Friday, August 31, 2007

عيد ميلادى ولكن

بكرة عيد ميلادى بعد الساعة 12 بالليل بدقيقة هدخل سنه جديدة هيكون عندى 24 سنه طبعا ناس كتير بيفوت عليها سنين وسنين وكل اللى بتعمله كل سنه أو تفتكره الهدايا والتورته وخلاص لكن أنا السنه دى بفكر فى حاجة تانية يمكن تفكيرى أختلف أيوة مفيش مانع من التورتة وخلافه بس أنا بفكر فى حاجة تانية بفكر السنه اللى فاتت دى عملت فيها أيه حققت فيها أيه ضيعت فيها وقت قد أيه
أنا يمكن دخولى لعالم النت كان تقريبا من سنه ويمكن السنه دى فعلا حصلت ليا فيها حاجات حلوة كتير
أولا أتعرفت على صديقتى الجميلة جدا والشاعرة الرائعة أميرة ويلز صاحبة مدونة
وبجد كانت معرفتى بيها وش الخير عليا لأنها كانت الطريق ليا لمعرفة المدونات ولعمل مدونتى دى وبجد مش هنسى أبدا فضلها ده عليا وبالأضافة أنها صديقة غالية جدا عليا ووفية بمعنى الكلمة
ثانيا عملت أنا وهيا مجلة نفسنا واللى كانت الطريق والباب لكل حاجة كويسة وحلوة بتحصل لنا دلوقتى
ثالثا بقيت أنا وهيا بنكتب فى مجلة على صوتك اللى بعتز بيها جدا واللى فتحت لنا باب وطريق كبير قوى
رابعا لسة فيه حاجات كمان أنا بدأت فيها ولما هتكمل هعرفكم أكيد
خامسا وده الأهم عرفت منتدى جميل جدا وغالى قوى عليا ويمكن ده كان البداية لكل ده ويمكن هو له الفضل فى حاجات كتير من خلال معرفتى بحاجات جديدة وقراءة كتابات ناس هناك كل ده نمى عندى حاجات كتير ومقدرش فعلا أنسى فضل ناس كتير عليا من المنتدى ده
وهو منتدى الكرامة
سادسا وده شىء فرحنى جدا جريدة المصرى اليوم نقلت موضوع من عندى فى الجريدة وده شىء أسعدنى جدا
سابعا نزل ليا رأى فى موضوع فى جريدة الكرامة وطبعا دى حاجة فرحتنى جدا جدا جدا
ثامنا بقى عندى أصدقاء أكتر من اللى كانوا عندى قبل كده وعرفت ناس كويسين قوى بجد
يعنى من الأخر السنه اللى فاتت دى أتعلمت فيها حاجات كتير ووصلت فيها لحاجات مكنتش أتوقع أنى أوصل لها
أنا كنت طول عمرى بحب الكتابة لكن ما عرفتش أنمى ده لكن اللى بأكده أن النت ودخولى على حاجات كتير فيه نمت عندى الموهبة دى
تانى وفعلا أنا حصلت ليا حاجات كتير فى السنه دى مفرحة وجميلة
أرجع بقى للمدونات ولمدونتى اللى عملتها من حوالى 8 أشهر ويمكن هيا أتمسحت منى بعدها بكام شهر وعملتها تانى بس عايزة أتكلم عن حاجات جميلة قوى عرفتها وناس جميلة صادفتهم هنا فعلا المدونات دى عالم غريب بس حلو قوى والأحلى الترابط اللى بلاقية وبشوفه بين المدونين ناس بتشارك بعض فى حاجات كتير ويمكن ما يعرفوش بعض الا عن طريق المدونة بس بيفرحوا لفرح بعض وبيزعلوا لزعل بعض
وأنا عن نفسى مدونتى كانت فاتحة الخير عليا بجد
أنا طبعا مش عايزة أذكر أسماء ناس مدونين عملوا معايا حاجات كويسة قوى علشان ما أنساش حد معلش بقى عيد ميلادى ودماغى متلخبطة ولأنى عارفة مهما كتبت مش هوفى حد حقه
