Sunday, January 20, 2008

أوراقى القديمة


أفتش فى أوراقى القديمة لأجد ورقا متناثرا وكلمات متفرقة وحكايات بعيدة عن بعضها بقايا أوراق من جرائد كنت أجمعهم
أفتش لأجد بقايا ذكريات قديمة وهدايا وأشياء كثيرة نسيت من هم أصحاب الهدايا وأعتصر عقلى من كثرة التفكير لأتذكر شخص أو أثنين أو أكثر ولكن المثير للدهشة أننى لم أتذكر كل أصحاب هذه الهدايا
قلبت فى أوراقى القديمة وفجأة وبعد صعوبة تذكرت أصحاب الهدايا قررت الا أفتح أوراقى القديمة حتى لا يعتصر عقلى من كثرة التفكير فى أسباب كتابة كل هذه الكلمات والحكايات
وأغلقت أشيائى القديمة لأجد نفسى كنت أبحث عن سراب فى الماضى كنت أبحث عن بقايا لأشياء لما تعد موجودة كنت أبحث عن نهاية للكلمات التى كتبتها وللحكايات التى لم تكتمل
ولكن قبل فتح هذه الكلمات أغلقتها خوفا منى أن تفتح بداخلى تساؤلات عديدة عن أسباب كتابة هذه الكلمات ووضعها هكذا بعيدا عن الناس
كلما أتذكر شكل أوراقى القديمة وقربى منها لفتحها وحسمى للأمر فى النهاية الا أفتحها يعتصر عقلى التفكير فى كيفية العودة الى هذه الأوراق لعل أجد بها شيئا يفرحنى أو يحزنى ليس هذا المهم ولكنى أبحث عن كل شىء له علاقة بالماضى كأنى أبحث عن حياتى السابقة فهذه الأوراق بالتأكيد بها ذكريات كثيرة ومليئة بالقصص والحكايات التى أنتهت والتى لم تنتهى فحياتنا كلها عبارة عن مجموعة قصص وحكايات وذكريات نعيشها
ولكن الى الآن لم تأتى لى الجرأة لكى أفتح أوراقى حتى لا أجد بها أى شىء قد نسيته عبر الأيام وأرجع له بعد رؤيتى لهذا الورق
خوفى من الماضى يدفعنى لعدم فتحها ولكن فضولى لمعرفة أفكارى وما بداخل الأوراق يدفعنى لكى أفتحها
ولكن هل اقدم على خطوة أقتحام الماضى أم لا
----------------
ملحوظة
الكلمات دى كتبتها من كام شهر وبعدها فعلا فتحت كل الورق وقطعت ورق الجرايد ورميته ولكن كان فيه شوية هدايا صحباتى كانوا جايبينها ليا من زمااااااااااان ولكن للأسف مش فاكرة كل أصحاب الهدايا
وكمان لاقيت شوية قصص كنت كتبتها أيام الدراسة هيا أكيد ساعتها كنت بحس أنها حاجة كبيرة لكن لما بشوفها دلوقتى بحس أن الكتابة نفسها ساذجة بس دى كانت بداياتى فى الكتابة ومش ممكن أرميها ولا أقطعها مهما حصل
وممكن هيا كانت مناسبة لسنى فى الوقت ده
وممكن أفكر أنشرها هنا أو فى أى مكان مش عارفة لسة بفكر

