Saturday, August 16, 2008

ماذا تفعل لو ( 3 ) 0

ماذا تفعل لو أرتبطت بأنسانة وكان بها كل الصفات التى تتمناها وعشت معها فى سعاده ولكن فجأة أكتشفت أنها كانت تخفى عنك أنها كانت على علاقة بشاب آخر قبل أرتباطكم مع العلم أن العلاقة لم تتعدى شهور قليلة وكانت عبارة عن مكالمات تليفونية فقط وعدد قليل جدا من المقابلات فى وجود صديقتها
هل تتركها بسبب أخفاء الأمر عنك
أم تغفر لها هذا الخطأ طالما كان قبل أرتباطكم
أم تغضب منها فترة ثم تسامحها
وهل غضبك سوف يكون بسبب أنها أخفت عليك هذا السر أم بسبب أنك كنت تظن أنها لم تعرف شخص قبلك
------------------------------
وهذا السؤال بالنسبة للبنات والسيدات أيضا
ماذا تفعلى لو أكتشفتى أن شريك حياتك كان على علاقة بفتاه بنفس التفاصيل السابقة
------------------------------------
هنا

13 comments:

كلبوزة لكن سمباتيك said...

انا لو مطرحه او مطرحها
اغفر و اسامح و اعتبر كرامتي اللي لازم تصونها من اول ما عرفتها مش من قبل كده

من حق اي بشر انه يخوض تجارب و يتعرف على الطرف التاني و اذا الموضوع مشي يبقى خير
و لو ممشيش يبقى مننصبش له المشانق
المهم اننا نتقي الله في تعاملنا بالطرف التاني و ميكنش في اي تصرف حرام بينا


تحياتي

محمد صبرى said...

و الله يابسمة البوست المرة دى صغير حجما لكن بيثير موضوع مهم جدا و متشعب جدا ,انتى سألتى عن رد الفعل اللى ممكن ناخده لو اتعرضنا للموقف اللى عرضتيه ايه هتكون طبيعته و ايه أسبابه , و طبيعى أنه رد الفعل فى موقف زى ده هيكون مبنى على قناعات كل واحد فينا و خلفياته و خبراته الاجتماعية و السلوكية و طريقة تربيته عشان كده أنا حابب اوضح ازاى انا شايف الموضوع ده و ليه انا شايفه كده

و خلينى اتكلم شوية بس فى الاول عن طريقة تربيتى و خبراتى فى الدنيا اللى هتشكل نظرتى للموضوع ده

-عندنا فى البيت, الانطباع اللى نقلته لنا امى بتصرفاتها و كلامها انه طبيعة العلاقة بين الراجل و الست اللى مبتجمعهمش صلة قرابة لابد يبقى ليها حدود فى منتهى الصرامة و الحزم, و إنه الجواز الطبيعي بس هو جواز الصالونات و أى حاجة غير كده تبقى استثناء ,فطبيعى كان لده تأثيره عليّ-ع الأقل فى مرحلة ما- بغض النظر عن مدى التأثير ده, فكانت -فى مرحلة المراهقة مثلا- قدرتى على إنى كولد أصارح البنت اللى بحبها بإحساسى ده تقريبا معدومة, فطبيعى مكنش فيه مجال لعلاقة و لو فى حدود , كان صعب علي جدا إنى اصارح بنت باحساسى ناحيتها لأنى ببساطة كنت بتخيل رد فعلها -اللى يستحيل أجازف بإنى اتعرض له -لو كانت تحمل نفس طريقة أمى فى التفكير و ردود فعلها :) ,ظروفى دى و طريقة تربيتى خلت طبيعة العلاقة بين البنت و الولد و ايه فيها الصح و ايه الغلط شاغلانى من سنين كتير فاتت ,فيعنى و إن كان لقناعتة أمى دى وجاهتها فى الجو العام و البيئة المغلقة المحيطة بينا لكنها بشكل عام كانت بالنسبالى محل نظر و مراجعة و بالذات بقى و احنا فى زمن دابت فيه الحدود و بقى للوازع الديني و الضمير فيه أهمية أكبر من الفواصل و الحدود فى ضبط تصرفاتنا و علاقاتنا ببعض من الجنسين , و بقى فيه مجال كمان أكبر للولد إنه يتعرف على الانسانة اللى ممكن تتوافق معاه , و للبنت انها تتعرف على الإنسان المناسب ليها من خلال محيط ارحب و بيئة اتساعها العالم, يعنى مبقاش جواز الصالونات بس هو المكان الوحيد اللى ممكن من خلاله تقدرى تلاقى حد يثق الانسان فى عراقة أصله و فى انه الشخص المناسب اللى يستأمنه الانسان على حياته الجاية ,فمسألة الاختلاط بشكل مبدئى بقى مألوف جدا دلوقتى , و صعب أوى انه ولد يكون انطباع عن انسانة سواء ارتبط بيها أو مرتبطش بيها , و يحكم عليها بإنها غير أمينة على بيته و أسرته عشان عرفت حد قبله

