Sunday, December 16, 2007

عيد أضحى سعيد عليكم

كل سنه وأنتم طيبين وعيد سعيد عليكم كلكم
زى كل عيد لازم أتكلم شوية معاكم قبل ما نعيد كده وقبل ما أسافر سفرية كل عيد لبلدى علشان اللمة بقى والزيارات وزى ما أنتم شايفين الخروف اللذيذ اللى فوق ده مكتوب عليه أيه وبيوصيكم بأيه

قبل العيد أسأل عن الأهل والأصدقاء قبل أن تسأل عن الطعام

وده برضة اللى عايزة أتكلم فيه العيد أربع أيام ياريت يومين منهم يكونوا لزيارات الأهل والأصحاب والجيران والمرضى والأيتام ودور المسنين والحاجات اللى محدش بيعملها فى الأيام دى الا نادر جدا وهايتبقى ليكم يومين أتفسحوا زى ما أنتم عايزين فيهم مع أنى شايفة أن أحسن فسحة هى زيارة الناس وليها ثواب كبير جدا زى ما أنتوا عارفين
صلة الرحم هاه فاكرينها ولا أيه النظام

ياريت ماننساش صلة الرحم اللى هنتسأل عنها يوم القيامة مش عايزة أظهر بمظهر الواعظة وأعمل نفسى ياما هنا وياما هناك بس عايزة أقول لكم حاجة وياريت كل أسرة تربى ولادها عليها أنا من صغرى من يوم ما أتولدت وأنا عايشة فى مدينة بس أصلى واصل أهلى بلد أرياف أهلى عودونى من صغرى أننا كل عيد لازم نروح بلدنا ونزور الناس وأن أهم حاجة فى العيد قبل الأكل واللبس زيارة الناس والأهل والأصحاب والمرضى وكل حد نعرفه وأتربيت على كده من صغرى يمكن وأنا صغيرة قوى ماكانتش فاهمة معنى صلة الرحم كل اللى كنت بفكر فيه أنى هسافر بلدى وأشوف ناس كتير أزورهم ويزورنى والعب وخلاص لكن لما كبرت عرفت قيمة اللى أهلى ربونى عليه وأن ثواب ده كبير قوى فياريت كل واحد وواحدة يربوا ولادهم على كده
هو المفروض طبعا الناس تزور بعضها طول السنه بس نظرا للمشاغل الحياتية عند كل الناس لازم ننتهز فرصة الأعياد والأجازات ونعوض اللى ما بنعملوش طول السنه

فيه حاجة يعنى مضايقانى قوى من الناس مش عارفة أيه اللى بيحصل لهم فى عيد الأضحى كأنهم كانوا صايمين طول السنه وبينتهزوا الفرصة ويفضلوا ياكلوا لحمه كتير بطريقة مش طبيعية فيه ناس بجد بتفطر وتتغدى وتتعشى أصناف كتيرة من اللحمه
هو مش كفاية الغداء ولا أيه نظامكم
بجد حرام أنا لو عملت كده فى يوم ممكن أموت
فيه أيه براحة شوية على نفسكم الدنيا مش هتطير

-------------------------------
أيه تانى يا بوس بوس اه عدد جديد من مجلة نفسنا روحوا شوفوه وأستنوا مفاجأتنا العدد الجاى
العدد السابع

--------------------------------
خدوا بقى شوية رسايل الموبايل أفتكروا بيها أصحابكم وقرايبكم علشان الناس اللى ما بتكلمش بعض طول السنه وماعندهاش وقت خدوا شوية الرسايل دى

ناس تنتظر عيد الفطر وناس تنتظر عيد الأضحى وأنا أنتظر نجاحك كل لحظة

يارب عيد سعيد علينا وباب الجنه مفتوح لينا وملك الرحمه بينادى علينا والنبى مبتسم ورب العرش راضى علينا

رن يا موبايل وابعت مراسيل وعلى الحلو ميل وقول له عيد سعيد عليك يا جميل

أخاف الناس تسبقنى تهنى قلبك الطيب أريدك دايما متهنى وأشوفك كل عيد طيب

المرسل : واحد من الناس المستقبل : اعز واغلى الناس النص : عيد سعيد عليكم

وياريت تفتكرونى بكام رسالة حلوة
-----------------
وكل سنه وأنتم طيبين مسلمين ومسيحين وعيد أضحى وعيد قيامه سعيد عليكم

24 comments:

dr.Roufy said...