Tuesday, January 8, 2008

كل سنه وأنتم طيبين

كل سنه وأنتم طيبين بمناسبة السنه الهجرية الجديدة 1429
وعام جديد سعيد عليكم إن شاء الله
وياريت زى ماكنا بنتكلم ساعة قدوم السنه الميلادية ونقول لازم نشوف عملنا أيه فى سنه فاتت ونفسنا نعمل أيه فى سنه جاية
لازم نقول نفس الكلام برضة ودلوقتى أحنا هنحتفل برأس السنه الهجرية يعنى كل واحد يشوف عمل أيه فى علاقته بربنا
قرب ولا بعد
أيه الطاعات اللى قصر فيها
أيه الطاعات اللى ماكانش بيعملها
وهكذا لنهاية كل حاجة
وطبعا هو لازم الواحد يحاسب نفسه على طول ومايستناش لما سنه تخلص وسنه تانية تيجى
وياريت ماتنسوش صيام اليوم التاسع والعاشر من محرم
فضل اليوم العاشر كالآتى
عن أبي قتادة رضي الله عنه قال : سُئل النبي صلى الله عليه وسلم عن صيام يوم عاشوراء ، فقال : إني أحتسب على الله أن يكفر السنة التي قبله . رواه مسلم
فيوم عاشوراء يوم يتقبل الله فيه الحسنات وترفع فيه الدرجات وتكثر فيه البركات
فيجب أن نكثر من الصدقات فى هذا اليوم ومن صلة الرحم ومن الدعوات ومن قراءة القراءن والذكر
وكان الرسول يصوم يوم العاشر من محرم وكان ينوى فى العام المقبل أن يصوم يوم التاسع أيضا ولكنه قد مات قبل هذا العام فالمستحب صيام يوم التاسع والعاشر

Tuesday, January 1, 2008

عام جديد وعيد ميلاد مدونتى الأول

Free Image Hosting at www.ImageShack.us


أحتفالين مرة واحدة مش كتير ده عليا


أنا قلت اعملهم مع بعض وأكتب كل حاجة هو أكيد البوست هيكون طويل بس كلامى عن مرور عام على مدونتى هيكون فيه حاجات كتير من اللى عايزة أقولها فى كلامى عن عام مر على حياتى كلها وعن قدوم عام جديد

بداية أنا مدونتى عملتها من سنه بالظبط فى شهر يناير بس يوم أيه مش فاكرة لان للأسف المدونة أتحذفت منى بعدها بحوالى خمس شهور غصب عنى وعملتها تانى وعلشان كده أنا هحتفل بعيد ميلادها الاصلى مش اللى فى الأرشيف


سنه مرت على مدونتى بكل حاجة حلوة وكل حاجة وحشة

بأحداث كتير سعيدة وكمان حزينة


بأفكار طلعت وكبرت وأفكار لسة مدفونة جوايا


بأحلام طلع منها حاجات ولسة الباقى عايز يطلع


بعلاقات جميلة عملتها


بصداقات طلعت بيها


بعقول جديدة مش موجودة كتير


خبرة كبيرة خدتها من كل حاجة شفتها وعملتها هنا


مدونتى هيا أنا جزء منى وأكيد عليها حاجات كتير جوايا ولكن مش كل الحاجات لأنه فيه حاجات ما ينفعش تكتب لأنه مهما كان دى مدونة وفيه ملايين بيشوفوها وما ينفعش أعرض كل حاجة تخصنى عليها

بس أكيد الحاجات اللى عرضتها جزء منى وأكيد أنا أستفدت كتير من السنه اللى بدأت أدون فيها


وأكيد فيه ناس أثروا فيا وناس أنا أثرت فيهم وأكيد كل حد هيدخل هيأكد على كلامى أو ينفيه أنا عايزة بجد الصراحة مهما كانت عايزة أعرف هل أنا فعلا أثرت فى حد سواء بالسلب أو بالأيجاب


هل أنا عملت حاجة كويسة ولا مفيش حاجة أنا عملتها ياريت أعرف رأيكم لأن ماينفعش أقيم مدونتى مهما كان ولا أقيم نفسى


أكيد فيه بوستات عندى بعتبرها أهم البوستات ولما جيت أكتب عنوانها لاقيتهم كتير علشان كده مش هكتب غير اهم أتنين


عيد ميلاد أخويا


عيد ميلاد ماما



وياريت كل حد كان متابع مدونتى وفيه بوست أثر فيه فعلا أو علم معاه يكتبلى أسمه ده لو كان فيه حاجة يعنى أثرت


مدونتى بجد كان طريق لحاجات كتير قوى كنت بتمناها وبحلم بيها ووقفت لظروف كتير عندى


سنه بحالها عرفت ناس وعرفونى أثروا فيا فى حاجات كتير


بتمنى ليهم كل خير وخايفة أقول أسم حد أنسى حد تانى بس بجد كلهم كان ليهم أثر جميل فى حياتى


