Tuesday, June 1, 2010

مواليد برج العذراء

مع أنى ما بصدقش ولا بقتنع بأمور الأبراج دى ولا بأنى أمسك الجرنان أشوف حظى إيه النهاردة وأفضل مقتنعة ومصدقة باللى مكتوب

ولكن اللى لاحظتة من خلال أحتكاكى بالناس أنه فعلا مواليد أيام وشهور معينة بتبقى فيه بينهم صفات كتيرة مشتركة بغض النظر عن تسمية البرج وبغض النظر عن أن مش كل اللى بيتقال عن أى برج بيبقى فى الأنسان بشكل صحيح


ولكن بما أنى أعتبر من مواليد شهر أغسطس ( 31 أغسطس ) وخلوا بالكم أخر يوم فى الشهر يعنى قفلتة بالضبة والمفتاح علشان محدش يجى ورايا

وبما أن ليا عدد من الأصدقاء مواليد نفس الشهر ويعتبروا من نفس البرج ومن قبل حتى ما أعرف حكاية الأبراج دى ولا أعرف تاريخ ميلادهم بس كنت بلاقى صفات كتيرة قوووووووووى مشتركة بينا


والصفات مشتركة عامة بين الجنسين الرجل والمرأة


فحبيت ألعب لعبة صغيرة مع نفسى وأكتب الصفات اللى شيفاها من وجهه نظرى موجودة فى مواليد برج العذراء عاااااااااااامة ومحدش يفكر أنى بقول صفاتى أنا بتكلم عامة لأنى ما ينفعش أساسا أقيم نفسى لذلك وجب التنوية


التناقض فى صفات الشخصية أيون بيبقى جواهم صفات وعكسها وكلها بتبقى شغالة وأنا شيفاها ميزة مش عيب لأن الشخصية دى بتبقى أكتر شخصية ممكن تتكيف مع أى وضع لأنها بتبقى فاهمة كويس اللى حواليها وعارفة معنى كل صفة موجودة فى الناس اللى حواليها ودة لأن الشخصية دى تقريبا بيبقى فيها كل الصفات أو معظمها


الصراحة شخصية صريحة جدا جدا ولكن عيبها الوحيد فى موضوع الصراحة أنها ساعات بتقول اللى جواها بتحديف طوب وبكلمات ممكن تضايق اللى قدامها ولكن صراحة الشخصية دى دايما بتبقى محببة ومرغوبة من كل الناس اللى حواليها بغض النظر عن شوية التحديف اللى بيحصلوا ولكن الناس اللى بيبقوا عارفين الشخصيات دى مش بيزعلوا منها أبداااا


الجدعنة الغير طبيعية شخصيات البرج ده بتبقى فيهم جدعنة مش طبيعية وبطريقة كبيرة جداااااااا جداااااااااااااااا حتى لو وقعتهم فى مشاكل كتيرة ولكنهم ما بيحرموش وبيفضلوا برضة جدعاااااااااان


الرومانسية مشاعرهم رقيقة جدا جدا ورومانسيين لأبعد حد حتى لو ماكانوش بيظهروا المشاعر دى وكتير بيقسوا على نفسهم وعلى اللى بيحبوهم وبيداروا مشاعرهم ويكبتوها بشكل كبير قوى

ولكنهم فى نفس الوقت لما بيبحبوا بيحبوا قووووووووووى وممكن يضحوا بحياتهم علشان اللى بيحبوه ومش سهل أبدا يحبوا ومش سهل برضة ينجرحوا لأنهم بيتحملوا الطرف التانى ويفضلوا يفوتوا له كتير لكنهم أول لما ينجرحوا بيبقى الجرح كبير قوى قوى ومش سهل ينسوا جرحهم


الصداقة بيحبوا تكوين الصداقات والعلاقات الأنسانية بشكل كبير قوووووووووووى ودايما بيبقوا مميزين عند الناس اللى تعرفهم


الحياة العملية ناس عمليين جداااااااااا وبيحبوا شغلهم قوووووووووووى ودايما بينجحوا فيه

طموحين جدا جداااااااااااا وعندهم آحلام كبيرة وكتيرة قووووووووووى وبيسعوا دايما علشان يحققوها

ولكن فيه نقطة بيختلف فيها مواليد البرج ده يعنى جزء منهم مش بيخاف من الشهرة والأضواء وبيقدر يبقى قدام الناس عادى وطبيعى وجزء تانى بيخاف جدا وبيتكسف من مجرد الظهور قدام الناس وتبقى الأضواء مسلطة عليه مع أن الأتنين بيكونوا طموحين وطموحهم لازم يخليهم ناس معروفة فى المجتمع نوعا ما


ونكتفى بهذا القدر من تحليل شخصية برج العذراء من وجهه نظرى الشخصية ولنا لقاء آخر للكلام عن باقى الصفات

4 comments:

عبدالرحمن said...

رغم عدم إيماني بالأبراح، لكن الكلام ده سليم

Wanda said...

الغريب و الا منطقى ان الكلام اغلبه صح

انا اصلى من مواليده برضه

تناقض - لا مش تناقض اقولك ساعات بحس ان زى الحرباية تتلون فى كل مجتمع و فكر و ناس و تعايش الى حواليها علشان متضايقش حد
بس الراحة فين ؟ المكان الى يناسبها تظهر لونها الاصلى قبل ما اللون يبهت و يختفى فين ؟هو ده الطموح الى بيسعوله

الصراحة :-))) ايوه انا ممكن اخذ حقى ثالث و مثلث بكلمات بس لانى عرفها سلاح موجع مخبيه وراء ابتسامه و كلمتين لااكثر كطبطبة منغير كذب
و الى بيسعى يسمع صراحتى باحذره و مع ذلك بلطفها بكل الاشكال الممكنة

الجدعنة حتى على حساب النفس :-) ايوه الكلمة عند بتسلسلنى لحد ما انفذها و علشان كده مابديها بالساهل لحد

الرومانسية :-))))) حتفضحينا ليه خلينا باردين زى ما هما عارفينا

الصداقة و الله الواحد بيعافر الزمن علشان ميخسرش حد و الغريب االاغلبية مش همها و بترمى صحوبيات قديمة فى الزبالة مدام ملهاش عائد

العملية و النجاح فى الشغل :-) يارب

قلب ينبض بالحب said...

اوقات ناس بيكون مش نفس البرج وبيكونوا متقاربين برضه وولا انتي ايه رايك ياجبانة

واحلى سلام لاحلى بنوتة شقية وغلباوية

مها said...

كلام جميل.. كلام معقول. أنا من مواليد برج العذراء و فيا صفات كتير من دول إن ما كانش كلهم
تحياتي