Saturday, December 6, 2008

كل عيد أضحى وأنتم بخير

كل سنه وأنتم طيبين وكل عيد أضحى وأنتم بخير
ويارب كل واحد واحدة بيحلموا بحاجة يقدروا يحققوها
بتمنى ليكم كلكم السعاده وعيد سعيد ان شاء الله

Wednesday, November 12, 2008

هو صحيح الحب بيختفى

طبعا العنوان واضح منه أنى هتكلم عن الحب ويمكن أنا كل اللى أعرفه فى حياتى وجربته حب أهلى وأخواتى وأصدقائى ومعارفى وزمايلى ولكنى ما جربتش الحب اللى بيكون بين الراجل والست لأنى لا مخطوبة ولا متجوزة يعنى كان لازم أتكلم فى الموضوع ده وأخد آراء الناس اللى مجربين النوع ده من الحب
أيه السبب أنى هتكلم فى الموضوع ده بالذات السبب أنى واحدة صاحبتى كانت بتكلمنى فى التليفون وصاحبتى دى متجوزة من حوالى أربع سنين وعندها طفلة صغيرة وللعلم صاحبتى دى متجوزة عن حب بمعنى أنها كانت وواحد قريبها بيحبوا بعض جدا من أيام ما كنا فى الدراسة وأنا كنت شاهدة بصراحة على القصة دى ويمكن حصلت مشاكل كتيرة بين العيلتين بسبب الموضوع ده وكان فيه طرف مش موافق على الجوازة دى ولكن فى النهاية الموضوع تم وأتجوزوا لحد كده كل شىء ماشى كويس أيه بقى اللى حصل صاحبتى وهيا بتكلمنى سألتها عن بنتها ولاقيتها يا عينى بتلعن فى الجواز واللى عايزين يتجوزوا ويخلفوا قلت لها أنه مفيش حياه كلها وردى وحب فى حب وأكيد لازم يكون فيه مشاكل الحياه العادية بتاعت أى ناس لا هيا كلها سلام وحب ولا هيا كلها مشاكل العادى يعنى
لاقيتها بتقولى حب أيه أوعى تكونى فاكرة أنه بيكون فيه حاجة أسمها حب بعد الجواز الموضوع ده مالوش وجود قلت لها أزاى قالت صدقينى سواء كنتى بتحبى الشخص اللى هتتجوزية أو لا الكلام ده بينتهى بعد الجواز وبتبقى الحياه ماشية روتين ملل ولا فيه أى حاجة كويسة فى الجواز
بصراحة أنا أتصدمت من كلامها وحب السنين اللى كان موجود كل ده بيروح فين وحتى لو كانش فيه حب وكان الجواز جواز صالونات أكيد بتتحرك شوية مشاعر بين الأتنين كل ده بيروح فين
قالتلى صدقينى مفيش لاحب ولا أى كلام من ده المهم سألتها عن أختها اللى لسة متجوزة من فترة بسيطة قالتلى أنها كل يوم تتخانق معاهم وتقول لهم أنتوا أيه اللى خلاكم تجوزونى
يا خبر هو فيه أيه
وقالتلى صدقينى فى الجواز كل شىء بيتساوى اللى بيحب واللى مش بيحب ومفيش حاجة أسمها حب ولا رومانسية ولا أى حاجة كويسة فى الجواز هيا حياه روتينية مملة بنعيشها وخلاص
قلت فى نفسى أيه هيا الناس هتعيش مع بعضها شفقة يعنى لو مفيش حب حتى لو أتولد بعد الجواز أمال الناس هتعيش مع بعضها لية بيعذبوا نفسهم وخلاص ولا هيا بتتجوز علشان لازم تتجوز وخلاص
أنا عارفة أنه أكيد الحياه مابتكونش حب فى حب وكلام حلو ورمانسيات على طول وعارفة أنه أكيد لازم يكون فيه مشاكل ومنغصات كتيرة وأكيد دى الحياه العادية لكن حكاية أن الحب مايبقاش موجود وينتهى دى بجد مش قادرة أصدقها أمال أحنا هنعيش مع بعض لية لو ماكناش بنحب بعض أو لو ما حاولناش نحب بعض
ياريت حد يقولى الكلام ده صح ولا أيه هو فعلا مفيش حاجة أسمها حب بعد الجواز ولا فيه أكيد مش هيبقى ال24 ساعة حب بس مش هيختفى ولا أنتوا أيه رأيكم ياريت حد يقولى هل ممكن حب السنين ينتهى بعد يومين ثلاثة جواز زى ما صاحبتى قالتلى أنهم يومين ثلاثة وكل شىء بينتهى ولا ممكن الحب ده يستمر
وهل ممكن الناس اللى ماكانتش تعرف بعضها قبل الجواز تحب بعضها ويكون فيه شوية رومانسية بينهم
ياريت حد يجاوبنى ومش عايزة مثاليات أنا عايزة الحقيقة والصراحة

Monday, October 27, 2008

أمنحونى حق الأختيار 2

ده الجزء الثانى من الموضوع اللى بدأتة وكنت عايزة فى الأول أوضح حاجة مهمة أنا فى الموضوع اللى فات كنت بتكلم عن حق البنت فى التعليم وفيه ناس كتيرة فسرت كلامى أنى بطالب بحق البنت فى السفر خارج مصر للتعليم وطبعا أنا ماطلبتش ده ولا كنت أقصد ده ولا أنا مع ده أنا كنت أقصد السفر داخل مصر والتعليم جواها يعنى فيه ناس كتيرة عايشين فى أماكن بعيدة عن المحافظات اللى فيها الكليات اللى ممكن تكون طموح أى بنت وكتير الأسر بتمنع بناتها من السفر للمحافظة دى أو الأقامة فى بيت الطالبات مثلا وبيجبروها تدخل أى كلية قريبة منهم وخلاص ده اللى أنا كنت بتكلم عليه وأتمنى تكونوا فهمتونى
فيه حاجة تانية عايزة أوضحها أنه فيه ناس كتيرة متخيلة أنى فى المواضيع دى بتكلم عن نفسى أو بقول حاجات شخصية وأنا عايزاها لنفسى عايزة أوضح أنى لما بتكلم بتكلم عن بنات كتيرة وفئات كتيرة موجودة حوالينا وبنشوفها وممكن أكون فى بعض الحاجات بتكلم عن نفسى لكن مش كل حاجة بتكون عنى لأنى مش عاملة المواضيع دى لنفسى وبس والا كنت أحتفظت بيها لنفسى وما نشرتهاش
ندخل على الجزء التانى من الموضوع
----------------------------
حقى فى العمل
العمل الشىء الذى يشعر الأنسان بقيمته وهو يفعله لماذا يكون مقصور على بعض الناس فقط ويكون الجزء الآخر محروم منه
كثيرا ما نرى أسر تمنع البنت من العمل بحجة أنها بنت وليس لأى سبب آخر لماذا لا يوجد مبرر ولا رد غير أنها بنت والعمل يجب أن يكون مقصور على الرجال
عندما تنهى البنت دراستها يكون عندها فراغ كبير والفراغ يكون فى كثير من الأحيان قاتل لماذا تدفعونها للموت طالما لا يوجد شىء تفعله لماذا تحرموها من حقها فى العمل وفى الخروج للحياه ورؤية الناس والأعتماد على النفس
لماذا تشعرونها بأنها كائن غبى وغير قادر على فعل أى شىء
وأيضا عندما تتزوج كثير من الرجال يخطبون بنات تعمل ولكن بعد الزواج تتغير نظرتهم لهم ولعملهم ويطلبون منهم ترك عملهم لماذا لا أعرف
ويوجد سيدات كثيرة تستطيع التوفيق بين بيتها وزوجها وعملها فلماذا تحرمها من حقها فى العمل اذا كنت أنت أرتبطت بها وهى تعمل وأنت تعرف هذا فلماذا تطلب منها ترك عملها الآن
أطلب من كل رجل أن يترك زوجتة أو أبنته أو أخته تعمل وأن تخرج للحياه وأن تتعلم الأعتماد على نفسها لأنه لا يدرى ماذا يحدث غدا وطالما هى غير مقصرة فى حق من حولها لماذا نمنعها عن العمل
ولماذا يترك الزوج زوجته تعمل ولا يقول لها شىء على عملها فى حالة مساعدتها له فى الأنفاق على البيت وعلى متطلبات الحياه هل لأنه يستفيد منها فلذلك يتركها تعمل
لماذا هذا الأستغلال الواضح والذى ترفضة كل فتاه وكل سيدة
لماذا عندما أساعد أسرتى وأهلى وزوجى فى مصاريف البيت يتركونى أعمل وعندما لا يستفيدون منى بشئ يطلبون منى ترك العمل
نحن نرفض هذا الأستغلال
لذلك أمنحونا حقنا فى العمل
------------------------
حقى فى العلاج
العلاج الشىء الأدمى المطلوب لكل شخص كثيرا ما يكون ممنوعا وبعيدا عن بعض السيدات والفتيات ويكون الأهمال فى صحتهم من جانين الأول أهمالها هى وتفضيل الأشخاص الآخرين عليها فى العلاج وثانيا أهمال الناس لها وعدم أحساسهم بها
أولا كثيرا ما نرى سيدات تكون حاله أسرتها المادية غير مستقرة وغير مرتفعة وعندما تمرض لا تقول لأحد عن مرضها وتفضل أطعام أولادها أو علاجهم بدلا منها
ولكن الحالة الثانية تكون حالة بشعة وهيا أهمال الأسر لحالة الأم الصحية وعدم الأحساس بها ولا مراعاتها كأنها جبل لا يمرض ولا تشعر ويتركونها مريضة ولا يكلف أحد نفسه السؤال عنها ولا عن أحوالها وحتى عندما تقول أنها مريضة أو تشتكى من أى شىء لا يشعر بها أى شخص ولا يطلب منها الذهاب للطبيب للأطمئنان عليها
وكثيرا من الأسر تهمل صحة بناتهم وخاصة فى الارياف التى تنسى شىء أسمه صحة المرأة أو البنت
وكثيرا من العادات التى تضيع صحه الفتيات والسيدات
لذلك نحن نرجو مزيد من التوعية لكل الناس بمزيد من الرعاية لكل بنت وسيدة موجودة على وجه الحياه
فنحن نطالب بحقنا فى العلاج
-------------------------
حقى فى أختيار شريك حياتى
شريك الحياه الزوج الذى يكون كل شىء لزوجته وللبنت أو الفتاه التى تتزوج هل من حقها أختياره أم لا ؟
كثيرا ما نرى أسر تضغط على أبنتها فى الأرتباط بشخص معين أو بأى شخص موجود حتى تتزوج فقط
وتكون ممنوعة من قول رأيها وحتى عندما تقوله لا أحد يأخذ به
الدين نفسه وصى بأخذ رأى البنت فى شريك حياتها وفى الشخص الذى يريد الزواج منها ولكن لماذا نحرم شىء حلال وشرعه الدين لنا
لماذا نمنع البنت من حقها الطبيعى فى أختيار الأنسان الذى سوف تقضى معه كل حياتها تحت سقف بيت واحد
توجد أسر وأهالى يجبرون البنت على الزواج من فلان أو فلان لمجرد الزواج وبدون الرجوع لرغبتها مع أن هذا أبسط حقوقها
كيف تغصب البنت على العيش مع شخص لا تقبلة ولا يكون بينهم قبول ولا أى توافق
هذا الشخص الذى من الممكن أن تعيش معه سنوات وسنوات وتنجب منه أطفالا يريدوا أن يعيشوا فى جو هادى وصافى كيف لهم العيش فى جو هادى والأم والأب غير متوافقين كيف ؟
لذلك يجب على كل أسرة الا تضغط على أى فتاه فى الزواج من أى شخص مهما كانت مواصفاته
فلماذا يكون من حق الرجل أختيار هذه الفتاه أو لا ولماذا يقول رأيه فى هذه وهذه ويكون ممنوع على البنت قول رأيها فى هذا الرجل نحن نطالب بأبسط حقوقنا أمنحونا حقنا فى أختيار شريك حياتنا
-----------------------
حقى فى أختيار مكان زفافى وحاجات تانية كتيرة
كل البنات بتحلم بيوم زفافها وفى مكان الزفاف وفى كل الترتيبات الخاصة بيوم الزفاف ولكن للأسف بيبقى فيه تدخلات من ناس كتيرة بتفسد على البنت فرحتها وسعادتها فى اليوم ده وساعات كتيرة بتخليها ترفض عمل حفل زفاف بسبب عدم أختيارها لمكان زفافها
نفسى أعرف أيه اللى هيحصل لو الناس سابوا العريس والعروسة يختاروا مكان زفافهم فى المكان اللى هما عايزينة لية يمنعوهم من حقهم ولية يخلوهم فى أحسن يوم فى حياتهم زعلانين ومش راضين عن اللى بيحصل
لية الأهل ما يسيبوش العريس والعروسة يختاروا مكان زفافهم بحرية وبدون تدخل الأهل
يعنى الناس هتكون مبسوطة لما يكون العريس والعروسة مش مبسوطين ؟
ولا العروسة والعريس المفروض يفكروا فى سعادة كل الناس على حساب سعادتهم هما
ده يوم ولازم يكون أحلى يوم ولية ذكرى جميلة فى نفس العروسين لية نخليه يوم زعل وحزن
من حق كل واحدة أختيار مكان زفافها وعلشان كده أمنحونا حقنا فى أختيار مكان زفافنا