أكيد أفكارى أتغيرت شوية وأكيد عقلى أتغير شوية وأكيد كل كلمة كنت بشوفها فى أى مدونة كانت بتفتح جوايا حاجات كتير


كان نفسى الف على المدونات اللى أتعودت أدخل عليها وأكتب هنا موضوع من كل مدونة علق معايا قوى بس للأسف الوقت ضيق ولو لحقت هعمل كده


كل ما أفكر وأقول هيا مدونتى دى هتفضل موجودة لحد أمتى لحد سنه أتنين هل ممكن أسيبها أقفلها ولا هيا هتفضل عايشة معايا طول ما انا عايشة


أنا بجد بتمنى أنها تفضل معايا طول ما أنا عايشة ونفسى ما تحصلش أى حاجة تخلينى أسيبها


طيب كفاية كده وأدخل على الكلام عن السنه الجديدة والسنة اللى فاتت لأن هيكون فيه كلام فيهم عن مدونتى برضة

----------------------




العام الجديد والعام القديم


أولا كل سنه وأنتوا طيبين بمناسبة العام الجديد وبتمنى يكون عام سعيد عليكم إن شاء الله وكل واحد وواحدة يحققوا كل أمنياتهم وآحلامهم فى السنه الجديدة

بتمنى مرور سنه وقدوم سنه مايكونش بس بالأحتفالات والحاجات الغريبة اللى بنشوفها دى بجد حاجة تغيظ


نفسى كل واحد يفكر كده أن السنه دى عدت من عمره يعنى عمره نقص سنه


يفكر عمل أيه صح وايه غلط حياته ومستقبله وكل حاجة عمل فيها أيه

أتقدم كام خطوة لقدام ورجع كام خطوة لوراء

هل عمل حاجة مفيدة ولا أيه ياريت نحاسب نفسنا على كل حاجة ونحاول نصحح أخطاءنا فى السنه الجديدة


بالنسبة ليا السنه دى كانت مليانه بحاجات كتير قوى من الكويس ومنها اللى مش كويس


أولا فى بدايتها عملت مدونتى وبدأت مشوارى اللى كنت بحلم بيه طول عمرى لأنى طول عمرى بحب الكتابة وكالعاده مكتب التنسيق ودانى لطريق تانى ونسيت الكتابة تماما الا فى أوقات بسيطة كنت بكتب فيها لنفسى بس لكن بعد ما عملت مدونتى رجعت تانى ليها لكن شوية وكان نفسى فى حاجة أكبر من المدونة وبدأت فى طريقى للمجلات بداية من مجلة نفسنا الى مجلة على صوتك الى كلمتنا

وبدأت فعلا أرجع لهوايتى وأكتر حاجة بحبها فى حياتى وبتمنى فى السنه الجديدة كل المجلات دى تكبر وتبقى أحسن وأحسن وإن شاء الله بأصرارنا كلنا هتكون أحسن


ونفسى أى حاجة أكتبها فعلا تأثر فى الناس

حلم تانى حلمته مع مدونة جميلة وهو أذاعة المدونين اللى بتمنى أسمع عنه أخبار كويسة قريب

بالنسبة لباقى حياتى أيه اللى حصل تانى أمممممممم

بقى عندى أصدقاء أكتر بسبب نقلى من مكان شغلى لمكان تانى وأكيد خدت خبرة أكتر فى شغلى لدرجة أنى بفكر أسيبه مش علشان هو وحش ولا مش عاجبنى لأ علشان أسباب تانية كتيرة هتعرفوها بعدين لأنى ناوية أكتب كذا موضوع عن العمل الحكومى وخصوصا اللى بعقود أنتظروه وأدعولى أقدر أخد قرار


بقى عندى صديقات مدونات حلوين قوى وبتمنى تستمر علاقتنا


حياتى عموما ماحصلش فيها تغيير كبير قوى

الحاجة اللى ضايقتنى وزعلتنى سفر أخويا الكبير حبيب قلبى وصديقى وكل حاجة حلوة فى حياتى يوم 14/6

