Wednesday, November 12, 2008

هو صحيح الحب بيختفى

طبعا العنوان واضح منه أنى هتكلم عن الحب ويمكن أنا كل اللى أعرفه فى حياتى وجربته حب أهلى وأخواتى وأصدقائى ومعارفى وزمايلى ولكنى ما جربتش الحب اللى بيكون بين الراجل والست لأنى لا مخطوبة ولا متجوزة يعنى كان لازم أتكلم فى الموضوع ده وأخد آراء الناس اللى مجربين النوع ده من الحب
أيه السبب أنى هتكلم فى الموضوع ده بالذات السبب أنى واحدة صاحبتى كانت بتكلمنى فى التليفون وصاحبتى دى متجوزة من حوالى أربع سنين وعندها طفلة صغيرة وللعلم صاحبتى دى متجوزة عن حب بمعنى أنها كانت وواحد قريبها بيحبوا بعض جدا من أيام ما كنا فى الدراسة وأنا كنت شاهدة بصراحة على القصة دى ويمكن حصلت مشاكل كتيرة بين العيلتين بسبب الموضوع ده وكان فيه طرف مش موافق على الجوازة دى ولكن فى النهاية الموضوع تم وأتجوزوا لحد كده كل شىء ماشى كويس أيه بقى اللى حصل صاحبتى وهيا بتكلمنى سألتها عن بنتها ولاقيتها يا عينى بتلعن فى الجواز واللى عايزين يتجوزوا ويخلفوا قلت لها أنه مفيش حياه كلها وردى وحب فى حب وأكيد لازم يكون فيه مشاكل الحياه العادية بتاعت أى ناس لا هيا كلها سلام وحب ولا هيا كلها مشاكل العادى يعنى
لاقيتها بتقولى حب أيه أوعى تكونى فاكرة أنه بيكون فيه حاجة أسمها حب بعد الجواز الموضوع ده مالوش وجود قلت لها أزاى قالت صدقينى سواء كنتى بتحبى الشخص اللى هتتجوزية أو لا الكلام ده بينتهى بعد الجواز وبتبقى الحياه ماشية روتين ملل ولا فيه أى حاجة كويسة فى الجواز
بصراحة أنا أتصدمت من كلامها وحب السنين اللى كان موجود كل ده بيروح فين وحتى لو كانش فيه حب وكان الجواز جواز صالونات أكيد بتتحرك شوية مشاعر بين الأتنين كل ده بيروح فين
قالتلى صدقينى مفيش لاحب ولا أى كلام من ده المهم سألتها عن أختها اللى لسة متجوزة من فترة بسيطة قالتلى أنها كل يوم تتخانق معاهم وتقول لهم أنتوا أيه اللى خلاكم تجوزونى
يا خبر هو فيه أيه
وقالتلى صدقينى فى الجواز كل شىء بيتساوى اللى بيحب واللى مش بيحب ومفيش حاجة أسمها حب ولا رومانسية ولا أى حاجة كويسة فى الجواز هيا حياه روتينية مملة بنعيشها وخلاص
قلت فى نفسى أيه هيا الناس هتعيش مع بعضها شفقة يعنى لو مفيش حب حتى لو أتولد بعد الجواز أمال الناس هتعيش مع بعضها لية بيعذبوا نفسهم وخلاص ولا هيا بتتجوز علشان لازم تتجوز وخلاص
أنا عارفة أنه أكيد الحياه مابتكونش حب فى حب وكلام حلو ورمانسيات على طول وعارفة أنه أكيد لازم يكون فيه مشاكل ومنغصات كتيرة وأكيد دى الحياه العادية لكن حكاية أن الحب مايبقاش موجود وينتهى دى بجد مش قادرة أصدقها أمال أحنا هنعيش مع بعض لية لو ماكناش بنحب بعض أو لو ما حاولناش نحب بعض
ياريت حد يقولى الكلام ده صح ولا أيه هو فعلا مفيش حاجة أسمها حب بعد الجواز ولا فيه أكيد مش هيبقى ال24 ساعة حب بس مش هيختفى ولا أنتوا أيه رأيكم ياريت حد يقولى هل ممكن حب السنين ينتهى بعد يومين ثلاثة جواز زى ما صاحبتى قالتلى أنهم يومين ثلاثة وكل شىء بينتهى ولا ممكن الحب ده يستمر
وهل ممكن الناس اللى ماكانتش تعرف بعضها قبل الجواز تحب بعضها ويكون فيه شوية رومانسية بينهم
ياريت حد يجاوبنى ومش عايزة مثاليات أنا عايزة الحقيقة والصراحة

