Monday, June 22, 2009

السعادة والناس



لية دايما لما نحس أننا فرحانين ونشعر بشوية سعادة لازم نخاف ونقول خير اللهم أجعله خير ونفضل حاطين أيدينا على

قلبنا وخايفين لتحصل كارثة أو مصيبة كمان شوية وكأن السعادة شىء وحش ولا لازم يحصل بعدها كارثة

لية نضيع لحظات السعادة اللى فى عمرنا بسبب أننا فى الوقت ده بنفضل نفكر ياترى هيحصل لنا أيه وحش وياترى هو ده الهدوء اللى بيسبق العاصفة والعاصفة هتقلب المركب وأحنا راكبينه وكل حاجة هتتقلب

مش عارفة بجد فيه إيه ولية تفكيرنا كده ولية ما نعيش لحظات السعادة ونبطل بؤس وأكتئاب بقى دى اللحظة اللى بتعدى من عمرنا ما بترجعش تانى

ونرجع نعيط لما تحصل لنا مشكلة أو حاجة تضايقنا ونقول ياااااااه أنا لية ما فرحتش لما كان فيه حاجة مفرحانى وفضلت أفكر فى اللى جاى وقلقان وخايف أفرح

بصراحة الواحد أكتشف أننا شعب نكدى من الدرجة الأولى
بنخاف نفرح لا ما نعرفش نحزن

بنخاف نضحك لا ما نعرفش نعيط

بنخاف نبتسم لا مانعرفش نكشر تانى

ياعالم حرام عليكوا نفسكوا أفرحوا بقى شوية كفاية كل المشاكل والهموم اللى الناس فيها مش لازم كمان لما تيجى حاجة تفرحنا نزعل

ولا الظاهر دى ثقافة النكد بتاعتنا

أفرحوا بقى أبوس ايديكم

وبطلوا نكد شوية وعيشوا لحظات السعادة اللى فى حياتكم

وبطلوا تنكدوا على نفسكم بدون سبب وبطلوا تخافوا تضحكوا لا ما تعرفوش تعيطوا تانى ما تقلقوش والله هتعرفوا تعيطوا وتصرخوا وتشدوا فى شعركم كمان


4 comments:

AHMED SAMIR said...

التجربة علمتنا ان بعد كل فرحة بييجي ما يسرق هذه الفرحة
و هانروح بعيد ليه...يوم الخميس اللي فات مصر كلها كانت بتبكي من الفرح و النهاردة مصر كلها بتبكي حزنا و قهرا

بسنت صلاح الدين said...

العودتنا انها بتدى بأيد وتاخد بالأيد التانيهنبس ده ميمنعش انك على حق فعلا مانجرب و خلاص نفرح و نسيبها على الله ماكده كده الحزن جاى لا محاله يبقى نفرح لنا شويه

بسمه عبدالباسط said...

أحمد سمير

مش عارفة بس لية أحنا ما نحاولش نغير تفكيرنا ده ونحاول لما تكون فيه فرحه نعيشها بجد وما نفكرش فى حاجة تنكد علينا

بسمه عبدالباسط said...

بسنت

فعلا ياريت نعيش لحظة السعادة وما نضيعهاش لانها ما بقتش بتيجى كتير