Sunday, September 27, 2009

أحنا مش كمالة عدد

كتير قوى وغالبا بتتعرض البنت لأنتقادات وهجوم من كل اللى حواليها لمجرد أنها عايزة تعمل حاجة لمجرد أنها عايزة تثبت نفسها وعايزة تعمل ليها كيان
غالبا بتتعرض البنت لأنتقادات وهجوم لمجرد أنها بنت وعلشان بنت ما يصحش تعمل كده حتى لو كان كده ده حاجة كويسة ومفيدة ومهمة ولكن علشان هيا بنت لازم تسكت وتفضل قاعدة حاطة أيدها على خدها مستنية عريس العدل اللى يجى ويشيل الشيلة ويكمل تحكمات وكبت ليها ولشخصيتها ويكمل تحكم وهجوم ونقد ليها لكونها الست وهو الراجل
وكتير قوى بتكون الأم اللى هيا ست وكانت فى يوم من الأيام بنت وليها آحلام وطموح وحاجات نفسها تحققها السبب فى الهجوم والأنتقادات اللى بتتوجه للبنت لأنها بتكون أول واحدة تحاول تكبت طموح وآحلام بنتها وبتساعد للأسف باقى الناس على كده بداية من والدها وأخواتها نهاية للراجل اللى هتتجوزة
بجد بيصعب عليا قوى أشوف مشاكل كتيرة بتمر بيها البنات سببها ستات وغالبا بيكونوا أمهات
وكتير بنشوف آحلام وطموح بيتكسر ويتهد علشان أنتى بنت ولأنك بنت مش لازم تعملى كده ولا تحلمى ولا يكون ليكى طموح
ولكنى عايزة أقول أننا مش كمالة عدد مش مخلوقين علشان نفضل قاعدين ساكتين ونكتم آحلامنا وطموحنا اللى لو سبتونا نعمله ممكن يجيب نتايج حلوة قوى وأنتوا أول ناس هتفرحوا بيها
بقولها بصوت عالى أنا مش كمالة عدد ومش لازم تكون أى بنت كمالة عدد ولازم تحاول وتحاول تحقق آحلامها وطموحها مهما كلفها ده
وياريت كل واحدة تردد الكلمة دى بعلو صوتها وتقول أنا مش كمالة عدد وما تسيبش حد يسرق حياتها وطموحها
فى النهاية أحنا مش كمالة عدد

موضوع من مواضيع الجزء الأول من كتاب البنات عايزة إيه

Monday, September 14, 2009

أرحموا بنات مصر لا للمنتج الصينى الجديد

تفاجئنا الصين هذه الأيام بأعلانها عن منتج جديد جدا ولكنه مختلف عن أى منتج آخر فهو ليس غسالة ولا ثلاجة ولا تليفزيون 20 بوصة ولا فانوس ولا أى شىء من المنتجات التى أغرقت السوق المصرى ولكن هذا المنتج الذى سوف تجدونه قريبا فى الأسواق وبعد العيد مباشرة ما هو الا وصمة عار جديدة لكل المصريين ولو تجاهلنا ما يحدث ووقفنا نشاهد من بعيد بدون كلام رافعين شعار ( وأحنا مالنا ) لم يتبقى لنا شىء بعد ذلك نخاف عليه أو نتكلم عنه لأن كل شىء ممكن السكوت عنه الا الحديث عن الشرف فهو أغلى من كل شىء

وبعيدا عن شعارات البعد عن التخلف والجهل وأن شرف البنت لا يتمثل فى وجود هذا الشىء من عدمه فأنا أقولها لكم بعلو صوتى أن شرف البنت بالفعل لا يمكن أن يكون متكامل بدون هذا الشىء
فلا الدين ولا العادات ولا التقاليد ولا أى شىء أخر يتقبل كل هذا الهراء

وأذا وضعنا الدين جانبا وتكلمنا تبعا لتفكير الرجل الشرقى بغض النظر عن ديانته فأنا أقولها لكم لا يوجد رجل شرقى أيا كان يستطيع قبول أى امرأة فقدت عذريتها قبل زواجه بها سواء أكتشف هذا الأمر قبل الزواج أو بعده
وكما يقال أن الأمر ليس فى بعض نقط الدم المنساله لأنه فى حالات كثيرة ومتعددة وشرحها الأطباء كثيرا بأنه لا يحدث نزول دم لأسباب متعددة ولكن أى طبيب يستطيع معرفة هذا بكل سهولة وهل عدم نزول الدم سببه فقدها لعذريتها أم لأى سبب آخر سوف أقوم بنقله لكم من مواقع طبية كثيرة

