Monday, March 22, 2010

من الهسهس العيالى

بما أنى طول عمرى بحب الأطفال جدا وحتى وأنا كنت لسة عيلة كام سنه وبمشى بالعافية كنت أقعد العب بالعيال وسبحان الله فيه شىء ما جوايا وجواهم بيجذبنا لبعض حتى لو ما كلمتهمش أو كلمونى أى مكان بيكون فيه أطفال بيحصل أى نوع من أنواع الأنجذاب حتى لو كان مجرد نظرات وضحك وشوية حركات هبل وعبط منى ومنهم


وفى مرة شفت فيها طفلة وكانت مامتها وجدتها سايبنها جوه عربية الأطفال فى وسط المحل ومشغولين بالشرا وأول ما لمحت البنت عجبتنى جدا بس قلت أحترم نفسى أحسن يفتكرونى هخطفها ولا حاجة


أذ فجأة سمعت حاجات بتصوصو ورايا ببص الاقى البت عمالة تلاغى فيا والبت عسولة وعنيها خضرا وهموت وأبوسها بس خفت يلبسونى قضية


المهم صوصوت أنا كمان ليها وشاورت بأيدى وبصيت قدامى تانى أشوف هشترى ايه مع ماما وأسمع حاجة بتصوصو تانى


الله بقى


بصيت على البنت لاقيتها مصرة تلاعبنى أممممممممممم طيب إيه الحل لية بس الأغراء ده وشوية والاقيها بتشاورلى وفضلت أضحك لها وأشاور ودى مدت أيدها وعايزانى أشيلها


ساعتها شريط عقلى سف ورجعت فلاش باك لورا شوية وأفتكرت الأفلام العربى القديمة وأنى أول ما همسك البت هلاقى مامتها وجدتها اللى رامينها أصلا ومش واخدين بالهم منها يقولوا أمسك حرامى هتخطف البنت ويقولوا ليا آآآآآه أصلك بقى محرومة هتعملى إيه غير كده


وأذ فجأة ماما فوقتنى من الفيلم العربى ده علشان نخلص ونمشى وأنا خارجة بقى قمت رميت ليها بوسة على الهوا كفاية كده قبل ما كنت البس قضية


وبما أن عيلتى كبيرة ومتشعبة ومتفرعة وفيها كل الأعمار وكل اللى تتخيلوه فمن زمان بقيت خالتو وعمتو لأطفال ولاد وبنات أعمامى وخالاتى وأخوالى


وبقى أسمى بيتدرج بتدرج الأجيال وبدأ ب ( بسه ) أيون بيشيلوا الميم كتر خيرهم برضك تعبوا


وبعدين بقى ( بسنه ) ثم ( بييييييييييييييه ) وأخيرا ( ساسا ) والأخير ده عاجبنى جدا بصراحة وبفكر أغير أسمى وأخليه ساسا


والظريف بقى أنهم بيعرفوا ينطقوا خالتو أو عمتو بسهولة ولكن أسمى هو اللى بيقف فى زورهم مش عارفة لية ههههههههه


وهكذا بيفضل أسمى يتأرجح من هنا وهناك وكل كام سنة يطلع ليا أسم جديد


وأكتر لحظة بحبها قووووووووى أول ما أروح البلد عندنا وأنزل من العربية والاقى التتار جاى عمتو بسمه جت هييييييييييييه والكل يجرى ويتشعبط فيا وبعد شوية يتخانقوا مين يقعد جمبى ولحد ما أفض الأشتباك ده بكون تقريبا شبه فصلت منهم ويبقى حد قاعد على يمينى وحد على شمالى وحد متشعلق فى رقبتى وحد مرمى على رجلى دى والتانى بيزق بيحاول يدخل ويلحق له مكان بين التتار ده


وشوية ويعملوا عليا مؤامرات زى بتاعت التتار وأول ما أختفى من قدامهم يفرقوا نفسهم ويبدأوا فى البحث عنى

