Sunday, January 20, 2008

أوراقى القديمة


أفتش فى أوراقى القديمة لأجد ورقا متناثرا وكلمات متفرقة وحكايات بعيدة عن بعضها بقايا أوراق من جرائد كنت أجمعهم
أفتش لأجد بقايا ذكريات قديمة وهدايا وأشياء كثيرة نسيت من هم أصحاب الهدايا وأعتصر عقلى من كثرة التفكير لأتذكر شخص أو أثنين أو أكثر ولكن المثير للدهشة أننى لم أتذكر كل أصحاب هذه الهدايا
قلبت فى أوراقى القديمة وفجأة وبعد صعوبة تذكرت أصحاب الهدايا قررت الا أفتح أوراقى القديمة حتى لا يعتصر عقلى من كثرة التفكير فى أسباب كتابة كل هذه الكلمات والحكايات
وأغلقت أشيائى القديمة لأجد نفسى كنت أبحث عن سراب فى الماضى كنت أبحث عن بقايا لأشياء لما تعد موجودة كنت أبحث عن نهاية للكلمات التى كتبتها وللحكايات التى لم تكتمل
ولكن قبل فتح هذه الكلمات أغلقتها خوفا منى أن تفتح بداخلى تساؤلات عديدة عن أسباب كتابة هذه الكلمات ووضعها هكذا بعيدا عن الناس
كلما أتذكر شكل أوراقى القديمة وقربى منها لفتحها وحسمى للأمر فى النهاية الا أفتحها يعتصر عقلى التفكير فى كيفية العودة الى هذه الأوراق لعل أجد بها شيئا يفرحنى أو يحزنى ليس هذا المهم ولكنى أبحث عن كل شىء له علاقة بالماضى كأنى أبحث عن حياتى السابقة فهذه الأوراق بالتأكيد بها ذكريات كثيرة ومليئة بالقصص والحكايات التى أنتهت والتى لم تنتهى فحياتنا كلها عبارة عن مجموعة قصص وحكايات وذكريات نعيشها
ولكن الى الآن لم تأتى لى الجرأة لكى أفتح أوراقى حتى لا أجد بها أى شىء قد نسيته عبر الأيام وأرجع له بعد رؤيتى لهذا الورق
خوفى من الماضى يدفعنى لعدم فتحها ولكن فضولى لمعرفة أفكارى وما بداخل الأوراق يدفعنى لكى أفتحها
ولكن هل اقدم على خطوة أقتحام الماضى أم لا
----------------
ملحوظة
الكلمات دى كتبتها من كام شهر وبعدها فعلا فتحت كل الورق وقطعت ورق الجرايد ورميته ولكن كان فيه شوية هدايا صحباتى كانوا جايبينها ليا من زمااااااااااان ولكن للأسف مش فاكرة كل أصحاب الهدايا
وكمان لاقيت شوية قصص كنت كتبتها أيام الدراسة هيا أكيد ساعتها كنت بحس أنها حاجة كبيرة لكن لما بشوفها دلوقتى بحس أن الكتابة نفسها ساذجة بس دى كانت بداياتى فى الكتابة ومش ممكن أرميها ولا أقطعها مهما حصل
وممكن هيا كانت مناسبة لسنى فى الوقت ده
وممكن أفكر أنشرها هنا أو فى أى مكان مش عارفة لسة بفكر

30 comments:

david santos said...

Hi bo bos

Excellent post!
Thank you.
have a good day

وطني said...

لا أجد
ما أقوله
أشعر بالعار يلفني
يشل يدي
و يعقد لساني
صدقوني
ما تمنيت الموت غير اليوم
يااااااارب
إقبضنا إليك غير خزايا ولا مفتونين
........................
صائم حتى يرفع الحصار عن غزة

دنــــيــــــا مـحـيـرانـي said...

