Sunday, September 27, 2009

أحنا مش كمالة عدد

كتير قوى وغالبا بتتعرض البنت لأنتقادات وهجوم من كل اللى حواليها لمجرد أنها عايزة تعمل حاجة لمجرد أنها عايزة تثبت نفسها وعايزة تعمل ليها كيان
غالبا بتتعرض البنت لأنتقادات وهجوم لمجرد أنها بنت وعلشان بنت ما يصحش تعمل كده حتى لو كان كده ده حاجة كويسة ومفيدة ومهمة ولكن علشان هيا بنت لازم تسكت وتفضل قاعدة حاطة أيدها على خدها مستنية عريس العدل اللى يجى ويشيل الشيلة ويكمل تحكمات وكبت ليها ولشخصيتها ويكمل تحكم وهجوم ونقد ليها لكونها الست وهو الراجل
وكتير قوى بتكون الأم اللى هيا ست وكانت فى يوم من الأيام بنت وليها آحلام وطموح وحاجات نفسها تحققها السبب فى الهجوم والأنتقادات اللى بتتوجه للبنت لأنها بتكون أول واحدة تحاول تكبت طموح وآحلام بنتها وبتساعد للأسف باقى الناس على كده بداية من والدها وأخواتها نهاية للراجل اللى هتتجوزة
بجد بيصعب عليا قوى أشوف مشاكل كتيرة بتمر بيها البنات سببها ستات وغالبا بيكونوا أمهات
وكتير بنشوف آحلام وطموح بيتكسر ويتهد علشان أنتى بنت ولأنك بنت مش لازم تعملى كده ولا تحلمى ولا يكون ليكى طموح
ولكنى عايزة أقول أننا مش كمالة عدد مش مخلوقين علشان نفضل قاعدين ساكتين ونكتم آحلامنا وطموحنا اللى لو سبتونا نعمله ممكن يجيب نتايج حلوة قوى وأنتوا أول ناس هتفرحوا بيها
بقولها بصوت عالى أنا مش كمالة عدد ومش لازم تكون أى بنت كمالة عدد ولازم تحاول وتحاول تحقق آحلامها وطموحها مهما كلفها ده
وياريت كل واحدة تردد الكلمة دى بعلو صوتها وتقول أنا مش كمالة عدد وما تسيبش حد يسرق حياتها وطموحها
فى النهاية أحنا مش كمالة عدد

موضوع من مواضيع الجزء الأول من كتاب البنات عايزة إيه

3 comments:

'' حطام (ك) بقايا '' said...

هو احنا فعلا مش كمالة عدد و خلاص
لاء احنا نصف المجتمع و من حقنا نحقق احلامنا و طموحتنا
و مش من حق اي حد يكبت ده فينا
ويقول لنا لاء او يمنعنا او كده
بس ده لو كان في اطار الشرع
اصله بيني وبينك دلوقتي
البنت بقت تطالب بحاجات مش من حقها
حتى الاسلام مش مديها الحق في عمله
بس هي بس عاوزة تعاند الرجل فيها
انا مع ان احنا من حقنا نحقق احلامنا و طموحاتنا
بس لو كانت في اطار الشرع
وانا عن نفسي لو شفنت نفسي مش هقدر اوفق بين ديني وحاجة نفسي اعملها اقعد في بيتنا احسن
و مثال بسيط جدااا
عندنا هنا بالمغرب كلية جميلة جداا و يعني حلوة و عندها مستقبل
بس بيرفضوا اي بنت محجبة ده ان مقلناش بنت متخلقة
اشي لبس واشي اخلاق
يعني اهو ابسط مثال
بس في كل الاحوال
احنا مش كمالة عدد فعلا
وانا متقبلة النقد
وان شاء الله اكون ضيفة خفيفة عليكم

bos bos said...

حطام بقايا

أولا أهلا بيكى نورتينى جدااااا

وعلى فكرة أنا معاكى أنه المفروض طموحها وآحلامها واللى عايزة تعمله ما يكونش مخالف للدين

وكمان معاكى فى أن لو الواحدة ما قدرتش توفق بين شغلها وطموحها وآحلامها وبين بيتها أنها تسيب شغلها لأن بيتها وجوزها وولادها أهم ولأنه فيه أولويات

وأكيد كنتى ضيفة خفيفة وبتمنى تكررى الزيارة

غمض عينيك said...

صح كده :)
انتوا مش كمالة عدد
:)

مالك بس عصبية ليه...مش مهم الناس بتعمل ايه وبتقول ايه
طالما في اصرار ومثابرة من البنت عشان توصل لهدفها وتحقق طموحها يبقى اكيد مش هتسمع ولا تشوف اي حاجة محبطة حواليها...انما لو سابت نفسها للي

حواليها هتبقى كمالة عدد

تحياتي
محمد سمير