Thursday, May 28, 2009

حوار مع آحلامى

الآحلام :- يااااااااااااه أيه ده هو إنتى كل يوم هتقلقينى كده وتفضلى تحلمى وتدوشينى معاكى مفيش يوم ترحمينى شوية
أنا :- أعمل إيه بس أنا بتمنى وبحلم بحاجات كتيرة قوووووووووووووووى ونفسى أحققها وغصب عنى بحلم
الآحلام :- يا بنتى أنتى مش رحمانى فى نوم بتحلمى وحتى وأنتى صاحية بتحلمى ريحينى شوية وخدى نفسك كده
أنا :- أنا لوخدت نفسى وبطلت أحلم شوية حماسى هيقل وهبطل حاجات كتيرة وعلشان كده لازم أفضل أحلم وأحلم وأحلم
الآحلام :- طيب قوليلى هو إنتى ما حققتيش حاجة خالص من اللى حلمتى بيها
أنا :- لا طبعا حققت
الآحلام :- طيب ما ترحمينى شوية وعيشى مع الحاجات اللى حققتيها وحاولى تكبريها وخدى هدنة كده معايا وبعدين كملى حلم تانى
أنا :- اللى حققتة واللى لسة بحلمه كل مرتبط ببعضه وما ينفعش أفصل بينهم ما ينفعش
الآحلام :- طيب قوليلى إنتى حققتى إيه
أنا :- ياااااااااااااه حاجات كتيرة قوى عايزة تعرفى إيه الحاجات الشخصية ولا العملية ؟
الآحلام :- نبدأ بالعملية وبعدين ندخل على الشخصية لأنى حاسة أنك هتنكدى عليا فى موضوع الشخصية دى
أنا :- بصى يا ستى أنا طوووووووووووووول عمرى بحب الكتابة قووووووووى أكتر من أى شىء بس دخلت كلية ودرست حاجة بعيدة عن المجال ده ويمكن نسيت آحلامى دى مؤقتا ولكن مش على طول لأنى كنت كل فترة بطلع الورق وأفضل أكتب وخلصت الكلية وأشتغلت برضة فى حاجة مالهاش علاقة بدراستى ولا حلمى فى الكتابة ولكنى فرحت بيها جدا ورجعت بقى لحلمى بعد ما بقيت بدخل على النت وبدأت بالمدونة بتاعتى اللى رجعتنى لحلمى من تانى وبقيت بكتب كل حاجة وأى حاجة حاسة بيها وهيا اللى وصلتنى للمجلات اللى بكتب فيها وهيا برضة كانت سبب فى موضوع كتابى وإنى عملته
الآحلام :- طيب طيب براحة بس شوية عليا يعنى إنتى كده بتعترفى أنك وصلتى لحلمك فى الكتابة وأنك بقيتى بتكتبى فى كذا مكان وكمان عملتى الكتاب اللى عمر أصلا ماكان فى بالك أنك ممكن تعملى كتاب إنتى مش شايفة أنك حققتى حاجات كتيرة قوى يعنى أهدى بقى شوية
أنا :- اه فعلا شايفة أنى حققت حاجات كتيرة ولكن ما ينفعش أقف لأنى لو وقفت ههد كل اللى عملته وتعب الثلاث سنين اللى فاتوا هيروح هدر وعلشان كده لازم أكمل وأحلم بالأحسن دايما
الآحلام :- طيب يا ستى نكمل كلام فى الموضوع ده بعدين قوليلى بقى حققتى إيه على المستوى الشخصى
أنا :- بصى بقى أنا طول عمرى بحب تكون علاقتى بكل الناس حلوة ويمكن ده راجع لتربية أمى ليا أنا وأخواتى اللى خلتنا كبرنا وأحنا حابين نكون على صلة وعلاقة كويسة بكل الناس سواء قرايب جيران زملاء أصحاب وأهم حاجة أن صلة الرحم ما تنقطعش ابدا مهما حصل وده كنا بنشوفه بعينا وأحنا صغيرين من تصرفات وافعال أهلى
المهم يا ستى أنا بقى الحمدلله علاقتى بقرايبى تعتبر ممتازة جدا نيجى بقى للأصدقاء والزملاء أنا بحب أكون علاقات كتيرة ويبقى ليا أصدقاء وأصحاب وزملاء وبحب تكون علاقتى بيهم كويسة جدا والحمدلله قدرت أعمل كده
يعنى هتستغربى لما أقولك أنى لسة ليا أصدقاء من أيام أبتدائى وأعدادى وثانوى وكلية وكمان الحمدلله الثلاث سنين اللى أشتغلت فيهم عملت صداقات كويسة
الآحلام :- هاااااااااااااااااااااااا كملى يا مغلبانى طيب دول الناس اللى كانوا معاكى زمان أنا عايزة أعرف الناس بقى بتوع التدوين والصحافة والجو ده
أنا :- يااااااااااااااااااااااه مش قادرة أقولك أن الحمد لله ربنا كرمنى بناس حلوة قوى وبقيت على علاقة بناس كتيرة وفيه منها علاقات بقت أسرية بمعنى فيه منهم جه عندى البيت وفيه منهم أنا رحت عندهم وفيه منهم شاف أمى فى حفل توقيع كتابى وفرحت جدا بيهم وبأنى عرفت ناس كويسة كده يعنى الحمدلله أقدر أقول أنى قدرت أكون مجموعة صداقات كويسة بدأت من النت وعلاقة على المدونات والميل وأمتدت للواقع وبقت علاقات رائعة جدا
الآحلام :- أمال إيه بقى ما إنتى كويسة أهو أستنى بس لسة فيه سؤال جوايا
أنا :- قولى هتغلبينى لية معاكى
الآحلام :- طيب يا ستى نيجى بقى لحاجة شخصية قوى وهيا
ودى بقى هنكملها فى الجزء الثانى من آحلامى
:))

12 comments:

أميرة said...

المدونة بقى شكلها رائع يابسبوسة بهنيكي عليها ويارب دايما تحققي كل احلامك

Dalia Shabana said...

يابسبوسه الله يعينك يعني الواحد مننا بيتعارك مع نفسه ومع ضميره ومع قلبه لكن لما تدخل في الاحلام تبقى مشكله لانها المكان الوحيد اللي بنهرب ليه لما نتخنق
تحياتي
http://daliashabana.blogspot.com/

Unknown said...

جميل يا بسمة
بس يمكن حسيت انها لو انكتبت بلغة فصحى كانت افضل

بس لما خلصت قراية حسيتها بالعامية احلى

احلامك متخيلة طفلة جميلة كثيرة الاسئلة
ربنا يوفقك و تحققى كل احلامك
----
قوليلى هو فيه احتمال حفل التوقيع اللى فى المنصورة يتأجل
؟
انا بسأل عشان انا ان شاء الله
رايح حفل التوقيع

بسمه عبدالباسط said...

أميرة ويلز

شكرا يا جميل ومبسوطة ان المدونة عجبتك

ويارب انتى كمان تحققى كل آحلامك

بسمه عبدالباسط said...

داليا

ههههههههههههههههه صح عندك حق بس هنعمل ايه

بسمه عبدالباسط said...

بدراوى

تعرف انا كمان قبل ما اكتب فكرت اكتبها فصحى بس لما جيت اكتب حسيتها عامية اكتر

شكرا ربنا يخليك ويارب تحقق انت كمان احلامك

ان شاء الله الحفل فى ميعاده الاسبوع الجاى وتنورنا اكيييييييييييييد ولو فيه اى تغيير هعرفك
بجد شكرا لحضورك مقدما

د/عرفه said...

يارب
تحققى كل اللى نفس فيه

وأكيد أى خطوة نجاح بتبدأ بحلم فى الأول

momken said...

لو بطلنا نحلم نموت

ماهما عاندنا الحلم
ومهما ارهقنا الحلم

ابداً لا يجب ان نيأس من احلامنا

حوار جميل مع حلمك

واتحرق شوقاً لمطالعه البقيه

دمتى مبدعه


تحياتى

Unknown said...

سبحان الله وأنا النهاردة كمان بفكر في أحلامي ايه حققته وأيه ما حققتش

علي العموم الحمد لله علي كل شئ

بسمه عبدالباسط said...

د/ عرفة

يارب شكرا ليك

بسمه عبدالباسط said...

ممكن

شكرا لييييييييييييييك

وانتظر البقية

بسمه عبدالباسط said...

أحمد

فعلا سبحان الله

اكيد كلنا بنعمل الوقفات دى مع نفسنا