Thursday, July 30, 2009

أزاى تعرفى أنك هبله 1

حاجات كتيرة قوى تعرفك بجد أنك بنت هبله ومعلش مش هقدر أجامل وأطلع كل البنات ملايكة لازم برضة أقول على العيوب

لما تفتكرى أنك لما تدلعى وتتمايصى وتمشى مع شباب علشان تضمنى أنك تكعبلى واحد منهم ويتجوزك تبقى مليون هبله لأنهم هيمشوا معاكى وهتسمعوا بعض أسطوانات محفوظة وهيكونوا بيضحكوا عليكى وفى الآخر لما يحبوا يتجوزوا مش هيبصوا لواحدة مشيت مع شباب المنطقة كلها حتى لو كانت الحكاية مجرد كام فسحة وكلام تليفونات وما لمسوش منك ولا شعره برضة مش هيعبروكى وساعتها أعرفى أنك ضيعتى عمرك ووقتك وخسرتى كل حاجة وبكده بقيتى هبله

لما تعيشى فى الآحلام وتتشدى لواحد وتحبيه وتفضلى تضيعى عمرك وأنتى مستنياه يعبرك مع أنه ممكن يكون بيحب واحدة تانية ولا مرتبط أصلا وإنتى مراية الحب عمياكى والكل عمال يقولك أنسيه وشوفى حياتك وإنتى موقفة حياتك على واحد مش واخد باله منك أصلا وفى الأخر ممكن تكتشفى أنه خاطب أو مرتبط وإنتى عمالة تضيعى فى وقتك وأعصابك وحياتك ومش عايزة تسمعى كلام حد ساعتها أعرفى أنك هبله

لما تنسى نفسك وتهملى فى شكلك ومظهرك كبنت وتهتمى بشغلك وتفتكرى أن ده كل حاجة أعرفى برضة أنك هبله لأن شكلك وأهتمامك بنفسك من غير مبالغة فيه بيديكى طابع مميز عن غيرك ومن غير ما يكون ليكى طابع وشكل وأستايل مميز مهما كنتى ناجحة فى شغلك ولا حد هيبصلك ولا يعبرك ولا هيقولك إنتى فين حتى على مستوى الشغل مش معنى أنك طموحة وعندك شغل بياخد وقت طويل أنك تنسى نفسك أهتمى بمظهرك ولبسك وأناقتك بلاش هبل بقى

لما ما تعرفيش الفرق بين السبانخ والجرير ولما تقولى أنا طباخة ماهرة ويادوب لما تيجى تسلقى بيضة أول ما حد يقشرها يلاقيها من جوه نيه ولما تعملى فيها أنك أستايل وبرستيج وبتاع وتقولى أنا ما بعرفش أعمل الأكل التقليدى أنا ماهرة فى عمل الكانولينى والكريم كراميل وبعمل سلطة زبادى رائعة وتبقى متخيلة أنك كده ياما هنا ياما هناك يا شيخة روحى منك لله الحاجات دى ماشى أعرفى أعمليها بس ما تنسيش الأكل الأساسى اللى بتقولى عليه تقليدى لأنه دايما هو اللى بيعجب الناس وخصوصا الرجالة ومرة مع التانية لو عملتى حركات البرستيج والسوفاج دى خطيبك ولا جوزك هيرميكى من أقرب شوباك وهيتجوز عليكى إن شاء الله خدامة فلبينية المهم تكون بتعرف تطبخ
يالا يا هبله أعرفى الحاجات دى وحاولى تتعلميها قبل فوات الأوان ( جميع أنواع الخضار أزاى بتطبخ وأزاى بتتعمل تورلى فى الفرن يعنى ههههههه ، الرز والمكرونة بكل أنواعها وأوعى تنسى المكرونة بالبشاميل وأوعى تفكرى تجيبى البشاميل الجاهز من برة بلاش هبل وعك ، الرز المعمر تصدقى سهل قوى وأسهل من الرز اللى بيتعمل العادى يالا أتعلمى ، المحشى بجميع أنواعه ، الجلاش ، الكفتة والكباب وغيرها وغيرها ، وما تنسيش الأكلات الشعبية اللى بيحبها كل الشعب الكشرى الأصفر واللى بعدس بجبة ، البصارة ، شوربة العدس وغيره وغيره ، ما تنسيش الحاجات بتاعت الفطار والعشا أزاى تسلقى بيض وبلاش والنبى البيض النى المقرف ده وأعرفى أزاى تعملى الفول فضحتونا منكم لله وطبعا لسة القايمة طويلة يعنى تبطلى هبل وتهدى كده وتتعلمى علشان ما تبقيش هبله

بلاش حركات مراقبة خطيبك ولا جوزك بلاش الخنقة دى لأنه مرة مع التانية هيفكر يسيبك ويقول يا عم فكك منها دى هتقرفنى وتراقب كل تصرفاتى أنا عايز أعيش حياتى
أيوة أنا معاكى لازم أنتوا الأتنين تبقوا عارفين كل حاجة عن بعض بس معلش لازم يكون فيه شوية حرية وخصوصية وزى ما أنتى بتتخنقى من مراقبتة ليكى إنتى كمان أهدى كده وأعقلى أحسن يسيبك ويرميكى فى أقرب أشارة مرور وترجعى تعيطى ولأن كل الرجالة ما بتحبش حركات المراقبة والحاجات دى


لما تحبى تنصحى واحد بنصايح أعمليها بذكاء وبلاش تحسسيه أنه طفل وأنك زى مامته لأنه هيتخنق منك وحتى لو كلامك صح هيقلب الترابيزة على دماغك فكرى أزاى توصلى له نصايحك بدون ما تحسسية أنه طفل قدامك وإنتى أمه وبتقولى له يعمل إيه وما يعملش إيه

وللحديث بقية

3 comments:

حـــلـــم كــــان said...

اول ماشوفت العنوان قولت اكيد هلاقى نفسى
بس مفيش حاجه هستنا بقايه الحديث يمكن ربنا يكرم

بسنت صلاح الدين said...

انا مش هبله يا جدعان ،احمدك يارب يا خوفى من البقيه يا بسبس

bos bos بسمه عبدالباسط said...

حلم كان

هههههههههههههه

ماشى وربنا يستر فى الباقى بقى


----------------------------

بسنت صلاح الدين

ههههههههههههههههههه

الحمدلله