Monday, April 6, 2009

من غير عفوا أحنا غيرنا العريس

شأنها كشأن كل الفتيات فى سنها تحلم بفارس آحلامها وبمواصفاته وبشكله وبكل شىء فيه وترسم مواصفات معينة فى خيالها وتتمنى أن تقابل هذا الفارس ولكنها تستيقظ على كابوس الزيارات المتكررة لعدد من العرسان والتى لا تجد بينهم فتى آحلامها ولا تجد أرتياح لأى شخص فيهم ويتنهى الموضوع وتعود تحلم مرة آخرى وتستيقظ بعد ذلك على كابوس زيارة جديدة لعريس وهكذا تظل بين مقابلات كل شخص والآخر تبحث عن مواصفات وصفات معينة ولكنها لم تجدها وكل مرة لا تشعر بأى قبول أو أرتياح للشخص المتقدم لها
ولكن كل زيارة وكل عريس تخرج منهم بحكايات كثيرة لو أرادت أن تكتبها لا يكفيها مليون موضوع ولكن أكثر الحكايات التى تتذكرها جيدا ولا تنسى ما حدث لها فيه هو تغيير العريس ووجود عريس آخر وكانت القصة غريبة جدا بدأت عندما وصل أخوها الأكبر للمنزل وقال لها أنه يوجد سيدة تتردد عليه فى مكان عمله وعلمت بأنه لديه أخت أصغر منه وغير مرتبطة وبأنها تريد أن تخطبها لشاب قريب لها وعرف منها مواصفات العريس وعمله ودراسته وكل شىء تقريبا وعندما قال لأخته ولأهله عن الموضوع رحب أهله وحددوا ميعاد لزيارة العريس لتراه أخته ويراها كما يحدث فى كل البيوت
جاء يوم الزيارة وكانت الفتاه كعادتها مرتبكة جدا وخائفة وهذا بسبب خجلها الشديد ولكن وصلت هذه السيدة ومعها سيدتان ودخلوا جميعا بعد ترحيب أخيها وأهلها بهم الى غرفة الصالون وكانت الفتاه فى غرفتها تتابع ما يحدث من خلف باب الحجرة وبعد عده دقائق دخلت أمها الغرفة لتصطحبها الى حجرة الصالون ودخلت الفتاه وسلمت على كل الموجودين وجلست وبعد الترحيب ونظرات السيدات لها والتدقيق فى كل تفاصيل وجهها وجسمها بدأ الكلام والسؤال عن سبب عدم وجود العريس معهم ليفاجأ الجميع بأن العريس مشغول فى عمله ولم يستطع الخروج منه ولكن الغريب أنهم قالوا عمل آخر غير العمل الذى قالته السيدة الأولى لأخيها فرد أخيها وسأل السيدة عن عمله وقال لها أنها قالت له أن الشاب يعمل فى وظيفة معينة ولكنكم الآن تقولون وظيفة آخرى فتنفجر السيدة من الضحك وتقول أنها عندما ذهبت لهذا الشاب وقالت له أنها أتت له بعروسة قال لها أنه خطب فتاه ولكن هذه السيدة لم ترد الخروج هكذا بدون عريس وتذكرت جيرانها وأن لديهم شاب لم يرتبط بعد وذهبت الى أخوته البنات وقالت لهم أن عندها عروسة ومواصفاتها كذا وكذا وبسرعة وافقت أخوات العريس الجديد على هذه الفتاه وطلبوا منها تحديد ميعاد وجاءوا معها فى يوم الزيارة لرؤية العروسة
وطبعا بعد سماع الفتاه وأخيها وأهلها لما حدث وبأن السيدة غيرت العريس بدون حتى ما تستأذن من أسرة الفتاه أصاب الفتاه صمت شديد ولما تستطع النطق بكلمة واحدة وردت والدتها وقالت لهم لماذا لما يأتى العريس الآخر ليقولوا أنه مشغول بمنتهى البرود وأصاب الجميع دهشة بالغة من الذى حدث وبعد مغادرة هؤلاء السيدات ذهبت الفتاه الى حجرتها مسرعة ولما تتكلم مع أحد ولا تنطق بأى كلمة وظلت هكذا لليوم التالى الى أن ذهبت اليها والدتها وقالت لها سوف نرفض هذا العريس لأن ما حدث غير صحيح وموضوع تغيير العريس شىء مهين لنا ولكى ولذلك سوف نرفضه لتنفجر الفتاه من البكاء وتقول لها لماذا تركتونى من يوم أمس وأنا أحرق فى دمى وأغلى من داخلى وأنتم تعلمون أن ماحدث أهانة كبيرة لى ولكم وأننى جرحت جدا من تصرفات هؤلاء الناس وأنهم لو كانوا جاءوا مرة آخرى لكنت حبست نفسى فى حجرتى أو خرجت من البيت حتى لا آراهم لأننى لو رأيتهم مرة آخرى كنت طردتهم من بيتى لأننى لست بضاعة يبدلوا من يشتريها أو يأخذها على حريتهم ولأننى لا أقبل المهانة فكيف يتم تغيير العريس بدون علمى وعلمكم وبعد هذا الحديث أنتهى الموضوع ولكنها لم تنسى ما حدث وعندما تتذكره تشعر بمشاعر كثيرة منها الغضب لما حدث والسخرية من طريقة تفكير الناس فى تغيير العريس وكأنه بضاعة يغيروها كما يشاءوا
والآن أصبح الموضوع مثل النكتة عندها ودايما تتذكره وتقول ( أحنا غيرنا العريس على وزن أحنا غيرنا الثلاجة أو البوتاجاز أو العربية )
ومن غير عفوا أحنا غيرنا العريس

11 comments:

همس الاحباب said...

ههههههههه
بصراحة عندها حق
لو حتى غيرنا التلاجة او البوتجاز حنقول
اما ده عريس با جدعان
سبحان الله على العقول والتفكير
تحياتى
وتقبلى مرورى

فاتيما said...

الاول
حمدلله ع السلامة
و كويس إنك مطولتيش يا بس بس
متبعديش تانى يا بسبوسة ..
لو سمحتى يعنى
بخصوص البوست ...
أقولك رأيى و متستغربيش ...
اصل ليا صديقة عايشة قصة الجواز دى عن طريق الصالونات ...
و من واقع سماع الحكايات ...
أقدر اقولك إن جواز الصالونات غالبا ليه قوانينه القاسية و الغير مراعية للذوق فى اوقات كتير ...
الأسرتين
و العريس و العروسة
محدش فيهم له حاجة عند التانى
و بالتالى المسألة بتمشى
بشكل جاف أوتوماتيكى بحت
و كل جانب بيحاول يمشى المقابلات
بأقل مجهود
و ينهيها بأقل خسائر تذكر ...
و كمان الواسطة ما بينهم
بعد مرور بعض الوقت ...
بتاخد المسألة عنها شكل إحترافى
حتى لو مبتاخدش اجر عليه زى الخاطبة ... لكن هيا فى الآخر خاطبة و لو بالمجان
عشان كدا لما قريت مدونة عايزة أتجوز بتاعة غادة عبدالعال
مستغربتش أى كلمة
حتى لو فيها مبالغة كوميدية ...
لأن الواقع فيه كوميديا أسود من كدا
و بعدين و لا يهم بطلة حكايتك
هما غيروا العريس
و هيا غيرت رأيها
و مش عاوزة من وشهم حاجة تانى
بس خلاويص
و بلاش هربان تانى

الربان said...

تحياتي

رغم ان الموضوع يصلح لموقف او حلقة كوميدي...الا انه يظهر لنا كيف اصبحنا
نفكر الان...وطريقة التفكير العقيمة لدي البعض منا....

اقول لحضرتك ان الفتاة محظوظة او ان ربنا يريد لها الخير لان الزواج بمثل هذه الطريقة السمجه غير مقبول و احتمالات
نجاحه و استمرارة ضئيله....

تحياتي و تقديري

صيدلانيه طالعه نازله said...