يدخلوا البيت يقولوا لماما هيا عمتو بسمه هنا


لا دى نايمة


نايمة بجد


أيوة


وطبعا ما يصدقوش وغالبا لازم يدخلوا الأوضة وأحس أن فيه حاجة بتخبط زى الفار كده من ورا السرير وفجأة الاقى اللى نطوا على السرير علشان يتأكدوا أنى نايمة


وأول ما يبدأو يعملوا شقاوة تبدأ التهديدات ليهم من أى حد موجود مش هنخلى عمتو بسمه تلعب معاكم


بس عمتو بسمه نايمة


بس هتقوم تضربكم


وطبعا طبعا باخد البيت والشارع كله جرى وراهم بعد أى مصيبة مدبرة من اللى بيعملوها بالأتفاق مسبقا مع بعض


بس فعلا هما بيخرجونى من أى مود مش حلو وببقى معاهم فعلا بسه وبسنه وساسا وخاصة ساسا دى


كانت معكم ساسا قديما بوسبوس من جنينة الأطفال بتاعت أم محمد من وسط جيش التتار

10 comments:

Lady E said...

الأطفال أحلى حاجه في الدنيا

وكمان احلى حاجه فيهم صدقهم وانهم بيحسوا بالحنيه والصدق في الأشخاص ومش بيروحوا غير للناس الجميلة أوي من جوه

ربنا يخليكي ليهم يا خالتو وعمتو ساسا :)

جنّي said...

السلام عليكم

جميل البوست وذكرياته .. واجمل ما فيه ان اسمك على اسم قريبة جدا لي بس بنقولها بسة بضم الباء وتشديد السين ( بوسّة ) ..

سلام

AHMED SAMIR said...

بجد احسدك على قدرتك على مداعبة الاطفال
انا عن نفسي بأحب الاطفال بس من بعيد لبعيد
ماستحملش اقعد مع طفل اكتر من 5 دقايق

إيناس حليم said...

هههههههههههههه
انتي عسل يا بسبس والله
تصدقي دايما بحس ان التعامل مع الأطفال صعب جدا وغالبا مش بعرف اتفاهم معاهم
بس بعد كدة هبقى اجرب طريقة الصوصوة دي يمكن تنجح :))

دمتي حنونة

بسمه عبدالباسط said...

lady e

فعلا الأطفال دى نعمة بجد وأحلى حاجة فى حياة أى حد

ربنا يخليكى يا قمرة

ايون كده اسمى الجديد بقى

ساسا

:))

بسمه عبدالباسط said...

جنى

وعليكم السلام

شكرا يا جميلة وسعيدة أن البوست عجبك

وعارفة ليا واحدة صاحبتى برضة بتقولى بوسة
:))

سلام يا قمرة

بسمه عبدالباسط said...

أحمد سمير

ربنا معاك بجد
بس لازم تتعود على موضوع الأطفال ده وإن شاء الله لما ربنا هيكرمك بأطفال هتلاقى نفسك مجبر تقعد معاهم وتلاعبهم وتعمل كل حاجة

بسمه عبدالباسط said...

إيناس حليم

انتى اللى قمرة وعسولة كمان

هو فعلا التعامل معاهم مش سهل بس لو فهمتيهم هتعرفى تتعاملى معاهم ببساطة وبسهولة كبيرة

هههههههههههههه
هيا فعلا الصوصوة دى بتعمل شغل جامد

:))

حنين الذكريات said...

السلام عليكم
أحلى عمر هو الطفوله الاولى
الاطفال بيكونوحلوين قوى مع أول نطق لأول حروف وأول خطوه ولما يتكعبلواويرجعو يقفوا تانى

ربنا يخليك ليهم وتفرحى بيهم
وربنا يكرمك بلاطفال اللى بتحيبهم

جنّي said...

السلام عليكم

على فكرة جنّي ( بتشديد النون )دا أسم المدونة .. اما اسمي فهو سعيد ..

ومعذرة في هذا اللبس