عودة الروح بتاج رأس السنة

طبعا ما طولتش الغيبة وهلاقى ناس بتقول يييييييييييييييييييييه اللى رجعها دى أحنا ناقصين وش

وطبعا اللى مقدرش أخبيه عليكم أن روحى بقت متعلقة بالمكان ده بشكل غير طبيعى وخاصة بمدونتى لأنها كانت الطريق لحاجات كتيرة حلوة قوى حصلت ليا ولأنها الحاجة الوحيدة اللى بحاول تفضل موجودة حتى لو سبت كل حاجة وبتمنى تفضل موجودة مش لآخر عمرى بس لا ده بعد ما عمرى يخلص

بتمنى الورثة بقى يسيبوها وما يتخانقوش عليها بقى وبتاع وكل واحد يقول لا ياعم أنا روح بوسبوس دى من حقى أنا والتانى يقوله نعم مين قال الكلام ده دى بتاعتى أنا

والاقى عيال عمالين يقولوا لا لا دى مدونة خالتو بوسبوس محدش له دعوة بيها

وعيال تانية دى مدونة عمتو بوسبوس وأياك حد يمد إيده عليها

وبعدين تلاقوا عيال متشردة ما تعرفوش جت منين تقول وسع يا عم منك له أنتوا بتستهبلوا ولا إيه محدش منكم ليه الحق فى روح بوسبوس أحنا بس اللى هنورثها دى بتاعت ماما بوسبوس

وفى اللحظة دى الشريط هيسف وبوسبوس روحها ترجع ليها تانى وتقول أنا معرفش العيال دى جم منين دول وإيه التشرد اللى هما فيه ده يبقى ولاد بوسبوس بالمنظر ده خيييييييييييييييييانه

والمحامى الخاص بالمدونة أستاذ مدوناتى فتح الباب يا عينى هيغلب فى تقسيم البوستات التقسيم الشرعى ليها وفى النهاية بعد الخناقة يحكموا عليها بالأعدام

آآآآآآآآآآآآآآآآآآآآآه يا خونة طيب مش هورثها لحد بقى وهتبرع بيها لجمعية روح بوسبوس للحفاظ على ممتلكاتى الخاصة على النت

أيون كل واحد لازم يعرف حقه فين ويروح فين ويجى مين أمال إيه بس

وطبعا بعد التفكير هرجع بإيه بالظبط وكنت بحضر لكذا حاجة كده أذ فجأة الاقى تاج رأس السنة خبط فى دماغى

وبما أنا صاحب التاج أحمد سمير الأغلبية الصامتة أخ عزيز وتقريبا أعرفه من يوم ما عملت فى مدونتى ويمكن ماحالفنيش الحظ أنى أشوفه ولكنى شفت نصه التانى القمرة يوم حنتهم ومعرفتش أشوفه بس ملحوقة وكده ليكم ليا زيارة ماليش دعوة بقى

وندخل بقى على التاج

أستعنا على الشقا بالله

ومش عارفة لية أحمد بينتقم مننا كده على نهاية السنة وجايب التاج كله أجبارى طيب أصبر عليا بقى لما أعمل ليكم تاج روح بوسبوس هطلع كل القديم والجديد عليكم وكل الأرواح الشريرة والشريرة برضة هتوريكم شغلكم

السؤال الأول : أجباري

بالنسبة لسيادتك......ياترى سنة 2009 تقدر تعتبرها بشكل عام سنة سعيدة....كبيسة...مملة...مالهاش لازمة.....الخ؟
ياريت تختار لها وصف من كلمة واحدة

بسم الله الرحمن الرحيم

أختار الأجابة رقم كبيسة

السؤال الثاني : اجباري برضة
ايه أجمل حاجة حصلت لك في 2009؟ و بالمرة أسوأ حاجة حصلت في 2009 (لو كانوا كتير اختار الأسوأ)؟

أحم أحم طيب لية كده طيب لو هما كتير نعمل إيه طيب ممكن أخرج عن النص وأقول أكتر

أجمل حاجة بعد حذف مليون أجابة

معرفتى بناس أقل ما يقال عنهم أن صحاب صحابهم بجد

أسوأ حاجة

بعد حذف مليون أجابة الا واحد وده لأنى هذكر حاجتين مش حاجة واحدة بلطجة يعنى

معرفتى بناس أقل ما يقال عنهم أنهم شياطين ويمكن الشياطين أحسن منهم بشوية والحمدلله ربنا نجانى منهم

تعبى اللى أثر على حياتى بشكل سلبى وبشكل إيجابى وهنعرف ده بعدين علشان ما نخرجش برة المنهج

السؤال الثالث: برضة اجباري
لما بيتقال قدامك 2009.....ايه اول حاجة بتتبادر لذهنك على طوووووووووول؟

الوحدة

السؤال الرابع: أكيد عرفت انه اجباري
بتحتفل بليلة رأس السنة؟؟؟ و لا بتعتبر الأحتفال بها حرام؟؟؟ (طبعا اكيد مش مقصود الأحتفال السكر و العربدة لأنها حرام في رأس السنة و رجليها كمان) و لا ايه؟

هههههههههههههههه حلوة العربدة دى فكرتنى بفيلم أبو لهب ههههههههههههه

بسم الله الرحمن الرحيم

والله هو الموضوع ده فيه قولان ولازم طبعا نفهمهم

ولكنى بالنسبة ليا معرفش هما إيه القولان

ومش هعمل بيهم وده لأنى لا بحتفل لا أحتفال حلال ولا حرام وغالبا هقضية فى بيتنا قدام التلافزيون أو الكمبرورر

وفيه أقوال بتقول إيه بقى نبدأ السنة الجديدة بركعتين لله ودعاء جميل نقوله والقول ده عاجبنى برضة ولأنه غير القولان اللى ما قولتهمش أنا قبل كده وغالبا هعمل كده وهبعت لأخواتى ولأصحابى أس أم أس يعنى رسالة يا جهلة أقول لهم بسررررررررررررعة صلوا ركعتين وأدعولى معاكم وأهم حاجة يدعولى

ما هو لازم الواحد برضك يستغل الناس اللى حواليه

ومن هذا المكان ومن هذا المنبر ومن المقر الخاص بروح بوسبوس بدعوكم فعلا لصلاة ركعتين والدعاء بكل ما تتمنوه وياريت ما تنسونيش فى الدعاء بقى كدهوه

السؤال الخامس : مبني على اللي قابله
لو مش محبكها..و ما بتعتبرهوش حرام....ياترى هتحتفل بيه السنة دي ازاي؟؟ او احتفلت بيه ازاي لو جاوبت على التاج دة بعد 31 ديسمبر؟؟

تقريبا زى ما قلت عادى هيبقى يومى عادى ولكن فى نهايتة قبل ما يبتدى اليوم الجديد هصلى الركعتين وقبلهم هكون قرفت كل اللى أعرفهم برسايل علشان يصلوا

وبس بقى

السؤال السادس: مش محتاج افكركم انه اجباري
فاااااااااكر 31 ديسمبر 2008 (اه...السنة اللي فاتت)؟ ياترى فاكر حالك ساعتها كان ايه و كنت عامل ازاي؟؟؟
في 31 ديسمبر 2009....ايه اللي اتغير فيك؟؟ ياترى لسة قاعد نفس القعدة و في نفس المكان و لا في حاجات كتير اتغيرت من 31 ديسمبر 2008 الى 31 ديسمبر 2009؟؟؟؟؟

أستغفر الله العظيم طيب ليه هتخلونى أطلع ليكم عفاريت الروح بقى وأخليها تأذيكم

بص يا سيدى هو تقريبا فى 31 ديسمبر 2008 كنت تعبانة تعب فظيع مرير غريب عجيب وتقريبا معرفش سنة 2008 خلصت أزاى ولا أمتى ولا 2009 بدأت أمتى أصلا وأزاى خلصت لأنى تقريبا بسبب تعبى ماكنتش بحس لا بالأيام ولا الشهور ولا حتى السنين وزى ما قلت لك أنا معرفش 2008 خلصت أمتى وأزاى ويوم إيه بالظبط وسنة كام وأهم حاجة خلصت سنه كام دى واخد بالك أنت

ولا أعرف 2009 بدأت أمتى وأزاى خلصت

بس كل اللى أعرفه بقى أن تعبى أفادنى كتير قووووووووووووووووووووى وبغض النظر عن أى كلام مالوش لازمة بس يمكن بسبب الوحدة والعزلة اللى كنت فيها نتيجة التعب ده عملت حاجات كتيرة قووووووووووى وده لأنى طول اليوم فى البيت ولكنى ما فضلتش حاطة إيدى على خدى وأبكى على التعب اللى فيا واللى مانعنى من كل الدنيا غصب عنى ولكن أستفدت من الموضوع ده وكنت متلقحة كدهوة قدام الكمبرورر بتاعى وفعلا الوحدة دى والتعب ده فادونى كتير وعملت حاجات كتيرة

وفاكرة أيام مهمة وتواريخ تعتبر علامة فى حياتى ودى هقولها فى بوست لوحده

ولكنى أكيد أتغيرت وأتغيرت قوى كمان

يمكن بقيت أقوى من الأول بكتير

يمكن بقيت عنيدة أكتر

يمكن بقيت صبورة أكتر وصبرى وأحتمالى تعبى ودعائى المستمر لربنا يشفينى كل ده خلانى أتعلم الصبر أكتر

