ده موضوع من سلسلة مواضيع هقدمها تحت عنوان ماذا تفعل لو
ماذا تفعل لو تزوجت من أنسانة تحبها جدا وكان بها كل الصفات الجميلة التى تتمناها فى شريكة حياتك وبعد زواجكم كنت فى قمه السعادة ولا ينقصك أى شىء
ولكن بعد بضع سنوات أكتشفت أنها لا تنجب
ماذا تفعل هل ستطلقها لكى تتزوج أم ستزوج عليها بدون معرفتها أم تظل معها وتنسى موضوع الأطفال أم تتزوج وتطلب منها أن تظل معك ؟
وهذا السؤال أيضا للفتيات والسيدات ماذا تفعلى لو أكتشفتى أن زوجك لا ينجب وفى نفس هذه الظروف
-----------------
أتمنى أن أجد أجابات صريحة جدا وليست أجابات مصطنعة
57 comments:
شخصياً لو كنت احبها جدا كما قلتي
سأحمد الله
فعسى أن تكرهوا شيئا و هو خير لكم
بالمناسبة
انتي ذكرتي انه سيطلقها او يتزوج من ورائها
ليه مذكرتيش انه ممكن لو متعلق اوي بالخلفة يستأذنها في انه يتجوز و هي لو انسانة بتقدر مش هتقول لأ
و هو لو العيب منه
اعتقد من العدل انه يعرض عليها انه يطلقها و يفترقوا بالمعروف اذا كانت هي متمسكة بالخلفة
تحياتي لكي على السلسلة المتميزة و الفكرة الممتازة
السلام عليكم
بسبسة
جميلة كتير الفكرة دي
بصي يا ستي
ما هو على حسب الشخصية
افترضي مثلا كنا
متجوزين عن حب فظيع
وطلع بعد كده انسان
مش بيتقى فيا ربنا
يبقى حفضل معاه ليه
وكمان مفيش اطفال
انما افترضي انه رجل كريم
مهذب محترم
يتقى فيا ربنا
يبقى حلاقي زيه فين
حتى لو مكنش فيه اطفال
بس فيه نقطة
أنا مختلفة جدددا
مع علاء
هي لو انسانة بتقدر مش هتقول لأ
مش شرط اطلاقا
اصل دى طبيعة بشرية
ممكن توافق آه
بس من جواها بتتقطع
وعلى فكرة لو رفضت
انه يتجوز مش معنى كده
انها انسانة مش بتقدر
لا ..خالص
ممكن يكون بمعنى انها بتحبه
وماتتصورش ان حد
تانى ممكن يشاركها فيه
تحياتي ليكي
ولافكارك الجميلة
سلاااموز
علاء
أشكرك على أجابتك ومشاركتك فى الموضوع والنقطة اللى حضرتك قلت أنى ماذكرتهاش أنا ذكرتها بس جايز الأسلوب ما وضحهاش قوى وهكتبها هنا علشان تتأكد
أم تتزوج وتطلب منها أن تظل معك )
وهيا دى العبارة اللى أنا اقصد بيها معنى الكلام اللى حضرتك ذكرته
وتحياتى لك على مشاركتك الأجابية
mesh2dra
وعليكم السلام يا قمر
وشكرا كتير على مشاركتك الجميلة ورأيك وطبعا أنا مش هقول رأيى الا فى الأخر خالص علشان كده مش هبين سواء كنت رافضة او موافقة على تعليق حد الا فى الأخر
تحياتى ليكى ياقمر وابقى نزلى بوست جديد بقى
صعب أوي نحكم وإحنا بره الموضوع ومعشناش التجربة بجد. بس أعتقد لو كان فيه حب وتفاهم جامد بين الطرفين وسعادة كمان ...يبقى قدر الله وما شاء فعل وده ابتلاء ربنا مقدر غن التنين يستحملوه سوا. وممكن يفكروا في فكرة كفالة أيتام يعوضوا شويه بيها الحنين إلى الأطفال.