بوسي عزيزتي لا تضحكي او تسخري من كلماتك مهما مر عليها من زمن هي انتي لو مر الف سنه هي انتي بكل شيء حزن فرح دردشه هو انتي ومحدش بيقدر يلغي نفسه بس لما نقرا اورقنا القديمه بنحس ان احنا كبرنا خبرتنا بقت اكتر رؤيتنا لامور بتختلف اما بقي بالنسبه لتذكر اسماء الاصحاب ده مشكله المشاكل زهايمير مبكره لا تقلقي كلنا بقينا كده علي فكره انا كمان لي اوراق قديمه بحب ارجعلها اوي و اشوف نفسي و افتكرها لما كانت في سن 17 و 20 وهكذا التذكر في حد ذاته حاجه جميلة اوي
لا تمزيقي شيء حتي برضه يقطع نفسه
تحياتي يا جميل

صوت من مصر said...

والله لو كلا واحد بص بصايه صغيره على نفسه هيلاقى السذاجه دى طبع عام فى المجتمع مش فينا احنا بس

shayma said...

وهو الانسان ايه غير شويه الذكريات دى
بجد انا بعمل زيك كده كل فترة افتح دفاترى القدديمه واعد ادور فيها احساس رائع كلام وكتابه ومشاعر ...بتفتكرى حاجات حوة اوى
بتشوفى نفسك من وجه نظر نفسك فى وقت تانى اكنك شخصين

حلو اوى البوست يا بوسبوسه

عاليا حليم said...

ليه بابوسى ترمى ورق الجرايد الى كنتى متفظة بيه صدقينى كان حيبقى بسمة حلو فى اوقات الملل

على فكرة انشرى القديم الى انتى فاكراه ساذج ده انا نشرت حاجات قديمة كنت كتباها فى ثانوى مش جامعة كمان و عجبت المدونين اوى جربى كده مش كل الى بنفتكره ساذج او سئ بيطلع كده على فكرة

خالص تحياتى

حبة حاجات (ايمان) said...

ياريت تبقى وقفنا عند السذاجه وبس

كلام حلو اوى

مهبول ومهبوله said...

خير ما فعلتي
يلا حصل خير لكن المره الجايه اوعي تنسي اصحابك بتوع الهدايا اكتبي علي كل هديه اسم صاحبها
بوست جامد

مهبول

A.SAMIR said...

ليه يا بس بس بتدوري على كل حاجة فيها حزن
انا برضة العبث في اشياءي القديمة بتثير في حزن لا مبرر له
مش علشان هدايا انا مش فاكر اصحابها انما علشان بفتكر سنوات عدت وناس سافرت او هاجرت او ماتت
سنين عدت بحلوها ومرها
بوست تحفة
تحياتي

امل عبد الحكيم said...

ازيك يابوس بوس
حلو ان الواحد ديما دور واة وعلى كل حجه موجودة
بس اوعى فى يوم تسخرى من كله انتى كتبيتها لانها كانت بتعبر عنك فى الوقت دة ياعنى الكلام دة كان انتى
حتى ولو مكانش عنك
بس بيبقى فيه جزء منك

bocycat said...

بوس بوس احلى حاجة الواحد يحاول يرجع لزكرياته القديمة ممكن نسرح يها ونلاقى حاجة فيها تفرحنا او تخلينا مجرد نفتكر ونبتسم اكيد ايم زمان بتبقى احلى كتير خصوصا اما بنكون لسة ببراءتنا وتلقائيتنا ... اما كتابات زمان فهى بتبقى اجمل لأن الكلام بيطلع عفوى وتلقائى وبيتحس بجد ... تحياتى

bos bos said...

david santos

هاى أزيك
فينك من زمان
شكرا على كلامك

تحياتى لك

bos bos said...

وطنى

كلنا نشعر بالعار لما يحدث
الله معنا

تحياتى لك

bos bos said...