وكمان خلانى أقرب من ربنا أكتر وأكتر

نظرتى للمرض والمحن أختلفت عن قبل كده بكتير قووووووووووووووووى

أتقدمت خطوات تعتبر كويسة فى مجال شغلى ونفسى بجد أكمل فيه وأبقى أحسن

السنه أو السنتين اللى فاتوا تقريبا شفت فيهم ومر عليا حاجات ما شفتهاش طول ال 26 سنه اللى عشتهم وطلعت بيهم بحاجات يمكن هقولها فى موضوع منفصل

ولكنهم كانوا سنتين فاصلتين ومهمين قوى فى حياتى بشكل غير طبيعى

السؤال السابع: برضة
غلطة غلطتها في 2009 و مش هتكررها في 2010

أنت قلبتها نكد فى الأخر لية كده وهتخلى عفاريتى يطلعوا

:-p

أنى أتهاونت وأتساهلت مع ناس كتيرة قوى ودخلتهم فى حياتى وفى تفاصيل مش هتهمهم فى حاجة وبالعكس ده خلاهم يفهمونى غلط قووووووووووووووووووى ويشوفونى بصورة غير حقيقتى

وأنى كمان أتهاونت فى حقى مع ناس كتيرة وكان لازم أديهم على دماغهم وما أسيبهمش يعيشوا الدور على حسابى

وأكيد رجعت تانى زى ماكنت ومش أى حد ممكن يعرف عنى أى حاجة

ومش أى حد ممكن يغلط أو يتعدى حدوده هسكت له تانى

السؤال الثامن: و دة اكيد اجباري برضة
امنية هتتمناها في 31 ديسمبر 2009 و تدعي ربنا انه يحققها لك في 2010....ادعي...(مين عااااااااارف؟) مش جايز تكون ساعة اجابة؟؟

يااااااااااااااااااااااه دى مش أمنية واحدة دى مجموعة أمنيات وبرضة مش هينفع أكتبهم كلهم هنا بس اللى أقدر أكتبه وأقوله أنى هدعى أن ربنا يغفرلى كل ذنوبى سواء بقى اللى عملتها السنه اللى فاتت أواللى عملتها طول عمرى ويسترنى فى الدنيا والآخره

وهدعى ربنا يثبتى على الطاعة ويبعدنى عن كل حاجة حرام أو غلط

وهدعى ربنا يخلى ليا ماما ويديها طولة العمر ويقدرنى أسعدها وأرد ليها جزء واحد من جمايلها عليا

وهدعى ربنا يوفق أخواتى ويرزقهم بالحلال ويكرمهم وأنى أشوفهم قريب على كل خير

ويوفقنى فى كل حياتى

وفيه حاجات كتيرة قوووى بدعيها ولسة هفضل أدعيها

قولوا آميييييييييييييييييييييييييييييييييين بقى على اللى كتبته هنا واللى فى بالى

السؤال التاسع : و الأخير
شخص............تتمنى لا تشوف صورته و لا تسمع أسمه في 2010؟؟؟؟!!!! (ياريت بلاش اللي في بالي....عايزين حد غيره)....بلاش تقليدية

طيب ليها نختمها بنكد كده ههههههههههههه

وما تخافش مش هقول اللى فى بالك ولا حاجة

وبصراحة أنا نفسى لا أسمع ولا أشوف أشخاص كتيرة قوى مش حد واحد للأسف ولكن مجموعة متنوعة متشعبة ولكنهم أذونى وفيه منهم مازال بيأذينى وبتمنى بجد أصحى فى يوم من الأيام الاقيهم أختفوا من حياتى تماماااااا

التاج دة لمين بقى

هو التاج متاح لكل الناس ياخدوه لأنه فعلا تاج رأس السنه وديلها كمان فاللى يحب ياخده ياخده

بالأضافة الى الأسماء اللى فى قايمة أفضل المدونات عندى وكمان كل الناس اللى فى الريدر عندى

وتقريبا أنا كده دبست حوالى 500 مدون ومدونة فى التاج

نييييييييييييييييييييييييييييياها ضحة شريرة

وبالنسبة لموضوع الورثة لروح بوسبوس أنا هتوصل معاهم لأتفاق لاحقا وهبلغه للأستاذ مدوناتى فتح الباب بدل الخناق والمشاكل قدام الناس كدهوه عيب يعنى أموت أنا من هنا وبعدين هما يفرجوا عليا الناس من هنا

أفهموا ليلى الأول

بقالى فترة بجهز فى الأفكار اللى هكتب فيها فى أحتفالية كلنا ليلى للسنة الرابعة وكنت ناوية أبدأ بموضوع عبارة عن طلب لكل ليلى أنها تعمل اللى عليها الأول وبعد كده تطلب اللى هيا عايزاه
ولكن لاقيت أن الموضوع ده نستنى عليه شوية ولأن لحد دلوقتى وبعد كل المواضيع والكلام اللى بيتقال على لسان كل واحدة لسة فيه مسافة كبيرة قوى بينا وبين كل الناس ولسة محدش فاهم ليلى ولا عارف متطلباتها والكل بيسأل
هيا ليلى عايزة إيه ؟
هما لسة عايزين حاجة ما هما خدوا كل حاجة ؟
أنتوا لسة بتكتبوا عن المرأة لية ؟

وملايين الأسئلة وأنا عن نفسى كذا مرة حد يقولى كفاية كلام عن المرأة بس أنا شايفة أنه مش كفاية وممكن أبطل كتابة عنها فى حالة واحدة لما الاقيها خدت أبسط حقوقها

ليلى مش عايزة تطلع السما ولا تبقى سوبر مان
ليلى مش عايزة تحط راسها براس الراجل ولأن كل واحد فيهم ليه دور والأتنين مكملين لبعض
ليلى مش عايزة تعلى صوتها على الراجل ولا تمشى كلمتها عليه
ليلى مش عايزة تبات برة بيتها ولا تسهر لحد وقت متأخر بالليل
ليلى مش عايزة تعمل نفسها الكل فى الكل ومن بعدها الطوفان
ليلى مش عايزة تعمل ملايين الحاجات اللى أنتوا فاكرين أنها عايزة تعملها
ليلى أبسط من كده بكتير

ليلى دى أمك وأختك وبنتك وعمتك وخالتك وخطيبتك وزوجتك

ليلى عايزة حاجات أبسط ما أنتوا متخيلين
عايزة معاملة أنسانية لأنها أنسان مش جماد
عايزة حد يتعامل معاها ويقدر عقلها مش يعتبرها جهاز بيديها أوامر ونواهى وبس من غير ما يفهمها لية
عايزة حد يفهم مشاعرها ويراعى طبيعتها الرقيقة مش يحدفها بطوب وزلط
عايزة ناس تبطل تبص لها على أساس أنها عاااااار ولازم ندارية
عايزة ناس تقدر آحلامها وطموحها طالما الحاجات دى مش متعارضة مع دينها ولا مع العادات والتقاليد ولا مع كونها امرأة عليها واجبات
عايزة ناس تبطل تتكلم عليها فى كل مناسبة وأى مناسبة وفى كل مرحلة عمرية ليها الكلام بيختلف ويتنوع

وكل الكلام ده مش مطلوب تعمله مع واحدة بس لا ده مطلوب مع أى ليلى موجودة فى حياتك سواء كانت أختك ، زميلتك ، بنتك ، خطيبتك ، مراتك

ولو عايزين فعلا تلاقوا ليلى زى ما بتتمنوا وتبطلوا تشتكوا منها أدوها حقها الأول اللى الدين نفسه أداه ليها وأنتوا حرمتوه عليها وبقيتوا بتتعاملوا معاها كأنها لوحة أو تحفة قدامكم

وأنتظروا باقى الأحتفال بتاعى بكلنا ليلى

بالفعل أنت الخسران

من الغباء أن تتوقع أنك تهمنى أو أنى مازلت أتذكرك

هل تتوقع بأنى مازلت أتذكرك فأنت كنت خارج من حياتى قبل دخولك فيها لذلك كان من السهل أخراجك لأنك لم تكن دخلت بعد لأنك لا شىء من الأساس فقط أنظر الى نجاحى وتعلم

وأعلم جيدا أن حياتى أصبحت أفضل بكثييييييييييييير بعد أخراجك منها وهذا على أساس أنك كنت قد دخلتها فأنت كنت مازلت على باب حياتى ولكنى بيدى أغلقت الباب ولم أسمح لك بالدخول لأنك أقل من أن تدخل فيها

أشكرك كثيرا لأنك جعلتنى أكرهك بشدة فى فترة وجيزة جدا لذلك كان من السهل على أغلاق الباب فى وجهك ونسيان هذه الصفحة أو بمعنى أخر لم تعد توجد هذه الصفحة فى حياتى مطلقا

حكمة قالها لى أحد الأصدقاء عنك

قال لى أعتبرى نفسك أشتريتى باكو من البسكوت وعند فتحة وقع منك فى التراب

فعلا صدقت هذه الحكمة وشكرا لمن قالها لى

وبالفعل أنت أقل بكثير مما تتوقع أو تتخيل

فقط تذكر كل كذبة كذبتها على وكل وقفة وقفتها معك حتى وأنت تكذب وتتحجج بأشياء واهية تذكر وقفتى بجوارك دائما لتعلم أنك خسرت كثيرا وأنك لو طفت العالم بأكمله لم تجد واحدة مثلى فعلت ما فعلت أنا