ربنا يرزق الجميع بالذرية الصالحة إن شاء الله.
just a reader
أشكرك على تعليقك الجميل ده وزيارتك لمدونتى المتواضعة
تحياتى لكى
السلام عليكم يا بس بس
اذيك معلش بقالي كتير مش باجي بس بجد ماشاء الله المدونة بقت حاجة تانية خالص
اولا الزواج القائم علي حب بيبقي مبني علي التحمل والتفاهم والمشاركة
المشاركة في الكويس والوحش
عشان كدة تلاقي معظم المتزوجين عن حب بيبقي فيه بينهم التفاهم والتحمل لكل مشكلة تقابلهم اكتر من المتزوجين زواج عادي
ايا كان بقي اللي مش بينجب الراجل ام الست فده في الاخر ابتلاء من ربنا ومذكورة صريحة في القران
تفتكري احساس الامومة اكبر ولا الابوة؟
وها ده كاف لانفصال اتنين متزوجين عن حب زي مبتقولي؟
الا ان الموضوع له محور تاني
الضغط النفسي..للاسف التعامل مع الموضوع ده بالذات في المجتمعات الشرقية بيبقي اكتر من مجرد حالة
بيبقي صفعة واهانة
وبيبقي الضغط النفسي بين الزوجين اكبر بكتير من التفاهم والحب اللي بينهم
ده غير كلام من حولهم حول ضرورة الانجاب بيضفي علي حياتهم مرارة وضغط نفسي اكتر من اللي موجود
واللي ينهار الاول هو اللي يطلب الانفصال
مهما كان الحب والتفاهم اللي بينهم
عشان كدة تلاقي معظم حالات الانفصال بتبقي بسبب النقطة دي
صحيح انا عايز اعرف رايك في الموضوع ده ولا انتي بتشوطي الكورة وتجري؟؟
يلا سلام
عشان مكدبش عليكى..
ممكن أسألها الأول ينفع أتجوز عليها ولا لا
وربنا يسهل :)
مع انى مبحبش نوع اسئلة ماذا تفعل لو ده لكن هجاوبك
لا مش هتجوز عليها وهنعيش حياتنا عادى جدا
تحياتى
بصراحة لا ادري بس انا كرجل
هطلب انى ابقى عليها واتزوج باخرى
فلو لم ترضى فلا ادري بس معتقدش انى هكون المضحى
لان لو العكس حصل وانا اللى مبخلفش لن ارضى ان يضحى اخر من اجلى
بس بصراحة سؤال مش من التو قعات
بصي يا ستي
يمكن انا فكرت في الموضوع دا قبل كدا بحكم اني شوفت موقف مماثل لدا
بيني وبينك هيكون الحكم علي اسس كتير جدا
اولا درجه حبي ليه
ثانيا درجه استحقاقه للتضحيه الي هعملها
مفيش شك انها تضحيه صعبه الي ابعد الحدود
وبالتالي لازم يكون الشخص اغلي منها
لو توافرت الشروط دي
مش هتردد لحظه اني اكون جنبه
بس يا ستي
تحياتي
أحمد عيسى
وعليكم السلام وشرفتنى زيارتك وفرحانة أن المدونة عجبتك ولاحظت أنها أتغيرت
رأيك مهم ويحترم جدا
بس أنا برضة مش هقول رأيى غير فى الأخر بعد التعليق رقم مليون كده
بص أنا مستنية بس علشان محدش يتأثر برأيى وفى الأخر هقول رأيى أكيد
تحياتى لك
amir-el zalam
سعيدة بزيارتك جدا وياريت تكررها تانى
وسعيدة بصراحتك دى قوى
تحياتى لك
محمد ياسر
مرحبا بيك وسعدت بزيارتك جدا
وسعيدة بصراحتك قوى قوى
تحياتى لك
المهاجر
مرحبا ييك وسعيدة بزيارتك جدا جدا
وسعيدة بصراحتك
تحياتى لك
gohayna
ازيك يا قمر عاملة ايه وحشانى
وطبعا رأيك يحترم جدا جدا