نقطة تانية مهمة وهى أختيار مكان المعيشة للعروسين والجهاز والحاجات الكتيرة اللى المفروض بتتعمل برضة مش عارفة لية الناس بتدخل فى الأمور دى ولية يفسدوا كل حاجة حلوة المفروض أنها أحلى حاجة بتكون بين العروسين والمفروض أن كل حاجة بتكون مشاركة بين العروسين والمفروض هما اللى يختاروها
ياريت الأهل ما يتدخلوش بطريقة تعمل مشاكل وتفسد فرحة الطرفين ممكن يقولوا رأيهم ومن حق العروسين أنهم ياخدوا برأيهم ولا لا ولكن مش من حقهم يفرضوا رأيهم ويغصبوهم على حاجات فعلا بتفسد أى فرحة جواهم

نقظة ثالثة وهيا بعد ما كل حاجة خلصت وخلاص الطرفين أتجوزوا وعدت كل حاجة نيجى لنقطة تانية وهيا لما ربنا يرزق العروسين بمولود من أول الحمل ونلاقى كل الناس بتدخل فى أختيار أسمه كأن الأم والأب مالهمش لازمة ولا ليهم رأى وتلاقى كل عيلة عايزة تسمى الولد أو البنت على أسم جد الطفل أو جدته وبتحصل خلافات كتيرة قوى بسبب الموضوع ده
أنا شايفة أن حق تسمية المولود يكون للأم والأب بس ومش من حق حد التدخل فيه أيا كان الحد ده فياريت الأهل ما يحاولوش يدخلوا ويعملوا مشكلة بسبب تدخلهم ده لأن فعلا بيوت كتيرة بتحصل فيها مشاكل بسبب الموضوع ده وبسبب أن مثلا الاب مش عايز يزعل أهله وعايز يسمى المولود بالأسم اللى أختاروه وهكذا بالنسبة للأم
فلية نعمل مشاكل مالهاش لازمة سيبوا كل واحد حر فى حياته
أمنحونا حقنا فى تسمية أبننا

Sunday, October 19, 2008

أمنحونى حق الأختيار

Image Hosted by ImageShack.us


ليلى واليوم الثالث ليها وثانى مشاركة ليا فى يوم ليلى


يمكن أنا فكرت أكتب أيه فى اليوم ووصلت فى النهاية أنى أمشى بطريقة مدونة البنات عايزة ايه وأكتب حاجة من الحاجات اللى البنات عايزاها أو بمعنى أصح اللى ليلى عايزاها وبتتمنى تلاقيها


يالا نبدأ لأن الموضوع كبير


----------------------------------


أمنحونى حق الأختيار

الأختيار حق مشروع لكل أنسان ولكنه أحيانا يكون ممنوع على ناس معينة ويمنعوا من حقهم فى أختيار أى شىء
كثيرا ما نرى أسر تمنع البنت من أختيار أبسط الأشياء الخاصة بحياتها فهى بالنسبة لهم شىء موجود يتحكمون فيه كما يحلو لهم
ولكن البنت أى بنت مثلها مثل أى أنسان لها الحق فى أختيار كل شىء يخصها ويخص حياتها طالما لا تختار شىء خطأ ومن حق الأسرة معاونتها فى أختياراتها والأختيار معها ولكن ليس من حقهم منعها من الأختيار فلماذا يعطون الولد الحق فى أختيار كل شىء ويمنعون البنت من أختيار أبسط حقوقها
وتوجد أشياء كثيرة تمنع البنت من الأختيار فيها وسوف نقوم بالكلام على كل شىء فى موضوع مستقل ومن ضمن هذه الأشياء
حقها فى التعليم وفى أختيار الشىء الذى تريد دراسته
حقها فى النجاح
حقها فى العمل
حقها فى العلاج
حقها فى أختيار شريك حياتها

وكثير من الحقوق الضائعة والممنوعة من أختيارها البنت فى كثير من الأحيان سوف نعرفها بالتفصيل لاحقا


--------------------------


حقى فى التعليم

البنت مالهاش غير بيتها ، يعنى هتعملى أيه هتجيبى الديب من ديلة ، انتى شوية وهايجى واحد ياخدك وخلاص بلا تعليم بلا كلام فارغ ، انتى مش ولد علشان تتعلمى الحاجات دى وتسافرى وتروحى وتيجى أتعلمى أى حاجة وخلاص ، دورات أيه وكلام فارغ أيه اللى عايزة تاخدية انتى مش خدى شهادتك خلاص كفاية عليكى كده
طبعا الكلام ده بنات كتيرة بتسمعه وبيتقال فى بيوت كتيرة لما البنت تكون عايزة تدرس حاجة معينة وتقول لأهلها عليها تلاقيهم رافضين تماما وعايزنها تدرس أى حاجة وخلاص ويقولوا لها انتى بنت مالك ومال الحاجات دى هو التعليم كمان فيه بنت وولد
وكمان لو عايزة تدرس فى كلية بعيدة شوية ولازم تسافر لها يقولوا لها لا لا مفيش سفر وكلام فارغ أدرسى أى حاجة وخلاص ماعندناش بنات تسافر وتروح وتيجى
ولما تخلص دراستها اللى فى الغالب بتكون درستها غصب عنها بتكون عايز تتعلم حاجات تانية تاخد دورات فى أى حاجة يبقى الرد أيه لا لا دورات أيه ماعندناش الكلام ده أنتى مش درستى وخدتى كلية وخلاص كفاية عليكى كده
وفى المقابل بنلاقى الولد يدرس أى حاجة هو عايزها ويدخل الكلية اللى بيحبها ويسافر ويروح ويجى عادى ما هو راجل ولو قال عايز أسيب الكلية دى وأروح دى عادى برضة ولما يحب ياخد أى دروات ماشى يا حبيبى خد مفيش مشكلة كل اللى أنت عايزة أعمله
طبعا الكلام ده بيحصل كتير قوى وعند ناس كتيرة وطبعا التعليم مفيهوش حاجة أسمها بنت وولد لية بنحرم البنت من حقها فى دراسة الحاجة اللى بتحبها لية بنحطها فى برواز خشب وعايزنها تدرس حاجة معينة وفى أى مكان قريب وخلاص لية ما نسيبهاش تختار الحاجة اللى بتحبها وحاسة أنها عايزاها وهتتفوق فيها
لية من حق الولد يدرس أى حاجة وكل حاجة هو التعليم كمان فيه ولد وبنت
أمنحونا حقنا فى التعليم