وتذكر جيدا مدى سخريتك من عملى وطموحى وأنظر بنفسك الى ما وصلت له أنا الآن والى ما وصلت له أنت الآن لتعلم من منا الكسبان ومن الخسران

فأنا كسبت كثيرا بعد أن طردتك من حياتى وبدأت أحقق طموحى وأفعل ما أريد

وأنت خسرت كثيرا عندما بعت وخنت وأهنت من ضحت بالكثير من أجلك

شكرا لك لأنك جعلتنى أكرهك كثيرا فوق ما تتخيل وتتصور ويتصور أى بشر

كلام كتبتة من فترة طويلة قووووووووووى وكان واقف فى زورى وأنا ما بحبش حاجة تقف فى زورى أطلااااااااااقا

الخوف وآآآآآآآآآآه من الخوف

كتير قوى بتحصل لنا حاجات ما نعرفش تأثيرها بالظبط إيه علينا ولكن بعد فترة بنلاحظ التأثير ده

وللأسف المشكلة الكبيرة أن الناس اللى حواليك ما يكونوش ملاحظين ده ويفضلوا يضغطوا عليك وعلى أعصابك بشكل يتعبك أكتر وأكتر

الخوف ده شعور عادى ممكن نحس بيه فى أى موقف يستدعى كده زى مثلا ماشين فى شارع ضلمة لوحدنا ، النور قطع علينا ، سمعنا صوت حيوان ما بنحبوش ، بنخاف من الأماكن العالية وهكذا من الحاجات اللى خوفنا يعتبر شىء طبيعى مش مرضى ولا زايد عن الحد

ولكن فكرتوا مرة فى الخوف النفسى

الخوف اللى يكون ناتج عن مجموعة صدمات ومواقف متتالية حصلت فى حياتك وخليتك بعدها تخاف

الخوف ده بيجى عادى لأى حد وبيكون الشخص ده طبيعى جداااااااااا جدااااااااااا وعايش حياتة عااااااااادى وكله تمام وفجأة تحصل له شوية حاجات ومواقف وصدمات وحاجات فوق حاجات فوق حاجات تسبب له صدمة عنيفة جداااااااااااااااااااا ومن بعد الصدمة وبعد ما يفوق بشوية بيلاقى نفسه بقى بيخاف

بيخاف من كل حاجة وأى حاجة

بيخاف من الناس وأنه يشوفهم أو يكلمهم وبيفضل العزلة وأنه يقعد لوحده

بيخاف من أماكن معينة ومن وجوده ومرواحه ليها وخاصة الأماكن اللى بتفكره بذكريات وحاجات ومواقف مش عايز يفتكرها فبتكون الأماكن دى بالنسبة له زى البعبع أول ما تقول له يالا نروح المكان الفلانى أو نسافر للمكان العلانى هووووووب فجأة يتعب مع أنه كان كويس ولكن الذكريات اللى جواه بتضغط على عقله الباطن وكل جسمه وبيطلع ده فى صورة تعب وأرهاق ودوخة وحاجات كتيرة بتوصله الى أن ما يروحش ولا يسافر الأماكن دى

بيخاف من جرس الباب أو التليفون بسبب برضة شىء متعلق بيهم

بيخاف حتى من نفسه وأهله ومن بيته

وحتى المكان اللى هو عايش فيه بيخاف منه وبيبقى كارهه بسبب أنه حصل فيه حاجات سابت جواه أثر مش كويس

بيخاف بقى من حاجات كتيرة قووووووووووووووى

وللأسف اللى بيزود الموضوع ده ضغط اللى حواليه عليه سواء أهله أو أصحابه أو أى حد

أنت ما بتخرجش ليه

أنت ما بتسافرش ليه

ما رجعتش تشتغل ليه

ما بتتصلش ليه

ما بتردش على الموبايل والتليفون ليه

ومليون ليه وليه وهو بيعمل كل ده غصب عنه ومحدش قادر يفهم اللى فيه والكل بيضغط عليه بسبب وبدون سبب

والمشكلة أن الموضوع بيكون محتاج وقت وصبر ومجهود كبير من الشخص نفسه ومن الناس اللى حواليه وأهم حاجة عدم الضغط واللوم ولأنهم بيزودا الموضوع مش بيقللوه

وبيكون محتاج حكمة وفهم كامل وتام للشخصية اللى قدامك وأزاى تتعامل معاها وتدخل ليها من أى مدخل

ولكننا للأسف بنفتقد ثقافة التعامل مع الناس ومراعاة ظروفهم وشعورهم وبنعرف بس ثقافة اللوم والضغط

أنا كنت من زمااااااان فاهمة من مواقف وحاجات كتيرة بشوفها حواليا أن الواحد ممكن يجيله خوف نفسى وقعدت أبحث واتأكدت من الموضوع ده

ومعرفش ليه كتبت الكلام ده ولكن يمكن ينفع أى حد ويفيده

أستفتاء مدونات 2009 علشان خاطر عيون فاتيما وبسكوتة

تدعوكم بسكوتة وفاتيما وغيرهم لأستفتاء مدونات 2009

وهو عبارة عن 10 أسئلة بالكمال والتمام

والأسئلة والتفاصيل هنااااااااااااا

http://pinkysequins.blogspot.com/2009/12/attention-every-bodythe-blogs-poll.html

هاااااااااااااااا مين قال هشارك معاكم ؟؟

وده الأيفنت اللى عملته على الفيس بوك علشان خاطر عيونهم

http://www.facebook.com/event.php?eid=225934336768

ورشة ابو حفيظة للسيناريو

يعلن الاعلامي الكبير / سيد ابو حفيظة عن بدء ورشة السيناريو للموسم الجديد و علي الراغبين في الانضمام لفريق عمل " سيد ابو حفيظة " ارسال بياناته كاملة مرفق معها نموذج لكتاباته علي

akramhosny@gmail.com

علي ان يكون اخر موعد لاستقبال الايميلات

يوم ٣١ / ١٢ / ٢٠٠٩

نقلا عن الجروب الرسمى للإعلامى الكبير سيد ابو حفيظة

القافلة تسيروالكلاب بتهوهو

القافلة تسير والكلاب بتهوهو وأكيد كلنا لازم نسيبها تهوهو

يعنى عمرك شفت حد بيبص لكلب بيهوهو

أهو بالظبط ده اللى المفروض كلنا نعمله نسيب الكلاب تهوهو فى أى مكان وكل مكان وهما أكيد من كتر الهوهوة هيتعبوا ويبطلوا وممكن بعدها ينونوا شوية أو يصوصوا أو يعملوا أى حاجة بقى هما حرين

وتبقى الخلاصة أن القافلة ماشية عادى والكلاب عمالة تهوهو وتهوهو وتهوهو ولا حد معبرها

مع تحيات جميعة الرفق بالهوهوة

أحساس مختلف

مش عارفة يمكن جوايا حاجات كتيرة مش عارفة أسميها ومش لاقية ليها وصف ولكن كل اللى أقدر أقوله أن جوايا حاجات كتيرة متلخبطة قووووووووووووووووووووى

ولكن أهم أحساس حاسة بيه دلوقتى قلقى على ناس غالية عندى قووووووووووى ونفسى أطمن عليهم

وثانى أحساس أنى ماشية فى طريق طووووووووووويل لوحدى ولوحدى دى لازم أحط تحتها مليون خط ولأنى فى الأول والآخر بشر وأحساس الوحدة تقريبا مدمرنى وأحساسى أنى دايما لوحدى مخلينى أحسب مليون حساب لأى خطوة بمشيها

الخووووووووووووووووووووووووووف

وآآآآآآآآآآآآآآآآآآه من الأحساس ده واللى بقى مخلينى حتى خايفة أشوف نفسى فى المراية

عمرى ما كنت جبانة ولا بخاف غير من ربنا ولكن لأسباب وحاجات ومواقف كتيرة بقيت بخاف حتى من نفسى بخاف حتى من الناس من كل حاجة وأى حاجة ومش قادرة حتى أطلع اللى جوايا ولا أفهم اللى حواليا باللى فيا ولأنى تعبت من الأحساس ده

مش عارفة أنا جوايا حاجات كتيرة قوى ومش قادرة حتى أكتبها مش لشىء الا أن إيدى مش عارفة توصف اللى جوايا

جايز أكون محتاجة أبعد شوية علشان أقدر أحدد أنا عايزة أعمل إيه ويمكن وقتها أقدر أرجع زى ما كنت

جايز أكون محتاجة لحاجات ولناس معينة

جايز يكون فيه حاجات كتيرة قوى ولكن إيدى هيا كمان مش راضية تكتبها

بقت بتخاف قووووووووى

بقت بتخاف من حاجات كتيرة قوى

وبحاول أخليها تبطل تخاف

ويادوب لسة بتبدأ أولى مراحلها لخروج الخوف من جواها

كأنها لسة طفلة صغيرة وبدأت تطلع للدنيا لوحدها

وتمشى بدون ما تسند على حاجة أو حد يساعدها و يشيلها ويحطها

أبتسم من فضلك

دعوة جديدة من مدونة نبضات قلب بعنوان

أبتسم من فضلك

بصراحة الموضوع عجبنى وقلت بدل البؤس اللى عمال يقع من مدونتى بقالها فترة نحاول نغير المود وقلت بس عندى كام نكتة واصلين ليا على الموبايل طازة أكتبهم هنا يمكن يعملوا فرق برضة وأول حاجة حبيت أنها تضحكم الصورة الهايلة اللى فوق دى بحس فيها بكمية غباء وهبل مش طبيعين وكمان لا مبالاة جامدة هههههههههههههههههههههههههه