-فيه مقوله بتقولك ايه " لو الحياة تقاس بالسعادة فاكتبوا على قبرى مات قبل أن يولد"و الحكمة المقصودة من ورا المقولة دى إنه العبرة مش بالأيام و السنين إنما بطبيعة الأيام دى , العبرة بمدى جودة الحياة و هل كانت سعيدة و لا تعيسة , كمان المثال اللى بنتكلم عنه عند بعض الرجال العبرة مش بوجود علاقة زى دى من عدمة العبرة بطبيعة العلاقة دى كانت ازاى , و حدودها كانت ايه , ده اللى يهم مستويات معينة من الرجال بالذات المستويات الأكثر ثقافة , اه ممكن يتفهم انه بقى من الظلم حاليا انه يحكم الرجل على انسانة بانها غير أمية على بيته و أولاده لأنه قلبها مال في يوم م الأيام- قبل ما ترتبط بيه –برجل تانى شافت فيه مستقبلها و سنينها الجاية و شاءت الأقدار أنه متتمش العلاقة دى , ده ممكن يفهمه الرجل لكن اللى مش ممكن يفهمه إنه حدود العلاقة دى و طبيعتها تحوم حواليها الشبهات . بالنسبالى كان عندى فرصة أكبر إنى أعرف من اكتر من طريق ايه الشكل الغالب للعلاقات بين الشباب و البنات دلوقتى , و فى الحقيقة تحديد حكم عام على العلاقات بين الولاد و البنات هيبقى ظالم جدا و قاس جدا , لأنه على الرغم من إنه الشكل العام زى ما انا شايفه بيقول إنه أغلب العلاقات بتتعدى حدود المكالمات التليفونية البريئة أو المقابلات فى وجود صديقة مع البنت بمراحل , و إنه أغلب العلاقات علاقات يدينها المجتمع و يرفضها لكن رغم كده فيه بنات فعلا عاشت التجربة دى فى حدود الاعراف العامة و بدون خروج على النص و مكنش هدفهم لا يتسلوا و لا يقضوا وقت بالعكس كانوا جادين فعلا و لما عاشوا المرحلة كانت كل واحدة فيهم شايفة الانسان اللى بتميل له حد مستأمن و ممكن تكمل معاه و لما مكنش فيه نصيب الموضوع انتهى


المشكلة و الأزمة الكبرى اللى ممكن يتعرضلها اكتر الرجال لما يتعرض لموقف زى اللى اتكلمتى عنه ده يا بسمه أنه مسألة انها خبت عنه دى - مهما كانت العلاقة بريئة و محدودة , و احيانا رغم مدة كافية من الحياه يعرف من خلالها أخلاق زوجته و يقدرها –هى اللى بتبقى عاملة زى الوسواس الخناس و ممكن تثير جواه شك مينتهيش و يسيطر عليه فكرة "خبت ليه لو كانت العلاقة دى بريئة" , و بالذات بقى لو كانوا اتكلموا عن حياتهم قبل ارتباطهم سوا و مجابتش سيرة عن العلاقة دى أو حتى هو سألها بشكل مباشر و هى نفت انها كان ليها تجربة بالشكل ده , و تحت تأثير وسواس من النوع ده هتقل فرصة إنه يفكر بموضوعية و يحط احتمال حسن النية و انها وارد محبيتش تتكلم عن ده عشانها سعيدة معاه و حابة تحسسه انه اول و آخر راجل فى حياتها , أو لخوفها من إنه ده يأثر على علاقتهم لو فضلت فكرة إنها عاشت قصة حب و لو محدودة قبله عايشة جواه

بيتهيالى لازم كل واحدة عاشت التجربة دى و بتتمتع بقدر من الفراسة و الذكاء توزن الأمور و تفكر كويس قبل ما تقرر تخبى عن جوزها حاجة زى دى , أحيانا بيبقى طبيعة الظروف نفسها بتقول إنه العلاقة دى قابلة انها تتعرف فى المستقبل ,فأعتقد فى الحالة دى أوقات كتير بيبقى أحسن انها تيجى منها و هى تصارح الانسان اللى هترتبط بيه قبل الجواز , و على فرض انه ارتباطها متمش بسبب انها حكت و صرحت يبقى هى الكسبانة لأنه معنى كده انه الشخص ده مش واثق فيها بدرجة كافية تسمح انها تكمل معاه , و يبقى هو بيدور على ملاك قرر يبقى انسان و هى متناسبوش و لا هو يناسبها

*بالنسبالى بقى افتكر انه انسانة عشت معاها مدة سعيد كفاية أوى عشان أكمل معاها , مفتكرش ممكن يبقى فيه فترة سعادة أصلا إلا إذا كنت عارفها كويس جدا و واثق من سلوكها كويس , و بعدين انا يهمنى هى معايا ازاى بعد ارتباطنا , حسابها عن مجمل حياتها قبل ارتباطى بيها و بعده ده حساب ربنا مش من حقى انا .. يعنى مش هتركها طبعا , و كمان مش هغفر لها لأنها مش مذنبة فى حقي أصلا و خدعوك فقالوا إنه ممكن حد أصلا يظن فى زوجته السوء أو يشوفها مذنبة عاطفيا و يرجع يصفالها تانى بعد كده ,و معتقدش إنى ممكن أغضب منها , لو حطيت فى اعتبارى انها كائن بشرى له قلب و مش من حقى انى افرض على القلب ده باثر رجعى انه ميميلش لغيرى حتى قبل ما يعرفنى ,و انها ممكن تكون خبت عليا عشانى و عشان حياتنا سوا وخافت مصفاش ليها و حياتنا تتأثر فمعتقدش إنه أى خيار من التلاتة دول يناسبنى

أفتكر إنى هتصرف بشكل تانى .. يعنى بما إنها مراتى اللى أنا عشت معاها و عرفتها و عرفت اخلاقها كويس هبقى واثق انها خبت خوفا منها انها تجرحنى أو إن حياتنا تتأثر , فهفكر فى انى احفظ لها سرها و كأنى معرفتش لو كان ده ممكن

مممممممم... يعنى احتمال برضه لأنى بطبيعتى مش كتوم أوى فهبتسم لها كده فى ساعة صفاو هلمحلها من بعيد لبعيد يادوب بكلام تفهم منه انى عندى فكرة فتحكيلى هى , و لما تتأكد إنى متفهم ينتهى الموضوع من غير حساسيات و من غير ما تشك إن الموضوع ممكن يمس سعادتنا مع بعض أو يأثر عليها

بس هو اللى انا بفكر فيه دلوقتى اخاصمها عشانها تصورت انى انسان همجى و خافت تقولى و لا لأ ..ههههههههههههههههه

على فكرة فيه ستات تزعل اوى لو جوزها مثارش لما عرف انها كانت عارفة حد قبله , ممكن تتصور انه ده برود و مفروض انه يغير عليها , بس ان شاء الله مراتى انا هتبقى اعقل من كده ,هههههههههههههههههههههه

على فكرة كمان فيه بنات يا بسمة لو اتحطت هى فى الموقف ده و اكتشفت انه خطيبها كان يعرف حد قبل الجواز تفرح اوى .. مقاييس نظرة المجتمع فى الموضوع ده مختلفة , و فى بنات بتشوف دى ميزة انه خطيبها ميبقاش ولد خام على عكس نظرة الولاد للموضوع , و فيه ستات لو اكتشفت انه جوزها مخبى عليها حاجة زى دى , لأ مش اكتشفت دى لو شكت بس او اخترعت شك و صدقته تقوم الدنيا و متقعدهاش عشان اغلب الستات حاليا عندهم رغبة انهم ينكدوا على اجوازهم ,ههههههههههههههه , فمتصدقيش كل بنت تقولك انها هتزعل لو اكتشفت ده بس هتغفر و تسامح دى تلاقيها عايزة تمسك عليه حاجة عشان ينفذلها طلباتها و يمشى ع العجين ميلخبطوش بعد كده ههههههههههههه, و لا تصدقيش كل ست تقولك انها اكتشفت كذا و كذا عشان فى الغالب هتبقى دى تهيآت ,هههههههههههههههه , لأ محدش م البنات او الستات يزعل انا مقلتش حاجة تزعل صح ههههههههه :-p