-------------------------------------


حقى فى النجاح

النجاح حلم لكل الناس تتمنى الوصول له فى أمور كثيرة فى حياتهم ولكن يوجد ناس محرومين من حقهم فى النجاح محرومين من أحساسهم بالنجاح والفرحة به
كثيرا ما نرى أسر تمنع أبنتها من النجاح وتدفعها للأسفل بكلامهم وتعليقاتهم ووقوفهم فى طريقها بحجه أنها بنت ولا يوجد شىء مهم تفعله
فكلامهم يكون بمثابة ضربة قوية لأى بنت تدمر بها نفسيتها ويجعلونها غير قابلة على الحياه ولا يوجد عندها طموح ولا حتى تحلم بالنجاح
وأيضا عدم مشاركتهم للبنت فى نجاحها والفرحة بيه يدفعها لعدم النجاح
فلذلك يجب على كل أسرة وكل شخص يتعامل مع أى بنت فتاه سيدة أن يشعرها بقيمه ما تفعله حتى تجد دافع يدفعها للنجاح
أمنحونا حقنا فى النجاح
-----------------------------


كده أنا أتكلمت عن كذا حق وباقى الحقوق هكملها فى تدوينة تانية ان شاء الله

Sunday, October 12, 2008

الروح ليلى

ليلى واليوم الثالث ليها وتانى مشاركة ليا بعد مشاركتى فى اليوم الثانى وبصراحة شايفة أنه لازم الكل يشارك سواء كانوا رجالة أو ستات وعايزة أوضح أننا مش ضد الرجالة ولا جايين نتحداهم ولا ننقدهم ولكن أحنا بنطالب بأبسط حقوقنا فى المجتمع اللى أحيانا كتيرة بتضيع بسبب الستات نفسهم واللى بيكون سبب فى أستغلال الراجل ليهم
يمكن أنا فكرت من مده فى حاجة نقول فيها أحنا عايزين أيه من كل المجتمع مش من الرجالة بس وكانت الفكرة عبارة عن مدونة البنات عايزة ايه اللى بنشترك فيها أنا ومجموعة مدونات ويمكن فى البداية أتقابلت المدونة بنقد شديد من الرجالة والشباب وكتير كانوا فاكرينها معمولة لنقد الرجالة وبس ولكن شوية وأتضحت فكرتنا وناس كتيرة فهمتنا وفهمت فكرتنا صح
ومن خلال المدونة حاولنا القاء الضوء على بعض الأشياء اللى يمكن تكون بسيطة ولكنها مهمة جدا فى حياه الستات والبنات ومهم قوى أن الرجالة يكونوا عارفينها حتى لو كان كتير منهم مش مقتنعين بيها لكن أحنا فضلنا مصرين أننا نكمل كلامنا وفكرتنا ولسة قدامنا حاجات كتيرة قوى هنقدمها ليكم
------------------------------------------------------

من ناحية تانية عايزة أقول لكل واحدة أنها جواها قوة كبيرة قوى تقدر من خلالها أنها تعيش حياتها وتحقق طموحها وأحلامها المشروعة حتى لو كل اللى حواليها رافضين لده فلازم تفضلى مصرة على موقفك طالما هو صح ومش متعارض مع أخلاقنا وعاداتنا وتقاليدنا يعنى مثلا لو واحدة عايزة تدرس حاجة معينة وكل اللى حواليها عايزين حاجة تانية أعتقد دى حياتك وده دورك علشان تقدرى تختارى وتثبتى على موقفك وتفضلى مصرة عليه وصدقينى مع قوة اصرارك هتوصلى للى انتى عايزاة
وعندنا أمثلة كتيرة قوى وكتير مننا صادف موضوع الدراسة ده سواء هو اللى مر بيها أو شافها حواليه وشوفنا قد أيه البنت بالذات بتتعرض لأنتقادات ورفض حاجة معينة هيا عايزة تدرسها وفيه كتير منهم بتستسلم لرأى الآخرين وبينسوا حلمهم وطموحهم ولكن فيه بنات كتيرة بتصر على موقفها وعلى قرارها وبتحاول تقنع اللى حواليها بيه وصدقونى كتير اللى حوالين البنت بيقتنعوا بده ولكن الأهم أنك تصرى على موقفك
وطبعا موضوع الدراسة ممكن نقيس عليه كل حاجة موجودة فى حياتنا وبتتقابل بنقد وضغط من اللى حوالينا
كل واحدة جواها قوة وعزيمة كبيرة هتقدر بيهم تعيش حياتها وتحقق طموحها وآحلامها وحتى لو قابلها سخرية ونقد من الآخرين ياريت ما تسمعش ليهم الا لو كان النقد بناء مش هدام زى ما بيحصل كتير حوالينا
وأنا هسيبكم دلوقتى ولكن أوعدكم هرجع ليكم تانى بأمثلة حيه وحصلت حوالينا فى الحقيقة

Saturday, September 27, 2008

كل سنه وأنتوا طيبين

خلاص كلها كام يوم وتنتهى أيام رمضان الجميلة الأيام اللى بنستناها فعلا من السنه للسنه وبعدها هندخل فى عيد الفطر وزى العادة كل سنه لازم أسافر أعيد فى بلدنا وان شاء الله هسافر يوم الأتنين وهرجع آخر الأسبوع فقلت أهنيكم بالعيد قبل ما أنشغل بترتيبات السفر
كل سنه وأنتم طيبين وعيد سعيد عليكم ان شاء الله

Friday, September 12, 2008

فى رمضان

أزيكم أخباركم أيه يارب تكونوا بخير
عاملين أيه فى رمضان وفى الصيام والطاعات
خلاص النهاردة 12 رمضان يعنى قربنا على نص رمضان ياترى عاملين أيه
أنا جيت بس أقول لكم على ميعاد برنامجين بيعجبونى جدا وياريت تشوفوهم
برنامج عمرو خالد قصص القرآن وبيجى الساعة 10 مساءا على قناه المحور يعنى من 10 الى 10 ونص ممكن تستنوه
وبرنامج الكنز المفقود لمصطفى حسنى وبيجى الساعة 11 مساءاعلى قناه اقرأ
وعلشان ساعات برنامج عمرو خالد بيطول وبيدخل فى ميعاد برنامج الكنز المفقود
ميعاد اعادة الكنز المفقود
الساعة 5 ونص بعد الفجر
وبرنامج عمرو خالد ممكن تنزلوه من على موقع عمل خالد أدخلوا على الموقع ده لأنه فعلا برنامج جميل جدا
------------------------------------------
فيه موقع حلو قوى هتلاقوا عليه المصحف وممكن تقروا من عليه القرآن وأنا حاطة اللينك على يمين المدونة وهحطة هنا تانى
----------------------------------------------
الصورتين اللى تحت دول
واحدة جدول المحاسبة خدوها عندكم وكبروها وشوفوا فيها أيه وممكن تضغطوا عليها وهتلاقوها كبيرة وتعرفوا تشوفوا الكلام
والثانى مكالمة الخير اللى منها بتساهم وبتتبرع لمستشفى سرطان الأطفال












Sunday, September 7, 2008

بعد أسبوع من رمضان

بعد ما عدى أسبوع من رمضان هاه أخباركم أيه عاملين أيه
ياترى يومكم عامل أزاى
صليتوا كل الصلوات فى أوقاتها؟
صلاه الفجر صليتوها فى ميعادها ؟
صلاه التراويح أخبارها أيه ؟
القراءن قريتوا فيه قد أيه ؟
الصدقة ؟
صلة الرحم؟
أفطار صائم؟
التسبيح ؟
الدعاء؟
والى نهاية كل الأشياء والعبادات عملتوا فيها أيه
وهل فعلا حسيتوا أن الأيام دى مختلفة عن غيرها وأنكم عملتوا حاجة جديدة
----------------------------------------------------
فيه حاجة كمان حبيت أنبه عليها وهو كان أقتراح منى وياريت فعلا ننفذه ودى حاجة هناخد منها حسنات كتير إن شاء الله وهيا
أول حاجة طبعا معظمنا عنده موبايل ممكن يا جماعة ساعة السحور وصلاه الفجر نرن على صحابنا وقرايبنا علشان يصحوا وتخيلوا بقى لو كانوا فعلا نايمين وصحيوا من الرنة دى أعتقد أنك هتاخد ثواب كبير قوى
وثانى حاجة طبعا فى كتير مننا ما يقدروش يعملوا شنطة رمضان ممكن نعمل حاجة بسيطة وليها ثواب كبير قوى وهيا طبعا كلنا عارفين البلح ممكن نشترى كيلو أتنين ثلاثة على حسب مقدرة كل واحد فينا وساعة صلاة المغرب نخلى حد يقف بيه عند الجامع يوزعه على الصايمين أو فكرة تانية ممكن نوديه الجامع لأى حد مسؤل هناك يوزعه ساعة المغرب وأعتقد أنه ده هيدينا ثواب كبير قوى
ولأى أقتراحات تانية ياريت تراسلونى علشان أنشرها هنا وكلنا نشترك فيها
ويارب تقبل منا كل أعمالنا
rohbosbos@gmail.com

وكل سنه وأنتم طيبين وربنا يتقبل كل أعمالنا

Tuesday, September 2, 2008

ست عيوب ياريت نتخلص منها

أولا كل سنه وأنتم طيبين ويارب تكونوا كويسين وتكون الأيام دى خير عليكم كلكم
كعادتى فى رمضان مابحبش أنزل أى حاجة غير وليها علاقة بالعباده والصوم والحاجات دى وعلشان كده هكلمكم عن كام حاجة
أول حاجة
فيه برنامج جميل جدا لأستاذ عمرو خالد أسمه قصص القرأن بيجى كل يوم الساعة 10 على قناه المحور
بجد البرنامج ده رائع
وخلاصة حلقة النهاردة أنه أزاى نتخلص من ست عيوب خطيرة جدا فينا وهيا
الكبر والحسد والبخل والطمع والعند والغضب
ياريت كل واحد فينا يحاول يشوف هل الحاجات دى فيه ولا لا ولو فيه ياريت يحاول يتخلص منها لأنها عيوب خطيرة جدا جدا
وكمان كان فيه حاجة مهمة جدا فى الحلقة وهيا صلة الرحم والتركيز على اعادة صلة الرحم زى زمان وزى ما كان الناس بتعمل لأنها مهمه جدا
ياجماعة صلة الرحم ممكن حتى تكون بالتليفون
لو تعرفوا قد أيه هيا مهمه ماكانش حد بطل يزور الناس ويتصل بيهم
ده لينك موقع عمرو خالد هتلاقوا عليه حلقات البرنامج
وربنا يهدينا ويهديكم للى فيه الخير ويغفر لنا ذنوبنا ويعتقنا من النار

