Wednesday, October 14, 2009

عجبا لأمر الحب

عجبا لأمر الحب !!! ؟
فبه تفرح قلوب وبه تحزن قلوب
وبه تعيش أحلى حياه وبه تموت وأنت على قيد الحياه
عجبا لأمر الحب !!! ؟
فهو الضيف الوحيد الذى يزورك بدون أستئذان بل ويدخل ويسكن قلبك ويعيش فيه رغما عنك وتظل تتسائل من هذا الزائر الغريب الذى بيده فرحك وحزنك
عجبا لأمر الحب !! ؟
الذى يجعل عينيك فى لحظة واحدة مليئة بالدموع وفى خلال هذه اللحظة تتبدل الدموع بلمعان من كثرة سعادتك به
عجبا لأمر الحب !! ؟
الذى يبدل حالك فسوف تجد نفسك تكتب كثيرا وتبدع حقا حتى لو كانت هذه هى أول مرة تكتب فيها أو تضيع منك الحروف والكلمات ولا تستطيع كتابة كلمة واحدة
عجبا لأمر الحب !! ؟
فقد يجعلك تحب كل شىء يحبه حبيبك وترى كل شىء يفعله جميلا
عجبا لأمر الحب !! ؟
فقد قيل فيه الكثير والكثير ومازال يقال فيه ولن تتوقف الكلمات ولا الحروف التى تقال على الحب فحرفان من حروف اللغة يحيران العالم بأكمله
حقا عجبا لأمر الحب !!!!!!!!!!!!!!!!!!!!!؟؟

Monday, October 5, 2009

السادس من أكتوبر وتاريخنا اللى ضاع




أيوة فعلا بكرة 6 أكتوبر بس ياترى كام واحد وواحدة عارفين يعنى إيه 6 أكتوبر وخصوصا الأجيال الجديدة كل الناس بتسأل هو أجازة ولا لا وكل اللى بيربطهم باليوم أنه أجازة والناس هترتاح من شغلها والطلاب من الجامعات والمدارس



اللى خلانى أتكلم فى الموضوع ده أمبارح ماما بتقولى بعد بكرة 6 أكتوبر مش هتكتبى عنه قلت لها لا مش هكتب قالتلى لية أمال أنتى بتشتغلى إيه مش المفروض برضة تفكروا الناس بتاريخهم قلت لها مش النظرية أنا بس ما بحبش أكتب فى الأتجاه ده مبعرفش أكتب فى المواضيع دى ما بلاقيش نفسى فيها ولا بعرف أعبر عن اللى جوايا
قالتلى يعنى المجلات ولا الجرنان اللى بتكتبى فيه مفيش حد خالص هيكتب عنهم قلت لها أكيد فيه ناس هتكتب لكن أنا مبعرفش أكتب فى الحاجات دى وبعدين أساسا محدش بقى عارف حاجة عن 6 أكتوبر غير أنه أجازة وبس ردت وقالتلى هو فعلا كل الناس بتدور على يوم الأجازة بس أكيد برضة لازم يكونوا عارفين هو حصل إيه فى اليوم ده
قلت لها يا ماما خلاص الموضوع ده أنتهى كان على أيامنا زمان وفى جيلى أنا وأخواتى اللى هو جيل التمانينات وما قبلة هما بس اللى عارفين معلومات عن 6 أكتوبر وكنا زمان لازم نعمل موضوع تعبير عنه وكمان مدرس الرسم كان يخلينا نرسم عنه وكانوا بيعملوا أحتفال فى المدرسة ونلاقى فيه كلمات ومواضيع وحاجات عن 6 أكتوبر ولكن خلاص أعتقد الأجيال اللى بعد كده الوضع أختلف معاها تماما ومابقاش فيه حاجة أسمها موضوع تعبير ولا حصة رسم ولا حفلة ولا كلمة فى الاذاعة الصبح عن 6 أكتوبر أحنا أتربينا على الحاجات دى وعرفناها مش من تاريخنا ومادة التاريخ وبس ولكن كل حاجة حوالينا كانت بتحكيها حتى التليفزيون نفسه كان فيه مسلسلات وأفلام زمان لما كنا صغيرين بتحكى التاريخ غير البرامج وغير أنى سمعت من بابا ذكرياته مع الحرب ولكن خلاص دلوقتى ما أعتقدش أنه فيه حد بقى عارف حاجة كل اللى يعرفوه أنه يوم أجازة وبس
وأنتهى الحوار مع ماما ولكن لاقيت نفسى جريت وبرضة عايزة أكتب عن الموضوع وذكرياتى معاه من زمااااااااااااااااان



