Friday, December 31, 2010

حصاد 2010 الجزء الثانى

الجزء الأول هنا

أكثر شىء يؤلم أى أنسان أن يضحك وبداخله أحزان كثيرة ولا يشعر بها أى شخص

الموت الحقيقي يبدأ عندما تموت كل آحلامك ولا تستطيع تحقيق أي حلم منها وتظل تتراكم حلم وراء الآخر حتي تشعر كأنك شبح يعيش بدون حلم ولا أمل في تحقيق أي حلم بعدما تداس كلها تحت أقدام الآخرين

الحياة محطات وكثير منها يجرحنا ويؤذى مشاعرنا

شعور مرير عندما تحمل هموم كل من حولك ولا تجد من يحمل معك همومك وقتها يجب عليك حملها بمفردك لأنك الوحيد القادر على فهم نفسك

لماذا نستسهل جرح بعضنا البعض وبعدها نبكى على اللبن المسكوب ؟

أحيانا يكون الوقت عائقا أمام بعض آحلامنا ووقتها نتمنى أن نوقف الزمن وأن نعود قليلا للوراء ولكن الذى يذهب لا يعود أبداااااااااااااااااااااااااااااا

عشقى لكل ما هو قديم يشعرنى كأنى أعيش فى زمن آخر لا أعرفه وروحى تعيش وحدها فى الماضى

الفرحة كالهواء نتقاسمها مع الجميع ويتسابق الكل لأخذ نصيبه منها ولكن الحزن لا يتسابق أحد لأقتسامه معك لذلك أحفظه بداخلك ولا داعى لظهوره أمام الآخرين

شعور مؤلم عندما تداس مشاعرك وأحاسيسك تحت أقدام الآخرين ولا يشعروا بما فعلوا ولكنهم نسيوا أن قسوة قلوبهم سوف ترد لهم حينما يأذن الله فلا تكن غليظ القلب ولا تبالي بما تفعل لأنه سوف يرد لك يوما ما

ربما يكون هذا هو الوقت المناسب لأصلاح الكثير من الأخطاء وتحرير الكثير من الآحلام وفك القيود والضغوط والبعد عن الحماقات والكثيرين الذين يسببوا الأحباط والمشاكل

نظرت الى المجتمع نظرة أشمئزاز وأخرجت له لسانى متمنية من الله أن يشفيه من أمراضه وعقدة

من المؤسف أن تجعل قلب من يحبك أرضا تدوس عليها بقدميك ولا تبالى بما فعلت

عندما تحتاج لأشخاص بعينها ولا تجدهم فمن الأفضل أن تصمت وتحترف الصمت وتجعله منهجا فى حياتك بدلا من شعور الأحتياج الذى يعذبك

شعور بالوحدة يتخلله صمت وبرود وجمود وأحتياج وبركان ثائر بداخلى يود أن يخرج ويصيح بأعلى صوت ويصرح بأنه بشر ويود أن يعيش مثل باقى البشر

أحيانا يشعر الأنسان بأشياء لا يستطيع ترجمتها لكلمات وتبقى وقتها لغة الصمت مع لغة العيون المعبر الحقيقى عن كل شىء وأى شىء

أحتاج للنوم كثيرا حتى أراك فى آحلامى فكما أراك فى آحلامى أراك فى واقعى بعد أستيقاظى

عندما نامت جفونى حلمت بك وتمنيت أن أقضى عمرى كله نائمة كى لا تغيب عن عينى ولكن تبا لذلك الأرق الذى يأخذنى منك دائما

حتما سيأتى يوما ما لتعرفنى جيدا وتعرف ما يفرحنى ويبكينى وحتى ذلك اليوم لا تنسى أى لحظة سعادة سببتها لك

ويأتى أجمل فصول العام لى وأحبهم لقلبى ويبدأ معه حنينى لكل شىء أحبه ولكل الأشخاص التى تفصل بينى وبينهم المسافات وأود أن أخرج لأسير على كورنيش النيل وهو خالى تماما من المارة ولا يوجد غيرى أنا والماء والهواء والبرد

