنك تحسدى قرايبك البنات اللى أصغر منك وأتخطبوا أو أتجوزوا وبيبصوا ليكى بصات مش كويسة ومعناها أنهم خايفين من عينك ومن حسدك
فعلا هو أحساس وشعور بشع وموقف سخيف وبايخ جدااااااااااا وبيجرح بنات كتير قوووووووووووى وبيعلم جواهم
ولكن أحسن حاجة أن كل واحدة تبقى واثقة فى نفسها جدا وما تحاولش تتأثر بالكلام ده بالعكس ده تحاول تبقى طبيعية جدا وعادية مع الناس وترد عليهم بكلام يخليهم يكسفوا من نفسهم ومن أفكارهم الغريبة دى
وتعيشى حياتك عادى جدا وما تقبليش بأى واحد علشان تخلصى من كلام الناس لا طبعا ده غلط ولأنه ممكن يؤدى لمشاكل ولا قدر الله لطلاق بعد كده يبقى إيه الأحسن جوازة فاشلة ولا طلاق ولا تبقى عانس زى ما الناس عايزة
أنا عن نفسى هفضل سنجل وعااااااااااااااااانس زى ما الناس عايزة لحد ما ألاقى اللى أنا عايزاه وغير كده يبقى بيت أهلى أولى بيا وحياتى ومستقبلى أهم لأن الموضوع مش جواز وخلاص ولا بيعه وشروه وصفقة هنعملها ده عمر وحياه وحاجات كتيرة مهمة لازم تبقى موجودة
مش عارفة لية حاسة أن عمرى ما هعيش لليوم اللى هشوف التفكير ده أتغير ناحية البنت وحتى لو ما أتغيرش وأنا لسة عايشة بتمنى يجى يوم ويتغير وبيتهيألى التغيير هيجى مننا أحنا يعنى أحنا دلوقتى سواء كنا بنات ولا ولاد أكيد فاهمين الكلام ده وبقينا شايفين أنه فيه موروثات وتقاليد غلط جدا وطالما عارفين كده يبقى نبدأ نغيرها ونعمل الصح
بالأضافة الى أننا نعلم ولادنا الصح ونغرس جواهم المفاهيم الصح مش الموروثات الغلط اللى عمالة تدمر فينا

وعلشان كده أنا برجح أفضل سنجل وبناشد كل البنات تفضل سنجل لحد ما يلاقوا نصهم التانى بس يلاقوه صح مش أى كلااااااااااااام

صدور العدد السادس وأفتتاح دار نشر ميكانو ومهرجان ميكانو الأول

2009-10-31T18:45:00.000-07:00

تم بحمد الله صدور العدد السادس من مجلة ميكانو

لمشاهدة العدد كاملا

http://www.mikanoo.com

بالأضافة الى مفاجأتنا المتعددة منها
افتتاح دار ميكانو للنشر الإلكترونى
لمن يرغب فى نشر مدونته يرجى الارسال عبر الايميل التالى
info@mikanoo.com
------------------------------------------
قريباً مهرجان ميكانو الأول فى تاريخ مصر لأدب المدونات
ونتيجة مسابقة مدونات ميكانو
انتظروناااااااااااااا

أعشق تمردى

2009-10-30T14:39:00.000-07:00

نعم أعشق تمردى ولا أرى فيه شىء خطأ مع أن الكثيرون يرون أن التمرد يتمثل فى الصوت المرتفع والتعدى على كل شىء صحيح وفعل الكثير من الأشياء الخاطئة
لكن تمردى أنا تمرد من نوع خاص لا يرتبط أبدا بالصوت المرتفع بالعكس فتمردى يرتبط كثيرا بالصمت والرفض المستميت لأى شىء لا أرغب فيه
فقد أحترفت الصمت منذ الصغر وصارت عندى موهبه فيه وصار الصمت فن أتقنه بشده ونادرا ما يفهمنى أحد أو يعلم ما بداخلى ولكن المقربين منى فقط يعرفون كل ما بداخلى فمجرد نظرة منى كفيلة بإيصال ما أود قوله ولكن يوجد كثيرون لا يفهمون لغة العيون ولكن من لا يفهمها لا يهمنى فى شىء فيكفينى فهم أقرب الناس لى ولأنى أتخذت من صمتى خطا دفاعيا عن كل شىء يمر بى ولأن الكلام كثيرا لا يصل لنتيجة وينتهى الأمر بالجدال فقط والمعارضة والنقد لمجرد النقد والمعارضة ليس الا
أحببت خجلى وأنطوائيتى الزائدة وأنا صغيرة التى جعلتنى صامتة رغما عنى نسبة لكم الخجل والأنطوائية التى كنت بها ولكن عندما كبرت وتخلصت من هذه الأنطوائية وأصبحت أجتماعية نوعا ما أخترت الصمت طريقا لى بدلا من الجدل الذى ينتهى الى جدل ومشاكل لا نهاية لها
فكثيرا ما نتكلم ونقول ونقول وينتهى الكلام بلا شىء ولا نتيجة ففى هذا الوقت يكون الصمت أصلح حل وتكون لغة العيون هى طريقى لإيصال ما أريد
وقلمى وورقى هما الطريق الثانى وبهذا أخرج ما بداخلى
أعشق تمردى على العادات والتقاليد والموروثات الخاطئة والتى لا ترتبط بالحلال والحرام ولكنها أشياء موروثة فى عقولنا فلا داعى من خجلى أو تصريحى من تمردى عليها
أعشق تمردى على الخوف والفشل والأحباط واليأس وكل شىء يأخذنى للخلف
وأريد أعلانها بأعلى صوت بأنى بشر وأريد أن أعيش مثل أى بشر وأنى مللت وحدتى التى يغلفها الصمت والبرود والجمود والأحتياج فبداخلى بركان ثائر يود أن يخرج ويصيح بأعلى صوت ويصرح بأنه بشر ويود أن يعيش مثل باقى البشر
بداخلى بركان مشاعر يود أن يصيح بعلو صوته ويخرج من صمته وهدوئه ويصبح كالفيضان يملأ الكون كله ويعلن ما بداخله بكل قوه وبدون خوف
مازلت أتمرد حتى على نفسى ولا أعلم نتيجة هذا التمرد الا أنى أعشق تمردى بشدة