Saturday, July 14, 2007

كن صريح مع نفسك

مش عارفة ابدأ كلامى منين بقالى فترة طويل عايزة أكتب كلام كتير لكن كل ما أجى أكتب مقدرش أكتب ولا كلمه لحد ما قررت أكتب وأقول كل اللى جوايا واللى يحصل يحصل
فى الأول كده طبعا كلنا بقينا مدمنين للكمبيوتر والنت والمدونات والمجلات وغيرها وغيرها وبقينا بنقضى وقت طويل قوى على الكمبيوتر يمكن بقى نص يومنا أن ما كانش معظمة نت
عايزة اسألكم سؤال الوقت اللى بيروح ده سواء كان فى حاجات مفيدة أو لا مالوش ثمن ليه محدش حاسس بيه ليه مابقناش بندى لأى حاجة فى حياتنا وقت زى الكمبيوتر والنت لية بقينا منعزلين عن حياتنا الأجتماعية وعن كل حاجة وقاعدين جمب الجهاز ده بجد أنا مش لاقية أجابة
ما هو ممكن برضة نقسم وقتنا ونعمل كل حاجة ويكون من ضمن الحاجات القعاد على النت لكن معظمنا بقت حياته كلها على الجهاز ده
بقالى مده كبيرة بفكر فى الموضوع ده وبقول هو ينفع كده ماشى أنا ما بعملش حاجة غلط يعنى بتابع مدونتى وكمان المجلات اللى بكتب فيها بتابع الأخبار بتابع مدونات كتير يعنى من الأخر مابعملش حاجة غلط مش قاعدة مثلا على الشات بكلم ناس معرفهمش فى أى كلام وخلاص ولا بقعد كده من غير فايدة بس برضة مش مرتاحة الوقت الطويل اللى بقضيه على النت تاعبنى اليوم كله ضايع
طبعا ممكن حد يرد عليا ويقولى ما تقعديش كل الوقت ده هرد وأقول أننا كلنا بقى عندنا أدمان وكمان أنا عما بكتب مواضيع عما بلاقى أفكار عما بلف على المدونات والمواقع بلاقى الوقت طار
يعنى بقى تقسيمة يومى كده بصحى الصبح أروح شغلى أرجع أفتح الجهاز وأشوف أخر الأخبار على المدونة والمجلات أروح أنام شوية أقوم أكمل باقى اليوم على الجهاز وهكذ ا ويمكن أنا فى الفترة الأخيرة بدأت أبعد شوية عن الجهاز وأقلل ساعات القعده قدامه وأعمل حاجات تانية
طيب نسيب كل ده ونتكلم فى نقطة تانية دلوقتى الوقت ده أحنا مش هنتحاسب عليه أحنا مش عندنا دين وعندنا عقائد وفروض وحاجات لازم نعملها وأنا هتكلم هنا عنى نفسى كمسلمة أنا عن نفسى قبل ميعاد أى صلاه بشوية بقوم أتوضى وأرجع أقعد على الجهاز لو كنت بعمل حاجة مهمه عليه وبعدين لما ميعاد الصلاه يجى بقوم اصلى وشوية وأرجع للجهاز فيه ناس هاتقولى أنتى كده كويسة الحمد لله أنك بتصلى ماشى ما قلتش حاجة لكن هو ديننا الصلاة بس هرجع وأقول تانى طبعا مع الصلاه أو بعدها بسبح وأقول الحاجات اللى بنقولها وبقول أذكار الصباح والمساء لكن هل ده كافى كده يبقى خلاص
لا طبعا وطبعا أكيد فيه كتير بيعملوا زيى كده ماشى ولكن فين القراءن فين صله الرحم حتى لو بالتليفون فين زيارة المريض فين00 فين00
ليه ما بنفتكرش كل يوم نقرا قراءن ليه كل يوم ما بنسألش عن قرايبنا ولو حتى بالتليفون ليه ما بنزورش أى حد عيان ليه ما بنسألش عن صحابنا اللى برة عالم الكمبيوتر واللى قضينا معاهم أجمل سنين عمرنا
ليه ما نقسمش وقتنا لكل الحاجات دى صدقونى لو عملنا كده هنرتاح قوى وأنا بحاول أعمل كده وبدأت فعلا أقلل قعادى على الكمبيوتر وبدأت أرجع أكلم صحابى زى زمان بعد ما فضلت مده مقاطعة كل حاجة ومش عايزة حتى أتصل بحد على التليفون بدأت أرجع زى ما كنت زمان قبل الكمبيوتر والنت ما يضيعوا يومى
ياريت كلنا نفكرفى الكلام ده وياريت تكونوا أكتر صراحة منى وتقولوا بتعملوا الحاجات دى ولا لا
وفى الأخر أسفة أنى طولت عليكوا بس كان لازم أطلع كل اللى جوايا

44 comments:

Bossy said...

السلام عليكم

تم تقديم طلب احاطه لرئيس الجمهوريه وسمح باستمرار البقاء امام المدعوق
طبعا فهماني

اما بالنسبة للبوست
فاول نتفق علي الصراحه

انا من اسبوع بالظبط كنت بدخل نت حولي 8 مرات في اليوم
مبعملش اي شئ غير النت
ادمان بجد لدرجه ان ببقي عندي امتحان وتلاقيني علي االنت
وكنت كل مره بضيع وقت ياما وبلوم نفسي اوي علي الوقت دا
بس تعملي ايه طول ما انا مش لاقيه حاجه اعملها هقعد علي الجهاز
بببقعي عندي اكتئاب لو النت كان فاصل او الكمبيوتر بعيد الشر بايظ
بس دلوقتي بدخل قيل اووي ويمكن ظروف النت مسعداني علي دا
صحيح النت بجد عزلني عن الدنيا كلها
ولا بابا ولا ماما و لا اخواتي ولا اصحابي
انا في كوكب وهما في كوكب
يمكن انتي قدرتي ترجعي للحياه دي بس انا مش عايزه
اما الاستفاده
بستفيد بس طبعا جزء صغير اووي
اللي برحمني من الكمبيوتر الكتب
كان في كتاب لزكي نجيب محمود
بجد مكنتش بدخل نت نهائي لحد ما الكتاب خلص


طولت اووي انا عارفه
بس اخر حاجه هقولها
ان لو النت هيجي علي علاقتي بربنا وياثر عليها
انا هعمل كنترول علي نفسي ويولع النت بجد
دي مفهاش كلام
وبعدين بردهالواحد بيتعلم حاجات كتيره وبزود معرفتي بالدين من النت
مل شئ في الكويس وفي الوحش والانسان هو اللي بيختار
تحياتي لصراحتك يا بوسبوس
سلام

شفّاف said...

فعلا...

أحس إن المدونات أكلت أهدافي وطموحاتي وحياتي

أكيد سأعمل شيء حيال هذا
ومش ح سكت أبدا

سلامي لك

media said...

الموضوع دة مهم جدا
انا بحاول بقدر الامكان مخليش الكمبيوتر ياخد كل وقتي الحمد لله بصلي وبقرا قران على قد ما قدر بس

بس لما الواحد بيعد قدام الجهاز الوقت بيفوت هوي يعني ممكن اعد 5 ساعات دة الاول طبعا مش دلوقتي وقول ايةدة معقول اعدت 5 ساعات دلوقتي بعد متقطع اعد شوية واروح اعمل حاجة وارجع كدة يعني
واسيبك دلوقتي عشان قايمة اصلي قيام الليل

ibn nasser - ابن ناصر said...

انا وصلت للادمان فعلا

تحياتي

حواء said...

بسبس كلامك صح كتير فى ناس عندها ادمان الكمبيوتر مش نت بس لا جيم كمان انا شخصيا مش متواجدة كتير عشان فى جزء كبير بيضيع فى الشغل والبيت والاولاد ولازم اخلص كل ده وبعدين افكر اذا كنت افتح الكمبيوتر ولا مش مهم .. لكن وانا عالنت طبعا مش بنسى الصلاة دى فريضة لازمة علينا .. تحياتى

tamer afify said...