فدعونا نتحدث بكل صراحة وواقعية وأنقل لكم آراء الرجال والشرقيون خاصة

الرجال لا يمكن أن يقبلوا فتاه فقدت عذريتها وأصبحت بدون هذا الشىء التى تروجه لنا الصين قريبا

النساء والفتيات أغلبهم يرون أن شرفهم أغلى شىء يملكونة فى هذه الدنيا ويحتقرون أى فتاه تفرط فى نفسها وفى شرفها بغض النظر عن أى حادثة أو شىء جعلها تفقده رغما عنها

وكل أم منذ ولادة بنتها وهى تحاول بكل الطرق توصيل لأبنتها فكرة ممنوع أقتراب أى شخص منك وخاصة هذه المنطقة ولأنها فى السن الصغير لا يمكن أن تفهم شرح الأم ولكن أى أم تحاول بقدر الأمكان توصيل المعلومة للبنت بطريقة بسيطة جدا ( وهى أنه عيب أى حد يلمسك فى أى حته فى جسمك خصوصا لو كان ولد وخصوصا المنطقة دى ) وتحاول بكل الطرق غرس الفكرة داخل عقلها حتى تكبر وتفهم أكثر وتستطيعوا سؤال أى أم عن كلامى هذا

وليس معنى وجود عدد من الفتيات ليس عندهم أخلاق أو شرف أن كل البنات هكذا وبغض النظر عن أى شىء فمجتمعنا بكل طبقاتة وطوائفه يرفض هذا المنتج الغريب وعلينا جميعا رفض دخول هذا المنتج بأى طريقة وعلى حكومتنا الدور الأكبر فى هذا

وأخيرا أنا كفتاه مثل ملايين الفتيات حاولت قدر الامكان منع نفسى من العصبية وأنا أكتب هذا الكلام دفاعا عنى وعن شرف بنات مصر ولى كلمة بسيطة أريد أن أوجهها لكل الناس أنه ليس بهذا المنتج أو غيره سوف تنحرف الفتيات أو تترك أخلاقها لأن الفتيات التى بداخلها فكرة الأنحراف والتفريط فى الشرف ليسوا أى فتيات ولا يوجد شىء يمنعهم من هذا ولا يهمهم هذا المنتج من غيره ويوجد عوامل كثيرة تدفعهم لذلك منها عوامل نفسية وأسرية وبيئية
فالفتاه المحترمة مهما حدث حولها لا يمكن أن تتخلى عن أخلاقها ولا عن شرفها فمهما فعلتوا فستظل فتيات مصر أشرف فتيات على وجه الأرض
وليس معنى كلامى أننا نسمح بدخول هذا المنتج لأن المسألة مسألة مبدأ ولأن مصر ليست وكرا لكل ما هو فاسد وغريب وغير أخلاقى وضد ديننا وعاداتنا وتقاليدنا

--------------------------

الصين تروج لأغشية بكارة صناعية فى مصر

http://www.youm7.com/News.asp?NewsID=136135

"الصحة"و"الصيادلة"يرفضان غشاء البكارة الصينى

http://www.youm7.com/News.asp?NewsID=136371

غشاء البكارة الصينى يثير جدلاً.. مواطنون: سيزيد العنوسة ويحبس البنات فى البيوت.. أطباء: يسبب العقم ويفتح باب الانحراف.. حقوقيون: إهانة بالغة لا يمكن أن نتجاوزها

http://www.youm7.com/News.asp?NewsID=136364

بكام الغشاء إنهاردة ؟

http://www.facebook.com/note.php?note_id=158810973956&ref=nf

Sunday, September 13, 2009

هو كله شغل شغل مفيش أجازة


كل يوم اللى نصحى فيه ننام فيه وياريتنا بنعرف ننام ده أول ما نحط راسنا على المخدة تجيلنا مليون فكرة وفكرة ويا أما نقوم نكتبهم ولو ماكناش قادرين نمسك الموبايل ونسجل عليه عناوين الأفكار علشان لما نصحى نشوفهم ونكتبهم وده على أعتبار أننا بننام أصلا هو تقريبا الجيل ده حد باصص له فى النوم بقينا جيل بلا نوم هناخد الرقم القياسى فى قلة النوم والأرق الكتير

