Saturday, April 12, 2008

التضحية والعطاء

التضحية كلمة معناها كبير قوى ولكن مش كل الناس تعرفها ومش كل الناس تقدر عليها وفيه ناس ماعندهاش أستعداد تضحى بأى حاجة مهما كان السبب

ولكن ياترى أنتوا شايفين التضحية أزاى معناها أيه بالنسبة لكم وممكن تضحوا بأيه وعلشان خاطر أيه ولمين
يعنى ممكن ناس تضحى بحاجات كتير من أجل أسرتها ودول بيكونوا الناس الوحيدين اللى ممكن يضحوا علشانهم بحاجة
وفيه ناس تانية ممكن تضحى كمان علشان أصدقائها ودول طبعا مابقوش كتير الأيام دى نسبة لأختلاف مفهوم الصداقة من شخص لآخر
وفيه ناس ممكن تضحى من أجل شخص عزيز يعنى حبيب حبيبة زوج زوجة وهكذا

وطبعا فيه أنواع كتير للتضحية ومختلفة من شخص للتانى ولكن هل الأنسان جواه طبع التضحية ولا دى حاجة بيكتسبها
العطاء هل ده صفة أساسية فى كل الناس ولا أيه الحكاية هيا أكيد بتختلف من شخص للتانى يعنى ممكن واحد يعطى بلا حدود وبيكون فى قمة سعادته وواحد تانى يعطى شىء بسيط ويحسسك أنه عمل اللى عليه وزيادة


لكن التضحية نفسها حاجة جميلة قوى وشعور حلو قوى لما تلاقى نفسك بتضحى علشان حد عزيز أو غالى عليك ومهما كانت التضحية بتلاقى نفسك مستعد ليها ومستعد تدية أكتر وأكتر
ولكن فيه نقطة مهمه لما تلاقى نفسك بتضحى مرة وأتنين وثلاثة ومية وفجأة تلاقى اللى قدامك مش حاسس بيك مش هقول ما بيضحيش علشانك لانك مش مستنى منه كده لكن بتكون مستنى كلمة حلوة منه مستنى انه يحسسك أنك كل حياته
لكن لما تلاقى نفسك بتدى وبس وحتى مش لاقى كلمة حلوة ولا مجرد أهتمام ولو بسيط من اللى قدامك ساعتها بتفكر مليون مرة فى اللى بتعمله
وممكن تزعل من اللى قدامك ونفسيتك تتعب ولكن بيفضل طبع التضيحة فيك ومهما عمل بترجع تسامحه
وبتكون مش عايز حاجة منه غير كلمة حلوة شوية اهتمام ولو بسيط
صدقونى بيفرقوا كتير قوى
مش شرط تقابل التضحية بتضحية زيها ممكن تقابلها بكلمة حلوة بموقف كويس بأهتمام باللى قدامك
حسسة أنه كل حياتك وأنه حاجة مهمه ليك
لأنك مهما عملت فيه هيفضل برضة يضحى علشانك لأن التضحية طبع فى الأنسان والأنسان اللى بيكون كده صعب يتغير
فياريت لما تلاقى حد مستعد يقدم لك كل حاجة ومستعد يضحى بحياته علشانك حطه فى عنيك وحسسه بأنه كل حياتك لأنك مش هتلاقى زيه كتير ولأننا بقينا فى زمن صعب نلاقى حد بيضحى علشان حد

24 comments:

(احمد سكر ) said...

السلام عليكم

كلامك مضبوط جدا

التضحيه شىء عظيم فعلا

وياريت فعلا الانسان يحس بالناس اللى بتضحى علشانه

وياريت الناس تحس بمدى التضحيه
اللى الاخر ممكن يضحى بيها

واللكلام دا كله يتلخص فى شىء واحد

الحب فى الله

لما تحب انسان فى الله ولله

لما بتساعد انسان وانت بتساعده لترضى الله

ومتكونش مستنى منه مقابل

ياريت اكون عرفت اوصل المعنى

تحياتى لقلمك المميز

احمد سكر

AHMED SAMIR said...

على فكرة يا بس بس
التضحية والقدرة عليها لا تظهر الا في الشدائد
يعني ممكن تلاقي شخص يقعد يقول انا اضحي بعمري علشانك...بس ساعة الجد تلاقيه بح
وممكن حد لا تتوقعي انه يضحي بباكو لبان..وتلاقيه بيفديك بحتة من جسمه
الشدائد فقط
تحياتي

صاحب المضيفة said...

فعلا تعبيرك عن الخلق ده بيشمله من نواحي كتير

ربنا يبارك لك على العرض الجميل ده


تحياتي

موناليزا said...

نصيحة غالية وياريت تتنفذ
فما اجمل ان تضحى من اجل من تحب ولكن الاجمل ان تجد من يستحق هذه التضحية

شيماء الجيزى said...

الله على كلامك يا بسمه
فعلا عندك حق فى كل شئ قولتيه
بس المشكله اننا اوقات كتير بنضحى بس مش بنلاقى اى رد فعل
اينعم التضحيه فى حد ذاتها مش بتحتاج رد فعل
لكن زى مانتى قولتى كلمه او فعل حلو هيفرق كتير
بس انا حاليا مش مستعده اضحى الا علشان اهلى
والتضحيه بردو مواقف
يعنى ممكن تضحى علشان اهلك فى وقت وبعد كده بتنتقل لشخص غير اهلك

وعلى فكرة الحب هو اساس التضحيه

بحبك جدا يا بسمة وربنا يديم الصداقه والمحبه بنا
تحياتى يا صاحبة العقل الراجح

son's egypt said...

السلام عليكم
فعلا التضحية شئ صعب خاصة لما تضحي وتلاقي اللي بيضحي علشانة مكنش يستحق التضحيىة
ولكن التضحية نفسها شئ جميل

عاشقة الوطن said...

السلام عليكم

ازيك يابسبس

التضحية
الموضوع ده خطير
ازاى كل واحد بيبص للموضوع ده
ومن اى زاوية ممكن نبص له ونتعامل معاه

قبل كده كنت كتبت موضوع عن التضحية بس كتبت عن نوع واحد من التضحية متكلمتش عن كل انواع التضحية
اتكلمت غى جزء واحد
وهو متضحيش باللى بتحبه
يعىن فيه ناس زمايلي من وجهة نظرهم انهم لما يضحوا باللى بيحبوهم عشان مش هيقدروا يعيشوهم فى نفس المشتوى اللى كانوا عايشين فيه
هما شايفين ان التضحية ديه لازم ولابد منها
على الرغم ان الطرف الاخر متقبل الانسان ده بيه كده
وعنده لما يحافظ عليه ويحارب عشانه اهم بكتير من انه يضحى بالحب ده

كنت اتكلمت وكتبت الموضوع ده من نقاشي مع ناس ووجهة نظرهم ونظرى
بس بجد التضحية اكيد لها جوانب اخرى
يعنى ليه هى كمان متضحيش وتقبل بانها تعيش معاه على حاه كده
مع العلم ان المستوى الاجتماعى والثقافي واحد

يعنى لو كل واحد نظر للتضحية فهيلاقي لها جوانب كتير اوى وجوانب مهمة محتاجين اننا نفهمها ونتناقش فيها
التضحية اكيد شئ حلو بس برضه ساعات بيكون تضحية سلبية
وياريت اللى يضحى تكون تضحيته فى جانب ايجابي

معلش طولت عليكى يابسبس
بس الموضوى بجد مهم وشيق

تحياتى ياجميل

Unknown said...

المدونة بسم الله ماشاء الله عليها
بجد جميلة جدا
وعجبتني جدا جدا
وعجبني اسلوبك وكلامك وتفكيرك
ماشاء الله عليكي
الى الامام دائما وربنا يوفقك

*سمر* said...

كلامك صح جدا ..عرضتى التضحية بكلمات بسيطة و مفهومة ..لكنها عميقة..
اشكرك على التدوينة ..
مدونتك جميلة ..وربنا يباركلك انتى و خطيبك :))

والسلام ختام

Anonymous said...

السلام عليكم
لو بينا حد مش كويس
لو بينا حد مغشوشين فيه
وبيتسغل تواجده بينا
ويقول كلام مش بينفذه
وبيوعد وعود تحت ميثاق الصداقة الحقيقيةوهذه العود لا تري النور!!
ماذا يكون الحل معاه؟؟؟
النصحية أم الفضيحة أم الصمت
علشان نعلمه القناعة وانه مش يخون ونعيد توجيه-ولما نحاول ويقفل الباب في وجه المحاولة؟؟ويدعي انك الغلطان وأنك لا تقدره؟؟ويقفل الابواب ويهرب؟؟
دهشتني عندما يستغل البعض صدقنا فيجعلنا نقسم ألا نثق في أحد بعد الان
ماذا نفعل مع هؤلاء
وخصوصا اذا كانو يلبسون غطاء جميلا وأصحاب كلمة المفروض يحترموها
ممكن تشاركونا الرأي
منتظر ردكم وشكرا

بسمه عبدالباسط said...