عندما تسقط حبات المطر على الطرقات وتنظف كل شىء يقابلها أشعر بأنها تغسل همومى وتمحوها واحدة تلو الآخرى

عندما يصبح الهواء الذى تتنفسه هو وجود من تحب بجوارك فلا تمنعه من أستنشاق بعض الحب يوميا حتى يستطيع العيش بك ولك

عندما يصبح الحب الهواء الذى تتنفسه والماء الذى تشربه فاعلم أنك وصلت لمنتهى العشق

كلما أزادات برودة الطقس وتكاثرت الأمطار وتناثرت قطراتها على شرفات غرفتى أتذكر كلماتك التى تدفئ قلبى وعقلى وأنظر لهؤلاء الذين يجرون هنا وهناك هربا من البرد والمطر وأبتسم لهم غير مبالية بما يحدث ولا بنظراتهم لتلك التى تسير فرحة سعيدة بحبات المطر وبك

وعدتك أنى سأظل على عهدى معك طوال حياتى فكيف أخلف وعدى وأنت كل حياتى

يصبح يومها سعيدا جميلا مختلفا عندما يبدأ بسماع صوتة فلا تحرمها من سماعه كل يوم

شعرت الآن وبقوة أن قلبها أخذ وعد من الجراح طيلة حياتة بأن لا تتركها فما أن تهدأ قليلا لتستيقظ مرة آخرى لتجد الجراح تنظر لها وهيا تخرج لها لسانها لتذكرها أنها مازالت حية وتحت الطلب

افعل كل ما شئت بها واجرحها كما تشاء وتخلص من كل هواجسك ومخاوفك فقلبها من كثرة الجراح لم يعد ينبض ولكنه منتظر أن تنتهى من كل ما يؤلمك وتؤلمها حتى ترتاح وأعتبرها جبل أو جماد لا يشعر ولا يبالى حتى ترتاح أنت

لو كانت تعلم أن هذا الطريق يحمل لها فى كل خطوة جراح ما كانت سلكته من البداية ولكن عليها تكملته بمفردها حاملة جراحها على كفيها متظاهرة بالقوة ويعلو وجهها أبتسامة بلهاء بعد كسر فرحتها وقتلها قبل خروجها للدنيا

تذكرنى حبات المطر بك ويأخذنى حنينى اليك ويدفعنى جنونى للسير تحت المطر حتى أجدك أمامى مبتسما لتكمل معى مشوارى فى الحياة كما وعدتنى

Thursday, December 30, 2010

حصاد 2010

سنة كاملة عدت بحلوها ومرها ولاقتنى بجرى على الأستاتيوس بتاعتى على الفيس بوك بتاعت 2010 كلها وجمعتها كلها وهكتبها هنا ولأنها كتيرة هقسمها على كذا مرة

من قلب ضعفنا تأتى قوتنا ولكن كلما كنا مترابطين لزادت قوتنا أكثر وجعلتنا نكسر كل الحواجز ونصل لما نريد فكن قوى دائما وامنحنى قوة فوق قوتى بوجودك بجوارى دائما وأبدا

عندما تتذوق المر كثيرا فى بدايات تناولك للعسل لا تغضب ولا تستعجل العسل الصافى فلكل شىء آوان ولكى تشعر بطعم العسل يجب أن تعرف طعم المر

لا يجب أن تلوم الآخرين على قسوتهم لأنها ربما تكون بسبب قسوتك عليهم وجرحك لهم

عندما تفتقد الأمان يتساوى عندك وقتها كل شىء وتفقد أجمل المشاعر الأنسانية الموجودة بداخلك

من الممكن أن تجرح شخص بكلمة أو موقف ما ولكن الجرح الأكبر فى تجاهلك لمن جرحته بقصد أو بدون وتركه بدون كلمة أعتذار أو عتاب أو لوم واحدة