جدول حياتنا كل يوم زى التانى زى الثالث زى الرابع وبيكون كالآتى
كذا فكرة جداد هنكتبهم وكذا مجلة على كذا جرنان على كام موقع هنلف فيهم نعرف أخر أخبار الدنيا
ونشوف النوتس الجديدة عند الناس ونلف على المدونات
والجروب ده عايزين نكبره شوية وده جروب جديد فكرته حلوة
شوفتى الموضوع الفلانى عند فلان رااااائع خدى اللينك شوفيه
طيب شفت الجروب الجديد بتاع فلانه جامد جدا يالا أدخل وعايزين نظبطه فى الدعايا
شفت الواد عباس عمل إيه ولا البت سوسو يا خرب عقولهم أتخطبوا ولاد الإيه ولا كان باين عليهم يالا ربنا يتمم ليهم على خير وتكمل الجوازة ويرزقهم ربنا بالذرية الصالحة
يا خبر شفتى فوزية صاحبتى مش فسخت خطوبتها للمرة العاشرة
وشفتى بقى أعلان الشغل الجديد ده قدمت فيه بس تقريبا زى العادة ولا حد هيعبرنى

أنا عندى فكرة لكتاب لا لا دول فكرتين ثلاثة لكذا كتاب طيب ابدأ بأى واحد فيهم وعايز حد يساعدنى فى الأفكار وتظبيط الفكرة طيب أعمل الكتاب مع أى دار نشر دول كلهم نصابين والواحد خلاص جاب أخره مفيش حاجة عدله
طيب خلاص هنكتب الكتاب لحد ما نشوف أكتر دار نصبا يوووووووه قصدى أكتر دار كويسة ومناسبة نعمل فيها الكتاب
وأنا لسة عايز أكمل دراسة وأتعلم وعايز أخد دورات فى حاجات كتيرة وأتعلم وأتعلم وأشتغل فى حاجات تانية وجديدة وعايز أعمل حاجات كتيرة

ويعدى الشهر ويجرى ويفوت واللى يحصل واللى يكون جديد والحدث السعيد نزول أعداد المجلات أو الجرايد اللى بنكتب فيها ولوووولوووولى مبروك العدد الجديد نزل يالا نغرق الناس بلينكات المواضيع والأعداد ونخنقهم لحد ما يزهقوا مننا ولو مادخلوش بالذوق هندخلهم بالعافية أمال إيه هنشتغل على الفاضى مش كفاية بنشتغل ببلاش كمان مش هنلاقى حد يشوف شغلنا

ويعدى شهر ورا شهر وكل يوم زى التانى والأفكار بتزيد ومفيش جديد وحياتنا بقت مملة وممكن على مدار كام شهر نلاقى حفلة ولا ندوة نحضرهم ونقول هيييييييه عملنا حاجة جديدة
وتفضل حياتنا شغل فى شغل لحد ما بيجى علينا وقت بنمل ونزهق ونتخنق بطريقة مش طبيعية مفيش تجديد مفيش خروج مفيش فسح مفيش تغيير والأنسان محتاج كل فترة والتانية للتغيير ولكن رتم الحياه السريع اللى بقينا فيه وظروف وحاجات تانية كتيرة ممكن تكون عائق للأنسان بأنه يخرج أو يسافر أو يتفسح أو يعمل شىء جديد ولكن الموضوع ده مهم قوى ولأن الواحد لو فضل شغل فى شغل شغل يا هيتجنن يا هيجيله أكتئاب يا هتحصل له أى حاجة وخلاص


ولكن أبشرك لو كنت من محبى الكتابة بطريقة مش طبيعية ودايما عندك أفكار كتيرة ومش لاحق تكتبها ودماغك شغالة تفكير وتحليل وتأمل وتدقيق مليون ساعة فى ال 24 ساعة أبشر أنت فى بداية طريق المورستان واللسعان وعلشان تعرف أنك على بداية طريق اللسعان أو المورستان شوف النقط اللى جاية


أولا لو كانت دماغك شغاله وما بتبطلش تفكير ولا لحظة وفى اللحظة الواحدة بتفكر فى مليون حاجة يبقى أنت خلاص على حافة اللسعان


