Monday, July 13, 2009

عن التطفل وأشياء آخرى

بعد سفر ولف أسبوع وحضور عدد لا بأس به من حفلات الزفاف وسط تجمع الناس ومنهم اللى الواحد يعرفه والواحد ما يعرفوش وده بيكون سبب للتطفل الغريب والرخم والغلس أحيان كتيرة
بصراحة الواحد أكتشف أن التطفل طبع أصيل ومميز فى الناس وصعب يتخلوا عنه ولا يسيبوه
ده ممكن يموتوا لو بطلوا تطفل
نبدأ بالتطفل على النت وخاصة الفيس بوك والمدونات وخلافه تلاقى ناس لا تعرفها ولا يعرفوك وداخلين يعلقوا عندك والتعليق فى حد ذاته سواء كان مع كلامك أو ضده مش عيب ولأن الواحد ما بيكتبش لنفسه ولكن العيب بقى فى اللى يدخل ولا تدخل ويفضل يوعظ فيك ويديك نصايح كأنك من باقى عيلته مثلا أو أنكم تعرفوا بعض من زمان أو مثلا يلاقيك كاتب أستاتيوس ولا أى موضوع ويفسره هو بمزاجة أو بمزاجها على أنك بتتكلم عن
نفسك ويدخل يديك شوية نصايح حلوة كده
أو يفهم كلامك غلط ويطلعك مثلا كافر ولا ملحد ويفضل يشتم فيك ويقول أنك كافر وملحد ويفضل يدعوك للهداية
أو حد يلاقيك منزل كام صورة ومفيش بينك وبين الحد ده أى كلام وتلاقية عمل لنفسه تاج على الصور كأنها صورة مثلا ومن غير أى أستذان أزاى حد يدخل على صور حد ويعمل لنفسه تاج
الواحد ممكن يقبل ده من حد يعرفه صاحبه من غير أى أستئذان ولكن حد متعرفوش ويدخل كده على صورك ويعمل لنفسه تاج طيب يستأذن الأول ولا أحنا خلاص بقى الناس بتعتبرنا من بقيه عيلتها
طيب مثلا يدخلوا يعلقوا على الصور يقولوا أى حاجة ولكن يعملوا تاج لنفسهم ده شىء غريب عجيب

وطبعا فيه أمثلة كتيرة على الموضوع ده زى مثلا لما واحدة تكتب مواضيع عن العوانس وعن الوصف ده وعن المواضيع الخاصة بالبنات تلاقى ناس باعته ليها وبتدعى ربنا يرزقها بأبن الحلال على أعتبار أنها كانت منزلة أعلان طالبة فيه عريس طبعا ده نتيجة للتفكير المتخلف اللى للأسف مازال منتشر وأكيد مش كل الناس كده ولكن لسة فيه ناس كده

نيجى بقى لحاجة تانية مهمة قوى وهيا تجمعات الناس فى حفلات الزفاف والخطوبة وما شابه وياسلام بقى على التطفل حاجة تجنن بجد خصوصا بقى لما يكون فيه مجموعة بنات وفيه ناس متعرفش البنات دى يعنى مثلا يكونوا قرايب العريس وقرايب العروسة مش عارفينهم أو العكس أو حتى ناس صحاب أو معارف العروسين وباقى الناس مش عرفاهم يا سلام بقى الستات والرجالة كمان على فكرة ههههههههههههههههههههه يفضلوا يفصصوا فى البنات بطريقة غريبة
وطبعا مع تطور التكنولوجيا اللى لحست دماغ الناس تلاقى الست ولا الراجل من دول مش شايفين قدامهم أصلا وماسكين ليا الموبايل وقال إيه بيصوروا العروسة والعريس وهما نازلين تصوير فى البنات الموجودة علشان يعرضوها فى سوق الجوارى قصدى فى سوق العرايس يوووووووووووووووه قصدى يوروها لأى شاب يعرفوه سواء كان أبنهم ولا قريبهم ولا جارهم ولا يعرفوه من أى مكان على أعتبار أن البنات دول بضاعة ولازم ينقوا ويختاروا ربنا يشفى