Friday, August 29, 2008

أيام وأيام وعيد ميلاد ورمضان كريم

أيام كثيرة تمر بينا منها السعيد ومنها الحزين ومنها العادى ومنها اللى مش عادى
بنقابل ناس كتيرة منهم الكويس ومنهم الوحش ومنهم اللى بيلون وشة بميت لون وبيطلع كل لون على حسب كل وقت وظرف
اسوأ حاجة لما تقابل حد ويظهر قدامك بوش وشوية وتلاقى وش تانى وشوية كمان وتلاقى وش تالت وهكذا لحد ما تلاقى مليون وش قدامك
الفترة اللى فاتت أتعاملت مع ناس بمليون وش مليون أيه ده أكتر من مليون وش والحمد لله أنه ربنا خلصنى منهم على خير
بحمد ربنا على أنى عديت التجربة اللى فاتت على خير وأنى واقفة على رجلى زى ما أنا وان شاء الله مفيش حاجة تكسرنى ولا تهزمنى وهرجع لشغلى ولحياتى ولطبيعتى وبحمد ربنا على اللى أنا فيه وبحتسب كل ده عند ربنا
الحمد لله أنى أتحررت من القيد اللى كان مكتفنى ومقيدنى وضاغط على أعصابى ونفسيتى وحياتى
--------------------------------
كمان يومين بالظبط عيد ميلادى يمكن من فترة كنت بخطط لليوم ده وكنت شيفاه بشكل تانى لكن دلوقتى مش شايفة له أى ملامح
يوم الأحد 31/8
هتم 25 سنه يعنى بقالى ربع قرن فى الدنيا مش عارفة أقول أيه ولا أكتب أيه الكلام ضاع منى أصلا ومش قادرة أقول كل اللى جوايا
أهو سنه وهتعدى بس بتمنى تكون الجاية أحلى منها
------------------------------------
يوم الأتنين ان شاء الله رمضان كل سنه وأنتم طيبين
وياريت نهتم قوى بالطاعات والصلاة وبالتقرب من الله
رمضان فرصة كبيرة لينا كلنا ياريت محدش يضيعها
كل سنه وأنتم طيبين

Saturday, August 16, 2008

ماذا تفعل لو ( 3 ) 0

ماذا تفعل لو أرتبطت بأنسانة وكان بها كل الصفات التى تتمناها وعشت معها فى سعاده ولكن فجأة أكتشفت أنها كانت تخفى عنك أنها كانت على علاقة بشاب آخر قبل أرتباطكم مع العلم أن العلاقة لم تتعدى شهور قليلة وكانت عبارة عن مكالمات تليفونية فقط وعدد قليل جدا من المقابلات فى وجود صديقتها
هل تتركها بسبب أخفاء الأمر عنك
أم تغفر لها هذا الخطأ طالما كان قبل أرتباطكم
أم تغضب منها فترة ثم تسامحها
وهل غضبك سوف يكون بسبب أنها أخفت عليك هذا السر أم بسبب أنك كنت تظن أنها لم تعرف شخص قبلك
------------------------------
وهذا السؤال بالنسبة للبنات والسيدات أيضا
ماذا تفعلى لو أكتشفتى أن شريك حياتك كان على علاقة بفتاه بنفس التفاصيل السابقة
------------------------------------
هنا

Sunday, August 10, 2008

فى أنتظار جودو

الأنتظار أكيد كلنا نعرفه وجربناه
لكن ساعات بيكون الأنتظار ده شىء صعب قوى خصوصا لو كان أنتظار طويل جدا وأنتظار من غير أمل
وموضوع الأنتظار ده بيفكرنى بمسرحية فى أنتظار جودو واللى كان كل الناس مستنين جودو وفى النهاية جودو ماجاش
ياترى أنت من أى نوع
من النوع اللى بيفضل واقف مستسلم ومنتظر جودو وخلاص
ولا لما بتكون منتظر حاجة بتسعى أنت كمان ليها علشان تقرب منها
ياترى أنت بتفضل مستنى وخلاص ومنتظر ولا بتحاول توصل لهدفك
الأنتظار اللى من غير أمل ده أصعب أنتظار من وجهه نظرى
زية زى أنتظار جودو اللى ماجاش ومش هايجى
ياريت ما نحاولش نضيع عمرنا فى أنتظار حاجات أحنا عارفين أنها مش هتيجى
وياريت ماننتظرش جودو اللى عمره ما هايجى

Monday, July 28, 2008

المحن تجمعنا

أكيد كلنا بنتعرض لمشاكل ومحن وحاجات كتيرة بتكون مضيقانا ومخليانا فى حالة مش طبيعية وبنكون عكس طبيعتنا خالص فى كل حاجة وممكن نكون عصبيين ومش ضايقين نكلم حد ولا نشوف حد
ولكن أى حد من السهل جدا أنه يكتشف أى أنسان ويعرف حقيقتة وأذا كان كويس ولا لا لما بيمر بمحنه أو بمشكلة
وأنا دايما بأيد المقولة اللى بتقول الصديق وقت الضيق لأنها فعلا صحيحة ولأن أكتر وقت الواحد بيكون محتاج حد جمبه هو وقت الضيق والمحن والمشاكل
وأكيد كلنا أتعرضنا لمواقف كتيرة فى حياتنا وعرفنا فعلا مين من الناس اللى حوالينا كويس بجد ومين هرب وسابنا ساعة مشاكلنا
علشان كده بقول أن المحن والمشاكل هيا اللى بتجمع الناس وتقربهم من بعض قوى
وكمان بقول لكل الناس أوعوا تتخلوا عن بعض فى أى مشكلة أو محنه لأن صديقك أو قريبك أو جارك أو أى شخص أيا كان علاقتك بيه بيكون محتاجك قوى وبيعرف معدنك من موقفك منه
وخليكوا فاكرين أن الصديق وقت الضيق
وأن المحن والمشاكل بتقرب الناس من بعضها أكتر وأكتر وعلشان كده المحن بتجمعنا

Tuesday, July 15, 2008

أزاى تدمر علاقتك باللى قدامك

الواحد ممكن يعمل حاجات كتيرة علشان يقرب من الناس ويقربهم منه وكمان لما بيلاقى حد بيقرب منه بيحاول بكل الطرق يتجاوب معاها ويكون كويس وفيه طرق كتيرة علشان الناس تقرب من بعضها وتقدر مشاعر اللى قدامها

ولكن فيه طرق لتطفيش الناس من حياتك ودى طرق كويسة جدا أتعلمتها بجد على أيد حد قريب منى جدا وحبيت أعرضها عليكم مش علشان تنفذوها وتطفشوا الناس لا طبعا علشان تاخدوا بالكم منها وما تحالوش تعملوها مع أى حد خصوصا لو كان قريب منكم
أول حاجة لما تلاقى حد مهتم بأنه يعرفك أكتر ويتصل بيك مرة وأتنين وثلاثة ويبعت لك مليون رسالة وأنت ما تعبروش طبعا ممكن تكون مشغول فى يوم مثلا أو عندك ظروف ولكن لما الموقف ده يتكرر يوم وأتنين وثلاثة وساعات كتيرة أسبوع وأكتر تلاقى حد بيتصل ويرن ويبعت رسايل وأنت ولا هنا الموقف ده كفيل بأنه يطفش اللى قدامك ويخليه مش ضايقك ولا ضايق يشوفك ولا يسمع صوتك وحتى لما بتتصل أنت بيه ما بيبقاش له نفس يرد عليك ولا حتى يكلمك ولما بيرد بيكون قرفان ومش ضايق نفسه من اللى أنت عملته
ثانى حاجة لما تلاقى حد بيعبر لك عن مشاعرة بكل الطرق الممكنة تعمل أنت أيه تتجاهله ولا كأنه عمل حاجة ولا تحاول تشكره على مشاعره الحلوة حتى لو ماكنتش أنت حاسس بأى مشاعر ناحيتة بلاش ما تعبروش وتتجاهله كأنه ما عملش حاجة لأن الموقف ده كفيل بأنه يقتل أى مشاعر حلوة جواه ناحيتك أيوة بيقتلها وبتنتهى على طول وطبعا لما المشاعر دى تتقتل وتنتهى صعب أنك تقدر ترجعها تانى بسهولة
ثالث حاجة لما تلاقى اللى قدامك بيعتبرك كل حاجة فى حياتك وبيقدرك جدا وأنت محسسه بأنه ولا حاجة وما بتحاولش حتى تعمل أى موقف حتى يبين له أنه له وجود فى حياتك الموقف ده برضة كفيل بأن مشاعرة اللى جواه تتغير من ناحيتك وزى ما أنت محسسة بأنه ولا حاجة أنت فعلا هتتحول وهتكون ولا حاجة بالنسبة له مع مرور الوقت
كل دى مواقف ممكن نكون بنعملها ومش متخيلين قد أيه هيا بتأثر فى أى حد وبتدمره نفسيا فياريت تخدوا بالكم منها خصوصا لو كان الموضوع بينك وبين حد قريب منك والمفروض تكون علاقاتكم كويسة جدا