ثانيا لو كنت قاعد فى أمان الله بتكتب أو بتفكر فى حاجة وجه حد يكلمك وأنت أنتبهت له علشان تسمعه وفى خلال لحظة رجعت تانى تفكر فى اللى بتعمله وتكتب وبعد شوية تقول للى بيكلمك بعد ما خلص كلامه هو أنت كنت بتقول إيه يبقى أنت أكيد أكيد وصلت


ثالثا لو كنت بتابع كل اللى بيحصل حواليك وبتدقق وتاخد بالك من كل كلمة وحرف وحدث وتفضل تحلل فيهم أبشر فاضلك خطوة وتبقى لاسع لاسع يعنى


رابعا لو كنت لسة مخلص شغل وكتابة وخلاص هتقوم تنام وأول ما تحط دماغك على المخدة تجيلك مليون فكرة وتقول يااااه ده أنا نسيت أكتب الموضوع الفلانى ونسيت أعلق على الكلام الفلانى وعندى فكرة دلوقتى عايز أكتبها وبكرة هعمل كذا وكذا وكذا وغالبا بتلاقى نفسك قمت تانى تكمل كتابة أو أقل حاجة تمسك موبايلك تسجل عليه الأفكار لحد ما تصحى


خامسا لو لاقيت نفسك صاحى من النوم وحاسس أن دماغك ما بطلتش تفكير حتى وأنت نايم وتلاقى أخر مليون حاجة كنت بتفكر فيهم قبل ما تنام هما اللى بتفكر فيهم أول ما صحيت يبقى خلاص بقى ربنا معاك


سادسا لما تلاقى نفسك قاعد فى وسط الناس وبيتكلموا فى موضوع وأنت سرحت فى حاجة جديدة وفكرة عايز تنفذها


سابعا لو كنت خارج وماشى فى الشارع ونفسك تكلم بتاعت الترمس وبتاع التين الشوكى وتعمل معاهم حوار وتبقى هتموت وتكلمهم ولكن بتخاف ليضربوك بحاجة فى دماغك


ثامنا لما تلاقى نفسك ماشى وعايز تصور أى حاجة وكل حاجة فى أى مكان وأى موقف وتطلع عليهم مليون تحقيق ومليون كلمة


تاسعا لما تلاقى نفسك نسيت كل الدنيا ونسيت نفسك والعمر عمال يجرى وأنت مقضيها شغل فى شغل وكل اللى يكلمك يقولك مش هنفرح بيك بقى ترد عليهم بأبتسامة بلهاء وبرد معناه أنك لسة ما لاقتش اللى بتحلم بيه ما هو طبيعى هتلاقية أزاى فى وسط كل اللى بتفكر فيه ومين أصلا هيستحمل كل الكركبة اللى فى حياتك دى الا أذا كان زيك وفيه حاجات كتيرة مشتركة بينكم ساعتها ربنا يوفقكم بقى ويتمم ليكوا على خير وساعتها ممكن تروحوا المورستان مع بعض وبالمرة تبقوا عزوة هناك


عاشرا لما تكون قاعد على الكمبيوتر وبتكتب موضوع وفى نفس الوقت فاتح مدونات الناس بتقرأ فيهم وكمان فاتح الميل بتكلم صحابك وموبايلك بيرن وأنت بترد عليه وفاتح الفيس بوك وكذا موقع لجرايد ومجلات وكل ده بتعمله فى نفس اللحظة أعرف أنك فعلا فعلا وصلت


حادى عشر لما تكون مقضيها شاى على قهوة على نسكافية وفى نفس الوقت ممكن تعمل كل الحاجات دى وتشربها


ثانى عشر لما يبقى عندك آحلام كتيرة وطموح فوق الوصف وعايز تعمل مليون حاجة وحاجة وكل ما بتعمل حاجة تلاقى نفسك عايز تعمل غيرها وغيرها والآحلام والأفكار ما بتنتهيش يبقى أنت أكيد أكيد لسعت


وبعد كل الحاجات دى وحاجات أكتر منها بكتير بنعملها كلنا أعرفوا أننا خلاص لسعنا أكيد وفاضل لنا خطوة على المورستان وكفاية كده لأنى حاسة أنى لسعت بجد

:)))

Thursday, September 10, 2009

أين أنت من قيمــــة الإقبال على العـلم؟ هام جداااااااااااا

أين أنت من قيمــــة الإقبال على العـلم؟

حب المعرفة من أولويات حياتى ؟

( نعم ) ............................... ( لا )