الحب أجمل المشاعر الأنسانية والكره أبشع المشاعر الأنسانية ولكن بينهم خيط طويل أذا أردت السير نحو الحب فأفعل ذلك وأذا أردت العكس فلا تلوم الا نفسك

القسوة والجفاء لا يجنيان الا كل شقاء

الحياة تجارب وأختيارات وكثيرة هي الأختيارات الصعبة ولكننا دائما نحب الصعب فإذا كنت أختياري الصعب فأسأل الله معي أن يهون علينا كل صعاب الدنيا

لكل شئ بداية ونهاية الا الحب له بداية وليس له نهاية ولكن تبدأ نهايتة عند الكذب والخيانة والأهانة والجرح وأهمال أى طرف للآخر

قسوة الآخرين تجعلنا أحيانا نقسو على أنفسنا وعلى غيرنا وتبدلنا من حال لحال وأسوأ حال هو قسوتنا على أنفسنا وعلى أحبابنا

أعظم قوة هى التى تولد من قلب المحن وتجعلنا نتخطاها بسلام ولكن أذا أصابنا اليأس وتملك منا فسوف تقتلنا المحن فكن دائما قوى وتسلح بالصبر فهو سلاحنا لتخطى كل شىء

قف وأنظر حولك وراجع سجلات حياتك وتذكر كم شخص اسأت اليه ( جرحت ، أهنت ، أغتبت ، قسوت الخ ) بقصد أو بدون وحاول أن تصلح أخطائك قبل فوات الآوان فكما تدين تدان

كثيرا لا نشعر بقيمة الأشياء التى نمتلكها الا عند أقتراب فقدانها !!! حقا عجبا لنا

أبحث عن وطن آخر به الناس تمتلك قلوب بشر لا حجر يحترمون بعضهم ويقدرون مشاعر الآخرين ويحافظون على كرامتهم ولا يقللوا منهم ويجرحوهم مهما حدث ولكن بعد بحث طويل لم أجد هذا العالم الا فى خيالى فقط

من الغباء أن تجعل قلبك وطن وسكن لمن لا يستحقة

أعظم قوة هى أن تبتسم وبداخلك آلام وهموم كثيرة ولا يشعر بها أحد غيرك

مع كل طلعة شمس جديدة بيتولد جوايا أمل جديد ومع فجر كل يوم بيكبر حلمى وينور قدامى ومع كل سجدة بقول يارب حققلى منايا

الذكريات المؤلمة غالبا ما تظل عالقة فى ذاكرتنا إن لم تحل مكانها ذكريات أفضل

أصعب شىء عندما تزداد قوتك بوجود أحد الأشخاص بجوارك وفجأة يتركك فى منتصف الطريق ويرحل

أصعب أحساس فى هذه الدنيا عندما تأتيك الضربة من أقرب الناس اليك وينسون كل شىء وأى شىء كان بينكم كأن العشرة والسنين والذكريات والآحلام كانت سراب ووهم كبير

Tuesday, December 28, 2010

عايزة أشتغل بواب

أيوة عايزة أشتغل بواب فيه حد عنده مااااااااااانع ؟؟

ما هو خلاص الكلية اللى طلع فيها عنينا ما بقاش ليها لازمة والشغلانة المتوفرة ليها حاليا أنك تبقى فرد أمن وده طبعا بالنسبة للولاد وماجابوش سيرتنا فى حاجة خالص طيب خلاص أنا بقى هطالب بالمساواة وأطالب بحقى فى أنى عايزة أبقى زيهم وأشتغل بواب على الأقل وواحدة واحدة أترقى وأبقى فرد أمن على أى مول

