Tuesday, May 12, 2009

جربت تبص فى المراية

جربت تبص فى المراية وتقول هو مين ده اللى فى المراية ؟
جربت تحس أنك عايش حياه غريبة عجيبة وأسلوبها غريب قوى ومش عارف تطلع منها وبتحاول بكل طاقتك تخرج وما تعرفش ؟
الناس كلها بتتهمك بأنك بتتدلع وبأن مفيش فيك حاجة ولكنهم مش فاهمين حاجة ولا حاسين بيك أصلا ولا عارفين إيه اللى خلاك كده لأنهم لو فهموا هيقدروا وحتى لو فهموا مش هيقدروا لأن محدش هيحسك الا لو كان جرب وشاف اللى أنت شفته
لما فجأة تلاقى الكل ضدك وبيطلبوا منك حاجة وأنت مش قادر عليها ومش بمزاجك وهما برضة مش فاهمين
لما فجأة تلاقى الكل ما بقاش معاك وبعد عنك وللأسف لو فهموك مش هيعملوا كده وأنت تعبت من كتر الشرح وتوضيح اللى جواك واللى تاعبك واللى خلاك كده وبرضة مش قادرين يفهموا وفيه منهم بيقفل ودانه أصلا وما يسمعش وفيه بيسمع وكأنه ما سمعش وفيه بيسمع وبيفهم وبرضة بيتهمك بأنك السبب فى اللى أنت فيه
لما فجأة تلاقى الكل أتخلى عنك هتعمل إيه ؟
لما تلاقى نفسك بتثق فى حد وعمال تحكيلة وبترتاح لكلامك معاه وفجأة تلاقية أتقلب عليك بدون سبب يبقى ده أسمه إيه ولية من الأول سمع ليك وخلاك تتكلم ما كان يقول من أولها أنه مش عايزة وش وخلاص ولكن ليه كده فعلا حاجة بشعة جداااااااااااااا بعد ما تثق فى حد وتتكلم معاه وترتاح فى الكلام وفجأة تلاقية بيعاملك وحش وبدون أى سبب أو توضيح هو كده وخلاص
لما تكون طول عمرك بتقف جمب الناس وتساعدهم وبدون ما تستنى كلمة شكر ولا مقابل لده وأول ما تتحط فى موقف وتكون محتاج حد جمبك ما تلاقيش والكل يتبخر ولا كأنهم عايشين هتعمل إيه ساعتها ؟
أسئلة كتيرة قووووووووووووى ممكن نعمل منها حكايات ولكن كفاية دول ومستنية ردكم
والكلام ده فكرنى بأغنية شيرين المراية
هتعمل إيه لو نمت يوم وصحيت بصيت وشفت نفسك فى المراية بكيت جواك سؤال تصرخ تقول أنا مين أنا مين أنا زى ما أنا ولا أتقسمت أتنين
وبعدين قول ياللى فى المراية فهمنى إيه الحكاية فرحان تعبان مرتاح ندمان حاجات كتير فى حياتنا أتسببت فى حيرتنا وأدينا عايشين راضين جايين ورايحين
هتعمل إيه لو نمت يوم وصحيت ولاقيت أقرب ما ليك فى الدنيا مش حواليك هو أنت مين اللى عمل كده فيك مش أنت ولا فيه حد غمى عنيك

11 comments:

صيدلانيه طالعه نازله said...

يووووووووووه طول ما انتى عايشه فى الدنيا حتشوفى من ده كتيييييييير
المهم تتعلمى انك ماتبيعيش لحد مش عايز يشترى
لانك اما بتحبى حد و تثقى فيه و تحكيله اسرارك بتحسى انك خلاص مش بتقدرى تستغنى عنه و ده بيبقى مشكله زى الادمان
ربنا يهديكى و يريحك يا بسبوسه

قلب ينبض بالحب said...

عارفة هعمل ايه هرضى بالي قسمه ليا ربنا وهتعلم منه واشوف ايه الحكمة من كده كل شي ربنا قدره لينا ليه حكمة من وراها والا مكناش اتحطينا فيها ، يبقى نرضى ونحتسب وربنا هيعوضنا خير اصل مهمها قعدنا وسالنا نفسنا ليه بيحصل كده لينا مش هنغير في الواقع شي ياحبيبتي يبقى نريحها من الاول ومش نتعبها بالستاؤلات ونرضى بالي ربنا كتبه ونتعلم منه دمتي بكل الخير

بسمه عبدالباسط said...

صيدلانية طالعة نازلة

فعلا الواحد طول ما هو عايش ياما هيشووووووووووووووووووووف
وعندك حق فى كلامك

وشكرا ليكى يا جميل

بسمه عبدالباسط said...

قلب ينبض بالحب

عندك حق فى كلامك يا قمر ودايما بتقولى الخلاصة

ربنا يخليكى ليا

MǿиY El-Shreef said...

الي يعيش ياما يشوف يا بسمه

الدنيا بتعمل ف البشر الي البشر بيعملوه فينا

هي كده سلسله بقى

ماحدش راضي ع الي بيجراله فبيحاول يخلي غيره يحس ولو جزء من احساسه بالضيق

ماتثقيش ف حد اوي دلوقتي

واكسبي نفسك قبل اي حد

مووواه ياجميل

Unknown said...

بسمة
------
عادى هى الحياة كدة
كلها
معلش مضطرين نعيشها

WS said...

مش عارف ليه حاسس انى اللى كاتب الكلام ده

بسمه عبدالباسط said...

مونى

فعلا كلامك صح
واللى يعيش ياما يشوف

موووووووووووووواه يا جميل

بسمه عبدالباسط said...

بدراوى

فعلا كلامك صح مليون المية

بسمه عبدالباسط said...

ws

عادى ده بيحصل مع كل الناس مش مع حد لوحده
الناس كلها كده

Unknown said...

نقول ايه هي دي سنة الحياة ومش انتي لوحدك ولا انا الوحدي اللي بيحصل معانا كدة