Sunday, September 23, 2007

خارج نطاق الأحساس وبرنامج جديد فى رمضان

يمكن أنا من قبل رمضان وماكنتش عايزة أكتب أى مواضيع غير عن رمضان والعباده ولكن ساعات بتحصل حاجات بتخرجنا عن الطريق اللى رسمناه وبرضة أنا فى البوست ده هتكلم عن حاجات متعلقة بالعباده بس فى الجزء التانى من البوست
----------------
مش عارفة ليه الناس دايما بتصر تجرح الناس اللى قدامها ليه مش بتراعى شعورهم
وفيه ناس كتير ما بتعرفش تفرق بين الصراحة وقلة الذوق وجرح مشاعر الناس
للأسف ساعات الواحد بيتحط فى موقف محرج وجارح جدا وتلاقى شخص ممكن ما يكونش ليك علاقة بيه فجأة يكلمك ويجرحك بكلام غريب وللأسف من دهشتك من الموقف ومن جرأته بتلاقى نفسك مش عارف ترد عليه ولسانك وقف والغريب ان الشخص ده بعد كده يقول لك معلش أصل أنا صريح ولكن ياريت نعرف الفرق بين الصراحة والجرح وقلة الذوق
------------------------------
هرجع بقى للمواضيع اللى بحب أنزلها فى رمضان
فيه برنامج حلو قوى وعجبنى جدا البرنامج أسمه على باب الجنه
وبيجى كل يوم الساعة 4 ونص قبل المغرب ياريت كلكم تتابعوه
لأنه فعلا حلو قوى
ودى المقدمة بتاعت البرنامج
البرنامج بيجى على قناه اقرأ وأسفة لأنى نسيت أكتب أسم القناه

--------------------------------

ياريت ما تنسوش الأقتراحات اللى أنا أقترحتها فى البوست اللى قبل اللى فات

والأقتراحات دى مكتوبة كمان على اليمين جمب البوست ده

وربنا يتقبل منا ومنكم ويبلغنا ليلة القدر

18 comments:

همسات ساكنه said...

بوست جميل جدا
فيه ناس كتير فعلا متقدرش تفرق بين الصراحه وانها تجرح غيرها
واعتقد ان ده بيرجع لاسلبوهم في الحوار
واكيد في اسلوبهم مع التعامل مع الغير
يمكن اللي بتقوليه مش خارج نطاق الحوار في رمضان لان مفروض في الشهر ده الناس تاخده كبدايه لاصلاح حياتها واصلاح تعاملها مع البشر
بالنسبه بقى للاقتراحات اللي قولتي عليها
يعني اقترح مثلا ان اكيد كلنا بنكون على النت لو مثلا حد عنده المقدره يدي ندوه او سمع برنامج بيتكلم عن موضوع معين
ممكن يتعمل زي محادثه كده جماعيه سواء على الهوتميل او الياهو ويتم النقاش في المواضيع دي
يعني مثلا اللي مش قادرين يساعدوا في شنطه رمضان
ممكن يساعدوا بعلمهم وفكرهم

KING TOOOT said...

زميلتي العزيزة
أنا يمكن مش بأعلق عندك كتير بس أنا متابع كتاباتك بإستمرار و الحقيقة البوست ده أستفزني أني أعلق عليه
شوفي يا ستي أنا حا اقول لك نصيحتين و بس
أولهم أنك ماتسمحيش لأي حد مالوش حق انه يتدخل في حياتك انه يبدي رأيه في اي حاجة بتعمليها غير لما تطلبي ده منه بشكل واضح ، و ثانيهم أن البني آدمين المتطفلين دول زي الذباب اللزج لو ماهشيتيهوش بسرعة حايلزق فيكي و مش حايمشي و حايعتبر نصيحته ليكي حق مكتسب و كمان شوية شوية حايبدأ يطالبك أنك تنفذيها و يزعل لو تجاهلتيها علشان كده مافيش غير حل واحد من الأول
خللي كلماتك ليهم اقوى من ريد و إيزالو
تحياتي
KING TOOOT

ياسر مدني ...دينامو الإخوان said...

أدعوكم للمشاركه وإبداء الرأئ في مسابقات الشعر وهي عباره عن خلق وصحابي ..ولا تنسوا
1-المشاركه
2-إيجابيتات
3-سلبيات
4_مقترحات

غمض عينيك said...

/معليشي بقا
في ناس كده
صراحتها عاملة زي القطر مابتقفش

كل سنة وانتي طيبة
:)

فى القلب said...

و هل يكب الناس على وجوهم الا حصاد ألسنتهم
ده بالنسبه للناس الى عندها قله ذوق فى معاملتها
الست حاجات يا قمر جارى تنفيذها
وحاضر هتفرج على البرنامج بس على قناه أيه

مدحت محمد said...

عندك حق فى ناس مدب
وفى ناس بتبقى قاصدة تجرح
وبتتلكك بالصراحة
وكمان ميرسى اوى على انك قلتى ميعاد
البرنامج الجميل ده
بس ياريت كنتى كملتى جميلتك وقلتى اسم القناة

Ahmed EIssa said...

زي مقلت قبل كدة
الوقاحة كنز لا يفني

حد متعرفيهوش قالك كلام جارح في لحظة مالهاش معني اديله علي دماغه تسكتي ليه؟؟؟

وبالنسبة للاقتراحات فربنا يقدرنا علي عبادات رمضان ومحاولة اصلاح الذات لان اقوي جهاد في الدنيا جهاد النفس

يلا سلام

تامر حسين said...

بوست جميل جدا جدا جدا
مستني الردود في مدونتي المتواضعه
تحياتي

بسمه عبدالباسط said...

همسات ساكنة

أهلا بيكى وسعيدة جدا بزيارتك
وفعلا فيه ناس ما بتعرفش تفرق بن الصراحة والجرح
ويمكن فعلا الناس لازم تتحلى بأحلى الأخلاق وخصوصا فى رمضان بس تقولى لمين
وأقتراحك جميل وممكن نطبقة كمان على مدوناتنا
تحياتى لكى

بسمه عبدالباسط said...

king tooot

أهلا بيك وأنا سعيدة جدا أنك شاركت بالتعليق وسعيدة أنك متابع كتاباتى
وبصراحة النصيحتين دول مهمين قوى وفى الصميم بجد
متشكرة جدا عليهم
بس المشكلة أن الموقف والمفاجأة ساعات بتخلى الواحد كأنه مغيب عن الوعى ومش عارف يتكلم
وشكرا لنصايحك مرة تانية
تحياتى لك

بسمه عبدالباسط said...

ياسر مدنى...دينامو الأخوان

أهلا بيك
وأن شاء الله هزورك
تحياتى لك

بسمه عبدالباسط said...

غمض عينيك

كلامك صح بس بيكونوا مش زى أى قطر
تحياتى لك

بسمه عبدالباسط said...

فى القلب

ربنا يهدى كل الناس
والبرنامج على قناه اقرأ
تحياتى لكى

بسمه عبدالباسط said...

moslim

مرحبا بيك وشكرا على زيارتك
وربنا يهديهم هنعمل ايه بس
ومعلش أنى نسيت أكتب أسم القناه وأنا كتبتها تانى وهيا قناه اقرأ
تحياتى لك

بسمه عبدالباسط said...

أحمد عيسى

شكرا على كلامك بس معلش الموقف كان مفاجأة
وربنا يقدرنا على العبادة ويهدينا كلنا
تحياتى لك

بسمه عبدالباسط said...

تامر حسين

سعيدة أن البوست عجبك
وأكيد هزورك وأعلق كمان
تحياتى لك

لسة نونة said...

فرق كبير بين الصراحة وقلة الزوق وقليل اللى يعرف كدة

كل سنة وانتى طيبة

تحياتى

بسمه عبدالباسط said...

لسة نونة

هو فعلا فرق كبير بس للى يعرفه
وكل سنه وانتى طيبة
تحياتى لكى