ما هو بعد أربع سنين درسناها فى الكلية أكتشفنا خير اللهم أجعله خير أننا مالناش لازمة أيوووووووون خريجين كليات الآداب والحقوق يروحوا يرموا نفسهم فى البحر بقى وده بناء على كلام وزيرة القوى العاملة بتقول لكم يا ولاد مالكوش مكان فى الوظائف الحكومية وروحوا أحسن لكم أشتغلوا أفرد أمن فاهمين الكلام ولا لا

ومش بعيد قريب يقفلوا الكليات دى ولا عزاء لينا ولا لأى حد يتشدد لنا كمان

طيب ممكن سؤال حضرتك معلش طيب هما المدرسين والمحامين المفروض يكونوا متخرجين من كليات إيه ؟

طيب يعنى هتعملوا ليهم كليات تانية ولا هتفتحوا قسم مدرسين مثلا فى كلية الطب وقسم محامين فى كلية الهندسة عشان تبقى كليات عملية أهى وفل الفل

وبالمرة يتخرج الواحد من كلية الطب يبقى دكتور ومدرس ومن كلية الهندسة يبقى مهندس ومحامى ولا أى أى ولا زى زى وبكرة نلاقى يافطة دكتور مكتوب عليها دكتور باطنة وقلب ومدرس مادة الحب لجميع المراحل الدراسية ولا سحر ولا شعوذة

ولا تكونوا ناويين تقفلوا المدارس كمان ما هى مالهاش لازمة وبالمرة مش عايزين محامين هيعملوا إيه يعنى ما هى خربانة خربانة

وكفاية علينا الولاد يشتغلوا أفراد أمن وعمال فى المصانع والبنات يبيعوا فل فى الأشارات ويمسحوا العربيات ويشتغلوا خدامات وفى الآخر لو حبوا يتجوزوا يشوفوا ليهم عشة فى أى خرابة وأهى هتبقى عيشة فل الفل أهى ولا محتاجة مهر ولا عفش ولا شبكة ولا أى حاجة وأهو هنبقى ساهمنا فى القضاء على ظاهرة العنوسة بالمرة وأهو كله موصل لكله

وطبعا بما أن العيشة هتبقى على القد هنقدر نحقق طلب السيدة مشيرة خطاب فى أن محدش يخلف أكتر من طفلين ولو حد خلف الثالث هو الجانى على نفسه بقى ومش هيبقى له أى دعم لأن الدعم هيبقى لأول طفلين

وبكدة واحدة واحدة هنخلص على الشعب كله ما هو الشباب والبنات من الشغل والنوم فى الشوارع هيموتوا من الجوع وكده كده لو أتجوزوا مش هيخلفوا ولو خلفوا عيالهم هيتشردوا وهيبقوا أطفال شوارع فالأحسن ما يخلفوش وشوية والأب والأم هيموتوا ومش هيبقى فيه أطفال وهنصفى الشعب واحدة واحدة وبراوقة كده

ويبقى ربنا كرمه اللى عرف يطفش من البلد ويشوف له بلد تانية يعيش فيها

مع أنى عايزة أعرف هو فين الدعم ده هو فيه حد لاقى ياكل

أخرجوا الشوارع وشوفوا عدد الناس اللى قاعدة تشحت بقى كام ولا شوفوا الناس اللى بتنام كل يوم من غير عشا ولا حتى غدا

وهتبقى آخرتها هنشتغل بوابين وخدامين ولا عزاء لأى حاجة بقى

وعشان كده أنا بطالب بدكة كويسة لزوم شغل البوابين وكمان شوية فل أسرح بيهم على الأشارات وفوطة نضيفة أمسح بيها العربيات

وهيبقى شعارنا الجديد بلا تعليم بلا كلام فارغ ومعاك كلية يبقى أنت الجانى على نفسك يا عنيا

Monday, December 20, 2010

مطبخى المجنون

أطبخى يا جارية أطلب العباسية يا سيدى

آن آن آآآآآآآآآآآآن

بداية غريبة ومجنونة طبعا كعادتى وبما أنى مجنونة زى ما كلكم عارفين فطبيعى تبقى كل حاجة بعملها مجنونة حتى حبى للمطبخ ودخوله له طقوس خاصة

