Thursday, January 7, 2010

عريس يا ماااااااااااى 1 : جواز المساطب

زى ما وعدتكم من خماشر موضوع كده أنى هعمل سلسلة مواضيع عريس يا ماااااااااااى وقد كان يالا بينا

عريس يا ماااااااااااى 1 : جواز المساطب


من ساعة ما وعيت على الدنيا وأنا أسمع الناس تقول جواز صالونات ومش عارفة الكلمة دى أصلها إيه وأشمعنى يعنى الصالون يعنى هو ما ينفعش جواز الكنب ولا المساطب

وفجأة لاقتنى بفكر كده من زماااااااااااااااان قبل ما تطلع الصالونات من أيام حواء وأدم كانوا بيسموا الجواز إيه ؟؟ ولاقيت أنه حصل تدرج فظيع للكلمة ومش بعيد بعد كام سنة نلاقى أسمه بقى جواز صواريخ وقعدت أتخيل مسميات الجواز وخيالى ودااااااااااااااااااااااااااااااانى الى


جواز الغابة

وده كان زمان قوووووووووى من أيام حواء وأدم لما كانوا عايشين فى الأرض وحواليهم الشجر والحيوانات وبيلبسوا ورق الشجر وطبعا كانت القعدة المفضلة للناس وقتها تحت الشجرة وعلشان كده الجواز أيامها كان أسمه جواز الغابة تلاقى الواحد قاعد تحت الشجرة وفيه واحد جاره تحت الشجرة اللى جمبه وزليخة بنت الراجل الأول بتعمل ليهم عصير توت لسة واخداه من على الشجرة طازة ويادوب بتقدمه لأبوها وللراجل الضيف اللى كان معاه أبنه أذ فجأة الواد تنح لزليخة وأبوة خد باله قام قايل لأبوها

مين دى يا نخلة

دى بنتى زليخة يا عنبة

طيب إيه رأيك نجوزها لأبنى وردة

بت يا زليخة إيه رأيك فى وردة يا بت

يوووووووووووة يا بابا كده تكسفنى وتخلى ورق الشجر يقع من عليا

خلاص طالما الورق وقع يبقى دى علامة القبول

زغرطى يا غصن بنتك أتخطبت لوردة

لووووووووووووولى ويا نخلتين فى العلالى يا بلحهم دوا وردة خضب زليخة وهيعيشوا سوا


جواز الخيمة

تلاقى الراجل رابط الجمل بتاعه وقاعد قدام الخيمة بتاعته هو ومراتة وبنته صحراء والبنت عمالة تحلب المعيز وقدام الخيمة التانية أبو تعلب قاعد ومعاه أبنه فهد والواد بيقول لأبوه

أبتاه يا أبو تعلب أنا أرغب فى الزواج من البنت صحراء

يا أبا صحراء نود زيارتكم فى خيمتكم اليوم لخطبة أبنتك صحراء لولدى فهد

بنيتى صحراء ما هو رأيك فى هذا الفهد

أبتااااااااااااااه عليك اللعنة أخجلتنى وتسببت فى وقوع لبن الماعز من هذه الشالية

مبارك عليكى بنيتى وقوع اللبن دليل على قبولك للزواج

أقيموا الأفراح والليالى الملاح أحتفالا بخطبة بنيتى صحراء لفهد ولد أبو تعلب

لووووووووووووولى مالى صبر يا ناس يا ناس دلونى صحراء بنت الناس خطفت عيونى


جواز المساطب

وبعد سنين وسنين والدنيا أتطورت أكتر وبقى الناس بيوتها بالطين وقدام كل بيت مسطبة وأتنين وأبو سريع قاعد قدام بيته على المسطبة ومعاه أبن جارهم محمدين وشوية وأبو سريع ينادى على بنته

بيت يا خاضرة هاتى أتنين شاى يا بييييييييييه وجهزلنا الغدا يالا محمدين هيطفح معانا

حاضر يا باااااااااااااااا

وتخرج خاضرة تودى الشاى لأبوها ولمحمدين وأول ما يشوفها محمدين تجيله حالة صرع وبعد ما تدخل خاضرة محمدين يقول للراجل

قالا قولى يا عم الحاج هيا خاضرة بنتك حد متكلم عليها

متكلم عليها ده أنا لو حد جاب سيرتها بكلمة أطلع بنطجيتى وأطخطخة طخيخ

لا يا عمى أبو سريع جصدى فيه حد قارى فاتحتها خاطبها

عااااااااااااا فهمت جصدك يا واد لا مفيش

طيب أنا عايزة أخطب خاضرة يا حااااااااااااااااااج

بييييييييييت يا خاضرة

نعم يا باااااااااااااااااااا

تعالى هنا يا بييييييييييييييييييييييييه

الواد اللى أتصرع من شوية ده عايز يخطبك قولتى إيييييييه يا منيلة

يووووووووووووووووووووه يا بااااااااااااااا لو مؤاخذة خضتنى وخليت عجين الفطير يجع عليك وعلى محمدين الهى ما يوعى ياكله

