Friday, June 8, 2007

الضمير

كتير قوى بسأل نفسى هو أيه الضمير ده هو الضمير ده حاجة موجودة جوه كل الناس ولا ده بقى حاجة نادرة مش موجودة للأسف فيه ناس فعلا ما عندهاش ضمير وفيه ناس عندها
بس الأول هو ايه تعريف الضمير هو فيه تعريف محدد له ولا تعريفه نسبى بيختلف من شخص لشخص ومن بلد لبلد على حسب العادات والتقاليد
الضمير من وجهه نظرى هو الصوت اللى دايما بيناديك الصوت اللى بيكون طالع من جواك ويقول لك ما تعملش كده وأعمل كده وهو كمان اللى بعد تصرفات كتيرة منك بيقول لك ماكانش لازم تعمل كده أنت غلطت أو يقول لك لية ما عملتش أكتر من كده فى الموقف ده كان ممكن تكون أحسن وهو الحاجة اللى دايما بتأنبك على كل شىء بتعمله هو الرقيب على كل تصرفاتك
وأعتقد أنه فيه تعريفات كتيرة للضمير على حسب مفهوم كل واحد له
ولكن هل فعلا فى زمنا ده بقى فيه ضمير ولا خلاص راح زى ما حاجات كتير راحت وهو الطبيعى يكون الواحد عنده ضمير ويحاسب نفسه ولا أيه أصل فيه ناس ما بتحاسبش نفسها خالص وسايبة نفسها كده
هل فيه درجات للضمير يعنى ممكن يكون فيه حد عنده ضمير زيادة عن اللزوم
ضمير بيحاسبه على كل حاجة عملها سواء كانت صح أو غلط
أنا عارفة أن الواحد لازم يكون عنده ضمير لكن لما الحكايه تكون زيادة عن الحد بتكون فعلا مشكلة لما تلاقى ضميرك بيوجعك على كل حاجة صح أو غلط بتلاقى نفسك بتحاسب نفسك على كل حاجة صح أو غلط والمشكلة أنك ممكن بتعمل حاجات هيا مش غلط لكن بسبب ضميرك الصاحى قوى بتحس أنك مقصر ويفضل ضميرك يأنبك
أنا عارفة أن موضوع الضمير ده كبير قوى ومش هيكفيه موضوع واحد علشان كده عايزة أعرف آرائكم فى الموضوع ده
--------------------------------
ملحوظة
بالنسبه لموضوع غمض عينيك لما تكمل كل الحوارات هنزلها كلها فى الجزء التانى من الموضوع

21 comments:

sendbad said...

الضمير الانساني زيه زي العادات والتقاليد والاخلاق اللي بتختلف من مكان لمكان وحتي من زمان لزمان الضمير موجود مع الانسان في كل وقت وفي كل لحظة في ضمير صاحي محترم بيعذب صاحبه علي اي خطا حتي ولو كان بسيط جدا وضمير مالوش لازمة ويمكن كمان بيشجع صاحبه علي فعل اي حاجة وحشة ويقدمه ليه المبررات للخطا في حاجات كتير ممكن تموت الضمير اولها واهمها البعد عن الله لو مفيش ايمان قوي يبقي مفيش ضمير تاني حاجة الظروف المحيطة بالانسان وطريقة التربية واعتقد ان انعدام وجود الرمز او المثل لاعلي حاليا ده اللي مدينا احساس بان الناس مبقتش عندها ضمير وراح الضمير زي ما اراحت حاجات حلوة كتير مننا هو موضوع كبير زي ما قلتي
تحياتي لمواضيعك الجميلة الهادفة
شكرا

ibn nasser - ابن ناصر said...

هههههه
ضمير
ضمير مين لقد اصبح ذكري

تحيان

bos bos said...

sendbad

أشكرك على ردك اللى فعلا أضاف كتير لموضوعى
والموضوع فعلا كبير لأن فعلا الضمير ما بقاش موجود وموضوع واحد مش هيكفى
تحياتى

bos bos said...

ابن ناصر

لية التشاؤم ده أنا معاك أن الضمير قل قوى بس هو لسة موجود
تحياتى

mesh2dra said...

السلام عليكم

بسبسة
أنا رديت على أسئلتك
عن حياة العين

لو عاوزة اى استسارات اخرى
أنا في الخدعة:D

سلاماتي

ضد الظلم said...

لا الضمير موجود بس فى فرق فى ضمير كل واحد
يعنى مثلا الضمير الصاحى يفضل يحزرك اوع تعمل كدة ويحاول يمنعك من حدوث شىء خطاء
والضمير الحى
هو الى بعد ما بتعمل الخطأ بيفضل ينغص عليك حياتك ويحاول يخليك تصلح الى عملتها
الضمير الى بيستهبل
بعد ما بتعمل الخطا بيفضل يقولك ما الناس كلها كدة جت عليك

موضوع رائع وديما بتتحفينى بمواضيعك بجد تحياتى

قلوب حائرة said...