فأنا بكره بشدة أنى أكون ملتزمة بالدخول للمطبخ فى أوقات معينة وبكره الأكل يبقى بمواعيد وبحب أعمل كل حاجة بمزاج حتى لو هطبخ الساعة 3 الفجر هو مزاجى كده

وبما أن مزاجى بقاله كام يوم مش ولابد ورياح الأكتئاب عمالة تخبط على الباب والشوباك كمان وأنا عمالة أطردها ومش عايزة أفتح لها ما هو مش ناقصين وش أحنا ماعنديش وقت أكتئب دلوقتى خليها تفوت عليا بعدين ولا ما تفوتش خالص يبقى أريح

وعلى رأى الشاعر اللى قال أذا جاء الأكتئاب وخبط على الباب نط أنت وأجرى من الشوباك

وأذ فجأة لاقتنى النهاردة صاحية وخير اللهم أجعله خير لسة الأكتئاب عمال يخبط قمت جريت على المطبخ أشوف حاجة أعملها ولا أطبخ عما ماما تيجى من الشغل قوم إيه حالة التهييس كانت واخدة حدها جدا معايا لدرجة أنى شفت الحمام سمك وبتصل بماما بقول لها

أنتى مطلعة سمك للغدا ليه النهاردة أنتى مش عندك برد

تقولى سمك إيه ده حمام

آن آن آن تششششششششششششش ده صوت عقلى من الصدمة

قلت لها حمام أه طيب أنا هطبخ بقى عما تيجى

وروحت اتأكد تانى أنه حمام وسبحان الله طلع حمام

وبدأت أسترجع ذاكرتى اللى باظت من عدم الطبخ وأفتكر كل الخطوات وأحاول ما أعكش عشان هيبقى شكلى وحش قوى يعنى قدام بابا وماما وبعد ما ظبطت كل حاجة رجعت ذاكرتى لسنين ورا وأنا عمالة أدندن يا تجيبلى الشيكلاتة يا بلاش يا وله روح رجع البطاطا يا بلاش يا وله

وشوية وقلبت على أم كلثوم أنت عمرى وعلى ما أعتقد أن الجيران كلهم طفشوا لأن الجلالة خدتنى قوى

وأفتكرت أخواتى لما كانوا يجوا من برة ومش عارفين مين فينا اللى طبخ الأكل أنا ولا ماما وبعد ما ياكلوا يتفاجأوا أنى أنا اللى طبخت وده لأن أكلنا نفس الطعم بالظبط فكنا بنعمل فيهم مقالب دااااااايما

نييييييييييييياها ضحكة شريرة

وقبل ما أقلبها غم ودموعى تنزل وتغرق الحلة رجعت أغنى تانى ما تمرش فية الشيكولاتة جابلى الحكاية على بلاطة وإيييييييييييييييييه

ومش عارفة بصراحة إيه سر الشيكولاتة معايا النهاردة

وفوقت من فقرة الكورال دى على صوت جرس الباب ولاقيت ماما جت بالسلامة والأكل قرب يستوى وأنا منشكحة عشان طبخت وعشان ماما بتقولى الأكل ريحتة حلوة ووحشنا طبيخك بقى وما تخليهوش يوحشنا تانى

وطبعا بعد الجملة الأخيرة دى فهمت مغزى الجملة الأولى بتاعت الأكل ريحتة حلوة لأنها كانت جملة تثبيتية جامدة

ولأول مرة تقريبا من زمان ماما تدخل المطبخ بعدى وما تلاقيهوش مقلوب وتلاقينى روقت الحوض وغسلت كل حاجة لا وكماااااااااااان نشرت الغسيل