طيب على خيرة الله يا بت وجوع العجين دليل على الرضا والجبول

زغرطى يا ولية منك ليها خاضرة أتخطبت لمحمدين

لووووووووووووووووولى وأدحرج وأجرى يا رمان


جواز الكنب

وده لما الناس أتطورت شوية وبقت بيوتها بالطوب وأحلى حاجة بقى تبقى عندهم الكنب كام كنبة بلدى والعيشة زى الفل

أستاذ عبدالغفور موظف فى الأرشيف مربوط على الدرجة الخمسين وعنده كام بنت وولد حلوين وفى يوم زارهم أبن صاحبه فتح الباب مفتاح أفندى أصله معاه أبتدائية قديمة

يا بنت يا بثينة

نعم يا بابا

أعملى أتنين شاى ليا ولمفتاح أفندى ولا تحب تشرب قهوة

لا يا عمى متشكر جدا شاى كويس قوى وياريت يا مزمازيل بثينة سكر خفيف شاى خفيف مية خفيفة نار خفيفة

بعد شوية تدخل بثينة بالشاى اللى كل حاجة فيه خفيفة وساعتها تليفون البيت يرن وقام عبدالغفور يرد عليه من الأوضة التانية قام مفتاح أتكلم وقال

أنتى مخطوبة يا مزمازيل بثينة

أنا أنت بتكلمنى أنا

أيوة يا مزمازيل بثينة

لا لا أبدا

ولا حد متكلم عليكى

وفجأة يدخل عبدالغفور وتخرج بثينة جرى ويقوم قايل لمفتاح هيا مالها فيها إيه

بصراحة يا عمى أنا عايز أخطب بنتك بثينة

طيب يا بنى لحظة هروح لها أخد رأيها

بثينة يا حبيبتى أنتى عارفة أنك أغلى حاجة عندى فى الدنيا وأنى عمرى ما غصبتك على حاجة ودايما معودكم على الصراحة مفتاح أفندى طلب إيدك من شوية وأنا مقدرش أديلة كلمة الا لما أعرف رأيك جايز يكون مش عاجبك ولا حاجة

ولسة بثينة هترد

قام قايل لها وحياة أبوكى لو قولتى لا لهحبسك فى البيت ومش هتروحى تانى دروس التريكو اللى قرفتينى بيها تانى

لا يا بابا مش كده

أمال إيه يا بثينة قلقتينى يا بنتى خير

مفيش بس أنا

بس إيه

ويقع من فوق راسها الوردة الدبلانة اللى كانت حطاها فيها

هاهاها وقوع الوردة دليل على الرضا والقبول مبروك يا بنتى

زغرطى يا حاجة أم بثينة بنتك أتخطبت لمفتاح أفندى

لووووووووووووووووووولى ما تزوقينى يا ماما قوام ياماما ده مفتاحى هياخدنا على بيتنا قوام يا ماما


جواز الصالونات

وتروح أيام وتيجى أيام وكل شىء يتطور والناس كلها يبقى عندهم صالونات والصالون من دول ما يتفتحش الا للضيوف وبس وممنوع منعا بااااااااااتا أى حد يفتحه ولا يقعد فيه الا لما يبقى فيه ضيوف وخاصة لو كان عريس

ومن شوية سنين كان جواز الصالونات بسيط قووووووووى وناجح جداااااااااااااااااا وكنا كل شوية نسمع

لووووووووووووووولى بدنا نتجوز على العيد بدنا نعمر بيت جديد

ويا دبلة الخطوبة عقبالنا كلنا ونبنى طوبة طوبة فى عش حبنا

وتروح أيام تانية وتيجى أيام تانية ونوصل لأيام هيحصل فيها العجب

هنا شاهيناز قاعدة فى صالون بيتهم وفيه كام واحدة شكل ريا وسكينة عمالين يقلبوا فيها زى البضاعة يا عينى ويجيبوها من فوق لتحت ولا كأنهم رايحين يشتروا عروسة من محل لعب

وهنا فوفا قاعدة فى صالون بيتهم ومعاها واحد قيمة وسيما وحاطط رجل على رجل وفى وشها ومش هامه وعمال يتنفج ويتعنتظ قووووووووى وناقص تطلع له ريشتين من كتر الغرور