10 comments:

رئيس جمهوريه نفسى said...

ااقولك يا بسمة باختصار الحب دة عامل زى الطفل ممكن الطرفين يحافظوا علية ويكبر قدام عنيهم لو اهتموا بية وممكن جدا يهملوا فيموت ناقص عمر
قدام الامثلة اللى انتى قولتيها حقولك مثال من الحياة برضة واحدة وواحد اتخطبوا من وهما فى الكلية واهلها مفكروش حيجهز منين ولا قالوا حتجيب اية اتجوزو ست سنين وهى فضلت مخطوبة حوالى 4 سنين ومتجوزين ليهم حوالى 5 سنين يعنى 9 سنين من يوم ما اتخطبو لبعض ولحد دلوقتى عايشين بسم اللة ما شاء اللة عيشة في منتهى السعادة وكفاية انى اقولك مفيش يوم جاءت شكت وقالت قالى كلمة ولا زعق ولا عمل حاجة تضايق
فبقولك الحب مشئولية الطرفين ومش معنى انى قدامك نماذج فشلت يبقى الفشل نتيجة الكل لا النماذج دى فشلت لانها معرفتش تحافظ على حبها

بوبو said...

ازيك يا قمرة عاملة ايه؟
بصي انا هتكلم في الموضوع دا من ناحيتين.. ناحية شخصية وناحية دينية
اما الناحية الشخصية فهي اني متجوزة ويوم الخميس الجاي هكمل سنتين جواز وعندي عمر العفريت الصغير اللي انتي عرفاه ، وانا الحمدلله متجوزة جوزي عن حب ، وكنت خايفة الحب دا يختفي بعد الجواز ، لكن الحمدلله اكتشفت ان العشرة الكويسة بتزود الحب يوم بعد يوم.. اصل الحب بعد الجواز بيبقى شكل تاني غير قبل الجواز.. يعني قبل الجواز بيبقى كلام رومانسي وافعال واخدة برضه شكل وردي شوية ، انما بعد الجواز الحب بياخد شكل تاني.. لما يشيل معاكي طبق بعدما تاكلوا دا تعبير عن الحب.. لما تقعدوا تتفرجوا سوا على فيلم بالليل وقدامكم طبق لب.. دا حب .. لما تغسلي هدومه وتطبقيها وترصيها في دولابه وانتي مبسوطة انه اختارك من بين كل البنات تبقي مسؤولة عن شؤونه.. دا حب
الحب بتبقى تفاصيله كتيييييييير رغم صغرها
الحضن الحنين حب.. البوسة على الايد بدون مناسبة حب
دا من الناحية الشخصية
اما من الناحية الدينية فالرسول عليه الصلاة والسلام كان متجوز السيدة عائشة وبيحبها ، ولما سالوه عن احب الناس اليه من النساء قال: عائشة
يعني الحب موجود بعد الجواز ، المهم نحافظ عليه ازاي؟ الرسول عليه الصلاة والسلام قال: خيركم خيركم لاهله وانا خيركم لاهلي
العشرة الطيبة هي المفتاح ، وزي برضه ما الرسول عليه الصلاة والسلام قال: يا عائشة.. ذهب حسن الخلق بخيري الدنيا والاخرة
يعني اللي اخلاقه كويسه بياخد الخير كله في الدنيا وفي الاخرة
اطمني يا بنتي.. الحب موجود بشرط نحافظ عليه
اسفة اني طولت

محمد صبرى said...