غبى أتقدم لبنت قالتله أسفة جوايا شخص تانى قالها بلاش فلسفة وقولى أنك حامل

واحد أتصل بمراته وهو بيزعق لها وبيقولها حضريلى المية السخنة بسرعة ، صاحبه بيقول له يا حمش قاله أمال إيه أنت عايزنى أغسل المواعين بميه ساقعة

راجل قام من النوم على صوت زعيق

سأل الجيران فيه إيه ؟

قالوله تصدق الميه مسممه

مراته

صحيت سألته فيه إيه ؟

قال لها مفيش أشربى كوباية ميه ونامى

انشرها فقد حدثت لى بالفعل : مره غفوت ليلا

و

عادى قمت الصبح

قد تظلم علينا الدنيا وقد تضيق بقدر ما أتسعت وقد تموت السعادة فى أحضان خبر مؤلم ولكن تبقى هناك شموع تضىء لنا


هتلاقيها فى

كارفور الواحدة ب 3 جنية

خطوبتى يوم الخميس وانتى أول واحدة أقول لها

توقيع

معنسة بتتخيل

وحشتنى قوى وفرحت لما شفتك أمبارح

ياااااااااااااااااااااااااه مش عارفة أقول إيه غير أنى مبسوطة جدا أنى شفتك فى الحلم أمبارح وزى ما قلت قبل كده أنى لما ببقى محتارة أو فيه حاجات كتيرة شغلانى وقرارات مهمة فى حياتى بلاقيك جايلى فى حلمى تطمنى ومجرد أنى أشوفك بس ده بيفرق معايا كتير قووووووووووووووووووى

مش قادرة أقولك أنت وحشتنى قد إيه وكان بقالى فترة طويلة بدعى أشوفك فى الحلم والحمدلله شفتك مرة الشهر اللى فات وكتبت عنك الموضوع ده

شفتك فى الحلم

ومرة أمبارح بجد أنت وحشتنى قووووووووووى قووووووووووووووى ونفسى أشوفك قووووووووى

ربنا يرحمك يا عمى ويدخلك فسيح جناته

اللهم أغفر له و أرحمه و اعفو عنه و أكرمه

اللهم وسع مدخله و أدخله الجنة وغسله بالثلج و الماء والبرد

اللهم يمن كتابه و هون حسابه و لين ترابه و ثبت أقدامه و ألهمه حسن الجواب

اللهم نور مرقده و عطر مشهده و طيب مضجعه

اللهم آنس وحشته و أرحم غربته و قه عذاب القبر و عذاب النار

اللهم نقه من خطاياه كما ينقى الثوب الأبيض من الدنس

اللهم فسح له في قبره و أجعله روضة من رياض الجنة و لا تجعله حفرة من حفر النار

اللهم أجعل له من فوقه ومن تحته ومن أمامه ومن خلفه وعن يمينه وعن يساره نورا من نورك يا نور السماوات و الأرض

اللهم أبدله دارا خيرا من داره و أهلا خيرا من أهله و أزواجا خيرا من أزواجه واسكنه فسيح جناتك في الدرجات العلي آمين

اللهم إن كان قد أحسن فزد في إحسانه و إن كان قد أساء فتجاوز عن إساءته

اللهم من أحييته منا فاحييه على الإسلام ومن توفيته منا فتوفاه على الإيمان

اللهم ارحم ( عمى مجدى ) رحمة واسعة وتغمده برحمتك

ربنا يرحمك يا عمى ويدخلك فسيح جناته

آميييييييييين يارب العالمين

متوفى يوم 22 أغسطس 2004 ومازال فى قلبى وعقلى موجود

يوميات موظفة حكومية متعاقدة( أنا والناظر وأسرائيل يا مامااااااااااااااااا

دى الحلقة الأولى من اليوميات

يوميات موظفة حكومية متعاقدة

------------------------------------

أنا والناظر وأسرائيل يا مامااااااااااااااااااااااا

أول يوم شغل بقى كان بالنسبة ليا يوم عالمى ولسة فاكرة تاريخة بالظبط 1 /1 / 2005 ويومها معرفتش أنام ولاقيت نفسى صاحية من بدرى وخاصة أنى هشتغل فى مدرسة فى بلد أرياف بينها وبين المدينة اللى عايشة فيها حوالى نص ساعة مواصلات ده غير المسافة من بيتى للموقف والبلد دى ليها حكاية لوحدها والناس كلها كانت مسمياها أسرائيل وبيحذرونى من الناس اللى هناك لطباعهم اللى مش ولابد
أكتر حاجة كانت كسفانى فى أول يوم ومضيقانى أن بابا صمم يجى معايا بحجة أنه بيشتغل فى مكان له علاقة بالتربية والتعليم وطبعا معظم الناس اللى هناك يعرفوه فقال يجى معايا يعرفنى بيهم واللى زود الموضوع بقى أنه له واحد صاحبه من البلد دى وقاله أنا هاجى معاكم أنا كمان

( يااااااااااااااالا كملت كان ناقص يجيبوا ليا مصاصة وحاجات حلوة أكل فيها هناك ههههههههههه )

أول ما ركبنا العربية وصاحب بابا أشتغل مرشد سياحى ليا وتقريبا كل اللى فى العربية خدوا بالهم والحكاية ماكانتش محتاجة كل ده لأن ده طريق بلدنا أصلا ويعتبر عرفاه كويس يعنى مش هتوه ولا حد هيخطفنى عاااااااااااااااااااااااا يا جدعان أنا كبرت خلاص إيه بس حركات معاملة الأطفال دى
نزلنا من العربية وصاحب بابا وقفنا شوية يورينا المنطقة وهنا إيه وهنا إيه على أعتبار أنى رايحة الهرم بيفرجنى عليه وطبعا بقيت عاملة زى السياح خاصة من شكلى وهدومى اللى بالنسبة للناس اللى فى البلد دى لبس الفرنجة والكفار هههههههههههههههههه

دخلنا المدرسة ومن أول البوابة وكل اللى يشوف بابا وصاحبه نازل سلام فيهم وطبعا محدش عارف هما جايين لية ولا مين اللى معاهم دى طلعنا الدور الثانى لاقينا صف مدرسين مرصوص جمب بعضه وده لأننا كنا قربنا من أمتحانات الترم الأول وما بقاش فيه طلاب بيروحوا خلاص وبعدين طلعنا للدور الثالث خليط بقى فى الطرقة من الرجالة والستات والكل متنح ومستغرب هما مين دووووووووووووووول

دخلنا أوضة والكل سلم على بابا وصاحبه وأنا زى الطفلة اللى رايحة الحضانة وبعد ما صاحبه أدى الورق بتاعى لواحد كان قاعد شوية الواحد ده قام يوديه الأوضة التانية للناظر والناس الموجودة حلفت لنشرب شاى
يخربيتكم شاى إيه أنا معدتى أتقلبت من منظر المدرسة اللى قدامها ترعة ده ومليانة زبالة وكمان منظر الناس هناك ما يشجعش الواحد يشرب مية حتى
ودول صمموا قال يعنى الكرم مقطع بعضة وعملوا لينا شااااااااااااااى تقييييييييييل بشكل غير طبيعى وأنا قعدت أقول لهم من الأول مش عايزة ودول مفيش فايدة شربت بقين كده وكنت ولا بلاش أقرفكم هههههه

شوية وجه حد نادانى تعالى الناظر عايزك قمت وفضل بابا وصاحبه يكملوا الشاى الوصاية ده وأول ما دخلت الأوضة لاقيت المدير على مكتب والناظر على مكتب وشوية ناس معرفش مين دول والناظر بسم الله ما شاء الله طول بعرض بأرتفاع والمهم أنه كان قاعد على المكتب بس باين برضة وأنا عاملة زى السفروتة وأول ما دخلت قلت السلام عليكم بس تقريبا كنت بقولها لجوه وشاكة أن حد سمعها
شوية وسمعت صوت كان هيغمن عليا ساعتها تقريبا كان الناظر بيكلمنى والصوت ده فكرنى بالراجل اللى كان فى فيلم محمد هنيدى بتاع جاءنا البيان التالى اللى كان فى السجن وعمال يقول صاحب العمارة الى أخره بقى من الجملة دى فاكرين صوت الراجل ده كان عامل أزاى أهو الناظر بقى صوته عداه بمراحل

ولاقيت اللى بيقولى أنتى عايزة تشتغلى أخصائية مكتبة

( نعم مين فين لية هو أنا لسة جاية أختار ولا دى مدرسة خاصة هتشغلنى على مزاجك ده العقد موجود ومكتوب فيه الشغل اللى هعمله وجاى من الأدارة والتوجيه عدل ليكم علشان أستلم شغلى مش لسة هختار ولا هتخيرنى حضرتك وتحسسنى أنى جاية أشتغل عندك )