كل سنة وانتي طيبة ياقمر
وعيدك سعيد
:)

Unknown said...

أخاف الناس تسبقنى تهنى قلبك الطيب أريدك دايما متهنى وأشوفك كل عيد طيب



كل سنة وانتى طيبة

Ahmed EIssa said...

كل سنة وانتي طيبة
ويارب يكون عيد سعيد عليكي ان شاء لله

عصفور المدينة said...

كل عام وأنتم بخير
وجزاك الله خيرا على التذكرة بس برضه حافطر لحمة

أميرة said...

كل سنة وانتى طيبة يابوس بوس

وعيد سعيد عليكى باذن الله

انا مابفطرش لحمة الحمد لله

بفطر كبدة :P

احلى رسالة للى بعتيهالى ياقمر

سلاماتو

بسمه عبدالباسط said...

dr.roufy

وانتى طيبة وبكل خير

تحياتى لكى

بسمه عبدالباسط said...

واحد مش فاهم حاجة


وانت طيب
وشكرا على الرسالة

بسمه عبدالباسط said...

أحمد عيسى

وأنت طيب
وعيد سعيد عليك

بسمه عبدالباسط said...

عصفور المدينة

وانت طيب وبكل خير
وأفطر براحتك مقدرش أقول لك حاجة

بسمه عبدالباسط said...

أميرة ويلز

وانتى طيبة يا رشا
وعيد سعيد عليكى بأذن الله
كويس ان الرسالة عجبتك

تحياتى لكى

أفندينا said...

عيد سعيد عليك وعلى أسرتك وعلى أمة سيدنا محمد صلى الله عليه وسلم

الطائر الحزين said...

كل عام انت بخير

تيجى بس اللحمة وبعد كنا نشوف هنفطر ايه

تحياتى

سجدة said...

كل سنة وانتى بخير وسعادة والسنة الجاية كده بقه على عرفااااات قولى أمين

بسمه عبدالباسط said...

أفندينا

عيد سعيد عليك وعلى كل الناس
وكل سنه وأنت طيب

بسمه عبدالباسط said...

الطائر الحزين

كل سنه وأنت طيب
وعيد سعيد عليك

بسمه عبدالباسط said...

سجده

كل سنه وانتى بكل خير
وآمين يارب نكون السنه الجايه مع بعض على عرفات

mesh2dra said...

وانتى طيبة يا بسبس
وبالف خير وهنا
عيد سعيد

ذو النون المصري said...

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل
.........................

gohayna said...

كل سنه وانتي بالخير وصحه وسعاده
والعيد الي جايه تبقي في احسن حال ونعمه وفضل من ربنا ياجميله

تحياتي ليكي

Unknown said...

كل سنه وانتى طيبه يا بوس بوس
ويعود عليكى الايام بخير يارب

ايدك على العيديه
انا عاوزه حقى ناشف
يعنى حته لحمه محمره كده

بسمه عبدالباسط said...

mesh2dra

كل سنه وانتى طيبة وعيد سعيد عليكى

بسمه عبدالباسط said...

ذو النون المصرى

كل سنه وانت طيب وشكرا على القصيدة

بسمه عبدالباسط said...

gohayna

كل سنه وانتى طيبة وبكل خير
شكرا على كلامك الجميل

بسمه عبدالباسط said...

لماضة
كل سنه وانتى بكل خير
تعالى انتى بس زورينى واعملك كل اللى انتى عاوزاه