وهنا أسماء قاعدة فى أوضتها ومامتها بتقول لها يالا يا بنتى العريس قاعد هو ومامته بلاش تتأخرى وأول ما تدخل هوووووووووووووب أم العريس إيه يا غندورة مالك بتدلعى علينا كده لية هو أبنى فيه واحدة برضة تعمل معاه كده ده مفيش زيه ده وده وده

وهنا فوزية وفتحية رايحين يشوفوا ميادة وقال إيه لما أهلها سألوهم عن العريس ولية ماجاش قالوا أصله مشغوووووووووووووول

مشغووووووووووول يروح يشوف العروسة !!!؟؟؟؟

وهنا عباس قاعد فى صالون عدلات بيحاول يقنعها بمهاراتة الجبارة فى شرب الحشيش وعدم الصلاه أيووووووووووووون هو كويس وأخلاق بس زى كل الشباب بيشرب حشيش عااااااااادى فيه مانع وكمان ما بيصليش كل الفروض أصله لسة صغنون عنده 35 سنة بس لما يكبر شوية هيواظب على الصلاة

وملاااااااااااااااااااااااايين الحكايات والروايات اللى بتحصل فى جواز الصالونات

وهو ده التطور الطبيعى للجواز وهنشوف بعد كده هيتطور ويروح لفييييييييييييييييين

هنشوف بعد كده أخبار وحاجات تانية أنتظرونااااااااااااااااااااااااااا



10 comments:

P A S H A said...

:)

البنفسج الحزين said...

هههههههههههه
اسلوبك جميل ودمك شربات
استمري استمري يا بنتي عرفيهم القهر اللي البنات عايشه فيه منذ عصر الجاهليه...

صبرني يارب said...

العيب فى مين ؟؟

اكيد مش فى الصالون

الصالون زي م اانتى قولتي كان شغال ميت فل وخماشر

العيب فى الي داخلين الصالون

جميل اوي الصراحه التدرج بتاعك ده

يلا كملي بقى

خواطر شابة said...

ده بقى اللي بيسموه التطور الطبيعي للحاجة الساقعة

اقصوصه said...

المهم بالنهايه

بعد ما يتزوجون

بيستمرون مع بعض

والا كالعاده طلاق

لوووووووول

ghorBty said...

السلامـ عليكمـ

ما شاء الله

والله عندك حق

عجبني جدا الاسلوب في عرض الفكره

ومنتظره بقيت السلسله ان شاء الله

موفقه يارب

روح طفلة said...

ههههههههههههههه
موضوع دمه خفيف اوى
وبعدين دلوقتى فى جواز الماسنجر
ده التطور باه
ويجيبوا العريس والعروسه كل واحده على جهازه بالكام والعريس جمبه المأذون ابو شورت وفانله وكاب ويسالوا العروسه واهلها على المايك ههههههههه

بسمه عبدالباسط said...

pasha

هههههههههههههه
فعلا هو ده اللى ما قل ودل
:))

-------------------------

البنفسج الحزين

ههههههههههههههههههههه
شكرا يا جميل
وبعدين تفتكرى أن الكلام هيفرق معاهم

----------------------------

صبرنى يارب

ههههههههههه
فعلا العيب مش فى الصالون وده اللى كنت عايزة أوضحه بالمستخبى وفهمتينى انتى قوووووووووى

هكمل أهو لا تقلقى

:))

---------------------------

خواطر شابة

ههههههههههههههههههههه
أيون هو ده

-----------------------------

أقصوصة

ما هو البداية هيا اللى غالبا بتحدد النهاية

:)))

-----------------------------

ghorBty

وعليكم السلام
أهلا بيكى يا جميل نورتينى
وقريب هنزل الباقى

------------------------------

روح طفلة

هههههههههههه
مبسوطة قوى أن الموضوع عجبك

فعلا عندك حق

ده التطور الطبيعى

:))

همسات ساكنه said...

اللي بيحصل في جواز الصالونات هو اللي خلى الواحد ياخد عنه فكره وحشه
لكن اغلب الناس زمان كانو بيتجوزوا بالشكل ده
لكن بالذوق والاحترام
لكن الايام دي بنلاقي اللي رايحين يتفرجوا ع العروسه وكانها بيع وشراء واللي يدفع اكتر هو اللي يشيل
مبيعملوش حساب لمشاعر البنت ان ممكن الاسلوب ده يجرحها جدا
لكن منقدرش نحكم كده ع كل جواز الصالونات لان اكيد فيه منه كتيييييير نماذج ناجحة

بسمه عبدالباسط said...

همسات ساكنة

أكيييييييييييد كان زمان دى طريقة الجواز الوحيدة وكانت ناجحة جداااااااا

وفعلا الطريقة دى مش وحشة ولكن اللى بيحصل فيها هو اللى بقى بيسىء ليها جداااااااااااااااااااا

نورتينى يا جميل