طبعا الكلام ده كله كان فى عقلى الباطن وفى خلال ثوانى قلت له أيوة وكانت داخلة لجوه أكتر من السلام عليكم كده
وفعلا كنت ساعتها هيغمى عليا بجد صوت الراجل وطريقتة فى الكلام ما عجبتنيش خاصة أنى داخلة أوضة كلها رجالة وكلهم مرزوعين قاعدين وماهانش عليه يقولى أتفضلى أقعدى على أعتبار أنى رايحة أشحت منه مثلا وكانت بداية غير مبشرة بالمرة
ولسة الباشا هيكمل المحضر الا وبابا وصاحبه جم والراجل أتنفض من على المكتب وسلم عليهم وقعدهم وساعتها حس بقى وقبل ما يقولى أتفضلى أقعدى صاحب بابا قالى واقفة ليه أقعدى ههههههههههههههه وأنا ما صدقت وقمت قاعدة
ومن بعدها أكتشفت أن الناس فى البلد دى ما ينفعش معاهم الواحد يستنى أى شىء ولازم أنت تتصرف تلقائى بنفسك يعنى مش لازم أستنى بعد كده حد يقولى أقعدى لأنه محدش هيقولها

( وبعدين أنا أزاى هتعامل مع الكائنات دى يالهوووووووووووووى هما مش شايفين أنا عاملة أزاى وهما أزاى عااااااااااااا )

وشوية وجه راجل عنده خمسين سنه كده والناظر عرفنى عليه وقالى ده أمين المكتبة ومن النظرة الأولى كده حسيت أن إن شاء الله شغل المكتبة كله هيبقى على دماغى وأحساسى ما كدبش بصراحة
وقام الراجل ده قالى تعالى أوريكى المكتبة وقمت أنا وبابا وصاحبه ومعرفش هما راحوا فين كده وأنا نزلت الدور التانى مع الراجل وقدام المكتبة كان صف طويل عريض من المدرسين الرجالة والرجالة وبس وعرفت أنه ماكانش فيه واحدة بتفكر تقرب من المكتبة بسبب أن الرجالة أستعمروها

( هاهاها بكرة نشوف هطفشكم من هنا واحد ورا التانى أنا فاضية للوش ده )

وطبعا نفس نظرات الفضول ومين دى وجاية ليه وخاصة لما لاقونى دخلت المكتبة مع الراجل ده وقام هو كمان سابنى ومشى ويادوب ببص بعينى برة المكتبة الاقى الصف الطويل العريض رامى عينه جوه المكتبة كان هاين عليا أقفل الباب فى وشهم وبعدين قعدت أبص على المكتبة بصة سريعة كده وقلت ياااااااااااه حلو قوى الواحد هيقرا كتير ولكن ماكنتش عارفة أنى هلاقى مفاجأت عديدة بعد كده

ونزل بابا وصاحبه وقالوا ليا يالا نمشى علشان نكمل باقى أجراءات الورق فى الأدارة وأنا ماكنتش عايزة أمشى وقلت لهم طيب ما تمشوا أنتوا وأنا هستنى

( ماكنتش أعرف أنى بعد كده أنا اللى هبقى أموت وأمشى )

ونزلنا الدور الأول علشان نمشى لقطتنا واحدة تعرف بابا وصاحبه وصممت نشرب شاى يخربيت الشاى بتاعكم ده أنا مش عايزة لا شاى ولا قهوة ومع أنى قلت لها مش عايزة الا أنها عملت وما شربتوش وتقولى مالك أنتى قرفانة ولا إيه لا ده الكوبايات والبراد نضاف وغسلاهم كويس
بابا قال لها أصلها شربت شاى كتير النهاردة وهيا ما بتحبوش

وروحنا بقى على أمل العودة تانى يوم لأسرائيل يوووووووووووه قصدى للمدرسة وتوالت المفاجأت

يوميات موظفة حكومية متعاقدة ،، كلاكيت تانى مرة

لا لا لا بلاش عقلكم يروح لبعيد أنا لسة مرزوعة فى بيتنا ما لاقتش شغل بس دى كانت يومياتى فى الثلاث سنين اللى أشتغلتهم بعد ما أتخرجت وقبل ما أسيب الشغل

وكنت بدأت وكتبت أول موضوع وبعدين نسيت الحكاية خالص وأنشغلت فى حاجات تانية ولكن الموضوع رجع يهف عليا فقلت أوريه ليكم وأخد رأيكم

هاااااااااااااا أكمل فيه ولا لا

يوميات موظفة حكومية متعاقدة

لا للكبت لاااااااااااااااااااااااااااااااااا

صمت رهييييييييييييييييييب + كبت أنفعالات ومشاعر كتيرة + آحلام غريبة مش فاهم منها حاجة + وحدة فظيعة = قولون قرب ينفجر + شبه حالة أكتئاب

وفى النهاية يساوى حد بيمثل أنه كويس وهو مش كويس

حد عايز يكون أقوى من مشاعرة وفعلا بيعدى أول الخطوات ولكن لازم يكون فيه عواقب وهيا دى العواقب

حد بيتمنى يطلع كل اللى جواه وما يكبتوش ولكن مش قادر

-----------------------------------

دموع فى نهر الحب

تؤ تؤ ده مش حاجة مألفاها ده مسلسل بيجى حاليا على قناة الحياه وبغض النظر عن قصته وأى شىء وأى حاجة ولكنى أول مرة بجد أشوف واحدة قدرت تمثل وبجدارة دور مرضى القولون العصبى والناس الحساسة

وفاء عامر أدت الدور ببراعة ولو بإيدى أديها وسام عليه

لأن ناس كتيرة مش قادرين لحد دلوقتى يتعاملوا ولا يتفاهموا مع الناس اللى قولونها عصبى

والأكتر من كده أنهم مش قادرين يحسوا باللى بيبقى جواهم

وفاء عامر عجبتنى فى كل حركاتها خاصة بقى لما كانت تيجى تتكلم والقولون تاعبها وتقوم حاطة إيديها على معدتها بشكل فعلا يوضح قد إيه هيا تعبانة

وسيبكم بقى من الهبل بتاع أن حد يتعب ويغمى عليه ويجى دكتور ويقول ده عنده أنهيار عصبى ويديله حقنة مهدئة وبعد ما يفوق يبقى كويس طبعا ده كمية غباء مش طبيعية بتيجى فى الأفلام والمسلسلات

ولكن وفاء جسدت مشاعر وأحاسيس أى حد بيكون شاف حاجات كتيرة فى حياتة وفضل يكبت فى نفسه ويستحمل ويستحمل لحد ما ده أدى الى أن القولون يجيله التهاب ويتعب وده طبعا ما بيحصلش بسهولة ولازم يحصل بعد حاجات جامدة قوى

وأكتر حاجة بتتعب القولون هيا الكبت

يعنى الواحد ما يطلعش أنفعالاته كلها فى لحظتها يعنى لو زعلان تلاقيه مخبى زعله وعمال يضحك

ولو أى حاجة تانية جواااااااه برضة يخبيها ويظهر عكسها ويمكن ده لأسباب كتيرة ومش وقتها دلوقتى

علشان كده كل اللى عايزة أقوله لأى حد بلاش الكبت وطلعوا كل أنفعالاتكم حتى لو هتكسروا أى حاجة قدامكم المهم تخرجوا الشحنة اللى جواكم بدل ما تتعبوا

ولأن تعب القولون أبشع من ما يتصور أى حد

يالا كفاية كلام بقى شكلى صدعكتم وتقريبا هعمل موضوع مفصل عن القولون وأسبابه وأزاى التعامل معاه وحاجات تانية كتير

نيولوك البنات عايزة إيه

أحم أحم أزيكوا عاملين إيه أنا قلت بقى بما أننا داخلين على سنة هجرية وكمان ميلادية جديدة والناس رايحة جاية تعمل حاجات غريبة وبتجدد فى كل حاجة قلت فى عقل بالى لا لا لا كله الا كده مش معقول هسيب بنتى الصغيرة بشكلها القديم كده وكل البنات عمالة تتزوق وتعمل نيولوك ومش عارفة إيه

قمت مكدبتش خبر وقلت وماله نعمل لها نيولوك هيا أقل منه يعنى ولا إيه

وقد كان قعدت ألف لفة حلوة كده لحد ما ظبطتها وهندستها وخليتها أحلى بنوتة فى الدنيا

ولو مش مصدقين أدخلوا وشوفوا بنفسكم بقت عاملة أزاى

البنات عايزة إيه فى ثوبها الجديد

ومش بس كده لاااااااااااااااااااااا

ده أنا بحضر لأحتفالية كلنا ليلى اللى هتشوفوها هنا وعلى المحروسة بنتى اللى عملت لها نيولوك دى وهتلاقوا مفاجأت جاااااامدة جداااااااااا

وكل سنه وانتوا طيبين بمناسبة السنه الهجرية والميلادية ويارب تكون السنين الجاية أحلى من اللى فات علينا كلنا إن شاء الله

لا لست أنا

لا لست أنا التى تموت من الحب

لا لست أنا التى تموت من الجرح

لست أنا التى تهزمها مشاعرها أيا كانت فأنا أقوى من مشاعرى هذه

وتعودت طوال عمرى أن هذه هى الحياة حب وكره وسعادة وألم

تعلمت أن حياتنا كلها تجارب ولكن الذكى الذى يستفيد من كل تجربة أيا كانت

تعلمت أنه كما نحب أحيانا نكره

وكما نفرح أحيانا نحزن

وكما ننجرح أحيانا نجرح

وهذه هى الحياة وعلينا أن نعيشها كما هى

ونهزم كل شىء لا نجعل الأشياء تهزمنا أبدااااااااااااااا

وبالطبع لست أنا من تهزمها مشاعرها ولا تهدها فأنا أقوى من مشاعرى هذه

أعذرنى سيدى

أعذرنى سيدى فقد أرهقتنى مشاعرى مشاعر أنثى محطمة القلب تخيلت فى يوم ما أن من حقها أن تحب وتجد من يحبها ويقدر مشاعرها