ومش هقول رأيى دلوقتى
تحياتى يا قمر
بصي من شخص للتاني تختلف
ومن ظروف لظروف ومن تفاهم لتفاهم ومن تضحية لتضحية ومن ومن
الحب عطاء
عطاء للنهاية وبدون مقابل
بس مش دة الحل الحل موجود في في دستور سماوي
اننا نرضي بهبة الله اولاد او بنات وبمشيئة الله في العقم
دة لو كان من الرجل
لو كان من الست
يتوقف عليها وعلي حبها وعطاءها هي
مش الراجل هنا هو الي ياخد قرار
فهماني ؟؟
اة نسيت حاجة مهمة لو من الراجل كمان يخيرها
ويعطيها حريتها لو عايزة
لان الامومة عن المرأة شديدة
ولو رضوا هما الاتنين مع حب
بدون منة او معايرة
يبقي خير
كراكيب عادل
أهلا بيك فينك من زمان
طبعا وجهه نظرك لها كل الأحترام والتقدير
وطبعا طبعا زى ما قلت رأيى هاتعرفوه فى الأخر
تحياتى لك
بكل امانة يا بس بس
ومش مثالية والله
مش ممكن اسيبها ابدا
مستــــــــــــــــــحيل
الاطفال دول رزق من عند ربنا ممكن يكون مكتوب لك الرزق دة وممكن لا
وبالتالي لا يمكن اضحي بحب العمر علشان حاجة في علم الغيب
وبعدين مين يعرف اني لو تزوجت عليها هنجب ولا لا؟
وكمان مين يعرف ان الاولاد دول مايطلعش منهم ولد عاق او جاحد؟
انا رأيي
ان اللي يسيب زوجته او يتزوج عليها علشان الانجاب هو جاحد ونكر للجميل
مع احترامي للجميع
تحياتي ليكي يا بسبس
الف شكر على موضوعاتك الجميلة
a.samir
أهلا بيك وحمدالله على السلامة الغيبة طولت قوى
على العموم رأيك طبعا ليه كل الأحترام وأنتظروا رأيى فى النهاية
تحياتى لك
السلام عليكم
طبعا تانى رد ليا فى المدونة , و أنا واثق بإنه مش هيكون الأخير و بإنى هكون متابع دائم للمدونة لأنه ببساطة المدونة بمجرد زيارتى ليها سابت جوايا انطباع و احساس الهدوء و بالراحة النفسية نادر انى الاقيه فى مدونات تانية كتير, و الاحساس ده مجاش من فراغ , بالعكس في عوامل كتير جدا ساعدت أنى احس بيه زى مثلا اسم المدونة نفسه - الروح - الروح اللى طبعا بقت غايبة أصلا عن كل حاجة سواء فى الحياة العادية أو حتى فى العالم الافتراضى , كمان تصميم المدونة نفسه, و بعدين و الأهم المحتوى نفسه - بجد يستاهل كل الإشادة و التقدير -
أسلوب سلس و أفكار عميقة فى نفس الوقت , حتى الردود بجد مبهرة , ما شاء الله كل الناس هنا بتعرض وجهة نظرها بدون تعصب و بدون متقطع فى بعض زى ما بيحصل فى مدونات كتيرة جدا
الظاهر ان صاحب المدونة بشكل تلاقى بيفرض طبيعته و احساسه على زوار المدونة , أو بمعنى تانى اكيد اللى بيزورا المدونة و مداومين ع الزيارة عندهم نفس نزعة الهدوء اللى احب بجد انى احييكم كلكم عليها
نخش بقى فى الموضوع
بالنسبة بقى للموضوع , سلسلة الأسئلة دى , فالفكرة جميلة جدا و بالذات بقى أن نوعية الأسئلة نفسها من النوع اللى من خلاله ممكن رواد المدونة يعرفوا بعض اكتر و يفهموا جوانب كتير من شخصياتهم بشكل أفضل و ده أحد اسباب وجود المدونات فى الأساس (مشاركة الخبرات الحياتية و تكوين صداقات بين شخصيات متقاربة فى التفكير و ليها نفس الهموم و بتشارك بعض نفس الاهتمامات ) يعنى الفكرة فى صميم الهدف
و بالنسبة للسؤال المرة دى فمعلش ردى ممكن يكسر الهوء اللى فى الموضوع لكن و الله انا مش متعمد و هحاول قدر الامكان انى اختصر
يعنى السؤال مبنى على فرضية ان الجواز قائم بين اتنين متجوزين و بيحبوا بعض و بعدين اتعرضوا لظرف معين اللى هو عدم الخلفة
طيب أنا المفروض مليش أنى أخرج بره الفرض ده و لازم ابنى عليه و على اساسه ردى , لكن كمان السؤال موجه ليا و عشان كده انا هرد رد خاص بيا و اتمنى انه بُعتبر رد فرعى و عابر لانه يمكن يخرج حبة بره صلب الموضوع
أنا هسأل بس كام سؤال لبوس بوس اثارهم عندى تساؤلها ده
هو ممكن فى زمانا ده مكان للحب يعيش و يتطول فيه اصلا بالشكل الطبيعى؟؟
و لو حصل ممكن الحب يعيش بعد الجواز و متقضيش عليه المشاكل الاقتصادية و كمان الاجتماعية و النفسية اللى بتتفجر بعد الجواز لما كل واحد بيشوف فى التانى اللى مكنش شايفه فيه قبل الجواز , و خاصة اننا و بكل أسف بقينا اصلا مجتمع غالبيته من الغير اسوياء نتيجة للتربية القاصرة , اللى يكفى عشان نقول عليها قاصرة , يكفى انها ليها مليون شكل و بتطلع افراد غير متجانسين تماما فى داخل المجتمع الواحد؟؟؟
لكن انا هفترض معاكى ان ده حصل فعلا و الحب استمر , بيتهيالى لو لسه فيه حب من النوع ده و صمد قصاد كل المعوقات دى .. يبقى مؤهل انه يصمد قصاد مشكلة الخلفة دى , و ساعتها مش ممكن هيطلق زوجتى , لكن التلت احتمالات التانية هتبقى واردة على حسب درجة الحب , لو بعد كل ده فضل حبى فى قوة الحب اللى فيلم قصة مدينتين مثلا يبقى مش هتعنينى مسألة الخلفة دى اصلا , و لو أقل شوية مش هتجوز إلا برضاها , و لو بحبها بس مش اد رغبتى فى الخلفة يبقى وراد انى اتجوز من وراها ,, و لو انه فى حالتى انا كمان الحل الاخير ده مستبعد لانه مش من طبعى انى اتصرف بالشكل ده
معلش الاجابة مجتش صريحة اوى :((( و طولت عليكم و هحاول بعد كده مطولش بجد
تحياتى ليكى بوس بوس ... و نحياتى لكل اللى ردوا و متابع ردودكم
محمد صبرى
أولا مرحبا بيك محمد وسعيدة جدا بزيارتك دى
ثانيا شكرا على المقدمة الجميلة والكلام اللى قلته فى حقى وحق مدونتى بجد أنا مبسوطة قوى مع أنى شايفة أنى ما أستحقش كل ده بس برضة متشكرة جدا ليك
بالنسبة بقى للموضوع أنا ليا تعليق كبير عليه بس مش دلوقتى لأنى من الأول قلت أنى هقول رأيى فى الأخر وعلشان محدش يتأثر برأيى
تحياتى لك وشكرا على كلامك الجميل
هو سؤال محرج
بس انا حتكلم عن نفسى و مليش دعوة بحد وكمان حتكلم بواقعية
انا عن نفسى استحالة حسيب مراتى
لأنى بحبها
وبما انى بحبها يبقى لازم احافظ على مشاعرها
وبمجرد انى اتجوز عليها يببقى انا كده بأحطمها وبأموتها موت بطيىء
يبقى مفيش قدامى غير انى اصبر
وان شاء الله ربنا حيبدلنى عن الغنجاب خير
السلام عليكم
mo"men mohamed
مرحبا بيك وشرفتنى وسعدت بزيارتك
وبرأيك اللى لازم أحترمه جدا
تحياتى لك
انا شخصيا ححافظ عليها و اصبر معاها بجد مش كلام لان الحب و الاخلاص بقو نادرين الوجدو بس هيه فين تيجي بس و انا احطها في عنيا
تحياتي
مدام في حب...يبقى خلاص مش مهم اي حاجة تانية
ولو طلبت معانا عيال...نبقى نكفل يتيم ندخل به الجنة
أنتظار مؤقت
أهلا بيك وشكرا على مشاركتك ورأيك اللى ليه كل الأحترام منى
تحياتى لك
marvel
مرحبا بيك وسعيدة جدا بزيارتك لمدونتى
وسعيدة برأيك
تحياتى لك
بجد بجد وبكل صراحة
هاحمد ربنا واشكر فضله على كل اللي انا فيه وهدعيه ان يرزقنا باللي فيه الخير
ده نصيب وقدر الله وهي مش زنبها ابدا انها لا تنجب
تحياتي ليكي
محمد سمير
بالمناسبة يابوس بوس ماجربتيش تبعتي لجوجل وتسألي ان كنتي تقدري ترجعي البوستات اللي اتمسحت؟
انا قبل كده الميل بتاعي اتقفل ع الهوتميل وربعت ميل رجعت بيه الايميلات كلها
تحياتي ليكي
محمد سمير
غمض عينيك
أشكرك على مشاركتك وردك على الموضوع
بس أية حكاية جوجل ده مش عارفة بتتعمل أزاى ياريت تعرفنى ولك جزيل الشكر
تحياتى
bos bos
I donno exactly the procedure through which you can proceed but try first to contact "Blogger Help Group" and post ur question about how to retrieve your deleted post or how can you contact Google/Blogger help Center and I'll try to find more and will feed you back
M.Samir
بوس بوس انا متفقة جدا مع راي استاذ علاء لانه لو بيحبها فعلا قوي ومش هيقدر على بعدها يستاذنها في الزواج من ارخ احسن مايكون موضوع الانجاب حاجز ما بنهم ومفيهاش حاجة ابدا ولاشي يقلل من حبها ابدا
غمض عينيك
شكرا على ردك وتوضيحك وهجرب وأشوف النتيجة
تحياتى لك
قلوب حائرة
ازيك يا قمر شرفتنى زيارتك الجميلة
ومتشكرة على رأيك اللى ليه كل الأحترام
تحياتى لكى
شخصيا انا لو بحبها اوى يبقى المهم سعادتها هيه اللى بيحب يضحى ومش انانى علشان كدا انا عن نفسى مش هتنازل عنها ولازم اجرب كل الوسائل المتاحة لو محصلش حاجة يبقى قدر ربنا معايا
قومى الى الأبد
مرحبا بيك وشرفتنى زيارتك وسعدت بها جدا
ورأيك له كل الأحترام منى
تحياتى
استحالة اني هسيبة او هتخلى عنة لاني حبيتة هو قبل ما احب ولادة الي لسة مجوش
وعمري ما هحسسة باني لازم اكون ام وليا اولاد
لان دة نصيب وحكمة من ربنا
لولا
شرفتنى زيارتك وسعدت بها جدا
ورأيك مهم جدا وله كل الأحترام منى
تحياتى
من واقع خبرتى فى الحياة
ومن واقع تجارب الآخرين من حولى
اجيبك عزيزتى على سؤالك
لن يصمد الرجال.. كلهم على فكرة
ولو تابعتى كل اللى كتب مش ممكن اسيبها والكلام الفارغ دة لمدة 20 سنة جاية هتلاقيهم كلهم ومن غير سبب طهقانين من زوجاتهم اللى اتجوززهم عن حب برضه