أذ فجأة لاقيتها بتبصلى وبتضحك ضحكة أنا بس اللى فاهمة معناها

والمشكلة الكبرى أنى كل ده وداخل عليا أكتئااااااااااااب

ويا تجيبلى الشيكلاتة يا بلاش يا وله روح رجع الأكتئاب والنبى ياوله

ونستخلص مما سبق أن الواحد لما يحس بأن الأكتئاب عمال يخبط على الشوباك يقوم هو يطرده من الباب ويعمل أى حاجة تخرجه من الحالة دى

بالأضافة الى أن شغل البيت حلو على فكرة وخاصة لما يتعمل بمزاااااااااااااااااااااااااج

هو مش كل شغل البيت يعنى نصه كده أو ربعه أو حته منه نييييييييياها

Thursday, December 16, 2010

تعلم كيف تحبنى

أن تحب فتاة مثلى فيجب أن تعرف عدة أشياء هامة حتى تمر حياتنا بسلام فكما قلت لى أنى مجنونة وغريبة فأنا أعترف أنى بالفعل مجنونة وغريبة ومتناقضة وبى كل شىء وأى شىء تتوقعه

ولكن اليس جنونى هذا الذى جذبك لى وجعلك تقتحمنى لتعرف من هذه الفتاة الغريبة التى تكون بمليون حالة فى الدقيقة الواحدة

أذن فأنت من أخترت فلا تلومنى على جنونى ولا على أى شىء أطلبه منك


أن تحب فتاة مثلى يجب أن تعرف مسبقا ما يفرحها وما يحزنها ما يبكيها وما يضحكها وأعلم أنها مثل الأطفال أقل شىء يجعلها فى غاية السعادة وأقل شىء مثله يجعلها فى قمة الحزن


أن تحب فتاة مثلى يجب أن تعرف أن غيرتها عليك ليست غيرة عادية ولكنها لا تظهرها بسهولة لا لشىء الا لأنها تعلم أنك سوف تحافظ على مشاعرها ولا تفعل ما يثير نار غيرتها حتى لا تحترقا بها سويا


أن تحب فتاة مثلى يجب أن تعرف أنها تريدك أن تشاركها كل شىء فى حياتك حتى همومك ومشاكلك التي تحاول اخفائها وعدم التحدث عنها فاعلم أن هذا الفعل يثير غضبها جداااااااااااااا لأنها تشعر وقتها أنها غير مهمة وليس لها وجود فى حياتك


أن تحب فتاة مثلى فاعلم أن بداخلها كمية حنان وطيبة تملأ الكون كله ولكن عندما تجرح أو تهمل أو تهان تكون فى قمة القسوة


أن تحب فتاة مثلى وتراها تبادلك نفس المشاعر فاعلم أنك أصبحت الهواء الذى تتنفسه وتريد رؤيتك وسماع صوتك فى كل لحظة وثانية ودقيقة وأنها أصبحت أقوى بك وتكون فى قمة ضعفها بدونك


أن تحب فتاة مثلى متمردة فاعلم أنها لم تتمرد عليك يوما ما الا إذا فعلت كل ما تكرهه هى


أن تحب فتاة مثلى فاعلم أن بداخلها بركان مشاعر سوف يملأ كل حياتك ولكن لا تتركها تشعر بالأحتياج لك ولا تجدك لأنك بهذا تؤلمها جداااااااااا وتجرح إحساسها ولأنك عندما تحتاج اليها تجدها فوراااا


أن تحب فتاة مثلى عقلها لا يتوقف عن التفكير أو التدقيق فى كل شىء وأى شىء فاعلم أنها تحب الكلام والنقاش فى كل شىء وأى شىء وتكره الشىء المسمى الأوامر والنواهى بدون ما تفهم لماذا


أن تحب فتاة مثلى فاعلم أنها عندما أحبتك فأصبحت لها كل شىء وكل العالم لا يهمها ولكن أحذر من أهمالك لها ولكل ما تحب وتكره ولأن غضبها وحزنها مثل البركان الذى لا يهدأ الا بنظرة منك وكلمة جميلة تنسيها الدنيا وما فيها