موضوعك قيم جدا جدا جدا يا بسمة و اتمنى بس اكون فعلا اتكلمت عن واقع مش عن خيال و يعنى لو اتحطيت فعلا فى موقف زى ده اتمنى انى فعلا زى ما انا شايف نفسى دلوقتى ... لو هيبقى فيه مواضيع كده كل يوم هتلاقي فى مدونتك كل يوم ,اينعم هبطت من الكتابة بس معلش هههههههه, مستنى ردود و مشاركات الناس فى الموضوع و مستنى موضوعاتك الجاية

خااااالص تحياتى

Empress appy said...

لا يا بسمه ماليش فى الماضى ليه فى اللى جاى

بسمه عبدالباسط said...

كلبوزة لكن سمباتيك

فعلا عندك حق
والمهم أننا نتقى ربنا فى تعاملاتنا

خالص تحياتى

بسمه عبدالباسط said...

محمد صبرى

فيه أيه قطعت نفسى من القراية والجرى بس أعمل أيه هيا دى عادتك ولا هتشتريها

بسمه عبدالباسط said...

appy

فعلا كلامك صح اللى فات مات

خالص تحياتى

ماء تشرين said...

الصراحه عجبنى اوى الموضوع وقولت اقول راى بعد اذنك
انت طبعا هتقولى اتفضلى
وانا هتفضل
احم احم
اول انا من انصار انو الماضي بتاع المعاك مش من حقك تحسبو عليه لانك مكنتش في حياتو ومن حقك تحسبو على افعالو بعدها لكن اذا كنت سألتو وهو نفى وقالك لا وانت اكتشفت اعتقد ده مش سهل لانو كدبو معناه انو في حاجه وليه ياخبى اذا كان وضع طبيعى انك يكون في حياتك شخص
وملحوظه :
طبعا ولاسف بنات كتير بيعملو كده وبينكروا انهم عرفو اشخاص "طبعا المعرفه للبنات المحترمين ولاد الناس بتبقه في اطار محترم وراقى" لكن البنات بيعتقدوا انو الرجاله ميحبوش يكون لبنت بتاعتهم ماضي والراجل الشرقى مع الاسف بيحب يضرب على قفاه انا اسفه بس دى الحقيقه الا من رحم ربى
دة راى مع احترامى للجميع

عروسة ننوسة said...

لو مكانك لازم اسامحها واغفرلها طالما ده كان قبل ارتباطهم ببعض

شفـقــة و إحســــان said...

كل سنة وانت طيب
انا من رائى انك تسامح وتغفر طالما هى ما ارتكبتش غلط والموضوع كان قبل الارتباط

بسمه عبدالباسط said...

ماء تشرين

معاكى حق المفروض الماضى حاجة وأنتهت خلاص مالوش لازمة نحاسب بعض عليها
وبرضة ما ينفعش لو حصل مواجهه بين الأتنين وسألوا عن ماضيهم حد فيهم يكدب لأن بكده هيحط نفسه فى وضع مش كويس

خالص تحياتى

بسمه عبدالباسط said...

عروسة ننوسة

صح عندك حق

تحياتى

بسمه عبدالباسط said...

شفقة هانم واحسان بك

وانت طيب وبكل خير

صح عندك حق

تحياتى

رئيس جمهوريه نفسى said...

انا ميهمنيش ابدا انى اكون اول واحد فى حياة الانسانة اللى حرتبط بيها بس الاهم انى اكون اخر واحد فى حياتها ولو ححسابها على ماضيها يبقى هى كمان من حقها تحاسبنى على الماضى بتعنا
وبدل ما انا عارف انى هى اخلاقها كويسة وبتتقى المولى عز وجل فى تصرفتها وبثق فيها يبقى انا واثق كمان حدود علاقتها كانت اية مع الانسان التانى