Thursday, December 13, 2007

مشاكل ليلى

كان بداية كلامى فى مواضيع ليلى تاج أنا ليلى
ودلوقتى هتكلم فى حاجة تانية خاصة برضة بليلى وهيا قهر ليلى واللى بيتضمن حاجات كتير منها أستغلال ليلى والقسوة عليها والغيرة منها ومن نجاحها
على الرغم من كل التطور اللى موجود حوالينا وكل حاجة بتحصل وكل التقدم الا أن برضة لسة قهر ليلى موجود ولسة التفكير الذكورى موجود وعايش بينا وبيتحرك وبياكل وبيشرب
قهر أدم لحواء مازال موجود
أستغلال أدم لحواء ، القسوة ، الغيرة منها ومن نجاحها
تعمد الغاء شخصيتها وتضييع مستقبلها شىء بشع جدا بقى موجود بصورة كبيرة قوى
كتير بنلاقى فى حياتنا أسر كتير فيها بنات وولاد ونلاقيهم فرحانين قوى بالولد وبيعملوا له كل حاجة وما بيرفضوش له طلب وتكون كل حاجة متاحة له من سبل الراحة لحد الوقوف جمبه علشان يوصل لاعلى المراكز ويشجعوه على الألتحاق بحاجات كتير علشان يزود خبراته
ولكن تعالوا بقى نبص للبنت أيه اللى بيحصل معاها
مش مهم تدرس أيه أهو أى حاجة والسلام وأهلها مش مهتمين أصلا بيها وحتى لما تحب تدرس حاجة كويسة أو تكون أحسن أهلها بيرفضوا ده وبيحسسوها أنها مهما عملت كل ده مش مهم مهما درست حاجة كويسة ومهمة أو حاجة عادية مش فارقة كده كده أخرها فى بيت واحد هيتجوزها
لو حبت تنمى مواهبها فى أى حاجة تتقابل بسخرية كبيرة قوى من أهلها ومحدش يقف جمبها
القهر بيبدأ من البيت من الأب وبعدين الأم وبعدين الأخوات الولاد وبعد كده جوزها
وكل واحد أهله بيدربوه على كده من صغره على أنه الآمر الناهى وأنه يقعد يحط رجل على رجل وأخته تخدمه وهو مايشيلش كوباية حتى من مكانها وللأسف هو بيتربى على عادات غلط وبتكبر معاه لحد ما يتجوز وتتنقل سيطرته على مراته
بجد مش عارفة نعمل أيه فى التفكير الذكورى اللى مش عايز ينتهى ده
ملايين من البنات طموحها ومستقبلها بيضيع بسبب أهلها
وبسبب غيرة أخوها أو جوزها
للأسف مجتعمنا لسة ذكورى وقليل قوى لما نلاقى ولاد وشباب فاهمين طبيعة المعاملة الصح للطرف الآخر
أمتى هنتغير أمتى

12 comments:

smraa alnil said...

كنت لسة هقولك ان ليلي مش مجبورة علي حاجة
او انه خدت حقها تالت ومتلت

بس لما جيت ابص للي بيحصلي واللي بيحصل لغيري لقيت انك صح مية في المية

عندك مثلا ابويا

شايف ان نجاحي مهمش
ويعني ايه تربي رياضية
دي ثني مد
و 1و 2 و3

وان تعييني معيدة فيه دة شئ عادي ولابد منه
اصلها هايفة

وان اي نجاح ليا بينسبه لنفسه

منتهي القهر
ومن كام يوم كنت بتكلم مع استاذ مساعد في الجامعه

دكتورة يعني

ولقيتها بتقولي ان جوزها بيغير منها لما تعمل اناج علمي وانه بيقف ضدها عشان بيغير منها مش عايزها تنجح

لحد النهاردة رغم انا بقينا منفتحين اوي

لكن البنت مش المفروض تخرج

البنت مش المفروق تتكلم في التلفون البنت شئ حيواني مش لازم يكون له صوت

جايز اكون بتكلم غلط
بس علي الاقل دة بيحصل معايا


لنا الله يا ليلي

عمر بوك ستورز said...

كل ما تقرؤه تحت سقف واحـد

بجد بجد ... زرورنـا تجدون ما يسركم
قائمة كبيرة من شتى الكتب وبأسعار لا تقبل المنافسـة
أقل الأسـعار

بين أيديكم

bos bos said...

samraa alnil

دى أكبر مشكلة أنه مهما البنت أو الست تنجح فى حياتها العملية برضة أهلها شايفين أن ده حاجة مش مهمة وأنها مهما عملت وهتعمل كل ده بدون فايدة
لكن تعالى بقى بصى للولد لو خد أى مؤهل جامعى حتى لو بتقدير مقبول ولو فضل 7 أو 8 سنين فى الكلية يبقوا طالعين بيه السما
والبنت اللى ممكن تنجح بتقدير ومن غير ما تعيد ولا سنه ولا كأنها عملت حاجة
وكمان لو حبت تكمل دراستها بتقابل ده بأستنكار
كتير من الأهل بيجبروا البنت تدخل أى كلية عادية حتى لو كان مجموعها يدخلها أحسن الكليات
وكمان كتير من ساعة ما بتكون فى ثانوية عامة يجبروها تدخل أدبى مش علشان حاجة الا حاجة واحدة لأن مخها مش هيستوعب الحاجات الرياضية من وجهه نظرهم
طبعا الأدبى مش عيب ولا وحش وكل واحد له ميوله لكن دايما الناس شايفة أن العلمى ده معجزة وأن الأدبى حاجة سهلة وهايفة
ولازم البنت تدخل أدبى وخلاص والولد العبقرى يدخل علمى حتى لو نجح بمجموع خمسين فى الميه يعملوا له فرح

