Thursday, June 9, 2011

حملة التدوين ( التدوينة الخامسة ) أنا كنت جزء من النظام

أنا كنت جزء من النظام عشان كنت حابسة آحلامى جوه قمقم ومش عايزة أحررها

أنا كنت جزء من النظام عشان كنت كتير بسكت وما بقولش اللي جوايا

أنا كنت جزء من النظام عشان ضيعت وقت كبير من حياتي في الخوف من كل حاجة وأي حاجة

أنا كنت جزء من النظام عشان بوظت ساعتي البيولوجية لدرجة أنى يا أما ما انامش خالص وأطبق بالكام يوم أو أنام وما أصحاش إلا بالطبل البلدي

لدرجة أن الناس اللي معايا في البيت بقوا بيوحشونى ولسه ماما النهاردة الصبح أول ما شافتنى قالتلى أزيك وحشتينى

أنا كنت جزء من النظام عشان بستهبل كتير وما أغسلش الأطباق والكوبايات اللي بستخدمها عشان ما بحبش غسيل الأطباق عاااااااااا وماما تقوم من النوم تلاقى المطبخ مقلوب رأسا على عقب
وللأسف مازلت جزء من النظام في النقطة دى

ما تجيبوا غسالة أطباق بقى وتريحونا

أنا كنت جزء من النظام عشان أوقات كتير بنشغل عن صحابي وقرايبى وما بسألش عليهم لدرجة أنى مسكت موبايلى وقلبت فيه لاقيت أسماء ناس بقالي كتير قوى ما كلمتهمش ولا أعرف عنهم حاجة وفى نفس الوقت كنت محتاجة أتكلم مع حد ومعرفتش أكلم مين بالظبط

أنا كنت جزء من النظام عشان ما بحبش أكل السمك المشوي ولا البامية وحاجات تانية كتير ومازلت برضة ما بحبش أكلهم ممكن نبدلهم بـ ( شيكولاتة ، شيبسى ، حرنكش ، دوم ، قهوة ، نسكافية ) نييييييياها

أنا كنت جزء من النظام عشان حاولت أبقى حد عاقل مع أنى شايفانى حلوة فى الجنان

إيه يعنى لما أبقى فاتحة اللاب توب وبتابع الفيس بوك والمدونة والميلات ومواقع تانية كتيرة وفى نفس الوقت فاتحة التليفزيون وفى الوقت نفسه بطبخ وبنضف البيت وكمان بتكلم فى الموبايل وتليفون البيت بيرن تررن تررن

أنا كنت جزء من النظام فى حاجات كتير ولكن من النهاردة مفيش نظام

أنا النظـــــــــــــــــــــــــــــــــــــــــــــــــــــــــــام

8 comments:

إيمان said...

ههههههههههه
حلوة بجد ولقيت نفسي انا كمان كنت زيك جزء من النظام فى نفس الحاجات تقريبا ما عدا رفاهية النوم لمدة طويلة زعدم غسل المواعين لانى بقيت انا الماما والباقى بيتدلعوا عليا
النبى على قلبك ما تعملى فى مامتك كده احسن هيطلع عليكى كوبايات كوبايات

Bent Men ElZman Da !! said...

كل ده وفى الاخر تطلعى انتى اصلا النظام :D
انا من كلامك حسيت ان كلنا جزء من النظام اصلا
حاجات كتير من اللى قولتيها بعملها بردو

تاكاشى said...

على كدا بقى انا من رؤوس النظام

إذ انى مش بذاكر

إذ انى مش بشتغل

إذ انى مش بفكر

إذ انى مش ببطل اكل ولا نوم

دانا كدا غلبت بابا حسنى بقى :D

تدوينه لذيذة جدا

تاكاشى said...

على كدا بقى انا من رؤوس النظام

إذ انى مش بذاكر

إذ انى مش بشتغل

إذ انى مش بفكر

إذ انى مش ببطل اكل ولا نوم

دانا كدا غلبت بابا حسنى بقى :D

تدوينه لذيذة جدا

بسمه عبدالباسط said...

إيمان

ههههههههههههه
موضوع غسيل الأطباق ده عامل ليا أزمة بس لما بكون مضطرة بغسله بس فى الأوقات العادية لااااااااا

هههههههههههه
نورتينى

-------------
بنت من الزمن ده
كلنا كنا جزء وكل واحد له نسبه فى الموضوع
بس سيبك من النهاردة مفيش نظام أنا النظااااااااام
:)

---------------
تاكاشى
ههههههههههههه ياه ده أنت كده طلعت من الفلول

:)

نورتنى

تاكاشى said...

بس بس ماتسيحيليش قدام الناس احسن يعملو عليا الحمله القوميه ضد تاكاشى ابو جلالبيه :D

العناية بالشعر said...

كل منا جزء من النظام في مواطن كثيرة

الميلية said...

هههههههههههههههههههههههههههه لكن انا هو النظام بذاتو هههههههههههههه