نفسى بجد فى السنه الجديدة أعمل حاجات كتير وأحقق حاجات أكتر
نفسى أقرب من ربنا أكتر
نفسى أنجح فى شغلى وخصوصا فى المجلات اللى بكتب فيها وصوتى يوصل لكل الناس ونفسى أنجح فى كل الشغل اللى بعمله
نفسى بجد أعمل حاجات كتير كتير كتير كفاية عليكوا بقى كده
ومش عايزة أطلع نفسى بقى مثالية ومفيش زيى وكده أيوة أنا عملت حاجات كويسة فى السنه اللى فاتت وبرضة عملت حاجات مش كويسة زى أى حد يعنى وضيعت وقت كبير قوى قوى على الكمبيوتر والنت ويمكن فى الأول كنت بضيعه من غير فايدة بس الحمد لله دلوقتى بقى بفايدة يمكن أنا بفضل كتير على النت بس الحمد لله بطلع بنتيجة كويسة
يمكن برضة النت ده أخدنى من الدنيا اللى حواليا والناس وصحابى ما بقتش بكلم حد قاعدة كده قدام الجهاز وخلاص
والحمد لله بدأت أرجع تانى للحياه
بجد ده أحسن عيد ميلاد مر عليا لحد دلقوتى فى حياتى
وخلاص فاضلى سنه وهكمل ربع قرن فى الحياه دى يا خبر بقالى كل ده فى الدنيا
وفعلا السنه دى أنا خدت فيها خبرة فى حاجات كتير قوى قوى
-----------------------------
ودى الهدايا اللى وصلتنى وأى حاجة جاية فى السكة هكتبها على طول
أول هديه جاتلى من الجميلة صاحبة مدونة مش قادرة وهيا عملت موضوع ليا ولناس كمان تانية عيد ميلادهم فى نفس الشهر
------------------------------
ثانى هدية مش هتقدروا تشوفوها للأسف صديقتى الجميلة أميرة ويلز كتبت على الأيميل بتاعها أهداء ليا مكان أسمها وبجد دى حاجة فرحتنى جدا جدا
--------------------------------
ثالث هدية رسالة جاتلى على الموبايل من مجهول هههههه قصدى من رقم بس تقريبا هو رقم واحدة قريبتى وصديقتى جدا
زى ما توقعت الرسالة من بنت خالتى صديقة عمرى ربنا يخليها ويخلى لها أبنها الجميل
-------------------------------
رابع هدية تهنئة من سمراء النيل على الأيميل بمناسبة عيد ميلادى
-------------------------------
خامس هدية تهنئة برضة من شيماء الجيزى على الأيميل بمناسبة عيد ميلادى
-------------------------------
سادس هدية
هدية حلوة قوى من ماما لسة جايباها من شوية ربنا يخليها ليا
---------------------------------
سابعا
هدية بجد غالية عندى قوى وأثرت فيا جدا لدرجة أن بعيط من الكلام الحلو اللى فيها واللى شايفة أنى أقل منه بكتير
الهدية دى من شيماء الجيزى
----------------------------------
ثامنا
رسالة جميلة من صديقة جميلة قوى على الموبايل شكرااااااااااااااااااااااااااااااااااااااااااا
-----------------------------------
تاسعا
الرقيقة صاحبة مدونة مش قادرة بعتتلى كارت جميل جدا جدا
يا حبيبتى والله مش عارفة أقول لك أيه على ذوقك ده يعنى موضوع وكارت
والله ده كتير قوى

56 comments:

عصفور المدينة said...

ولكن كل خير وبركة
وكل عام وأنت طيبة وتزدادين إنجازات وعلوا بالحق
بارك الله فيك
أنا فاكر يوم مأساة ضياع مدونتك
لكنك وقفت على رجليك مرة أخرى

قيـ ـثارة said...

أنا أول مرة أدخل مدونتك
وأول مرة يبقى عيد ميلادك
ده انا محظوظة بقى
كل سنة وانتى طيبة يا قمر
كل عام وانتى الى الله اقرب وعن النار ابعد وللجنة ارغب
ويارب السنة دي تحققى كل اللى مش لحقتى تحققيه في عمرك اللى فات
وعقبال 100 سنة
ربنا يكرمك ويوفقك في حياتك ان شاء الله

سجدة said...

كل عام وإنتى إلى الله اقرب وإلى طاعته اقرب وعن المعاصى ابعد وعن النار ابعد
وابعتى بقه قطعة جاتوه
وسلامى لأميرة ويلز

Anonymous said...

كل سنة وانتي طيبة ياروح قلبي وان شاء الله العام القادم يكون ربنا جامع بين قلبك وقلب النص الحلو ياااااااااااارب وتكون محققة كل احلامك وطموحاتك يارب ويهديكي الى سواء السبيل

عاشقة الوطن said...

السلام عليكم

ازيك يابسبوسة ياقمر

كل سنة وانتى طيبة وبخير يااارب
وكل سنة وانتى احلى من اللى قبلها وانتى بتستفيدى اكتر وانتى دايما يارب حبوبة فى وسط الناس وكل الناس بتحبك

عقبال السنة الجاية ان اشء الله وانتى محققة كل احلامك
وانتى دايما فى خير وسعادة
وانتى دايما قريبة لربنا
وقريبة منكل الناس اللى تعرفيهم واللى متعرفهمش

كل سنة وانتى طيبة ياأجمل بسبوسة عرفتها

safa7_karmooz said...

كل سنة وانتى طيبة ...

ياااااااااه

كبرتى وعجزتى...كح كح...هههههههههههههه

يارب تكون سنة سعيدة عليكى ان شاء الله

بعد اذنك عايز حتة من الطورطة

Anonymous said...

كل سنة وانتى بالف خير يا بوسى
كل سنة وانتى صديقتى وحبيبتى ورفيقة الدرب
بجد
انا سعيدة بعيد ميلادك ده
وعجبنى جدا تعليق عصفور المدينة
فاكرة ايام ممدونتك ضاعت؟
شايفه دلوقت المدونة شكلها ايه؟
بجد
احلى بكتير من اللى فاتت

كل سنة وانتى بوسى النقية الرقيقه

تحياتى فى اجمل عيد ميلاد

Anonymous said...

تقريا اول زيارة ليا للمدونة كانت بعد ما اتحذفت و فاكر وقتها اد ايه كنتى مضايقة لكن لانك تستاهلى كل خير ربنا عوضك و المدونة رجعت قوية و مرجعتش لوحدها , لكن رجعت و معاها انجازات متقلش عنها اهمية زى المجلة و الصداقات اللى واضح من كلامك انها صداقات بناس مميزة و بيحبوكى زى ما بتحبيهم

على فكرة انا مش ناسى رابعا و مستنى اعرف ايه الجديد اللى لسه معرفناهوش :)

كل سنة و انتى طيبة و سعيدة و عقبال مليوووووووون سنة

بحاول اكون said...

اول مره ازور مدونتك
كل سنة وانتي طيبة وعقبال مليون سنة يا قمر وانشالله السنة الجديدة تحققي اكتر من اللى اتحقق في السنة اللى فاتت وكل اللى نفسك فيه
ربنا يوفقك لما فيه الخير والثواب
موني

Unknown said...

كل سنة و انتى طيبة يا أمورة و عقبال مائة سنة ربنا يسعدك دايما يا حبيبتى :)
مبروك على وجودك بمجلة على صوتك و سعيدة انك قابلتى أدى حال الدنيا ربنا يوفقوا
شكرا ع الهدية الى جبتيهالنا بمناسبة عيد ميلاد مردودالك فى الأفراح :)

Anonymous said...

حبيبة قلبى وروحى وعمرى
كل سنه وانتى طيبه يا ارق بنى ادمه عرفتها
انتى انسانه جميله قويه وربنا هيجازيكى خير
انتى موهوبه وان شاء الله ربنا هايحققلك كل اللى تتمنيه
نسيتى تقولى بس ان احسن حاجه حصلتلك السنادى هى انك عرفتينى
:P
اتمنى اشوفك على خير دايما وطمنينى عليكى
يلا سلام

admin said...

ألف مبروك وعقبال مائة سنة
ومبروك على مقال جريدة الكرامة
سلام

mesh2dra said...