أبذل الكثير من وقتى وجهدى ومالى لتحصيل العلم والمعارف ؟

( نعم ) ............................... ( لا )

لم أعد أعتقد فى قيمة العلم فالنجاح يحتاج حظ وانتباه للفرص؟

( نعم ) ............................... ( لا )

أسعى إلى أن أعرف ولو بعض الأشياء فى كل العلوم ؟

( نعم ) ............................... ( لا )

العصر الذى نعيشه يتطلب ارتحال وحركة ولكنه ليس بحاجة لعلم ؟

( نعم ) ............................... ( لا )

ثقافة الشعوب وعلمها يوضح القدر الذى ستشغله هذه الشعوب وما ستحققه من نجاح؟

( نعم ) ............................... ( لا )

يكفى أن يحفظ الشخص مواده الدراسية للحصول على شهادة ليكون شخصا ناجحا؟

( نعم ) ............................... ( لا )

تحصيل العلم تضييع للوقت والمال والأفضل أن نعمل أطول وقت ممكن ؟

( نعم ) ............................... ( لا )

أرى أن عزة الإسلام فى مدى العلم الذى يحصله المسلمين ليرفعوا رايته على أسس علمية؟

( نعم ) ............................... ( لا )

لم يعد هناك تقدير للعلم والعلماء وبالتالى من غير المنطقى الإلتفات لتحصيله؟

( نعم ) ............................... ( لا )

لا أجد تحصيل العلم من الأمور التى تجذبنى ؟

( نعم ) ............................... ( لا )

سيظل أصحاب العلم أصحاب فضل على البشرية بأكملها وهذا ما جعلهم يوصفون بأنهم ورثة الأنبياء ؟

( نعم ) ............................... ( لا )

يمر عليَ عام بأكمله ولم أقرأ كتاب بأكمله؟

( نعم ) ............................... ( لا )

أسعى دائما لأن يكون لغذاء العقل لديَ قدر من الوقت والإهتمام ولا يتوقف الأمر عند غذاء الجسم؟

( نعم ) ............................... ( لا )

أنا غير مهتم بما يدور حولى ولا أتابع الأحداث ؟

( نعم ) ............................... ( لا )

العلم أمر ينتقل للبشرية بأكملها ، فإذا ما حصله شخص أو دولة كفى الأخرين فإذا ماكانت هناك دول تسعى للعلم فلا داعى أن نسعى نحن أيضاً ؟

( نعم ) ............................... ( لا )

لديَ نشاط علمى بمقدرا ثابت فى حياتى ؟

( نعم ) ............................... ( لا )

لا أتلقى المعلومات بشكل سلبى ولكنى دائما ما أجتهد لتنقيحها وفهمها ووضعها موضع اختبار؟

( نعم ) ............................... ( لا )

الكتب من الهدايا التى تسعدنى ؟

( نعم ) ............................... ( لا )

لا يمكن أن أحضر جلسة علم وأشعر بسرور أو سعادة ؟

( نعم ) ............................... ( لا )

أعتقد أن العلم وأصوله سيظل حكراً على دول بعينها وسنظل متأخرين فلا فائدة من البداية لأنها متأخرة مهما سعينا؟

( نعم ) ............................... ( لا )

أُمرنا بتلقى العلم للدرجة التى أعتقد فيها أنه عبادة ؟

( نعم ) ............................... ( لا )

حساب الدرجة : تحصل كل عبارة على درجة واحدة .. مع الأخذ فى الإعتبار أن بعض الفقرات تأخذ درجة إذا كانت الإجابة بـ ( لا ) ، وذلك على النحو التالى :

العبارات التى تحصل فيها على الدرجة إذا كانت الإجابة بـ ( نعم ) هى أرقام : 1، 2 ، 4 ، 6 ، 9 ، 12 ، 14 ، 17 ، 18 ، 19 ، 22

العبارات التى تحصل فيها على الدرجة إذا كانت الإجابة بـ ( لا ) هى أرقام : 3 ، 5 ، 7 ، 8 ، 10 ، 11 ، 13 ، 15 ، 16 ، 20 ، 21

مستويات الدرجة :

إذا حصلت على درجة كلية تساوى من 1- 10 فإن قيمة الإقبال العلم لديك قيمة منخفضة.

