Tuesday, January 1, 2008

عام جديد وعيد ميلاد مدونتى الأول

Free Image Hosting at www.ImageShack.us


أحتفالين مرة واحدة مش كتير ده عليا


أنا قلت اعملهم مع بعض وأكتب كل حاجة هو أكيد البوست هيكون طويل بس كلامى عن مرور عام على مدونتى هيكون فيه حاجات كتير من اللى عايزة أقولها فى كلامى عن عام مر على حياتى كلها وعن قدوم عام جديد

بداية أنا مدونتى عملتها من سنه بالظبط فى شهر يناير بس يوم أيه مش فاكرة لان للأسف المدونة أتحذفت منى بعدها بحوالى خمس شهور غصب عنى وعملتها تانى وعلشان كده أنا هحتفل بعيد ميلادها الاصلى مش اللى فى الأرشيف


سنه مرت على مدونتى بكل حاجة حلوة وكل حاجة وحشة

بأحداث كتير سعيدة وكمان حزينة


بأفكار طلعت وكبرت وأفكار لسة مدفونة جوايا


بأحلام طلع منها حاجات ولسة الباقى عايز يطلع


بعلاقات جميلة عملتها


بصداقات طلعت بيها


بعقول جديدة مش موجودة كتير


خبرة كبيرة خدتها من كل حاجة شفتها وعملتها هنا


مدونتى هيا أنا جزء منى وأكيد عليها حاجات كتير جوايا ولكن مش كل الحاجات لأنه فيه حاجات ما ينفعش تكتب لأنه مهما كان دى مدونة وفيه ملايين بيشوفوها وما ينفعش أعرض كل حاجة تخصنى عليها

بس أكيد الحاجات اللى عرضتها جزء منى وأكيد أنا أستفدت كتير من السنه اللى بدأت أدون فيها


وأكيد فيه ناس أثروا فيا وناس أنا أثرت فيهم وأكيد كل حد هيدخل هيأكد على كلامى أو ينفيه أنا عايزة بجد الصراحة مهما كانت عايزة أعرف هل أنا فعلا أثرت فى حد سواء بالسلب أو بالأيجاب


هل أنا عملت حاجة كويسة ولا مفيش حاجة أنا عملتها ياريت أعرف رأيكم لأن ماينفعش أقيم مدونتى مهما كان ولا أقيم نفسى


أكيد فيه بوستات عندى بعتبرها أهم البوستات ولما جيت أكتب عنوانها لاقيتهم كتير علشان كده مش هكتب غير اهم أتنين


عيد ميلاد أخويا


عيد ميلاد ماما



وياريت كل حد كان متابع مدونتى وفيه بوست أثر فيه فعلا أو علم معاه يكتبلى أسمه ده لو كان فيه حاجة يعنى أثرت


مدونتى بجد كان طريق لحاجات كتير قوى كنت بتمناها وبحلم بيها ووقفت لظروف كتير عندى


سنه بحالها عرفت ناس وعرفونى أثروا فيا فى حاجات كتير


بتمنى ليهم كل خير وخايفة أقول أسم حد أنسى حد تانى بس بجد كلهم كان ليهم أثر جميل فى حياتى


أكيد أفكارى أتغيرت شوية وأكيد عقلى أتغير شوية وأكيد كل كلمة كنت بشوفها فى أى مدونة كانت بتفتح جوايا حاجات كتير


كان نفسى الف على المدونات اللى أتعودت أدخل عليها وأكتب هنا موضوع من كل مدونة علق معايا قوى بس للأسف الوقت ضيق ولو لحقت هعمل كده


كل ما أفكر وأقول هيا مدونتى دى هتفضل موجودة لحد أمتى لحد سنه أتنين هل ممكن أسيبها أقفلها ولا هيا هتفضل عايشة معايا طول ما انا عايشة


أنا بجد بتمنى أنها تفضل معايا طول ما أنا عايشة ونفسى ما تحصلش أى حاجة تخلينى أسيبها


