Monday, June 18, 2007

غمض عينيك الجزء الثانى

بعد موضوعى غمض عينيك وبعد الردود اللى تلقتها على الموضوع وجدت العديد من
الناس يعيشون نفس الحياه
لذلك قررت أن أفتح معهم حوار حول هذه الحياه وأدخل أكثر فى تفاصيلها
والى الآن أجريت خمس حوارات سوف أقدم منهم حوارين فى هذا الجزء وباقى الحوارات فى الجزء القادم
وسوف أقدم الحوارات على حسب ترتيب أجراءها
------------------------
وسوف ابدأ أولى الحوارات مع سندباد صاحب مدونة فكرة
الاسم / امجد
السن / 35 سنة
المؤهل / ليسانس حقوق
العمل / خبير قانوني بالمحكمة
اسم المدونة / فكرة
سبب أختيارك لأسم المدونة
لان في راي ان كل حاجة بدات في الدنيا كانت في الاصل فكرة ده سبب والسبب التاني اني مش ببطل تفكير دايما عقلي شغال مش عايز ياخد هدنة فكان طبيبعي ان اسمي مدونتي بالفكرة لكثرة التفكير
الأن وبعد أن تعرفنا عليك وبعد أن سمعنا رأيك فى موضوع غمض عينيك أو حياه العين من خلال ردك على الموضوع نريد معرفة شكل هذه الحياه معك وبعد أعترافك أنك ترى آحلامك تكبر أمامك وتدفن بنفسك أحزانك وبتتكلم مع أشخاص أمامك
كلمنا عن هذه الحياه وما رأيك فيها وما هى هذه القصص التى تعيشها وهل تكون حقيقة أم خيالية كلمنا عنها وهل تحب هذه الحياه أم لا
بالنسبة لموضوع غمض عنيك او حياة العين الموضوع ده بدا معايا من فترة طويلة جدا وكانت المسالة في الاول عبارة عن تعبير عن كبت او وسيلة للتنفيث عن غضب وكان بيجي علي فترات طبقا للحالة النفسية ثم تحول الامر الي انه اصبح من الطقوس اللي لازم اعملها قبل ما انام لاني بطبعي مش من النوع اللي بنام علي طول باخد فترة طويلة قبل ما ادخل في النوم ولا اخفي سر اني قبل ما انام بيمر عليا شريط اليوم بالكامل وافضل افتكر واحلل كل موقف حصل واتخيل اني مثلا لو كنت رديت علي شخص معين بكلام غير اللي انا قلته كان هايقول ايه وافضل اتخيل واعمل سيناريو كامل – ده ناهيك علي ان الامر بيوصل معايا اني بحس ان بسمع صوت اللي بكلمه – واحيانا بتخيل حاجات كتير مش حقيقية لشئ بتمني حدوثه جدا وببقي مستمتع جدا جدا وانا بحس ان ممكن الموضوع ده يحصل بالصورة اللي انا رسمتها في خيالي وبصراحة انا مقدرش اتخيل نفسي من غير حياة العين دي لانها اعتقد انها نوع من انواع التخفيف النفسي للواقع الصعب اللي احنا عايشينه
----------------------------
وثانى حوار مع ضد الظلم صاحب مدونة ضد الظلم
الأسم / ضد الظلم
السن/ 23 سنه
المؤهل / بكالوريوس حاسب آلى
العمل/ صاحب محل
أسم المدونة/ ضد الظلم
سبب أختيارك لأسم المدونة
ضد الظلم لان انا بطبعى بكره الظلم والظالمين وبحس بمراره لما بشوف حد بيتظلم
ونفسى اكون ضد الظلم على طوول واقدر اعمل حاجة
الأن وبعد أن تعرفنا عليك وبعد أن سمعنا رأيك فى موضوع غمض عينيك أو حياه العين من خلال ردك على الموضوع نريد معرفة شكل هذه الحياه معك وبعد أعترافك أنك تظل حوالى ثلاث ساعات تعيش هذه الحياه وتخترع قصص وتعيشها
كلمنا عن هذه الحياه وما رأيك فيها وما هى هذه القصص التى تعيشها وهل تكون حقيقة أم خيالية كلمنا عنها
انا لما بغمض عيونى بخرج من عالم الفساد الى بنعيش فيه كلنا وبحاول ادخل
لعالمى الخاص عالم خالى من الفساد والمفسدين والظلم والظالمين وبحاول اكون بطل
قصه كل يوم يعنى مره اروح العراق وساعد المقاومه ومره اروح فلسطين واصلى فى الاقصى واجاهد مع المجاهدين
بحلم بحببتى وبرسم الدنيا الى بنتمنى انا وهى نعيشهابحلم بيوم الثورة فى مصر ونحررها من الفساد باديناوبفضل كدة لحد ما النوم يصالح عيونى ويجينىودة طبعا هروب من الواقع المؤلم الى بنعيشه
ومحدش يقول مجنون ( الجنون هو قمه العقل ) 0
--------------------
أتمنى أن تحوذ الحوارات على أعجابكم وباب الحوارات مفتوح لأى شخص يريد عليه أن يرسل لى لفتح معه حوار
وباقى الحوارات سوف تكون فى الجزء الثالث من الموضوع
تحياتى لكم

12 comments:

ibn nasser - ابن ناصر said...

حوارات لطيفه ومن الجميل انك بتأتي ببعض المدونين ..شرف للتدوين ليس كما يوجد البعض الان في الحديث عن التفاهات التكلم بالشتائم والبذائات,,,بس بالحوارت الجامده دي مش هتبقي وزيرة القوي العامله لأ هتمسكي مؤسسة الاهرام ,, وبقول لضد الظلم الثورة جايه متستعجلش :)

تحياتي

بسمه عبدالباسط said...

ابن ناصر

أشكرك على كلامك ده بجد أسعدتنى جدا كلماتك
وبعدين همسك الأهرام بحالها لا ده كتير قوى عليا
على العموم متشكرة جدا جدا
وباب الحوار لسة مفتوح لو عايز عرفنى بس
تحياتى لك

كراكيب عادل said...

جميل الحوار

تحياتي

أنا حر said...

حوارات جميلة كالعاده انت متميزة في افكارك الجديدة المختلفة كل بوست عن البوست اللي قابله
اتمنالك التوفيق وتنفيذ كل افكارك
تحياتي

Bossy said...

السلام عليكم

لا دا انا لازم اشغلك في الجرنال بتاعي
انت عارفه الجرنال الوهمي اللي مفيش حد بيقراه غيري
والله بجد الحوار حلو والردود جميله
والموضوع نجح بفكرتك و مشاركه الاخوه المدونين
مستنين الجديد وبحييك كمان علي العدد التاني للمجله

سندباد said...

شكرا علي مجهوداتك
نحياتي الخالصة

بسمه عبدالباسط said...

كراكيب عادل

سعدت بزيارتك
تحياتى

بسمه عبدالباسط said...

أنا حر

شكرا على كلامك الجميل ده
وبتمنى لك التوفيق فى حياتك
تحياتى

بسمه عبدالباسط said...

boosy

وعليكم السلام
أزيك يا قمر وأنا موافقة على الجرنان بشرط أنك تكونى معايا
تحياتى ليكى يا قمر

بسمه عبدالباسط said...

sendbad

العفو على ايه لولا وجودكم ماكانش الموضوع نفع
تحياتى لك

Anonymous said...

بنت
ايه ده
ايه ده يا بنت

هى الحوارات للنشر
عااااااااااا
مكنتش اعرف
وانا اقول البنت كانت بتتكلم رسمي ليه في الرسالة

يعنى حلاقي رسالتي منشورة كمان بوست ولا اتنين

""
ايكون مذبهل

ماشي ..انشري
بس شيلي منه حاجات تتشال
ها
ماشي يا بسبسة:)
مووووا
بديكي بوسة عشان برشيكي
:)

بسمه عبدالباسط said...

mesh2dra

ههههههههههههههه
أيه ده أنتى ما كنتيش تعرفى أنها للنشر
ماشى يا قمر هشيل منها ما تقلقيش
تحياتى