Thursday, November 4, 2010

ليلة النمل

4 نوفمبر عيد الحب المحلى بتاع بلدنا من الآخر ولكن ليلة عيد الحب بتختلف من شخص للتانى ومع أن مفيش حد بقى له نفس يحب ولا يحتفل بحاجة ومعظم الناس مش ضايقة نفسها وحتى مش عارفين يمثلوا أنهم بيحبوا كانت ليلة عيد الحب عندى مختلفة تمااااااااما وبغض النظر عن أنه عيد حب سنجلاوى ولكن كان عندى أحتفال تانى مختلف ومميز عن أى حد


وكعادتى كل ليلة بسهر مع نفسى ولاب توبى وأتجول هنا وهناك طقت فى دماغى أعمل الفسكافية بتاعى عشان نظبط الجمجمة ونشوف هنعمل إيه وأذ فجأة وأنا المطبخ الاقى شوية نمل


طااااااااااخ طووووووووووووووخ تــــــــــــــــــــــــش

طبعا ده صوت دماغى اللى أنفجر لمجرد أنى شفت شوية نمل لأنى بقرف من الحشرات جدااااااااااا وأستحالة أقعد فى مكان فيه حشرة واحدة ولاقتنى عمالة أتنطط هنا وهناك عشان أعرف مصدر النمل وجاى منين ورايح فين وهل وصل للأكل طيب كل ولا لسة جعان ما أنا لازم أطمن عليه برضة قبل ما أقتله مش ضيوف دول فى بيتنا ولازم ياخدوا واجب الضيافة


وبعد التدقيق والتمحيص والتدوير والتنطيط وصلت الى أنى لازم أشيل كل حاجة وأنضف المطبخ وأمسحه وأرش مبيد الحشرات


وقد كان شلت كل حاجة وحضرت عدة الشغل المكونة من جردل المسح والمساحة أم شراشيب دى طبعا كل البنات عارفينها والولاد أكيد عارفينها ولو مش عارفينها مش مهم هما إيه اللى دخلهم هنا أصلا ده موضوع بناتى


ما علينا وجبت الفنيك اللى ما بطيقش ريحته وبيخنقنى جدااااااااااا ولكن ما باليد حيلة وتقريبا كده والله أعلم أنا ماكنتش بمسح بمية وعليها فنييييييييك نووووووووووووووووووو أنا كنت بمسح بفنيك عليه مية وده نسبة لكمية الفنيك اللى حطيتها عشان أطمن أن كل حاجة هتبقى تمام


وخلصت مسح وتنشيف واللذى منه وفضلت ألف فى المطبخ تانى وأحاول أشوف هاااااااااااا لسة فيه ضيوف ولا روحوا وشغلت الحاسة السادسة اللى هيا عند الستات والرجالة ما يعرفوش عنها حاجة دى وبعد ما أستوكدت أنه مفيش حاجة وكله تمام جبت المبيد الحشرى وغرقت المطبخ وبعدها رجعت كل حاجة لمكانها


وفى خلال هذه الرحلة المكوكية كنت عمالة أدندن وأخبط وأرزع فى كل حاجة لدرجة أن مش بس اللى معايا فى الشقة صحيوا لا ده تقريبا كل العمارة صحيت


ولكن بعد ما حسيت أن الناس صحيت لاحظت حاجة أن فيه هدوء غريب ساد الجو وتوقعت بذكائى كده أن ريحة علبة الفنيك والمبيد الحشرى دخلتهم فى غيبوبة لمدة سنتين ونص كده


وأكتشفت أن الشقة كلها بقت ريحتها فل الفل واللى نفسى أعرفه واسأله لكل الناس هل لية الناس لازم تمسح بفنيك هااااااااا لية وريحته بتبقى بشعة طيب هو مفيش فنيك ريحته حلوة أنا كان عندى أستعداد أحط على المية بخور وبرفان


لذلك قررت قرار هااااااااام لسة واخده من خمس دقايق ونص وللأسف نسيته


نرجع لمرجوعنا ولليلة الحب الجميلة اللى أنا قضيتها مع النمل والفنيك وجه فى عقل بالى برنامج أسامة منير وبفكر أعمل واحد زيه وأسميه أنا والنمل وهوااااااااااك وهيكون فكرته عن عيد الحب المنمل


وما نجيلكوش فى نمل أبدااااااااااااااا

فوتكوا بعافية بقى عشان ألحق أحتفل شوية بعيد الحب

3 comments:

إنسان || Human said...

حلو موضوع النمل ده , ودي طبعاً أحسن طريقة تقضي بيها عيد الحب , في جريمة قتل بشعة بالفنيك ...الله يرحمه ويرحمنا جميعاً
أما عن تساؤلك عن ليه الفنيك ريحته وحشه وبنستخدمه , أعتقد ان ده موروث قديم اللي هو الفنيك
لان ارتبط عند الناس الفنيك وريحته بالنظافة ..وده طبعا اعتقد صعب نتخلص من الحته دي

Unknown said...

عسل يا بسمة
و برافو عليكي
انك عرفتي تخلصي على النمل
:)
شطورة يا بسومة

mrmr said...

الفنييييييييك قاتل النمل
شطوووووه يا بوسبوس
كلوا اللى انا والنمل وهواك جميل الاسم ينفع اسم فيلم سنيمائى
ليله حب جميله مع النمل
دى ح تنكتب فى التاريخ
كل عيد حب وانت بخير