يبقى لازم تعرفى ان .. لن يصمد الرجال
وسوف تصمد غالبية النساء
تعلمت المرأة منذ نعومة اظافرها ان تخضع للظروف
تعلمت ان تقبل كل شىء
تعلمت ان للحب قيمة
تعلمت ان عصفور فى اليد أضمن
بينما تعلم الرجل
الغرور
الأنانية
انه محور الكون
ان الحب آخر متطلبات الحياة
ان المرأة أداة
وعاء انجاب
تحياتى لك على بوست قوى خلانى افكر
ياسمين
أزيك يا قمر بجد بفرح قوى من تعليقاتك الجميلة قوى
وسعدت بوجودك فى موضوعى ده وسعدت أكتر برأيك الرائع
تحياتى يا قمر
هوه ليه كده؟؟
يعني أنا داخل أقرا موضوعك الجديد أفاجأ بإنك عملالنا تاج على سهوة كده؟
ع العموم أنا ممكن أجاوب ع السؤال بصراحة
بصي يا بوس بوس
نجيب من ورا لأدام
موضوع الأطفال ده ... كل انسان مننا سواء راجل أو ست بيبقى نفسه فيهم ويشوف من الشخص اللي بيحبه طفل بيعتبروه هدية من بعض
لكن مسألة الأطفال دي وأكيد كلنا عارفين بتبقى حاجة بتاعة ربنا مش لينا فيها
إيه اللي هيحصل يعني؟؟ طالما الشخصية دي اتجوزتها وحبيتها ورضيت تكون شريكة حياتي فليه أعاقبها على حاجة مش بإيديها وكإنه ذنب وارتكبته ف حقي
طالما ربنا اللي مقدر ده يبقى أقول إن ربنا عايزنا نعيش مع بعض ومحدش يقطع علينا لحظاتنا الجميلة وعيشها حب يا عم الحاج
تحياتي
sakayar
أهلا بيك ومرحبا بزيارتك سعدت بها جدا جدا
ورأيك مهم وله كل الأحترام منى
تحياتى
لو فيها كل الصفات اللي بتمناها عمري ما هسيبها او اطلقها الخيار ده مرفوض حتي لو كانت عايزه عشاني ,,اما بالنسبه للزواج بأخري ممكن بس لازم بعلمها وموافقتها ده اساسي
وتحياتي
ابن ناصر
مرحبا بيك سعدت جدا بزيارتك وبرأيك الصريح
تحياتى لك
لو بحبه اوى وهو مش بيخلف حرضى باللى ربنا قسمه لنا وحفضل معاه والست اما بتحب بتشوف ان راجلها ده هو كل حياتها يعنى ابوها واخوها وعشيقها وابن عمها وجارها يعنى هو كل الرجالة فى بعض .. بس يا ترى هو حيقدر ده ؟ وياترى لو هى مكانه حيعمل كدة ؟ وبعدين لازم نرضى ونعرف ان ربنا مقسم كل واحد له ايه .. انا شخصيا مش حسيبه ولا بالطبل البلدى
bocycat
أزيك يا جميلة وحشانى
وسعدت بمشاركتك ورأيك مهم جدا جدا
تحياتى لكى
أكيد أكيد عمري ما هسيبها البنت مش مجرد اله بتجيب اطفال دي احساس ومشاعر ارقى من كده بكتير
وبعدين الموضوع ده مش بأيديها خالص
علشان كده هحطها في عنيا وأحاول اعوضها عن الجزء اللي هي مفتقداه
تحياتي ليكي
أنا حر
سعدت بمشاركتك ووجودك هنا
ورأيك مهم جدا جدا
تحياتى لك
عارفه يا بسبس ده ساعات بيكون ده نعمة من عند ربنا صدقينى
حتى لو بيحبها او مش بيحبها
عارفه زمان كانوا حتى لو بيحبها ممكن يتجوز عليها
وانا بصراحه ...مقدرش اقول انه غلط
لانه ميه فى الميه صح
حتى الدين صرح له بكده
انا يمكن ردى مش هيكون زى الراجل
بس يمكن انا شايفه انه دلوقت مبقاش
زى الاول
...............
