Tuesday, July 15, 2008

أزاى تدمر علاقتك باللى قدامك

الواحد ممكن يعمل حاجات كتيرة علشان يقرب من الناس ويقربهم منه وكمان لما بيلاقى حد بيقرب منه بيحاول بكل الطرق يتجاوب معاها ويكون كويس وفيه طرق كتيرة علشان الناس تقرب من بعضها وتقدر مشاعر اللى قدامها

ولكن فيه طرق لتطفيش الناس من حياتك ودى طرق كويسة جدا أتعلمتها بجد على أيد حد قريب منى جدا وحبيت أعرضها عليكم مش علشان تنفذوها وتطفشوا الناس لا طبعا علشان تاخدوا بالكم منها وما تحالوش تعملوها مع أى حد خصوصا لو كان قريب منكم
أول حاجة لما تلاقى حد مهتم بأنه يعرفك أكتر ويتصل بيك مرة وأتنين وثلاثة ويبعت لك مليون رسالة وأنت ما تعبروش طبعا ممكن تكون مشغول فى يوم مثلا أو عندك ظروف ولكن لما الموقف ده يتكرر يوم وأتنين وثلاثة وساعات كتيرة أسبوع وأكتر تلاقى حد بيتصل ويرن ويبعت رسايل وأنت ولا هنا الموقف ده كفيل بأنه يطفش اللى قدامك ويخليه مش ضايقك ولا ضايق يشوفك ولا يسمع صوتك وحتى لما بتتصل أنت بيه ما بيبقاش له نفس يرد عليك ولا حتى يكلمك ولما بيرد بيكون قرفان ومش ضايق نفسه من اللى أنت عملته
ثانى حاجة لما تلاقى حد بيعبر لك عن مشاعرة بكل الطرق الممكنة تعمل أنت أيه تتجاهله ولا كأنه عمل حاجة ولا تحاول تشكره على مشاعره الحلوة حتى لو ماكنتش أنت حاسس بأى مشاعر ناحيتة بلاش ما تعبروش وتتجاهله كأنه ما عملش حاجة لأن الموقف ده كفيل بأنه يقتل أى مشاعر حلوة جواه ناحيتك أيوة بيقتلها وبتنتهى على طول وطبعا لما المشاعر دى تتقتل وتنتهى صعب أنك تقدر ترجعها تانى بسهولة
ثالث حاجة لما تلاقى اللى قدامك بيعتبرك كل حاجة فى حياتك وبيقدرك جدا وأنت محسسه بأنه ولا حاجة وما بتحاولش حتى تعمل أى موقف حتى يبين له أنه له وجود فى حياتك الموقف ده برضة كفيل بأن مشاعرة اللى جواه تتغير من ناحيتك وزى ما أنت محسسة بأنه ولا حاجة أنت فعلا هتتحول وهتكون ولا حاجة بالنسبة له مع مرور الوقت
كل دى مواقف ممكن نكون بنعملها ومش متخيلين قد أيه هيا بتأثر فى أى حد وبتدمره نفسيا فياريت تخدوا بالكم منها خصوصا لو كان الموضوع بينك وبين حد قريب منك والمفروض تكون علاقاتكم كويسة جدا

10 comments:

المـــفـــــــقــــــــوعـــــة مــرارتـهــا said...

كيف تخسر صديقاً
للأسف خسارة الصديق بقي أسهل كتير من كسبه
فيه طريقة تانية
خلي صديقك يقولك علي سر وذيعه علي الملأ ويستحسن يكون في وجوده
ممكن كمان تنقد تصرفاته أمام ألد أعدائه اللي هو يحب يبان قدامهم في احسن حالاته
لما يكون عيان اوعي تكلمه وتقوله سلامتك

Unknown said...

بوست مهم جدااااااااااا

اشكرك بجد عليه
دمتى بخير

blue-wave said...

فعلا
ياترى كام حد جرحناة واحنا مش واخدين بالنا؟؟

Empress appy said...

خليتنى اخد بالى بس على فكرة ساعات بعمل كده متعمده لان مبكونش عاوزة اللى قدامى او الحل التانى ببلغه على طول

Anonymous said...

المفقوعة مرارتها

فعلا كيف تخسر صديق بقت أسهل كتير قوى عن ازاى تكسبة والناس بقت بارعة فى الموضوع ده قوى


تحياتى

Anonymous said...

عاليا حليم

العفو يا جميلة نورتينى

تحياتى

Anonymous said...

blue-wave

اكيد جرحنا كتير قوى

تحياتى

Anonymous said...

appy

اكيد احنا ساعات بنعمل حاجات ومانكونش واخدين بالنا منها وساعات بنكون متعمدين بس الأهم لما نعملها واحنا مش واخدين بالنا ساعتها بندمر حاجات كتيرة

تحياتى

Ahmed El.Saryِ said...

للاسف بقي سهل جدا علي الناس انهم يفقدوا اشخاص طالما مفيش من معرفتهم مصلحة او شغل ... قليل اللي بقي بيعرف الناس لانه بيحبهم

Anonymous said...

ahmed el.sary

صح عندك حق فى كلامك الناس بقت بتعرف بعض علشان المصلحة وقليل لما نلاقى حد بيعرف حد لشخصه او علشان بيحبه

تحياتى