Monday, June 4, 2007

غمض عينيك


كلنا أكيد بنام ومهما طال وقت سهرنا لكن فى الأخر بنام وحتى لو النوم ده كان لمده نص ساعة لكن بنام
فيه حياه غريبة يمكن محدش واخد باله منها حياه بنشوفها بين النوم والصحيان وهيا حياه العين ايوة حياه العين
كلنا لما بنيجى ننام بنغمض عينينا فيه ناس طبعا بتنام على طول وفيه ناس لا لو كنت من الناس اللى مابتنامش على طول أهلا بيك معنا خليك معايا للأخر ولو برضة كنت بتنام على طول خليك معايا
لما بغمض عنيا بحس فعلا بحياه تانية جوه فى الأول مش بتشوف غير سواد لكن ركز شوية وعيش شوية وفكر فى كل حاجة وأحلم وصدقنى هاتلاقى حياه جوه العين هاتلاقى ناس ماشية ناس أنت تعرفهم وناس ماتعرفهش فكر فى أى حاجة وتوقعها وصدقنى هتشوفها فى حياه العين
أنا فعلا بعمل كده ولأنى ما بنامش على طول ودايما أفضل ساعة أو أتنين أو أكتر عما أنام علشان كده بحس قوى بحياه العين أمبارح لما جيت أنام دخلت جوه حياه العين كالعاده وانا على فكرة مش من الناس اللى بتتفائل أو بتتشائم بسماع صوت أى حيوان أو طير لكن معرفش ليه فيه صوت واحد بيخلى قلبى مقبوض معرفش لية فعلا مع عدم أعتقادى بده المهم وأنا فى الحياه دى سمعت صوت الهدهد بجد طلعنى من حياه العين فجأه على صوته
وبجد فيه حاجة غريبة فى الصوت ده مع أنه حلو بس معرفش لية بعد ما بسمعه قلبى بينقبض جايز أكون فعلا مضايقة من حاجة أو بفكر فى حاجة مضيقانى المهم طلعت من حياه العين بعد صوت الهدد ده وفضلت أفكر فى حياه العين وقلت لازم أعرفكم الموضوع ده وأشوف رأيكم فى الحياه دى
نرجع لحياه نوم العين تانى وطبعا الحياه دى محدش يحس بيها أو يقدر يعشيها الا الناس اللى بتعانى من الأرق والنوم بصعوبة بعد عده ساعات من الدخول للسرير فعلا حياه العين حياه جميلة جدا ورائعة ياريت فعلا تجربوها وأعرف آرائكم
-------------------------
تحديث
جاتلى فكرة مجنونة وعايزة أنفذها والفكرة مش هتنفع من غيركم طبعا اللى شاف الموضوع بتاع غمض عينيك والناس اللى ردت عليا ياريت اللى فعلا بيعيش وبيحس بالكلام اللى أنا قلته يبعت ليا على الأيميل علشان أعمل معاه حوار وأعمل أجزاء تانية للموضوع
وطبعا اللى يبعت يقول هو مين ويسيب ليا أيميله وعنوان مدونته علشان اللخبطة بس معلش أستحملونى

-----------------------------
تحديث للمرة الثانية
لحد دلوقتى عملت حوارين والثالث بيجهز وأتمنى أن كل الناس تشاركنى فى الحوار ده وتبعتلى
تحياتى لكم

34 comments:

انتظار مؤقت said...

انا قعدت ساعه اكتب و بعدين اتمسح باين ..الخلاصه حغمض و اشوف و اقولك

bos bos said...

أنتظار مؤقت

ولا يهمك ولو عايز تكتب تانى أكتب ومعلش على تعبك اللى راح
وأنا أكيد مستنية خلاصة التجربة
تحياتى

bocycat said...

انا زيك مش بنام بسرعة بفضل بالساعات على بال مانام بس اما البال بيكون مشغول وتعبانة من التغكير فى حاجات مضايقاكى برضه بيجى لك احساس نوم العين ده ؟ اعتقد ان ده بيحصل اما بيكون البال رايق عشان نقدر نستمتع باللى حنشوفه او باللى احساسنا حيودينا له .. على فكرة المرة دى البوست جميل جدا

bos bos said...

bocycat

ازيك بجد أنا سعيدة من ردودك على مواضيعى وفعلا أنا لما بكون مش مضايقة بيكون أحساس نوم العين ده أفضل منه لما بكون مضايقة
على فكرة أتا مبسوطة جدا أن البوست عجبك
تحياتى

ياسمين said...