Sunday, July 6, 2008

المحن

المحنه كلمة كبيرة قوى وليها معنى ومحدش يقدر يحس بيها الا اللى مر بمحن فى حياته أو شاف حد قريب منه مر بمحن بس عمر ما حد بيحس بقيمتها الا اللى مر بيها بجد
المحن بتختلف من كل أنسان للتانى وبتختلف درجة تحمل كل واحد ليها ولكن للأسف ساعات كتيرة الناس بتنهار قدام أى محنة بتمر بيها وما بيقدروش يصمدوا قدامها
ولكن تعالوا نحسبها كده مع بعض أنت لما بتمر بمحنه بيكن مطلوب منك أيه
أولا أنك تفكر فى حل ليها
ثانيا أنك تصبر عليها لحد ما تعدى
ثالثا أنك ما تلعنش حظك ولا دنيتك بسبب المحنه دى
تيجوا نبص لنقطة الصبر ونفكر فيها كويس قوى ولازم نبقى عارفين أن ربنا بيختبرنا بالمحن دى وبيختبر مدى صبرنا وقوة ايمانا بيه لأن الناس فى المحن بتنقسم قسمين قسم بيصبر وبيدعى ربنا وبيحتسب أجره عند ربنا وقسم يفضل يلعن فى حياته وفى اللى بيحصل ليه
يبقى أول حاجة لازم نتعلمها لما نمر بمحنه الصبر ولازم نعرف أن صبرنا ده هيجازينا عليه ربنا لأنه بيكون بيختبرنا بالمحن دى
ولازم نتعلم عدم لعن حظنا ونصيبنا وحياتنا لما نمر بأى محنه
وكمان لازم نفكر فى حاجة تانية أنه ممكن تكون المحن دى تكفير لذنوبنا وأكيد كلنا عندنا ذنوب ومفيش حد خالى من الذنوب
يبقى لازم نصبر وندعى ربنا ونحاول نخرج من أى محنه بايمانا بربنا وبتفكيرنا فى طريقة الحل وممكن نعرض الأمر على حد قريب منا يحاول يساعدنا فيه
ولازم نكون متأكدين دايما بأن( الله مع الصابرين) 0
ياترى أنت من أى نوع لما بتكون عندك محنه

Tuesday, June 17, 2008

ما أصعب

ما أصعب الدمع عندما يظل محبوس داخل العين
ما أصعب الحب عندما يظل مخنوق داخل القلب
ما أصعب الحياه عندما نعيشها بلا هدف ولا أمل
ما أصعب الجرح عندما يأتى فى أكثر اللحظات شوقا
ما أصعب الذكرى عندما تتذكر ما لا نريد تذكره

Friday, May 23, 2008

يوميات موظفة حكومية متعاقدة

ياه خلصنا الكلية الحمد لله ، نفسى بقى أشتغل وابدأ حياتى العملية وأحقق ذاتى وطموحاتى مع إن أيام الدراسة هتوحشنى وكل حاجة فى الكلية أصحابى والأماكن والمذاكرة والتعب والسهر والسفر كل ده هيوحشنى
يالا كانت أيام وعدت وأكيد الجاى هيكون أحلى وكل مرحلة ولها جمالها
عدى يوم وأتنين وخلصت ورقى خلاص وكل حاجة تمام نفسى الاقى شغل بقى ، طيب هشتغل أيه أنا درست فلسفة وكنت بحبها قوى لدرجة الجنون بس أنا مش عايزة أشتغل مدرسة فلسفة
( أيه ده أنتى بتتأمرى كمان هو فيه شغل أصلا )
أنا عايزة أشتغل أى حاجة تانية وفات شهر وأتنين وثلاثة ومفيش حاجة لحد ما فى يوم رحت مدرسة خاصة غريبة كده مفيش فيها مكان تحط فيه رجلك الناس اللى بتشتغل هناك زى الرز ، أيه الناس دى كلها حسيت أن كل البلد شغالة فى المدرسة دى
طيب خلاص وأنا مالى بقى أشوف عايزين منى أيه ، يالا أكتبى بياناتك كلها وهنبقى نبعت لك
( تبعتوا ليا اه طيب )
وكتبت البيانات وأستنيت حد يبعت ولا حد عبرنى ولا فيه فايدة طيب خلاص ندور فى مكان تانى
مش لاقية حاجة مفيش شغل مفيش أى وظايف ، طيب وبعدين هفضل قاعدة فى البيت كده لا أنا مش قادرة كده هتجنن
وفى يوم من الأيام خير اللهم أجعله خير كنت نايمة الاقى بابا بيصحينى يالا قومى البسى
خير فيه ايه
يالا هتشتغلى
أيه مين أنا
ايوة قومى
طيب فين ده
هو أنتى لسة هتسألى يالا البسى
ولبست فى دقيقة وخرجت وأنا فى قمة سعادتى وطبعا فى الطريق عرفت التفاصيل ووصلت للمكان اللى هكتب فيه العقد وكانت الفرحة الأولى والصدمة الأولى ، شغلانة مش تخصصى ولا أعرف فيها حاجة قلت وماله اهو نتعلم حاجة جديدة وناخد خبرة ، وكمان العقد مدته سنه ويا أما يتجدد أو لا طيب وماله أدينا بنتسلى أحسن من القعدة ، أيه ده المرتب كام 100جنية ، طيب مش مهم أنا أصلا مش بشتغل علشان الفلوس أنا عايزة بس أعمل حاجة وأثبت نفسى
وظبطت ورقى وكل حاجة وكتبت العقد وروحت وكان بعدها بثلاث أيام هستلم الشغل
فرحة ما بعدها فرحة خلاص هشتغل وهلاقى حاجة أعملها ومش هضيع وقتى فى الهوا وفضلت أحلم بالشغل وبشكل المكان اللى هشتغل فيه وبكل حاجة لحد ما جه أول يوم
لبست الهدوم اللى على الحبل زى ما بيقولوا وكنت رايحة وأنا فرحانة وخايفة فى نفس الوقت لأنها حاجة جديدة عليا خالص وكان قلبى عمال يدق وحاسة أنه هيغمى عليا من الفرح والخوف فى نفس الوقت
------------------------------
هاه أيه رأيكو فى الكلام ده أكمل باقى الحكاية ولا لا

Thursday, May 8, 2008

حلقة برنامج البنات عايزة ايه

بجد مش قادرة أوصف لكم مدى سعادتى وحبى وتقديرى للبرنامج ده
برنامج أنت تسأل والكمبيوتر يجيب يذاع كل يوم ماعدا الجمعه على اذاعة البرنامج العام
كان موضوع حلقتة النهاردة الخميس 8/5/2008 مدونة البنات عايزة ايه وبجد كان رائع جدااااااااااااااااااااااااااااااااااااااااااااااااااااااااااااااا
وأنا بجد سعيدة جدا ودلوقتى يالا اسمعوا الحلقة معانا
ومش هنسى أشكر أستاذ صلاح حجازى مقدم ومعد البرنامج على الحلقة الجميلة دى
اللينك ده نزلوا منه الحلقة
-----------------------
تحديث
أى حد ينزل الحلقة يشغلها بالطريقة دى يضغط كليك يمين وبعدين يختار ميديا بلير معلش أصل أحنا كل حاجة عندنا غريبة

Saturday, April 12, 2008

التضحية والعطاء

التضحية كلمة معناها كبير قوى ولكن مش كل الناس تعرفها ومش كل الناس تقدر عليها وفيه ناس ماعندهاش أستعداد تضحى بأى حاجة مهما كان السبب

ولكن ياترى أنتوا شايفين التضحية أزاى معناها أيه بالنسبة لكم وممكن تضحوا بأيه وعلشان خاطر أيه ولمين
يعنى ممكن ناس تضحى بحاجات كتير من أجل أسرتها ودول بيكونوا الناس الوحيدين اللى ممكن يضحوا علشانهم بحاجة
وفيه ناس تانية ممكن تضحى كمان علشان أصدقائها ودول طبعا مابقوش كتير الأيام دى نسبة لأختلاف مفهوم الصداقة من شخص لآخر
وفيه ناس ممكن تضحى من أجل شخص عزيز يعنى حبيب حبيبة زوج زوجة وهكذا

وطبعا فيه أنواع كتير للتضحية ومختلفة من شخص للتانى ولكن هل الأنسان جواه طبع التضحية ولا دى حاجة بيكتسبها
العطاء هل ده صفة أساسية فى كل الناس ولا أيه الحكاية هيا أكيد بتختلف من شخص للتانى يعنى ممكن واحد يعطى بلا حدود وبيكون فى قمة سعادته وواحد تانى يعطى شىء بسيط ويحسسك أنه عمل اللى عليه وزيادة


لكن التضحية نفسها حاجة جميلة قوى وشعور حلو قوى لما تلاقى نفسك بتضحى علشان حد عزيز أو غالى عليك ومهما كانت التضحية بتلاقى نفسك مستعد ليها ومستعد تدية أكتر وأكتر
ولكن فيه نقطة مهمه لما تلاقى نفسك بتضحى مرة وأتنين وثلاثة ومية وفجأة تلاقى اللى قدامك مش حاسس بيك مش هقول ما بيضحيش علشانك لانك مش مستنى منه كده لكن بتكون مستنى كلمة حلوة منه مستنى انه يحسسك أنك كل حياته
لكن لما تلاقى نفسك بتدى وبس وحتى مش لاقى كلمة حلوة ولا مجرد أهتمام ولو بسيط من اللى قدامك ساعتها بتفكر مليون مرة فى اللى بتعمله
وممكن تزعل من اللى قدامك ونفسيتك تتعب ولكن بيفضل طبع التضيحة فيك ومهما عمل بترجع تسامحه
وبتكون مش عايز حاجة منه غير كلمة حلوة شوية اهتمام ولو بسيط
صدقونى بيفرقوا كتير قوى
مش شرط تقابل التضحية بتضحية زيها ممكن تقابلها بكلمة حلوة بموقف كويس بأهتمام باللى قدامك
حسسة أنه كل حياتك وأنه حاجة مهمه ليك
لأنك مهما عملت فيه هيفضل برضة يضحى علشانك لأن التضحية طبع فى الأنسان والأنسان اللى بيكون كده صعب يتغير
فياريت لما تلاقى حد مستعد يقدم لك كل حاجة ومستعد يضحى بحياته علشانك حطه فى عنيك وحسسه بأنه كل حياتك لأنك مش هتلاقى زيه كتير ولأننا بقينا فى زمن صعب نلاقى حد بيضحى علشان حد