دنيا محيرانى

انا مش بسخر من الكلمات بمعنى الكلمة أنا كان قصدى أنى حسيت قد ايه هيا كانت بسيطة وعفوية وما ينفعش أصلا اسخر من حاجة أنا كتبتها مهما كانت بسيطة لأنها كانت بداياتى فى الكتابة

وكل كلامك أكيد صح
ومن ناحية الزهايمر ما تقلقيش كلنا بقى عندنا ههههههههههه

وأنا فعلا بحب كل مده أفتح حاجاتى القديمة وأشوفها

تحياتى لكى

bos bos said...

صوت من مصر

أكيد السذاجة بقت طبع فى ناس كتيرة

تحياتى لك

bos bos said...

shayma

فعلا هو الأنسان شوية ذكرياااااااااات
ولولا الماضى والذكريات مش هيكون فيه حاضر ولا مستقبل
وكل فترة لازم أرجع أشوف الذكريات دى

تحياتى لكى

bos bos said...

عاليا حليم

رميت ورق الجرايد لانه فعلا ما بقاش له قيمة عندى أو بمعنى تانى خد منه اللى عايزاه وخلاص
وباقى الحاجات أكيد هحاول أنشرها وربنا يستر بقى

تحياتى لكى

bos bos said...

حبه حاجات ( ايمان )

سعيدة بزيارتك وأن البوست عجبك

تحياتى لكى

bos bos said...

مهبول ومهبولة

سعيدة بالزيارة وبأن البوست عجبكم
وفعلا بعد كده هكتب أسماء أصحاب الهدايا

تحياتى لكم

bos bos said...

a.samir

تصدق كلامك بينطبق على معظم اللى كنت بدرو عليه وأنا بفتح حاجاتى القديمة
هو فعلا لما بلعب فى حاجاتى وافتكر ناس كانت معايا وخلاص مش موجودة لأى سبب وناس سافرت وناس مش عارفة راحت فين وصور أصحابها خلاص بعدوا لأسباب كتير حتى لو لسة على أتصال ببعض بس أكيد زمان كان غير دلوقتى

هو ممكن يكون البوست تحفة لأننا كبنى آدمين بنميل للذكريات والشجن

تحياتى لك

bos bos said...

أمل عبدالحكيم

انا مش بسخر من الكلمات بمعنى السخرية زى ما قلت قبل كده
لكن أنا حسيت قد ايه الحاجات دى كانت بسيطة وعفوية وتلقائية
أحسن حاجة الذكريات

تحياتى لكى

bos bos said...

bocycat

اكيد احلى حاجة الذكريات سواء كانت حزينة أو سعيدة
وإنتى أكيد فهمتينى وفهمتى أنى اقصد أن كتاباتى زمان كانت بسيطة وعفوية وتلقائية

تحياتى لكى

همسات ساكنه said...

انا عجبني البوست ده اوي
عارفه انا بحب اوي افتح حاجاتي القديمه وابص انا كنت ايه زمان وانا ايه دلوقتي
اشوف انا اتغير فيا ايه
كتابتي حتى اكيد اتغير الاسلوب فيها
يمكن اوقات حاجات في الاوراق القديمه ممكن تتعبك لو راجعتيها بس ده زمن وراح خلاص ومهما افتكرتي حاجات حصلت فخلاص حتى لو افتكرتيها دلوقتي مش حتعيديها تاني
وابقي انشري الحاجات القديمه دي .. متشوقه اشوفها ;)

عاشقة الوطن said...

السلام عليكم

ازيك يابسبس

انتى عارفة ان مفيش اجمل من انك تدورى فى ورقك القديم
بجد هتلاقي نفسك بتفتكرى كل لحظة كتبتى فيها الورقة ديه
والمناسبة اللى كتبتها فيها
وشعورك بالفرح لما تفتكرى اللى انتى كتباه ده كتاه لايه وعشان ايه
بجد الواحد بيحس انه عايش فى وقت غير الوقت
وممكن تعيشي مع ورقك القديم وتنسي بعض اللى انتى بتعيشيه حاليا
بس بجد ماأجملانك تفتحى الورق القديم وتشوفي انتى كتبتى ايه وانتى ازاى كنتى بتفكرى قبل كده
انا ساعات بفتح ورقي القديم واقعد اضحك ياماعلى الاسلوب اللى اناكاتبه بيه ياما على اللى اناكتباه وذكريات ياما حزينة او مفرحة بس بجد بفرح بيها اوى


موضوعك جميل وهتخلينى اروح اقلب فى ورقي القديم

تحياتى يابسبوسة

الخيط الرفيع said...

