Tuesday, July 27, 2010

ست بيت مستهبلة


لكل فعل رد فعل ........ بيسلموا على بعض دايما


وبما أن أستعمال الأطباق والشوك والسكانين والحلل والصوانى من الأمور الهامة جدا والغير قابلة لأى نقاش ولا أى تأخير فأنا أشهد وأنا بكامل قوايا العقلية أنى ست بيت مستهبلة وتشهد معى أمى بذلك


فمنذ سنوات طويلة عديدة وأنا أهوى السهر وأستعمال المطبخ والتفنن فى أى شىء وكل شىء وكل هذا لا مانع منه ولكن المشكلة تكمن فى أنى بعد نومى وأكل الأرز مع الملائكة تستيقظ أمى للذهاب لعملها وتدخل الى المطبخ لتجده ملىء بالأكواب والأطباق والملاعق وغيرها وغيرها وهيا غير نظيفة وأنا نائمة مثل القطة البريئة الرقيقة


وعندما تعود من العمل يتردد نفس الكلام ( هو أنا مفيش يوم أصحى فيه الا والاقى المطبخ مقلوب على أخره وكوبايات مرمية فى حتة وأطباق فى حتة وحلل فى حتة )

لينطق لسانى الذى ينقط شهد دائما ( ما أنتى عارفة أنى ما بحبش غسيل الأطباق ولا الحاجات دى كلها )

لترد قائلة ( شكلك هتفضحينا بعد كده أنا أول حاجة هجيبها ليكى فى جهازك غسالة أطباق )

ليتدخل أخى الأصغر فى الحوار ( أه وماله وبالمرة هاتيلها جهاز يعمل شغل البيت وينضف ويغسل ويطبخ عشان ما تتعبش نفسها وتعمل حاجة )


وكل فترة يتردد نفس الحوار ومع أنى أعترف أنى ست بيت مستهبلة دائما ولكنى كثيرا أغسل الأطباق عندما يستدعى الأمر لتدخلى أو تكون الظروف هكذا ولا يوجد من يغسلها

ولكنى أكره هذا الشىء المسمى غسيل الأطباق أكرهه مثل كرهى لأعدائى الذين أعرفهم ولا أعرفهم وكرهى لأيام الأمتحان الذى يهان فيه المرء أو يهان


والسؤال الذى يطرح نفسه الآن لماذا غسيل الأطباق من مهام النساء دائما وحتى لو أستعمل أى رجل كوب ماء يرميه فى مكانه ولا يكلف نفسه عناء وضعه فى مكانه المخصص له ( يكونش عليهم ندر مثلا لو واحد منهم غسل كوباية ولا طبق الندر يقع )

نصل الى قائمة الأستهبالات المنزلية فمنذ قليل وبعد أضرابى عن الطعام اليوم ولأنى لا أحب السمك المشوى وأكله مضطرة فى ظروف ما وعندما قرصنى الجوع ذهبت الى المطبخ لأصنع لى أى شىء أكله والسلام وبعدها خرجت من المطبخ أصوصو من الحر الشديد وتحاورت مع أمى وهزرنا كثيرا وقليلا وفى خلال حديثنا عن الحر خاصة قلت لها ( دلوقتى بقى هتطلع تقليعة جديدة فى جهاز البنات لما تيجى تتجوز وأنهم لازم يجيبوا تكييفات بدل المراوح )

لترد قائلة ( أيوة ما هما مش فالحين غير فى التقاليع مش برضة دلوقتى بقى فيه ناس لازم تجيب كمبيوتر فى الجهاز وريسيفر )


نظرت اليها وأنا أتمالك نفسى من الضحك الهستيرى على الناس التى من الممكن أن تبيع ملابسها من أجل التقاليع وتقليد الناس فأنا ولا أمى نمانع فى تجهيز البنت بالأشياء الضرورية والأساسية أذا كانت ظروف أهلها تسمح بذلك ولكننا نكره موضوع المنظرة على الفاضى


ووجدتها بعد ذلك تنظر لى وهيا مبتسمة وتضحك وتقول لى يعنى تبقى عروسة ومعاها كمبيوتر أنتى بقى هتبقى عروسة ومعاكى لاب توب وهذا عندما يصل لاب توبى الجديد من خارج البلاد بسلامة الله مع أخى

نييييييييييييييياها


وفى هذه الأثناء فوجئت بأعلان السكر ده هيطفش العريس لننفجر أنا وأمى من الضحك وأنتهى أنا من كتابة أستهبالاتى وأكتفى بهذا القدر المستهبل لحين أشعار أستهبالى آخر


6 comments:

mrmr said...

بالزمه استهبلى كمان وكمان
هو الاستهبال عليه فلوس ههههههه
نزود الاستهبال ونقول
ذى ما الراجل نخليه يلبس مريله المطبخ ويغسل المواعين نخليه كمان يحبل ويولد ويربى العيال ويوديهم الحضانه وجيب البامبرز ويغيرلهم يعنى من الاخر يقوم بواجبات الست واحنا نكون قوامون على الرجال علشان الايه تنقلب
ههههههههههه
وبعدين بدل المروحه نجيب تكييف مركزى للشقه كلها ماهو استهبال فى استهبال بقه
علشان الوقفه فى المطبخ تبقى بنفس مفتوحه بلا وجع قلب
اقولك من الاخر
استهبلى ولا يهمك وانا معاكى نستهبل سوى

ههههههههه
ربنا يسعدك يا بوس بوس ويفرح قلبك

мαησηα said...

ههههههههههههههههه والله انتى عثل

انا كمان ست بيت مستهبلة بس انتى بدرجة ممتاز مع مرتبة الشرف انا بتصعب عليا امى ههههههههه

وبقه انتى بقه يا شيخة روح بوسبوس ماكنتش اعرف وربنا تخيلى اصلا ما اعرفش انك عندك مدونة شوفتى الخيبة اللى انا فيها

وكنت مستخسرة النوتات اللى بتكتبيها ع الفيس بوك هههههههه

سالخيييييييييييييييير بقه

Mahmoud Ahmed said...

ربنا يكون في عون والدتك و الله
^____^

فاتيما said...

و الله يا بسبوستى
انا العكس تمامااااااااا

الطبيخ بالنسبالى مأسأة
و كل شغل البيت عموما

الحاجة الوحيدة بقى
اللى بستمتع بيها هيا غسيل الاطباق
لدرجة اننا لما نتعزم
عند حد من قرايبنا
بعد الاكل
بدخل المطبخ معا ستات البيت اشيل الاطباق
و اروح لابسة المريلة
و واقفة قصاد الحوض
و مخرجشى من قصاده
الا و الاطباق بتاعة العزومة
بالحلل بالكوبايات
بالمعالق
بكله
مغسول و بيبرق


آه و الله




بصى انتى متجبيش
غسالة اطباق و لا حاجة

لما تتجوزى أن شاء الله
ابقى خدينى انا ف الجهاز
ايه رأيك ؟؟



الحمدلله انك بخير
و ان طنط كمان بألف خير


بوسات و حضونات
يا بسبسة يا جميلة

basma bahaa said...

هههههههههههههههههه
لا انا كمان من هواة غسيل المواعين
تشغلى جنبك كوكتيل حلو كدا لعبد الحليم وفيروز بقى وشوية ناس م اللى بتحبيهم
هتبقى متعة;)

sony2000 said...

لااااا
خليه هو يجيب
غساله الاطباق
والجهاذ وكل حاجه
موش كفايه انه هياخد بوبوس
دا يبوس ايدو وش وضهر