Thursday, April 10, 2008

اسمعوا اول برنامج اذاعى عن النت ضرورى جدا

خبر هام سعيد جدا
ستكون مدونة البنات عايزة ايه ضيفة أول برنامج اذاعى عن النت
البرنامج بيتذاع على أذاعة البرنامج العام
والحلقة هتكون يوم السبت الموافق 12/4/2008
الساعة التاسعة وعشر دقائق صباحا
يالا الكل يسمع البرنامج
وأى حد عايز يبعت أى تعليق أو مشاركة بخصوص البرنامج أو الحلقة يبعت على الميل ده
-------------------------------------
تفاصيل الخبر فى التعليق اللى هكتبه حالا اللى جه على أخر موضوع فى المدونة

الأخت العزيزه صاحبة المدونه الجميله تحياتنا لك

اظهارا لأعجابنا ستكون مدونتك ضيفتنا فى حلقة برنامجنا الأذاعى وهو اول برنامج اذاعى عن النت فى العالم العربى ويذاع على البرنامج العام اى الأذاعه الرئيسيه لمصر يوم السبت 12-4-2008 الساعه التاسعه وعشر دقائق صباحا على موجة الأف ام107 وسته من عشره

وكافة التفاصيل فى موقعنا

http://dear.to/cairo

والدعوه موجهه ايضا لكافة المعلقين زوار هذه المدونه للأشتراك بآرائهم فى البرنامج

مع تمنياتنا لكى بالتوفيق

وعنوان بريدنا

netonradio@yahoo.com

ويسرنا ان نستمع الى آرائكم فاكتبوا لنا

----------------------

أستاذ / صلاح حجازى


نشركم على منحكم هذه الثقة فينا
واحترامكم لافكارنا
ويسعدنا أن نلبي دعوتكم

مع خالص تحياتنا للجهد المبذول في البرنامج الذي حظى على إعجابنا فور الاستماع عليه

ونتمنى أن نكون عند حسن ظنكم

----------------------------

أخيرا وعلشان أسهل عليكم سماع البرنامج هكتب لكم لينك موقع بيشغل البرنامج العام اول ما تفتحوا هتشتغل على طول

http://www.kr-kr.com/tv/39/

------------------------

بجد أحنا بنشكر كل حد دخل المدونة وعلق تعليق شجعنا أكتر على الأستمرار فى فكرتنا ومدونتنا وأى حاجة وصلنا ليها كانت بسبب تشجعيكم لينا ووقوفكم جمبنا وجمب فكرتنا

--------------------------

ياريت أى حد يعرف يسجل الحلقة يسجلها

Monday, April 7, 2008

قوينى بيك

كتير بنشوف أن الواحد بيبقى جواه آحلام وطموحات كتيرة ونفسه يحققها وفى نفس الوقت مش لاقى دافع لده أو مش لاقى حد يشجعه ويقف جمبه ويفضل الواحد بيحاول فى حلمه وطموحه وبيحاول يقنع اللى حوالية باللى فى دماغة وفكره ويحاول يقربهم من حلمه علشان يساندوه ويكونوا معاه ويدوه شوية حماس ولكن كتير اللى حواليك بيحبطوك وبيبقى رد فعلهم على اللى أنت بتعمله محبط للغاية ولكن بتفضل عندك قدرة غريبة على التحدى وتخطى كل العقبات علشان توصل للى أنت عايزة ولكن بتكون من جواك مش سعيد بنسبة ميه فى الميه لأنك نفسك فى حد يفهمك ويشجعك بجد ويديك القوة اللى أنت محتاجها لأنك مهما كان عندك من قوة فى حالة أنه مفيش حد جمبك ولا حاسس بيك بتكون أضعف واحد ومهما حاولت تظهر بأنك غير كده
ولكن طموحك وحلمك دايما بيديك القوة والصلابة والشجاعة وبيخليك تتحدى كل حاجة وكل الناس وكل العقبات
لكن برضة بتكون مستنى حاجة تأثر فيك بقوة وتدفعك لقدام وتساندك وتقف معاك
وبتلاقى نفسك بتعمل حاجات كتير فى نفس الوقت وبتحاول تضاعف جهدك علشان تثبت ذاتك وبتكون فى تحدى كبير مع نفسك علشان تثبت للكل أنك تقدر تكون حاجة وتقدر تعمل حاجة
وبتوصل أكيد لحلمك ولطموحك وبتتحدى كل الناس وكل الظروف ولكن بتكون مستنى حاجة كمان تديك القوة اللى مش ممكن حد يديها ليك
الحاجة دى هيا الحب أيوة قوة الحب دى حاجة غريبة قوى بتديك دفعة لقدام بطريقة مش طبيعية بتخليك تعمل أضعاف أضعاف المجهود اللى كنت بتعمله علشان توصل لطموحك وحلمك وبتكون فى قمة سعادتك
بتلاقى جواك مشاعر حلوة قوى وبتلاقى نفسك بقيت أقوى بكتير
بتلاقى حد يفهمك ويقف جمبك ويساندك بكل ما عنده
حتى لو كانت مساندته عبارة عن كلمة أو موقف أو مشاعر حلوة بتخليك طاير فى السما
الحب هو أساس كل حاجة حلوة فى حياتنا
الحب بيخليك تدى كتيييييييييييير أكتر من الأول من غير ما تحس
بيخليك أقوى بكتير من الأول
بيخليك تتحدى أى حاجة وكل حاجة
بيديك دفعة لقدام ومن غير ما تحس هتلاقى نفسك بتتقدم خطوات كتيرة قوى
جميل قوى لما تلاقى نفسك بتتقدم خطوات كتير لقدام ولما تبص حواليك تشوف ايه اللى حصل تعرف أن فيه حد وجوده فى حياتك خلاك تتقدم كتير من غير ما تكون أنت متعمد أنك تتقدم ولا هو قاصد أنه يحصل كده ولكن دى حاجة طبيعية بتحصل بسبب المشاعر الحلوة اللى بتتولد جوانا بتخلينا حتى من غير ما نحس بنمشى لقدام وبنحقق آحلامنا سوا وبنعيش طموحاتنا ونتخيلها قدامنا واحدة واحدة
ومن غير ما تحس بتلاقى الأنسان ده بيكلمك عن حلمك وبيديك نصايح كتير علشان طموحك ده وبيدفعك بكلامه للتقدم خطوات كتيرة لقدام
ومن غير كلام بتلاقى المواقف نفسها بتحركك وبتحسسك بأن اللى قدامك عايزك تتقدم خطوات كتير وتوصل لحلمك وتعليه وتكبره
ومن غير مواقف بتلاقى النظرات كفيلة بنقل كل المشاعر دى
ومن غير نظرات الحب لوحده كفيل بكل ده وبيخليك لوحدك تعيش حياتك كأنك طاير فى السما وبتلاقى نفسك بكل تلقائية بتحاول تكون أحسن وأحسن وبتتقدم أكتر وأكتر
فى النهاية الحب له أثر كبير فى حياتنا والحب بكل أنواعه مش شرط حب الرجل للمرأة
فى النهاية لازم كلنا نقف جمب بعض ونحب بعض بجد ونحاول نساند بعض ونقف مع طموحاتنا وطموحات وآحلام غيرنا مش نفكر فى نفسنا بس

Wednesday, March 12, 2008

غطس جوه نفسك

جربت مرة تدخل جوه نفسك وماتعرفش تطلع تانى أو تلاقى نفسك عايز تفضل جوه نفسك طبعا كلام غريب
هو مش غريب لأن كتير مننا بيحسوا بيه وبيعشوه كمان 0
طيب نبدأ من الأغتراب والأحساس بالغربة اللى الواحد بيحسه وبيخليه يدخل جوة ذاته 0
فى دراستى للفلسفة كان فيه موضوع عندنا بيتكلم عن الأغتراب والغربة مع توضيح بسيط لأنواع الغربة 0

فى البداية لازم نفرق بين نوعين من الغربة وهما زى ما قال التوحيدى :- غربة مكانية وغربة نفسية مأساوية
الغربة المكانية بيعتبرها التوحيدى غربة مؤقته أو مرهونة بارتحال الغريب وهجرته عن أهله وذويه
والغربة النفسية بيصفها بأنها الغربة الحقيقية لأنها غربة دائمة وعميقة ومريرة فالغريب الذى يعنيه التوحيدى غريب فى وطنه وغريب وهو بين أصحابه وأحبابه لأنه بيحمل الغربة فى داخله لذلك هو دائما متبرم ومتمرد على المكان 0
ياترى فيه حد حس بالغربة دى بالنوع الأقوى واللى بيأثر أكتر على الأنسان طيب كنتوا بتحسوا بأيه وهل الأحساس ده موجود دايما ولا بيجى ويروح لأنه لو بيجى ويروح هتكون حاجة كويسة لأن كده أنت مش هتكون أنسان تعبان نفسيا وبتعانى ولكن لو كان موجود على طول هتعمل أيه0
كتير ناس مننا ساعات بتضايق وبتحصل مواقف تضايقها وتلاقى الواحد كرد فعل لاأرادى منه بيبعد عن الناس وبيعيش جوه نفسه زى ما أنا قلت ويكون فعلا حابب يبقى بعيد وبيحس بغربة شديدة حتى وهو بين أهله وأصدقائة وكل الناس المقربين له 0
لكن فيه نوع الطبيعى بتاعهم أحساسهم بالغربة يعنى حاجة طبيعية كده عندهم أنهم يكونوا حاسين بالغربة وهو فى وسط كل الناس وده طبعا أحساس بشع جدا وهو ده النوع التانى من الأغتراب عند التوحيدى اللى بيسميها غربة نفسية مأساوية وأنا لما فكرت فى النوع ده وحطيت نفسى بجد مكان الناس اللى بتكون حاسة بكده بجد مقدرتش أحس بأى حاجة حلوة أو كويسة ولاقيت أنه مهما الناس اللى حواليا عملوا أو أنا عملت برضة الأحساس ده هيفضل متملكنى وأتمنيت فعلا مايكونش فيه حد فى عصرنا ده عايش النوع ده من الغربة 0
هو يمكن فى عصرنا كترت شوية الأزمات النفسية والصراعات الداخلية جوه الأنسان ويعنى بتوصل للى أنا قلته أنك بتحس أوقات بالغربة عن كل اللى حواليك وفى نفس الوقت بتحب تعيش جوه نفسك وتفضل معاها وما بتكونش عندك الرغبة أنك تطلع منها 0
ولكن سؤالى برضة فيه حد بيحب يعيش جوه نفسه سواء كانت فيه حاجة مضيقاه ولا لا بمعنى أيه بمعنى أنى أقول كل حاجة جوايا لنفسى أفضفض لنفسى وما أكونش من النوع اللى بيحكى للناس وكل حاجة بخليها لنفسى لأنى حاسة أن نفسى أكتر حد هيحسنى وهيفهمنى وعمرها ما هتقلب عليها ولا هتعايرنى بأى حاجة غلط وهيا برضة أول حد هيحاسبنى وهيلومنى وهيوجهنى 0
فيه حد حس الأحساس ده أو حابب يعيشه أو يحسه طيب لو حد عاشه كان بيحس بأيه ولو حد ما جربوش هل نفسك تجربه ؟
أيه اللى بيخلى الناس توصل لكده هل كتر المشاكل والأزمات والضغوط اللى حوالينا بتدفع الناس الى انها تكون تعبانة نفسيا ؟
ولا الحاجات الكتير اللى بيكون الواحد بيعملها رغما عنه زى مثلا بيتعلم حاجة هو مش عايزها بيشتغل حاجة مش حابهها بيعيش حياه بطريقة مش عجباه 0
وايه اللى بيخلى الناس عايزة تدخل جوه نفسها وتفضل جواها وما تطلعش وما تحكيش لحد أى حاجة هل لعدم ثقتهم فى أى حد ؟ ولا لأن الناس ما بقتش زى زمان 0
لية الناس بقت بتخاف من بعضها كده فيه حد عنده أجابه0
أعتقد لو الناس رجعت زى زمان ورجعت لها الأخلاق والعادات والتقاليد والحاجات اللى نسيناها وما بقتش موجودة مش هنكون محتاجين نعالج نفسنا نفسيا ولا هنقول أننا عندنا يأس ولا أحباط ولا الكلام الكبير ده 0
بس هل ممكن ده يحصل ولا خلاص دى بقت أحلام ومستحيلة ؟

