Friday, October 19, 2007

كلنا ليلى أو مع ليلى هيا هيا نفس النتيجة

لمعرفة التفاصيل أدخلوا على اللينك ده
بصراحة أنا عجبتنى جدا الفكرة وعجبنى التاج المعمول لها وقلت لازم أجاوبه وبتمنى ما أكونش اتأخرت
هل انتى سعيدة كفتاه فى مناحى حياتك؟
طبعا سعيدة بأنى فتاه جدا جدا
ومن ناحية كل مناحى الحياه المشكلة مش فيا أنا المشكلة فى المجتمع يعنى المجتمع فى أوقات كتير بيحاول يهمش دور الفتاه ويحسسها أنها مالهاش قيمة ودى مش مشكلتى دى مشكلتهم هما لأنهم مش عارفين قيمة وجود الفتاه

هل تحبين نفسك أم تتظاهرين بالقوة ؟
طبعا بحب نفسى بس مش لدرجة الأنانية علشان محدش يفهم غلط
أنا الحمد لله شايفة أنى قوية وبحاول كتير فى أوقات الضعف أظهر قوية حتى لو أنا ضعيفة جدا جدا بحاول ما أخليش اللى قدامى يحس بكده
هل تعرفين دورك فى الحياه أم تتسابقين وتلعبين أدورا مرسومة فقط ؟
دورى فى الحياه منقسم لعده أدوار منها دور الفتاه اللى هتكون بعد كده زوجة وأم وأكيد الدور ده لازم كل فتاه بتستعد له من صغرها علشان تقدر تعيشه على أكمل وجه
وكمان فيه دور غير دور الزوجة والأم دور الأخت والأبنه وده دور مهم قوى ولازم كل واحدة تقدر تعيشه وتعرفه صح لأن ده البداية فى حياتها قبل دورها كزوجة وأم
وبالنسبة لدورى فى باقى الحياه من شغل وغيره أكيد بحاوله أكون على قد المستوى وبحاوله أعيشه صح
ولو فعلا القدر رسم ليا دور وده بيحصل لناس كتير مننا لازم فعلا احاول أمشية
هل مستعده أن تدافعى عن وجهة نظرك عموما أم تجبنين عند المواجهة ؟
طبعا وبقوة كمان
يمكن كنت قبل كده بحاول تجنب المشاكل لكن الهروب والضعف مش بيوصل لنتيجة وعلشان كده لازم أتسمك برأيى وأدافع عنه مهما حصل طالما الرأى ده مش غلط
وهل ترين جبنك صفة شخصية ام يغذيها من حولك؟
الحمد لله أنا مش جبانة
ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
أهمها أن أصلا المجتمع كتير مش بيعترف بوجود ليلى
ومصدره التربية كلنا من صغرنا بنشوف الأهل بيربوا الولد على أنه أحسن من البنت وهو اللى المفروض يقعد حاطط رجل على رجل والبنت هيا اللى تخدمه
المواقف موجودة فى كل حياتنا مش عندى أنا بس معظم الناس بتربى ولادها على أساس أن البنت هيا اللى لازم تخدم البيت كله والولد ما يعملش حاجة
وأنا مش بعترض ابدا على أشتراك البنت فى خدمة أخواتها وأهلها بس فيه فرق لما البنت تعمل كده بمزاجها ولما تعمله غصب عنها
البنت على فكرة بتكون سعيدة قوى لما تعمل حاجة فى البيت بس بمزاجها مش أجبار ولا بالطرق اللى بنشوفها
هل تري المرأة اقل من الرجل في اي مستوى من المستويات؟وان كان فعلا فما هي هذه المستويات؟
لا طبعا المرأة مش أقل من الرجل الأتنين مكملين لبعض طوال الحياه
ولا يمكن الحياه تكمل بدون حد منهم
هل يساهم الأعلام فى ترسيخ صورة نمطية عن المرأة ؟ وكيف ترين معالجات قضايا المرأة وتأثيرها فى المجتمع؟
للأسف دور الأعلام بسيط قوى ده إن ماكانش معدوم
وأصلا مابشوفش أى معالجات لقضايا المرأة وحتى لما يحصل ونشوف برنامج بيتكلم عن المرأة بنلاقى أصلا الفئة اللى بتتكلم دى فئة غريبة عنا ومش هيا معظم الحالات الموجودة فى مجتمعنا ومش عايشين أصلا المشكلات اللى بيتكلموا عنها يبقى أزاى هيقدروا يحسوا بيهم ويحلوا ليهم مشاكلهم
بعد مرور سنه من يوم ليلى الأول ماذا تغير فى وضع ليلى ؟
أنا يمكن مش شايفة أى تغير ملحوظ بس بتمنى فعلا أنى أشوف تغير
ماذا تغير حولها فى الشارع كالظروف والمشاكل فى مصر بالنسبة للبنات والسيدات صارت أحسن أم اسوأ ؟
أنا شايفة أنها بقت للأسوأ والمشاكل زادت
------------------------
ودى كانت الأسئلة وأجاباتى عليها
وفى النهاية مش عايزة أى واحد يفهم الموضوع غلط أحنا مش معترضين على دورنا فى الحياه كفتيات أو سيدات ليهم دور أساسى فى الحياه وفى البيت وفى تربية الأولاد وغيره من كل المهام الموجودة لكن أنا بعترض على نظرة الرجل لينا على أعتبار أننا أداه لخدمتهم بس دون مراعاه لشعورنا وكمان أستخفافه بينا فى أى عمل بنعمله سواء داخل البيت أو خارجة فى العمل
وكمان عدم الأحساس بالمرأة عموما ولا تقديرها ولا تقدير دورها فى الحياه
وأحنا مش بنادى بمعاداه الرجل لا ابدأ بس بنادى كل الرجال لفهم كل السيدات
-----------------------
التاج همرره لمين
وطبعا الأسماء اللى كتبتها دى لو حد مش عاجبه التاج مفيش مشكلة ما يجاوبش
والتاج ده كمان مش للسيدات أو الفتيات ولكن للرجال كمان ولكن أنا طبعا ما حبيتش أكتب أسم أى واحد علشان محدش يزعل