وطريقة تانية تلاقى الواحدة من دول جاية بدون أى أستئذان ولا أحم ولا دستور وقاعدة جمب أى بنت وتفضل تفصص فيها وتحقق معاها أحيانا وتقلب فيها وتبص على إيديها ده أهم شىء تشوف فيه دبلة فى ايديها دى ولا دى ولا لا ولما تطمن تكمل بقى باقى التقليب فى البضاعة يوووووووووة قصدى البنت ومش بعيدة كمان تحقق معاها وتفتح معاها محضر كأنها فى قسم شرطة ولا قاعدة مع مخبر

حاجة كمان غاية فى الروعة كلمة عقبالك اللى بتتقال لأى واحد أو واحدة فى أى فرح لية بقى الكلمة دى ممكن تتقال مليون مرة من نفس الشخص فى نفس الوقت وتقريبا فى خلال ساعة أو أتنين أى واحدة أو واحد يسمعوا كلمة عقبالك خمسين مليون مرة لا وكمان لما تلاقى حد بيقولها ليك وهو فى عينه حسرة وزعل لأنك لسة مش مرتبط وبيقولك عقبالك وشوية وهيرفع ايده لربنا يدعيلك بأنه يرزقك بنصك الثانى كأنك لو ما لحقتش نفسك وأتجوزت ولا أتجوزتى يبقى أرتكبتى جريمة ولازم بقى تلحقوا نفسكم أحسن القطر يفوتكم وممكن يدوسكم كمان ده أنا ماكانش داسكم بناء على نظرات وكلام الناس

نيجى بقى لكلام غريب وعجيب بيتقال لأى واحدة فى أى فرح أو أى تجمع للعيلة هو إنتى لية قاعدة كده وده نتيجة مثلا لأنها بتبقى قاعدة فى حالها مثلا مع أهلها أو مع قرايبها فى أى فرح بتتفرج وخلاص
لا لا ده كلام قديم وتخلف ورجعية لازم تقوم تلف لها لفة فى الفرح كده يمكن تطلع لها بعريس ولا حاجة ولا تكعبل واحد فيها وطبعا نفس النصايح بتتقال للشباب اللى بتلاقيهم مالهمش شغلة غير اللف من هنا لهنا فى أى فرح والتفصيص فى كل البنات الموجودة يمكن البضاعة تعجبه ولا حاجة يوووووووووه قصدى يمكن واحدة تعجبه ويا بخت من وفق راسين فى الحلال وسمعونا زغروطة بقى

وياعينى على التخلف والجهل اللى مش هيخلص والتطفل والهبل فى التعامل

وأحسن حاجة ونصيحة منى لأى واحد وواحدة ما تعملوش غير اللى أنتوا مقتنعين بيه وبس وشايفينة صح ومش متعارض مع أخلاقنا ولا عاداتنا وتقاليدنا وسيبكم من كلام وتطفل الناس لأن الناس كده ولا كده بتتكلم
وسمعونا أجدع سلام للتطفل والمتطفلين وتخلف وجهل الناس اللى مش ناوى ينتهى

7 comments:

A.SAMIR said...

من راقب الناس مااااااات هما
في ناس كتير عايشين على اخبار الناس و سيرة الناس
يموتوا لو بطلوا يراقبوا و يتكلموا على غيرهم
عارفة حلهم ايه؟؟
القافلة تسير و الكلاب تعوي

hasona said...

