Saturday, October 16, 2010

سنجل هانم أم الخير

اللى يتلسع من الشوربة ياكل أم على واللى يشوف سناجل الناس تهون عليه سنجلته

وبما أنى حسيت فى الفترة الأخيرة أن موضوع أرتباطى بقى مطلب شعبى قومى سوفسطائى ديمقراطى وكل شوية ومن كل ناحية وأتجاه الاقى أشياء وأشياء ومش عايزة أجيب سيرتهم لأنهم بيجوا على السيرة ربنا يجعل كلامنا خفيف عليهم فقلت لا بقى لازم أعمل وقفة ولا تقولولى وقفة العيد الصغير ولا الكبير لا دى هتبقى وقفة بوسبوس أيووووووووون خلاص بقى كفيانا هزار ندخل على التهريج

وبما أنى عتبت خلاص العام ال 27 ومعرفش ليه رقم سبعه ده مضايقنى قوى ما ينفعش نغيره أنا ماعنديش مانع أخليه 8 بس 7 ده مخلينى متوجسة خيفة

ولكن لكل سنجل هفوه وما يغركوش يعنى أن الواحد بقى مأصل فى موضوع السنجلة ده وخبرة وكده وبقينا بندى دروس فى تطفيش العرسان اللى عايزة أى درس تقولى وأنا تحت أمرها بس تجيب الأجرة الأول أيووووووون عشان نشتغل على مية بيضا ما هو محدش بياكلها بالساهل وما نجلكوش فى سنجل أبدااااااااا

وكله كوووووووووم وموضوع سنجل على الفيس توك ده كوم تانى لأن الموضوع كان بالنسبة ليا عاااااااااادى جدا ومش فارق معايا أكتب سنجل ولا لا ولأن الناس اللى عارفانى عارفين أنا سنجل ولا نو سنجل ولكن فى الفترة الأخيرة معرفش لية حسيت أن موضوع معرفة أنا سنجل ولا لا بقى مطلب شعبى قومى وكل شوية الاقى رسايل من عينة

أنتى سنجل ولا مرتبطة

أنتى سنجل ولا إيه

أنتى مخطوبة ولا مدام

أنتى مرتبطة يا أنسه ( مع علامة تعجب منى للجملة الأخيرة دى )

وكلام غريب عجيب ظريف لذيذ والغريب أن الاقى واحدة مركزة معايا قوى فى الموضوع ده ومع أنى تجاهلت رسايلها تماما بس هيا ما بتهمدش لدرجة أنى خفت منها وتوجست خيفة يجى للسنة الجاية كده وقلت فى عقل بالى تكونش جايبالى عريس ياللهول ولا تكونش هيا العريس ذات نفسه ولاقيت صوباعى الصغنطط الجميل ده بيجرى على الريموف والبلوك

نييييييييياها

ما أحنا لازم نحتاط برضك ومش أى حد يكلمكم تردوا عليه مش جايز ده فخ من الأعداء الشريرين ومش كل سنجل اللى يتاكل لحمه على فكرة بقى

وبعدين قلت ما بدهاش أنزل أنى سنجل بقى ما نشوف أخرتها إيه والغريب أن الرسايل اللى من النوع اللطيف وقفت من ساعتها يكونوش بيدوروا على الناس المرتبطة عشان يغرغروا بيهم وما بيبصوش للسنجل على أعتبار أنهم عوانس وبايرين وكدهوه وما هيصدقوا حد يعبرهم

ومن هذا المنبر بقولها نصيحة مش أى سنجل يقابلكم هيبقى واقع ومدلوق وهيموت وهيتجوز

ومش أى سنجل أتلسع من الزبادى قبل كده هيفكر يلغى سنجلته الا لما يستوكد من الأمر

ومش أى سنجل موجود على النت يبقى بيدور على حد يضيع سنجلته

ومش أى أى ولا زى زى

وبعدين بينى وبينكم كدهوه أنتوا هتستهبلوا ولا هتستهبلوا ما هو فيه ملايين الناس كاتبين أنهم سنجل ومن جواهم ما هماش سنجل أعتقد كلامى وااااااضح ومفهوم بس الحقيقة الحقيقة يعنى عرفت أننا ناس عبيييييييييييييييييييييطة جداااااااااااااااااااااااااا ومازالت نظرتنا للأمور محتاجة إعادة بناااااااااء يعنى غريبة قوى قبل ما فيه ناس تعرف أنا مخطوبة ولا متجوزة وكانت هريانى رسايل وأول ما نزلت سنجل ياعينى أتخرسوا ورجعت بقى النظرة للعنوسة والكلام العبيط ده

كانت معكم سنجل هانم أم الخير اللى الله أعلم هيا سنجل ولا لا أنتوا كنتوا دخلتوا جوااااااااها آآآآآه يا بشر عايزة الضرب بالنار

5 comments:

sony2000 said...

ياااااااااااربي
مايسيبوا الناس فحالها بقي
ايه البواخه دي
بكره المتطفلين اللي ذي دول بجد
وموجود منهم للاسف بكثره

همس الاحباب said...

ههههههه
البوست دمه خفيف
ويار يت الناس تتهد وتسيب الناس فى حالها
موضوع الارتباط ده قسمة ونصيب
بس الفاضى يعمل اكونت ويقرف السناجل الغلابة
ههههه
تحياتى

Ms3a_miso said...

خديها مني نصيحة من شب عشريني .. 100 سنة سنجلة ارحم من البهدلة

mrmr said...

بوست دمه خفيف وظريف
شكرا يا اجمل بوسبوس

غمض عينيك said...

بس اسه حكاية التوجس خيفة دا يابسمة
كتير كده ليه
:)
انتي مرتبطة؟

وحشتني تدويناتك والله

تحياتي ليكي
محمد سمير