طيب كفاية كده وأدخل على الكلام عن السنه الجديدة والسنة اللى فاتت لأن هيكون فيه كلام فيهم عن مدونتى برضة

----------------------




العام الجديد والعام القديم


أولا كل سنه وأنتوا طيبين بمناسبة العام الجديد وبتمنى يكون عام سعيد عليكم إن شاء الله وكل واحد وواحدة يحققوا كل أمنياتهم وآحلامهم فى السنه الجديدة

بتمنى مرور سنه وقدوم سنه مايكونش بس بالأحتفالات والحاجات الغريبة اللى بنشوفها دى بجد حاجة تغيظ


نفسى كل واحد يفكر كده أن السنه دى عدت من عمره يعنى عمره نقص سنه


يفكر عمل أيه صح وايه غلط حياته ومستقبله وكل حاجة عمل فيها أيه

أتقدم كام خطوة لقدام ورجع كام خطوة لوراء

هل عمل حاجة مفيدة ولا أيه ياريت نحاسب نفسنا على كل حاجة ونحاول نصحح أخطاءنا فى السنه الجديدة


بالنسبة ليا السنه دى كانت مليانه بحاجات كتير قوى من الكويس ومنها اللى مش كويس


أولا فى بدايتها عملت مدونتى وبدأت مشوارى اللى كنت بحلم بيه طول عمرى لأنى طول عمرى بحب الكتابة وكالعاده مكتب التنسيق ودانى لطريق تانى ونسيت الكتابة تماما الا فى أوقات بسيطة كنت بكتب فيها لنفسى بس لكن بعد ما عملت مدونتى رجعت تانى ليها لكن شوية وكان نفسى فى حاجة أكبر من المدونة وبدأت فى طريقى للمجلات بداية من مجلة نفسنا الى مجلة على صوتك الى كلمتنا

وبدأت فعلا أرجع لهوايتى وأكتر حاجة بحبها فى حياتى وبتمنى فى السنه الجديدة كل المجلات دى تكبر وتبقى أحسن وأحسن وإن شاء الله بأصرارنا كلنا هتكون أحسن


ونفسى أى حاجة أكتبها فعلا تأثر فى الناس

حلم تانى حلمته مع مدونة جميلة وهو أذاعة المدونين اللى بتمنى أسمع عنه أخبار كويسة قريب

بالنسبة لباقى حياتى أيه اللى حصل تانى أمممممممم

بقى عندى أصدقاء أكتر بسبب نقلى من مكان شغلى لمكان تانى وأكيد خدت خبرة أكتر فى شغلى لدرجة أنى بفكر أسيبه مش علشان هو وحش ولا مش عاجبنى لأ علشان أسباب تانية كتيرة هتعرفوها بعدين لأنى ناوية أكتب كذا موضوع عن العمل الحكومى وخصوصا اللى بعقود أنتظروه وأدعولى أقدر أخد قرار


بقى عندى صديقات مدونات حلوين قوى وبتمنى تستمر علاقتنا


حياتى عموما ماحصلش فيها تغيير كبير قوى

الحاجة اللى ضايقتنى وزعلتنى سفر أخويا الكبير حبيب قلبى وصديقى وكل حاجة حلوة فى حياتى يوم 14/6

بجد كانت حاجة صعبة عليا قوى وبتمنى أشوفك فى السنه الجديدة


حاجة كمان ضايقتنى أنى أنشغلت عن صديقاتى صديقات الطفولة ومراحل عمرى المختلفة وصولا لصديقات العمل بجد أنا بعترف أنى مقصرة فى حقهم جامد بس مؤخرا ابتديت أرجع تانى لعاداتى معاهم ربنا يخليكم ليا


فرحت جدا بسبب قدوم كذا طفل لناس قرايبى ولصديقات ليا فى عام 2007 للدنيا


من بداية السنه لنهايتها وكل مده يجى طفل وطبعا ده شىء بيسعدنى جدا جدا وأنتهت أخبار الأطفال بخبر قدوم عمر الجميل


قدرت الحمد لله أمشى خطوات كويسة فى مشوارى فى الكتابة وبتمنى أحقق باقى آحلامى الخاصة بالموضوع ده

حاجة كمان فرحتنى جدا أن أهلى أخيرا عرفوا قيمة الحاجات اللى بكتبها وحسوا بقيمتها بسبب الموضوع اللى نزل ليا فى مجلة كملتنا لأن طبعا المجلات الألكترونية حاجة مش ملموسة بالنسبة لهم فماكانوش حاسين بيها قوى ولا بقيمتها ولكن بعد موضوع كلمتنا حسوا فعلا أنى بعمل حاجة كويسة وأنى عارفة طريقى كويس


بس لسة المدونة الحاجة الوحيدة اللى بعيدة عنهم وأكيد هيعرفوها أمتى بالظبط مش عارفة


بالنسبة لأحوال الدنيا وبلدنا أكيد الحاجات اللى مضيقانى مضيقانا كلنا ومفيش داعى لذكرها وبتمنى فعلا أنها تتغير فى السنه الجديدة

نفسى الناس تكون أحسن وتبطل سكوت وسلبية وأستغلال وطمع وجرح وغدر وخيانة ونفاق وكل الصفات اللى كلنا ما بنحبهاش

وأكيد عندى أحلام شخصية بس مش هينفع أكتبها وبتمنى أنها تتحقق

نفسى الناس تحب بعض بجد

نفسى ناس كتيرة تفهمنى بجد

نفسى أعمل حاجات كتير وبحاول أحققها على قد ما أقدر

نفسى أكون أحسن من السنه اللى فاتت فى كل حياتى

نفسى أقرب من ربنا أكتر وأكون أحسن من اللى فات

نفسى على السنه الجاية لو كان ليا عمر وبعد مرور سنه من عمرى وعلى مدونتى الاقى نفسى أتقدمت خطوات لقدام وحققت أحلام من آحلامى وأتغيرت حاجات كتير عن دلوقتى

نفسى مايكونش فيه حد زعلان منى فى أى حاجة ولو أنا عملت أى حاجة ضايقت حد ياريت تسامحونى

نفسى ناس كتير تفهمنى كويس

هاه تفهمنى كويس وتحس بيا وأكيد السطر ده بهدية ل 000000000 لأى حد طبعا

يالا كفاية عليكوا كده وكل سنه وأنتوا طيبين وسنه جديدة سعيدة عليكم

وكل سنه ومدونتى بكل خير يالا بهنى نفسى


والورد ده بهديه ل00000000 لأى حد برضة هو فيه أيه


وبمناسبة العام الجديد تم عمل مدونة جديدة للمدونة بسمه قصدى بوس بوس أنا يعنى يوه أستحملوها بقى أصلى هكتب فيها خواطرى

خواطرى

روحوا بقى شوفوا عدد يناير من مجلة على صوتك

----------------

معلش البوست كان طويل أنا كتبته على كام مرة وفى كذا يوم وفى الأخر الموضوع مش عاجبنى ماطلعش زى ما كنت عايزة بمعنى تانى مش عارفة أطلع اللى فى دماغى على العموم كل سنه وأنتوا طيبين وممكن تكون دى أخر مرة تشوفوا فيها حاجة ليا لية مش عارفة

12 comments:

عصفور المدينة said...

كل عام تدويني وأنت بخير

AHMED SAMIR said...

كل سنة وانتى طيبة يا بس بس
كل سنة ومدونتك الجميلة بخير
واوعي مدونتك تتحذف تاني بقى...خبطتين في الراس توجع
عموما مبروك المدونة الجديدة..وكل سنة والمدونة القديمة موجودة
ملحوظة:
ايه يا بس بس انتي فلوسك كتير ولا ايه؟...كل شوية تفتحي مدونة جديدة؟
تحياتي واحتراماتي

الحب واشياء اخرى said...

كل سنة وانت طيبة

مدونة اكثر من رائعة

تحياتى
على

بسمه عبدالباسط said...

عصفور المدينة


وأنت بكل خير وصحة
تحياتى لك

بسمه عبدالباسط said...

mustafa senalp

شكرا على كلام وبتمنى تكون فاهم المواضيع اللى بكتبها

تحياتى لك

بسمه عبدالباسط said...

a.samir

وأنت طيب وبكل خير
وشكرا على تلقيب مدونتى بالجميلة
هيا جميلة فعلا ولا دى مجاملة ؟
عايزة الصراحة
لا خلاص تتحذف تانى ده أنا كنت أروح فيها المرة دى
ربنا يستر وما يحصلش أى حاجة وتفضل موجودة
الله يبارك فيك وأهو بنجرب حاجة جديدة

ملحوظة
تصدق مش فلوسى اللى كتير أفكارى هيا اللى بقت كتير كل شوية عايزة أكتب حاجة طيب أعمل أيه قولى
مش عارفة فيه أيه بالظبط حصلى

تحياتى لك

بسمه عبدالباسط said...

love @ other things

وأنت طيب وبكل خير
وشكرا على كلامك أسعدتنى فعلا

تحياتى لك

Anonymous said...

كل سنة وانتى طيبة يا بسبوسة وعقبال 100 سنة

عاشقة الوطن said...

السلام عليكم

ازيك يابسبوس ياقمر

كل سنة ومدونتك وانتى بألفخير
سبحان الله اناوانتى تقريبا بدأنا التدوين سوا او فى توقيت متقارب يعنى ولادة مدوناتنا فى سن واحد

فعلا التدوين بيدى الواحد حاجات كتير بيديله انه يطلع اللى جواه انه يتكلم يعبر يقول عن اللى حسه
بس برضه زى ماانتى قولتى وانا عارفة ان مش كلاللى حاسين بيه هنقدر نقوله
ومش كل حاجة حوانا هنعرف نعبر عنها

وتقريبا انا وانتى فيه حاجة مشتركة بينا بس اكيد هنعرفها بعيدن وهنفهمها او يمكن احنا فهمنها

عالم التدوين من اجمل شئ
عرفت برضه ناس كتير وشوفت حاجات اكتر
اتعلمت
وناس عرفتنى
بدأت اعرف ان انا ليا رأى وناس كتير بتشاركنى ان كنت صح او حتى ان كان رأيي غلط

حبيت التدوين وحبيت ناس كتير مدونين

ربنا يخليكم ليا
ونفضل أصحاب على طووووووووول

كل سنة وانتى ومدونتك بالف خير يااااااااااارب
ويارب السنة الجديدة نقدر نعمل حاجات حلوة لان ربنا هيحاسبنا على كل سنة بتمر وان كنا عملنا حاجة فعلا وللا قاعدين وحاطين ادينا على خدنا

تحياتى ليكى يابسبوسة ياقمر وكل سنة وانتى طيبة

وكل سنة وانتى جميلةزى ماانتى

بسمه عبدالباسط said...

شيكابالا

وانتى طيبة وبكل خير

تحياتى لكى

بسمه عبدالباسط said...

عاشقة الوطن

وعليكم السلام
ازيك انتى وانتى طيبة وبكل خير
يعنى مدوناتنا كمان بدأت مع بعض وأنا بقول برضة فيه حاجة غريبة مشتركة بينا
فعلا الواحد بقى بيقدر يعبر ويقول اللى جواه براحته وكمان بيلاقى حد يشاركه ويتناقش معاه
وأكيد فيه حاجة مشتركة بس هعمل نفسى مش عرفاها لحد ما أعرفها منك ههههههههههه

وأكيد أحنا أستفدنا كتير من التدوين
وكل سنه وانتى طيبة وبكل خير

تحياتى لكى

نقطة مية said...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم