اهو جه ياولاد

كل سنه وكلكم طيبين ورمضان كريم عليكم ويارب يكون أحلى رمضان وربنا يغفر لنا كلنا ذنوبنا ويعتقنا من النار ويكتبنا من أهل الجنة إن شاء الله

عمتو لأول مرة

أحساس غريب عجيب لأول مرة أحس بيه خلاص أخيرااااااااا بقيت عمتو ودى أول مرة هبقى عمتو بجد
يعنى بقالى سنين بسمع كلمة عمتو وخالتو من أولاد وبنات ولاد أعمامي وخالاتي ولكن المرة دى الكلمة مختلفة وليها فرحة تانية خالص

فرحة مستنياها من شهور وعمالة أعد في الأيام لحد ما تيجى

والنهاردة الأتنين 11 يوليو 2011 شرفت ( جاسمين ) بنت أخويا الدنيا وخلتني أحس بإحساس مش قادرة أوصفه كأن بنتي هيا اللي شرفت الدنيا

يمكن كان نفسي أبقى موجودة لحظة ولادتها ولكن للغربة أحكامها ومنتظرة بفارغ الصبر اليوم اللي هايجى فيه أخويا ومراته عشان أخطف البنت منهم ومش هسيبها وههريها لعب وبوس ودلع

وخدى بالك أنا ما بطلتش لف على محلات لبس ولعب الأطفال ومنتظرة ميعاد وصولك عشان أنزل أجيبلك كل الحاجات اللى عجبتنى يا روح عمتو بس قولى أنك جاية وهاتيجى تلاقى كل حاجة تحت أمرك

وصولك للدنيا له مليون معنى عندي ومش قادرة حاليا أوصف كل اللى جوايا

الفرحة اللى جوايا أكبر من أي كلام بس حبيت أنزل الكلام ده يوم ما تتولدى عشان لما تكبرى تدخلى تشوفي أنى كان نفسي أوثق كل حاجة حصلت من يوم ما جيتى للدنيا عشان تعرفي قد إيه بحبك وبموت فيكى

يالا بقى هسيبك ترتاحي عشان عارفة أنى دوشتك
نورتى الدنيا يا روح عمتو

جاسمين جت ، الدنيا لازم تنهد ، عشان قمر العيلة جه ونور ليالينا

الصبر

كتير بنمر بتجارب ومحن وحاجات بتكون محتاجة مننا شوية صبر والإيمان بقضاء ربنا
وكتير بتجيلنا رسايل ربانية تطمنا وتعرفنا انه مهما طال الظلم والبلاء أكيد هايجى يوم وناخد حقنا ونرتاح

يمكن ساعات بنغلط ونزعل لان حقنا لسة ما رجعش ولسة الظلم واجعنا ولكن وقتها لازم نفتكر أن ربنا كبير ومفيش حاجة بتحصل الا لما بنتعلم منها وأن ربنا مش هيسيبنا أبدااااااااا الا لما يريحنا ويعمل لنا الحاجة الكويسة دايما

{ وبشر الصابرين الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون }