Sunday, July 6, 2008

المحن

المحنه كلمة كبيرة قوى وليها معنى ومحدش يقدر يحس بيها الا اللى مر بمحن فى حياته أو شاف حد قريب منه مر بمحن بس عمر ما حد بيحس بقيمتها الا اللى مر بيها بجد
المحن بتختلف من كل أنسان للتانى وبتختلف درجة تحمل كل واحد ليها ولكن للأسف ساعات كتيرة الناس بتنهار قدام أى محنة بتمر بيها وما بيقدروش يصمدوا قدامها
ولكن تعالوا نحسبها كده مع بعض أنت لما بتمر بمحنه بيكن مطلوب منك أيه
أولا أنك تفكر فى حل ليها
ثانيا أنك تصبر عليها لحد ما تعدى
ثالثا أنك ما تلعنش حظك ولا دنيتك بسبب المحنه دى
تيجوا نبص لنقطة الصبر ونفكر فيها كويس قوى ولازم نبقى عارفين أن ربنا بيختبرنا بالمحن دى وبيختبر مدى صبرنا وقوة ايمانا بيه لأن الناس فى المحن بتنقسم قسمين قسم بيصبر وبيدعى ربنا وبيحتسب أجره عند ربنا وقسم يفضل يلعن فى حياته وفى اللى بيحصل ليه
يبقى أول حاجة لازم نتعلمها لما نمر بمحنه الصبر ولازم نعرف أن صبرنا ده هيجازينا عليه ربنا لأنه بيكون بيختبرنا بالمحن دى
ولازم نتعلم عدم لعن حظنا ونصيبنا وحياتنا لما نمر بأى محنه
وكمان لازم نفكر فى حاجة تانية أنه ممكن تكون المحن دى تكفير لذنوبنا وأكيد كلنا عندنا ذنوب ومفيش حد خالى من الذنوب
يبقى لازم نصبر وندعى ربنا ونحاول نخرج من أى محنه بايمانا بربنا وبتفكيرنا فى طريقة الحل وممكن نعرض الأمر على حد قريب منا يحاول يساعدنا فيه
ولازم نكون متأكدين دايما بأن( الله مع الصابرين) 0
ياترى أنت من أى نوع لما بتكون عندك محنه

16 comments:

أحمد سلامــة said...

طول ما في يقين بزوال المحنة
يزول احساس الهم بها

appy said...

هى دى الثقه والايمان كمان بربنا والرضا باللى فى حياتنا تسلم ايديكى

أسوور said...

المحنة
كلمة سهلة مضمونها صعب

محدش فى الدنيا ما مرش بمحنة يوما ما

ولكن ضاقت فلما استحكمت حلقاتها
فرجت .. وكنت اظنها لا تفرج

تحياتى

موناليزا said...

ربنا يكرمك كلاماتك جميلة وواقعية
ويكفى لاصحاب المحن هذه الاية"وبشر الصابرين"

صاحب المضيفة said...

المحن دايما بتكون مكفرات للذنوب وزيادة في الحسنات لو تقبلناها برضا بالقضاء والقدر


ربنا يقدر لنا الخير دائما

تحياتي على الموضوع الجميل

blue-wave said...

انت تريد وانا اريد والله يفعل ما يريد
تحياتى

ريمان said...

السلام عليكم

كل انسان مبتلى

وكل انسان بيمر بمحن كبيرة جدا

ولازم الانسان يرضى بقدر الله

ويعلم ان المحن دى بتكفر عنه حاجات كتير اوى

ولازم كمان نعرف ان اله لا يكلف نفسا الا وسعها

عشان كده بتختلف شده المحنه من شخص لاخر

...........

بوست رائع

جزاكم الله خيرا

أنا حر said...

زيزتي انا دبستك في واجب عايزك تعمليه معلش ممكن يكون رخم شوية بس هعمل ايه بقى نصيبك كده
اتفضلي عندي في المدونة علشان تعرفي الواجب بتاعك
تحياتي

bos bos said...

أحمد يقين

صح معاك حق

تحياتى

bos bos said...

appy

فعلا لو الواحد بقى عنده ثقة وايمان بربنا ورضا كل حاجة هتهون وتعدى

تحياتى

bos bos said...

أسورر

ولكن ضاقت فلما استحكمت حلقاتها
فرجت .. وكنت اظنها لا تفرج

هو ده الكلام

تحياتى

bos bos said...

موناليزا

ربنا يخليكى شكرا على كلامك
وفعلا كفاية الآية دى

تحياتى

bos bos said...

صاحب المضيفة

فعلا لو كل واحد فكر فيها كده كل شىء هيهون

تحياتى

bos bos said...

blue-wave

صح كلامك وأكيد ربنا بيختبرنا وبيختبر قدرتنا على الصبر والتحمل

تحياتى

bos bos said...

ريمان

وعليكم السلام

فعلا قدرة التحمل بتتغير من كل واحد للتانى علشان كده بتختلف المحن من واحد للتانى

تحياتى

bos bos said...

أنا حر

ماشى متشكرة جدا وهاخد الواجب مع أنه صعب قوى

تحياتى