14 comments:

Unknown said...

ازيك يا بوس بوس وحشتينى ، حلوة الأسئلة دى على فكرة و الأجوبة أحلى و أحلى تعرفى كنت فكراكى مستسلمة طلعتى ثورجية زى ناس

الى الأمام يا ليلى :))))))))))

بسمه عبدالباسط said...

عاليا حليم

أزيك انتى
انتى اللى وحشتينى قوى

مش موضوع ثورجية ولا حاجة بس موضوع أننا عايزين نلفت نظر الناس لينا شوية ونحسسهم بقيمتنا اللى هما مش حاسين بيها

هيا فين الثورجيه دى ياريتنى كنت كده

تحياتى لكى

حواء said...

بوس بوس الجميلة التاج جميل جدا زيك يا قمر وانا حجاوب عليه وبعد اذنك حمرره لبعض الشباب من الرجال برضه نحب نسمع رأيهم ووجهة نظرهم .. احيكى

kikooooooooo said...

أنا عجبني تفكيرك جدا وانتي بتجاوبي علي التاج علما بأننا ولد بس بجد تفكيرك كأنه أكبر من سنك يعني عاقل جدا
نسيت أقول اللوك اللي انتي عاملاة في البلوج جامد جدا
كان معكم ....,
كيكوووووووو مدون جديد

بسمه عبدالباسط said...

bocycat

ازيك يا قمر اخبارك ايه
مبسوطة قوى ان التاج عجبك
وبراحتك طبعا مررية لأى حد

تحياتى لكى

بسمه عبدالباسط said...

kikotalaat

مرحبا بيك كيكو فى عالم التدوين
وانا سعيدة جدا ان الأجابات عجبتك
وكمان ان اللوك بتاع المدونة عجبك

تحياتى لك

همسات ساكنه said...

ازيك يا بوس بوس
البوست ده حلو اوي
وخاصه فعلا ان كتير جدا بيهملوا دور الفتيات والسيدات بالمجتمع

الاجابات كمان منطقيه جدا ودفاعيه كمان يعني مفيش استسلام

الى الامام دايما وكلنا ليلى ومع ليلى

تسمحيلي بقى اخد التاج ده منك ;)

بسمه عبدالباسط said...

همسات ساكنة

ازيك انتى اخبارك ايه
فعلا ناس كتير بتهمل دور الفتيات والسيدات
سعيدة أن الأجابات عجبتك قوى

وطبعا ممكن تاخدى التاج بس المهم تدخلى مدونة كلنا ليلى وتحطى لينك التاج لما تجاوبيه فى اخر موضوع عندهم فى التعليقات

تحياتى لكى

Unknown said...

عندى ليكى تاج تعالى خديه

فى القلب said...

ياه يا بوس بوس

حقيقى تاج غالى من غاليه

التاج جميل أوىىىىىىىىى يا بوس بوس
و ردودك رائعه تمس الوتر


و أنتى حقيقى شرفتينى بالتاج ده

truelove said...

بوسي اجباتك مش جديدة عليا ومكملة للصورة التي متوقعها لكي ومنطقية قوي الاجابات وبدون اي تصنع او تكلف والجديد نزل ومحتاجة لرايك

بسمه عبدالباسط said...

عاليا حليم

شكرا على التاج بس أنا جاوبته تحت البوست ده على طول
تحياتى لكى

بسمه عبدالباسط said...

فى القلب

متشكرة جدا على كلامك الحلو ده واللى إنتى اللى غالية عليا قوى

تحياتى لكى

بسمه عبدالباسط said...

truelove

سعيدة أن كل الناس حاسة أنى مش بقول كلام خيالى أو بعيد عنى وعن طبيعتى وشخصيتى

وأنا شفت الجديد وعجبنى قوى قوى

تحياتى لكى