ولكن أستيقظت على واقع ينظر لها نظرة سخرية ويخرج لها لسانه ويقول لها هذا ليس زمنك ولا وقتك

ومشاعرك هذه كلها بلا قيمة ولا هدف واضح ومحكوم عليها بالاعدام وكل هذا لأنه ليس من حقك أى شىء ليس من حقك الحياة كأى أنسان طبيعى

أعذرنى سيدى لا يمكننى أنا أقف أمام العالم بأكمله وأفصح عما بداخلى وأنت واقف بعيد مكتوف الأيدى تنظر لى وتسخر منى ومن أفعالى وبداخلك سعادة كبيرة لأنك تشعر بما داخلى تجاهك وتزداد سعادتك عندما تشعر بأن الكثيرون يشعرون بهذا

ولكن عفوا فأنا لم أتعود أن أحصل على شىء ليس من حقى فما داخلى أشعر بأنه سرقة

نعم أشعر بأنى أسرق هذه المشاعر لأنى بكل بساطة لا أستطيع أن أعبر عنها بكل قوة وكل هذا لأنى بالنسبة لك لا شىء

نعم لا شىء وعندما بحثت عن مكانتى بداخلك لم أجد أى شىء ولم أجد نفسى فى حياتك ووجدتنى خارجها

فكيف لى أن أشعر بشىء ليس من حقى

لذلك أعذرنى وأعدك أنى سوف أخرج من حياتك حتى تعيشها بهدوء وراحة وأيا كانت العقبات والعذاب الذى سوف أشعر به فهو أهون بكثير من شعورى بالمهانة وبكرامتى التى ضاعت تحت قدميك

أعذرنى فلم أكن يوما أنسانة ضعيفة ولم أتعود على وجودى فى هامش حياة الآخرين أيا كان شعورى تجاههم

أعذرنى فسوف أرحل وأترك لك كل شىء فمن الممكن وقتها أن تشعر بمن كانت فى حياتك ورحلت بعد أحساسها بأنها لا شىء

فقد كنت على أستعداد أن أقف أمام كل العالم وأعلنها وأفعل الكثير والكثير ولكن أعذرنى فأنت من جعلتنى أهرب وأتركك

ينسون أنى أنثى

ينسون أنى أنثى لها قلب ومشاعر وأحاسيس ويتخيلون من معاملتى الجافة لهم أنى لست امرأة وبأنى أنسان جاف المشاعر

يتخيلون أن مظهرى الطفولى لا يعكس غير تصرفات طفولية غير مسئولة ، ينسون أنى أنثى وبداخلى قلب به الكثير من المشاعر الراقية التى لا يعرفون عنها شيئا

يتخيلون أن معاملتى الجادة ما هى الا أنعكاسا لموت قلبى

لا قلبى لن يموت وسيظل ينبض لآخر يوم فى عمرى فبداخله شلال من المشاعر الجميلة ولكن لا يصح أظهارها هكذا

ينسون أننا نعيش فى مجتمع لا يرحم من تكتم مشاعرها ولا يرحم من تظهرها فكلهن فى نظرهم مجرمات خاطئات

مجتمع يعاقب كل أنثى لا لشىء الا لأنها أنثى فقط

ينسون أنى أنثى تتمنى أن تعيش أروع قصة حب فى العالم ويتهموننى بأنى لست رومانسية ولا أعرف شىء عنها

كيف لى أن أظهر مشاعرى وسط هذا الكم من الأنتقادات والأتهامات ليس لسبب الا لأننى أنثى

فأنا أعترف بأن لى قلب وبه الكثير من المشاعر والأحاسيس وبأنه من الممكن أن يكون أرق قلب فى الوجود ويتمنى أن يحب ويخرج كل ما بداخله من مشاعر ورومانسية ويعلنها أمام العالم كله

ولكن لمن سوف تخرج هذه المشاعر وهل سوف يتقبلها أم يوبخنى هو الآخر ويتهمنى بطفوليتى

كل ما أعلمه الآن أننى أنثى لها قلب رقيق جدا ليس من السهل الحصول والحفاظ عليه ولكن من السهل جرحه وإيذائه

ولكنى سوف أحتفظ بما داخل قلبى حتى يظهر من يستحق الحصول عليه

وكل هذا لأنى أنثى وكونى أنثى يمنعنى من البوح بما يحمله قلبى من مشاعر وأحاسيس

ومازلت أحلم بأن أعيش قصة حب أسطورية تجعلنى أخرج كل ما بداخلى من مشاعر وأحاسيس وتوقظ الأنثى النائمة بداخلى

امضاء أنثى تعيش فى مجتمع يلوم أى أنثى على أى شىء وكل شىء

من تأثير أقتراب يوم كلنا ليلى

بطلة دائما

كانت تعيش دائما دور البطلة وكل من حولها كان يضعها ويراها الأكفء لهذا الدور

أخوتها ، عائلتها ، أصدقائها كل من تعرفهم وضعوها فى هذا المكان وكانوا يروها بطلة حقا وذلك بسبب تأثيرها ودورها الملحوظ فى حياتهم فكانوا لا يتخيلون الحياة بدونها ولا بدون مشاركتها ولا آرائها وظهورها فى كل شىء يخصهم

وعاشت طويلا بطلة فى حياة كل من عرفتهم كبارا كانوا أو صغارا وكانت مثل الجبل يحمل الكثير والكثير وعلى أستعداد لحمل الأكثر وكانت مثل البحر بداخله الكثير مما يخصها ولا يعرف أحدا ما بداخلها الا عندما تريد هى

فهى مثل البحر تخفى أكثر مما تظهر وكانت لا تحب رمى أحمالها أو أعبائها على أى أنسان حتى لا تزعجهم مع أنها كانت تحمل أعباء كل من حولها

الى أن جاء يوم وأنهار الجبل ووقع كل الحمل من على أكتافه وتركت دور البطولة وأكتفت بدور المتفرج ولكن حتى وهى فى هذا الدور يطلب منها كل من حولها أن تعود لدور البطولة مرة آخرى لأنهم غير راضيين عن الدور الجديد وغير سعداء بحياتهم من غير بطلتها الحقيقية

ولكن هل من الممكن بعد ما أنهار الجبل وتعكر البحر أن يعودوا من جديد كما كانوا؟

وأن تعود هى لدور البطولة أم أنها سوف تكون بطولة مزيفة

شغلى

شغل عدد نوفمبر جريدة أسرار الغد

شغل عدد أكتوبر جريدة أسرار الغد

ورجعت الحالة من تااااااانى

مش عارفة فيه إيه بالظبط لكن كل اللى حاسة بيه قووووووووى الأيام دى شعور بالوحدة فظيييييييييييع وبجد الشعور ده بيقتلنى من جوه

وعدم أحساس بالوقت غريييييييييييييييييييييييييب

فاقدة الأحساس بالزمن والوقت والدنيا كلها فاقدة الأحساس بالفرح والحزن

فى النهاية مش حاسة بأى شىء تقريبا فقدت أحساسى بكل شىء

وتقريبا مش عارفة سبب محدد لظهور الحالة دى دلوقتى بالتحديد

بس اللى عرفاه كويس أنى من ساعة ما رجعت من السفر بعد أجازة العيد وأنا مش طبيعية خالص ومش مظبوطة بالمرة ومعدتى من جوه قايدة نااااااااااااار

بس لية كل ده معرفش

أحساسى بالوحدة بيزيد مش بيقل ويمكن ده سبب أن كل شوية أسافر علشان أبقى وسط ناس كتيرة قوووووووووى

يمكن فيه أسباب كتيرة قوى لأحساسى ده اللى عمال يزيد

ولكن كل اللى متأكدة منه أنى محتاجة ناس بعينها ولأنى نفسى مرة واحدة أحس بأن فيه حد فاهمنى وحاسس بيا من غير ما أقول أنا جوايا كذا وكذا وكذا ومن غير ما أطلب من أى حد أنى أفضفض شوية

بجد الموضوع ده بيتعبنى مجرد أنى أحس أنى غامضة على كل اللى حواليا وأنهم مش حاسين باللى جوايا وما بيحسوش بيا الا لما أتكلم وأفضفض معاهم

ياااااااااااااااااااااااه هل هايجى اليوم اللى الاقى حد فيه زى أخويا الكبير كان بيفهمنى من نظرة عينى أو من نبرة صوتى حتى لو ما بظهرش اللى جوايا وبحاول أبان عكس كده

هل هايجى اليوم اللى الاقى حد من مجرد كلمة أو جملة أكتبها يفهم أن فيا حاجة

عايزة أتكلم بجد وأطلع اللى جوايا واللى أكيد مش هيطلع لأى حد

ولأن مشكلتى الكبيرة فى كتمااااااااااااااااااااااااااااااانى الكبير قوى

وفى عزة نفسى اللى بقت بتخلينى أتكسف أطلب من حد يسمعنى ولأن كل أنسان عنده اللى مكفية

بس بجد أكتر شىء حاسة بيه دلوقتى هو الوحـــــــــــــــــــــــــــــــــــــــــــــــدة