لقاء المدونين فى بورسعيد
يوم الجمعه الموافق 13\7
ارجو حضوركم
والله الموفق
تحياتى
شيماء الجيزى
أزيك يا قمر وحشانى قوى فينك من زمان
ورأيك صريح ومهم جدا
وبالنسبة للقاء للأسف عندى ظروف تمنعنى من التواجد معاكم كان نفسى أكون معاكم بجد يالا تتعوض مرة تانية
تحياتى لكى
هقول بقى رأيى وأمرى لله
لو فعلا أرتبطت بواحد كويس وكنت بحبه قوى وكنت سعيدة معاه وحصل بعد مده وعرفت أنه مابيخلفش أستحالة هسيبه لأنه عندى أغلى من كل حاجة
وبعدين معلش يعنى لو فكرت أسيبه ما أنا ممكن أتجوز واحد وأخلف عيال وتكون حياتى جحيم مع التانى ده
وأنا أصلا عمرى ما هفكر أسيبه أبدا أبدا مهما حصل
أدخل بقى على النقطة التانية لو حصل وكان سبب عدم الخلفة منى مش هكون أنانية خالص وهعرض عليه يتجوز معرفش أنا ساعتها هختار أيه يعنى هختار أفضل مستمرة معاه بعد ما يتجوز ولا أسيبه وننفصل ويعيش حياته
بس اللى متأكده منه أنى هعرض عليه أنه يتجوز علشان يخلف
وده كان رأيى
السلام عليكم
ان التعدد شرعة الله سبحانة وتعالى لاستقامة الحياه وليس لأن تتهور النفسيات و وتظل الزوجة كالمعلقة لا زوجها يعطيها حقوقها ولا هو يتركها
فالتعدد شرطة العدل فى المبيت والنفقة
و العدل فى كل ما أملك
اللهم هذا قسمى فيما أملك
فلا تؤاخذنى فيما لا املك
وعلية ان تنفيذ شرع الله ليس به آراء
والأهم ان يتم كل شىء بالمعروف وهذا يتطلب تفهم للشرع وليس للأهواء والعادات
تحياتى
الطائر الحزين
أهلا بيك ورأيك طبعا معروف ومفهوم وأحنا مش معترضين على شرع ربنا لكن أحنا بنتكلم من الناحية النفسية لو واحدة هتحس بضرر نفسى لو جوزها أتجوز عليها لأى سبب من حقها تطلب الطلاق
ولو واحد برضة حس أنه نفسيا مش متوافق مع مراته من حقه برضة يتجوز وهى ليها حرية القرار تفضل معاه او تسيبه
رأى الدين صدقنى أحسن رأى لكن للأسف مفيش واحد بيعدل ولو حصل بيكون واحد فى المليون
تحياتى لك
فين رايك؟؟؟؟؟؟؟
أنا كتبت رأيى وهكتبه تانى
لو فعلا أرتبطت بواحد كويس وكنت بحبه قوى وكنت سعيدة معاه وحصل بعد مده وعرفت أنه مابيخلفش أستحالة هسيبه لأنه عندى أغلى من كل حاجة
وبعدين معلش يعنى لو فكرت أسيبه ما أنا ممكن أتجوز واحد وأخلف عيال وتكون حياتى جحيم مع التانى ده
وأنا أصلا عمرى ما هفكر أسيبه أبدا أبدا مهما حصل
أدخل بقى على النقطة التانية لو حصل وكان سبب عدم الخلفة منى مش هكون أنانية خالص وهعرض عليه يتجوز معرفش أنا ساعتها هختار أيه يعنى هختار أفضل مستمرة معاه بعد ما يتجوز ولا أسيبه وننفصل ويعيش حياته
بس اللى متأكده منه أنى هعرض عليه أنه يتجوز علشان يخلف
وده كان رأيى
اممممم هى فعلا حاجه محيره
تفضل مع الى بتحبه والى ادتك حياته وقررته تعيش معاه..ولا لاحباب الله
وهل لو كل واحد اتجوز واحد لا تنجب وبعدين طلقها..هل الفتيات دى تفضل كدا..دا قضاء ربنا وقدره
تفضل عانس ..؟؟؟
سؤال محير
علشان كدا اعتذر عن الرد
تقبلى مرورى\\\\\\\\\\\
Post a Comment