لييييييييييييية بس كدا يا بنتي
خيفة كدا لية من اللي فات
اكيد انت عملتي فيه احسن حاجة ممكن تتعمل في وقتها

اسفة دخلت شمال كدا من غير لا سلام عليكم
ولا ازيك يابوسي ولا اي مقدمات
بس اصلي عندي ورق زي ورق وبكون مبسوطه قوي بيه حتي لو فكرني بحاله وحشه كنت فيها او بحاجة وحشه حصلت
بيكون وقت سعيد جدا بين الاوراق عديمة الفائدة عند الجميع ومهمه عندي انا بس


الماضي مهم نتصالح معاه لانه ممكن يكون وقود رهيب للجي
حتي لو كان في ضعف افتكرية كويس علشان تتعلمي متكونيش ضعيفة تاني
لو في حاجة حلوة خلي ذكراها الحلوة طاقه نور من اللي فات للي جي
اهم حاجة في حياتنا ماضينا لانه بيشكل مستقبلنا

لو عاوزين نفضل زي زمان هنعمل اللي كنا بنعمله زمان
ولو عاوزين نغير نقلب كل حاجة للتقيد

والله دا مش كلام ليكي دا ممكن كلام ليا اولا
يارب اكون ضيفة خفيفة
اه بس لو مكنتش طولت كدا
كان ممكن بقيت ضيفة خفيفة
بس يلا المرة الجاية
مبسوطة اني عندك وان شاء الله اجي تاني

bos bos said...

همسات ساكنة

فعلا الواحد من فترة للتانسة بيحب يشوف حاجاته القديمة ويشوف الذكريات بتتحرك قدامه سواء كانت سعيدة أو حزينة بس أكيد بتكون ذكرى حلوة قوى
واكيد طبعا بتحسى تغير فى طريقة كتابتك وده طبيعى لان كل سن وله طبيعته فى كل حاجة

تحياتى لكى

bos bos said...

عاشقة الوطن

وعليكم السلام
ازيك انتى يا قمر
كلامك فعلا صح
لان الواحد بيلاقى نفسه عايش مع الورق القديم بتاعه وكمان بيفتكر كل حاجة حصلت فعلا وكل موقف
سواء كان موقف محزن أو مفرح
يالا بقى روحى أفتحى ورقك القديم وتعالى قوليلى لاقيتى ايه

تحياتى لكى

bos bos said...

الخيط الرفيع

صحيح ايه الدخلة الجامدة دى ههههههه
صح كل اللى قلتيه
لو فعلا الماضى كان فيه حاجات صح بنحاول ننميها ونكبرها ونحسنها
ولو كان فيه حاجة وحشة بنحاول ننساها ونتعلم منها علشان ما نعملهاش تانى
بس تعرفى أحسن حاجة الذكريات الجميلة بجد حاجة روعة

وبعدين الكلام ليكى أو ليا أهو كله صح والمهم نستفيد منه بجد

وبعدين انتى كنتى ضيفة خفيفة بلاش تقولى كده على نفسك
وانا اللى سعيدة بزيارتك وبتمنى أنك تكرريها

حاول تفتكرنى said...

جميل أن نجد أنفسنا ولو فى قصاصات بعيدة ، ونراها من زواية عديدة بمنظار الوقت المختلف


مدونة راقية ومنظمة

تحياتي

bos bos said...

حاول تفتكرنى

فعلا احنا بنشوفها برؤية تانية خالص
شكرا على كلامك على المدونة

تحياتى لك