Thursday, February 14, 2008

أى حاجة أهو اللى طلع منى

الحب

تتكلمون عن الحب وتحتفلون به هل تعلمون ما هو الحب الذى تتكلمون عنه ؟
هل تعرفون مدى أهميته للكثيرين ؟
كفى كلاما عن الحب
فأنتم لا تعلمون عنه شيئا
الحب ليس شىء عابر نحتفل به فى يوم واحد فقط
الحب شعور جميل يجب أن نحتفل به يوميا
الحب حياه بأكلمها يجب أن نشعر بها دائما
الحب ليس فقط حب الرجل للمرأة
الحب بكل أنواعه أهم شىء فى حياتنا
والى الآن الكثيرون لا يعلمون عنه شيئا
ويتخيلون أنه وردة تهدى فى يوما وبعدها ينسى كل شىء
لذلك فهم لا يعلمون ما هو الحب
---------------------------

ماحدث

ما حدث وما يحدث وما سيحدث هو هو لا تغيير ولا تبديل ما دمنا نعيش فى هذا الواقع الأليم فسحقا لهذا الواقع وما به
-----------------------------
من حقنا
من حقنا أن نعيش لأحلامنا وفى أحلامنا ونسعى لتحقيقها
لا يجب أن نعيش أحلام غيرنا فينا
من حقى أن أعيش حلمى وأحاول بقدر أستطاعتى تحقيقة
ولكن هل يتركنا الآخرين لنعيش أحلامنا وترك أحلامهم فينا
-------------------------------

اليس كله حب
حب الشر اليس حب
حب الخير اليس حب
حب الحياه اليس حب
حب الموت اليس حب
حب الأهل اليس حب
حب الأصدقاء اليس حب
حب الأزواج اليس حب
حب الآحلام اليس حب
حب حب حب
أخاف نستيقظ فى يوم من الأيام لنجد كل هذه الأنواع سواء ولا يفرق بينهم شىءويصبحوا شيئا واحد
اليس كله حب

Sunday, January 20, 2008

أوراقى القديمة


أفتش فى أوراقى القديمة لأجد ورقا متناثرا وكلمات متفرقة وحكايات بعيدة عن بعضها بقايا أوراق من جرائد كنت أجمعهم
أفتش لأجد بقايا ذكريات قديمة وهدايا وأشياء كثيرة نسيت من هم أصحاب الهدايا وأعتصر عقلى من كثرة التفكير لأتذكر شخص أو أثنين أو أكثر ولكن المثير للدهشة أننى لم أتذكر كل أصحاب هذه الهدايا
قلبت فى أوراقى القديمة وفجأة وبعد صعوبة تذكرت أصحاب الهدايا قررت الا أفتح أوراقى القديمة حتى لا يعتصر عقلى من كثرة التفكير فى أسباب كتابة كل هذه الكلمات والحكايات
وأغلقت أشيائى القديمة لأجد نفسى كنت أبحث عن سراب فى الماضى كنت أبحث عن بقايا لأشياء لما تعد موجودة كنت أبحث عن نهاية للكلمات التى كتبتها وللحكايات التى لم تكتمل
ولكن قبل فتح هذه الكلمات أغلقتها خوفا منى أن تفتح بداخلى تساؤلات عديدة عن أسباب كتابة هذه الكلمات ووضعها هكذا بعيدا عن الناس
كلما أتذكر شكل أوراقى القديمة وقربى منها لفتحها وحسمى للأمر فى النهاية الا أفتحها يعتصر عقلى التفكير فى كيفية العودة الى هذه الأوراق لعل أجد بها شيئا يفرحنى أو يحزنى ليس هذا المهم ولكنى أبحث عن كل شىء له علاقة بالماضى كأنى أبحث عن حياتى السابقة فهذه الأوراق بالتأكيد بها ذكريات كثيرة ومليئة بالقصص والحكايات التى أنتهت والتى لم تنتهى فحياتنا كلها عبارة عن مجموعة قصص وحكايات وذكريات نعيشها
ولكن الى الآن لم تأتى لى الجرأة لكى أفتح أوراقى حتى لا أجد بها أى شىء قد نسيته عبر الأيام وأرجع له بعد رؤيتى لهذا الورق
خوفى من الماضى يدفعنى لعدم فتحها ولكن فضولى لمعرفة أفكارى وما بداخل الأوراق يدفعنى لكى أفتحها
ولكن هل اقدم على خطوة أقتحام الماضى أم لا
----------------
ملحوظة
الكلمات دى كتبتها من كام شهر وبعدها فعلا فتحت كل الورق وقطعت ورق الجرايد ورميته ولكن كان فيه شوية هدايا صحباتى كانوا جايبينها ليا من زمااااااااااان ولكن للأسف مش فاكرة كل أصحاب الهدايا
وكمان لاقيت شوية قصص كنت كتبتها أيام الدراسة هيا أكيد ساعتها كنت بحس أنها حاجة كبيرة لكن لما بشوفها دلوقتى بحس أن الكتابة نفسها ساذجة بس دى كانت بداياتى فى الكتابة ومش ممكن أرميها ولا أقطعها مهما حصل
وممكن هيا كانت مناسبة لسنى فى الوقت ده
وممكن أفكر أنشرها هنا أو فى أى مكان مش عارفة لسة بفكر

Tuesday, January 8, 2008

كل سنه وأنتم طيبين

كل سنه وأنتم طيبين بمناسبة السنه الهجرية الجديدة 1429
وعام جديد سعيد عليكم إن شاء الله
وياريت زى ماكنا بنتكلم ساعة قدوم السنه الميلادية ونقول لازم نشوف عملنا أيه فى سنه فاتت ونفسنا نعمل أيه فى سنه جاية
لازم نقول نفس الكلام برضة ودلوقتى أحنا هنحتفل برأس السنه الهجرية يعنى كل واحد يشوف عمل أيه فى علاقته بربنا
قرب ولا بعد
أيه الطاعات اللى قصر فيها
أيه الطاعات اللى ماكانش بيعملها
وهكذا لنهاية كل حاجة
وطبعا هو لازم الواحد يحاسب نفسه على طول ومايستناش لما سنه تخلص وسنه تانية تيجى
وياريت ماتنسوش صيام اليوم التاسع والعاشر من محرم
فضل اليوم العاشر كالآتى
عن أبي قتادة رضي الله عنه قال : سُئل النبي صلى الله عليه وسلم عن صيام يوم عاشوراء ، فقال : إني أحتسب على الله أن يكفر السنة التي قبله . رواه مسلم
فيوم عاشوراء يوم يتقبل الله فيه الحسنات وترفع فيه الدرجات وتكثر فيه البركات
فيجب أن نكثر من الصدقات فى هذا اليوم ومن صلة الرحم ومن الدعوات ومن قراءة القراءن والذكر
وكان الرسول يصوم يوم العاشر من محرم وكان ينوى فى العام المقبل أن يصوم يوم التاسع أيضا ولكنه قد مات قبل هذا العام فالمستحب صيام يوم التاسع والعاشر

Tuesday, January 1, 2008

عام جديد وعيد ميلاد مدونتى الأول

Free Image Hosting at www.ImageShack.us


أحتفالين مرة واحدة مش كتير ده عليا


أنا قلت اعملهم مع بعض وأكتب كل حاجة هو أكيد البوست هيكون طويل بس كلامى عن مرور عام على مدونتى هيكون فيه حاجات كتير من اللى عايزة أقولها فى كلامى عن عام مر على حياتى كلها وعن قدوم عام جديد

بداية أنا مدونتى عملتها من سنه بالظبط فى شهر يناير بس يوم أيه مش فاكرة لان للأسف المدونة أتحذفت منى بعدها بحوالى خمس شهور غصب عنى وعملتها تانى وعلشان كده أنا هحتفل بعيد ميلادها الاصلى مش اللى فى الأرشيف