السلام عليكم

التطفل أحد العادات السيئة
لكن أختلف معك في بعض الحالات التي سرديتها هنا - كتعريف للتطفل
حضرتك ضربت مثلا بموضوع التعليق علي أي موضوع سواء للمدون أو علي الفيس بوك أو بأي طريقة أي كانت
حضرتك كاتبة الموضوع وأنشأت المدونة لعرض منهجك وفكرك وتعبيرا علي ما يجود به خاطرك ووضعته في المدونة للعالم كله علي الانترنت وهو مفتوح للجميع
اذا لو أي أحد قرأ الموضوع وعلق عليه بالسلب أو الايجاب لا يعتبر تطفلاً
وإلا من باب أولا أن تدعو ناس معينة لهذا الموضوع أو لهذه المدونة
طبعا أستثني من هؤلاء من يذم أو يعلق بأسلوك قذر أو سافل أو يتفوه بكلمات ليست لطيفة أو يتعرض لشخصية الكاتب بدون وعي ولا سابق معرفة
،،،،
أما بقية المواقف التي سردتيها في مجملها ثقافة مجتمع
ويمكن تكون هذه ميزة وعيب في المجتمع المصري
حيث يغلب لعينا النواحي الاجتماعية أكثر من اللازم
وبعض المواقف تنم عن طيبة وتعامل بالطبيعة فوق العادة

لكن حضرتك أجملتي ولخصتي الموضوع في جملتك الاخيرة منه
وأحسن حاجة ونصيحة منى لأى واحد وواحدة ما تعملوش غير اللى أنتوا مقتنعين بيه وبس وشايفينة صح ومش متعارض مع أخلاقنا ولا عاداتنا وتقاليدنا وسيبكم من كلام وتطفل الناس
لأن الناس في كل الحالات تتكلم

أسف علي تطفلي هذا إن اعتبرتيه تطفل

تقبلي مروري

تحياتي

سمسم said...

الســـــــــــــــــلام عليكم
في كتير ناس فاضية ونا وراها غير الحكي على الناس التانيين
وانا معك طالما الي بنعملوا لا يخالف الدين والشرع ما نهمل هم الناس وحكيهم
لانهم على كل الحالات راح يحكوا

bos bos said...

أحمد سمير

فينك من زمااااااااااااان
وحشتنى تعليقاتك

وفعلا عندك حق

وهو ده الحل المثالى برافو عليك

تحياتى

bos bos said...

hasona

وعليكم السلام

لا طبعا أنا مقصدش أن التعليق سوء كان معايا أو ضدى يعتبر تطفل أنا بتكلم عن الناس اللى بتدخل تشتم أو تقول أى كلام مش كويس وما بتعلقش أصلا على الموضوع

وفعلا أنت قلت الخلاصة وفهمت كلامى اللى هيا

طبعا أستثني من هؤلاء من يذم أو يعلق بأسلوك قذر أو سافل أو يتفوه بكلمات ليست لطيفة أو يتعرض لشخصية الكاتب بدون وعي ولا سابق معرفة

وبالنسبة للموقف الثانى فعلا هيا ثقافة مجتمع ومش هتتغير للأسف والأحسن كل واحد يعمل اللى مقتنع بيه وبس

وبعدين أسف إيه بس حضرتك مش متطفل وأنا لو ماكنتش عايزة حد يعلق عندى كنت قفلت المدونة وعملت دعوات لناس معينة بس

لا طبعا حضرتك تشرفنى فى أى وقت وتقول اللى أنت عايزة ده مش تطفل ابداااااااا

تحياتى

bos bos said...

سمسم

وعليكم السلام

فعلا هما ناس فاضية وطالما أحنا ما بنعملش حاجة غلط ولا متعارضة مع الأخلاق والعادات والتقاليد يبقى ما يهمناش من حد

تحياتى

عمادخلاف said...

اكتر شعب متطفل فى العالم هو الشعب المصرى بجد شعب يحب يعرف كل حاجة واى حاجة
لكن فى سؤال محيرنى
انتى على طول نزلة طالعة مفيش وقت خالص تقعدى بجد صعبتى علية
تحياتى لحضرتك ارجو التواصل
انا عندى مدونتين واحدة للمقالات والتانية للقصة القصيرة