إذا حصلت على درجة كلية تساوى من 11- 16 فإن قيمة الإقبال على العلم لديك قيمة متوسطة

إذا حصلت على درجة كلية تساوى من 17 - 22 قيمة الإقبال على العلم لديك قيمة مرتفعة

وضع هذا الاستقصاء الخبيرة النفـسيـة دالـيـا الشيـمـي - المنـتـدب لـلتـدريــس بـقسـم علـى الـنفــس ومدير مركز (عـينٌ عـلى بُـكـرَة) للمـسانـدة النفسية والتنمية الأسرية.

http://amrkhaled.net/articles/articles3690.html

Wednesday, September 9, 2009

خلاص مااااااااااشى

ياااااااااااه خلاص رمضان قرب يخلص خلاص ودخلنا على العشر الأواخر يااااااااااااه الواحد محسش بالأيام ولاقاها بتجرى قوى ويمكن هو كده الأيام الحلوة بتجرى بسرعة
يالا بقى نلحق نفسنا فى العشر الأواخر ونشد حيلنا فى الصلاه والقرأن والدعاء وإن شاء الله ربنا يبلغنا ليلة القدر وننول ثوابها كلنا إن شاء الله وما تنسونيش من دعائكم بقى
اللهم بلغنا ليلة القدر وأغفر لنا ذنوبنا وأعتقنا من النار
آمييييييييين يارب العالمين

Tuesday, September 8, 2009

عالج أمراض قلبك

فى الحلقة ال 17 من برنامج قصص القرآن أتكلم عمرو خالد عن أمراض القلب وفعلا هيا أمراض خطيرة جدا وياريت نراجع نفسنا كلنا واللى يلاقى حاجة منهم فيه يحاول يعالجها ويتخلص منها

وزى ما مكتوب فى موقع عمرو خالد
أمراض القلوب كثيرة ومنها الحقد والحسد والغل والكراهية والكبر والعجب والأنا،،، وكلها تؤدي إلى الهلاك وسوء الخاتمة إن لم يسع الانسان لعلاج نفسه وتخليصها من هذه الامراض التي تفتك اول ما تفتك بصاحبها. فلنبحث في قلوبنا ونطهرها كما نهتم باجسادنا ليل نهار. أما الجسد ففان، وأما القلوب فتأتي يوم القيامة بما كان داخلها في الدنيا ثم تحاسب عليه...."إلا من اتى الله بقلب سليم

وده اللينك لو عايزين تقروا أكتر

Sunday, September 6, 2009

حلال المشاكل

مين فينا ماعندوش مشكلة ومش عارف يعمل فيها إيه
مين فينا مش لاقى حد يحكيله عن مشاكله وياخد رأيه فيها
الفكرة بدأت بسيطة جدا بمدونة للمشاكل كنت عملاها مع صديقة ليا من سنين عبارة عن فضفضة بينا وبين الناس ولكن المفاجأة أنه بقى بيجيلنا مشاكل كتيرة وبقينا بنرد عليها وكلامنا بقى بيعجب الناس وبياخدوا بيه
حلال المشاكل قسم فى مجلة وسط البلد لـ بسمه عبدالباسط
www.wostelbalad.com
جروب حلال المشاكل على الفيس بوك
-----------------------------------
على قد ما بقدر بحاول أقدم أى نصيحة بشوفها مناسبة والحمدلله جاتلى مشاكل كتير ومع أن الواحد ساعات ما بيقدرش يحل مشاكله هو شخصيا بس ببقى فى قمة سعادتى وأنا بساعد أى حد فى حل مشكلتة وعلشان كده عايزة الموضوع يكبر قوى علشان أحس أنى عملت حاجة يمكن أعوض حاجات كتيرة مش عارفة أعملها لنفسى بالموضوع ده وتقريبا موضوع الدبلومة اللى عايزة أعملها مرتبط بالموضوع ده أدعولى بقى أعملها على خير وربنا يوفقنى فيها
وأكيد مش كل المشاكل بنشرها على الجروب أو المجلة باخد أذن صحابها الأول ولو ماعندهمش مانع بنشرها ولو مش موافقين ما بنشرهاش طبعا
------------------------------------
لو عجبكوا الكلام بتاعى وعايزين تتكلموا وتفضفضوا أبعتولى على
hallalmashakel@gmail.com

-----------------------
ودى مجموعة من المشاكل فى مجلة وسط البلد