كل سنة وانتى طيبة
يا بسبسة

تستاهلي كل خير بجد

بسمه عبدالباسط said...

عصفور المدينة

وأنت بخير والحمد لله المدونة رجعت تانى وأتمنى أنها تكون عجبتكم
تحياتى لك

بسمه عبدالباسط said...

سمسه

سعيدة جدا بزيارتك وياريت ماتكونش أخر زيارة
وأنتى طيبة يا جميل
ربنا يخليكى
تحياتى لكى

بسمه عبدالباسط said...

سجدة

كل عام وأنتى بخير يا جميل
أتفضلى يا حبيبتى التورتة كلها
تحياتى لكى

بسمه عبدالباسط said...

قلوب حائرة

وأنتى طيبة يا قمر ويارب أحضر فرحك قريب جدا جدا وأبارك لك بنفسى
تحياتى لكى

بسمه عبدالباسط said...

عاشقة الوطن

وعليكم السلام
ازيك انتى يا قمر فينك من زمان
وأنتى طيبة وبخير
وربنا يسعدك يا حبيبتى وشكرا على كلامك الجميل ده
تحياتى لكى

بسمه عبدالباسط said...

safa7_karmooz

وأنت طيب
وأتفضل التورتة كلها
تحياتى لك

بسمه عبدالباسط said...

شيماء الجيزى

وأنتى طيبة وبألف خير وسعادة وهنا يا حبيبتى وصديقتى
وبجد متشكرة جدا على الموضوع اللى عملتيه ليا فى مدونتك ما تتصوريش هو عمل فيا أيه
والحمد لله أن المدونة عجباكى
تحياتى لكى

بسمه عبدالباسط said...

محمد صبرى

شكرا على كلامك وأنت طيب وبكل خير وبسعادة
وسعيدة أن المدونة عجبتك
تحياتى لكى

بسمه عبدالباسط said...

بحاول اكون


سعيدة أنك زورتينى وبتمنى ماتكونش الزيارة الأخيرة
وكل سنه وأنتى بكل خير
تحياتى لكى

بسمه عبدالباسط said...

عاليا حليم

وأنتى طيبة يا جميل
الله يبارك فيكى وشكرا على تهنئتك
العفو على أيه يا جميل دى أقل هدية ممكن أقدمها للناس اللى فرحتنى فى عيد ميلادى
تحياتى لكى

أميرة said...

اولا الله يحرق النت اللى خلانى اتأخر كل دة

كل سنة وانتى طيبة وسعيدة يابوسبوس

تعرفى كل كلمة قلتيها عن السنة اللى فاتت دى انا حسيت بيها لانى عاصرت معاكى التطور اللى حصل دة

وبشكرك ياحبيبتى على كلامك الجميل
عارفة يابسمة الفضل كله لمنتدى الكرامة
لانه علمنى كتير اوى زى ماعلمك بالظبط وعرفنى على حاجات كتير زى ماعرفك وكاننا قبل ماندخله كنا فى الضلمة ولما دخلناه بقينا فى النور واتفتحت لينا دنيا واسعة

ان شاء الله السنة الجاية هتكونى حققتى فيها انجازات اكتر وهتكونى اكبر

مش لحاجة غير لانك عايزة تكونى كدة

انا كنت سعات بتعجب من اصرارك ونشاطك الزايد يمكن اوقات مكنتيش بتوجهيه صح وانتى فاهمانى اكيد
واعتقد دلوقتى قدرتى توجيه فى المكان السليم واعتقد انك بعد كدة هتكونى انسانة مميزة جدا لانك عرفتى نقط ضعفك وقوتك وهتقدرى تعالجى الضعف وتركزى على القوة

عقبال 100 سنة يابسمة كلها نجاح

انتى تستاهلى كل خير

تحياتى وسلامى

بسمه عبدالباسط said...

وينكى

وأنتى طيبة يا قمر ومتشكرة جدا على كلامك الحلو ده
ربنا يخليكى وتحقق كل اللى بتتمنيه
تحياتى لكى

بسمه عبدالباسط said...