هو المفروض إنه أغلب حالات الحب اللى شفتها و اللى سمعت عنها مكانتش ناجحة و مكانتش بتنمو مع الوقت ,بالعكس , و أفتكر إنه مش بس المحيط اللى بعيش فيه هو اللى بالشكل ده , لأنه المشاكل اللى بتواجه الحب فى بلدنا-على كثرتها- أغلبها مكررة فى شرقها و غربها و شمالها و جنوبها , فمثلا فى مشاكل بيبقى سببها انه اللى احنا عايشينه مش حب أصلا, يعنى ولد أو بنت فى مرحلة عمرية الطبيعى بتاعها انه يبقى فيه حد في حياة كل واحد فيهم فلو ده اتأخر شوية تلاقى البنت مثلا راحت موجهة كل مشاعرها ناحية أول ولد يقرب منها و يكون محقق الحد الأدنى من تطلعاتها فى فتى الأحلام لدرجة إنها ممكن يتهيألها أنها غرقانة فى الحب لمجرد إنه الشاب اللى قرب منها بكلمة لطيفة ده مقبول شكلا بالنسبالها ,و بتلاقيها بسرعة و فى وقت قياسى -مفروض إنه فى الأحوال الطبيعية ميسمحش إننا نعرف حد- كونت قناعاتها ناحيته و بقت خلاص شايفاه أحسن إنسان فى الدنيا أو ممكن خلينا نقول إنها فى الوقت ده بتكون بقت خلاص مش شايفة ,لكن الحياة مبتقفش عند حالة الهيام دى و لو مكنش حظها كويس و صادف إنه اللى توسمت فيه الخير ده أهل للخير مع الوقت بتوريها الأيام إنه الوهم اللى رسمته فى خيالها مش موجود , مواقف سلبية من الإنسان اللى افتكرت إنه مفيش زيه مرة ورا مرة ورا مرة بتفوق على صدمة و تلعن فى الحب و سنينه و تنسى إنها أصلا خدعت نفسها قبل ما تنخدع .و اتسرعت فى أكتر حاجة مينفعش فيها التسرع

اما الشاب بقى لما بيبقى محتاج إنه يعيش حالة حب و هو عارف انه الظروف حواليه متسمحش إنه يعيش حالة نقية صافية صادقة بجد فبيقرب و يقول بحبك , و على العكس من البنت لما بيقول الولد بحبك مبيبقاش مغيب بالكامل مبيحسهاش صادقة بجد نادر جدا لما ينخدع في كلامه الشاب , نادر جدا لما يكدب الكدبة و يصدقها , إنما كمان مبيبقاش فى كامل وعيه , الرغبة فى إنه يحب و الظروف اللى متسمحلوش يطور علاقة حب صادقة الاتنين سوا بيخلوه فى حالة بين البينين , يعنى بحبك آه , إنما أضحى عشانك لأ , موجودة فى حياتى جميل , مش موجودة مش هينتهى العالم , هتكملى معايا بشروطى آه , مش هتكملى أحب غيرك ,و ده كله لأنه الكلمة جت قبل معناها ,و لأن اللى بيقولها لكلمة مش مقصودة لذاتها , هى بس فى حياته لأن الحب يعنى بنت و الشيء لزوم الشيء

الحالات اللى فاتت دى لو كملت و وصلت لمرحلة الجواز بتنكشف بقى , لازم تنكشف و يظهر كل المستخبي , لأنه الجواز آه ممكن يمشى بالحب بس , بس الكلام ده لما يكون حب بجد حب فيه تفانى فى رضا الطرف التانى , أما بقى لو الحب مجرد سراب موهوم أو درجته أقل من درجة الفناء فى رضا المحبوب -إذا كان جائز تقسيم الحب درجات يعنى-يبقى الوصف الأصح ليه إنه مؤسسة إجتماعية مفيش مانع يبقى فيه قدر من الاحترام و المودة إنما لازم كمان يعامل معاملة أى مؤسسة , لازم يتعمله حساباته , لازم يبقى فيه دراسة جدوى , لازم يتعرف ايه هى احتمالات الربح و الخساره , لازم يتعرف ايه هى طاقة كل شريك متضامن فى العطاء و ايه هى قدراته على جبر الناقص عند الطرف التانى , اينعم يفترض فى اى شركة عايزة تنجح إنها بتبنى نفسها على أساس مبدأ الاستمرارية لكن النجاح بمفهوم أشمل بيبقى مع اللى بيعمل حساب احتمالات الخساره و ازاى لما تحصل يقلل خسايره لأقل قدر ممكن ,,,,


