Thursday, April 1, 2010

أشتغالات فون

كل يوم بنسمع عن عروض جديدة وعجيبة وكلها من الآخر مش أكتر من أشتغالة وتضييع لفلوس الناس وبس ولكن لأننا بنحب الأشتغالات لازم نجرب كل أشتغالة جديدة أمال إيه الناس تقول علينا جهلة وما جربناش كل شىء

أشتغالات فون طريقك الأمثل لعالم الأشتغالات

حلمك هيتحقق مع أشتغالات فون


مع خدمات أشتغالات فون نضمن ليك أكبر خدمة أشتغالات فى العالم كله



أستهبلنى شكرا :- خدمة جديدة لكل المستهبلين وأذا كنت من محبى الأستهبال
عليك الأشتراك بالخدمة اللى هتيح ليك الأتصال بأى رقم ما تعرفوش وتستهبل شوية وفى الآخر تقولة سورى أصل خدمة أستهبلنى ضافت ليا أرقام معرفهاش بس إيه رأيك تيجى نتعرف ؟

مع أستهبلنى شكرا أستهبل براحتك وأستهبلى براحتك وكله على حسابكم



أسرقنى من فضلك :- مع خدمة أسرقنى الجديدة هتقدر تخلى أى حد يسرقك فى أى
وقت ومن غير ما تحس كأنها شكة دبوس كده كل اللى عليك الأشتراك فى الخدمة وحتى من قبل ما تشترك برضة هيسرقوك وممكن تخلى كل أصحابك وقرايبك يشتركوا معاك علشان تبقى السرقة فى بيتها يعنى


رنتك من طلتك :- لكل محبى الرنات والنغمات والأستهبالات أبعتلنا صورة
حضرتك هنبعتلك رنة تناسب طلتك بس خد بالك لو لاقيت رنة نهيق حمار جت لك يبقى دى مش مسئوليتنا لأن الرنة بتتعمل على طلة حضرتك فى الصورة ولأننا أحسن ناس فى موضوع الصور ده وبيجيلنا شلل رعاش أول ما نقف نتصور فلازم الرنات هتطلع كالآتى كلب بيهوهو حمار بينهق عصفور كان نفسه يصوصو بس ياعينى لسانه وقف فى زوره

مع رنتك من طلتك أكيد أنت الغلطان حد قالك تبعت لنا طلتك البهية دى



أخطبنى بعد أذنك :- وأهم خدماتنا حاليا خط الخاطبة أم زغلول بأمكان كل
واحدة وواحد الأشتراك فى الخدمة وأن شاء الله قريب أم زغلول هتوفق كل خطين مع بعض

ويا يخت مين وفق خطين فى عدة واحدة ويا حبذا لو كانت صينى




أحلم ليا يسعدك :- مع خدمة تفسير الكوابيس هنقدر نفسر ليك كل آحلامك
وكوابيسك وكمان الجديد عندنا أننا ممكن نحلم لسعادتك لو مش قادر تحلم لنفسك سيب أمنيتك ونفسك تحلم بإيه والحلم هيكون جاهز فى خلال 63 ساعة


أكلنى شكرا :- أطلب أى أكل نفسك فيه وهيوصلك حالا فى رسالة ديليفرى مع أكلنى شكرا مش هنخلى فى نفسك أى حاجة



وده كان جزء من خدمات أشتغالات فون ونكتفى بهذا القدر لأنشغال الشركة بخدمة الأستهبالات الجديدة

2 comments:

NaiRa said...

طيب احجز مكان بقى

NaiRa said...

ههههههههههههههههههههههه بس يا بسمه والله فى خدمات بتفيد جدا يعنى مثلا فى خدمه سلفنى شكرا دى اى نعم بتسحب مننا زياده اكتر ما بيدولنا بس بتفك زقات ساعات والله وانا اول اللى بيصدقو وبيعملو الخدمات ههههههههههههههه
نايس بوست يا قمرايه