4xmisr

الله يبارك فيك
وشكرا على زيارتك وكلامك
تحياتى لك

بسمه عبدالباسط said...

mesh2dra

وأنتى طيبة يا جميل
ومتشكرة جدا على هديتك الرائعة وعلى الموضوع والكارت الجمال قوى
تحياتى لكى

بسمه عبدالباسط said...

أميرة ويلز

النت أصلا كان مستقصدنى أنا وأنتى أمبارح أنا كنت هكسر الجهاز
وأنتى طيبة وبكل خير وسعادة
بتشكرينى على أيه أنا قلت الحقيقة وده كمان أقل من اللى تستحقية
وأنا متأكده أنك أكتر واحدة حاسة بيا لأنك فعلا عاصرتى كل حاجة معايا
وفعلا منتدى الكرامة كان له فضل كبير علينا قوى
طبعا فهماكى وعارفة قصدك ايه ومعاكى فى كل كلمة بتقوليها
وعقبال يا قمر ما نفضل أصدقاء ونكبر وننجح مع بعض دايما
وشكرا على كلامك الجميل ده
تحياتى لكى

YHYيــوســف الـمصـرى said...

السلام عليكم كل سنة وانتى طيبة
شىء جميل اوى انك تحسى انك فى سنة انجزتى حجات كتير واتعرفتى على ناس كتير جميلة زى الى ذكرتيهم وتقريبا ده الى حصل معايا من يوم ما عملت مدونتى
شىء جميل جدا
ربنا يكرمك كمان وكمان وتعملى السنة الى جية انجازات واحلام جديدة
وكل سنة والجميع طيب وبخير بمناسبة حلول شهر رمضان العظيم
تقبل الله منا جميعا ان شاء الله
تحياتى

Eman Eltaher said...

عيد ميلاد سعيد يا ألذ بوسبوس
و يارب كل عيد ميلاداتك

كل سنة و انتى طيبة يا قمر

و يارب عقبال 100 سنة

طب 107 !!!!! هههههههه
يارب عقبال كل السعادة ف كل أيامك

وايوة كده
عايزة البسمة علطول
و التفاؤل

دا انا متفائلة جدااااااااااااا
شفتينى و انا متفائلة ؟؟؟؟؟؟؟؟؟؟
هههههههه

يارب يديم نعمة التدوين علينا و يتم كل نعمه علينا

تحياتى يا جميل

حنين و حنان said...

http://a7babwalakenn.blogspot.com/
hi i want you to visit my blog
happy birthday

غمض عينيك said...

كل سنة وانت طيبةيابوس بوس
ويارب دايما كل سنة كده تكون عندك انجازات ومجاحات وتكوني دايما منورانا

كل سنة وانتي طيبة وعيد ميلاد سعيد
محمد سمير

sherif gharib said...

كل سنه و انتى طيبه و متالقه دايما كده حلو قوى انك فاكره الحلو اللى فى السنه اللى فاتتت من عمرك و انك هامله اى حاجه تانيه
و حلو برده انك اتعلمتى منها كتير لان زى ما انتى قولتى يا ما ناس بتعدى عليهم ايام و كانها صفحات كتب بتتقلب و خلاص
تحياتى مع مزيد من التقدم

Bossy said...

السلام عليكم

كل سنه وانتي بخير ويارب تحققي كل شئ بتتمنيه
واشوفك دايما سعيده
انتي انسانه جميله ووفيه جدا وان شاء الله ربنا دايما هيكرمك
كل سنه وانتي اجمل بنوته في الدنيا
كل سنه وانتي طيبه

بسمه عبدالباسط said...

يوسف المصرى

وعليكم السلام ورحمه الله وبركاته
شكرا على زيارتك وكلامك
وكل عام وأنت بخير بمناسبة رمضان
تحياتى لك

بسمه عبدالباسط said...

eman eltaher

وأنتى أسعد يا قمر
وأنتى طيبة وبكل خير
وشكرا على كلامك يا جميل
ويارب تكون كل أيامك سعادة
تحيات لكى

بسمه عبدالباسط said...

أحباب ولكن

شكرا على زيارتك وكلامك
وكل عام وأنت بخير
تحياتى لك

بسمه عبدالباسط said...