و الله يا بسبس الناس فعلا بقت معندهاش دم و فيهم قله ذوق مش معقوله و فى جواز الصالونات ده بتبقى اللى جايبه العريس عامله نفسها رئيس جمهوريه و كانها شاريه العريس من جيب اهلها و اللى زى الناس اللى غيروا العريس دول ميستحقوش غير الطرد

د. إيمان مكاوي.. أم البنين said...

هو ده جواز الصالونات ..ناس بتتفرج على ناس ما تعرفهاش
طول عمري ماكنتش حابه أتعرض للموقف ده ..والحمد لله لم أتعرض له
الزواج إختيار ..مش بضاعة
بوست جميل يا بسمه
تحياتي لقلمك
دمت بكل الحب

bos bos said...

همس الأحباب

لا عادى ده بقى تفكير ناس كتيرة ههههههههههه

تحياتى

--------------------------------
فاتيما

الله يسلمك يا جميل
ماشى يا قمر مش هبعد تانى انا مقدرش ابعد عنكم اصلا

هههههههههههههههههه
عندك حق فعلا
جواز الصالوناتى بيبقى فيه مواقف صعبه وجارحو جدا وخصوصا للعروسة
وزى ما انتى قلتى هما غيروا العريس وهيا غيرت رأيها واحدة بواحدة بقى

تحياتى يا قمر وحشانى جدا

-----------------------------

الربان

فعلا عندك حق استمرارية النوع ده من الزواج تعتبر ضئيلة جدا او مستحيلة واكيد هيا كسبت لما انهت الموضوع

تحياتى

------------------------------
صيدلاية طالعة نازلة

فعلا يا بنتى الطرد كان اقل حاجة ممكن تتعمل معاهم حاجة بشعة بجد

تحياتى

-------------------------------

أم البنين

فعلا عندك حق واى بنت نفسها ما تتعرضش للموقف ده بس نعمل ايه فى الزمن وفى الناس ما بقاش عندهم دم اصلا

تحياتى

احساس لسه حى said...

عزيزتى

ما يمكن فى التغير ده خير

هى حبيت الاولانى علشان تزعل انه اتغير بالتانى

احلا شئ فى الدنيا دى ما يفعله القدر والمكتوب فينا

ربنا يكرم الشباب بما يستحقونه

تحياتى

سلام

hasona said...

السلام عليكم

ههههههههه
يا بخت من وفق (لفق ) راسين في الحلال

والعريس الجديد كان معاه الضمان ولا ايه

هناك عقول عقيمة لا تستطيع فهم حتي أخطائها

hasona said...

السلام عليكم

ههههههههه
يا بخت من وفق (لفق ) راسين في الحلال

والعريس الجديد كان معاه الضمان ولا ايه

هناك عقول عقيمة لا تستطيع فهم حتي أخطائها

الله يهديهم


تحياتي

hasona said...

بس يمكن الموقف حصل بحسن نية

تصوري ان فيه ناس كده
لما تشوف شاب أو فتاة كويسة
تضع علي عاتقها أن تزوجه
مهما كانت العوائق و الظروف

محمد صبرى said...

"ما يمكن فى التغير ده خير

هى حبيت الاولانى علشان تزعل انه اتغير بالتانى?

احلا شئ فى الدنيا دى ما يفعله القدر والمكتوب فينا"

ده كلمات إحساس لسه حي , و هي فعلا وجهة نظر تُحترم حبيت أؤكد عليها, رغم إنى شخصيا لا أرى في جواز الصالونات أسلوب مناسب ليا ممكن أرتبط من خلاله.

بس واضح من القصة دي إنه لسه جيل الأهل مش مستوعب التغييرات اللي حصلت ,يمكن اللي حصل ده كان يبقى شيء ممكن يتفهم في زمن غير زماننا , إنما الثقافة السايدة حاليا مفتكرش إنها ممكن تسمح لأغلب بنات جيلنا أنها تتقبل تصرفات من النوع ده , رغم كده جواز الصالونات مازال منتشر جدا و أغلب الزيجات بتتم من خلاله بس مفتكرش أنه أغلب الناس ممكن تتصرف بالشكل الفظ ده اللى اتصرف بيه الناس اللي العريس من طرفهم