هااي عليكي يا بوس بوس هو انا عندي الضمير في علم النفس اسمه الانا الاعلى اللي يا عيني تعبان ما بين الهوا والانا الهوا عاوز يعمل اللي نفسه فيه والانا يقوله لالالالالالالالالالالالالالالالا يجي مين ضايع في النص عم الانا الاعلى اللي قعد يشوف ينفع ده يتعمل ولا لا او انه يأجله شويا المهم كده وبعيد عن الكلكعة دي ان الضمير بيكون بصورة وسطية عند الشخصية المتدينة الشخصية الوسطية اللي بيكون ضميرها نابع من تعاليم الله وسنة رسوله

bos bos said...

mesh2dra

وعليكم السلام يا قمر
أنا شفت الحوار وعجبنى جدا وهنزل كل الحوارات قريب وأكيد لو فيه حاجة هبعت لك
سلام

bos bos said...

ضد الظلم

عجبتنى حكاية الضمير اللى بيستهبل دى أصله للأسف موجود كتير قوى الأيام دى
تحياتى

bos bos said...

قلوب حائرة

بجد أسعدنى جدا توضيحك لموضوع الضمير من علم النفس وكويس أنك وضحتى الموضوع
شكرا على كلامك
تحياتى

A.SAMIR said...

بصي يا ست بس بس
الضمير بتاع كل بني ادم بيختلف عن البني ادم التاني
كل واحد بيعمل اي حاجة حتى لو كانت غلط....ضميره بيصور له ان دة عين الصواب
هتستغربي لو قلت لك ان الحرامي قد يكون عنده ضمير وبيصور له ان دة حقه وانه بياخد حقه من الاغنياء اللي وصلوه للمرحلة دي
الموضوع زي انتي ماقلتي موضوع كبير قوي
تحياتي واحتراماتي

تامر حسين said...

لالالالا ده تشاؤم اويييييي
بس موضوع حلو والله
تحياتي

el condor said...

لا أريد أن أتيه داخل متاهات تعريف الضمير
:ولكن باختصار أقول
إن الضمير هو ذلك الرقيب على نوايانا وسلوكنا وأفعالنا ولكن درجة اليقظة عند هذا الرقيب تختلف من شخص لآخر بل نجده نائما عند كثير من الناس
وشكرا على الموضوع

http://el-condor.piczo.com

bos bos said...

a.samir

هو فعلا الموضوع كبير قوى قوى
وزى ما قلت بيختلف من واحد لواحد وفعلا الحرامى بيكون شايف نفسه صح
تحياتى

bos bos said...

تامر حسين

مش تشاؤم ولا حاجة بس الناس فعلا ما بقاش عندها ضمير ونسيوا أصلا أنه فيه حاجة أسمها ضمير

تحياتى وشكرا على زيارتك

bos bos said...

el condor

فعلا هو نايم عند ناس كتير
ودرجات اليقظة بتختلف وده راجع لحاجات كتير من العادات والتقاليد ودرجة التدين وأختلاف الثقافات وهكذا
أسعدتنى زيارتك
تحياتى

الريس said...

الضمير الحاجاة اللى مش بتخليك تستمع اووى بالحاجاة اللى مش صح وانتا بتعملها

bos bos said...

الريس

كلامك مظبوط جدا
وشكرا على زيارتك
تحياتى

انتظار مؤقت said...

انا دايما بشوف..بعد النظاره الجديده ...بشوف ان الضمير ده هوه فطرة الانسان و البراءه الي كان عليها قبل ما الدنيا تلوثه و الفطره دي مزروعه جوه الانسان و هوه دايما في حالة مقارنه بين الفطره النضيفه البريئه و الطبيعه الي اصبح عليها و بيحاول يوفق نفسو بين الاتنين ..مش عارف ؟انا اضن كده
تحياتي

bos bos said...

أنتظار مؤقت

فعلا الفطرة أحسن بكتير من كل الملوثات اللى جت عليه
تحياتى

cuteE DOD said...

فعلا انا من الناس الى ضميرها على طوووووول بحاسب نفسى ع الصغيره قبل الكبيره ودا طبعا مسبب لى ازمااااااااات
لكن احيانا طبعا يكون مهم جدا بالنسبه لى ..وبيرشدنى للصح
وتعيرفاته طبعا بتختلف من انسان لانسان

تقبلى مرورى\\\\\\