غمض عينيك

وأنت طيب
يارب أدعيلى بس
وكل سنه وأنت طيب
وشكرا على كلامك
تحياتى لك

بسمه عبدالباسط said...

sherif gharib

وأنت طيب وبكل خير
وشكرا على كلامك وزيارتك
تحياتى لك

بسمه عبدالباسط said...

boosy

وعليكم السلام
وأنتى طيبة وبكل خير والله الكلام ده كتير قوى عليا
ربنا يخليكى
وشكرا ليكى
تحياتى لكى

Unknown said...

كل سنة وانتى بخير
وكل لحظة وانتى بخير وان شاء الله السنة الجاية تبقى اجمل

~ Bato0ot ~ said...

kol sana wnty tyba...
ana awel mara agy hena ... w mabsota eny geeet f monsba 7elwa keda 3ashan a2ol happybirthday :D

دنـيـا محيراني(ايناس لطفي said...

اولا انا سعيده جدا لتعرف عليكي يا بوسي ازي انا ماكنتش بدخل مدونتك كنتي مستخبيئه علي الحمد لله قبلت مدونتك اخيرا بجد مدونه حلوه جدا و تدل علي شخصيه صاحبتها شكلنا كده هانبقي اصحاب موت
ثانيا كل سنه و انتي طيبه و عقبال 100سنه و تكون بالف حال و خير
ربنا يحقق ليكي كل امانيك و طموحاتك و احلامك
تحياتي

فى القلب said...

كل سنه وأنت طيبه يا جميله
وعقبال ألف سنه
وليكى منى ميييييييييت مليييييييييون
بووووووووووووووووووسه
وأدينى عنوان البيت
وأنا واللهى أبعت أحلى تورته
لست البنات

gohayna said...

كل سنه وانتي بالف صحه وخير وسلامه يا قمر

ويارب السنه الي جايه تبقي احلي واحلي من الاول

وتكوني في اسعد حال ووضع ان شاء الله

تحياتي ليكي


كل سنه وانتي طيبه

نهر الحب said...

كل سنه وانتي طيبه

Ahmed EIssa said...

كل سنة ونتي بالف صحة وعافية وربنا يسعدك يوهنيكي علي طول

بسمه عبدالباسط said...

أيوية

أزيك يا جميل
وأنتى بخير يا قمر
وشكرا على تهنئتك وزيارتك
تحياتى لكى

بسمه عبدالباسط said...

bato0ot

وأنتى طيبة
وسعيدة جدا بزيارتك وياريت تكرريها
وشكرا على كلامك
تحياتى لكى

بسمه عبدالباسط said...

دنيا محيرانى

أنا اللى سعيدة جدا أنى عرفتك
شكرا على كلامك الجميل ده وأتمنى أن مدونتى تكون عجبتك فعلا وتفضل تعجبك دايما

وأنتى طيبة يا قمر وبكل خير وصحة وسعادة

بسمه عبدالباسط said...

فى القلب

وأنتى طيبة وشكرا على كلامك وأعتبرى التورتة وصلت ليا
تحياتى لكى

بسمه عبدالباسط said...

gohayna

وأنتى طيبة وبألف خير وصحة وسلامة
وشكرا على كلامك يا قمر
تحياتى لكى

بسمه عبدالباسط said...

نهر الحب

وأنتى طيبة وبكل خير وصحة
تحياتى لكى

بسمه عبدالباسط said...

أحمد عيسى

وأنت طيب وبكل خير وصحة وسعادة دايما
وشكرا على كلامك
تحياتى لك

BaSsMa said...

ياخبر عيد ميلادك وأنا آخر من يعلم
انا اسفة جداا والله يابس بس ياقمر على التأخير
***
كل سنة وانتي طيبة وبخير وبصحة يارب
يارب تحققي كل لي تتمنيه ولي جاي يكون أحلى من لي راح
joyeux anniversaire
kiss u
;)

بسمه عبدالباسط said...

bassma

يا قمر ولا يهمك ومفيش داعى للأسف
وإنتى طيبة
وشكرا على التهنئة
تحياتى لكى