الحملة بتاعتى فى اليوم السابع

أول ما عملت الحملة وكالعادة لاقيت هجوم وكلام ونقد كتير وطبعا ده متوقع جدا أى فكرة محتمل ناس تتقبلها وناس لا ولكنى ما يأستش وكملت فيها والنهاردة لاقيت حد سايبلى لينك الموضوع اللى كتب عن الحملة فى اليوم السابع بجد أنا فرحت جدااااااااااااااا

جدااااااااااااااااااااااااااااااااااااااااااااا

ده لينك الموضوع على اليوم السابع

http://www.youm7.com/News.asp?NewsID=165621&

وده لينك الجروب على الفيس بوك

http://www.facebook.com/group.php?gid=182783013793

فى النهاية عايزة أقول أنى مبسوطة بغض النظر عن أن فيه ناس كتيرة ضدى ومش عاجبهم الحملة ولا أسمها

:)

الطبيعة وتصويرى

دى شوية صور من اللى صورتها فى العيد ومازلت لسة بتعلم وفيه حاجات كتيرة هتجننى فى الكاميرا بس مسيرى أعرفها يالا أتفرجوا على التخريف اللى عملته

:)

أن تكونى حساسة

أن تكونى حساسة ومشاعرك رقيقة شىء عادى جدااااااااااااااا

ولكن أن يكون قولونك عصبى فهذا شىء عادى عند بعض البشر

وعند بعضهم الآخر جريمة لا تغتفر وينظرون لكى على أنك مريضة بمرض مزمن أو معدى وأحيانا تخرج من أفواههم كلمات وجمل لا يستطيع أى عقل أن يصدقها مثل

مش كفاية كنا هناخدها وهيا تعبانة كده !!؟؟ على أعتبار أن عندها جرب مثلا أو صرع

دى تعبانة يعنى المفروض نحاسب على كل كلمة نقولها ليها والا كل شوية هتتعب لينا وتقرفنا !!؟؟ على أعتبار أنها مجنونة وماعندهاش عقل وأى حاجة هتخليها تزعل وتتعب ماكانش حد عاش بقى فى زمنا دة

ولا على أعتبار أنهم راحوا خادوها من العباسية مش شافوها فى بيت أهلها وشافوا أنها عايشة طبيعى جدا زيها زى أى حد فى الدنيا

وعلى أعتبار أن الناس لازم تفضل تحدف بعض بالطوب واللى ما يتأثرش ولا يزعل ولا يتعب يبقى تمام وفل الفل ولكن اللى يتعب لازم نقيم عليه الحد

هيا مالها معدتها فيها إيه !!؟؟ هيا مافيهاش حاجة وكويسة جدا وزى أى حد ولكن تقريبا لما أتعاملت مع ناس زيكم ما عندهمش قلب ولا رحمة وما بيحسوش وفضلوا يضغطوا عليها وعلى أعصابها تعبت وكانت كل ما بتشوفكم لازم تتعب لأنكم مش بنى أدمين أصلا

وكل ده ليه لأننا عايشين فى مجتمع غبى ماعندوش مشاعر ولا قلب وما أتعلمش أزاى يتعامل مع بنى أدمين ولا يعرف أبسط قواعد الأنسانية ولا عندهم ثقافة الأحساس والمشاعر ومفتقدين لكل شىء أدمى

كلام كنت عايزة أقوله من زمااااااااااااااااااااااااااان قووووووووووووى

عايز تتعلم كتابة سيناريو

فيه ناس كتيرة عايزة تتعلم أزاى تكتب سيناريو سواء كان سيناريو فيلم أو مسلسل
دى مدونة كويسة جداااااااااااااا وصاحبها منزل سيناريوهات لمسلسلات وأفلام وكمان كتاب عن كتابة السيناريو عامة
بتمنى بجد تفيد أى حد عايز يعرف المجال ده وعلى فكرة على الفيس بوك كمان مجموعة جروبات خاصة بالموضوع ده وأنا عرفت المدونة دى عن طريقة وهجمع كل الجروبات دى فى مرة وهنزلها هنا
وأنا عن نفسى نزلت الكتاب ولسة بنزل فى السيناريوهات

سيناريو جامد

حاليا بنزل مجموعة كتب لنوال السعداوى ولسة ببحث عن مواقع فيها كتب أكتر ووصلت لموقعين بدأت أنزل منهم اللى عنده مواقع تفيدنى ياريت ما يبخلش عليا ويكتب لينكها هنا
ويمكن أنا مابحبش قراية الكتب من على النت ولكن لأنى محتاجة الكتب دى ضرورى ولكتب تانية غيرها مضطرة أشوفهم على النت لحد ما أسافر وأجيبهم لأنى هنا فى صحراء تقريبا
ولية الكتب دى بالذات لأنها كانت نصيحة من أصدقائى ولأنها هتفيدنى قوى وعلشان كده لازم أعملها ومش معنى كده أنى مش هقرا غيرها يعنى بس تقريبا هبدأ بيهم :)
وبجهز نفسى كمان من دلوقتى لمعرض الكتاب اللى فى أخر يناير وناوية أروح كام مرة مش مرة واحدة وأعيش فيه وأجيب أكبر قدر من الكتب

أن تكون لحياتك معنى

أن تكون لحياتك معنى هذا شىء جيد جداااااااااااااااااا

ولكن أن تكون أنت معنى الحياة بالنسبة للكثيرون فهذا شىء صعب جدا

هل جربت هذا الأحساس أن تكون أنت معنى الحياة للكثيرون ؟؟

هيا بنا نتحدث بكل صراحة وكل فرد منا يقول هل لحياتة فعلا معنى وهدف أم لا ؟؟

وأيضا هل أنت ممن يقال فيهم أنهم معنى الحياة حتى لو كان لشخص واحد فقط ؟؟

أحلى عروسة

يااااااااااااااااه كان فرح جميل جدااااااااااااااا ويمكن فرحتى كانت كبيرة قد عمر صداقتى بعروسة النهاردة تخيلوا كده تبقوا عارفين حد من الأبتدائى وتفضلوا عارفين بعض طول المده دى وتكبروا مع بعض وتعدوا بمراحل كتيرة وتشوفوا بعض فى ليلة العمر

بجد سعادتى ماكانش فيه حاجة توصفها ولا تقدرها واللى زود سعادتى نظرة صاحبتى أول ما شافتنى واقفة بصورها وكانت وسط أخواتها وضحكت ضحة جميلة جدا وبعدين قمت أنا جارية حطيت الكاميرا مع ماما ورحت تانى ليها وأول ما لمحتنى سابت الناس اللى معاها ودخلت عليا وهاتنا أحضان بقى ياااااااااااااااااااااه فرحت قوى من فرحتها دى

وفضلت واقفة شوية معاها وهيا طايرة من الفرحة

يمكن أنا كنت متوقعة أشوف ناس كتيرة من صحابنا من أيام المدرسة والغريبة أنى ما لاقتش أى حد خااااااااالص مش عارفة لية بس

ويمكن وجودى وحضورى فرح صاحبتى قوووووووووى لأنها شافت حد من صحابها وفرحنى أنا أكتر ولأنى لا يمكن كنت هتأخر عنها مهما حصل

بجد مش قادرة أوصف فرحتى بيها وليها

ربنا يتمم ليها بكل خير يارب ويرزقها بالذرية الصالحة وتكون جوازة سعيدة عليها وعلى عريسها إن شاء الله

ويمكن فيه كام موقف مضحكين عايزة أحكيهم بس فعلا هموت من الصداع ودوشة الفرح لسه فى ودانى وعايزة أنام بقى علشان بكرة هصحى بدرى

تصبحوا على خير وبكرة نكمل بقى

:))))))

أنتظر المجهول@وشوية حاجات

أنتظر شىء أو أشياء مجهولة ولا أعرف هل هى جيدة أم سيئة ولكن أتمنى أن تكون جيدة

أسوأ شىء فى هذه الدنيا الأنتظار خاصة لو كان أنتظار شىء مجهول

طبعا من الواضح أن أخر كام موضوع ليا كانوا نكد شوية بس طبعا ده مش قصد بس كانت حاجات جوايا من فترة وحبيت أطلعها ولأن مدونتى هدفها الأساسى أنى أطلع اللى جوايا

على العموم هحاول أغير الكلام الكئيب ده اللى بيخلى الناس تفتكرنى كئيبة بس كل الفكرة أنى عادية جدا زى أى حد ولكنى بطبعى كتومة قوووووووى ومش سهل أتكلم أو أحكى مع أى حد والكتابة تعتبر هيا صاحبى الأول

النهاردة فرح بسمه صاحبتى بجد فرحانة ليها جدااااااااااااااااااااااااااا وهروح الفرح طبعا أنا وماما

وبكرة إن شاء الله رايحة بؤجة الخير

ولما هرجع من الفرح أحتمال أكتب موضوع عن مشاعرى وكل حاجة حصلت ده على أعتبار أنى هبقى راجعة شايفة قدامى ومش هرجع أنام علشان أصحى بكرة من الساعة 7

نداء هااااااااااااام لكل الناس اللى تعرفنى ومعاهم رقمى رنوا عليا كتيييييييييييير الساعة 7 الصبح