يعنى الحقيقة بصراحة يا بسمة إنه حب السنين ممكن ينتهى بعد يومين تلاته لو مكنش فعلا حب حقيقى , لأنه الحب الحقيقى بيتعرف من قدرته إنه يصمد قدام اى حاجة

و على فكرة اه ممكن يبقى فيه شوية رومانسية بعد الجواز , و ممكن حتى يتولد حب بعد الجواز , الحب ملوش معاد و ممكن يفاجأ اتنين اتجوزا جواز تقليدى انه كل واحد فيهم هو الشخص اللى حلم بيه التانى , بس فى الغالب مش ده اللى بيحصل

المشكلة فى اللى عاشوا سنين فى وهم اسمه الحب و لما تيجى المسئولية ميبقاش حد فيهم مستحمل التانى و لا قادر يكمل معاه و كمان لسه متصورين انهم كانوا عايشين حالة حب

صاحب المضيفة said...

الحب عمره ما بيختفي ولا حاجه

المشكل ان الحب بالمنظر ده هو اللي بيكون عرضة للتلف اكتر من اي نوع تاني

عندك النبي صلى الله عليه وسلم فضل يحب السيدة خديجة رضي الله عنها ام المؤمنين حتى بعد ما ماتت


مش معنى ان صاحبتك ربنا يعافيها ويعافينا مش مستقرة في جوازها انها تحكم بالشكل ده على كل حاجه

ده حكم جائر جدا


ربنا يسعد قلبك بحب طاهر وعفيف وشرعي يكمل معاكي للنهاية باذن الله

كل التحية

كراكيب عادل said...

ممكن يغيب ويرجع

اقوي زي الحبل المطاط لما يتشد بيرجع بقوة

smraa alnil said...

بصي يا ست البنات

الحب طبعا موجود

وهيفضل موجود

اجيبلك امثلة كتيرة
وفي زيها واكتر علي فشل الحب

مش عارفة هطول عليكي ولا ايه
بس هبعبع باللي جوايا


من حوالي 8 سنين

كنت ارتبطت بواحد
مش هنخش في تفاصيل ازاي ومنين وليه

المهم بمرور الشهور عشقته او اعتقدت اني بحبه جدا

فضلنا مع بعض حوالي سنة ونص مش كتير اي نعم وبرضه مش قليلين

وصدقته في كل كلمة وحركة وهمسة وحبه ليا

كنا بنتخانق زي اي حد وبنرجع تاني زي الكلاب لبعض

لحد ما اكتشفت انه بيتسلي بيا او بمعني ادق كان عايز ينسي حبيبته الاولي

وانتهت العلاقة بجرح كبير ليا منه

فضلت السنين اللي فاتت دي مش واثقة ان في حب

وانه كله بيتلاعب بكله


نيجي بقي للمفيد

انتي عارفة اني اتجوزت طارق عن حب

اه الحياة بتختلف شوية بعد الجواز

بس اختلاف كل واحد فيه قادر انه يتغاضي عنه او يعديه
تلات اربع مشاكل الجواز بتنحصر في ان الهدوم ليه مش نضيفة
او انتي مش بتهتمي بيا
او البيت مش معمول كويس

بس زي ما بوبو قالت

انه لما بيشيل معاكي طبق او بيفكرك بمعاد دوا
او يبقي متعصب لو انتي زعلانة او مضايقة او حتي مزعلاه