بجد كانت حاجة صعبة عليا قوى وبتمنى أشوفك فى السنه الجديدة


حاجة كمان ضايقتنى أنى أنشغلت عن صديقاتى صديقات الطفولة ومراحل عمرى المختلفة وصولا لصديقات العمل بجد أنا بعترف أنى مقصرة فى حقهم جامد بس مؤخرا ابتديت أرجع تانى لعاداتى معاهم ربنا يخليكم ليا


فرحت جدا بسبب قدوم كذا طفل لناس قرايبى ولصديقات ليا فى عام 2007 للدنيا


من بداية السنه لنهايتها وكل مده يجى طفل وطبعا ده شىء بيسعدنى جدا جدا وأنتهت أخبار الأطفال بخبر قدوم عمر الجميل


قدرت الحمد لله أمشى خطوات كويسة فى مشوارى فى الكتابة وبتمنى أحقق باقى آحلامى الخاصة بالموضوع ده

حاجة كمان فرحتنى جدا أن أهلى أخيرا عرفوا قيمة الحاجات اللى بكتبها وحسوا بقيمتها بسبب الموضوع اللى نزل ليا فى مجلة كملتنا لأن طبعا المجلات الألكترونية حاجة مش ملموسة بالنسبة لهم فماكانوش حاسين بيها قوى ولا بقيمتها ولكن بعد موضوع كلمتنا حسوا فعلا أنى بعمل حاجة كويسة وأنى عارفة طريقى كويس


بس لسة المدونة الحاجة الوحيدة اللى بعيدة عنهم وأكيد هيعرفوها أمتى بالظبط مش عارفة


بالنسبة لأحوال الدنيا وبلدنا أكيد الحاجات اللى مضيقانى مضيقانا كلنا ومفيش داعى لذكرها وبتمنى فعلا أنها تتغير فى السنه الجديدة

نفسى الناس تكون أحسن وتبطل سكوت وسلبية وأستغلال وطمع وجرح وغدر وخيانة ونفاق وكل الصفات اللى كلنا ما بنحبهاش

وأكيد عندى أحلام شخصية بس مش هينفع أكتبها وبتمنى أنها تتحقق

نفسى الناس تحب بعض بجد

نفسى ناس كتيرة تفهمنى بجد

نفسى أعمل حاجات كتير وبحاول أحققها على قد ما أقدر

نفسى أكون أحسن من السنه اللى فاتت فى كل حياتى

نفسى أقرب من ربنا أكتر وأكون أحسن من اللى فات

نفسى على السنه الجاية لو كان ليا عمر وبعد مرور سنه من عمرى وعلى مدونتى الاقى نفسى أتقدمت خطوات لقدام وحققت أحلام من آحلامى وأتغيرت حاجات كتير عن دلوقتى

نفسى مايكونش فيه حد زعلان منى فى أى حاجة ولو أنا عملت أى حاجة ضايقت حد ياريت تسامحونى

نفسى ناس كتير تفهمنى كويس

هاه تفهمنى كويس وتحس بيا وأكيد السطر ده بهدية ل 000000000 لأى حد طبعا

يالا كفاية عليكوا كده وكل سنه وأنتوا طيبين وسنه جديدة سعيدة عليكم

وكل سنه ومدونتى بكل خير يالا بهنى نفسى


والورد ده بهديه ل00000000 لأى حد برضة هو فيه أيه


وبمناسبة العام الجديد تم عمل مدونة جديدة للمدونة بسمه قصدى بوس بوس أنا يعنى يوه أستحملوها بقى أصلى هكتب فيها خواطرى

خواطرى

روحوا بقى شوفوا عدد يناير من مجلة على صوتك

----------------

معلش البوست كان طويل أنا كتبته على كام مرة وفى كذا يوم وفى الأخر الموضوع مش عاجبنى ماطلعش زى ما كنت عايزة بمعنى تانى مش عارفة أطلع اللى فى دماغى على العموم كل سنه وأنتوا طيبين وممكن تكون دى أخر مرة تشوفوا فيها حاجة ليا لية مش عارفة