حياة العين دى هى احلام اليقظة
وهى الدليل على ان العقل يعمل ويتخيل ويفكر ويتأمل حتى لو لم نكن نرى بأعيننا
ولو حد ضرير برضه بيكون له خيال
تحياتى

Carol said...

:)
nice post
فكرته غريبة و جديده
شدتني الفكرة
و شدني لأسم البلوج جدا
تحياتي

قلوب حائرة said...

بوس بوس حياة العين حياة متعبة قوي انا مجربها ونفسي جدا بجد احط دماغي على المخدة كده واسحب في النوم ياريت ابقى كده انا وانتي وكلنا احسن دي حاجة متعبة ولو هنقعدج كده علطول ربنا يستر علينا تحياتي

bos bos said...

ياسمين

ممكن تكون هيا دى أحلام اليقظة وممكن تكون حاجة تانية لأن فى أحلام اليقظة الواحد بيحلم وهو صاحى وفى أى وقت وهو مفتح عينه ولكن حياه العين دى الواحد بيغمض عينيه وبيحلم
ممكن تكون دى هيا دى
وممكن دى حاجة ودى حاجة
على العموم تحياتى ليكى على كلامك الجميل

bos bos said...

carol

مرحبا وشكرا على الزيارة الجميلة ومبسوطة أن الفكرة عجبتك
تحياتى

bos bos said...

قلوب حائرة

هيا فعلا متعبة بس ساعات بتكون لذيذة ومثيرة أنا بجد نفسى زيك أحط دماغى أنام
ربنا يرحمنا ويارب تحطى دماغك على المخدة وتنامى على طول
تحياتى

mesh2dra said...

السلام عليكم

بسبس

انتى تقصدي بحياه العين
ان الواحد يألف فيلم فيه الحاجات
اللي نفس الواحد انها تتحققق

هى دى اسمها حياة العين
؟

لو صح كده
يبقي انا استاذة وحعمل دراسات
في تلك الحياة

جميل موضوعك
وجديد بجد

تقبلي تحياتي وسلاماتي واحتراماتي
:)

عصفور المدينة said...

مش باعرف لو عملت كدة حانام كان فيه رواية قريتها لحمدي الكنيسي زمان كان مش عارف ينام وبعدين قعد يعد
1.2.3.4.5.6.7......

نص الرواية أعداد دايما افتكره لو جالي أرق وعدين أجيبها من قصيرها وأشوف حاجة اعملها لحد بعد الفجر

bos bos said...

mesh2dra

سعيدة بزيارتك ليا ومفيش مانع يالا نبدأ تأليف ده أنا كمان هعمل مجلدات
مبسوطة أن الموضوع عجبك قوى
تحياتى

bos bos said...

عصفور المدينة

دى نعمه والله أنك تنام على طول أحمد ربنا عليها
تحياتى لك

Just a Reader said...

أعتقد دي أحلام اليقظة فعلا...لما يجيلك أرق كده اقري أي قرآن ولو سور قصيرة أو ابدأي في التسبيح هتلاقي نفسك هديتي ونمتي. ممارسة رياضة المشي برضو هتفيدك أوي بتهد الواحد وتخلية يتقتل في النوم:).

bos bos said...

just a reader

ولو كنت بعمل كل ده وبرضة مابنامش
سيبك أنتى أحسن حاجة أغمض عينى وأفضل أحلم وأسرح مع نفسى لحد ما أتهد وأنام بس بعد مده طويلة
تحياتى

sendbad said...

وهاتلاقي احلامك بتكبر قدامك واحزانك وانت بتدفنها بعيد عنك وذكرياتك الجميلة وحبيبك اللي سابك جاي يقعد معاك ويفضفض وممكن تسمعي صوته وهو بيكلمك
اصلي انا مجرب الموضوع ده ومحترف فيه جدا
تحياتي

david santos said...

Alive the people of Palestine, against the fascism of Israel and the terrorism of the North America

Peace for Palestine

bos bos said...

sendbad

فعلا بشوف كل أحلامى وأحزانى
بس أنا ملاحظة أن الموضوع ده فتح لكم المجال لمواضيع كتير ممكن فعلا أعمل سلسلة للموضوع ده وأتناقش معاكم وأحط رأى كل واحد منكم فيه أنتوا فعلا فتحتوا ليا المجال ده وأنا هبدأ
تحياتى

bos bos said...

david santos

صدقنى بجد أنا لغتى مش قد كده وفعلا مش فاهمة معنى كلامك
بس اللى لاحظتة أنك بقالك مده ما جيتش هنا
تحياتى

bos bos said...