ولو حتى خد دبلوم ثلاث سنين بيحسسوه أنه جاب الديب من ديله وعمل اللى ما يعملش

يابنتى التطور اللى حوالينا برضة لسة ماآثرش فى الناس الناس بس حست بالتطور فى أن يكون عندهم موبايل وكمبيوتر ووصلة نت ودش وغيره وغيره
ولكن للأسف لسة تفكيرهم عقيم وتفكير خلص من زمان

بس للأسف أحنا عايشين فى المجتمع ده ولازم نحاول نثبت نفسنا مهما حصل

bos bos said...

عمر بوك ستورز

أكيد هنزوركم
وربنا يوفقكم

لولا said...

البنت مسيرها لبيتها وجوزها
الجملة دي بسمعها كتير اوي وسمعتها كتير اوي من ناس قرايبي لما عرفوا اني حولت من تربية لاداب اعلام

اعلام هتعملي اية بالاعلام
يا جماعة بحبة
يابنتي احنا عاوزين مصلحتك مش هتعرفي تشتغلي في الاعلام
لية انا بحب المجال دة وحاسة اني هبقى كويسة في

يا بنتي ادخلي تربية مجالها في الشغل حلو
بس انا عاوزة اعلام
خلاص براحتك احنا هنقولك كلمة البنت مسيرها للجواز
كنت بتنقط من الكلمة دي
وخدتها تحدي ليهم
وعمي يقولي ادخلي تربية ونفتحلك حضانة قال حضانة اقال
اما بابا اداب اية الي انتي عاوزة تدخليها
في حد يسيب تربية ويدخل اداب
يا بابا بحب المجال ده
وبعد اقناعات وافق
بس لما شاف اسمي مكتوب في جريدة بعد كدة
بقى طاير من الفرح
وانا بقى كن سعيدة جدا لاني انتصرت على كلامهم وافاكرهم
مش عاوزة اقولك اني كنت فرحانة فيهم كمان

مفيش غير امي هي الي كانت بتشجعني

يعني باختصار مهما قالوا ومهما عملوا لازم نحقق نفسنا ونثبت ان احنا احسن من ميت راجل وقادرين نعتمد على نفسنا


لازم نتنصر على المجتمع الذكوري المتعفن
ولازم يعرفوا ان احنا نصف المجتمع مش مهمشين

والبنت زي الولد ماهيش كمالة عدد
زي قالت سعاد حسني
الله يرحمها

truelove said...

والله ليكي حق يابوسي تفتكري لما يكونالاب والام بيبصوا كدهلبنتهم تفتكري الي هيبقى جوزها هيعاملها ازاي يوم مانقدر نطلع البنت من ارستها مرفوعة الراس معتزين بيها وبكرامتها وراسها مفتوحة هنلاقي الكل بيحترمها لكن طول ما التخلف بيبدأمن جوه لاعمرنا هنقدم ولا نأخر حاجة تحرق الدم وتقصر العمر

bos bos said...

لولا

فعلا لازم نثبت نفسنا ونثبت وجودنا فى المجتمع اللى أحنا عايشين فيه
وكل اللى حصل معاكى حصل مع بنات كتير قوى
بس فيه بنات مابتقدرش تقاوم وبيضيع مستقبلها وبنات تانية بتفضل تقاوح

بس لازم فعلا ما نسيبش مستقبلنا يضيع

تحياتى لكى

bos bos said...

truelove

عندك حق والله
لأن فعلا لو الأهل عرفوا قيمة بنتهم وقدروها
كان جوزها هو كمان عرف قيمتها لكن للأسف العيب بيبقى من جوه الأول
بس أكيد فيه حل

تحياتى لكى

Eman & Yasser said...

الأسرة هي البداية للتغيير: الأسرة التي تربى أولادها وبناته علي اساس المساواة وتعتمد علي المشورة بين أفرادها تكون أسرة ناجحة

bos bos said...

eman@yasser

فعلا كلامك صح البداية من الأسرة

Eman & Yasser said...

السؤال التالى هو: كيف نغير المفاهيم القديمة لدي الأسرة المصرية؟
كيف نجعل الأسرة المصرية تفكر بعقلية هذا العصر؟
المساواة - المشورة - الأهتمام بتربية وتتعليم البنات - والأحترام المتبادل داخل الأسرة

bos bos said...

eman@yasser

أكيد كل الكلام اللى ذكرتوه المفروض يتم بس برضة فاضل وقت طويل عما كل ده يتحقق ولكن لازم نبدأ خطوة خطوة