انه لمما تيجي تغرفي الاكل بتجيبياول طبقي وتغرفي ليه هو كل الحاجات الهايفة دي بتبقي حب كبير اوي

في ايام الخطوبة الحب بيبقي عبارة عن كلام
مسكة ايد بالجامد شوية

سرحان في العين
اشتياق للحضن
لكن بعض الجواز الحب بكون حب اوي

مشاركة بتنامي في حضنه
بتحضنيه
بتفرحي اول ما يجي من شغله

زي ما التعليقات عندك بتقول ان الاتنين لازم يحافظوا علي المشاعر اللي بينهم

جايز اكون لسة فترة جوازي مش كبيرة اي نعم بقالي 4 شهور متجوزة

بس بيبي في زعل

لما جوزي يحس اني مقصرة شوية في البيت
بيقولي كنتي بتعملي ايه من الصبح

الحور والصراحة هما اهم حاجتين في الجواز
وبيختف من فرد للتاني
مش كله بيبقي عصبي ومش كله بيبقي بارد
هي مساله نسبية

في ناس مش بتحب تبين غلطها

يعني مثلا انبارح اتفرجت علي يوميات ونيس لما جهاد غضبت وسابت البيت بحجة ان زكروتا جوزها اهانها

لما طلب منها تعملوا بتنجان علي العشا

جايز يكون موقف كوميدي
بس هو حقيقة وبتحصل كتير جدا

ان الزوج يطلب طلب من مراته وتقوله مش فاضية و اعملوا انت

او بتحس ان رغم مركزها وكيانها مش المفروض انها تعمل كدة
وفي نفس الوقت مش قادرة تعترف بكدة

الراجل بطبيعته بيزهق بسرعه

من المشاكل وهموم البيت

فلازم الست هي اللي تتغير

كلنا بنقول اشمعني احنا نتغير وما لا

بس صدقيني ان دايما الست هي اللي معاها مفتاح الحياة السعيدة

الا اذا ان الراجل اصلا ابن ستين في سبعين

او انه يكون مثلا زي ابويا

بس عارفة

انا عشان امي كانت بتتهان منه وبتسكت وانها مش كملت تعليمها لن هو امرها بكدة
وانها كانت ساكته علي حق كتير كان ليها

عشان كدة الحياة فشلت رغم قصة الحب النيفه اللي كانت بنهم واللي كانت امي هتنتحر عشان اهلها رفضوه في الاول

دلوقتي لما تشوفي مرات ابويا تحسي بجد ان ما جمع الا ما وفق
هي علي طول مش ساكتة ليه وممكن كمان تهينه ادام الناس وعشان يداري كسفته بيضحك علي ان اللي بتقوله دة هزار

ورغم دة بيحبها جدا ومش قادر علي زعلها

خلاصة الكلام ان الحب مش بيموت ولا حاجة
بس بياخد منحني تاني وشكل تاني غير اللي الواحد مستنيه


يعني انا مثلا بقول لجوزي انت ليه مش بتبعتلي رسايل زي الاول علي الموبيل لما بتكون في شغلك

كان رده
ان واحجنا مخطوبين كان بيفكر فيا علي طول وكان في احتمال انه مش يشوفني
فكان عايز يعبر عن اللي جواه

انما واحنا متجوزين

اللي جواه بيقولهولي لما بيشوفني

قالي
بيبقي جوايا حاجات كتير بحب اقولها ونتي في حضني او ادام عيني

ودة مش يمنع انه فعلا ببعتلي رسايل بس كل فين وفين

تععالي بقي بصي لاي بنت تانية هتقوله

انت اتغيرت ومش بقيت بتحبني

وممكن تعمل مشاكل

الفكرة انك تحترمي كلامه وتصدقيه

صدقيني لحب موجدود قبل وبعد الجواز

وبيزيد فعلا بعد الجواز

لدرجة والله ببوس رجل طارق من كتر حبي ليه حتي لو كنا زعلاننين من بعض

لما تعملي الاكل وتقفي في المطبخ عشان تعمليلو حاجة ياكلها وتروقي بيتك عشان يجي مرتاح بيبقي دة حب