ياريت يا جماعة كل الناس اللى ردوا هنا وفعلا بيعيشوا الحياه دى ياريت يبعتولى على أيميلى علشان أعمل معاهم حوار عن الموضوع ده وأعمل أجزاء تانية للموضوع هنا وطبعا علشان أقدر أعرف أيميلهم وأكلمهم وأعمل الحوار

الأيميل
rohbosbos@gmail.com

ضد الظلم said...

فعلا حياه العين من اروع ما يكون بس عشان انا واحد بيتعزب لحد ما النوم يجيلى بفضل من سعتين لثلاثه ساعات بحاول انام بفضل اخترع قصص واعيش انا بطلها

سلام

bos bos said...

ضد الظلم

كويس قوى أنت كده زيى وأيه يعنى لما نخترع أهو بنحلم مش أحسن ما نتجنن من عدم النوم
تحياتى

sendbad said...

تحياتي لزيارتك بس انا لحظت حاجة انك بتكلميني علي اني بنت انما انا اسمي سندباد عمرك شفتي سندبادية

bos bos said...

sendbad

معلش أعذرنى على الغلطة دى بجد مش عارفة أقول أيه
تحياتى لك وشكرا على زيارتك وكلامك

mesh2dra said...

السلام عليكم

كده اسرع بالنسبالي

ده ايميلي
mesh2dra@hotmail.com

وأنا مش قادرة
طبيعي يعني ..واضح :D

واسمي سمايل

ضيفيني واعملي الحوار اللي انتى عاوزاة

سلااااماتي

A.SAMIR said...

بس بس
انتي بتتكلمي بجد؟
يعني الحكاية دي علمية ولا ايه؟
يعني حياة العين دي مصطلح علمي موجود في علم النفس وكدة ولا ايه؟
معلش وضحي لي لأن الموضوع شيق جدا اصل انا منهم من بتوع النوم بياخد وقت معاهم
بس انا بيتهيأ لي ان دة ليه علاقة بالعقل الباطن وبتاع مالوش دعوة بالعين خالص
حلو قوي الموضوع دة يا بس بس
تحياتي ليكي واعذريني على التقصير والف الف شكر ع السؤال

bos bos said...

mesh2dra

شكرا على ردك السريع
علم وينفذ
تحياتى

bos bos said...

a.samir

حمد الله على السلامه
ندخل بقى على الموضوع أنا عن نفسى معرفش الموضوع ده علمى ولا لا بس تصدق هبحث فى علم النفس علشان أعرف
وحتى لو مش موجود هطلع أنا النظرية وأعمل براءة أختراع أيه منفعش ههههه
هيا فعلا الحكاية ممكن تكون مرتبطة بالعقل الباطن بس برضة مرتبطة بالعين لأننا بنعملها وأحنا مغمضين وبنعيش جواها
تحياتى لك وسعيدة بزيارتك

مادو said...

هنا القاهرة معك من لا ينام ابدا سريعا
افتكر ان معظم الناس كده ليه بقى ؟
الله اعلم ... مش عارف
أنا بقى مش باعمل كده لكن بافكر في مليون حاجة و ساعات كتييييييييير بينزل الوحي و انا هاموت و انام فخوفا على الجماهير باضطر اقوم انور النور و اكتب لغاية ماخلاص بح و ارجع احاول انام تاني
بنتعب و الله

bos bos said...

مادو

فعلا معظم الناس مش بتنام بسرعة معرفش لية وخصوصا الجيل بتاعنا أو جيل الشباب بس احسن حاجة أن الواحد يستغل الوقت فى حاجة مفيدة او حتى يحلم زى ما أنا بقول
شرفتنى زياتك
تحياتى لك

el condor said...

سلام من المغرب أرحب بك صديقة وهذه مدونتي


http://el-condor.piczo.com

&

elcondorito.blogspot.com

bos bos said...

el condor

أهلا بك معنا وشرفتنى زيارتك وسعدت بها وأكيد هزور مدونتك
تحياتى

cuteE DOD said...

الاحلام ...ف اى وقت لازم نحلم
انا عن نفسى بحلم وانا نايمه وانا صاحيه ف كل وقت..وانا مغمضه وانا مفتحه
بجد كلام ف قمة الروعه
تقبلى مرورى\\\\\\