Saturday, July 24, 2010

ست بيت شبر ونص

( الطويلة تقضى حاجتها والقصيرة تنده جارتها )

مثل شعبى متعارف عليه جدا ولكنه فيه ظلم واضح لستات البيوت الشبر ونص مثلى

فأنا قصيرة أينعم

شبر ونص أينعم

ولكنى أعتمد على نفسى أعتمادا كاملا فكل شىء له حل

أينعم حلول ممكن أن تؤدى الى كوارث ولكنها حلول رااااااااائعة وتجعلنى مثل فرقع لوز يقفز وينط هنا وهناك وأشبع نزعة الطفولة المدفونة بداخلى لأنى أفعل كل هذا كأنى العب


فمثلا عندما أريد أن أحضر الشنط الموجودة فوق الدولاب ماذا أفعل أحضر كرسى وأقف عليه وأظل أشب أشب أشب مع حركات بهلوانية الى أن تصل يدى الى الشنط مسألة بسيطة جدا لا تدعو لأستدعاء أى جيران ولكنها تدعو لأستدعاء الأسعاف مثلا لأن هذه الحركات البهلوانية من الممكن أن تأخذنى أنا والكرسى والشنط وتقفز بنا على الأرض


ولو كان هناك أشياء كثيرة فوق بعضها على الدولاب لا يوجد عندى مانع من وضع بعض المخدات على الكرسى حتى أصل الى ما أريد ووقتها أتذكر أخى الأصغر والذى كان يقف على الأرض ويمد يده وبمنتهى السهولة يحضر أى شىء فوق الدولاب وأنا مازلت أنط وأقفز


أصل الى المطبخ الذى توجد معزة خاصة بينى وبينه وبداخلى سؤال مهم لماااااااااااااااذا يضعوا الأشياء كلها فى مستوى مرتفع ( إييييييييييه يعنى لما يحطوا السكر مثلا على الأرض النمل هيتلم إيه يعنى مش أحسن لما أفضل أشب عشان أوصل للسكر والشاى )


وعندما أريد الوصول للأطباق فى المطبقية أرفع يدى على أخرها كأنى أغرق وأستغيث وعندما أصل اليها أكون منهكة القوى ( إيه البواخة دى ما ينزلوا المطبقية تحت شوية إيه المشكلة لما يحطوها تحت الحوض لية حاطينها فوق الحوض مش يراعوا ظروفى )

وبسبب هذه المطبقية لا مانع أبدا من وقوع الأطباق والملاعق ويا حبذا لو كانت سكينة أو شوكة وتسقط على رأسى ( أنا عارفة هيموتونى قريب )


وبعد وقت ما أسمع الكل يا بسمه شغلى السخان يا بوسى شغلى السخان ( أشمعنى أنا مالاقوش حد يشغل السخان غيرى ومازال عندى نفس السؤال لية السخان محطوط عالى كده وينهد حيلى عما أشغله طيب ما هو ممكن نعلقه فى الدش وهو يبقى قريب والمية تنزل مباشرة منه للدش بدون تعب وغلب بقى )


نصل الى تنظيف وترتيب البيت ويا حبذا لو كان هذا التنظيف يتعلق بالسقف أو المراوح فأنظر لهم شذرا كأن بينى وبينهم تار ( هو حد قال لهم يعلقوا المراوح فى السقف المفروض يعلقوها فى الأرض وكمان السقف المفروض ينزل لتحت شوية )


لذلك قررت قرار هاااااااااااااام جدااااااااااا لو كان ليا عمر وبقى عندى بيت يعنى كل حاجة هتبقى أرضى أيووووووووووون محدش يناقشنى


فنصيحة منى لكل ست بيت لم يصل طولها الى 160 سم أن تجعل كل شىء أرضى أرضى وأهو عيشة الارض حلوة برضة


الدولاب لازم يكون له سلم علشان نعرف نطلع له بسهوله

تقفيلة المطبخ والمطبقية واللذى منه يتحطوا فى مستوى منخفض جدا ولو لزم الأمر نعمل ليهم حبل نشده ينزلوا لتحت ونعيش بقى

إيه لازمة المراوح التكييف حلو برضك ، والسخان يتعلق فى الدش


ولا عزاء للطوال وتعيش الشبر ونص

2 comments:

sony2000 said...

ويعيش الشبر ونوص
ذيي بالظبط
وتعييييييييييييييييش:)

قبلاوى said...

على الستات الطويله مش كتير

قالوا المثل ده على أى أساس