أنا فاكرة فعلا لما كنت صغيرة أنا وأخواتى أننا كنا عارفين مناسبات وحاجات كتيرة تاريخية وكنا بنلاقى حد فى المدارس يحكيلنا عن التاريخ والحرب وحاجات كتيرة وحتى لما كنت لسة فى أبتدائى وأنطلب منى موضوع تعبير ورسم عن 6 أكتوبر جريت على بابا اسأله ولاقيتة حكالى وكتبلى موضوع عن الحرب واللى شافه واللى حصل وبعدها أنا قريت وفهمت وكتبت ورسمت وساعدنى فى الرسم وكمان كان بيحكيلنا عن اللى بيحصل وحصل



عارفين زمان شبابنا كان بيحصل معاهم إيه كان ممكن الواحد يدخل الجيش ويقعد 7 سنين وما يبقاش عارف هيخرج أمتى ولا هينزل أجازة أمتى
أنا بابا قعد فعلا حوالى 7 سنين فى الجيش لحد الحرب ما خلصت وماكانش فيه زى دلوقتى موبايلات ولا تليفونات تقدر تطمن على أهلك ولا هما يطمنوا عليك وكان ممكن تقعد بالشهور محدش يعرف عنك حاجة وأهلك يفتكروا أنك مت خلاص لأنه مفيش أى أخبار وكل شوية يسمعوا أن فلان مات أو مصاب



ولا واحد يكون خاطب واحدة وبقاله كام سنه فى الجيش مش عارف ينزل وياخد أجازة 24 ساعة ولا 48 وينزل يعمل الفرح ويتجوز ويرجع الجيش وما يرجعش تانى لعروستة لأنه أستشهد
متخيلين مشاعر الناس وقتها كانت عاملة أزاى



بابا كان بينقل ذخيرة فى عربية من مكان لمكان وبيقولى كان ممكن نبقى لسة نازلين من العربية وبنحط الذخيرة فى مكان ونلاقى العربية أنضربت
أو يادوب لسة هنخرج من الخندق نلاقى الضرب يمين وشمال



أحنا الجيل بتاعنا جيل التمانينات وجيل السبعينات كان محظوظ شوية يعنى حتى اللى ماكانش عنده حد فى الجيش وحكاله عن اللى حصل كان فيه مدارس وحاجات تانية بتنقل لنا اللى حصل



ولكن جيل التسعينات وما بعد أنتهى خلاص الموضوع ده لا بقى فيه أهل بتحكى حاجة ولا المدارس بتعلم حاجة والتليفزيون حاله زى ما الكل عارف كل سنه اللى بيحصل فيلم ولا أتنين عن الحرب وده مش كل حاجة طبعا وده على القنوات المحلية واللى ما بقاش حد بيتابعها أصلا



وما فاضلش غير النت والجرايد والمجلات ياترى هيكتبوا إيه بقى
المتوقع أنهم هيعملوا مقارنة بين زمان ودلوقتى وهنلاقى أغانى ومواضيع عن أول ضربة جوية فتحت باب الحرية وكمان خناقات عن مين كان أحسن فى الرؤساء وأى عصر أحسن وكلام متقال ومتعاد مليون مرة




بالأضافة الى أننا هنلاقى كمان أخبار عن الأستعداد لعيد ميلاد عمرو دياب ومشكلة نور الشريف ومشكلة أيناس الدغيدى والماتش النهاردة حصل فيه إيه
ومش ده اللى عايزين نسمعه لأننا زهقنا منه



بس مش عارفة تقريبا أنا بحلم لأنه خلاص اللى أحنا عرفناه عن تاريخنا وأتعلمناه ومحفور فى عقلنا صعب أنه يتحفر فى عقول الأجيال الجديدة لأنه خلاص مفيش أهل عندهم وقت يحكوا حاجة والمدارس ما أعتقدش حد هيعمل زى زمان والتليفزيون راحت أيامه وده على أعتبار أن حد لسة متابعه والنت فى وادى تانى
والجرايد والمجلات وغيره زى العاده وزى ما قلت



طيب إيه الحل بقى أعتقد أننا كمان كام سنه مش هنعرف 6 أكتوبر ده كان علشان إيه هنفتكرها أجازة عادية وخلاص زى أى أجازة وتاريخنا يتمحى وكل سنه وأنت طيب وسلملى على حضارة اللى مش عارفة كام سنه وتاريخنا اللى ضاع وعمال يضيع