Saturday, May 23, 2009

هيا البنت المحترمة بعبع ؟

هو أكيد العنوان صدمة بس أنا قصدتة بصراحة وقصدت المعنى يوصل كده وفعلا هيا البنت المحترمة بعبع وبتخوف
تيجوا نتكلم بصراحة شوية هو لية الناس بتخاف من البنات المحترمة قوى كده ولية بيعملوا حواجز وأسوار بينها وبينهم
أنا طبعا مع أنه لازم يكون فيه حدود فى التعامل بين البنت ومع أى حد أيا كان ولكن أنا كلامى على خوف الناس من البنات المحترمة بمعنى ساعات مثلا فى أماكن أى عمل تحصل أى حاجة خاصة بأى واحدة وتكون من وراها ومحدش يقدر ينطق ولا يقول لها حاجة ويفضلوا الناس وزملائها يتكلموا ويتهامسوا من وراها على الموضوع ده وطبعا هيا لما بتحس بشىء غريب بتحاول تعرف منهم بكل الطرق ولما بيقولوا لها بتسألهم لية ما قولتوش ليا الموضوع ده من بدرى وفى ساعتها يكون الرد أصلنا بنخاف منك ومن رد فعلك ولما تحاول تفهم منهم ليه بيخافوا منها يكون الرد لأنها محترمة ومحافظة قوى وحاطة حدود فى الكلام بينها وبين أى حد وطبعا ده مش غلط ولكن الغلط أن الناس بتخلط بين كل شىء يعنى المفروض أنه حصلت حاجة خاصة بيها فى الشغل وتكون هيا أول واحدة تعرفها علشان تلحقها من أولها بتكون هيا أخر واحدة تعرفها وساعات كمان ما بتعرفهاش
ياترى لية التفكير ده وهل البنت المحترمة بعبع ؟ وهل الحدود والخطوط اللى مش لازم حد يتعداها دى حاجة غلط ؟ ولية الناس بتخلط كل حاجة ببعضها فيه فرق بين الشغل ومواضيع الشغل وأى حاجة تانية
وبصراحة الموضوع ده حصل قدام عينى مليون مرة وكنت فعلا بلاقى زميلات ليا بتحصل أى مشكلة أو حاجة من وراهم ومحدش عايز يقول لهم ولما اسأل ليه يقولوا أصلهم محترمين قوى ومحافظين وحاطين حاجز فى التعامل بينهم وبين الناس
يا سبحان الله وده علاقتة إيه بالشغل وعلاقة الحدود فى التعامل بموضوع خاص بالشغل إيه مش فاهمة الصراحة
ولأن نفس الموضوع كان بيحصل معايا أنا كمان وكنت بتخنق منه جدااااااااااااا وكنت بعمل مليون مشكلة مع أى حد يخبى عليا حاجة خاصة بشغلى وبيا لأن ده مش شىء شخصى ده شغل والمفروض أى شىء يخصنى فى شغلى أعرفه ولكن لا حياه لمن تنادى التفكير الغريب مش هينتهى
طيب تيجوا نتكلم فى نقطة تانية وهيا موضوع الأعجاب بأى بنت وخاصة لما تكون محترمة ممكن ووارد جدا أن البنت يكون عارفاها شباب كتيرة عن طريق شغلها أو الأقارب الجيران أو عن أى طريق ولو حصل بقى وأى واحد منهم أعجب بالبنت دى وساعات بتكون هيا كمان بتبادله نفس الشعور وطبعا هيا لو بتموت فيه عمرها ما هتنطق بكلمة ولا هتعمل أى تصرف يدل على ده وممكن كمان تلاقيها بتتصرف معاه تصرفات رخمة علشان ما يحسش بحاجة
يا ويلها ويا سواد ليلها على اللى هتشوفه لأن الشباب تقريبا عندهم حساسية من البنات المحترمة وبيخافوا منهم مش عارفة لية وممكن يفضلوا مطلعين عينها سنه ولا أتنين لحد ما ينطق ويقول لها أنه معجب بيها وعايز يرتبط بيها
يا حلاوة يا ولاد يعنى البنت ذنبها أنها محترمة يبقى لازم تدفع ثمن أحترامها والولد يطلع عينها لحد ما ينطق
وطبعا بتكون عند الولد شوية مبررات أولها أنه خايف لو كلمها وقال لها أنه معجب بيها هيا تفهمه غلط وتفتكره عايز يمشى معاها ويتسلى وتقوم قاطعة علاقتها بيه وبكده هو يخسرها للأبد وبدل ما كانت زميلة ولا قريبة وبيفكر يرتبط بيها كده العلاقة أنقطعت
ومبرر تانى أن ممكن تكون ظروفة مش سامحة ليه بالأرتباط فى الوقت الحالى وهو من جواه عارف أنها مش هتوافق تكلمه ولا تمشى معاها سنه ولا أتنين من ورا أهلها لحد ما يكون جاهز فبيكون عنده أحسن أنه يفضل ساكت ويراقبها من بعيد لبعيد لحد ما يكون جاهز ويقدر يتقدم بدل ما يكلمها ويخسرها للأبد
ولكن فيه حاجة مهمة جدا أن أنت ممكن كده تكون بتضيعها من أيدك وأنا عارفة طبعا أن كل شىء نصيب ولكن برضة فيه أسباب يعنى لو ظروفك على قدك مثلا وخايف تدخل فى أرتباط وشبكة والحاجات دى كلها كلمها قول لها على نيتك ما هيا ممكن توافق ترتبط ليك بدبلة وخلاص وممكن تفضلوا مخطوبين سنه ولا أتنين ولا أكتر لحد ما تجهز نفسك وتكونوا مشيتوا طريق صح وقدام الناس والنور
ليه تحكم أنها ولا أهلها هيرفضوك
ولأن أصلا كل الشباب ظروفهم بقت زى بعضها وحاليا بقى المعروف والأغلب أن الأتنين بيتخطبوا بدبلتين وبس ويفضلوا مخطوبين سنه أتنين أو مده لحد ما يقدر يجهز اللى يقدر عليه ويتجوزوا
ولكن لية تتعب نفسك وتتعبها ويكون ردك لما حد يسألك أصلى خايف منها
يعنى إيه خايف منها ؟
طيب خايف وسط حد بينكم حد تكون واثق فيه وقريب جدا منكم ولكن برضة نسبة لأن الناس ما بقوش بيحبوا الخير لبعض الأحسن أنك تكلمها بأى طريقة وتوضح لها أنك معجب بيها وبأن ظروفك كذا وكذا وهيا بدورها هتبلغ أهلها وهترد عليك بعد فترة تفكر هيا وأهلها فيها ويكون أهلها سألوا عليك
ولكن لية حكاية أصلى بخاف منها أصلى بخاف أكلمها أصلها محترمة ومحافظة قوى
كأن الأحترام بقى حاجة وحشة وكأن المحترمة بقت بعبع
وطبعا فيه أمثلة كتيرة على الموضوع ده ولكن كفاية الأمثلة دى دلوقتى ومرة تانية هكمل الباقى

14 comments:

مواطن مصري said...

اول زيارة


الموضوع حلو و هقرائة تاني

المشكلة كمان في البنات يعني البنات سعات بتعجب ب الولد الي مصاحب بنات كثيرة و مقطع دلها العيب في الولاد و البنات راجع تاني بكرة

بن آدم said...

االسلام عليكم
عن موضوع الشغل أنا عن نفسى مشتفتوش لإن ولله الحمد معندناش بنات خالص فى الشغل فمعرفش طريقة التعامل بس حتى لو كان فيه أى بنت معانا عمرى فى حياتى مكنت حقولها أى حاجة ولو كان فى الشغل .
دكتور ليا مرة قالى أشرح لزميلتك كذا وشى جاب الألوان كلها لدرجة انها اتحرجت والدكتور قال حد ييجى بداله عشان محروج - أنا شايف ان التعامل بين الولد والبنت لااااااااااااازم يكون فى أضيق حد ممكن ويفضل ان ميبقاش فيه تعامل أصلا
أما لو كنت بتتكلمى على بنات مع بعضيكوا أساسا بيتهيألى ان البنات كده كده بتخبى على بعض مش عارف لييه – مش متأكد من المعلومة – بس ممكن انت تتأكد منها

أما مسألة الإعجاب – فطبيعة المجتمع اللى النظام وصله لدرجة كبيرة من ضيق ذات اليد – وبالعافيه ممكن تلاقى شاب بيصرف على نفسه – ليا زمايل خرجيين من 2004 ولسه مشتغلوش حاجة ليها قيمة – ومنهم اللى خطب على غرار "انهم هيستحملونى" – لكن الأمر باء بالفشل لأن اللى استحمل سنة مش قادر يستحمل التانية – والمجتمع بيضغط على الشباب بطريقة كبيرة جدا
يعنى مينفعش تتجوز من غير فرش أودتين تلاته على الأقل – وبيتهيألى لو حد راح قال لأبو العروسة أنا هتجوز بنتك ونعيش على السطوح ممكن يحدفه من عليه
ده اللى بيخلى حتى لو واحد معجب بواحدة بجد مش قادر يتكلم - وممكن ياولداه يبقى حاسس انها بردوا معجبه بيه ويشوفها قدامه بتخطب وتتجوز وهوه بيتقطع من جواه لكن مش قادر يعمل حاجة
وكده هوه مش شايفها بعبع ولا حاجة لكنه مش عايز يظلمها معاه
حاجة أخيره – مظاهر الجمال مختلفة من واحد لتانى – لو ان الجمال المقصود فى الموضوع على غرار أنا عايز أتجوز واحدة شبه الممثله الفلانية – فقيل لى ذات مرة من صديق "أن الالتزام قد يضفى بعض من عدم الجمال الحسى على المرأة الملتزمة لأن جمالها يتوج بالألتزام"

hatem183 said...

صراحه الاحترام مفيش احسن منه
و ان هي تكون بعبع و محترمه احسن ما تكون متحرره و اللي جاي واللي ماشي يهزر معاها و يضحك
صدقوني الشباب بيحترم كتير اوي البنات المحترمه ذوي الحياء

يوميات شاب منوفى said...

اى شاب لما يحي يرتبط بيدور على البنت المحترمة دة انا كنت معجب ببنت محترةم جد وكنت حاسس انها معجبة بية بس اتاخرت كتير انى اقولها ويقوم مكلمتها كانت اتخطبت يعنى ضاعت منى
السببين الى انتى قلتيهم هما الى خلونى اتاخر فى انى افاحتها

بدراوى said...

بسمة
------
بخصوص يخبوا عليها فى الشغل
عشان هيا محترمة و محافظة
يخبوا ايه بالضبط
هل مثلاً مشاكل ليها علاقة بسمعة المكان اللى بتشتغل فيه
و لا اى مشاكل و خلاص
و بعدين هيا المفروض تبقى عارفة ايه اللى بيدور بنفسها
-----
اما بخصوص مواضيع الإعجاب و خلافه
انا كشخص مثلاً و حتكلم عن نفسى
لو فكرت و ده احتمال مستحيل اصلاً
انى ارتبط او اتجوز
فده لما اكون قد تجهيز بيت و تكوين اسرة مادياً و نفسياً و اجتماعياً

عشان كدة عمرى ما حفاتح اى بنت بإعجاب قد يتطور لمشاعر حب
يمكن عشان كدة بحاول اووى لو حسيت ان مشاعرى فى التعامل مع اى بنت ممكن تتطور بدون قصد بعمل وقفة مع نفسى
و اقدر احجم مشاعرى كويس

كمان انا اصلاً مش بفكر لا فى الحب و لا فى الجواز كمان
سواء بقى معايا افتح بيت مش معايا
انا حابب اشيل مسئوليتى لوحدى و بس
حابب اعيش لوحدى و بس

بس اعتقد ان الإنسان اللى بيحس بمشاعر حب تجاه اى بنت فى محيط شغله او اسرته
ياريت ميصرحهاش بالحب ده
عشان لو هو مش اد الإرتباط
و هيا ارتبطت بحد تانى
هو بس اللى يتألم لوحده
لكن لو هيا عرفت مشاعره و شاركته فيها
هيا كمان حتتألم لألمه
---
سؤال
هو ليه عيب البنت تصارح الشاب بمشاعرها
طالما واثقة انها محترمة و مهذبة و مشاعرها سوف تتطور لشكل رسمى فى النور قدام الناس
؟

bos bos said...

مواطن مصرى

اهلا بيك ونورتنى ويشرفنى انك تزورنى تانى ومستنية رأيك

bos bos said...

بن آدم

وعليكم السلام

انا برضة معاك أنه فى نطاق الشغل أو الدراسة لازم يكون التعامل فى نطاق ضيق ولكنى بتكلم عن الحاجات الخاصة بالشغل يعنى ممكن مثلا تحصل مشكلة بسبب أى شىء والناس تعرف ويخافوا يقولوا للبنت عليها ويبقوا مش عارفين يقولوا ليها ده اللى بتكلم عليه

وبخصوص موضوع الاعجاب والارتباط صدقنى دلوقتى بقى فيه أسر كتيرة ما بتبالغش فى طلباتها زى ما أنا قلت والأتنين يتخطبوا بدبلتين وبس وكمان مش لازم الفرش كله يجى والكلام ده
فيه ناس أتغيرت كتير قوى وده عن تجربة

ولكن برضة مش مبرر أنه أمكانياته محدودة أنه يسكت وخصوصا لو كان حاسس أنها بتبادله نفس الأعجاب طيب ما يقول لها مش ممكن هيا وأهلها يوافقوا علية لأنهم عايزين راجل لبنتهم مش شقة وعربية وفلوس وشبكة

bos bos said...