سكر

وعليكم السلام
فعلا وصلنى كلامك
الحب فى الله هو اساس كل شىء ومن غيره مش هنكون حاجة ولا هنعمل حاجة

تحياتى لك

بسمه عبدالباسط said...

a.samir

فعلا فى وقت الشدة بيبان كل واحد على حقيقتة

تحياتى لك

بسمه عبدالباسط said...

صاحب المضيفة

شكرا على كلامك وسعيدة ان الموضوع عجبك

تحياتى لك

بسمه عبدالباسط said...

monaliza

فعلا كلامك صح
وجود من يستحق التضحية شىء مهم جدااااااا

تحياتى لكى

بسمه عبدالباسط said...

شيماء الجيزى

فعلا الحب هو أساس التضحية
واصعب حاجة انك لما تضحى ما تلاقيش رد فعل
واكيد الناس مش بتبان حقيقتهم الا فى مواقف معينة

سعيدة جدا بأن الموضوع عجبك وبأنك رجعتى تنورى مدونتى تانى

وانا كمان بحبك جدا ويارب تفضل صداقتنا طول العمر وان شاء الله هتفضل وهتستمر

تحياتى لكى

بسمه عبدالباسط said...

sons egypt

وعليكم السلام
فعلا هيا شىء جميل بس بتكون صعبة قوى لما تضحى وتلاقى اللى انت ضحيت علشانه مايستاهلش

تحياتى لكى

بسمه عبدالباسط said...

عاشقة الوطن

وعليكم السلام

ازيك انتى يا قمر

فعلا عندك حق فى كلامك
واكيد التضحية ليها جوانب كتيرة وكل واحد بيشوفها من وجهه نظره

ويا ستى انا عايزاكى تطولى لان كلامك بيعجبنى جدا ودايما بيكون أضافة لكلامى

تحياتى لكى

بسمه عبدالباسط said...

theriddle

اولا انا سعيدة جدا بزيارتك لمدونتى
ثاينا شكرا على كلامك فة حق مدونتى وفى حقى وبتمنى تفضل تعجبك دايما

ربنا يوفقنا كلنا

تحياتى لك

بسمه عبدالباسط said...

سمر

شكرا على كلامك
وسعيدة بزيارتك وبأن المدونة والموضوع عجبوكى وبتمنى تعجبك مدونتى دايما

ربنا يخليكى وتحية كبيرة من خطيبى ليكى

تحياتى لكى

بسمه عبدالباسط said...

anonymous

وعليكم السلام

الحل اننا نحاول معاه مرة واتنين وثلاثة ونحاول نوجهه للصح ونقنعه
ونحاول فعلا معاه كتير ولكن لو مفيش فايدة ومش عايز يتغير ومصمم على افكارة وعلى انه هو الصح واننا الغلط يبقى الحل بعد كل محاولاتنا اننا نتجاهلة ونبعد عنه جايز يتغير ولو ما اتغيرش يبقى هو حر احنا نعيش حياتنا من غيره وننساه ونطلعه من حياتنا خالص واكيد هنلاقى ناس كويسة كتيرة وهتقدرنا وهنقدر نصاحبهم
والدنيا زى ما فيها الابيض فيها الاسود وعلينا اننا نختار اللى يناسبنا

بتمنى أكون أفدتك

وكنت اتمنى اعرف مين معايا

ومنتظرة اى مشاركات تانية

تحياتى لك

NilE_QueeN said...

الانسان لما بيضحي بيضحي بشئ مهم عشان شيء اهم

واكيد بيكون الدافع وراء التضحيه هو الحب

موضوع جميل ومودنه جميله لانسانه جميله

بنت مصريه said...

انا بصراحه فى الزمن اللى احنا فيه ده كله بيقول يلا نفسى
الكلمه دى اتشالت من قاموس حياتنا كله دلوقتى بيدور على رغيف العيش
بس والله مجرد وقوفه فى الطابور تضحيه بحياته عشان
اسرته تاكل ولا ايه احييكى واتمنى تنورينى

Anonymous said...

nile_queen

فعلا الحب هو الدافع لكل حاجة
وشكرا على كلامك الجميل ده
نورتينى

تحياتى لكى

Anonymous said...

بنت مصرية

هو فعلا الناس اتغيرت بس لسة فيه ناس كويسة ومستعده تضحى كتير

نورتينى وهزورك اكيد

تحياتى لكى