سنه مرت على مدونتى بكل حاجة حلوة وكل حاجة وحشة

بأحداث كتير سعيدة وكمان حزينة


بأفكار طلعت وكبرت وأفكار لسة مدفونة جوايا


بأحلام طلع منها حاجات ولسة الباقى عايز يطلع


بعلاقات جميلة عملتها


بصداقات طلعت بيها


بعقول جديدة مش موجودة كتير


خبرة كبيرة خدتها من كل حاجة شفتها وعملتها هنا


مدونتى هيا أنا جزء منى وأكيد عليها حاجات كتير جوايا ولكن مش كل الحاجات لأنه فيه حاجات ما ينفعش تكتب لأنه مهما كان دى مدونة وفيه ملايين بيشوفوها وما ينفعش أعرض كل حاجة تخصنى عليها

بس أكيد الحاجات اللى عرضتها جزء منى وأكيد أنا أستفدت كتير من السنه اللى بدأت أدون فيها


وأكيد فيه ناس أثروا فيا وناس أنا أثرت فيهم وأكيد كل حد هيدخل هيأكد على كلامى أو ينفيه أنا عايزة بجد الصراحة مهما كانت عايزة أعرف هل أنا فعلا أثرت فى حد سواء بالسلب أو بالأيجاب


هل أنا عملت حاجة كويسة ولا مفيش حاجة أنا عملتها ياريت أعرف رأيكم لأن ماينفعش أقيم مدونتى مهما كان ولا أقيم نفسى


أكيد فيه بوستات عندى بعتبرها أهم البوستات ولما جيت أكتب عنوانها لاقيتهم كتير علشان كده مش هكتب غير اهم أتنين


عيد ميلاد أخويا


عيد ميلاد ماما



وياريت كل حد كان متابع مدونتى وفيه بوست أثر فيه فعلا أو علم معاه يكتبلى أسمه ده لو كان فيه حاجة يعنى أثرت


مدونتى بجد كان طريق لحاجات كتير قوى كنت بتمناها وبحلم بيها ووقفت لظروف كتير عندى


سنه بحالها عرفت ناس وعرفونى أثروا فيا فى حاجات كتير


بتمنى ليهم كل خير وخايفة أقول أسم حد أنسى حد تانى بس بجد كلهم كان ليهم أثر جميل فى حياتى


أكيد أفكارى أتغيرت شوية وأكيد عقلى أتغير شوية وأكيد كل كلمة كنت بشوفها فى أى مدونة كانت بتفتح جوايا حاجات كتير


كان نفسى الف على المدونات اللى أتعودت أدخل عليها وأكتب هنا موضوع من كل مدونة علق معايا قوى بس للأسف الوقت ضيق ولو لحقت هعمل كده


كل ما أفكر وأقول هيا مدونتى دى هتفضل موجودة لحد أمتى لحد سنه أتنين هل ممكن أسيبها أقفلها ولا هيا هتفضل عايشة معايا طول ما انا عايشة


أنا بجد بتمنى أنها تفضل معايا طول ما أنا عايشة ونفسى ما تحصلش أى حاجة تخلينى أسيبها


طيب كفاية كده وأدخل على الكلام عن السنه الجديدة والسنة اللى فاتت لأن هيكون فيه كلام فيهم عن مدونتى برضة

----------------------




العام الجديد والعام القديم


أولا كل سنه وأنتوا طيبين بمناسبة العام الجديد وبتمنى يكون عام سعيد عليكم إن شاء الله وكل واحد وواحدة يحققوا كل أمنياتهم وآحلامهم فى السنه الجديدة

بتمنى مرور سنه وقدوم سنه مايكونش بس بالأحتفالات والحاجات الغريبة اللى بنشوفها دى بجد حاجة تغيظ


نفسى كل واحد يفكر كده أن السنه دى عدت من عمره يعنى عمره نقص سنه


يفكر عمل أيه صح وايه غلط حياته ومستقبله وكل حاجة عمل فيها أيه

أتقدم كام خطوة لقدام ورجع كام خطوة لوراء

هل عمل حاجة مفيدة ولا أيه ياريت نحاسب نفسنا على كل حاجة ونحاول نصحح أخطاءنا فى السنه الجديدة


بالنسبة ليا السنه دى كانت مليانه بحاجات كتير قوى من الكويس ومنها اللى مش كويس


أولا فى بدايتها عملت مدونتى وبدأت مشوارى اللى كنت بحلم بيه طول عمرى لأنى طول عمرى بحب الكتابة وكالعاده مكتب التنسيق ودانى لطريق تانى ونسيت الكتابة تماما الا فى أوقات بسيطة كنت بكتب فيها لنفسى بس لكن بعد ما عملت مدونتى رجعت تانى ليها لكن شوية وكان نفسى فى حاجة أكبر من المدونة وبدأت فى طريقى للمجلات بداية من مجلة نفسنا الى مجلة على صوتك الى كلمتنا

وبدأت فعلا أرجع لهوايتى وأكتر حاجة بحبها فى حياتى وبتمنى فى السنه الجديدة كل المجلات دى تكبر وتبقى أحسن وأحسن وإن شاء الله بأصرارنا كلنا هتكون أحسن


ونفسى أى حاجة أكتبها فعلا تأثر فى الناس

حلم تانى حلمته مع مدونة جميلة وهو أذاعة المدونين اللى بتمنى أسمع عنه أخبار كويسة قريب

بالنسبة لباقى حياتى أيه اللى حصل تانى أمممممممم

بقى عندى أصدقاء أكتر بسبب نقلى من مكان شغلى لمكان تانى وأكيد خدت خبرة أكتر فى شغلى لدرجة أنى بفكر أسيبه مش علشان هو وحش ولا مش عاجبنى لأ علشان أسباب تانية كتيرة هتعرفوها بعدين لأنى ناوية أكتب كذا موضوع عن العمل الحكومى وخصوصا اللى بعقود أنتظروه وأدعولى أقدر أخد قرار


بقى عندى صديقات مدونات حلوين قوى وبتمنى تستمر علاقتنا


حياتى عموما ماحصلش فيها تغيير كبير قوى

الحاجة اللى ضايقتنى وزعلتنى سفر أخويا الكبير حبيب قلبى وصديقى وكل حاجة حلوة فى حياتى يوم 14/6

بجد كانت حاجة صعبة عليا قوى وبتمنى أشوفك فى السنه الجديدة


حاجة كمان ضايقتنى أنى أنشغلت عن صديقاتى صديقات الطفولة ومراحل عمرى المختلفة وصولا لصديقات العمل بجد أنا بعترف أنى مقصرة فى حقهم جامد بس مؤخرا ابتديت أرجع تانى لعاداتى معاهم ربنا يخليكم ليا


فرحت جدا بسبب قدوم كذا طفل لناس قرايبى ولصديقات ليا فى عام 2007 للدنيا


من بداية السنه لنهايتها وكل مده يجى طفل وطبعا ده شىء بيسعدنى جدا جدا وأنتهت أخبار الأطفال بخبر قدوم عمر الجميل


قدرت الحمد لله أمشى خطوات كويسة فى مشوارى فى الكتابة وبتمنى أحقق باقى آحلامى الخاصة بالموضوع ده

حاجة كمان فرحتنى جدا أن أهلى أخيرا عرفوا قيمة الحاجات اللى بكتبها وحسوا بقيمتها بسبب الموضوع اللى نزل ليا فى مجلة كملتنا لأن طبعا المجلات الألكترونية حاجة مش ملموسة بالنسبة لهم فماكانوش حاسين بيها قوى ولا بقيمتها ولكن بعد موضوع كلمتنا حسوا فعلا أنى بعمل حاجة كويسة وأنى عارفة طريقى كويس


بس لسة المدونة الحاجة الوحيدة اللى بعيدة عنهم وأكيد هيعرفوها أمتى بالظبط مش عارفة


بالنسبة لأحوال الدنيا وبلدنا أكيد الحاجات اللى مضيقانى مضيقانا كلنا ومفيش داعى لذكرها وبتمنى فعلا أنها تتغير فى السنه الجديدة

نفسى الناس تكون أحسن وتبطل سكوت وسلبية وأستغلال وطمع وجرح وغدر وخيانة ونفاق وكل الصفات اللى كلنا ما بنحبهاش

وأكيد عندى أحلام شخصية بس مش هينفع أكتبها وبتمنى أنها تتحقق

نفسى الناس تحب بعض بجد

نفسى ناس كتيرة تفهمنى بجد

نفسى أعمل حاجات كتير وبحاول أحققها على قد ما أقدر

نفسى أكون أحسن من السنه اللى فاتت فى كل حياتى

نفسى أقرب من ربنا أكتر وأكون أحسن من اللى فات

نفسى على السنه الجاية لو كان ليا عمر وبعد مرور سنه من عمرى وعلى مدونتى الاقى نفسى أتقدمت خطوات لقدام وحققت أحلام من آحلامى وأتغيرت حاجات كتير عن دلوقتى

نفسى مايكونش فيه حد زعلان منى فى أى حاجة ولو أنا عملت أى حاجة ضايقت حد ياريت تسامحونى

نفسى ناس كتير تفهمنى كويس

هاه تفهمنى كويس وتحس بيا وأكيد السطر ده بهدية ل 000000000 لأى حد طبعا

يالا كفاية عليكوا كده وكل سنه وأنتوا طيبين وسنه جديدة سعيدة عليكم

وكل سنه ومدونتى بكل خير يالا بهنى نفسى


والورد ده بهديه ل00000000 لأى حد برضة هو فيه أيه


وبمناسبة العام الجديد تم عمل مدونة جديدة للمدونة بسمه قصدى بوس بوس أنا يعنى يوه أستحملوها بقى أصلى هكتب فيها خواطرى

خواطرى

روحوا بقى شوفوا عدد يناير من مجلة على صوتك

----------------

معلش البوست كان طويل أنا كتبته على كام مرة وفى كذا يوم وفى الأخر الموضوع مش عاجبنى ماطلعش زى ما كنت عايزة بمعنى تانى مش عارفة أطلع اللى فى دماغى على العموم كل سنه وأنتوا طيبين وممكن تكون دى أخر مرة تشوفوا فيها حاجة ليا لية مش عارفة