حاتم

اها فعلا انا معاك أن الواحدة لازم تكون محترمة وفيه حدود بينها وبين الناس خصوصا لو شباب أو رجالة

bos bos said...

يوميات شاب منوفى

فعلا الاسباب دى هيا اللى بتخلى الشاب يعمل كده بس لازم الشباب يتخلوا شوية عن خوفهم ده مش يمكن الامور تمشى والبنت وأهلها يوافقوا عليه

bos bos said...

بدراوى

بس لو على كلامك ده يبقى محدش هيرتبط خالص لانه ما بقاش فيه شاب أصلا قادر يجيب كل حاجة قبل ما يرتبط والناس دلوقتى بقت بتتنازل عن حاجات كتيرة علشان ولادهم وبناتهم يتجوزوا
وبعدين فيها ايه لو اتنين معجبين ببعض ويخطبها بدبلة ويفضلوا سنه ولا اتنين ولا ثلاثة حتى مخطوبين لحد ما يجهز الحاجات الأساسية ويتجوزوا

اصل لو كل واحد استنى لحد ما يجهز كل حاجة فى ظل الظروف اللى أحنا فيها دى يبقى محدش هيتجوز وهتلاقى الواحد وصل ل 50 سنه وهو لسة بيكون نفسه

الناس أتغيرت عن زمان وكتير منهم بقى بيتغاضى عن حاجات كتيرة فى سبيل أسعاد ابنهم او بنتهم

------------------
وبخصوص السؤال

اولا لو حصل وبنت راحت قالت لولد على اللى جواها هتنزل من نظرة جداااااااااااااا حتى لو كانت محترمة وعلى أخلاق ومفيش زيها
صدقنى هتنزل من نظرة قووووووووووى

وبعدين على فرض وواحدة أعجبت بواحد وعايزة تقول له هيا اصلا تعرف منين أنه بيبادلها نفس شعورها يعنى حتى لو قلنا أنه مافيهاش حاجة أنها تصارح وصارحته وطلع هو مش معجب بيها ولا هيا فى دماغه
ساعتها هتكون هيا خسرت كل حاجة
أولا نظرة الولد ده ليها
وهتنزل من نظر نفسها كمان
ومش بعيد الولد ده يروح يقول للناس انها راحت عملت كده
وده غير الجرح اللى هيبقى جواها

جمال البنت فى حيائها وأخلاقها ولا يمكن بنت تروح لواحد وتعبر عن مشاعرها طالما هو ما عبرش ولا نطق

مجرد مدونة said...

متهيألي في موضوع الشغل لازم صاحباتها يقولوا لها من باب النصيحة حتى .. خاصة لو حاجة خطيرة..
أما موضوع الإعجاب فالشاب اللي بيدور على بنت محترمة غالبا بيبقى محترم عشان كده بيحب يدخل البيت م الباب ..
عشان كده في شباب كتير دلوقت بيتجهوا لزواج الصالونات عشان يبعدوا عن قصص الحب اللي غالبا بتنتهي بكوارث ده طبعا غير المخالفات الشرعية اللي بيقع فيها (الحبيبة).. لكن أهم شيء في الموضوع الاستخارة طبعا بجد ليها بركة رهيبة..

bos bos said...

مجرد مدونة

وانا مش قصدى انه يعبر ليها عن اعجابه ويمشوا ويكلموا بعض من ورا اهلهم
انا قصدى انه يعرفها ويعرف رأيها بأى طريقة حتى لو عن طريق صديقة ليها وبعد كده يدخل من باب البيت
انا قصدى انه نسبة لظروف كتيرة ممكن يكون معجب بواحدة وهيا كمان بتبادلة ولكنه ما بينطقش ولا يتكلم وممكن يفضل سنين كده

محمد صبرى said...

