Sunday, October 12, 2008

الروح ليلى

ليلى واليوم الثالث ليها وتانى مشاركة ليا بعد مشاركتى فى اليوم الثانى وبصراحة شايفة أنه لازم الكل يشارك سواء كانوا رجالة أو ستات وعايزة أوضح أننا مش ضد الرجالة ولا جايين نتحداهم ولا ننقدهم ولكن أحنا بنطالب بأبسط حقوقنا فى المجتمع اللى أحيانا كتيرة بتضيع بسبب الستات نفسهم واللى بيكون سبب فى أستغلال الراجل ليهم
يمكن أنا فكرت من مده فى حاجة نقول فيها أحنا عايزين أيه من كل المجتمع مش من الرجالة بس وكانت الفكرة عبارة عن مدونة البنات عايزة ايه اللى بنشترك فيها أنا ومجموعة مدونات ويمكن فى البداية أتقابلت المدونة بنقد شديد من الرجالة والشباب وكتير كانوا فاكرينها معمولة لنقد الرجالة وبس ولكن شوية وأتضحت فكرتنا وناس كتيرة فهمتنا وفهمت فكرتنا صح
ومن خلال المدونة حاولنا القاء الضوء على بعض الأشياء اللى يمكن تكون بسيطة ولكنها مهمة جدا فى حياه الستات والبنات ومهم قوى أن الرجالة يكونوا عارفينها حتى لو كان كتير منهم مش مقتنعين بيها لكن أحنا فضلنا مصرين أننا نكمل كلامنا وفكرتنا ولسة قدامنا حاجات كتيرة قوى هنقدمها ليكم
------------------------------------------------------

من ناحية تانية عايزة أقول لكل واحدة أنها جواها قوة كبيرة قوى تقدر من خلالها أنها تعيش حياتها وتحقق طموحها وأحلامها المشروعة حتى لو كل اللى حواليها رافضين لده فلازم تفضلى مصرة على موقفك طالما هو صح ومش متعارض مع أخلاقنا وعاداتنا وتقاليدنا يعنى مثلا لو واحدة عايزة تدرس حاجة معينة وكل اللى حواليها عايزين حاجة تانية أعتقد دى حياتك وده دورك علشان تقدرى تختارى وتثبتى على موقفك وتفضلى مصرة عليه وصدقينى مع قوة اصرارك هتوصلى للى انتى عايزاة
وعندنا أمثلة كتيرة قوى وكتير مننا صادف موضوع الدراسة ده سواء هو اللى مر بيها أو شافها حواليه وشوفنا قد أيه البنت بالذات بتتعرض لأنتقادات ورفض حاجة معينة هيا عايزة تدرسها وفيه كتير منهم بتستسلم لرأى الآخرين وبينسوا حلمهم وطموحهم ولكن فيه بنات كتيرة بتصر على موقفها وعلى قرارها وبتحاول تقنع اللى حواليها بيه وصدقونى كتير اللى حوالين البنت بيقتنعوا بده ولكن الأهم أنك تصرى على موقفك
وطبعا موضوع الدراسة ممكن نقيس عليه كل حاجة موجودة فى حياتنا وبتتقابل بنقد وضغط من اللى حوالينا
كل واحدة جواها قوة وعزيمة كبيرة هتقدر بيهم تعيش حياتها وتحقق طموحها وآحلامها وحتى لو قابلها سخرية ونقد من الآخرين ياريت ما تسمعش ليهم الا لو كان النقد بناء مش هدام زى ما بيحصل كتير حوالينا
وأنا هسيبكم دلوقتى ولكن أوعدكم هرجع ليكم تانى بأمثلة حيه وحصلت حوالينا فى الحقيقة

4 comments:

شفقة هانم واحسان بك said...

فكرة المدونة ممتازة حلوة جدا جدا
والبوست بجد كلامه رائع حسيت فعلا وانا بقراه انه بيمس الواحد بجد وفيه دفعة للامام
تحياتى

مؤمنه said...

السلام عليكم ورحمة الله وبركاته
عندك حق يا بوسبوس كل واحد فينا عنده قوه داخليه بتدفعه للعمل والافضل هو من يكرس قوته للايجابيات واختيار ما يصلح له

موضوع جامد
وفى انتظار ابوست القادم

والسلام عليكم ورحمة الله وبركاته

Desert cat said...

كلامك حساس اوى يا بسمة
اتمنى اسمع صوت كل الليلات
:)

برنامج انت تسال والكمبيوتر يجيب said...

بسمه
رايك فى المجلات الألكترونيه بصفتك مديرة تحرير على صوتك يذاع فى حلقة الأحد 19-10 تسعه وعشر دقائق صبحا من الأذاعه الرئيسيه لمصر
والتفاصيل فى مدونتنا
http://netonradio.blogspot.com