لما بيقلق عليكي ويساعدك ويخاف عليكي وقولك البسي دة ومش تلبسي دة اصل دة ضيق او مش تفتحي الباب لحد او البسي عباية وانتي داخلة البلكونة دة مش تحكم دة حب واخلاص وغيرة

احنا اللي بنفسر الكلام غلط

جايز تكون صاحبتك غلطانة بس مش مبينة غلطها


عارفة

كان ليا واحدة من دفعتي مش شفتها من سنتين كدة

البنت دي ليها قصة حب سبع سنين
كان نتيجتها عبد الرحمن

وجوزها جاله عقد عمل في سلطنة عمان

هي قالت لا مش هسافر عشان ابني مش يتبهدل

لما يكبر شوية

قبلها لبست النقاب لانها تدينت بعد لجواز وجوزها كمان

لكن حست ن جوزها ابتدي يبص برة مع ان دة مش صح

يعني لما يقولها الطقم اللي البنت دي لابساه دة مش معناه انه معجب بالبنت
من الاخر هي قلعت النقاب ولبست لبس البنات ولمكياج بقي

طلب منها كتير تسافر ليه

ورفضت

بحجة انها حرة ومش لازم تبقي معاه
انت اشتغل ووفر فلوس وابعتها

وفي الاخر اطلقت

جايز برضه يكون هو غلطان بس هسيبك انتي تحددي مين اللي غلطان الاول

مش هطول عليكي اكتر من كدة قولي طولي

بس انا بحب جوزي اوي

والحب موجود

أمل حمدي said...

ازيك يا بوس بوس

موضوع جميل استمتعت بيه وبالردود كمان

المهم حبيبتي

الحب زي الاكسجين منقدرش نعيش من غيره

ممكن يجينا ضيق تنفس بس بنرجع نتنفس من تاني

اوصيكي وصية عيشي حياتك من غير تدخل الاخرين

دايما امسكي طرف الخيط واوعي تشديه على الاخر

حسي بالطرف التاني لو شد ارخي

صادقي زوجك وسامحي دايما

لو زعلتي منه في حاجة صارحيه بيها وقوليله دا بيجرحني

اوعي تغضبي وتسيبي حتى سريرك

لو خرج وهو زعلان لما يرجع اوعي تفكريه

خليه يحب بيته بوجودك فيه

اياكي والغيرة لانها موت مستعجل للحب وللجواز

وعلى فكرة مش كل جواز عن حب بينجح ولا كل جواز صالونات بيفشل

المهم احنا نراعي ربنا ونكون سكن ورحمة
وربنا هو الموفق

وقولي لصاحبتك تغير من نفسها قبل ما تشتكي

ربنا معاكي يا بوس بوس

momken said...

الحب رزق من الله
يزيد وينقص

يزيد الحب بلاهتمام والرعايه
وينقص بالاهمال والامبالاه

اما ان يموت الحب فلا اعتقد

لكنه يقتل ولابد ان يكون هناك قاتل

واده الجريمه غالبا الخيانه

البوست يدعوا لكثير من التفكير

دمتى مبدعه
تحياتى

hasona said...
This comment has been removed by a blog administrator.
cuteE DOD said...

انا سالت نفسى السؤال دا كتير ولكن فكرت ف نفس افكارك لو مفيش حب هنعيش ازاى ؟؟؟ازاى احب واحد يومين وف ثانيه اكره..لا طبعا ..وانا من راى انى حب اى اتنين زى حب اى حب
الحب الحب.ومش بيبص هو بين مين؟؟؟
وبعدين فيها ايه لو كان ف مشاكل ..لازم يكون ف مشاكل ف اول الحياه "الحياه من غير مشاكل ملهاش طعم"
وعمر ما ف حياه تسمتر من غير حب
ممكن نزعل مره واتنين وتلاته لكن ف الاخر هنفضل نحب بعض ونعيش لبعض..واستحاله حب السنين يضيع ف يوم ولا اتنين ابدا

\\\\تقبلى مرورى