أن تحب فتاة مثلى فاعلم أنها عندما تحب تحب بكل ما فيها من قوة وعندما تكره تكره بكل ما فيها من قوة أيضا


أن تحب فتاة مثلى فاعلم أن حياتك معها سوف تكون مختلفة تماما لا لشىء الا لأنها تكره الروتين والملل وأى شىء يدعو للحزن وتحب كل شىء جديد ومجنون وغير طبيعى


أن تحب فتاة مثلى فاعلم أن دموعها غالية جدا وعندما تسقط يكون جرحها كبييييير فلا تجعلها تنام يوما وفى عيناها دمعة حزن ولا بأس من دمعة فرح


أن تحب فتاة مثلى وتفعل معها كل ما تفعل فاعلم أنها تحبك أكثر مما تحبها ملايين المرات ولكن لا تغضيها وتهملها وكن معها دائما وأبداااااااااااااا ولا تتركها تشعر بالأحتياج لك يوما ما ولا تجدك لأنك أصبحت الماء والهواء لها

Monday, December 6, 2010

ليلة الكباب

كعادتى كل يوم بحب أسهر مع نفسى كده وغالبا ما باكلش وجبة العشا مع بابا وماما ولكنى وأنا سهرانة بعد ما يناموا ساعات بفتكس أى حاجة جديدة أكلها أو حتى تقليدية وأكل مع نفسى


والنهاردة خير اللهم أجعله خير وعلى غير العادة لاقيتنى جعانة وبشدة وعايزة أتعشى مع أنى أتغديت وأنا غالبا باكل وجبة فى اليوم ولو العملية هايصة معايا باكل وجبتين وده لأن الأكل عدوى الأول والأخير معرفش إيه اللى بينى وبينه بالظبط


وطبعا لما حصل الحدث السعيد ولاقتنى جعانة مسكت الثلاجة أقلب فيها من فوقها لتحتها ومش عاجبنى حاجة وماليش مزاج للأكل التقليدى بتاع العشا ده وقعدت أفكر أممممممممم أكل إيه أعمل إيه


أمممممممممممم ودماغى تزن وتزن وأفضل أفتح الثلاجة وأقفلها والف لفة من فوقها لتحتها بصراحة تعبت من كتر اللف وخدت التوك توك بتاعى يلف معايا


وأذ فجأة التوك توك قالى تحبى أوديكى مكان جديد


قلت له فين ده


قالى أحنا ما روحناش ناحية الفريزر


قلت له فريزر إيه بس أنت بتستهبل أنا بقولك عايزة أتعشى يعنى أى حاجة على السريع تقولى فريزر هو أنا لسة هطبخ


قالى أسمعى الكلام بس ممكن تلاقى حاجة تعجبك


وقد كان سمعت كلامه عشان ما يزعلش وفتحت لاقيت حاجات مش عارفة ماهيتها بالظبط ولكنى أتكعبلت فى لحمة مفرومة وساعتها لاقيت التوك توك وقف قلت له مالك وقفت لية أنا قلت لك تقف


قالى هيا دى مش همشى تانى


هيا دى أزاى يعنى


هيا دى أسهل حاجة طلعى اللحمة المفرومة وأعملى أى حاجة


أمممممممممممم ياراجل أنت شايف كده


أيووووووووووووون


وخدت اللحمة والتوك توك ودانى جرى على المطبخ وفى طريقى كنت قابلت ماما فى الأنترية وقلت لها أستنى بقى هعمل لك عشا حلو عشان ناكل مع بعض

ودخلت المطبخ أخبط وأرزع وأكسر وأفكر هعمل إيه بالظبط أيووووووووووووون أعمل كباب وبطاطس فى الفرن