هههههههههههههههههههههههههههههههههههه

الصداقة كنز ولكن أى كنز هذا !!؟؟

تعودت طوال عمرى على تكوين علاقات أنسانية كثيرة وكنت أحب ذلك كثيرا لذلك يوجد لدى أصدقاء كثيرون منهم من صادقتهم من صغر سنى وأنا فى المرحلة الأبتدائية ومازلنا الى الآن أصدقاء مرورا بكل مرحلة فى عمرى كنت أخرج منها وأنا أجنى ثمرة من ثمرات الصداقة

ولا أخفيكم سرا الى أنه من بين كل الأصدقاء الجيدين يظهر شخصية أو أكثر تعتبر مثل الثمرة الفاسدة التى تود أن تقلع كل أخضر ويابس وصادفت أنواع كنت على وشك توطيد علاقتى بهم وفى الوقت المناسب قطعتها تماما

وحذر الأنسان وذكائه لا يمنعه مطلقا من الأنخداع فى بعض البشر حوله

وبالتأكيد يوجد فرق بين الصداقة والزمالة وأى علاقات آخرى تحت أى مسمى ولله الحمد فقد كونت معظم أنواع هذه المسميات من صداقات الى زمالات الى معرفة وأشياء آخرى كثيرة

ولكن مؤخرا تعرفت بمجموعة من الشخصيات وبطبعى دائما لا أثق ولا ابدأ فى البوح بأى شىء يخصنى الا عندما أتأكد تماما من شخصية من أمامى

ولكن مع شدة حذرى أحيانا أقع فى معرفة شخصيات وأخدع فيهم كثيرا

وتقريبا الآن أشعر بأننى أعرف نوع من الأنواع الذى خدعت فيهم وفى برائتهم الكاذبة وخوفهم المزيف على ولكنى أنتظر الوقت المناسب والشىء المؤكد على كذبهم وخداعهم حتى أقطع علاقتى بهم تماما أو أجعلها علاقة معرفة فقط لا صداقة ولا حتى زمالة ولا أى مسمى من المسميات الأنسانية

وبالطبع أشعر بضيق كلما أتذكر أنى وثقت بهم كثيرا وفتحت لهم قلبى وأخرجت الكثير مما بداخلى ومع أن كل من يعرفنى جيدا يعرف أنى لست الشخص الذى يثق بسرعة ولا يبدأ فى قول أى شىء عنه الا بعد فترة طويلة من المعرفة وأننى بطبعى مثل الصندوق السرى الذى يخفى بداخله أكثر مما يظهر ولكن كل هذا لم يمنعنى من الوقوع فى الخطأ

لا أريد أى شىء الآن الا أن يعيننى الله على معرفة هؤلاء البشر وهل هم بالفعل صادقون أم كاذبون حتى أرتاح من شكوكى هذه التى تذبحنى كلما تكلمت معهم أو رأيتهم أو شعرت بأنهم يلعبون بى ويوقعون بينى وبين كل من أعرفهم

ليس لى الا الله

وأتمنى من كل قلبى أن يكون شكى ليس فى محله وتكون مجرد أوهام

أرق آحلاااااااااااااامى

آحلامى الأيام دى عندها حالة أرق شديدة مش عارفة إيه السبب ولكن كل اللى أعرفه أنى لما بيكون عندى حلم لازم أفضل أحاول وأحاول وأحاول أوصل للحلم ده

وبتمنى فعلا أوصل لآحلامى اللى بحلم بيهااااااااااااااااا من زمان

وبتمنى بجد أشوف كل الناس تحاول وتحاول توصل لكل حاجة بتحلم بيها وما تستسلمش أبدا مهما حصل وأهم شىء أنها تبقى قوية قدام أى ظروف وما تنكسرش من أى حاجة وحتى لو جت لحظات ألم تحاول تكون أقوى منها ومن نفسها كمان

ويارب آحلامى تتحقق وكل الناس تحقق كل آحلامها

عصافير عقلى

خلاص بقى مش قادرة بجد

بحب العصافير يا جدعاااااااااااااان ونفسى يكون عندى عصافير أربيهم والعب معاهم ونبهدل بعض عاااااااااااااادى جدا

بس ده مش عادى خالص عندنا بابا مش موافق أطلاقا مطلقا أنى أشترى عصافير مش عارفة لية

أمال لو قلت عايزة أشترى قطة ولا كلب مع أنى عمرى ما هقولها ولا هعملها لأنى بخاف منهم أصلا وبقرف منهم

ولكن العصافير من أكتر الحاجات اللى لا بتقرف ولا تخوف

عااااااااااااااااااااااااااااااا

ماما كانت خايفة من الحرمانية ولما قلت لها أنى سمعت كذا مرة أنه مش حرام وكمان بعت لدار الافتاء وعرفت أنه مش حرام سكتت وما قالتش حاجة

عااااااااااااااااااااااااااااااااااا

أعمل إيه بقى هموت وأجيب عصافير

أهىء أهىء أهىء

وبعدين هو فيه أحلى من أن الواحد يصحى الصبح على صوت زقزقة العصافير يا سلام دى أحلى حاجة فى الدنيا

قعدت أفكر وأتكتك وأخطط وقلت بس مفيش غير أن حد يجيبلى العصافير هدية ساعتها بابا مش هيتكلم وممكن أبقى أديكم حقهم بعدين ما تقلقوش

هههههههههههههههههههههههههههههههههههههههههههههههه

لا والغريبة خطيبة أخويا جابتلى فى عيد ميلادى هدية عبارة عن شجرة وعليها عصفور وبيصوصو بس لعبة طبعا مش عارفة عرفت منين الموضوع ده شكلى بدأت أصعب على كل الناس

ومن هنا من هذا المكان هفتح باب التبرع للمدونين والمدونات القادرين منهم والقادرات أتبرعوا ولموا وهاتولى قفص فيه عصفورين

عاااااااااااااااااااااااااااااااااااااااا

وعصفورين فى اليد خير من عشرة على الشجر

وهديكوا ثمنها بعدين

هههههههههههههه

بفكر أعمل حملة عصفورين وقفص

أو عصفور الحلو يا عصفورى

أو عصافير بوسبوس

شكلى أتجنتت خلاص

:))))))))))

غبية جدااااااااا

غبية جدا وضعيفة وبتضيع فرص كانت تتمناها من زمان ولكن لغبائها وخوفها الزيادة مش عارفة تحسن التصرف وعمالة تضيع فى كل حاجة وتهد كل شىء

ولكن إيه النهاية

خليكى كده قاعدة فى قوقعتك وضيعى حياتك وأقفى أتفرجى عليها من بعيد وبعدين أبكى على اللبن المسكوب

وما تزعليش لما حاجات كتيرة تضيع منك

أكيد أنتى أتقدمتى كتير قوووووووووى وبقيتى أحسن وأتخلصتى من حاجات كتيرة قوى كانت مضيعاكى وتعباكى ولكن مازال فيه جزء ناقص جواكى وحلقة مفقودة مخلياكى تبقى كده مخلياكى تبقى ضعيفة وخايفة والخوف شعور طبيعى ولكن لو زاد هيضيع الدنيا
ولو وصلتى لحل الجزء المفقود ده هترجعى زى زمان وأحسن من زماااااااااان بكتير

لكن لازم ما تستسلميش ولا تضعفى لأنك لو ضعفتى لحظة واحدة هتهدى كل اللى بنتيه وعملتيه فى سنين وهترجعى تانى لنقطة الصفر لا ده هتبقى أقل من الصفر كمان
يمكن ربنا له حكمة فى تأخير حاجات أو تقريب حاجات ولكن برضة فيه أسباب وبلاش ترمى كل حاجة على القدر وخدى بالأسباب مين عارف هيحصل إيه

بطلى غباء بقى أرجوكى وأطلعى من ضعفك وأقتليه

لأنك بكل بساطة مش ضعيفة ولا غبية والدليل كل حاجة عملتيها ولسة بتعمليها فى حياتك وكل اللى وصلتى ليه وفى وقت قياسى جدا كل ده يبين ليكى أنك مش ضعيفة بس يمكن خايفة يمكن وحيدة ولوحدك معلش تعالى على نفسك وكملى علشان خاطرى

ودارى ضعفك وخوفك جواكى وأياكى تظهريه لأى حد وخاصة لو كان حد مش هيفهمك ولا يقدر ده ولأن مفيش حد ما بيخافش ولا بيجى عليه لحظات بيكون ضعيف ولكن خليكى زى ما كنتى دايما كل حاجة جواكى ومحدش عارفها خليكى دايما قوية والكل شايفك شجاعة وأقوى من أى شىء وتشيلى هموم جبال ولا تنهدى منها وكمان تشيلى هموم كل اللى حواليكى وترميها جواكى وتقفى معاهم وتحليها ليهم حتى لو ماكنتيش عارفة تحلى مشاكلك برضة خليكى كده

أنا معاكى أنك بشر وأوقات بتحتاجى حد تفضفضى معاه ولكن لو ماكانش الحد اللى هيفهم ويقدر يبقى تسكتى أحسن وخليكى محافظة على مظهرك القوى زى الجبل اللى ما يهزه أى شىء

أنتى أتغلبتى على نفسك وعلى مشاعرك وقلبك وعلى عقلك كمان

خلااااااااااااااص زى ما أتعودتى تسيبيها على الله سبيها برضة على الله
وأنتى أتطورتى جدا وقدرتى تبقى قوية على نفسك كملى بقى وبلاش تضيعى الباقى

كونى قوية أرجوكى وبلاش تضعفى وكلنا معاااااااااااااااااااكى ومش هنسيبك