يعنى ساعات الانطباع ده بيبقاله أصل يا بسمة , يعني وارد أنه الواحد فى محيط المقربين إليه يلاحظ حدة في ردود أفعال إنسانة معينة و يتصادف إنها تكون حد محترم فيتصور إنه ده الشكل العام لأي بنت محترمة فممكن توصل لأنه يهاب التعامل مع أى بنت السمت العام بتاعها بيقول إنها حد محترم , ساعات كمان تقابل نوع من الفتيات المحترمات - معذورات -بيتعمدوا إنهم يدوا انطباع للمتعاملين معاهم إنه الواحدة فيهم بميت راجل من خلال حدة فى التعامل و ردود افعال غير متناسبة مع الموقف كنوع من انواع الردع الاستباقي لكل من تسول له نفسه إنه يتعدى حدوده معاها , و فيه ولاد بيترسخ فى وجدانهم سواء من خلال إعلام الدولة إنه البنت الملتزمة منعزلة حادة الطباع , متحجرة التفكير , و ساعات بعض جهات التثقيف الديني بتكون هى السبب في التأكيد المستمر على فكرة إنه البنت كائن بشري يجب اعتزاله قدر الإمكان , و سواء تصورت البنت المحترمة منعزلة أو تخيلت الولد المحترم هو من يعتزل التعامل مع الفتيات -بشكل مبالغ فيه-تصورات من النوع ده متأصلة في الوجدان لفترات طويلة لازم ينتج عنها في النهاية حد غير سوي في التعامل مع البنت المحترمة , و غير قادر على تحقيق توازن بين اللى يصح و اللى ميصحش

دا بالنسبة لخلفيات السلوك الغير سوي , و التصورات الغير طبيعية ناحية االبنت المحترمة

مسألة بقى إحجام الشاب عن التصريح بحبه , فالشاب اللى بيقدر يجي على نفسه و ميصرحش بحبه ده ممكن يكون ليه أسبابه فعلا ليه لأ ,يعنى مثلا الظروف المادة الصعبة للشباب و نمط تكاليف الزواج اللى اتجوز بيه اهالينا و لسه مصرين عليه , عامل بركان فى البلد لسه لم يثر و مظهرتش لسه قدراته التدميريه على السطح - و ان كان بركان نشط فى طريقة للانفجار- و لغاية بقى ما تحصل الثورة الاجتماعية و تخرج الناس فى الشوارع ولاد و بنات يطالبوا بحقهم فى الجواز , و لغاية ما يتيقن الشاب انه غالبية البنات بقوا مدركين للواقع الجديد بكل مأساويته و مستعدين يتحملوا معاه حياة جديد مش سهلة ابدا و لا ميسرة , لغاية ما يحس الشباب فعلا من الاهل انهم خلاص فهموا انه النهارده غير امبارح و بقى الاهل من الطرفين مستعدين يقبلوا ترتيبات زواج غير تقليدية يساعد فيها أسرة الولد و البنت بكل طاقتهم أولادهم المقبلين على حياة جديدة .

لحد ما ده يحصل هيفضل فيه زيجات فاشلة نتيجة الصورة الوردية اللى بترسمها بعض البنات لحياة ما بعد الجواز و بتتشوه مع أول حالة استثنائية محتاجة مصاريف زيادة مكنش الزوج عامل حسابها مع الأعراض المصاحبة -لو مكانتش البنت مقدرة- من توتر و انهيار معنوي و بعدين خناقات و خلافات و ساعات ضرب و طلاق و تبدأ آثار الشيخوخة المبكرة تظهر على الطرفين و هما لسه فى اول حياتهم.

لحد ما ده يحصل هيفضل الإحجام عن الجواز يزيد و يزيد و البنات المحترمة اللى عايزة الستر تسال فين ابن الحلال , و ليه بقى أقرب للحرام منه للحلال , ليه الولد بيدور ع البنت اللي يعيش معاها لحظات الغرام يوم بيوم و لحظة بلحظة و مش مهم يبقى معاها الضهر و مع غيرها العصر ,كل اللى يهمه يلحق العمر اللى هيضيع لو دور ع الحلال

لحد ما ده يحصل هتفضل الناس تسأل ليه البنت المتربية في بيت كويس لبست في الجامعة الافرنكا و ماشية مع ولد و اتين و تلاته

لحد ما ده يحصل هتفضل البنت المحترمة بعبع , هيفضل الحلال بعبع

مجرد مدونة said...

متهيألي السبب الأول والأخير في الموضوع ده العادات والتقاليد يا سلام بس لو ما نتقيدش الا بديننا والله حاجات كتيرة تبقى سهلة اوي ان شاء الله..
الموضوع متهيألي مش له علاقة بأن البنت محترمة أو كده لا الموضوع عام جدا..