وتك تك تك خلصت تقطيع وتظبيط كل حاجة وبالمناسبة أحب أقول لكل ستات البيوت أنى عرفت حاجة تخلى عينيكى وأنتى بتبشرى البصل ما تدمعش ودى عرفتها من سارة درويش من خلال جروب أطبخى يا جارية أطلب الأسعاف يا سيدى ومن هذا المنبر بشكرها جدا وبشكر كل البنات والستات اللى بيتعاونوا ويتكاتفوا عشان يوصلوا خبراتهم لبعضهم أمال إيه ما أحنا مالناش غير بعضينا


نرجع لمرجوعنا عشان حاسة أنى هقلب على جمعية المرأة المتوحشة إيه بقى الحاجة اللى تخلى عينيكى ما تدمعش وأنتى بتبشرى البصل أنك تنقعى البصل بعد ما تقشرية فى مية لمدة خمس ولا عشر دقايق حاجة زى كده وبعدها وأنتى بتبشرية مش هتعيطى يا أمال ولا هتحتاجى حد يمسحلك دموعك


وفى خلال الرحلة المكوكية بين البوتاجاز والفرن قلت أدندن شوية ومش عارفة لية قعدت أدندن أغنية فدائى فدائى فدائى شىء غريب عجيب فعلا ولكن ما تستغربوش دى تقريبا الحالة أشتغلت ولاقتنى سرحت وأفتكرت أخواتى لما كانوا هنا وكنت أقوم أحضر الأكل لينا ويجى حد فيهم من ورايا يخضنى وحد تانى هاااااااا يا بوسى فاضل كتير وكان فاضلى ثانية ونص وحد يقولى أمسحى دموعك يا أمال لولا أنى نقلت ذاكرتى لمنطقة تانية وكملت غنا بقى ووصلت ذاكرتى لأنى واقفة فى مطبخ بيتى يدينا ويديكم طولة العمر والاقى حد ناططلى برضة وبيشخط ويقولى إيه يا ست هانم أنتى بتغنى ولا بتطبخى مش هنطفح بقى ولا إيه

ولاقتنى فوقت من الكابوس ده وبقول لنفسى ده أنا لو جوزى طلع كده هولع فى الأكل وفى نفسى وفيه هو شخصيا هههههههه

وفجأة أنتهبت أن الكباب والبطاطس خلااااااص قربوا يستوا وجهزت الفحم ورميتة فى الفرن معاهم وعمل تششششششششششششششش وبعدها فوجئت أن ماما نامت وهيا منتظرانى للدرجة دى كانت بتهرب من أكلى ولا أنا الجلالة خدتنى والغنا خلانى اتأخرت والحمدلله تمت المهمة بنجاح وماما وبابا أتعشوا من الأكل وكل حاجة تمام ومحدش حصل له أى حاجة ولكن الغريب أنى بعد ما خلصت الأكل نفسى أتسدت ويادوب هما صابعين كباب وقمت جرى وماما بصتلى بصة معناااااااها ولا بلااااااااش


وبعدين ده كفاية قوى عليها المطبخ اللى يضرب يقلب بسبب أنى بكره غسيل الأطباق والحلل والصوانى وتقريبا مفيش مرة أدخل فيها المطبخ الا وأقلبه رأسا على عقبا وأخرج وأسيب المعالق والأطباق والحلل فى الحوض ربنا يكون فى عونها أنا لو منها كنت طردتنى من زمان وشفت بنت تانية


ولهذا أناشد كل ربة منزل بضرورة أحضار غسالة أطباق لبنتها فى بيتها أيووووووووووون ولن أتنازل عن غسالة الأطباق

طاخ طوزززززززززززخ طبعا ده صوت ناس كتيرة بتحدفنى بالطماطم وأى حاجة قدامها فى دماغى


وقبل ما تحصل أى كوارث لازم الى نهاية طبق اليوووووووم دة قصدى ليلة الكباب بسلاااااااام فوتكوا بعافية


--------------------------

باقى حلقات ست بيت ولكن هتلاقوها

هنا