فعلا النت عمل هاله وهمية في تفكيرنا انه هوه كل حاجه وأعظم حاجه لكن الحقيقة انه دمرلنا اعظم حاجه وهيا التواصل الانساني بين البشر
التواصل اللي مش بالكيبورد وللا بالكومنت اللي بيحسسنا ان احنا عبارة عن ماكينات تتلقى الفعل لكي تقوم برد الفعل
اتمنى فعلا نعرف نقيم يومنا ونشاطاتنا بشكل سليم علشان منوصلش لمرحله اصعب من كده
تحياتي

أسوور said...

انا شخصيا بقيت مدمنة كمبيوتر ونت بالفعل
والكومنتات بتاكل دماغى والبوستات بتخطر فى بالى وانا سايقة العربية .. وانا فى السرير .. حتى وانا باستحمى
:)))))))

بس برضه بأزور أهلى
وبود اخواتى
وبأسأل على الكل بالتليفون
وبأفسح بناتى
وبأطلع للجيران وبيجولى

دة مايمنعش الإدمان لكن فعلا لازم يبقى فى حاجات تانية تدى حب للى حوالينا
تحياتى

Anonymous said...

جزاك الله خيرا على اللفته الطيبه دى انا عن نفسى قعادى محدود على النت لان ببقى عارفه انا عايزه ايه بعمله وبخلص على طول بس لو انا وبوسى فى شات بنسى الوقت

gohayna said...

بجد انا مكنتش فاهمه ان الموضوع النت دا كبير اوي كدا

بجد جبار

وعالم رهيب بيضيع الوقت بشكل مش معقول والله

حاجه فظيعه
ولذيذه في نفس الوقت

بجد كل الي قولتيه صح ميه في الميه

تسلم ايدك

وحشتيني يا جميله

تحياتي

mraghy said...

الكمبيوتر ادمان ، و النت ادمان

و اصعب شيئ في الادمان ده اننا بنبقا مش عايزين نبطله خالص

هو بيخلينا نبعد عن الاهل عن الاصحاب عن الاخوه و الاخوات

انا شخصيا كنت في فتره تحولت لمدمن بمعنى الكلمه يكفي اني اقولكم اني ما كنتش باقعد اقل من 12 ساعه يوميا

و يتحرق الشغل و يتحرق البيت و لا يهمني

لقيتني باضيع بابعد عن كل الناس

قررت فجأه اني اقلل عدد ساعات النت

و فعلا ربنا اكرمني و قللتها علي قد ما اقدر لدرجة اني حاليا مش باقعد قدامه غير ساعه واحده يوميا

حاولوا كده زيي و جربوا

تقبلي مروري

أنا حر said...

على فكرة الموضوع مش وحش قوي كده كل ما في الامر بس اننا مش بنلاقي حد نتعامل معاه بسهوله زي الانترنت محدش عنده استعداد انه يسمعنا أو يفيدنا أو يقعد معانا مده طويلة زي النت
اما بالنسبة لموضوع الدين ده ضروري طبعا بس زي مااالكمبيوتر قدر انه يحتل مكان كبير في حياتنا لازم احنا كمان نشوف حاجة قوية في الدين بتاعنا ليها نفس القوة في احتلال المكان ده
تحياتي

Anonymous said...

للاسف دى بقت مشكله معانا كلنا

ان النت و الكومبيوتر خدونا من اى حاجه فى حياتنا

بس لازم نحاول تعمل كنترول و نوفق بين كل حاجه
دراسه , حياه اجتماعيه و نت

و اهم حاجه انه مش ييجى على علافتنا مع ربنا

و بجد بوست هايله

شكرا

شيماء الجيزى said...

عارفه

انا يمكن معاكى شويه فى الكلام ده وكنت بفكر اكتب حاجه عنه
بجد بقيت مش عارفه اقوم اساسا من قدام الكمبيوتر
ومش علشان المدونه والى اساسا هى الى خلتنى بقيت كده
بس علشان انا بقى ليا شغل كتير اوى لازم اقعد اكتب فيه على الكمبيوتر

عارفه بالمناسبه
جهازى بايظ
وده عاملى مشكله المشاكل
مكنتش اعرف ان هيحصلى كده لما جهازى يبوظ
مكنتش اعرف انه بالاهمية الى تخلينى مؤرقه كده
وده لفت نظرى له كلامك
المشكلة انى مش بضيع وقت كتير او بقعد ارغى واعمل شات او حتى اقلب فى المدونات
انا بقيت بقعد اكتب شغل واعمله بس وقت كبير لدرجة ان حالتى الصحية تدهورت
مش عارفه اقولك ايه
بس انا فعلا حسه انى هقعد افضفض واقول كلام يمكن شبه كلامك او حتى له علاقه

بس لازم نبص للوقت والحياة
حياتنا
مش كلها نت وكمبيوتر

تحياتى يا بوس بوس

بسمه عبدالباسط said...

boosy

أكيد فهماكى وأنا أخدتها من قصيرها قبل ما يصدر قرار بأعتقالى
جميل تعليقك قوى وصدقينى جربى وهتقدرى ترجعى للحياه الطبيعية بتاعتنا
تحياتى لكى يا جميل

بسمه عبدالباسط said...

الشفافية

أكيد لازم تعمل حاجة وزى ما أنا قلت نحاول نقسم وقتنا وربنا يسهل
تحياتى لك

بسمه عبدالباسط said...

لولا

هو فعلا بياكل الوقت قوى الواحد ممكن يجى يقعد ويقول هعمل حاجة بسرعة بس بعد ما يخلص يبص يلاقى أنه قعد كام ساعة من غير ما يحس
تحياتى لكى وشرفتنى زيارتك

بسمه عبدالباسط said...

ابن ناصر

فيه ناس كتير وصلت وأنا منهم بس حاولت أبعد وقدرت بس لما بيكون عندى شغل لازم أقعد كتير
تحياتى لك

بسمه عبدالباسط said...

bocycat

كويس قوى أنك قدرتى تقسمى وقتك وطبعا البيت والشغل والأولاد أهم وبعد كده تفكرى فى النت وكويس قوى أنك بتلاقى وقت تقعدى عليه
وأكيد أنه لازم ما يأثرش على علاقتنا بربنا والا كنت كسرت الجهاز
تحياتى لك

بسمه عبدالباسط said...

tamer afify

فعلا لازم نرجع تانى للتواصل الأنسانى ومانسيبش النت والكمبيوتر يضيع أحلى العلاقات مننا
تحياتى لك

بسمه عبدالباسط said...

ياسمين

فعلا بقينا مدمنين قوى وكويس قوى أنك قادرة تقسمى وقتك كده ده شىء جميل جدا
تحياتى لكى

بسمه عبدالباسط said...

مؤمنه

جزاكى الله يا قمر كل خير على كلامك وزيارتك
وأكيد أنا عارفة القعدة اللى بتضيع الوقت وجربتها معاكم
تحياتى لكى يا قمر

بسمه عبدالباسط said...

علاء

ماشى هروح وأشوف
تحياتى لك

بسمه عبدالباسط said...

gohayna

أنتى اللى وحشانى أكتر
فعلا هو بياخد وقت كتير جدا
بس نعمل أيه لازم نحاول
تحياتى لكى

بسمه عبدالباسط said...

mraghy

هو فعلا أدمان وبيبعدنا عن الناس والتواصل ولازم فعلا نحاول نبعد شوية وكويس أنك قدرت وأنا كمان قدرت أبعد شوية
تحياتى لك

بسمه عبدالباسط said...

أنا حر

شكرا على مشاركتك وفعلا التواصل هنا له شكل تانى بس مش زى التواصل الحقيقى التواصل الأنسانى بعيوبه ومميزاته
تحياتى لك

بسمه عبدالباسط said...

مريم

فعلا هيا مشكلة حتى لو بنستفيد بس الوقت بيضيع هوا
وفعلا لا يمكن نسيبه يأثر على علاقتنا بربنا
تحياتى لكى

بسمه عبدالباسط said...

شيماء الجيزى

بجد مش لاقية كلام أعلق بيه على كلامك
الجميل ده وتعليقك بجد هايل قوى
وفعلا أنا كمان بقيت بعمل شغل بس المشكلة أن الوقت بيضييييييييييييييع
تحياتى لكى

Anonymous said...

السلام عليكم

عارفة يا بسبس
موضوع مهم اوى

وقفت مع نفسي
من فترة
ولقيت ان يومى كله نت

ومش حقولك مابقتش اكلم اقربائي
لا
انا بعدت عن ماما
واخواتى
قريبا كان يومى كالتالي

اروح الكلية ارجع منها اقعد لغاية معاد النوم
اصحى قبل معاد الصحيان عشان اقعد عليه
ادمان جدا
وتلاقينى اتنرفزت لما ما بيكونش فيه نت
و لا النت لما بيكون واقع
تحسي ان ناقصك حاجة
ومتنرفزة
وشغلي واقف
بالاضافة الي انك طول الوقت معندكيش وقت
ومفيش وقت للخروج
ولا انك تقضي يومك زى بقية خلق الله

ناهيكي بقى عن اضراره الصحية
والنفسية

يلا كفاية كد
عشان حقوم
اصل انا بقالي كتير قاعدة:)

سلاماتى يا قمر

عاشقة الوطن said...

ازيك يابسبس

والله عندك حق احنا كننا مخلصيين أكتر فى كل حاجة بتعملها قبل ادمان الكمبيوتر والنت

بس دلوقتى بنحاول نرجع تانى ونشوف احنا مقصرين فى ايه ونقدر نعمله ونرجعه من تانى

ربنا يقدرنا على اننا نغير من نفسنا الى الأحسن

تحياتى ليكى يابسبس ياقمر

Eman Eltaher said...

بوسبوس اللذيذة بجد الف مبروووووووووووووووووووك على النيولوك الجديد
مدونتك بجد رائعة
موضوكع جميل يا بوسبوس
فعلا الانسان بيضيع وقت كتير ف حاجات مالاش أهمية
لو ف القراية ماشى
زى قراية موضوعات المدونات التانية

بليييييييييييييييييز يا بوسبوس
طلب وحيد
عايزاكى تشرفينى ف مدونتى و تقفى جمبى م الغزو دهلانه الشباب بجد مبهدلنى و بيقوقلولى مفيش بنت واقفة معاكى و اتى لما هتقرى مضوعى بيتهيألى هتتفقى معايا فيه من غير مااطلب منك

شكرا يا بوسبوس
تحياتى

Anonymous said...

كلامك منطقى جدا
بس مش عشان الكمبيوتر بس
ماينفعش ان حاجه واحده تسيطر على كل حياة الانسان وتبقى هى شغله الشاغل
ربنا خلق اليوم 24 ساعه عشان يكفوا كل حاجه
عموما قرارك سليم وياريت تستمرى على خطتك دى

ريـــانه said...

كلامك صحيح وواقعي جداااااااااااا

أقلك حاجه بتضحك..انا كنت قاعده و بفكر أروح لواحده صاحبتي بقالي زمن مشفتها
وشويه وانا أقول لا بلاش أقعد أكتبلي كام بوست و مش عارفه ايه..

وانا بدور على حاجات في النت وقعت في البوست بتاعك ده

قعدت أضحك جه فوقتو
الظاهر حقوم من الجهاو و خلاص

بس بجد موضوعك مهم جدا والنت بيلتهم وقت الواحد وممكن يلتهم حياتو كلهاا

بيخلينا نفضل العالم ده الي ورا الشاشة على العالم الحقيقي

وده غلط طبعا و أكبر غلط ممكن يعملو أي حد ولو محاولش يسيطر على دخولو للنت

حيندم على الحاجات الي ضيعها فحياتو

ربنا يعينا بقا عشان نقدر ننظم الوقت و نعمل كل حاجه

عشان منندمش على حاجه

وآسفه على كلامي الكتير

sherif gharib said...

يا عزيزتى ما حدش بيروح للادمان اللا اللى عايز يروحله يعنى احنا قبل ما كل ده يدخل حياتنا كنا بنقعد نفس الوقت ده على شاشات التليفزيون و غيرها
بس هى المساله نسبيه يعنى فيه اكيد اختلاف بين كل واحد و التانى على اللى بيقضيه فيه
مثلا فتره الشغل اللى انتى بتروحيه اكيد مختلفه من شخص للتانى
و بالتالى ما اقدرش انى اعمم الموضوع
و اكيد طبعا انى معاكى اننا تركنا الكثير من الاهتمامات و الفروض علينا
اللى انتى ذكرتيها بس صدقينى السبب مش النت و البلوج و غيره
السبب جوانا احنا
تحياتى

دكتور مستكنيص said...

ازيك يافندم عاملة ايه
معلش والله علي الغيبة الطويلة دي والله امتحنات لسه مخلص اول امبارح
انا منستش المشروع بتاعنا بالعكس انا فاكره ومجهزله ولقيت منتديات مجانية بازن الله نبدا منها قريب لحد مانبدا نفهم الليلة نقوم عاملين بقي المتطور
هاوافيكي بالتطورات
تحياتي

بسمه عبدالباسط said...

mesh2dra

وعليكم السلام والله كل كلامك صح وياريت فعلا نقدر نتحكم فى نفسنا
تحياتى يا جميل

بسمه عبدالباسط said...

عاشقة الوطن

فعلا ما بقيناش مخلصين لأى حاجة بسبب اللى بنعمله ده ربنا يقدرنا فعلا ونقدر نغير من نفسنا
تحياتى لكى

بسمه عبدالباسط said...

eman eltaher

ماشى يا جميلة هجيلك هوا وهقف جمبك طبعا
تحياتى لكى

بسمه عبدالباسط said...

وينكى
فعلا اليوم 24 ساعة لازم نقسمهم ومانخليهمش لحاجة واحدة

تحياتى يا قمر

بسمه عبدالباسط said...

ريانة

شرفتينى وسعدت جدا بزيارتك
وبلاش تعتذرى بالعكس أنا مش ممكن أزعل من التعليقات اللى بتناقش مواضيعى حتى لو كانت طويلة
تحياتى لكى

بسمه عبدالباسط said...

sherif gharib

سعدت بزيارتك جدا جدا وشكرا على رأيك المهم
واللى صح قوى
تحياتى لك

بسمه عبدالباسط said...

دكتور مستكنيص

حمد الله على السلامة
وياريت فعلا تعرفنى باقى التطورات وأنا عندى خلفية بالشغل فى لوحة التحكم وهعرف أفيدك وأساعدك ياريت تبعتلى
سلام

غمض عينيك said...

عارفة يابوس بوس رغم ان متفق معاكي ان الكمبيوتر والنت بياخدوا الواحد من حاجات كتير الا اني بردو عايز اوضح ان في اوقات كتير بيكون النت هو الملاذ الوحيد ليكي انك ماتكونيش منعزلة عن الدنيا والناس
انا مواعيد شغلي متلخبطة بشتغل ايم والناس نايمة واكون نايم والناس صاحية باخد اجازاتي في ايم شغلهم واشتغل في ايام اجازتهم علاقاتي الاجتماعية معظمها من التواصل ع النت فعلا مش لاقي وقت اروح ولا اجي يدوبك اهلي و 3 او 4 اصحاب بشفهوم كل اسبوع او اتنين

النت والمدونات هي اللي مخلياني لسه عارف اتكلم في حاجة غير الشغل

تحياتي ليكي

محمد سمير

بسمه عبدالباسط said...

غمض عينيك

هو فعلا كلامك صح والواحد بيقدر يتواصل مع الناس عبر النت وكل واحد طبعا على حسب ظروفه وظروف شغله وحياته
بس كلنا متفقين أن الحكاية بتاخد وقت طويل
تحياتى

cuteE DOD said...

الفكره دى على طوول ف بالى
اشكرك ع طرح الفكره
فعلا عندك حق احنا بانا بنعبد عن الحياه وعن الناس لمجرد ان احنا عاوزين نستمتع بوقتنا
انا قعدت فتره طوويله جدا والكومبيتر عندنا ف البيت مش اقعد عليه غير فتره صغيره جدا
لكن السنه دى بقعد عليه اوقات زاهله
ولكن من نعم الله ..بادى الفروض
ولكن زى ما قلت مش بقرا قران باستمرار..

ولكن والله يعلم انى احاول ان ابعد ع قدر استطاعى..والدراسه كمان خلتنى اقدر اتمكن من الموضوع دا
والله المعين

تقبلى مرورى\\\\\\