Monday, January 4, 2010

خيالى مع عدم الجاذبية النيوتينية


أذ فجأة وأنا قاعدة أمبارح على الجهاز وكل ما أروح لعمو جوجل الاقى تفاح عمال يقع هنا وهناك لحد ما الجهاز أتملى تفاح وبقيت حاسة أنى فى محل فكهانى وشوية وهنادى وأقول الكيلو بخمس ونص يالا تعالى بص طبعا خمسة ونص دة للصورة بس اللى على الجهاز ولكن الحقيقى أغلى من كده بكتير
وفجأة راح خياااااااااالى لبعيد وأفتكرت موضوع الجاذبية ونيوتن وسرحت قوووووووووى وتخيلت كده لو ماكانش فيه جاذبية والواحد يبقى طاير كده فى الجو ومش عارف يبثت على الأرض وتقريبا عشت جوه الحلم ده شوية ولاقيت نفسى طايرة فعلا ورجلى مش لامسة الأرض ولاقيت توابع كتيرة لموضوع عدم الجاذبية والطيران دة

هنلاقى الناس كلها عمالة تخبط فى بعضها بسبب وبدون سبب ومش هنلاقى أزمة مرورية بقى لأننا مش هنحتاج العربيات فى حاجة لأننا هنكون طايرين وساعتها هنستخدم الطبق الطائر
وبصيت بعيد شوية لاقيت عريس قاعد جمب عروستة فى حفل خطوبتهم وبدل ما يلبسها الدبلة لبس أختها الدبلة
وشوية ولاقيت واحد فى يوم فرحه وأذ فجأة وهو قايم يرقص مع عروستة الرقصة السلو لاقى نفسه بيرقص مع حماتة وجاتلة أزمة قلبية
وبعيد شوية واحد مع أبنه فى محل لعب بيشترى له لعبة وهما طالعين من المحل وبيمد أيده علشان يمسك أبنه لاقى نفسه طالع بعيل تانى وأم الواد التانى طلعت جرى وراه علشان تاخد أبنها وفجأة بعد ما وصلت لاقت نفسها كانت بتجرى ورا واحد تانى
وده واحد قاعد فى الأمتحان وبعد ما خلص وكله تمام بيسلم الورقة لاقى نفسه كان بيجاوب فى ورقة زميله وورقتة لسة فاضية
ودى واحدة بتنشر الغسيل فى البلكونة وبدل ما تحط المشابك على الحبل بتحطها فى دماغها
ودة واحد واقف مع صحابة على ناصية الشارع بيعاكسوا البنات وبيستعدوا لموسم التحرش بتاع كل سنة وفجأة لاقوا نفسهم بيعاكسوا أخواتهم البنات وساعتها تابوا عن المعاكسة والتحرش
واحد رايح يدى لحبيبتة وردة قام مديها لأمها وخدله الطريحة التمام
واحدة بتطبخ لجوزها جوزين حمام وبعد ما خلصت وبينادى عليها بيقول لها فين يا فوزية الحمام قالت ثوانى يا سى حنفى هحمره وأجيبه وبعد شوية الراجل بيبص من بلكونة بيتهم لاقى مراتة بتحط الحمام على سفرة جارهم
واحدة داخلة أوضتها تعمل تسريحة حلوة وتظبط شعرها بالسيشوار فجأة بتبص فى المراية لاقت نفسها ماسكة الخلاط وعملها أحلى تسريحة عفاريتى وجوزها مرمى جمبها على الأرض من الخضة
واحد كتب موضوع حلو قوى ولسة بينشره فى مدونتة قام نشره على حبل الغسيل
واحدة عملت كتاب وبعد ما نزلتة لاقت أسم صاحبتها هو اللى عليه

وبعد عشرة خماشر ساعة فوقت من الحلم ولاقيت نفسى بدل ما أكتب الموضوع فى الورقة كتبته على حيطة البيت ومنتظرة العلقة التمام

وبعد كل ده لاقيت نفسى صحيت من النوم بعد مفاجأة التفاح بتاعت أمبارح اللى خلت ساعتى البيولوجية جاتلها صدمة ونيمتنى تقريبا خماشر ساعة بحالهم وفوقت لاقيت التفاح فى مكانه والسرير فى مكانه وكل حاجة فى مكانها فقلت أكتب بسرعة قلت ما أدخل فى الغيبوبة من تااااااااانى

نييييييييييييييييييييييييييييييييياها

وكل سنة وأنت طيب يا عم نيوتن
اه صحيح الموضوع اللى فات ده أنا مستنية فيه رأيكم وأنا حذرتكم أهو مش لازم أروح لكل واحد مدونتة أقوله تعالى ياااااالا جاووووووب
عااااااااااااااااااااا

10 comments:

P A S H A said...
This comment has been removed by the author.
P A S H A said...

مســـاء الفـــل

بوست جميل بجد .. حلو قوي التخيل ده .. خلتيني سرحت بصراحة .

:)

تقبلي مروري وتحياتي وتقديري

سلام

بسمه عبدالباسط said...

pasha

بسم الله الرحمن الرحيم

هو أنت مش كنت علقت من شوية تعليق قبل ده

وأنا نزلتة ولسة بدخل من شوية أعلق ما لاقيتوش

هو فيه إيه ههههههههه

------------------------

مساء النور

شكرا شكرا مبسوطة أن البوست عجبك

وياترى بقى لما سرحت لاقيت إيه

تحياتى ليك

سلاااام

خواطر شابة said...

حلوة التجربة يمكن ساعتها الحياة حتكون أحلى
لا يوجد احلى من الانطلاق وسعة الافق
تحياتي لك

بسمه عبدالباسط said...

خواطر شابة

فعلا مفيش أحلى من الأنطلاق

نورتينى يا جميل

الشعب لابد له من حكومه تشكمه said...

انتى والصباغ وقع عليكو التفاح فى نفس ذات الوقت يامحاسن الصدف هههههههههه.
بس حلو البوست.
بقولك لازم نجاوب على الاسأله اجبارى يعنى؟؟

بسمه عبدالباسط said...

الشعب لابد له من حكومة تشكمه

ههههههههههههه

أيون يا بنتى توارد تدوينى بقى

:))))))))

وبعدين مين محاسن دى

هههههههه

أيون أيون لازمن ولابد تجاوبى على الأسئلة وعلى التصويت اللى على الشمال اللى قرب يصوت منكم ده

عاااااااااااااااا

أميرة الأحلام said...

بوسبوس ..
بوست جميل جدا
حلوه قوي التخيلات دى يااااااه
لو الي بتقوليه ده حقيقي
هههههههههههههه
تحياتى ليكى يا قمر

اعشق فى الليل ضوء القمر said...

اصل لو ريح دماغه نيوتن ده
واكل التفاحه وهضمها زى ما بيحصل
مكنتيش عشتى العيشه الغيبوبه دى
بس السؤال الجوهرى هنا
كانت تفاحه امريكانى حمرا ولا صفراء ياخوفى كانت تفاحه بلدى وقعت على دماغ نيوتن

بسمه عبدالباسط said...

أميرة الآحلام

ههههههههههههههه

اه احسن حاجة موضوع الطيران ده

يا سلام لو الواحد يطييييير

--------------------------

أعشق فى الليل ضوء القمر

هههههههههههههههههههههههه

مش عارفة بصراحة كان نوع التفاحة إيه